الحلية: من مصطلحات المزيكاتية للهبيشيات الطرفناملية الدبيبية التي تأتي قبل/اثناء/بعد لزمة صوتية أو لحنية مهمة في الغنية ..
غنى "محمد جزار" في قناة الشروق قبل دقائق "صباح النور عليك يا زهور" ... حيث تنتهي الاغنية (حسب توزيعه) بتلاشي الصوت وهو يردد "صباح النور عليك يا زهور" .. بينما تردد الكمنجيات "حليات" متتالية ترد عليه كل مرة ... بينما "الفرشة" الإيقاعية في الخلفية "تنقز" نقزاتها الرتيبة يتلوى حول رتابتها صوت بيانو اليكتورني بكوردات بلوزاوية (شبه أيمن الربعاوية) وجيتار إيقاعي خائن لمقامه الموسيقي دون أن يهجر زمن الإيقاع وبيز أبو رزين للصعاليك الفوضجية ديل ... هكذا ... إلى أن يتلاشى الصوت إلى صمت مطبق ... حلية ... تلو الحلية ...
حولا!
... المهم ...
09-07-2012, 08:26 PM
تبارك شيخ الدين جبريل
تبارك شيخ الدين جبريل
تاريخ التسجيل: 12-04-2006
مجموع المشاركات: 13936
هذا الجزار محمد ... يسكن سكنة في بيت جيران معشوقته بنت أفكار المستمع ... فكلما خرجت بنت أفكار المستمع لافحة "مقام" الغنية لتكشح موية غسيل الحنين للمقامات الحقيبية بعبق الأصائل الأمدرمانية ... كان ذلك الجزار ("متفرقصًا في عتبة الدكّانِ" ... كما قال الشاعر) يجتر مقامات الغزل بنظرات خفية لذلك "الفستانِ" ...
(وانتو أمة حاقدة ... البوست دا اعجاب بالغنية شكيتكم على الله )
... المهم ....
09-07-2012, 11:35 PM
مرتضى احمد عبد القادر
مرتضى احمد عبد القادر
تاريخ التسجيل: 12-30-2009
مجموع المشاركات: 2484
بلا إعلان انعتاق الأذن السودانية من مركزية معهد الموسيقى الغتست حجر ثقافتنا المحلية والعالمية ...
تعرف يا مرتضى ... انا اللفتني لى غنا محمد جزار في القناة ... إنو - كعادته الإبداعية المتهورة - طعن كل الفنانين في عمق فكرة عرض الغنا على الهواء مباشرةً ... بى إنو ممكن يكون موزع بى حرفية عالية وكأنو مجهز لتسجيل استوديو ... لاكين يتغنى حي على الهواء ...
الحركة دي بنشوفها عند الخواجات والناس الغناهم مكتوب أصلاً بى توزيع احترافي ... ما ناس "العدادات" الله يكرم "اغاني واغاني" ...
("اغاني واغاني" زاتها لو ما "طه سليمان" واحترافيتو العالية ... لا تطاق!)
... المهم ....
09-08-2012, 00:29 AM
محمد على طه الملك
محمد على طه الملك
تاريخ التسجيل: 03-14-2007
مجموع المشاركات: 10624
بتفق معاك يا تبارك الجزار موزع ما فيهو كلمة ومنجض شغلتو وبينفذ شغلو على الهواء بنفس الكفاءة البشتغل بيها لمن يسجيل في الإستديوهات طبعا هنا ما بحاسبو برداءة اجهزة الصوت بتاعة التلفزيونات والمسارح في كتير من الأحيان لكن مرات التوزيع بتاعو ذااتو في عضمو و بغض النظر في مهنيتو العالية في التنفيذ بكون ما سمح زي في صباح النور دي المزيكا ازعجتني وابت تديني فرقه استمتع بالغنية واللحن عموما الكلام دا لو نقاش عوام ساي تاني بقول ليك غنيتك الجبتها راكوبة في خريف لكن لو الشغل شغل معلمين مزيكا ببلع كلامي وبنسحب لعدم الكفاءة
انت المنبر دا ما منبر عوام ولا شنو !!؟ بقيتو تزرزرو لواحد كدا
09-08-2012, 01:05 AM
محمد حيدر المشرف
محمد حيدر المشرف
تاريخ التسجيل: 06-20-2007
مجموع المشاركات: 20359
نتمادى في كلام العوام قبل ما تحسمنا كدي جرب اسمع الجزار كتير بعد اسبوعين تلاته بالكتير حتلقى روحك ما قادر تسمعو اها دا بكون من شنو ما تقدر تعرف غايتو انا اسبوع واحد وصلته لحقيقه مفادها إنو الغنية البتعجبك عند الجزار ما بتتسمع اكتر من مرة في الاسبوع بالكتير
09-08-2012, 01:28 AM
محمد حيدر المشرف
محمد حيدر المشرف
تاريخ التسجيل: 06-20-2007
مجموع المشاركات: 20359
صباح النور يا تبارك حاولت اسمع طلعت بالاتى انه الفنان محمد الجزار صوته انفى دا انطباع اولى التانى انه ينفع "مداح " حيث تتلازم فى المدائح "الطريقة الافقية فى الاداء لا يمشى اللحن سوى افقيا "كما فى اغنية الحقيبة حيث يقال ان اغنية الحقيبة طالعة من عباءة المدائح والله اعلم الصوت الانفى مشكلة وزى ما قلت ليك رغم جمال مارلين مونرو الذى ظل محل تقديس لغاية الان الا ان المخرجين كانوا يحجمون عن تقديمها فى الافلام لان ذاك مشكل اساسى فى صوتها رغم جمالها الفنان محمد جزار يعانى من نفس المشكلة الفنان دا بغنى من "انفه " وخشمو بكون فاتح " يعنى الصوت ما بقدر يطلع صاح خلينا نقول انه مجرب فى امر توزيع الحقيبة التى نحبها لكن عليه ان يفتح الدروب امام فنانين يمكن ان يغنوا وهو يوزع يكون خدم القضية خدمة "الزامية " لاحد لها وشكرا لاتاحة الفرصة
09-08-2012, 09:14 PM
مرتضى احمد عبد القادر
مرتضى احمد عبد القادر
تاريخ التسجيل: 12-30-2009
مجموع المشاركات: 2484
Quote: عليه ان يفتح الدروب امام فنانين يمكن ان يغنوا وهو يوزع يكون خدم القضية خدمة "الزامية " لاحد لها
سلامات سلوم اعتقد انو الجزار طارح روحو موزع و مهندس صوت اكتر من انو مغني لانو سمعته غنا كتير موزعو الجزار بغنوهو فنانين شباب زي (محمد عثمان، مجاهد عثمان، عمر فقيري، الشاب أمير، حسين الصادق، أحمد الصادق وشكر الله) .. عارفة المشكلة الحسيته عند كتير من الشباب البغنو اغاني من توزيع الجزار بتروح ليهم طريقتهم الخاصة في الغنا وبيغنو بنفس طريقة الجزار في الغنا
والله يا تبارك انا من امس ماسك روحي بالقوة ما عايز أخونا العزيز Isa يفتكرني متحامل على الجزار وكدا لكن غلبني كدي اسمع السكج بكج - ياقول حموودي - و ادي ربك العجب
09-08-2012, 10:21 PM
Tumadir
Tumadir
تاريخ التسجيل: 05-23-2002
مجموع المشاركات: 14699
التمتم مع الحليات المنلاحقة في تطريب الصوت ...انا اللاقيتا أول ....وووووب علينا غني بتسكر ...
أول مرة اتفق مع تبارك شيخ الدين في (طرح) ما....
انعتاق الأذن السوداني من كلاسيكيات معهد الموسيقى دي ما بتفق معاها أفتكر هو تطور منطلقو الأول كان ما أعده معهد الموسيقى للأذن السودانية وهي الاذن السودانية ذاتا لى حسة مدورة في اللحن القديم والأغنية القديمة وانا برضو بشوفا ظاهرة صحية ظاهرة الريسايكل دي
لمن الأغنية القديمة تنجض في الاجتهاد ياهو بجوا ناس الجزار ديل وفرقة النيل وناس تاني حلوين كده بغنوا غنا سوداني مع راب ...والله تجارب جميلة ومحطرمة ...
يعني فنانيننا الزمان كنا بنحبهم حسة الواحد لو عمل ليك غنية وبديت تسمعها طوالي تتذكر انه (قفاك أعوج) وماشي تتم شغلك لكن غايتو الليلة الجزار ده قعدني عديييييل كده لما سمعت أنا اللاقيتا اووووووووولللللل دي
والله أعلم ...(كذب المنجمون ولو صدقوا) ....
طبارك انت وين؟
09-08-2012, 10:44 PM
تبارك شيخ الدين جبريل
تبارك شيخ الدين جبريل
تاريخ التسجيل: 12-04-2006
مجموع المشاركات: 13936
ود البشرى ما ممكن بغنية واحدة نحكم على الجزار، و تقيم عمل ما ممكن يتعمم على كل الاعمال والقصة ما الجزار براهو حتى لو كان الجزار هو الاكثر انتاج وشهرة في شباب تانين شغالين بعملو في حاجات جديدة وفريدة و النجيضة في ثورة على المزيكا السودانية التقليدية واثناء الثورة دي الشباب ديل حينتجو غنا يتهضم للمستمع وغنا ما حيتهضم و مصير الثورة دي شنو لسه ما معروف
الواحد حاسي انو بقى لايوق بس دا آخر فيديو يا تبارك اهداء لسلمى الشيخ لانو قبل سنة عجبته غنية عزيزدنياي بصوت عمر فقيري في قعدة بي بيانو بعزف عليهو الجزار فدا عمري فقيري تاني في قعده بغني (عاطفة وحنان) وبعزفو عماد ببو (قدس الله سره) - محمود كرار - كولا
09-08-2012, 11:35 PM
تبارك شيخ الدين جبريل
تبارك شيخ الدين جبريل
تاريخ التسجيل: 12-04-2006
مجموع المشاركات: 13936
الفيديو الجابتو تماضر ديل (سودانز باند) و في (فرقة السودانين) البغني فيها الجزار اعتقد انهم كانو فرقة واحدة زمان وانقسمو على اتنين واحدين شالو الإسم بالعربي و واحدين شالو الاسم بالإنجليزي عموما الفرقتين لاقين قبول من المستمع مع انو شكل الموسيقى جديد وحتى الأغاني المسموعه الأعادو توزيعه التوزيع االجديد مهضوم للمستمع وفي هايبرد باند برضو و الثورة مستمرة
في فرقة سودانيل بس موسيقتهم بتشبة ناس المعهد فما حيقسمو معاك يا تبارك
09-10-2012, 06:26 PM
تبارك شيخ الدين جبريل
تبارك شيخ الدين جبريل
تاريخ التسجيل: 12-04-2006
مجموع المشاركات: 13936
طبعًا فرقة السودانيين أو سودانيز ساوند أو سودانيز باند هي في مجملها فكرة واحد طويل متسلسلة ذات تاريخ نضالي طويل ضد هذا الصرح الجرح المسمى معهد الموسيقى والمسرح ...
نادر السوداني اكتسب اسمه من الإنتماء للفرقة في جيلها الأول المؤسس في أوائل السبعينات (بعد معهد الموسيقى الفيهو انعرفت!) ... وهو عضو في هذا المنبر ويستطيع أن يأتي لنا بالوقائع التاريخية حين كانوا ينافسون وليام اندريا والبلوستارز وفرقة جاز العقارب وشرحبيل احمد والجيلاني الواثق وكمال كيلا في إحياء ليالي أندية الخرطوم الليلية حين كانت جنة العشاق التي يتغنى لها الأجانب "يا جمال النيل، والخرطوم بالليل" ...
فقد تركت السودان في تسعينات القرن الماضي وأنا أردد أن الكاشف هو ملك الغناء الحديث في الماضي ... ومحمود عبدالعزيز هو ملك الغناء الحديث في الحاضر ... وشرحبيل احمد هو ملك الغناء الحديث في الماضي والحاضر والمستقبل ... (كل هذا قبل انبعاث عنقاء فرقة السودانيين والتي تركت فكرة إحيائها حلم يراود ممدوح طاهر فريد وغاندي احمد رجال والموسيقار المرحوم أحمد تاور ... أيضًا كان موقفي هذا قبل سطوع نجم الموسيقار طه سليمان!)
فالفكرة كانت تراود الكثيرين المثيرين من مطاليق الغنا وهمباتة الشجن الخفي المدسوس في طرب المقامات الشجية ... ولا زالت ...
في هذا السياق أتتنا نوبة هؤلاء الشباب يتغنون "لالوبة يا خدامها الليل بجيب كلامها النوم بقالي ملامة" بصوت شبكة وصوت نسائي جميل لا أكاد أميزه يغنونها في "برلمان كافى" ... وهي على ما اعتقد من توزيع محمد جزار أيضًا ... فقابلت زفتهم كيتة من سبقوهم في طريق القوم فكانوا جمالاً على جمال ....
... المهم ....
09-10-2012, 06:31 PM
تبارك شيخ الدين جبريل
تبارك شيخ الدين جبريل
تاريخ التسجيل: 12-04-2006
مجموع المشاركات: 13936
Quote: طبعًا فرقة السودانيين أو سودانيز ساوند أو سودانيز باند هي في مجملها فكرة واحد طويل متسلسلة ذات تاريخ نضالي طويل ضد هذا الصرح الجرح المسمى معهد الموسيقى والمسرح ...
نادر السوداني اكتسب اسمه من الإنتماء للفرقة في جيلها الأول المؤسس في أوائل السبعينات (بعد معهد الموسيقى الفيهو انعرفت!) ... وهو عضو في هذا المنبر ويستطيع أن يأتي لنا بالوقائع التاريخية حين كانوا ينافسون وليام اندريا والبلوستارز وفرقة جاز العقارب وشرحبيل احمد والجيلاني الواثق وكمال كيلا في إحياء ليالي أندية الخرطوم الليلية حين كانت جنة العشاق التي يتغنى لها الأجانب "يا جمال النيل، والخرطوم بالليل" ...
فقد تركت السودان في تسعينات القرن الماضي وأنا أردد أن الكاشف هو ملك الغناء الحديث في الماضي ... ومحمود عبدالعزيز هو ملك الغناء الحديث في الحاضر ... وشرحبيل احمد هو ملك الغناء الحديث في الماضي والحاضر والمستقبل ... (كل هذا قبل انبعاث عنقاء فرقة السودانيين والتي تركت فكرة إحيائها حلم يراود ممدوح طاهر فريد وغاندي احمد رجال والموسيقار المرحوم أحمد تاور ... أيضًا كان موقفي هذا قبل سطوع نجم الموسيقار طه سليمان!)
فالفكرة كانت تراود الكثيرين المثيرين من مطاليق الغنا وهمباتة الشجن الخفي المدسوس في طرب المقامات الشجية ... ولا زالت ...
في هذا السياق أتتنا نوبة هؤلاء الشباب يتغنون "لالوبة يا خدامها الليل بجيب كلامها النوم بقالي ملامة" بصوت شبكة وصوت نسائي جميل لا أكاد أميزه يغنونها في "برلمان كافى" ... وهي على ما اعتقد من توزيع محمد جزار أيضًا ... فقابلت زفتهم كيتة من سبقوهم في طريق القوم فكانوا جمالاً على جمال ....
ياسلام عليك عجبنى الكلام دا عجب ، عجب سيدو زاتو
09-10-2012, 10:27 PM
AMNA MUKHTAR
AMNA MUKHTAR
تاريخ التسجيل: 07-31-2005
مجموع المشاركات: 13702
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة