|
|
 بيان جديد للحزب الشيوعى..(ترضية للأخوان والصحبان الزعلانين)
|
جماهير شعبنا السودانى
فى الريف
والمدن
جموع الفلاحين والعمال
يمهل ولايهمل..يوم أمس جات الطيارات الأسرائيلية وأدبت لينا الجماعة ديل أدب شديد وعدمتهم نفاخ النار نعم لقد روعت المواطينين وقتلت أبرياء لكن كلو بسببهم لأنو نحن زمان قلنا ليهم ماتتشوبروا وتدعموا الأرهاب وحماس وناس حزب الله ونحن ماعندنا قدره على أسرائيل قمتو جبتوها لينا بالتِشبر بتاعكم ده , ولقد ظلننا ننادى منذ فتره بأن يتم تحويل هذا المصنع لمصنع مويه أو أيسكريم لكنكم بغباء تناسيتم مطالبنا..
أننا فى الحزب الشيوعى السودانى نعبر عن بالغ سعادتنا لهذا القصف والدمار الذى حاق بمصنع الكيزان ونطالب المواطنين بأن يطنشوا من قصة أنو فى طيران دولة جا وقصف المصنع لأنو أصلاً نحن ماكان عندنا سيادة عشان ندافع عنا البلد فاتحه شوارع والشعب قاعد فى الشوارع دى مقهى وبياكل فى قصب سُكر تجى طياره أسرائيلية يقول ااامك أسرائيل يجوا المارينز ديشااااك المارينز يجوا الأيرانيين أبوالزفت الأيرانيين بعاين ساى ونحن طبعاً مسئوليتنا التاريخية هى فى حدود (معاينتو) دى مابنفوته شبر,.. وزى ماقالوا فى الأمثال( العفش على مسؤولية الراكب) الوطن هنا بكون على مسؤولية السواق يعنى لوضاع ولاأنضرب نمش نمسك فوقوا ونقول ليه نحن قاعدين فى أمان الله بعد ماقرينا دعاء السفر وبنحضر لينا فى فلم هندى وبنحلم بالوصول لمحطتنا..نجى نفتشوا نلقاها راح ولاناقص ليهوا أقليم اقليمين وخمسة كراتين وباقة, وتجى برضو تقول لينا وطنيتكم راحت ..وتسأل كمان أنتو ليه ماكنتوا بتجو مره مره تتبنوها عشان تتأكدوا أنها قاعده مع العفش,
المصنع حق الدولة
والأسرائليين أصحاب الحق
وكانو حداشر رباطية
ومامعاهم ولا فد نوباوية
ويابوليس ماهيتك كم..
(شعر ثوري)
المجد لأبنا شعبنا
فالنسقط نظام البطش والتجويع والأرهاب
ماخسانا بفلسطين ولاميتين زاتو..
تحت تحت (التحية لأسرائيل)
----
أراهن أنه لوكتب الحزب الشيوعى بيانه بهذه الصيغة سيعلن البعض أنه أعظم بيان فى تاريخ الحزب الشيوعى
|
|
 
|
|
|
|
|
|
|
|
Re: بيان جديد للحزب الشيوعى..(ترضية للأخوان والصحبان الزعلانين) (Re: DKEEN)
|
الحيثيات شنو الخلتك تمنحي الشيوعي الافضلية ؟
في تقديري وليس لانني (اتحادي) افضلها هو الحزب الاتحادي لانه الاقل اضراراً بالسودان وليس لأنه الاكثر نفعاً للسودان ...
سلامات يا جنابو ..
كل زول يعجبو الصارو
مع إنو كان جينا للجد أنا ما صارة الحزب الشيوعي بالمعنى الرسمي ..
الحزب الشيوعي أفضل السيئين يا عمر
لو إتغاضينا عن الأسباب التقليدية والكلام المكرر من جهة إنو ما حزب ثيوقراطي/طائفي
وإنو قدم فكر مختلف إرتقى بوعي السودانيين
وقدم قيادات بقت رموز ملهمة لكتيرين جات من قلب الشعب مش أنا الرسول جدي وأنا الله والرسول جوني بين اليقظة والأحلام وقالوا لي
أفضلية وعظمة الشيوعي بتجي في نظافة يد الحزب وقياداتو
وبعدهم عن شبهات الفساد المالي والجشع وحب الرفاهية المصاحب لباقي قيادات الأحزاب الأخرى ودي البتهمني كمواطنة عادية
عندو عيوب؟
أيوة عندو
لكنها ما بتجي حاجة جنب باقي الأحزاب الإنتهازية ناس كلا ونعم الباعت ولازالت تبيع في الشعب وتشتري بي اسمو مقابل منصب وكرسي
نحن ربنا إبتلانا على مر العصور بي حكومات كارثية وأحزاب معارضة وإتلاف أكثر كارثية
لمن أقوم أعتبر الحزب الشيوعي الماعاجب تلاتة أرباع الناس دا كأفضل حزب معناها باقي الأحزاب راقدة خيت (ودي الحقيقة)
بحاول أرجع لمواصلة الهتاف لو ما سيدنا حاتم أدانا طردة 
هوي يا حاتم الياس
ارفع يدك عن الحزب
سيادة بتاعة فنيلتك؟
| |
|
|
|
|
|
|
|
|
Re: بيان جديد للحزب الشيوعى..(ترضية للأخوان والصحبان الزعلانين) (Re: تيسير عووضة)
|
Quote: كل زول يعجبو الصارو
مع إنو كان جينا للجد أنا ما صارة الحزب الشيوعي بالمعنى الرسمي .. |
والله ياتيسير انا الصاريهو زاتو ما عاجبني لكن بفتكر انو هو الاقل اضراراً بالسودان
حيث لا نفع في جميع الاحزاب ........
Quote: وقدم قيادات بقت رموز ملهمة لكتيرين جات من قلب الشعب مش أنا الرسول جدي وأنا الله والرسول جوني بين اليقظة والأحلام وقالوا لي
أفضلية وعظمة الشيوعي بتجي في نظافة يد الحزب وقياداتو
وبعدهم عن شبهات الفساد المالي والجشع وحب الرفاهية المصاحب لباقي قيادات الأحزاب الأخرى ودي البتهمني كمواطنة عادية |
بتفق معاك الى حد كبير لكن ما بتتفقي معاي انو المحك الحقيقي لاختبار هذه الصفات هو السلطة ...
بمعني ان الشيوعي لما تتاح له فرصة كاملة لممارسة السلطة حتى نمتحن قادته ومدي مطابقة اقوالهم لافعالهم
وان كان الكثيرون يحملون الشيوعي ما حدث من نميري في ايامه الاولي المصادرات والتأميم والتطهير .... الخ
| Quote: نحن ربنا إبتلانا على مر العصور بي حكومات كارثية وأحزاب معارضة وإتلاف أكثر كارثية |
أو كما قال الراحل العزيز (حميد)
حيكومات تجى
وحيكومات تغور
تحكم بالحجى
بالدجل الكجور
ومرة العسكرى
كسار الجبور
يوم باسم النبى
تحكمك القبور
| |
|
|
|
|
|
|
|
|
|
Re: بيان جديد للحزب الشيوعى..(ترضية للأخوان والصحبان الزعلانين) (Re: كمال عباس)
|
كتب الأخ عمر عثمان
| Quote: وان كان الكثيرون يحملون الشيوعي ما حدث من نميري في ايامه الاولي المصادرات والتأميم والتطهير .... الخ |
الغريبة أن نظام مايو كان يأخذ علي الحزب الشيوعي عدم تأييد قرارات التأميم والمصادرة وبالفعل هناك بيان من الحزب الشيوعي أدان فيه التأميم وكذلك وقف ضد كثيرا من توجهات مايو ,, ولكن فلنكن موضوعيين ونربط الأسباب بالنتائج :-
الحقيقة أن الإنقلاب علي الديموقراطية تم يوم بلعت احزابنا الوطنية طعم جبهة الميثاق الإسلامي وتأمروا علي الحزب الشيوعي وطردوا نوابه من البرلمان وكانت الطامة الكبري هي تغول الحكومة الديموقراطية علي إستقلال القضاء - ** فقد أفتي القضاء السوداني بعدم دستورية حل الحزب الشيوعي وعدم شرعية طرد نوابه وكا ن علي الحكومة الإستجابة للحكم القضائي - وبهذا يكون قد تم نسف نظام ومبدأ فصل السلطات الثلاث- تشريع - قضاء- تنفيذ والتغول علي إستقلالية القضاء وخرق الدستور مما يعد إنقلابا مكتمل مكتمل الاركان علي الديموقراطية وديكتاتوريةمدنية تسربلت بالدين مماقاد لإنقلاب مايو - وقد أدي هذا الوضع والموقف من مايو لصراع وإنقسام في الحزب الشيوعي -أنا شخصيا ضد الإنقلاب من حيث المبدأ ولكن أفهم السياق والظرف الذي جري فيه - وأعي أن إنقلاب مايو كان نتيجة لاسبب
* عموما يتحمل الحزب الشيوعي تاريخيا مشاركة بعض عناصره في مايو وتأييده لبعض قراراتها .. وقد دفع ثمنا باهظا لذلك وتحول لأشرس
المعارضيين لنظام مايو...
** بالنسبة للحركة الإتحادية والحزب الاتحادي فهو حزب الحركة الوطنية وهو ميزان الاعتدال والتسامح والتعائش وسيظل صمام أمان لوحدة وإستقرار البلد متي مارجع لمباديئه وثوابته التاريخية * ومتي عاد لقيم المؤسسية وأشاع الديموقراطية في هياكله وسمح بتواصل ا الأجيال وتداول القيادة وسار علي خط الشريف حسين الهندي ومبدأ فصل الدين عن الدولة ووضع مسافة ومساحة بين الطريقة الصوفية والمؤسسة الحزبية ومتي مانأي الحزب بنفسه عن المشاركة في الانقاذ وعاد لنبض جماهيره وأقام مؤتمره وبني مؤسساته الحزبية,,,,,,,,,
| |
|
|
|
|
|
|
|
|
 Re: بيان جديد للحزب الشيوعى..(ترضية للأخوان والصحبان الزعلانين) (Re: كمال عباس)
|
Quote: وإنو قدم فكر مختلف إرتقى بوعي السودانيين
وقدم قيادات بقت رموز ملهمة لكتيرين جات من قلب الشعب مش أنا الرسول جدي وأنا الله والرسول جوني بين اليقظة والأحلام وقالوا لي
أفضلية وعظمة الشيوعي بتجي في نظافة يد الحزب وقياداتو
وبعدهم عن شبهات الفساد المالي والجشع وحب الرفاهية المصاحب لباقي قيادات الأحزاب الأخرى ودي البتهمني كمواطنة عادية
عندو عيوب؟
أيوة عندو
لكنها ما بتجي حاجة جنب باقي الأحزاب الإنتهازية ناس كلا ونعم الباعت ولازالت تبيع في الشعب وتشتري بي اسمو مقابل منصب وكرسي |
والله شر البلية ما يضحك ...
فكر؟
نضافة يد؟
بعد عن:
1- شبهات الفساد المالي؟
2- والجشع؟
3- وحب الرفاهية؟
الحزب الشيوعي؟
زول يمشي يصحّي ليّ عادل عبدالعاطي ...
غايتو انا بعمل فيها انك ما جادة يا تيسير عووضة ...
... المهم ....
| |
|
|
|
|
|
|
|
|
|
Re: بيان جديد للحزب الشيوعى..(ترضية للأخوان والصحبان الزعلانين) (Re: تبارك شيخ الدين جبريل)
|
Quote: والله شر البلية ما يضحك ...
فكر؟
نضافة يد؟
بعد عن:
1- شبهات الفساد المالي؟
2- والجشع؟
3- وحب الرفاهية؟
الحزب الشيوعي؟
زول يمشي يصحّي ليّ عادل عبدالعاطي ...
غايتو انا بعمل فيها انك ما جادة يا تيسير عووضة ...
|
احسب عندك اتنين يا تبارك وعادل كان صحي اليصحا(وش مبتسم)
ولا ينكر اسهامات الحزب الشيوعي ودوره الرائد والطليعي في الصراع الاجتماعي في السودان تاريخيا الا مكابر ، لم يخلو تاريخ الحزب قط من نابهين اخترقوا حٌجب الايدولوجيا وقدموا قراءات مغايرة وثرية لقضايا البلاد والعباد
الحكم علي مجمل خطاب الحزب الشيوعي التاريخي والمعاصر والغاء مساهماته او الازراء بها بجرة قلم ليس رأيا صائبا ولا موضوعيا
استاذنا حاتم الياس
بيان الحزب الشيوعي كان غالبو يعني يندد بامتهان السيادة الوطنية ويدين اسرائيل ويلعن سنسنفيل اجدادا
وبرضو يقول للكيزان المصنع ده بتصنعو فيهو الاسلحة البتكتلو بيها المواطنين السودانين من ابناء الهامش ويستاهل التدمير والقصف
يعني كان قالو حندمرو بايدينا وايدي الشعب وحنسقط النظام ونوقف قتل مواطني الهامش باسلحة الدولة المركزية فيها شنو؟ لا يرحموا لا عاوزين رحمة ربنا تنزل ؟
بس ياها حكاية كلـــب السرة يعني ؟
وكمان قال ليك (الحكومة) كده حاف .. من غير ما يصرفو ليها من جنس الشمولية والديكتاتورية والقمعية الخ .. يا كافي البلا هي وكت حيكومتنا زيها وزي باقي المسميات حكومات في دول العالم دي كلها نحن المتور نفسنا شنو؟؟؟؟؟
| |
|
|
|
|
|
|
| |
حاتم الياس
تيسير عووضة
omer osman
سفيان بشير نابرى
تبارك شيخ الدين جبريل
كمال عباس
محمد حيدر المشرف
HAYDER GASIM
قيقراوي
فيس بوك
تويتر
انستقرام
يوتيوب
بنتيريست