ليلا حريف و ضلم الصاحى فيه هلك ندم الينادى هلم سجم البقول لبيك يا حزنى مافى بغم يا قدرى احسن ليك كانت بلادك ام و صار السفر والديك هل فى العمر تم تم بعد المناحات ديك الراجعين اريتك هم و الغايبين مراسيل ليك الموجة سامعه النم و تطانش القمرة و الشاردة من اليم فى حضنه منكسرة الجاى لو يعلم بالفاتو فى المسرى قدام معاك يا عم و السايقة هى الحسرة قتلايا خوف و ندم قول عندك الاسرى اشجارى ما بتفهم هاك كلم الزهرة ضو الصباح نحن و ما اجمل السهرة لو داير تقسمنا هديك بلدنا ترا مين فى الشجن سجنا و هل غبنا عن نظره شوفينى كم سحنه و لسانى نضمه برا النجمه ممتحنه فى حظنا بتقرا و الغيمه فى محنه مديونه كم مطرة لا زال يجرحنا و لا زلنا ليه ضرا نحن البريحنا جروحنا ما تبرا
وننزل الاغنية والناس تسمع وتقارن الفرق
10-01-2012, 10:18 PM
معتصم ود الجمام معتصم ود الجمام
تاريخ التسجيل: 04-22-2003
مجموع المشاركات: 3261
الغيمة والمطرة .. قراب شديد .. بس تقسمنا وتفسحنا ما بتلموا يا حمزة وعشان ما تزعل انا مقدم السبت انو عاطف موافقك مع اني اشك بالجد اشك عاطف ما بجاملك في القصة دي .. ولو عمل يبقى ده كلام تاني
10-02-2012, 00:19 AM
معتصم ود الجمام معتصم ود الجمام
تاريخ التسجيل: 04-22-2003
مجموع المشاركات: 3261
ليه يا مورتا ... انت جيت تجاملني ... ولا شنو ؟؟ اسمع عقد الجلاد بالطريقة البتريحك .. بس في فرق بين تقسمنا وتفسحنا .. هسه لو قالوا ليك فسح الزول ده وقسم الزول ده .. في واحد منهم اكيد حيكون فرحان والتاني الله يفسحو ..
10-02-2012, 01:31 AM
مرتضى احمد عبد القادر مرتضى احمد عبد القادر
تاريخ التسجيل: 12-30-2009
مجموع المشاركات: 2484
Quote: بس تقسمنا وتفسحنا ما بتلموا يا حمزة وعشان ما تزعل انا مقدم السبت انو عاطف موافقك مع اني اشك بالجد اشك عاطف ما بجاملك في القصة دي .. ولو عمل يبقى ده كلام تاني
القول هو ما فلته يا معتصم لو عاطف موافق على الحته دي يبقى موضوع بوستك راح في حق الله ويبقى رأي في الغنية قاعد اي نعم الفرق في المعنى بين تقسمنا و تفسحنا مختلف جدا لكن شعر عاطف دا ذاتو انا ما بضمن اني فاهم معناهو صاح لذا الفيصل هل هو الشاعر موافق ولا لا
10-02-2012, 03:20 AM
معتصم ود الجمام معتصم ود الجمام
تاريخ التسجيل: 04-22-2003
مجموع المشاركات: 3261
معتصم كيفك آعتقد آن حمزه لم يخرج من سياق النص كثيرا فالتفريق هو نوع من العقاب والتفسيح (الكلمة المغرقة في المحلية) هي نوع منه عندما يقولون (فسحوا) وهي هنا لاتعني النزهة قطعا الا آنني آفضل تفرقنا
اشرف انت مسحتا ما مسحت ... طيب اوكي النص ده محمل بكتير ما بقت علي لو داير تقسمنا ... يا جماااعة عليكم الله اسمعوا واقروا النص ده تاني ... اما يا موصلي ... اسمع الاغنية اكتر من مره
ما في تفريق .. في تقسيم يا استاذ .. شوف بعد التقسيم في شنو في كلام يرفض الفسحة والله لو ما عجبكم حمزة عكس النص فوق تحت
لو عاوز تقسمنا ......... شوف فيني كم سحنة ولساني نضمو بره ده التنوع ولكن انت قسمتنا وانتوا مصرين تقسموا النص ده
10-02-2012, 10:55 AM
Azhari Nurelhuda Azhari Nurelhuda
تاريخ التسجيل: 03-01-2007
مجموع المشاركات: 1958
يا جمامي يا ساكن بلد الرسول عليه أفضل الصلاة وأتم التسليم. السلام والإنجمام في بلدكم ومع سيد بلدكم.
اسمعني جاي يا زول: كلامك سمح ونجيض طب يا زول وأنا معاك للطيش فيما ذهبت إليه تفرقنا أجمل من تفسحنا والدلالة قالوا لو... لأنها راكبة مع باقي الكلام ومتسقة مع المعنى العام.
أرفع التمام مع الإحترام وبلغ السلام لصاحب المدينة.
10-02-2012, 01:45 PM
معتصم ود الجمام معتصم ود الجمام
تاريخ التسجيل: 04-22-2003
مجموع المشاركات: 3261
Quote: اشرف انت مسحتا ما مسحت ... طيب اوكي النص ده محمل بكتير ما بقت علي لو داير تقسمنا ... يا جماااعة عليكم الله اسمعوا واقروا النص ده تاني ... اما يا موصلي ... اسمع الاغنية اكتر من مره
ما في تفريق .. في تقسيم يا استاذ .. شوف بعد التقسيم في شنو في كلام يرفض الفسحة والله لو ما عجبكم حمزة عكس النص فوق تحت
لو عاوز تقسمنا ......... شوف فيني كم سحنة ولساني نضمو بره ده التنوع ولكن انت قسمتنا وانتوا مصرين تقسموا النص ده
الحقيقه انا لم اسمع الاغنيه سوف اسمعها واتيك برايي الاخير بس قبل كده انتو مشكلتكم مع النصوص قرانية الموسيقي آو الملحن من حقه آن يحول النص الى اغنيه ولا يحول الاغنية الى نص وهناك فرق كبير بين الاغنية والنص النص حاف يمكنه آن يحتوي على كثير من فلسفة الشاعر ورؤاه بطريقة تفصيلية ولكن حينما يتناوله الموسيقى فانه يريد آن يجعل منه آغنيه ولهذا فا لغرب متفوق علينا من منظور الاغنية بل الشرق يفعل الشى نفسه بعد ذهاب العصر الكلثومي وهناك شئ اسمه Song writing ومؤلف يطلق عليه Song writer من حق المؤلف الموسيقي آن يتحرك في سياق العمل اذا رضي الشاعر وتفهم ذلك بسمع وبتم ليك باقي الكلام
طيب عزيزي معتصم انا سمعتها ثلاث مرات انت ذاتك عندك خظآ فهنالك فرق بين هلك و هليك الاصلية وطريقة كتابتك للنص آحدثت اهتزاز في السياق وليس صياغكما كتبتها يا معتصم وانا والله حاولت ارسال رسالة لك للتصحيح ففشلت عدة مرات نرجع للطريقة الصحيحة التي كان يجب ان يكتب بها النص خصوصا ونحن نريد آن نقدم اتهامات بخيانة النص
---------------------- ليلا حريف و ضلم الصاحى فيه هليك ندم الينادى هلم سجم البقول لبيك يا حزنى مافى بغم يا قدرى احسن ليك كانت بلادك ام و صار السفر والديك هل فى العمر تم تم بعد المناحات ديك الراجعين اريتك هم و الغايبين مراسيل ليك الموجة سامعه النم و تطانش القمرة و الشاردة من اليم فى حضنه منكسرة الجاى لو يعلم بالفاتو فى المسرى قدام معاك يا عم و السايقة هى الحسرة قتلايا خوف و ندم قول عندك الاسرى اشجارى ما بتفهم هاك كلم الزهرة
ضو الصباح نحن و ما اجمل السهرة لو داير تقسمنا تفسحنا هديك بلدنا ترا مين فى الشجن سجنا و هل غبنا عن نظره شوفينى كم سحنه و لسانى نضمه برا النجمه ممتحنه فى حظنا بتقرا و الغيمه فى محنه مديونه كم مطرة
لا زال يجرحنا
و لا زلنا ليه ضرا نحن البريحنا جروحنا ما تبرا ------------- هنالك في الشعر مليسمى باللزوميات (لزوم مالا يلزم) لاحظ آن القافية في الجزء الثاني من القصيدة القافية تنتهي بالنون والتاء المربوظة آو ما شابهها في النطق حسب العامية السودانية النون والالف لذلك استبدل حمزه تفسحنا بدلا عن تفرقنا وربما آن ذلك الابدال بفعل المبدع عاطف خيري نفسه كل الود
(عدل بواسطة Elmosley on 10-02-2012, 12:13 PM) (عدل بواسطة Elmosley on 10-02-2012, 12:15 PM) (عدل بواسطة Elmosley on 10-02-2012, 12:17 PM) (عدل بواسطة Elmosley on 10-02-2012, 12:18 PM)
10-02-2012, 12:27 PM
Elmosley Elmosley
تاريخ التسجيل: 03-14-2002
مجموع المشاركات: 34683
عندما تغني استاذنا الكبير الكابلي باغنية وصف الخنتيلة وقافيتها تنتهي بالتاء والياء واللام والهاء
وصف الخنتيله ةمال تاجوج المافي متيله الا آن الاستاذ الكبير نطقها حينها (مثيله) بمد اللسان في الفصحى ولكنه بعد النقد عاد الى (متيله) وهو عودا واعيا حميدا من مبدع مثقف خبير وهكذا سارت القافية
الشاعر أبو صلاح
وصـف الخنتيله جمال تاجوج المافى متيله هاك يا زميل
رويحـتى كـتـيـلة قليبى يشابى حسب ترتيله
صدير هزاز وضميره فتيله وآلخ آلخ
لزوميات لزوميات
(عدل بواسطة Elmosley on 10-02-2012, 12:28 PM) (عدل بواسطة Elmosley on 10-02-2012, 12:29 PM)
استاذي موصلي اي نعم انا قد كتبت كلمة سياق خطاء يا استاذي انا لم اتعامل مع النص كانه منزل فقط اشرت الى ان تبديل الملحن لكلمة تقسمنا غيرت في معنى القصيدة واقول ليك ليه
الكلمات ما بعد تقسمنا تصور السودان المتعدد الاعراق والثقافات في قول عاطف شوفني كم سحنة ولساني نضمو بره ضيف علي ذلك تحسر النجمة وحيرة الغيمة او المطرة من امرنا الماشي علي التقسيم انا ما عاوز افسر ليك النص تفسير او بطريقة الكلمة ومعناها بتاعت المدارس ديك انا ده القاصدو من كل الكلام ده انو تفسحنا غيرت المعنى العام ولك ولكم شكري الجزيل
10-03-2012, 01:07 AM
Elmosley Elmosley
تاريخ التسجيل: 03-14-2002
مجموع المشاركات: 34683
Quote: ضيف علي ذلك تحسر النجمة وحيرة الغيمة او المطرة من امرنا الماشي علي التقسيم انا ما عاوز افسر ليك النص تفسير او بطريقة الكلمة ومعناها بتاعت المدارس ديك انا ده القاصدو من كل الكلام ده انو تفسحنا غيرت المعنى العام ولك ولكم شكري الجزيل
بالمناسبة انا ما مختلف معك في التفضيل انا مختلف معك في الخيانه هذه واحده وقد وضحت لك مسالة اللزوميات وكيف ان القافية كانت يجب ان تسير وربما هكذا قد فكر حمزه ----- بالرغم من آن عاطف ياتي ضمن مقدمة الشعراء الذين آعجب بهم ايما اعجاب ومتمني يوم آعالج له نص صغمبوتي الا آنني آرى خللا في جزء من هذه القصيدة من حيث الوزن لا ادري انه تم بفضل عاطف ام حمزة آم عقد الجلاد -----
Quote: ضو الصباح نحن و ما اجمل السهرة لو داير تقسمنا هديك بلدنا ترا
ان لو داير تقسمنا + هديك بلدنا ترا (مختلتان وزنا ولا تتسقان مع ضو الصباح نحن وما آجمل السهره (باعتبار ان الواو تم دغمه) ولوكنت مكانهم جميعا لقلت
ضو الصباح نحن وما اجمل السهره ان درت تقسمنا اها ديك بلدنا ترا آو آهي ديك بلدنا ترا ويجب عدم تشديد السين في تقسمنا والا فان الوزن سيختل آيضا
اشكرك على هذا البوست الجميل
(عدل بواسطة Elmosley on 10-03-2012, 01:10 AM) (عدل بواسطة Elmosley on 10-03-2012, 01:11 AM) (عدل بواسطة Elmosley on 10-03-2012, 01:12 AM)
10-03-2012, 01:59 PM
معتصم ود الجمام معتصم ود الجمام
تاريخ التسجيل: 04-22-2003
مجموع المشاركات: 3261
الاستاذ موصلي شكرا علي الرد انا ما خبير في موضوع الشعر واللغة شديد لكن اصراري علي موضوع الخيانة بنيتو علي الفرق الكبير في المعني
بين تقسمنا وتفسحنا ... قالت الصديقة سلمى في مداخلة لها الفسحة دي برغبتنا بس التقسيم ده تم وناس كتار بكت علي الوطن البقى وطنين .. ولك مودتي الأكيدة واعتذر عن تأخري في الرد وذلك لكوني مريض بالتهاب حاد
10-03-2012, 02:54 PM
Elmosley Elmosley
تاريخ التسجيل: 03-14-2002
مجموع المشاركات: 34683
، معتصم إزيك تاني والشوق من هني لا عندك.. ، قريت النص كممممم مرة ولقيت إنو بي قراية مختلفة شوية بحتمل "الفسحة" والتي لا هي "كما أولها الاستاذ الموصلي" ولا هي كمان "البطلبا منك بتاع المعمل".. فسحة الله والرسول ديك.. وفي نفس الوكت كلامك ما غلط، بحسب قراية تانية برضو، وهي البتقرب كل ما يليها من الجمل والمفردات الإنت اتكرمت بايرادها في مداخلتك مع موصلي. ، يبقى، حسب رأيي طبعاً، انو مافي اي خيانة للنص فيما يخص تغيير المفردة دي، حتى لو غيرا حمزة بي رضاهو ومن غير اي ضغوط من لجنة شنو ديك كده ما عارف.. واتفق تماماً مع الموصلي في موضوع ما يستدعيه الاتفاق مع القافية، فبتكون "تفسحنا" اوقع من "تفرقنا" ولكن لو اجتهد عاطف ومعاهو حمزة كان جابو مفردة تتفق مع القافية ومع المعنى في نفس الوكت وكان يا دار ما دخلك اي نقاش.. وكان حا نبقى بس في حكاية الألحان المكررة بتاعة عقد الجلاد دي.. والبي سببا قال مرتضى انو ما لقى اي اغنية جديدة، وانا بصمت برضو بالعشرة وحلمات اضني.. ، تصحيح بسيط (شوف فيني كم سحنة) ، أبقى طيب يا صاحب وشكراً لتكرمك علي بي نص ما سمعتو قبل كده لي عاطف.. كم مشتاق ليهو ياخ ولي قصايد عيان بيان.. ويا حليل زمان ،
10-02-2012, 05:11 PM
عبدالله الشقليني عبدالله الشقليني
تاريخ التسجيل: 03-01-2005
مجموع المشاركات: 12736
الحبيب معتصم الجمام أهلاً بك ، وبالنموذج ، ومن السعي للدقة ، وهو محمود في رصد الأعمال والشكر لأضيافك فقد أثروا الملف * عندما كتب الشاعر السوداني الهادي آدم " أغداً ألقاك " كان المطلع : أغداً ألقاكَ فيا لَهَفَ فؤادي من غدِ وعندما اختارتها أم كلثوم ، في مسيرتها قصيدة من كل بلد عربي لتُلحن وتُغني لدعم " الجبهة من بعد هزيمة 1967 ، وبدء حرب الاستنزاف. وهي متذوقة للشعر بإمتياز ، ولها حصيلة في اللغة مُبهرة . أتت بها إلى محمد عبد الوهاب : هنالك الكثير بين الموسيقى الشعرية وموسيقى الغناء . والثقوب في البناء الشعري تُدخِل اللحن من أحرُف المد ، ويسلس الشِعر الغنائي قياده للحن . أول أمره كانت قضية ( لهَفَ ) قضية كبرى ، وليس بها حرف مدّ لينطلق اللحن . وتم استدعاء الشاعر لمصر . وجلس ثلاثتهم ، وتم بعد لأي تعديل البيت الأول ليصير كالآتي : أغداً ألقاكَ فيا خَوفَ فؤادي من غدِ ودار حوار شجي بين اختلاف المعنى واختلاف النطق وإمكانية التيسير على اللحن .... وكان هذا هو المنهاج على كامل القصيدة التي تعدلت أيضاً في الترتيب وفي أشياء أخرى . * هذه القضية أوردناه دون الوقوع في فخاخ الأوصاف الغليظة التي تترك للطرف الاخر حقوق الرد لما أسميته أنت " الخيانة " ، ونخرج نحن من المغاضبة بمحصول دون المُرتجى . يكفي أن نعرف الموضوع أولاً وقضية التعديل الذي تمّ وبواسطة مَنْ ، ثم بعد ذلك نبتدر الحوار ، ولكني أرى أن يكون حواراً متصالحاً مع الآخر ، ولا نشهد إلا الوجه الرفيق ، اللطيف المُثمر الذي يفيدنا جميعاً . لك محبتي
.
10-03-2012, 02:11 PM
معتصم ود الجمام معتصم ود الجمام
تاريخ التسجيل: 04-22-2003
مجموع المشاركات: 3261
الأستاذ عبد الله الشقليني تحياتي واحترامي .. شكرا لايرادك نموذج قصيدة الشاعر الهادي ادم بس لهف وخوف .. ممكن تدي نفس المعنى في سياق البيت الشعري اما وهذا حسب رأي تقسمنا وتفسحنا .. دي في الشرق ودي في الغرب انا معاك في كثير من الاغاني تم تغيير في كلماتها وللراحل مصطفى سيد احمد تجارب كثيرة مع حميد ولم نسمع عن اختلاف بينهم .. وكذلك عقد الجلاد غيرت في قصيدة لحميد برضو بس بالنسبة النموذج الانا جبتو ده مصر انو غير المعنى ومرحب بالحوار والاخ حمزة سليمان عضو في هذا المنبر .. وانا انتظر مشاركته في اثراء هذا الحوار ولكم مودتي الاكيدة
10-02-2012, 05:18 PM
عصام علي أحمد عصام علي أحمد
تاريخ التسجيل: 07-16-2006
مجموع المشاركات: 2419
معتصم ازيك وضيوفك الكرام اتفق معك تماما لانه اتفرقنا ياها اتفرقنا اتباعدنا غصبا عننا اتفسحنا بمزاجنا قبل كدا كان فى قصيدة لعاطف دا نفسه "وصتنى وصيتها " بغنيها سيف الجامعة فى مقطع بقول "يا حلمتها " فتغير الى "طيبتها " امكن الحذف ناتج من بعد "اخلاقى " لكن اتفسحنا دىى كتيرة وما مبلوعة
10-02-2012, 11:29 PM
معتصم ود الجمام معتصم ود الجمام
تاريخ التسجيل: 04-22-2003
مجموع المشاركات: 3261
انتي كدة جبتيها من الأخر .. مع انكم كلكم غيرتوا لو عاوز تقسمنا بلو عاوز تفرقنا ... وهم قسمونا وانتهوا وما شفعت لينا ..... شوف فيني كم سحنة تحياتي ومودتي الاكيدة لك
10-03-2012, 02:13 PM
معتصم ود الجمام معتصم ود الجمام
تاريخ التسجيل: 04-22-2003
مجموع المشاركات: 3261
شكرا يا صديقي .. انا ما عارف الحاب كلمة تفرقنا للبوست او للاغنية منو ؟ بس هي نفس معنى كلمة تقسمنا ... انا طبعا اسقطت حالة سياسية محددة علي النص وممكن لبعض الناس ما تكون واضحة لذلك ممكن يكون اسقاطي السياسي اثر في شوفي للخيانة الواضحة في تغيير المعنى ما بين تفسحنا وتقسمنا .... وامنياتي ان يعود الوطن بلا تقسيم ونعيش فيهو كلنا واحد مع اني لا اظن ذلك لك مودتي الاكيدة
10-03-2012, 02:31 PM
بشرى محمد حامد الفكي بشرى محمد حامد الفكي
تاريخ التسجيل: 08-25-2006
مجموع المشاركات: 2361
ليلا حريف و ضلم الصاحى فيه هليك ندم الينادى هلم سجم البقول لبيك يا حزنى مافى بغم يا قدرى احسن ليك كانت بلادك ام و صار السفر والديك هل فى العمر تم تم بعد المناحات ديك الراجعين اريتك هم و الغايبين مراسيل ليك الموجة سامعه النم و تطانش القمرة و الشاردة من اليم فى حضنه منكسرة الجاى لو يعلم بالفاتو فى المسرى قدام معاك يا عم و السايقة هى الحسرة قتلايا خوف و ندم قول عندك الاسرى اشجارى ما بتفهم هاك كلم الزهرة ضو الصباح نحن و ما اجمل السهرة لو داير تفسحنا هديك بلدنا ترا مين فى الشجن سجنا و هل غبنا عن نظره شوفينى كم سحنه و لسانى نضمه برا النجمه ممتحنه فى حظنا بتقرا و الغيمه فى محنه مديونه كم مطرة لا زال يجرحنا و لا زلنا ليه ضرا نحن البريحنا جروحنا ما تبرا
10-03-2012, 03:15 PM
معتصم ود الجمام معتصم ود الجمام
تاريخ التسجيل: 04-22-2003
مجموع المشاركات: 3261
شكرا حمزة سليمان ولك تحياتي .... سؤال عرضي هل ما كتبته انا فيه تجريح شخصي لك ؟ لو كنت تظن ذلك لك اعتذاري ... انا قمت بنقاش قضية محددة وكثير من الملحنين قاموا بتعديل في اشعار بعض الشعراء .. بل في بعضهم تجنى علي اعمال الشعراء وهناك امثلة كثيرة ...
نموذج الفنان الكابلي مع قصيدة عمر الطيب الدوش سعاد ..
ويا سيدي شكرا علي الرد
10-03-2012, 05:48 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: الحقيقه انا لم اسمع الاغنيه سوف اسمعها واتيك برايي الاخير بس قبل كده انتو مشكلتكم مع النصوص قرانية الموسيقي آو الملحن من حقه آن يحول النص الى اغنيه ولا يحول الاغنية الى نص وهناك فرق كبير بين الاغنية والنص النص حاف يمكنه آن يحتوي على كثير من فلسفة الشاعر ورؤاه بطريقة تفصيلية
اخي الفاضل معتصم أتفق مع المبدع الموصلي قلب وقالب هناك الكثير جداً من الأغاني السودانية التي تغنى بها كبار المطربين ونظمها كبار الشعراء لو سمعت الأغنية ملحنة وقرأت النص تجد حزف بعض الأبيات كاملة تحل حيناً بعض كلمات مكان كلمة كانت أصلاً موجودة في النص اللحن ما شئ بهذه السهولة تحكمة نغمة موسيقية وغيرها والموصلي أدرى بذلك ( موسيقي ) لي علاقة وطيدة بزول ملحن وشفت كيف يتعامل مع النصوص وكم مرة يتصل بالشاعر ويتشاور معه أن يغير هذا ويقلب هذا فلا تظلم شخص قد يكون برئ مما أتهمته به أجد لاخاك العذر أتصل بعاطف يمكن عاطف متفق مع الملحن
تحياتي ومودتي
10-03-2012, 06:12 PM
معتصم ود الجمام معتصم ود الجمام
تاريخ التسجيل: 04-22-2003
مجموع المشاركات: 3261
دي شماتة واضحة منك يا مورتـــــا ,,, النص موجود بالطريقة الانا قلتها في صفحة تخص اشعار عاطف في الفيس بوك لكن انا قبلان شماتك فيني يا مورتـــــا ... وشكرا ..
10-04-2012, 00:55 AM
Elmosley Elmosley
تاريخ التسجيل: 03-14-2002
مجموع المشاركات: 34683
Quote: خي الفاضل معتصم أتفق مع المبدع الموصلي قلب وقالب هناك الكثير جداً من الأغاني السودانية التي تغنى بها كبار المطربين ونظمها كبار الشعراء لو سمعت الأغنية ملحنة وقرأت النص تجد حزف بعض الأبيات كاملة تحل حيناً بعض كلمات مكان كلمة كانت أصلاً موجودة في النص اللحن ما شئ بهذه السهولة تحكمة نغمة موسيقية وغيرها والموصلي أدرى بذلك ( موسيقي ) لي علاقة وطيدة بزول ملحن وشفت كيف يتعامل مع النصوص وكم مرة يتصل بالشاعر ويتشاور معه أن يغير هذا ويقلب هذا فلا تظلم شخص قد يكون برئ مما أتهمته به أجد لاخاك العذر أتصل بعاطف يمكن عاطف متفق مع الملحن
تحياتي ومودتي
العديد من التعديلات حدثت بين اساطين الفن وفطاحل الشعراء في تاريخ الاغنية السودانية مابين تعديل ودمج وكولاج الخ وتبقي القصيدة الاصل قصيدة وتبقي الاغنية آغنية والان عرفنا آن حمزه قد استلم النص بالطريقة التي لحنها بها وهذا قد يؤكد رآيي في مسالة اللزوميات وارجح آن عاطف الشاعر المجيد قد آلقى عليها نظرة ثانية بعد آن نشرها على الفيس بوك سابقا وارسلها لحمزه كل الود ياخالد
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معتصم ود الجمام
مرتضى احمد عبد القادر
Elmosley
Ashraf el-Halabi
Azhari Nurelhuda
عبدالله الشقليني
عصام علي أحمد
سلمى الشيخ سلامة
بشرى محمد حامد الفكي
HAMZA SULIMAN
خالد علي محجوب المنسي
فيس بوك
تويتر
انستقرام
يوتيوب
بنتيريست