ونحن صغااار ونتشالق في قصة الفنانين ونحن ملمومين تحت شجرة النيمة ذات نهار مسخخن جات السيرة عن الاستاذا ود اللمين واحد من أولاد الحلة قال لينا أووووو ياخ ود اللمين ده ملك العووود ..قبل كده جابوهو في لقاء انا حضرتو قال فيهو والله لو ما إحترامي لي الموسيقى كنت عزفت العود بي رجلي.. رسخت المعلومة في ذهني تمااماً بل وإستلمتها ليكم من صاحبنا ده وبقيت بقشر بيها كمعلومة وأصصر وإلللح إنو انا زاااتي قبل كده سمعتها في لقاء تلفزيوني.. قبل فترة وانا قاعد مع يمني وكان مشغل تلفزيون اليمن جابو فنان يمني صوتو جميل وبيعزف العود بي طرقة جميييلة قمت علقت لي اليمني ده بي إنو الزول ده شكلو فنااان شديد وبيعزف العود بي طريقة غريبة .. رد علي اليمني بي إنو أووو ده الفنان فلان الفلاني وهو معروف بي عزفه على آلة العود وواصل قائلاً : يا عمر هذا الفنان في لقاء تلفزيوني قال لمقدم البرنامج لولا إحترامي للفن لعزفت على العود بقدمي !!! نفس الحكوة تكررت لي مع صديقي السعودي وانا أحادثه عن إعجابي بالفنان عباد الجوهر وكيف أن عزفه على آلة العود مريييحة فرد علي السعودي : يا عمر عباد الجوهر قال في لقاء صحفي لولا إحترامي للعود لعزفت عليه بقدمي !!!
من القصص أعلاه إتضح لي تماااماً إنو المقولة دي يا إما ما عندها سييد يا كمان سييدا واحد لكن بعد داك إتلفحت وأييي زول بقا يللصقا في فنان من بلدهم..
نموذج تاني متعلق بي النكات .. كتيير من النكات بتتحكي في المجالس على إنها موقف حقيييقي والزول يحلف لييك يقول ليك حصلت لي صحبي وانا كنت قاااعد معاهو لمن حصلت ..تقوم بعد فترة تمشي لي منطقة تانية تلاقي نففس النكتة بيحكيها ليك زول تاني ويحلف ليك إنو حصلت ليهم فييي الحلة عندهم وهو أحد الشهود عليها.. يعني مننن ونحن صغااار أييي زول بيحكي ليك إنو في حصة الإنجليزي في واحد صاحبم الأستاذ قال ليهو أقرا كلمة Enough يقول ليك قراها ليهو أنقهي وواحد تاني يقول ليك الأستاذ وقف اصحابي يقروا في حصة الإنجليزي قام الأول قال ليهو ويير إز ذا كنايف التاني رد ليهو آي دونتي كنو .. والقصة دي يبدو إنها مننن الستينات أيي زول بيقول ليك حصلت لي صحبي..
نموذج تالت متعلق بي القصص حقت المغتربين خصوووصاً في الخليج ..المغترب في الإمارات يحكيها ليك على إنها حصلت في الأمارات وفي شركتهم ..المغترب في السعودية يحلف بي التقطعو إنها حصلت عندهم وهو كان حاااضر ..والمغترب في قطر يقول ليك وحاااة الله القصة دي انا شوفتها بييي عيني .. اللي هي يجي واحد يحكي ليك يقول ليك إتنين من الكفلاء (اصحاب العمل الخلايجة) قاعدين مع بعض بيتونسو قام واحد فيهم قال للتاني أوريك الفرق شنو بين المصري والسوداني؟؟ داك قال لهيو أييييوة .. اها قام الكفيل الخليجي(طبعاً محل خليجي دي خوتو سعودي إماراتي قطري حسب رواي القصة مغترب وين) نادا ليك المصري وقال ليهو الليلة يوم كم؟؟ المصري قال ليهو اللية يوم 15 ..قام الكفيل قال ليهو خلاص نهاية الشهر نحن قررنا ننهي خدماتك ونتخلى عنك ونعمل ليك خروج نهائي..فقام المصري جا للكفيل وباس يدو ولييه يا بيييه وانا عملت إييه وأبووس إييدك خليني انا عندي عيال أربيهم وعندي وعندي ..أبووس رجلك يا بيه..فقام الكفيل قال ليهو خلاص كدي أمشي وبنشوف.. قام الكفيل نادا السوداني وقال ليهو جيب ملفات الحسابات وتعال..أها وسألو الليلة يوم كم ؟ السوداني قال ليهو يوم 15 ..فرد الكفيل خلاص يوم 30 في الشهر ح يكون اخر يوم ليك وح نعمل ليك خروج نهائي ..قام السوداني رمى ليهو الملفات في وشو وقال ليهو وليييي يوم 30 ؟؟هاكم عواليقكم دي من أسسسة وده طرفي منكم !!!!!
حقيقي إستوقفتني هكذا قصص وهكذا حنك وبقيت ما عارف الفهم منها شنو والرواي بيكون غرضو شنو لمن يستلم قصة سواء كانت نكتة أو مقولة أو موقف ينسبها لي روحو وإنها حصلت وهو شاهد عليها !!! النماذج كتيييرة والقصص أكتر...
تخريمة : عندنا صاحبنا الأستاذ كتب في السبورة I shall Do وقال ليهو أقراها قام صاحبنا قراها إسهال دو..
08-25-2012, 08:15 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
واحدة من أسباب كتابة الموضوع ما كتبه الأخ aosman فيما يتعلق بطلب إمام مسجد سعودي أن يبقى السودانييون بعد صلاة الجمعة ثم خاطبهم فيما يتعلق بي نسوانهم !!! القصة أعلاه سمعتها بي أكتر من رواية من أكتر من زول يقطن في حي معظمه سودانيين فمرة أسمعها من منفوحة ومرة من غبيرة ومرة من النسيم ومرة من ومرة من .. والأغرب إنو القصة دي بسمع فيها مننن وانا مغترب كرت كرتونة حكاها لي اصحابنا من ققدامى المغتربين عام 2003 م!!!! يعني إمام الجامع ده يا aosamn منن 2003 قاعد يقعد السودانيين بعد صلاة الجمعة وعليه أن تناقش في حادثة حصلت قبل 10 سنوات تقريباً حسب ما إتحكت لي نفس قصتك دي !!
08-25-2012, 08:21 PM
الرفاعي عبدالعاطي حجر
الرفاعي عبدالعاطي حجر
تاريخ التسجيل: 04-27-2005
مجموع المشاركات: 14684
وبالبوست كتبت يا ابن صديقي العزيز شيخو صاحب البقالة الخيرية كتبت في البوست اننا نحن من يساهم في الترويج ونحن اهل لذلك ألم تسمع وانت صغنوني بقصة الراجل اللي لقى ضب في سبيل جاره وقام قال لي واحد لقيت ليك ضب ليهو ضل مشى الشغل ولما جاء وجاء العصر الولية تسوي في الغداء قالت ليهو ما سمعت بسبيل خير الله لقو فيهو تمساح , شفت كيف من ضب الى تمساح . وتمضي الحكاية سيدا النعيم اللي حرمه هيثم مصطفى من البقاء في صفوف الهلال .
الرفاعي يا خاااال: عيدك مبارك ياخ وكل الحاجات تكون رايقة ..
Quote: وتمضي الحكاية سيدا النعيم اللي حرمه هيثم مصطفى من البقاء في صفوف الهلال .
ياخ تعرف مثالك ده حباااابو شديييد وفعلاً بيقرب من الفكرة تمااماً..الناس ليها جغلومية سنة تتناقل سيييدا دمر النعييم سييدا حرم النعيم من اللعب سييدا شطب النعييم ..أهوداك النعيم ليهو سنتين برا الهلال وما لعب ليهو نص ساعة !!! والمشكلة لو سألت الجماعة ديل انتو عرفتو كيف؟؟ يقولوا ليك قالوا لينا !! ووالله الواحد فيهم لمن يحكي ليك القصة تحلف تقوول إنو كان قاااعد جووة التمرين مع اللعيبة ..
تخريمة : الراجل قال ليهو ألحححق مرتك الليل كلللو قاعدة مع راجل غريب في الغابة براااهم ما جات راجعة البيت إلا وش الفجر.. قال ليهم هن كلللهن شجرتين ..خلااااص عملتوها غابة ؟
08-25-2012, 10:32 PM
حمزه بابكر الكوبي
حمزه بابكر الكوبي
تاريخ التسجيل: 04-13-2009
مجموع المشاركات: 2121
الفاروق سلام وكل سنة وانت طيب قصة الزول في القاهرة داير يقول كلمة كبكبيه (الحمص) بالطريقة المصرية ابقى بيه سمعتها والله في التلفزيون القومي من عدة مشاهير نسبوها لاصحابهم وانهم كانوا موجودين في الموقف ده !!!؟؟؟
08-25-2012, 10:37 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
تعرف برضوا من القصص السمعتها زمان قصة ضابط الجوازات القال للسوداني الاسمو عبيد (ندري انك عبيد بس شو اسمك ) وبرضو قصة الزول الاسمو السر طه وضابط الجوازات القرأ اسمو الشرطة سمعتها من واحد جاي من السعودية وواحد تاني من ليبيا وتالت من العراق ايام العراق فيها مغتربين وده عادي انك تسمع نجر زي ده لكن قصة الكبكبي دي الزول يسمعها مرة رواية عن احد المشاهير (نسيت اسمه) والراوي حسين خوجلي في التلفزيون ومرة تانيه تسمعها من فنان (توفاه الله) ولاداعي لزكر اسمه بأنه من المواقف الطريفة المرت بهم في القاهرة وبطلها احد العازفين معاه ومرة تانية اسمعها من المذيع عوض ابراهيم عوض وده كله في التلفزيون ده يبقى عبط
حكاية الككو دي شكلها فعلا مستحدثة لانه ماحجونا بها لسع فكدي احكيها لينا شمارة ساكت
08-26-2012, 03:08 AM
الصادق اسماعيل
الصادق اسماعيل
تاريخ التسجيل: 01-14-2005
مجموع المشاركات: 8620
... قصة الفنان السالوهو عن امنيتو الفنيه وقال ليهم احجج أمى دى سمعتها بأضانى فى تلفزيون السودان .. اللهم الا اذا كان هناك فنان يمنى عمل نفس العملية فلا ارى إمكانية لسماعها anywhere else
08-26-2012, 07:41 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
Quote: أنا على الاقل سمعتها عن تلاتة (مناطق صناعية) الخرطوم والابيض وسنار.
الصادق اسماعيل ..وعيدك مبارك ياخ.. ضييف عندك منطقة صناعية رابعة في امدرمان ..سمعت نفس القصة بي نفس المفهوم مع تغيير طفيييف .. شكلو صنايعية البلد دي يدينهم مفاتيح إنجليزية ماشاء الله ..
08-26-2012, 08:17 AM
omer osman
omer osman
تاريخ التسجيل: 06-09-2007
مجموع المشاركات: 15218
يا أبو عمير: قصة المرحوم سامي مع سيكو دي في منها نسخة مع منتصر الزاكي زيكو يقولوا ليك كان بيلعب ليهو الكورة مقصرة .. وطبعاً في منها كم نسخة تاني مع لاعبين تانيين يشبكوك اللعيبة بيدسو منهم عشان ما يعرفو يلعبو الباص وين.. أما قصص نميري دي فرييحتني في حناني ..في منها روايات بي الكوووم..غير أن حكاية لبنان دي تستاهل نديك فيها جائزة :)
08-26-2012, 09:37 AM
rani
rani
تاريخ التسجيل: 06-06-2002
مجموع المشاركات: 4637
عمر ...دا بوست مبدع وواجب الاضافة فيهو ... - سبب ثروة صلاح ادريس 300 الف ريال هدية من بن محفوظ لانقاذه من الافلاس ابان ازمة بنك الاعتماد والتجارة - قصة السوداني السحر الكفيل السعودي الحرمو من حقوقو وقال ليهو حتجيبا لي وفي النهاية الكفيل مشى ليهو وفك ليهو القربة وحب يديهو زيادة قام قال حقي بس لا زايد لا ناقص - قصة المية الف الاداها امير لي زول كاتب في قزاز عربيتو من ورا (لا اله الا الله محمد رسول الله) وبعدها انتشرت الظاهرة عسى ولعل الامير تاني يسويها - قصة الزول بتاع صينية ش البلدية القال ( نميري جاكم من خور عمر المرة دي جاكم عمر صاحب الخور زاااااااتو) -السوداني الفي ايام الطفرة اغترب عشان سمع انو الناس بتخم في القروش خم في السعودية نازل من الباخرة في جده لقى ليهو خمسمية ريال واقعة لزاها بي رجلو وقال (بدينا) - حكاية الفنان خليل اسماعيل لما اكل الفاصوليا في العشاء وقام بتاع الاكورديون خلى العزف وكورك (ياخي انا بعزف اكورديون والا سايق كارو) - مقولة الفنان وردي عن آل البنا ( ناس البنا ديل ما بطلع منهم فنان ما دامو مكنكشين في (الشنطة) دي قاصدا اغاني الحقيبة
08-26-2012, 12:30 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
يا سلاااام يا طاهر يا بدر .. والله قصصك عييينة .. والعجب قصة مندول المبيعات العايز من كفيلو قروش وداك ما عايز يديها ليهو قام يوم مشى جمع ليهو مية ألف ريال ومشى المطار وقف العربية وضرب لي كفيلو من السودان قال ليهو العربية في المطار وباقي القروش في الدرج انا شلت منهم حقي بس..
08-26-2012, 01:04 PM
الفاتح شلبي
الفاتح شلبي
تاريخ التسجيل: 02-27-2009
مجموع المشاركات: 2141
وحكاية السوداني فى الرياض واقف فى شارع عام وأشر لسيارة مارة طلب من سيدها نظام " قدام معاك " واتضح ان سيد السيارة الأمير خالد بن الوليد بن طلال, فقال الأمير للسوداني مازحاً بآخد منك 20 ريال حق التوصيل والسوداني رفض وقال 10 ريالات بس ... ولما وصل حيث يريد السوداني هم بالنزول وهو يمد 10 ريالات للأمير ... الأمير قال " إنت ما عرفتني؟" رد عليه السودان لا ما عرفتك فقال الأمير " أنا خالد بن الوليد" ... ضحك السوداني وناول 10 ريالات إضافية ومدها للأمير وهو يقول " أمسك عشرينك قبل لا تقول أنا عمر بن الخطاب "
تخريمة: جنابو عمر يا حريف ... أسحب مقولة أن جماهير الهلال أكثر من جماهير المريخ من القائمة دي ... واحد من عندينا مسجل الجماهير بالأسماء
08-26-2012, 01:37 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
غايتو يا الفاتح شلبي انا حصلت لي واحدة فييي رمضان ده وحقييقيية غايتو ما زي نجر المغتربين ده :) الحتة الشغال فيها انا معظمها هنود ونحن ماكتبنا Open Area ..أها في هندي جا ووقف شكلو كان بيفتش لي وهو ما بيعرفني ..أها المهم لمن جا وقف جمبي هوووزز راسو كداا وقال لي : إنت فيي عمر بن الخطاب؟؟ قلت ليهو يا زووول حبااابك وصصصلت تتتتتب
08-26-2012, 04:34 PM
ابوحراز
ابوحراز
تاريخ التسجيل: 06-27-2002
مجموع المشاركات: 5515
نكتة جدي والتي حدثت معي شخصياً وجدتها متداولة في الكثير من المنتديات وهي والله لأول مرة تحدث والنكتة هي في مناسبة غداء عادية حيث كنا في سماية ونحن من مختلف الوان الطيف يعني مهندسين واطباء وعمال ورعاة وميكانيكية وسائقين وغيرهم كالعادة بدات الونسة بعد الغداء حتى أذن العصر وكانت كلها تدور حول كبار السن والكاريزما التي يمتازون بها وكذلك القوة والهيبة وتطرقنا عن التنظيم الغذائي لهؤلاء الناس وكيف أن بنيتهم قوية 00 وهنا كانت الطامة وبكل براءة قلت لهم أن جدي وذكرته بالاسم : قلت لهم ان جدي لايشرب موية نهائيا في الشتاء وبالفعل هو كذلك لأنه يشرب اللبن والسمن بكمية كبيرة جداً فرد أحد الميكانيكية 00 ياخي دا جد وللا فلوكسواجن أسمع ليك الناس الشغالين في الورش كلهم يضحكوا والله انا لو تصدق نهائيا ما فهمت الرجل يقصد شنو ولكن ضحكت معهم مجاملة اها سالت 00 فذكروا لي أن الفلوكسواجن تأتي بدون لديتر الماء !!!
اها كتير القى واحد قاعد يقشر بالنكتة دي ويقول جدي جدي !!!
أووووول حاجة وقبل كل حاجة.. شايف في نشاط مريب وغريب للعضو عمر الفاروق هذه الأيام.. ورجع بنفس (البور) تقرأ (power) ويمكن بزيادة.. ولو عرفنا السر في الموضوع والله ما بنقصر وبنشارك.. وبنجيب ليكم كلام من بيت الكلاااااوي..
08-26-2012, 06:24 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
الغريبة نحن عندنا جارتنا رحمة الله عليها حاجة التومة مرا ساخرة جداً وكانت كل ما تزورنا في البيت تلقانا عاملين ملاح رجلة ووقتها يبدو إنو الرجلة كانت أرخص خضار ..لكن أبوي الله يديهو العافية تبريرو لي حاجة التومة ما كن كده .. قال ليها يا حاجة التومة الرجلة دي فيها مواد حديديية .. ردت بسخريتها المعهودة وهو متمحنة ومقبلا وشها للحيطة وقالت ليهو : هي يا يمة هيييي والله لو كده انا كان بقيت كمر * من رجلتكم الكلو يوم دي..
_________________________ * لعناية المطوفشة وضاحة عشان ما تجي تنطط وتتخللع فينا ..الكمر ده حدييدة صلبة بيثبتو بيها السقف
08-26-2012, 06:27 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
Quote: أووووول حاجة وقبل كل حاجة.. شايف في نشاط مريب وغريب للعضو عمر الفاروق هذه الأيام.. ورجع بنفس (البور) تقرأ (power) ويمكن بزيادة..
دي العاصفة التي تسبق الهدوء.. أخوك زييي البيبسي لازم يعمل دعايات كل فترة عشان يحافظ على وضعه في السوق وإن كان لا يحتاج للدعاية لكن لو صن الكوكاكولا بتضرب منو السوق .. أها أبشرك انا كده كفاي ..وتاني تحلموا بي حلم .. :)
تخريمة : الله يجازي اللي كان السبب بس الحمد لله شدة وزااالت ..
08-26-2012, 06:44 PM
محمد عبد الرحيم جمعة
محمد عبد الرحيم جمعة
تاريخ التسجيل: 12-18-2009
مجموع المشاركات: 815
السلام عليكم أجمعين عمر الفاروق ردك بليغ على حكاية الإمام مع السودانيين.
Quote:
لما يقولوا ليك السوداني قال للمصري إنت إرد ولا أأو .. (قرد ولا ككو ) ..
- البنت السودانية الضاعت من أسرتها في العتبة قالت للعسكري المصري أنا رايحة، قال ليها طب ما تروحي في حد حاشك. - المصري هنأ المصري قال ليه رمصان مبارك، فرد عليه قائلاً رمضان مرسي. - الأفريقي أو الأسوي الذي يدرس بالأزهر وقال للمصري بلسانٍ عربيٍ مبين( أخي أريد الذهاب إلى مدينة البحوث الاسلامية ولكن ضللت طريقي فهل دليتني؟ فقال له المصري (صدق الله العظيم ) خذ 51 العباسية.
Quote: نموذج تالت متعلق بي القصص حقت المغتربين خصوووصاً في الخليج....
- الخليجي في الهاي وي بنشرت سيارته ومحتاج مساعدة ولم يتجاوب معه أحد في النهاية لبس العمة السوداينة وعتدها كم هائل من السودانيين وقفوا لمساعدته.
Quote: قصة المرحوم سامي مع سيكو دي في منها نسخة مع منتصر الزاكي زيكو يقولوا ليك كان بيلعب ليهو الكورة مقصرة .....
-
- في معسكر المنتخب أي حركة رياضية صعبة يعملها عز الدين الدحيش بالكرة سانتو يعملها تماماً بل يتوفق أحياناً، الدحيش اغتاظ منه، هز شعره ميمنة وميسرة وقال ليه تعال أعمل دي. " sorry for racism smell"
Quote: الضابط في الاحتياطي المركزي قال للعسكري امشي جيب لي (سفنجة) بعد شوية سمع ابنصات اللوري السفنجة بره المكتب !!!
- نفس الضابط بعد عمل البيادة اللازمة للعسكري قال ليه أمشي اقيف في آخر الصف ومشى وجاء راجع قال ليه في آخر الصف في واحد.
08-26-2012, 07:39 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
Quote: الخليجي في الهاي وي بنشرت سيارته ومحتاج مساعدة ولم يتجاوب معه أحد في النهاية لبس العمة السوداينة وعتدها كم هائل من السودانيين وقفوا لمساعدته.
طبعاً دي فيها الرواية المدنكلة ..يقولوا ليك الخليجي عربيتو باظت في طريق صحراوي وقدر ما وقف زول ماف زول عبروا أها في النهاية وقف ليهو سوداني ولما ما قدر يساعدوا قال ليهو يا إبن العم انا غايتو ما بقدر اعمل ليك غير حاجة واحدة وقام قلع عمتو وربطا للخليجي وقال ليهو كده ح يقيفوا ليك السودانيين ..وقد كان وقفوا ليهو مليون سوداني وصلحوا ليهو عربيتو ومازال يحتفظ هذا الخليجي بي العمة ..
Quote: في معسكر المنتخب أي حركة رياضية صعبة يعملها عز الدين الدحيش بالكرة سانتو يعملها تماماً بل يتوفق أحياناً، الدحيش اغتاظ منه، هز شعره ميمنة وميسرة وقال ليه تعال أعمل دي. " sorry for racism smell"
وبرضو يقولوا ليك علي قاقرين مرة موصيين بشارة ولا منو ما عارف يكون زي ضلوا ..أها معاهو جكسا أظنو ونضمو عربي قام فهمهم بعد داك حاولوا إنجليزي برضو فهم خطتهم ..أها بعد داك دوورو فيهو فرنسي ما فهم حاجة وجابو قوون بي الخطة النضموها دي..
08-29-2012, 01:32 PM
طاهر بدر
طاهر بدر
تاريخ التسجيل: 05-30-2012
مجموع المشاركات: 555
عمر ...خلي البوست دا مدور ما ينزلق ... ذو شجون وممكن نعرف لينا مصدر مصدرين من اصحاب المواقف والنكات . . .
Quote: نحن عندنا جارتنا رحمة الله عليها حاجة التومة مرا ساخرة جداً وكانت كل ما تزورنا في البيت تلقانا عاملين ملاح رجلة ووقتها يبدو إنو الرجلة كانت أرخص خضار ..لكن أبوي الله يديهو العافية تبريرو لي حاجة التومة ما كن كده .. قال ليها يا حاجة التومة الرجلة دي فيها مواد حديديية .. ردت بسخريتها المعهودة وهو متمحنة ومقبلا وشها للحيطة وقالت ليهو : هي يا يمة هيييي والله لو كده انا كان بقيت كمر * من رجلتكم الكلو يوم دي.
. . . هسي يا عمر نفهم انو حجة التومة نجرت النكتة الشهيرة بتاعت الكمر البقولوها ناس الهيلا هوب بتاعت العذابي الماسك الميز وشابكم رجلة رجلة والا حجة التومة سمعتا قبلك وجات قالتا ليكم وانت اتخيلت انها هي صاحبة النكتة . . كسرة : حموري في مدني مختوتة عليهو حالات كتيرة ما معروف مدى صحتا منها: - في مباراة خارجية لقى مكتوب (دورة المياه) قام سأل اللاعب الجمبو دي الدورة النحن مشاركين فيها - قالو كان عندو بيجو وقف بيها اخد من فرن عبد الغني عيش حار وختاهو في الكنبة الورا وبعد ما اتحرك جاتو ريحة العيش اشتهاه مد يدو ما حصل الكيس قام وقف العربية وختا التعشيقة على حركة ورا - ومرة جا ينزل من العربية لقى في مطره قام رجع وفتح الباب التاني ونزل منو .....وكتيرة حكاويهو سمعناها زمان في مدني . . . غايتو نحن في السكوت بنعرف مصدر النكات منهم زول مشهور اسمو سيد تلول من منطقة عبري وصاي ملقب بي جحا النوبة بجيك لي بعض نكاته ...
08-29-2012, 01:50 PM
محمد عبدالرحمن
محمد عبدالرحمن
تاريخ التسجيل: 03-15-2004
مجموع المشاركات: 9059
انت فى النعيم ...ولا اللاعب المشهور لازم يكون عندو اخو العب منو لكن ماصدقت معاهو ...وبالطبع انت بتكون ماشفتو ...يقول ليك (انت ماشفت اخوهو ياخ داك بقول ليهو انت بتعرف شنو ) ...الغريبة انا مرة سالت والى الدين عن اخوهو قال لى (اخوى العب منى ... والله مابقدر العب معاهو نهائى ) ...محمد السنى دفع الله برضو مرة قال لى (اخوى بمثل احسن منى ) ...الحمد لله انا شفتا نميرى احمد سعيد وعصام احمد سعيد..وشفتا كندورة وعلى اخو كندورة ...فرق السما.. زول بغالطنى فيهم مافى ....
08-29-2012, 02:15 PM
معاوية المدير
معاوية المدير
تاريخ التسجيل: 03-24-2009
مجموع المشاركات: 14411
Quote: حموري في مدني مختوتة عليهو حالات كتيرة ما معروف مدى صحتا منها: - في مباراة خارجية لقى مكتوب (دورة المياه) قام سأل اللاعب الجمبو دي الدورة النحن مشاركين فيها - قالو كان عندو بيجو وقف بيها اخد من فرن عبد الغني عيش حار وختاهو في الكنبة الورا وبعد ما اتحرك جاتو ريحة العيش اشتهاه مد يدو ما حصل الكيس قام وقف العربية وختا التعشيقة على حركة ورا - ومرة جا ينزل من العربية لقى في مطره قام رجع وفتح الباب التاني ونزل منو .....وكتيرة حكاويهو سمعناها زمان في مدني .
وبرضو بيسألوهو، ألف الطوب فيهو كم طوبة؟؟؟ يقول ما عارف. !!!
وقصة الزول الملّح مع وآحد، وطلعوا ماشيين نفس البيت.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة