|
كلام أهلي في بربر الطاعم . . الله يطراكم بالخير
|
تحياتي وأشواقي الحارة لأهلي في بربر والواحد والله مشتهيلو نضمن مقعد (بتشديد العين) ،،،
حكى لي خالي لامن كان في لندن في السبعينات ،،، انو كان في حلفاوي بيسافر بالقطر مسافتن طويلة عشان يناضم بلدياتو ،،،
اللتاريهو النضم شيتن مو ساهل ،،،
كدي انمسكلكم كلماتن قدام و نشوف نسيناهن ولا ليليل ،،،
(الدمفريس)
الدمفريس تعني الشي المخلوتة ،،، و ناس بربر لامن يقولو الدمفريس بيقصدو الشي المخلوتة والتعبانة من ناحية جودتا ،،، و باللوال انشوف صفتا ونعتا ،،، البرابرة بيقولو الدمفريس لباقي الفتة (مثلا في الولايم الكبيرة يعني زي الاعراس) الفتة طبعا بتتكون من الكسرة والرغيف والرز واللحم و البناتي ،،، أها، بعد الجماعة يضربو تمام، الباقي البيفضل دا بيقولولو الدمفريس ،،، لانو بيكون خلتة كسرة ورغيف ورز، لكن اللحم ما ظنيتو يبقى فيهو عقاب ،،،
وجا من الكلمة المثل "يا بت اوعك يجيبوك بباقي دمفريسك" ،،، وتقال للهظار، والزمن دا سامع بيقولو "بي باقي خبيزك"
وبرضو الجنون "الاطفال" الصغار لامن يبقو مخلوتين بنات و اولاد برضو بيقولولن "الدمفريس"
-------------------------------------------
تخريمة: البرابرة معروفين بتنويع الاكل ،،، ياخ لدرجة انو واحد قال "امانة يالمخيرف ما فيكي عجايب، ملاح البامية مخلوت بي دنس" سبحان الله، الزول كانت اول مرة يشوف فيها بامية متبوخة ،،، الدنس طبعا قاصدبو اللحم ،،،
|
|
|
|
|
|