غايتو لو في شي وااااحد ح يعمل كارثة فهو نقتنا الكتييييرة في إنو ح تحصل كارثة ..وإنو علينا تداركها وإنو لاز ننتبه و و و .. ياخ شن جاب لي جاب..الجمهور السوداني مختلف بمعنى مختلف..مش الجمهور السوداني الرياضي بل الشخصية السودانية عموووماً.. انا ما شايف أييي حاجة دخيلة علينا ..كلللو كان موجود زمان ولحدي أسة موجود.. سنحت لي الفرصة زيارة القرير وتحديداً قوز قرافي وانا في المرحلة المتوسطة في زيارة مع اصدقائي للشمالية .. اها وبما إني كنت بلعب كورة ونظام جاي من العاصمة ونظام محترف ساقوني معاهم كورة مع حلة تانية .. أكتر من مرة كنت لمن أشوت الكورة بتطلع لي عكاز معاها من الأرض..!! قبل ما الدنيا تمغرب واحد نبهني إنو أكون قريب من طرف الملعب عشان لمن الحكم يصفر نحن مفروض نجري.. وقد كان..تيييت ييييت توووت ..فررر فررر فرررررر.. وقوموا يا ناس الحلة التانية طلعوا العكاكيز من تحت الأرض وسكونا بيها عشان غلبناهم.. أها الثقافة دي منتشرة فينا مننن زماااان وما بي جانب حق عنف بقدر ما هو جانب حق إسترجال وبرنامج بتاع حقرنا بيكم وحقرتو بينا ..غلبتونا ودقيناكم .. في الدورات المدرسية وبعد كل مباراة كان ناس المدرسة التانية بيخربو لي ديلك مدرستهم .. تكسير كراسي الإستدادات ما ظاهرة جديدة وموجودة من زمااان ..بس زمان عشان كانت الكراسي حقت الحديد وكانت كميتها محدووودة (فقط في المقصورة) عشان كده كمية الدمار ما كانت بتظهر.. أسة الكراسي بلاستيك وموجودة تقريباً في نصف المدرجات وأكتر.. الملاحظ إنو الجمهورين من هلال ومريخ ما فكو الكراسي وتراشقو بيها مع بعض بقدر ما تم رمي معظم الكراسي خارج الملعب من السور الخلفي .. وده دليل واضح إننا ما جمهور يجنح للعنف ..بس هي قصة حقرتونا وحقرناكم.. ماف زول يقول لي هي بتبدا كده ..أبددداً نحن جمهور مسالم ,,وكتييير من مباريات المريخ انا بحضرها في نصصص جمهور المريخ وبكورك وبعللق دون ما يصيبني مكروه .. انا شايف إنو الكلام الكتيير حول محاربة الظاهرة دي قد يلفت الإنتباه لي إنها فعلا تتحول عنف.. ثم وإنو ياخ دي كراسي شنو البتتفك بي السهولة دي؟؟ ياخ اووول شي وقبل ما يحققو مع الجمهور مفروض يجيبو شركات التركيب دي يحققو معاها!!! وين ناس ضبط الجودة ؟؟ وين مدير المشروع ؟؟ وين وين وين؟؟ عليكم الله ما تخربو لينا كورتنا وما تدعو للمثاليات ..خلوها كده وصدقوني ما بتجينا عوجة.. ياخ والله قد تستغربو لكن انا اكتر يوم ضحكت فيهو انا وبشوف جمهور الهلال في كورة المريخ بيرقص والكراسي في راسهم ..نظام مكاواة وكده .. لو في كوراث ممكن تجي للجمهور فصدقوني ح تكون من رجال الشرطة غير المدربين .. لو في كوارث ح تجي فهي من البمبان اللي بيتم إطلاقه بلا رقيب ولا حسيب.. لو في كوارث بتجي فهي من الخرطوش الأسود والكلاب البوليسية ورجال السواري وهم بيتعاملوا بي إستهتار مع جمهور مغلوب على أمره.. لو في كوارث بتجي فهي بتكون من مجموعة صعــــاليق لبسوهم مريلة وقالوا ليهم أقعدوا حول الملعب فبدل ما يحفظو الأمن عايزين يضربوا المشجعين !! ياخ انا أوول مرة أشوف لي حراس ملعب بيمسكوا المشجع ويضربوهو عياناً بياناً بي البونية والشلوت مهما كان تصرف المشجع !!!! ياخ الإنجليز حصلت عندهم كوارث ماتوا فيها أكتر من تسعين مشجع والتحقيقات إشتغلت جغلومية سنة وأوول التوصيات بعد نتيجة التحقيقات كانت إنو سبب الوفيات هو وجود السياج حول الملعب فقرروا إزالة السياج!! أكتر من جغلومية سنة تحقيق وأخيراص الحكومة البريطانية تعتذر للجماهير وتبرئ ساحة جماهير ليفربول.. وقفوا الرشيد علي عمر ومزمل ابو القاسم ..والعوجة ما بتجيكم .. باقي الصحفيين ديل صدقوني مساكين ساي وما عندهم أي أجندة ..ناس بتاعين استرزاق ومكاواة ومشجعين عاديين ..
09-24-2012, 01:22 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
سلامات يا عمر ..يا ريت القصة لو كانت بالبساطة دي تذكر الحصل في نهائي كأس السودان, ناس اجتمعت و دبرت و خططت للإنتقام لراجي بشتيمة أم البرنس هل دا عادي أو في ثقافتنا التشجيعية نفس الحصل اسي تدبير و تخطيط للإنتقام من الحصل في قمة الكونفيدرالية ودا الجديد وما عادي عارف قصة الكراسي دي المؤسف فيها انو من تاني يوم للكونفيدرالية المنتديات و الشوارع وبعض الصحافيين كتبو في الموضوع دا , وكان رد بعض المريخاب انهم كـ"شفوت" ح يحموا استادهم يعني الموضوع كان متوقع وما في جهة اتحركت لحل المسالة واسي لو ما اتحل الموضوع بطريقة ودية ولو استجاب الاتحاد لتحريض البعض وعاقب الهلال فقط باعتبار انو المباراة في بطولته و ترك الكونفيدرالية للإتحاد الإفريقي والعكس برضو لو حصل وعاقب الكاف المريخ ولم يعاقب الاتحاد الهلال الموضوع ح يتفاقم و اسي مع ظهور انماط التشجيع المنظمة الجديدة التراس و مش عارف ايه ممكن عادي تلقى البعض يدخل وسط جمهور التيم التاني و يثير شغب يتسبب في عقوبات وحرمان
09-24-2012, 01:32 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
ود البشرى يا حبيب.. عارف الجديد هو التنظيم والعمل في مجموعات من قبل بداية المباريات.. لكن يا حبيب وعشان نكون فيير فصدقني داخل الإستاد كان اللاعبين زمان من قبل هيثم وراجي بيسمعوا الفاظ تتحول لي جماعية من داخل مدرج الشعب.. زي ما قلت ليك إمكن كانت وليدة اللحظة وما بيتم ليها التجهيز من قبل كم يوم لكن هي هي نففس الإساءات !! هتف جمهور الهلال ضد إبراهومة وهتف جمهور المريخ ضد الراحل والي الدين وكلها كانت بنفس القبح ..ووقتها ماف أولتراس ولا روابط ولا إنتقامات..
09-24-2012, 02:02 PM
omer osman omer osman
تاريخ التسجيل: 06-09-2007
مجموع المشاركات: 15218
ثم وإنو ياخ دي كراسي شنو البتتفك بي السهولة دي؟؟ ياخ اووول شي وقبل ما يحققو مع الجمهور مفروض يجيبو شركات التركيب دي يحققو معاها!!! وين ناس ضبط الجودة ؟؟ وين مدير المشروع ؟؟ وين وين وين؟؟
<<<<<<<<<<<<<<<<<<<<<<<<<
بعجبني فيك بتجدع الباص في المنطقة المظلمة زي باصات سامي عزالدين
او بطريقة اخري بتعاين في حتة الناس ما عاينت فيها
عمر الفاروق ضروري في التمرين هههههههههههه
09-24-2012, 02:37 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
ما ياهو يا عمر دي الآفة حكاية التنظيم و التدبير زي ما قلت الشتايم الفوق دي عفوية كانت و بعدين مافي زول بسمع بيها بعد الكورة تنتهي تخيل حكاية هيثم دي عرفناها من المنتديات جو ناس كرروها و للأسف بفخر كمان انا فاهم عليك عايز تقول انو الجمهور لو عليه براه الموضوع ما بتطور لكن للأسف ودي حقيقة ما نقدر نتجاهلها نوع الجمهور البركبو الحافلة من السوق الشعبي سوا و يتناقروا السكة كلها و بعد الكورة يرجعوا يتعشوا سوا وينسوا الموضوع للكورة الجاية انتهت أو على الأقل بقى يتأثر بالمجموعات الشبابية السايقها الغلو و التطرف منتديات هلال مريخ بقت فظيعة جدا و بتتداول لغة عنيفة حتى في المدرجات ما كانت في عمرنا كلو بنقول عليهم صهاينة وهم يقولوا رشاشات اسي جابت ليها جلافيط وخنازير وحاجات عجيبة ما انزل الله بها من سلطان والفاظ تحقيرية أكتر منها مناكفة كويس انو المنتديات مقفولة لكن للأسف تاثيرها في تاني كمان قصة الصحفيين المعيشين الناس انو دايما في مؤامرة على التيم و انو القصة صراع بمعنى كلمة صراع مش تنافس في كورة او غيره ما تستهون بالقصة دي يا عمر هسي ممكن ما يحصل شي في الفترة القريبة باعتبار السلطات زاتها ح تفتح عيونها لكن طالما الاسباب البتغذي التعصب دا من منتديات و اولتراس و صحفيين موجودة ممكن يحصل الانفجار لا قدام
09-24-2012, 03:10 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
عارف يا ود البشرى لو في حاجة واااحدة فعلاً غريبة ومحيرة فهي قصة المشجعين الجدد دي!!! زمان كان في ثاقفة سائدة بكل أسف عن إنو مشجعين المساطب الشعبية بتعاين أورنيش وبررد وقصب وناس على قدر حالهم وما فاهمين و و و ..سبحان الله الناس ديل واللي كانت جملة من يدعون الثقافة تحتقرهم هم والله الأوعى والأجممل والأنقى والأفهم..بيشجعو وبس ..الواحد فيهم بيكون شغال يومو كلللو عشان يطلع حق التزكرة ويخش الكورة يبتهج ويشاغل ويرقص وينطرب.. أسة المحيير من يقودون هذا التشجيع لهذه الهاوية زي ما انت بتقول فهم جملة من يدعون إنهم جامعيين ومثقفين وفاهمين!!!! ياخ مش في حاجة ما مفهومة ؟؟؟؟؟
Quote: تاني كمان قصة الصحفيين المعيشين الناس انو دايما في مؤامرة على التيم
يا ود البُشرى أخوي ... غير حتة إنّو في مؤامرة على التيم .. حتة الصحفيين وأخصُ منهم مزمّل أبو القاسم المعيشين الناس إنّو عندهم تيم زي برشلونة كدة ... ياخي أنا لمّا أقرأ غزل هذا المزمّل في لاعبي المريخ .. بدعك عيوني وأقول إمكن أنا غلطان والزول دة بتحدّث عن ميسي وتشافي وإنييستا ... وبرجع أفتح خشمي بي خلعة لمّا أتأكد إنّو الزول دة قاصد جماعتو ...
الإحساس دة لمّا أكون مريخابي .. وتاني يوم الهلال يقوم يرصّع المريخ مُش حأنزل من المدرجات وأقوم جاري على الحكم عشان أعتدي عليهو زي ما عمل واحد كدة في نهاية المُباراة الأخيرة .. واللي مُش عارف لحدّي هسي المشجّع دة عايز يعتدي على الحكم عشان شنو ؟ غايتو إلاّ عشان جماهير الهلال كسّروا الكراسي لأني لم أرَ أيّ تحيّز للهلال من جانب الحكم ...
ـــــــ ياخي مزمّل يتغزّل في لاعبي المريخ ويوهم ليك ناس عمنا الأمين موسى البُشاري البجو يكتبوا لينا هنا إنو ريكاردو هلالابي ... طيب يا البُشاري أخوي .. عندك مازدا مدرب المنتخب مريخابي وتشكليته الأساسية أغلبها من الهلال .. دة يقولوا فيهو شنو لو عندك لعيبة ياخ ؟! ياخي أفضل لاعب عندكم الآن هو "الباشا" لم يكن أساسياً في الهلال ...
الكلام الأخير دة وصلوهو للبُشاري خلوهو يجي يدافع عن نفسو
09-25-2012, 12:23 PM
محمد عمر جبريل محمد عمر جبريل
تاريخ التسجيل: 08-27-2009
مجموع المشاركات: 2263
سلامات بما إنو كل الشباب الخشو البوست دا قاعدين برة السودان فـ اااا شنو في حاجات كتيرة ما بقراها وبشوفها إلا الزول القاعد جوة السودان الهنا معليش يا عمر بس المرة دي الموضوع إتغير شديد ودي أبدا ما ثقافتنا التشجيعية أمس وفي واحد من قروبات الفيس بوك قريت كلام بقول ( الجماعة ديل لازم نكتل منهم زول عشان إتأدبوا ) أي والله نكتل عديل .. واحد من القروبات المضادة عمل برنت سكرين وشال اللينك وختاهو في القروب التاني وديل برضو ما قصروا .. المباراة الجاية لازم أي زول يجيب معاهو سلاح أبيض .. والما بقدر يدخل بيهو الاستاد يدسوا في حتة قريبة
.. تخيل إنت براك السيناريو الجاي ها يكون شنو ؟! لازم يحصل تصعيد للموضوع وإلا والله العظيم كارثة أخرى على وشك الحدوث أتمني واحد من الشباب أو إنت ذاتك يا عمر تفتح بوست وتتكلم عن موضوع التهديد بالقتل في المباراة الجاية دي أنا والله لا أقوى على إدارة بوست كامل الأيام دي بسبة لضيق الوقت عسى ولعلي .. أن نمنع هؤلاء المعتوهين من الطرفين القيام بأي تصرف غبي أرعن
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
محمد البشرى الخضر
omer osman
محمد عمر جبريل
فيس بوك
تويتر
انستقرام
يوتيوب
بنتيريست