هرولتي زييين بين الجبال وندهتي للفرَج القريب ردَّ المحال يا الله للصَّيْ والصقيع سوِّيتني جار ورقصْتي جِمِّي على الحجار يا جِمِّي جِمِّي على الحجار ما نقَّعتْ موية التَّمَد لا كَلَّ عزمِك لا فتَر وعزايا ملفوف في مهَد صنَّتْ ضَراعاتو وهمَد هرولتي زييييين غنَّتْ ضفايرِك للرياح فرِّيتي من حنَّك جناح حلَّقْتي ناجيتي السحاب وهتفتي للأرض اليباب الموية عوووووك.. الموية عووك قام حَنْدَك العطش السراب واتبرَّع الصدَّى بالجواب ! وكشفتي عن ساقين طَلِحْ شايلين غُنا وفالاًُ سمِحْ يا الله وابِلْ للصقيع يا الله طَلْ إنشاء جرتِقْ بالرزاز ! يا جارية قدَّمتي النذور يا نايمة في الصحْو الخزاز يا شاتلة فوق عرْش الصخور ساقْ الطلِحْ .. وين لي سويق بلقيس مضبلِنْ في القزاز ! شبِّيتي قدَّام المصـــير في زول مشنَّط للسفَر قدَّامو ما معروف شنو ؟ يا زول مشنَّط للسفر شقِّيش مقبِّل دون دليل شقّيش مقبِّل يا صباح والدنيا ليل سايمْ خُطاك على النجوع سايب رواحك للرحيل الختْرة معناها الغياب والستْرة نار والقعدة ويل ! والعتْرة شايْلالَكْ نذُر يا ماسِكْ الدرْب العديل في لحظة تسرقني السنين في لحظة يجري بي العمر في لحظة طلَّقتَ القصايد بي سطُر وطبقتَ بُقجة حُرقتي وكفرتَ بالشبَح المسمَّر بالغصب في فجَّتي ! وضربتَ في حلَك الفجاج العتْمة علْعالة وعجاج شمتان ضلامي على الصباح ضحَّك علىَّ الصافنات نادنِّي : يا الحانف وشيك زىْ صاري خالعاهو الرياح! نادنِّي : عووووووووووووك لامْتين تتكِّنْ في سراب دربَك خُطاك ؟ والنيل شرَد يبَّس قفاك ! يا سارِي يا داقس سُدنْ البيت وراك يا الجاري هاج ! والباب مترْكَش يا رتاج ! وشابيتي قدَّام المصير لي زول مشنَّط للسفَر قدَّامو ما معروف شنو أعوَجْ قفـا ومكسور جناح شايلْ زوادْتو جُراب يقين والباقي هين والباقي هين !!
09-26-2012, 08:49 AM
ibrahim fadlalla
ibrahim fadlalla
تاريخ التسجيل: 06-09-2007
مجموع المشاركات: 2585
Quote: شبِّيتي قدَّام المصـــير في زول مشنَّط للسفَر قدَّامو ما معروف شنو ؟ يا زول مشنَّط للسفر شقِّيش مقبِّل دون دليل شقّيش مقبِّل يا صباح والدنيا ليل سايمْ خُطاك على النجوع سايب رواحك للرحيل الختْرة معناها الغياب
كلام نجيض ...طافح بالحزن ..وخيال شعري ولا أبدع ...
شكرا يا شاذلي ...
09-26-2012, 12:35 PM
shazaly gafar
shazaly gafar
تاريخ التسجيل: 12-12-2004
مجموع المشاركات: 1604
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة