ملحوظة مهمة الخريطة أعلاه ملونة حسب إرتفاع الارض من مستوى سطح البحر راجع مفتاح الخريطة : الابيض 1500 - 1000 متر البني 1000 – 500 متر الاصفر 500 متر أو أقل الاخضر مستوى سطح البحر تقريباً الخريطة مدرجة الالوان حسب الارتفاعات و ثلاثية الابعاد كذلك
ورد في جريدة الرائد السودانية أن إمام وخطيب مسجد الشهيد بالخرطوم الشيخ عبد الجليل النذير الكاروري قد دعا السودان ومصر للعمل على تحويل مجرى النيل عبر جبل أولياء مروراً بمنطقة كورتي بدلاً عن حلفا ،وقال إن عملية التحويل ستعالج مشكلة التبخر التي تتعرض له مياه النيل كما أن ولايات الخرطوم ودارفور وجزء من كردفان ستستفيد من عملية التحويل. ونبّه الكاروري إلى ضرورة العمل على تنفيس مياه النيل حتى لا تتحول الفيضانات التي تشهدها بعض أجزاء البلاد حالياً إلى نقمه بدلاً عن نعمة، ونادى بضرورة الإستفادة من تعيين وزير مصري متخصص مؤخراً في المياه والري.
هذه الفتوى في خطبة الجمعة تعتبر أحدى عجائب و محن شعب السودان الذي لا تنقطع غرائبه ! فأي طالب هندسة مدنية في المستوى الثالث ناهيك عن المتخصصين في علم المياه يعرف بالبداهة الحقائق العلمية التالية عن نهر النيل و المياه في السودان :-
1. فقدان مياه النيل نتيجة للتبخر يحدث معظمه في منطقة المستنقعات بدولة جنوب السودان تحديدا منطقة جونقلي حيث يمكن توفير 4.7 مليار متر مكعب بحفر هذه القناة التي توقف العمل بها منذ العام 1983 لاسباب سياسية و أمنية. التعاون مع دولة جنوب السودان الوليدة و تمويل حفر قناة جونقلي سيساعد السودان كثيرا قي زيادة نصيبه من المياه ، الجدير بالذكر ان هذا المشروع توقف بعد اكتمال 75% من مراحل تنفيذه
2. حسب إتفاقية مياه النيل الموقعة عام 1959 بين مصر و السودان فإن نصيب مصر هو 55.5 مليار متر مكعب من المياه في العام ، و نصيب السودان من مياه نهر النيل هو 18.5 مليار متر مكعب من المياه في العام. الطاقة التخزينية لجميع سدود و خزانات السودان هي 11.19 مليار متر مكعب موزعة كالتالي: (خزان سنار 0.39 مليار متر مكعب من المياه + خزان الرصيرص 3 مليار متر مكعب من المياه + خزان جبل أولياء 3.5 متر مليار مكعب من المياه + خزان خشم القربة 1.3 مليار متر مكعب من المياه + سد مروي 3 مليار متر مكعب من المياه). و هذا يعني ببساطة أن 7.31 مليار متر مكعب من المياه من حصة السودان – الضئيلة أصلاً – من مياه النيل مفقودة لا يتم إستغلالها و تذهب مع النيل حلالاً لمصر التي إما أن تستغلها أو حتى تستغنى عنها لتصب في البحر الأبيض المتوسط. أي أن السودان أصلاً يضيع 7.31 مليار متر مكعب من المياه من حصته السنوية، فمت فائدة الحفر المكلف لهذه القناة؟ أليس من الاجدى زيادة السعة التخزينية للبلاد بتعلية خزان الروصيرص أو حتى بناء خزان جديد؟
3. تخزين و حفظ المياه في المناطق شمال الخرطوم غير ذي جدوى إقتصادياً و زراعياً و حتى من سد مروي الغرض الأساسي منه هو توليد الكهرباء و ليس تخزين المياه ، فموقع بحيرة السد في أقصى شمال السودان في منطقة صحراوية لاتوجد بها تربة صالحة للزراعة يجعل المياه المخزونة في هذا السد بلا فائدة تقريباً غير الكهرباء، حيث أن تكلفة ترحيل هذه المياه الى المناطق الزراعية في وسط السودان باهظة للغاية. فماهي الفائدة التي سيجنيها السودان من حفر هذه القناة؟
4. تعليه خزان الرصيرص كانت تستحق الأولوية اكثر من إنشاء سد مروي ، فدراسة الجدوى الخاصة بخزان الروصيرص المعمولة في العام 1904 كانت توصي بإنشاء الخزان على مرحلتين لأولى بسعة 3 مليار متر مكعب ومرحلة ثانية ترفع سعته الى 7.4 مليار متر مكعب. تم الانتهاء من تنفيذ المرحلة الاولى فى العام 1966 م ، و بالمقارنة نجد سد مروي يوفر 3 مليار متر مكعب بينما تعلية خزان الرصيرص كانت ستوفر 4.4 مليار متر مكعب ، و حتى من ناحية التكلفة فتكلفة تعلية خزان الرصيرص 396 مليون دولارأمريكي بينما تكلفة إنشاء سد مروي بلغت 2 مليار دولارأمريكي تقريباً. أليس من الأجدى تمويل تعليه خزان الرصيرص بدل حفر هذه القناة العبثية التي تشابه فكرتها حفر ترعتي الرهد و كنانة ذلك المشروع الفاشل لهذه الحكومة في بداية عهدها؟
5. حسب طبوغرافية الارض و منطق البداهة فإن المياه في الأنهار تجري في أكثر الأراضي إنخفاضاً ، و هذا هو المسار الحالي لنهر النيل من السبلوقة مروراً بشندي و عطبرة و مروي. بالنظر للى الخريطة المرفقة أعلاه فإن مسار القناة المقترحة للشيخ الجليل الكاروري سيعاكس إنحدار الأرض و الجريان الطبيعي للمياه، حيث يستدعي ذلك الحفر بزاوية 45 درجة عبر تربة صخرية مرتفعة لأعماق قد تزيد عن 600 متراً فوق سطح البحر. هذا مشروع عبثي و مكلف جداً و لا توجد أي جدوى إقتصادية أو زراعية له.
6. لو إفترضنا جدلاً انه تم حفر هذه القناة المزعومة حسب رغبة الشيخ الكاروري ، فإن سريان نهر النيل عبر سد مروي سيتوقف تماماً و يصبح هذا المشروع عملياً خارج الخدمة ، و هكذا سيفقد السودان 1250 ميقاوات من الكهرباء (الطاقة الانتاجية الكاملة حسب التصميم ما يتم انتاجه اقل بكثير و ضعف شبكات التوزيع لايسمح حتى بتوصيل ما انتج) ، و سيكون عليه سداد تكلفة سد مروي لدائنيه و مقدارها 2 مليار دولارأمريكي هذا غير الفوائد السنوية الربوية المركبة لهذا الدين و التي تتناقض مع الشريعة الاسلامية التي يدعو لها الشيخ الكاروري.
7. الحماية من الفضيانات أو (العمل على تنفيس مياه النيل) كما ادعى الشيخ الكاروري بهذه القناة، هو قول حق اريد به باطل ، قالقناة الهدف منها تحويل مسار نهر النيل (حسب ادعائه) و ليس توفير مسار اضافي لتسريب المياه عند الفيضان. معروف ان اكثر المناطق تأثراً بالفيضانات هي المناطق شمال مروي مثل دنقلا العجوز و حلفا ، مسار القناة الحالي لا يوفر اي حماية لهذه المناطق فنفس كمية المياه ستصلها عند الفيضان فقط عن طريق مسار جديد هو قناة الشيخ المزعومة، و على العكس تماما فهذه القناة ستعرضها لخطر اكبر لأنه سيتم إخراج سد مروي – على علاته – من مسار نهر النيل و الذي احد اهدافه أساساً حماية هذه المناطق من الفيضان عبر تخزين المياه في بحريته ذات الطاقة التخزينية البالغة 3 مليار متر مكعب من المياه في العام. و حتى لو ادعى الشيخ الكاروري أنه يريد حماية مناطق شندي و عطبرة من الفيضان فإن تعلية خزان الرصيرص ستقوم بهذه الخدمة إضافة لفوائدها الإقتصادية و الزراعية و هي كانت أفضل و أقل تكلفة من بناء سد مروي من الأساس.
8. إدعاء الشيخ الكاروري أن هذه القناة ستوفر المياه ل(ولايات الخرطوم ودارفور وجزء من كردفان) هذا كلام لا تصدقه حقائق الجغرافيا ، فالمنطقة غرب امدرمان أصلا صحراوية لا تصلح للزراعة و مياه الشرب موجودة أساساً في نهر النيل بالقرب منها يعيبها فشل الهيئة القومية للمياه للتوصيل ، و دارفور بعيدة كل البعد عن هذه القناة المزعومة و كردفان لا علاقة لها بها كذلك ، و حتى لو حفرت هذه القناة في وسط دارفور و كردفان فإن طوبغرافية الارض ستعيد المياه نحو المجرى القديم لنهر النيل لأن الماء يعرف أن جريانه يكون حيث الإنخفاط (بالفطرة).
ختاماً أقول هذه النتيجة الحتمية لسياسات الحكومة السودانية في إفراغ العلم من محتواه و خلطه بالدين و السياسة ، بحيث أصبح خطباء المساجد يفتون عبر خطب صلاة الجمعة في الهايدروليكا و مكانيكا الموائع و جريان المياه. هذا النوع من العبث أدى إلى إفراغ البلاد من خيرة كفاءاتها من المهندسين و العلماء الذين درسوا في جامعاتها و كان من الأولى أن يستفاد بهم في التخطيط السليم لآخر ثروات السودان التي لم تستطع يد حكومة البشير ان تطالها بعد و هي المياه. ولا عجب أبداً من أن يدعو الشيخ الكاروري حكومته الى تعيين وزير (مصري) متخصص في المياه والري لأن جميع الخبرات و الكفاءات الهندسية قد هاجرت عن هذه البلاد التي هي أمنا الغولة التي تأكل بنيها ، و حتى من بقى فإنه يبحث للهجرة سبيلاً و لكنه قطعاً لن يجاري الشيخ الكاروري في هذا العبث.
شكرا يا باشمهندس على المرور وعليك الله نقول شنو ؟ الكاروري مُصر اصرار صرير يدخل نفسو في اي شئ وانا متذكر انو قال اخترع ليهو عجلة قبل كدة مذكورة في تعليق واحد من الشباب تحت الصورة في فيسبوك.
بلد منتهي
08-12-2012, 08:11 PM
أحمد الشايقي أحمد الشايقي
تاريخ التسجيل: 08-08-2004
مجموع المشاركات: 14611
Quote: ختاماً أقول هذه النتيجة الحتمية لسياسات الحكومة السودانية في إفراغ العلم من محتواه و خلطه بالدين و السياسة ، بحيث أصبح خطباء المساجد يفتون عبر خطب صلاة الجمعة في الهايدروليكا و مكانيكا الموائع و جريان المياه. هذا النوع من العبث أدى إلى إفراغ البلاد من خيرة كفاءاتها من المهندسين و العلماء الذين درسوا في جامعاتها و كان من الأولى أن يستفاد بهم في التخطيط السليم لآخر ثروات السودان التي لم تستطع يد حكومة البشير ان تطالها بعد و هي المياه.
08-12-2012, 08:30 PM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
Quote: . حسب طبوغرافية الارض و منطق البداهة فإن المياه في الأنهار تجري في أكثر الأراضي إنخفاضاً ، و هذا هو المسار الحالي لنهر النيل من السبلوقة مروراً بشندي و عطبرة و مروي. بالنظر للى الخريطة المرفقة أعلاه فإن مسار القناة المقترحة للشيخ الجليل الكاروري سيعاكس إنحدار الأرض و الجريان الطبيعي للمياه، حيث يستدعي ذلك الحفر بزاوية 45 درجة عبر تربة صخرية مرتفعة لأعماق قد تزيد عن 600 متراً فوق سطح البحر. هذا مشروع عبثي و مكلف جداً و لا توجد أي جدوى إقتصادية أو زراعية له.
لفتت نظري الفقرة اعلاه واشك في ان من كتبها مهندس مدني يعرف طبيعة ارض السودان البروفايل البسيط ادناهو يقول ان ما كتب اعلاه خطأ
و اموت واعرف الـ600 متر جابها من وين وللمعلومية الـ بالشمال دي الخرطوم وواضح انها اكثر ارتفاعاً وطبعا ده مسار مستقيم عشوائي يربط بين النقطتين المقترحتين، ويمكن ايجاد مسار "اريح" واكثر انحداراً
============ ما كتبته اعلاه لا يعني موافقتي على الفكرة، ولا يعني رفضي لها والفكرة يمكن نقدها بطرق "علمية" اكتر
08-15-2012, 11:44 PM
ياسر مكاوي ياسر مكاوي
تاريخ التسجيل: 01-16-2004
مجموع المشاركات: 646
الاخ اسامة تحية طيبة حتى لا نبخس الناس اشياؤهم ولمجرد انهم تابعين للحزب الحاكم في السودان نقوم بابتزال مقتراحات ثورية تغيير وجه السودان وان جاءت من رجل دين مثل الكاروري
سبق ان جئت بمشروع وادي المقدم في هذا المنبر من 2002 في بوست به الكثير من المشاريع والمقترحات وطالما ما الامر اكثر من رائ
دعني اعيد لك هذا المشروع من 2002 هنا لنستانف الحوار العلمي حول هذا المشروع
Quote: .الاخ بكرى التحية والتجلة هذا ما نراه نحن فى تعاملنا مع هذا الموقع..تقديم المفيد والجديد وارسل المحور الثالث الذى يخص كل اللذين لم يعلنون وفاة الشمال الناس الوعيهم زى ضل الدليب من ابناء الشمال **************8 مشاريع التكامل الاقتصادي مشروع الوادي الأخضر (وادي المقدم)
إن المشاكل الأساسية في السودان هي قضية التنمية الشاملة وترتكز التنمية على ثلاثة محاور أساسية ، المياه ، الطاقة الكهربائية ، السكة الحديدية . أ) المياه : مشروع الوادي الأخضر [ وادي المقدم ] :- هذا مشروع تنموي وبيئي في المقام الأول يهدف للنهوض بالولاية الشمالية في إطار التكامل الاقتصادي بين مصر والسودان ، يهدف المشروع لحفر قناة تمتد الى وادي المقدم من منطقة خزان جبل أولياء على النيل الأبيض جنوب الخرطوم وتمتد غرباً الى منطقة وادي المقدم لنقل كمية كبيرة من مياه النيل الأبيض المحتجزة ومهدرة وذلك لإن النيل الأزرق يحجز النيل الأبيض جنوب الخرطوم بمياهه السريعة. وادي المقدم منخفض طبيعي يمتد من شمال كردفان ويصب في النيل وفي شمال السودان وبوجود مياه دائمة فية ، ترتفع الرطوبة النسبية في المنطقة مما يساعد على تساقط الأمطار في شمال كردفان وادار فور ودرء خطر الجفاف (وجود مسطح مائي وسط حزام الجفاف ) ، كما أن هذا المشروع يوفر جزيرة جديدة (صحراء بيوضة) يمكن أن تستغل كمزارع ألبان ولحوم وثروة سمكية ومحاصيل قمح وفول مصري في هذه المنطقة الخصبة الخالية من العوائق . ب) الطاقة الكهربائية : (القوة المحركة للتنمية) :- مد خطوط الكهرباء من السد العالي في مصر عبر الشمال السوداني مروراً بوادي المقدم حتى مدينة أم درمان لتزويد هذه المنطقة الجديدة بالطاقة اللازمة لتنفيذ المشاريع الآنفة الذكر في البند (أ) . ج) السكة الحديدية (الناقل الوطني الأساسي) :- إعادة تأهيل السكة الحديدية على المواصفات الفنية لسكة حديد مصر حتى يتم دمج السكة الحديدية السودانية مع الشقيقة مصر لاحقاً ونحن نقترح هذا الخط الجديد الممتد عبر السودان [ حلفا ـ دنقلا ـ وادي المقدم ـ أم درمان ـ الدويم ـ كوستي ـ ملكال ـ جوبا ـ نمولي ] . خاتمة : بتنفيذ هذه المحاور الثلاثة يمكننا النهوض بالاقتصاد السوداني ويبقى لنا ملاحظات :- 1) الاستعانة بالخبرات الصينية وهم الأقدر على تنفيذ هذه المشاريع الجبارة وهي الدولة الصديقة للسودان والمشهود لها بدعم التنمية في السودان في العهود السابقة . 2) إنشاء بنك مشترك بين مصر والسودان تحت السقف المباشر لبنك السودان للاستثمار في هذا المشروع [بنك التكامل] . 3) يمكن أن تمول ليبيا هذا المشروع .
ملحوظة : تم التفكير في هذا المشروع كدراسة ماجستير في علم البيئة إبان عملي كمعلم في مدرسة كريمة الصناعية 1988م .
Quote: من منطقة خزان جبل أولياء على النيل الأبيض جنوب الخرطوم وتمتد غرباً الى منطقة وادي المقدم لنقل كمية كبيرة من مياه النيل الأبيض المحتجزة ومهدرة وذلك لإن النيل الأزرق يحجز النيل الأبيض جنوب الخرطوم بمياهه السريعة.
ولان مياه النيل الازرق تشكل 85% من مياه النيل الرئيسي..بينما مباه النيل الابيض 15% فقط لن يشكل نقل مياه النيل الابيض المحتجزة جنوبا لاسباب فيزيائية (اختلاف سرعة المياه) عبر وادي المقدم ا واعادتها الى النيل مرة اخرى..كارثة او تحويل لمجرى النيل؟؟ بل حتى حفر قناة جونقلي كان سيزيد من مياه النيل الابيض ويقضي على المستنقعات والاوبئة في الجنوب ولكن هنا في السودان هناك ارباب العلم الذى لا ينفع الذين يجهضون كل مشروع بحجج واهية ليس لها ادنى علاقة بالعلم والمعلومات فقط تناحر سياسي
08-16-2012, 01:26 PM
adil amin adil amin
تاريخ التسجيل: 08-01-2002
مجموع المشاركات: 37020
اصلا كيف تنحر المياه بصورة طبييعة من وادي المقدم من شمال كردفان الى النيل اذا كانت التضاريس معكوسة كما ترى ممكن نمد القناة من جبل اولياء الى منابع ودادي المقدم شمال كردفان مش كده وبعد تداك بتنساب الموية طبيعيا الى مصبه في كورتي بس حتكون مياه دائمة مش مؤقتة كما هي الان من خريف لي خريف يا اخوى ده مشروعي وان قادر اسوقه في اقرب ديموقراطية
08-16-2012, 07:07 PM
Osama Mohammed Osama Mohammed
تاريخ التسجيل: 04-02-2008
مجموع المشاركات: 4619
(((النسبة للكوز الاسمه الشفيع وراق ، كلمو الكنتور الجايبه دا زي ما هو بقول (عشوائي) بين نقطتين على نهر النيل ، بينما الخريطة الفوق دي خريطة (كنتورية) بالالوان و عشان الناس المابتعرف تقرا (خريطة كنتورية) انا كتبتا فوق ترجمة للكنتور في اول كلامي الالوان دي بتدل على ارتفاعات، فوق لي كدا الخريطة 3D. بدل ما يختف ليه نقطتين عشوائيات و يجي يقول دا الكنتور انا ممكن اخد اي نقطتين عشوائيات و اقول دا كنتور ، لكن لانه دا حفر يعني قروش متلتلة يعني لازم تاخد الكنتور بتاعك محل ما اقترح الشيخ الكاروري دا. المكان المقترح للقناة موضح في الخريطة بخطين سود ، لو راجعت الوان الارض في الخريطة في مسار القناة حاتلقا الالوان بين الاصفر و البني يعني على حسب مفتاح الخريطة ما بين 300 الى 1000 متر في اقصى المرتفعات في المنطقة دي يعني المتوسط الممكن تحفره لمسافة قبل المرتفع و بعده قد يصل الى 600 متر على جانبي المرتفع. و دي الخريطة الاصلية للكنتور بتاع السودان قبل ما اشتغل عليها))))) اقتباس رد باشمهندس حاتم خاصية الاقتباس لا تعمل عندي ارجو المعذرة الرد هـــــــــــــــــــــــنـــــــــــــــــــــــــــــــــــا
لو الكلام دا قالوا الكاروري يا اسامة معناها قد انقلبت خطط الانقاذ.. الزول دا ما بقول كلام ساي.. وذو علاقة بخطط التنمية بالشمالية بشكل ما تتصورو.. طيب ..
الاكيد انو هذا المشروع ما جديد وهو زي ترعتي كنانة والرهد وسد مروي موجود في الاضابير منذ الاحتلال الانجليزي.. الفكرة بسيطة ترعة تخرج من جنوب ام درمان وتستفيد من المسار بتاع وادي المقدم البصب اصلا ف النيل لتعود المياه الى النيل مرة اخرى(يقال انو دا مجرى قديم للنيل يعني ما تخاف يا اسامة لو المشروع اتخطط صاح).. نحن ابناء كردفان كنا على علم بهذا المشروع ،بس بمجرد ما اتبنا مشروع مطار الخرطوم في فم ومدخل المسار التاريخي المؤدي الى وادي المسلم حتى علمنا ان المقصود ليس المطار ولكن وأد هذا المشروع..
يا اسامة شمال كردفان يقطنها ثلاثة ملايين نسمة وجنوبها ما يقل قليلا عن ذلك(مجملا ما لايقل عن ستة ملايين نسمة). ومشكلة هذه المناطق الاساسية هي الجفاف والتصحر ومشاكل العطش .. هذا المشروع سوف ينعش امال الناس هناك .. للزراعة والرعي لو علمنا ان شمال كردفان هي المورد الاساسي للثروة الحيوانية والمحاصيل الزراعية.. الفاقد التربوي هناك سببه اخراج التلاميذ من المدارس لجلب المياه..
طيب ..
الشمالية كلها حسب التعداد الاخير لا يتجاوز سكانها(نهر النيل والشمالية) لا يتجاوز المليون ونصف.. فلو علمنا ان النهر الازرق اصلا سوف يمر بمجراه القديم .. فلما الاعتراض على ترك النيل الابيض ليجري في مجراه التاريخي القديم..
---- يا اسامة النقطة دي حساسة جدا خصوصا لو علمت ان كردفان اصلا ترفد النيل بما لايقل عن المليار متر عبر الرقبة الزرقاء وبحر العرب وغيرو.. عشان كدا اعتراضك دا في ناس حيحملوا اكثر من نيتك الحقيقية والبيضاء.. مهما كانت تكلفة هذا المشروع فهو لا يعني شئ بالمقارنة بالخدمة الحيقدما..
08-16-2012, 07:47 PM
Osama Mohammed Osama Mohammed
تاريخ التسجيل: 04-02-2008
مجموع المشاركات: 4619
استاذنا صهيب موضوع الكاروري اعتقد بختلف عن موضوع عادل امين . اعرف كردفان ومشكلة المياه فيها ( العقاب من بارا والابيض ولسة باقي الاهل عايشين هناك ويمكن نحنا من الاسرة القليلة في السودان البتعمل هجرة عكسية : من المركز للاقاليم في كل جيل مرات عديدة). ساعود بعد ان يرفد الباشمهندس عادل موضوعه.
يا صهيب كلامك عن عدد سكان كردفان مقارنة بسكان الشمالية تقولو للجهة الاساسا خلت النيل يختار مجراهو الحالي ده و شكلت الارض و حددت تضاريسها و مناخها. انت بتتكلم عن ترعة ، يعني زي شغل المصريين في الترعة الابراهيمية و البولاقية. و صاحبك الكاروري الموهوم بتكلم عن تحويل مجرى النهر. اعتقد أنو التلاعب في الطبيعة عندو آثار سلبية على البئية و المناخ قد لا يمكن معرفتها حاليا و لكنها حتما ستظهر على المدى البعيد، التجربة الانسانية اوضحت بجلاء أن أفضل تعامل مع الطبيعة هو احترامها و عدم التلاعب بها. كان دايرين ترعة احفروها لو المصريين بخلوكم.
يا سيف في سد اسمو مروي بحجز وراهو اربعة ملايين متر مكعب اخدوا ليهو اذن من المصريين.. شنو البمنع انو تتعمل ترعة جوة ارض السيادة السودانية محتاجة اقل من كدة بكتتييييييييييييييير عشان تسقي ارض موات من حساب مويتنا ما موية المصريين (يعني بتتخصم من ال18 مليار بتاعتنا!!!).. ولا ال18 مليار دي حقت ناس الشمالية!!!!!!!!!!!!!!!!!!!!..
وبعدين بخصوص نكلم الخلو النيل يجري بي جاي .. وعلاقة الستة مليار دولار البنو بيها شوارع في الشمالية وكباري ومطارات ما جنبها صوت زول.. علاقة دا كلو بينا انحنا البترول البطلع من ارضنا شنو!!!!!!!!!!!!!!!!!!!.. يعني اسع وكت المسالة فيها مشروع تنموي لجهة غير الشمالية النقة تكتر!!!!!!!!!!!!!!..
--- الاكيد الاكيد انو العلة ما في الانقاذ بس،الله يكضب الشينة..
08-16-2012, 08:01 PM
الرفاعي عبدالعاطي حجر الرفاعي عبدالعاطي حجر
تاريخ التسجيل: 04-27-2005
مجموع المشاركات: 14684
يا صهيب دي المرة التانية تاخد كلامي على محمل جهوي! انا و الله لا انطلق من اي منطلقات زي دي و يبدو أن طبيعة تفكيرك أنت الجهوية بتخليك توزن كلام الأخرين و تقيمو على هذا الأساس. تحويل مجرى النهر فكرة فاشلة و مدمرة اقتصاديا و بئيا و صادرة عن شخص يدعي العلم و العلم منه براء دي هي فكرتي بالتحديد زائد لو بتقدرو تقنعوا المصريين بمشروع الترعة فخير و بركة و يدنا معاكم. كلامك عن سد مروي و توابعه اعتقد أنه irrelevant هنا و لاحظ أن السكان المحليين هم المتضرر الأكبر من هذا المشروع الفاشل -على الأقل حتى الآن- و الشمالية على وجه لعموم لم تستفد اي شئ منه.
08-16-2012, 09:07 PM
jini jini
تاريخ التسجيل: 02-05-2002
مجموع المشاركات: 30720
ما عندنا مانع خليهو يلقى لينا ممول لتحويل المجرى! وبالمرة يحول سكان ضفتى النيل مع نخيلهم وبيوتهم! ياخ الحلفاوين لى يوم الليلة بطنطنوا داير تحول ولايتين بالكامل! انا ما فى الكارورى انا فى الناس البصلوا وراهو ديل يستاهلوا! انا المن زمن هو امام مسجد العشرة وبضم العين نهائ ما بنزل من حلقى! دا مفروضى كارورى عربجى جارى كارو! جنى
08-16-2012, 09:14 PM
النذير حجازي النذير حجازي
تاريخ التسجيل: 05-10-2006
مجموع المشاركات: 7160
لا فض فوك يا باشمهندس حاتم علي، وبالمناسبة يا شباب حاتم علي دا عضو معانا هنا ويا حاتم لا أعرف سبب مقاطعتك لهذا المنبر، لكن بالجد يا حاتم إنت من العقول النيرة التى نحتاجها هنا في هذا المنبر بالذات، وأرجو أن تراجع حساباتك وتعود إلى المنبر
وشكراً يا أسامة على نقل هذا الكلام المفيد
08-17-2012, 12:42 PM
adil amin adil amin
تاريخ التسجيل: 08-01-2002
مجموع المشاركات: 37020
الاخ صاحب والبوست والاخوة المتداخلين نحن عايزين نناقش بصورة علمية ولى حقي سميح وحق الناس ليه شتيح يظهر بعضكم لا يضاهد ناشنونال جوغرافيك والانشاءات العظيمة اولا الخارطة غير دقيقة فعلا جعلت سد جبل اولياء في النيل الازرق ولم تحدد تماما وادي المقدم ولم يجاوب واحد فيكم عن هل لا يمكن نقل جزء من مياه النيل الابيض المحتجزة جنوب الخرطوم من خزان جبل والياء غربا الى منابع وادي المقدم؟؟ عايز اجابة نعم ام لا وسيبكم من الكاروري وغيره ودي ذاتا كثيرة بالنسبة لرجل دين يتحدث عن التنمية ويعتبر تطور من النكاح الجماعي والجهاد...
اذا كان النفط نفسه ينقل في السكا عبر انابيب عكس الجاذبية وعبر الجليد اهودي خارطكم ذاتا بعد التعديل
08-17-2012, 12:51 PM
adil amin adil amin
تاريخ التسجيل: 08-01-2002
مجموع المشاركات: 37020
خلاص انا جبت كلامي وحججي وجبت الفكرة بتاعتني وهي من 1988 يعني قبل سد مروي ذاتو وكانت رؤيتي متكاملة وبسكة حديدا كمان..تغير وجه السودان الكالح من حلفا الى نمولي والى الابد
وحتما خانتظر الديموقراطية الحقيقية في السودان ولمن تجو تكنقراط غير مسيسسن او مؤدجلين لانجاز هذه المشاريع
وفي جاجة عايز اقولا لمن زول يفتح بوست في شان عام سوداني الناس تركز على الموضوع وتسيب الجدل الجانبي غير المفيد ده كوز وده قعر حلة وكده امشو اقروا المشروع تاني وفندوه فقرة فقرة واطرحو البديل بتاعكم الذى يقنع اهلنا في شمال كردفان بان مياه في وادي المقدم والملك تشكل كارثة بيئية
08-17-2012, 12:58 PM
Osama Mohammed Osama Mohammed
تاريخ التسجيل: 04-02-2008
مجموع المشاركات: 4619
الاخ عادل امين رغم ان الباشمهندس حاتم له عضوية هنا الا انه لا يستطيع الرد ( وهو موضوع طويل ليس وقته ولا مكانه الآن) كنت اتحدث معه (بالمراسلة امس ) وقد تطرق لمواضيع سانقل الجزء المهم وهو يطلب من كل من يريد الحوار ان ينقله الى فيسبوك( هكذا طلب) حيث نقلت منه الموضوع وانزلته هنا .
اقتباس 1 (((((عادل امين بتكلم عن نقل مياه خزان جبل اولياء بالحفر لها لتصب في وادي المقدم في كردفان اولاً دا ما مقترح الشيخ الكاروري ، الكاروري كلامه عشوائي و غير واضح و داير يحفر محل مرسوم في الخريطة يعني يشيل موية النيل بعد ما يتلاقى النيل الابيض بالازرق في الخرطوم و يحفر في الجبال يكبها بعد مروي. كلام عادل امين مختلف تحويل مياه النيل الابيض فقط من خزان جبل اولياء عبر وادي المقدم و هو (خور في كردفان) موجود في الخريطة غرب امدرمان ، دا موضوع مختلف و ممكن من ناحية هندسية بحتة يعني حفر و مناسيب و لكن السؤال حول جدواه الاقتصادية و الزراعية ؟ و هل يوفر مياه فعلا من فاقد التبخر ؟ لانه المسار الجديد المقترح قد يكون ليس اقصر كثيراً من المسار السابق ، و ما الهدف منه اصلاً ؟ بعدين في كل الاحوال اي تحويل لمجرى النيل الحالي لا يمر بمروي عبارة عن خسارة لاننا نحنا و اولادنا و احفاد اولادنا حندفع تكاليف سد مروي - الهو غلط هندسي و اقتصادي من الاساس - مضافا اليها فوائده الربوية المركبة)))) انتهى الاقتباس
اقتباس 2 (((((عدين الموضوع هو افكار فقط ام دراسة جدوى شاملة هندسية و اقتصادية و زراعية الخ ... نحنا عندنا في السودان و جنوب السودان مشروعين مهمين بيوفروا مياه و بيحلوا مشاكل و منهم جدوى اقتصادية و زراعية يعني في عائد بيعوض تكلفتهم و هما : تعلية خزان الروصيرص و استكمال حفر قناة جونقلي و الاسباب مفصلة اعلاه في كلامي الفي الخريطة)))))
اقتباس 3 ((((( رجع نسأل تاني تحويل مياه النيل عبر أي مسار غير مسارها المن ما ربنا خلق النيل بتمشي بيهو الهدف و الجدوى منو شنو ؟ هندسيا و اقتصادياً و زراعياً ؟))))) اقتباس 4 ((((( و لو حابب خليهم يجوا يتناقشوا معاي في الفيسبوك دا لو هم عايزين، دا محلي و محل انا قاعد))))) رابط الموضوع لنقاش الباشمهندس
Quote: ((((( رجع نسأل تاني تحويل مياه النيل عبر أي مسار غير مسارها المن ما ربنا خلق النيل بتمشي بيهو الهدف و الجدوى منو شنو ؟ هندسيا و اقتصادياً و زراعياً ؟)))))
شكرا اسامة وانا بفضل الكتابة في هذا الموقع والافضل للمهندس ان ياخذ باس وورد من بكري ويدخل معانا هنا لانو مشاريعي عايزة تكون جزء من وعي الناس في السودان وفي الشمال تحديدا
ثانيا الكلام الديني(المن ربنا خلق النيل) ده كلام ماعلمي ولا حاجة ويشبه كلام الكاروري نفسه ربنا خلق العقل عشان يروض الطبيعة في خدمة البشر ودونك واليابان والبرازيل والصين والعقول الجبارة التي جعلتهم قوة اقتصادية عظمى في العالم تابعو فقط ناشونل جغرافيك انشاءات عظيمة
انا مشروعي واضح وبسيط وواقعي ومتاكد ما في زول قراه حتى في البوست لان الكاروري طايير ليكم في راسكم جدوى المشروع واضحة ما مكن تقول لي سكة حديد من نمولي لي حلفا جدواها شنو او من الاسكندرية لي ممبسا جدواها شنو بعدين كان في مؤتمر هيدرولجيا الوديان انعقد في اليمن يتحدث عن نقل المياه الى الوديان الجافة بكافة الوسائل التكنولجية لمكافحة الجفاف والتصحر وقدمت فيه اوراق قيمة طالعتها عبر الصحف والسؤال هل ممكن هذا المشروع ام لا وتقنيا
08-17-2012, 01:59 PM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
والله ياجماعة الفكرة دي من حيث إنها فكرة دارت في ذهني من زمن .. حتى ناقشتها مع الصديق الدكتور فوزي بابكر .. رؤية عادل معقولة من حيث مسار الترعة ببدأ من النيل الأبيض وبالتالي التأثير على سد مروي ما بكون كبير .. ووادي المقدم بنتهي مساره في نفس النقطة القال بيها الكاروري .. بجانب كونو كمجري طبيعي بقلل من تكلفة الحفر .. بالمناسبة الناس السافروا في خط امدرمان دنقلا.. بتظهر ليهم مساحات مهولة من الاراضي الطينية المنبسطة على مد البصر دون أي مرتفعات جبلية في المنطقة دي .. أعتقد الفكرة من حيث هي مفيدة وسوف تسهم في استقرار الكثيرين .. إن شاء الله بس لو مرت السبعة مليار القاعدة تصب في البحر هدرا.. بجانب الفائدة في إعادة الغطاء النباتي .. تبقى المسألة بعد داك فنية وتمويلية وسياسية.. . . برضو نكون جرينا ناس صهيب علي النيل بدل يجرونا ـ هههه .
Quote: برضو نكون جرينا ناس صهيب علي النيل بدل يجرونا ـ هههه .
شوف يا محمد علي .. هذا المشروع في ظل الانقاذ ما بقوم لانو مطار الخرطوم الجديد الحااااااااااااااالي دا انشئ في مخرج الترعة المقترحة رجوعا لكلام مختصين.. السبب التاني رفض الانقاذ لتمويل الخط الناقل للمياه من النيل الابيض لشمال كردفان بتمويل 700 مليون دولار رغم وجود شركة صينية قبلت بالتمويل بنظام البوت!!!!!!!!!!!!!!.. تصدق لا لا!!..
خلي الحكومة يا عمك لو ملاحظ في ناس معارضين عدييييييييييييييييييييييييييل كدة عندهم راي في المشروع دا!!.. وفييييييييييييي البوست دا.. باقي ليك السبب هي الانقاذ ولا طريقة تفكير محدد
Quote: بعدين في كل الاحوال اي تحويل لمجرى النيل الحالي لا يمر بمروي عبارة عن خسارة لاننا نحنا و اولادنا و احفاد اولادنا حندفع تكاليف سد مروي - الهو غلط هندسي و اقتصادي من الاساس - مضافا اليها فوائده الربوية المركبة
الكلام الفوق دا والله نكتة !!..
ومنو الحيدفع تكاليف سد مروي يا عمك .. وزارة المالية من عوائد البترول ولا ناس مروي!!.. المهندس دا بي صحو يا اسامة!!؟.. يا زول الديون دي جاية بخطاب ضمان من بنك السودان علاقة ناس مروي بيها شنو ولا عندكم نية انفصال!!. دي بتتسدد من عوائد البترول عوااااااائد البترول لانو كلامك صاح السد دا صلاحيتو 15 سنة بس!!,, وبعدين ما بتسدد حق السد بس بل المشروعات المصاحبة (الطرق الكباري المطارات استصلاح الاراضي وكهربة المشروعات والمستشفيات والمشروعات الزراعية وغيرا).. المشروعات المصاحبة فقط قروضا تبلغ ستة مليار دولار يا عمك.. والبترول بجي من كردفان عشان كدي النيل يحولوا يمر بكردفان عشان ياخدوا حقهم..
08-17-2012, 11:13 PM
الشفيع وراق عبد الرحمن الشفيع وراق عبد الرحمن
تاريخ التسجيل: 04-27-2009
مجموع المشاركات: 11406
Quote: (((النسبة للكوز الاسمه الشفيع وراق ، كلمو الكنتور الجايبه دا زي ما هو بقول (عشوائي) بين نقطتين على نهر النيل ، بينما الخريطة الفوق دي خريطة (كنتورية) بالالوان و عشان الناس المابتعرف تقرا (خريطة كنتورية) انا كتبتا فوق ترجمة للكنتور في اول كلامي الالوان دي بتدل على ارتفاعات، فوق لي كدا الخريطة 3D. بدل ما يختف ليه نقطتين عشوائيات و يجي يقول دا الكنتور انا ممكن اخد اي نقطتين عشوائيات و اقول دا كنتور ، لكن لانه دا حفر يعني قروش متلتلة يعني لازم تاخد الكنتور بتاعك محل ما اقترح الشيخ الكاروري دا. المكان المقترح للقناة موضح في الخريطة بخطين سود ، لو راجعت الوان الارض في الخريطة في مسار القناة حاتلقا الالوان بين الاصفر و البني يعني على حسب مفتاح الخريطة ما بين 300 الى 1000 متر في اقصى المرتفعات في المنطقة دي يعني المتوسط الممكن تحفره لمسافة قبل المرتفع و بعده قد يصل الى 600 متر على جانبي المرتفع. و دي الخريطة الاصلية للكنتور بتاع السودان قبل ما اشتغل عليها)))))
Quote: النسبة للكوز الاسمه الشفيع وراق
Quote: خطرفة وتخاريف الكاروري
اولا اظن حتى يستقيم النقاش ويكون علمي المفروض نتعامل مع بعض بغض النظر عن الولاء الحزبي او الجهوي كتبت سابقاً
Quote: واشك في ان من كتبها مهندس مدني يعرف طبيعة ارض السودان
وهسه كتابته تؤكد ما ذهبت اليه شفنو ليكم مهندس يعتمد على "مفتاح خريطة"؟؟؟؟؟ يا اخوي انا جبت ليك "مقطع" طولي، وهو مقرب الى اقرب 50 متر، تمشي تستند لي على "مفتاح خريطة"؟؟؟؟ البروفايل الجبتو وصفته بي انه "عشوائي" لانه على الطبيعة ممكن تتبع متعرجات تؤدي الى مسار افضل بكتير وعموماً البروفايل بقول حقائق اصلا مثبتة ولا تحتاج الى بروفايل
Quote: بالنظر للى الخريطة المرفقة أعلاه فإن مسار القناة المقترحة للشيخ الجليل الكاروري سيعاكس إنحدار الأرض و الجريان الطبيعي للمياه، حيث
الكلام ده بكون وراد فقط في حال النيل بمشي من الشمال للجنوب ولو نظرنا لي صورة عادل امين بعد كبرناها وعملنا زووم على وادي المقدم الماشي بي انحدار الارض
وقارناها بالبروفايل "العشوائي" ح نلقى الفرق بسيط وهو بالضبط ما قصدته من تتبع المتعرجات الطبيعية الاخ/عادل امين مقترحك لم اطلع على تفاصيله، ولكن واضح انه لا يختلف كتير عن ما قاله الكاروري وربما يكون تكميلي و انه ح يستفيد من المياه المتراكمة للنيل الابيض ويتم ربطها بوادي المقدم التي اصلاً مرتبطة بالنيل وهو يؤكد ان المسار في انحدار الارض وقد لا يتطلب "حفر" كتير ولو كان مدعم بخرط توضيحية ح يكون فهمه اسهل واتفق على انه تحويل مسار النيل بالكامل سيضر بخزان مروي، ولكن الاستفادة من مياه النيل الابيض التي اصلا لا تساهم الا بقدر قليل، يمكن التفكير فيهو تحياتي
08-18-2012, 00:12 AM
النذير حجازي النذير حجازي
تاريخ التسجيل: 05-10-2006
مجموع المشاركات: 7160
يا حاتم ووراق إنتو الاتنين زملاء مهنة واحدة وأرجو النأي عن التنابز بالألقاب يا الشفيع كتبت:
Quote: شفنو ليكم مهندس يعتمد على "مفتاح خريطة"؟؟؟؟؟
يا الشفيع المهندس اللي ما بعتمد على مفتاح الخريطة دا ما مهندس من أصلو والخريطة اللي ما فيها مفتاح لا تُعتبر خريطة من أساسو، فأنا مهندس مدني ومتخصص في المياه ورسم الخرائط ببرنامج الـ GIS والأتوكاد والمايكرو ستاشن وإذا ما سلمت أي خرطة للشئون الهندسية وما فيها مفتاح خريطة برموها ليك في وشك، فأرجو يا الشفيع أن تهتم بمفتاح الخرائط، والنقطة دي بتقودنا لي نقطة تانية، يا الشفيع لو راجعت بروفايلك وإذا ما كانت لك خبرة ولو ضئيلة في معرفة مفتاح الخرائط ح تلقى نفسك إنت الصاح وحاتم قد أخطأ، ففي الحقيقة تظهر الخارطة الكنتورية أو بالأحرى الــ TIN أو خارطة التضاريس للمنطقة بأنها فعلاً تنحدر من الخرطوم إلى كريمة، ففي الخرطوم اللون الاصفر الباهت يدل على أن الإرتفاع 500 متر عن سطح البحر، وفي كريمة باللون الأخضر يدل على أنها على إرتفاع صفر من مستوى سطح البحر، وعليه إذا ما صُممت قناة من الخرطوم إلى كريمة فإنها تنحدر بميلان يساوي 0.2% لأن المسافة هي 300 كيلومتر والإرتفاع 500 فيعطي الميلان يساوي 0.2%.
فأرجو من الجميع مناقشة الموضوع بصورة علمية بدلاً من الغُلاط، وبالمناسبة يا الشفيع البروفايل اللي جبتو دا برضو غير علمي على الرغم من إتفاقي عليه، إلا أننا لا نعرف من أي نقطة بدأت ومن أي نقطة إنتهيت، فقد تكون قد بدأت البروفايل من كريمة وإنتهيت في الخرطوم، ولا يوجد إثبات على ذلك، فقوقل إيرث لا يوضح سهم نقطة البداية ونقطة النهاية للبروفايل، فراسم البورفايل هو الوحيد الذي يعلم ذلك، ولا يوجد إثبات في الخرطة ، اللهم إلا الخارطة الكنتورية التى جلبها الباشمهندس حاتم فهي مكتملة وتتطابق مع البروفايل الذي جلبته..
من الخارطة أعلاه، يتضح سخف هذه الفكرة العنصرية السخيفة فإذا ما أنشئت هذه القناة ستحرم ولاية بكاملها من مياه النيل ومن عجبي أن اسم الولاية هو ولاية نهر النيل الذي يريد هذا الجاهل بحرمان قبائل هذه الولاية من نعمة المياه، لأن المياه ستنساب إلى المسار الجديد وتلغي المسار الطبيعي القديم لنهر النيل، بالإضافة بأنها أيضاً ستجفف نهر كامل وهو نهر عطبرة، بغض النظر عن هذه المساويء فكما تكرم الباشمهندس حاتم أعلاه بأن الفكرة عقيمة وليست ذات جدوى مع التكاليف الباهظة وسيحرم القبائل الآتية من مياه النيل وهي: 1) قبيلة الجعليين 2) قبيلة الأنقرياب 3) قبيلة الميرفاب 4) قبيلة الرباطاب 5) قبيلة المناصير
08-18-2012, 10:25 AM
أحمد الشايقي أحمد الشايقي
تاريخ التسجيل: 08-08-2004
مجموع المشاركات: 14611
Quote: 1) قبيلة الجعليين 2) قبيلة الأنقرياب 3) قبيلة الميرفاب 4) قبيلة الرباطاب 5) قبيلة المناصير
اعتقد أن الكاروري يريد (فتح كـلام) والسلام ...
هذا الكلام مفيد في شغل المجتمع عن قضاياه الآنية والدليل أن أولويات الحكومة الحالية هي أولويات سياسية في المقام الأول نتيجة للظرف الأقتصادي الضاغط جداً فهي تحتاج لتسويات في جنوب كردفان والنيل الأزرق ودارفور وتحتاج لمزيد من رفع الدعومات عن السلع أو بالأحرى زيادة الضرائب غير المباشرة على السلع وهذه لها تكاليف سياسية باهظة في زيادة الاحتجاجات واستمرار الهزة الجماهيرية للنظام
في مثل هذه الظروف من الجيد لـ (فراودة) النظام العمل على (تشتيت) الأنظار و(البيع) في سوق الكلام .. أهو كلام والسلام وخطبة جمعة والكاروري معتاد تماماً على مثل هذا التشتيت فهو يتحدث عن تحالفات العالم القديم والجديد والمتجدد وحروب الكون الكبرى وتحركات الاستخبارات العالمية وما إلى ذلك من تحليلات لم تصدق يوماً ولم تتغشى يوما واحداً أمور المواطن الحقيقية من معاش وعــلاج ودواء وتعليم أبناء ومواصلات وإسكان وسعر صرف العملة وما إلى ذلك
الحكومة ليس لديها إمكانية تنفيذ أي ترعة فالمصريين لن يوافقوا على أي حفرة تروي شبر من الأراضي والحزب الإسلاموي الحاكم في مصر سيقول للحزب الإسلاموي الحاكم في السودان: دعوا هذه المشاريع الآن فالحكم الإسلامي يمر بمرحلة تاريخية حاسمة والشيوعيون المصريون سيستغلون هذه المشاريع لإظهر فشلنا في إدارة ملفات مياه النيل ..
والحكومة ليس لديها مال وليس لديها إمكانية استدانة ومشكلتها في التماسك الداخلي للحزب الحاكم نفسه أكبر من أي مشكلة أخرى
قوموا إلى ديمقراطيتكم (حيث الهواء النقي والكلام المباح ...) يرحمكم الله ...
أحمد الشايقي
08-18-2012, 10:44 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: شفنو ليكم مهندس يعتمد على "مفتاح خريطة"؟؟؟؟؟
هلا يا الشفيع وانضبط يا باشمهندس وما تشيلك الهاشمية الكيزانية وتقول كلام موغل في الورجغة وخاصة فيما يختص بالعلوم والمنهج الذي لا يتناطح فيهو كبشان وانا زي النذير حجازي..اكل عيشي كلو مراجعة خرط واجازتها في اطار اجازة الخرط المتعددة الاغراض ومفتاح الخريطة هو مكون اساسي ومهم مفصلي في اي خريطة ومن اول الجزئيات التي يدلف اليها المهندس لقراية الخريطة ثم مراجعتها وفك اشيائها ومفتاح الخريطةعندو انواع وتوصيفات واستاندرات واي خرطة مفتاحها ما مالي يمينو تصبح خطة مكانها هو سلة الريجكشن..... ودي اساسيات علم الخرائط وعلم الكارتغرافي يا الشفيع.... -----
واما فتوي الشيخ الهندسية فهي لست ذات قيمة هندسية بل هي تواصل لسلسلة الورجغات المعشعشة في العقول التي تحكم هذه البلد وكلام فارغ ومحزن في نفس الوقت... وعشان تغيير مجري نهر دي عملية هندسية -جيولوجية- بيئية واقتصادية - وعلوم مائية -بالاضافة الي علومو تربة وللافتاء فيها ما داير ورجغة وتكبير وتهليل علي هامش دولة فاسدة ظالمة بل مكانها تربيزة العلماء وحواسبهم المجهزة
وهل قام شيخنا النحرير بمسح جيولوجيي للمسار الذي حدده حتي يسرح ويمرح في الخيال المورجغ... لانو نظيرته الفطير دي قد تصطدم باول عملية مسسح جيوفيزيائي للمنطقة المحددة والموية الدايرها تمشي في هذا المسار ممكن تاني يوم تطلع في القضارف
وشكرا يا هندسة ياحاتم علي الكلام الموضوعي العلمي والعميق الهابش الكثير من النقاط التي يجهلها تما م الجهل هذا الكاروري او اي كان اسمه
Quote: شوف يا محمد علي .. هذا المشروع في ظل الانقاذ ما بقوم لانو مطار الخرطوم الجديد الحااااااااااااااالي دا انشئ
نعم اخي صهيب كلامك صاح 100% لا في ظل الانقاذ ولا احزاب المركز القديمة ايضا للبعد الايدولجي السقيم في عرض المشاريع وكما ان التنمية الحقيقية مرتبطة بالديموقراطية الحقيقية جدا جدا ودونك والتقرير ادناه
Quote: هم ما يميز الجهد الفكرى المجسد لتقارير التنمية البشرية الصادرة حتى الان هو المنهجية المتبعة والمرشدة لصياغة الاستنتاجات والتوصيات العلمية الهادفة لتطوير وتوسيع البرنامج القطرية والاقليمية والعالمية فىهذا المضمار وتتمثل هذه المنهجيةبطابع متجدد ومستند الى معطيات وتناقضات الواقع الحافل بالمتغيرات وهى ترتكز على دعامتين اساسيتين هما صياغة مفهوم للتنمية البشرية من ناحية والعامل الاخر هو مؤشر قياسها من ناحية اخرى(الاحصاء) ************ ولاول مرة فى الادب التنموى العالمى تعرف التنمية البشرية على نحو محدد واضح بانها:عملية توسيع خيارات الناس والمقصود بخيارات الناس هو الفرص المبتغاة فى الميادين الاساسية فى الحياة الانسانية بصورةشاملة وتتلخص فى الغايات التالية: 1- تامين حاجات الاجيال الراهنة دون الاضرار بامكانات الاجيال القادمة علي تامين احتياجاتها 2- المحافظةعلى التوازن البيئى بمكافحة التلوث البيئى وتخريبها والسعىلاستخدام رشيد للموارد وتطويرها بصورة بناءة 3-العنايةبالغايات الاجتماعية واهمها اجتثاث الفقر والعنصرية والقضاء على البطالةوتوفير فرص عمل متكافئة للمواطنين وتحسين توزيع الدخل الوطنى على الجميع ولا فرق بين المركز والهامش بهدف تحسين مستوى معيشتهم وتطوير نوعية حياتهم 4-تاكيد قيم الحرية وحقوق الانسان والديموقراطية بهدف احترام كرامة الناس وكفالة امنهم وتمكينهم من المشاركة فى رسم مستقبلهم وفى عملية صنع القرار فى بلادهم وكذلك توفير الوسائل والآليات الضامنة لادارة ديموقراطية وشرعية للحكم وارساءه على سلطة القانون والمؤسسات المنتخبة والدستورية على المدى البعيد ... *********** هكذا ياتى التقرير الآخير عن التنمية البشرية ليسجل اضافة نوعية فى بلورة الفكر التنموى المعاصر وتاصيله ويؤشر الى ميادين عمل اساسية ومهمات جوهرية لتحسين نوعية حياة الناس ولازالة الفقر ومظاهر التفاوت الاقتصادى والاجتماعى على صعيدين القطرى والعالمى..وبهذا المفهوم السليم للعلاقة بين حقوق الانسان والتنمية البشرية تتساقط المزاعم القائلة ان الحقوق الاساسية هى نوع من الترف والكماليات..بل يتعين علىالتشديد على التنمية الشاملة والمجدية لاى مجتمع لا يمكن بلوغها دون الاستجابة الحقة والكاملة للحقوق والحريات التىتمثلها الديموقراطية والمنابر الحرة ..وهذا ما يجب ان يتنبه له الموقعين اليوم الاحد9/1/2005 فى كينيا..من اجل مرحلة جديدة فى السودان..كما يجب ان تعى رموز واحزاب السودان القديم دون استثناء ان المرحلة القادمة مرحلةتنميةبشرية واعادة اعمار وان يجب عليهم ان يتخلصو من خطابهم القديم المترف ويتحدثو عن المشاريع التنموية واعادة اعمار الارض والانسان...
Quote: قوموا إلى ديمقراطيتكم (حيث الهواء النقي والكلام المباح ...) يرحمكم الله ...
أحمد الشايقي
وبعد الديموقراطية يا احمد شنو نتظر ودا وسواعا ويغوثا بتاعين المركز ديل تاني يجو يورجغو ولا تنمية ولامشاريع برضه داير تختنا تحت الوصاية رايك انت شنو في تطوير الشمال بعد الانقاذ بصفتك شايقي ولماذا لا تحترم مشاريع غير الانقاذيين التي تقدم هنا رايكم شنو في اعادة الاقليم الشمالي وعمل انتخابات لحكمومة اقليم مثلا؟؟
لا زم تترطح بدائلك الواضحة لشعب عشان يختو الكيزان يدل يجوك ده مشروعي وداك مشروع الكاروري مشروعكم انتو شنو لتطوير شمال السودان؟؟ النقد والتجريح والتبخيس لن يجعل مواطن واح يباريك
08-18-2012, 03:23 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
.. بوست هام، بوست جنود الوطن .. جنود التنمية ( التنمية في إطار الدولة الوطنية - الديمقراطية المستقلة) إستعادة الديمقراطية، و دولة القانون، و إصدار قرارات المشاريع الوطنية الكبيرة عبر لجان البرلمان المُختصة، دا كلو ساهل لانو امر حتمي و هو قدر التاريخ .. لكن المشكلة و التحدى هو تنمية هذا البلد ذو التعقيد الجغرافي - المناخي - الإثني
تنمية السودان ( المُرتكزة لحد كبير على حل سؤال الطاقة) صارت اكثر صعوبة بعد إنفصال الجنوب و بعد رسوخ الجيوبوليتكس / الجيوإكونومكس الدولي الجديد الشرس داخل الاضابير و المسارات الأفريقية
اطرح نقاط و ملاحظات غير متخصصة قد تساعد البوست في خلفيته و وجهته :
* كلام الكاروري هو ضرب من الهوان الوطني - السياسي - العلمي .. هو ضمن أفكار شهر العسل بين المؤتمر الوطني و مصر (مُرسي العياض) .. لازم نتذكر إنو كل المصريين، بما فيهم الشيوعيين و الإسلاميين، و الحاجة إنسانية رئيسة نقابة بائعي الكشري في العتبة، ديل كلهم تفكيرم بكون واحد لمن يتلعق الامر بالسودان، و مياه النيل .. و مصالح مصر في السودان
* لا يزال موضوع تعلية خزان الروصيرص و إكمال شق طرق الجهات الاربعة، و إعادة التأهيل الجاد و المواكب لسكك حديد السودان، و تطوير لقاح الطاعون البقري، و الخطة الخمسية لربط الصناعة الصغيرة و المتوسطة بالزراعة : هو المدخل الاولى السليم و الحاسم في موضوع التنيمة
* فِكر القنوات : حفر قناة جونقلي، حفر ترعة كنانة و الرهد، ترعة الكاروري، قناة جبل اولياء / وادي المقدم .. كلها و رغم ما فيها من موضوعية و دفوعات معقولة، إلا أن الامر في جوهره يمثل هروب حكومات الهوان من مواجهة السؤال الوطني الكبير حول إتفاقية الظالم و المظلوم المسماة بإتفاقية مياه النيل 18.5 إلى 55.5 .. برغم ان الموارد الزراعية و الحيوانية هي في جنوب الوادي و ليس شماله ! القنوات دي زي طريقة ناس الكونكان المطالبين ب ( البيليا ) بغرض تغيير الحظ و الهروب من الزول الما برمي غير دوهات و ترايس ( وجه مبتسم يا عادل أمين، و ارجو مواصلة التوسع في فكرتك و ثيقة الإرتباط بدولة الديمقراطية و تغليب مصالح الوطن و الغلابة، و سيادة العقل و العلم و الإختصاص )
* بمعنى آخر و وضوح اكثر : لو ما نحنا أصلا" بنتحرك في إطار القسمة البائسة البتحكمنا ب 18.5 مليار متر مكعب فقط، فكان من الممكن ان نبني سد مروي من البداية بسعة تخزينية ضخمة جدا" و ليس بسعة 3 مليار متر مكعب فقط .. بسعة سد الفولجا، و سعة سدود الوسط الامريكي، و بكامل التفوق على سعة سد أكرا، و سدود امريكا اللاتينية، لانو الموية العندنا نحنا، الجماعة ديل كلهم ما عندهم
* بناء سد مروي إبتداء بسعة تخزينية ضخمة ( سعة ذات جسارة و طنية و ثورية و بفوارق تمويلية تزيد قليلا") كان سيمثل نقلة حاسمة في فكر التنمية الجاد، و كان سيعفينا من تكلفة بناء، و عُسر ولادة، و فتنة، ثلاثة سدود لاحقة بائسة من النوع ( ابو 3 مليار متر فقط) .. يقول المثل : إذا ضربت فأوجع فإن الملامة واحدة .. فطالما شردنا المناصير و ناس الحماداب .. فكان الاولى نشردم فوق ( شيتا") ذو فائدة و طنية إستراتيجية كبيرة
* الامر المحتاج لتأمل و حذر : الان صارت الكهرباء مشكلة حقيقية في بلدان جهاز الدولة الوطنية العريقة .. تواصل إنقطاع الكهرباء في القاهرة، و خروج 600 مليون هندي من شبكة الخدمات قبل اسبوعين تقريبا" : الامر ليس يتعلق فقط بالكثافة السكانية و لا ضعف و هلاك شبكات التوزيع البالية القديمة فقط .. الامر يرتبط بغياب التخطيط و التفكير الإستراتيجي العلمي من أساسو و سيادة عقلية الكومشنات و الفساد و عدم المواكبة و إعادة التأهيل و الصيانه المُنتظمة بسبب نهب الفوائض الوطنية بواسطة رصفاء المؤتمر الوطني في كل من الهند و مصر و بقية البلدان التى يحكمها ( جراد الخلا)
* فكر و مشروع الطاقة البديلة : مكانو بالضبط السودان ( ارجو ان يولي البوست إهتمامو بأمر و إمكانيات الطاقة البديلة في سودان شموس المشارق المُتعددة .. و شموس العِفة التى جاءت في غنائية العبادي و سرور )
تقديري الصادق لكل ناس هذا البوست، بما في ذلك أخي الشفيع وراق ذو ( السلبطة الأيدلوجية الواضحة في هذا الموضوع الوطني - العلمي)
08-19-2012, 10:51 AM
adil amin adil amin
تاريخ التسجيل: 08-01-2002
مجموع المشاركات: 37020
Quote: إتفاقية مياه النيل 18.5 إلى 55.5 .. برغم ان الموارد الزراعية و الحيوانية هي في جنوب الوادي و ليس شماله ! القنوات دي زي طريقة ناس الكونكان المطالبين ب ( البيليا ) بغرض تغيير الحظ و الهروب من الزول الما برمي غير دوهات و ترايس ( وجه مبتسم يا عادل أمين، و ارجو
الاخ العزيز احمد طراوة كل عام وانتم بخير نعم ربطت المشروع بتاعي بالديموقراطية لاني عارف تماما نوع النظام الحاكم في السودان ومن يعارضونه وجهين لعملة واحدة من 1964 وعاطلين عن الابداع وجربتهم لان المشروع ده قدمناه 1988 لحاكم الاقليم الشمالي ان ذاك في الدامر وليس هناك داع لذكر اسمه و1988 بقولو كانت ديموقراطية اما النقاط المثارة 1- نحن في القرن 21 واقتصاد التكتلات والكهرباء والسكة الحديد العابرة للحدود(الاتحاد الاوروبي) ويخلونا من مصر فعلت وتركت اسواءحاجة صدرتا لينا مصر بس الشيوعين والاخوان المسلمين 2- مشروعي مافيه استغلال من جهة ولا مصر ولا هم يحزنون واصلا ما كان في داعي لي سد مروي من اساسو طالما السد العالي موجود 3- اما اتفاقية مياه النيل فهي تخص مياه المجرى الرئيس وكل مياه الفروع تخص السودان ويمكن حسابها او جعل مصرتزرع حصتها داخل الاراضي السودانية كما تفعل الصين في انجولا 4- يوجد نهر كلفورنيا الصناعي في امريكا عبرصحراء نيافادا-يجب الاطلاع عليه نحن ما جبنا حاجة من عندنا
وتخريمة وفي واحد في البوست ده من النوع الما بنفع السودان اصلا وقال انا متخصص في الكاروري بس وطبعا ذى ده ... ما بنفع الشمالية بي شيء عايزو ينفع كردفان كيف...لاانه رافع شعار وحيد القرن بتاع السودان القديم وتسفيه مايقدمه الاخرون مشروعي قدم شوية واتغيرت الدنيا ولكن سنزل نيو فرشن لمن يعترف الناس انه خزان جبل اولياء في النيل الابيض وليس في النيل الازرق وانه الانحدار عبر وادي المقدم طبيعي وممكن اما عن جدوى المشروع باخده بصورة متكاملة خلي السودان ينفذوا...شرط توفر الديموقراطية واعادة الحكم الاقليمي باسس جديدة لو ما بيقنا ذى البرازيل في خمس سنة بكون خريح اداب لغة فرنسية وليس كلية العلوم جامعة الخرطوم يا اخ البلد كانت ماشة بخيرالانجليز ساكت... ,,,,
بعدين يا ابو الريش انا ما سائح فرنسي انا من الشمال وما يريده الناس في الشمال تحسمه صناديق الاقتراع في اول انتخابات حرة.... وحلايب مصرية (وجه باسم)
Quote: من الخارطة أعلاه، يتضح سخف هذه الفكرة العنصرية السخيفة فإذا ما أنشئت هذه القناة ستحرم ولاية بكاملها من مياه النيل ومن عجبي أن اسم الولاية هو ولاية نهر النيل
بس يا النذير يااخوي الناس قالوا يحولوا ترعة من النيل الابيض ،بل من البحيرة خلف سد جبل اولياء يا عمك.. يعني المياه الاصلا محجوزة !!.. دا علاقتو بي نهر النيل والانقرياب والرباطاب شنو.. ديل حيمشي ليهم النيل الازرق كاملا(86%) من مياه النيل!!.. والله اسمح لي يا النذير، انو نطلع ترعة لاولاد عمك في كردفان تكون فكرة عنصرية!!.. يا خ نهر النيل كووووووولها ساكننها حسب التعداد الاخير650 الف نسمة .. وكردفان فيها ستتة ملايين نسمة يا النذير !!.. يعني اسع ترعة من النيل الابيض تروي عطاشى كردفان وحيواناتم تكون فكرة عنصرية!!.. وبعدين منو المفروض يحتج ،ناس نهر النيل ولا الناس البين سد جبل اوليا والفتيحاب الحتمر بيهم الموية دي..كلام والله!!؟..
والله كان كدي يا النذير مافي داعي لاي ثورة ..
------------- اقول ليك يا النذير خلاس ادونا المليار متر مكعب ونصف البتجيكم من كردفان وتمشي للمصريين بدون ما تلقوا انتو اولاد عمنا اي فائدة منها.. والله يا النذير لو موقفك دا هو موقف الثوار اخيرلينا الانقاذ!!..
08-18-2012, 06:06 PM
النذير حجازي النذير حجازي
تاريخ التسجيل: 05-10-2006
مجموع المشاركات: 7160
يا صهيب إنت بتتكلم عن البوست دا وللأ بوست تاني؟ والله حيرتني عديل كدا يا صهيب اللي دخل كردفان في الموضوع دا شنو؟! موضوع البوست هو كما قال طراوة فكرة ترعة الكاروري وهي تحويل مسار نهر النيل ليمر من الخرطوم إلى كريمة ويحرم جميع سكان ولاية نهر النيل من المياه
أما فكرة ترعة كردفان التى ناقشها البعض هنا لم أطلع عليها ولم أرد عليها، فأنا قد ركزت على موضوع البوست الأساسي
أما بخصوص كردفان وغرب السودان فهو غني بالأنهار الجوفية وليس بحوجة لنهر النيل أساساً، ولقد فتح بوست في الماضي بهذا الخصوص.
Quote: يا صهيب إنت بتتكلم عن البوست دا وللأ بوست تاني؟ والله حيرتني عديل كدا يا صهيب اللي دخل كردفان في الموضوع دا شنو؟! موضوع البوست هو كما قال طراوة فكرة ترعة الكاروري وهي تحويل مسار نهر النيل ليمر من الخرطوم إلى كريمة ويحرم جميع سكان ولاية نهر النيل من المياه
وثم اردفتا قائلا يا النذير..
Quote: أما بخصوص كردفان وغرب السودان فهو غني بالأنهار الجوفية وليس بحوجة لنهر النيل أساساً، ولقد فتح بوست في الماضي بهذا الخصوص.
كدي سمي لي نهر جوفي واحد في كردفان يا عمك.. ولا بتقصد حوض بارا الجوفي !!؟.. ياااا حليلك يا النذير دا مياه شرب الابيض بس قصت قلبو واثرت في منسوب مياه السواقي بتاعت بارا اللحقت اليوم امات طه!!.. ياخ الناس شدة ما قنعو من الحوض دا لييي مياه الشرب فكروا في الخط الناقل للمياه من النيل الابيض بقيمة 700 مليون دولار.. واللي رفضت الحكومة تمويله..
---- يا النذير كدي وسع افقك يا عمك السودان دا كبيييييييير.. ارمي قدام..
08-18-2012, 07:23 PM
النذير حجازي النذير حجازي
تاريخ التسجيل: 05-10-2006
مجموع المشاركات: 7160
يا صهيب أنا أساساً ضد فكرة العبث بمياه النيل وهي مكلفة جداً جداً، وضرها أقرب من نفعها ولبئس المولى ولبئس العشير.
وما قصدته بخصوص كردفان وغرب السودان عموماً فيوجد بها أنهار جوفية تحت باطن الارض ولقد إكتشفها الإمريكان عن طريق الأقمار الصناعية، ولقد أذاعتها السي أن أن في قنواتها ومواقعها الإلكترونية، وأستفادت ليبيا منها فائدة قصوى وصممت منها النهر الصناعي العظيم، ولقد فتح الباشمهندس نصر الدين هجام بوستاً بهذا الخصوص في السابق، ولقد حضرنا أنا وهو في واشنطن سمناراً ضخماً بهذا الخصوص، والله يا صهيب هسى أنا كسلان شوية لكن أول ما ألقى وكت ح أجيب ليك الروابط عن الانهار الجوفية في غرب السودان فهي تسقي جميع السودان ومصر وليبيا أجمعين وبتكلفة زهيدة جداً جداً، بالمناسبة يا صهيب الموية دي شغلي وأكل عيشي.
08-18-2012, 08:22 PM
الشفيع وراق عبد الرحمن الشفيع وراق عبد الرحمن
تاريخ التسجيل: 04-27-2009
مجموع المشاركات: 11406
Quote: يا الشفيع المهندس اللي ما بعتمد على مفتاح الخريطة دا ما مهندس من أصلو والخريطة اللي ما فيها مفتاح لا تُعتبر خريطة من أساسو، فأنا مهندس مدني ومتخصص في المياه ورسم الخرائط ببرنامج الـ GIS
النذير شكرا على ايضاحاتك العلمية انا ايضاً مهندس اتصالات ومتخصص "جداً" في الخرائط واتعامل مع كل برامج الـGIS بصفة يومية وأؤكد تماماً على اهمية "مفتاح الخريطة" ولكن كدليل "فقط" لقراءة الخريطة ولا يركن له كدليل هندسي لاي مخرجات للخريطة الا بصورة تقريبية جدا يعني الدليل ممكن يقول لينا (التضاريس السودانية تنحدر من الجنوب والشرق الى الشمال والغرب)، ولكن عند تحليل مسار قناة يجب ويجب جدا عمل X-Section او قطاع "بروفايل"
Quote: يا الشفيع لو راجعت بروفايلك وإذا ما كانت لك خبرة ولو ضئيلة في معرفة مفتاح الخرائط ح تلقى نفسك إنت الصاح وحاتم قد أخطأ
وده الكلام القلته من البداية
Quote: وعموماً البروفايل بقول حقائق اصلا مثبتة ولا تحتاج الى بروفايل
Quote: فراسم البورفايل هو الوحيد الذي يعلم ذلك، ولا يوجد إثبات في الخرطة
كلمتي "اثبات"
Quote: وانضبط يا باشمهندس
كيكي راجع ردي للنذير وكنت حقيقة اتوقع دخولك ومعاك "جنازيرك" وبطل مجاملة كلام "مهندسك" خطرفات، والنذير رد عليها بكل هدوء دون ان يجرح كبرياؤه، ومع احتفاظه برايه العلمي الواضح الذي لا يستطيع ان يتناطح فيها تيسان
اقول قولي هذا مع تحفظي السابق على الفكرة، وردي ينحصر فقط في الشبهة التضاريسية التي اتى بها "مهندسكم"
08-18-2012, 10:58 PM
Abureesh Abureesh
تاريخ التسجيل: 09-22-2003
مجموع المشاركات: 30182
المهندس لم يقل ولا كلمـة عن الأضرار التى ستلحق بالمواطنين الذين يعيشون على النيل منذ زمن تهراقا.. من جنوب شندى وحتى الدبـة. فقط تحدث عن فقدان الكهرباء وتعطيل سد مروى.. أتدرون لماذا؟ لأن سـد مروى يمد الخرطوم بالكهرباء... وحريقة فى الأقاليم وناسهـا!!! مصالح أهل المنطقـة فى الماء أهم من مصالح الخرطوم وغيرها فى الكهرباء.
ثم أيضا تحدث عن أن الصحراء غير صالحـة للزراعـة.. لا أعرف إن كان اللخو حصل زرع فى حياته.. لكن حين يأتى النيل يحمل الطمى معه طول العام.. والزراعة أساسا عدة شهور فقط وتحتاج للماء وبقية الغذاء فى الطمى..
اخيرا، الجعليين والشايقية والرباطاب وغيرهم من سكان نهر النيل والشمالية لهم كامل الحق فى معارضـة أى منشأة تقام لحرمانهم من مقومات حياتهم التى وهبها لهم الله من قبل التأريخ.. وخطرفات هـذا الرجل سوف لن تفوت فروته فى المسجـد.
08-19-2012, 10:58 AM
adil amin adil amin
تاريخ التسجيل: 08-01-2002
مجموع المشاركات: 37020
Quote: الله ياجماعة الفكرة دي من حيث إنها فكرة دارت في ذهني من زمن .. حتى ناقشتها مع الصديق الدكتور فوزي بابكر .. رؤية عادل معقولة من حيث مسار الترعة ببدأ من النيل الأبيض وبالتالي التأثير على سد مروي ما بكون كبير .. ووادي المقدم بنتهي مساره في نفس النقطة القال بيها الكاروري .. بجانب كونو كمجري طبيعي بقلل من تكلفة الحفر .. بالمناسبة الناس السافروا في خط امدرمان دنقلا.. بتظهر ليهم مساحات مهولة من الاراضي الطينية المنبسطة على مد البصر دون أي مرتفعات جبلية في المنطقة دي .. أعتقد الفكرة من حيث هي مفيدة وسوف تسهم في استقرار الكثيرين .. إن شاء الله بس لو مرت السبعة مليار القاعدة تصب في البحر هدرا.. بجانب الفائدة في إعادة الغطاء النباتي .. تبقى المسألة بعد داك فنية وتمويلية وسياسية.. . . برضو نكون جرينا ناس صهيب علي النيل بدل يجرونا ـ هههه .
الله يكثر من الاذكياء زيك في البورد وفي السودان والله فعلا ملك ومن الناس السافرو وشافو مش بنظرو ساكت اها بقينا انا وانت وصهيب ووراق= حلف جديد والاتجاه المعاكس بدا ولي قدام
08-19-2012, 06:18 PM
Osama Mohammed Osama Mohammed
تاريخ التسجيل: 04-02-2008
مجموع المشاركات: 4619
رد الباشمهندس حاتم وبالمناسبة هو عندو حساب هنا بس عندو موضوع لازم يتحلة مع بكري ابوبكر ( معاهو مجموعة من الاعضاء).
Contour profile or cross section through Karori Alleged Canal shows exactly the real elevation of the area. Two set of highland shown in the profile, Khartoum to the left. First max height point is 1577 Ft (481 m approx.) just after Khartoum, the second max height point is 1581 ft (482 m approx.). 70% of the total distance of the canal (140 Mile out of 200 Mile approx. it is height is above 1250 Ft (381 m approx.). The average width of River Nile in Aswan (most accurate close data point) is 1.74 Miles (2.8 Km approx.). So anyone can imagine how much the volume of excavation might be ده نمرة واحد.
اسئلة للاخ عادل امين 1. هل ستؤدي القناة الجديدة الى تقليل التبخر و توفير المياه ؟ ام ان استكمال حفر قناة جونقلي اجدى و ارخص ؟ 2. الفائدة الاقتصادية و الزراعية المردوة من القناة المقترحة و هل اجدى هي ام تعلية قناة الروصيرص ؟ 3. كيف ستؤثر هذه تقليل منسوب النيل و تأثيره على الزراعة و السكان على طول نهر النيل من امدرمان حتى ما بعد مروي (برغم ان النيل الازرق يجلب الجزء الاكبر من مياه النيل الا انه موسمي بمعنى انه يجلب ماء اكبر ابان الخريف في اثيوبيا، بينما النيل الابيض Steady و عليه يكون الاعتماد عليه كبيرا خصوصا في الفترة ما بعد سبتمبر )؟ 4. إقامة السدود و الخزانات و احداث اي تغيير في في اي نهر مائي لابد ان تصاحبه دراسة جدوى هندسية و اقتصادية و زراعية شاملة مضافا اليها اعتبار ال human environmental factors فاي تغيير في نمط و معيشة السكان و البيئة لابد من وضعه على الاعتبار قبل القيام بهكذا مشاريع، ماهي الاثار المترتبة على حفر هذه القناة بيئياً و انسانياً على سكان المناطق شمال الخرطوم جنوب مروي ؟
ارجو الرد المفصل على كل سؤال لو سمح وقتك بذلك . اسامة محمد
اقتباس ((((((و لو سمحتا يا اسامة وضح لباشمهندس النذير حجازي وباقي الناس البتسأل من عدم مشاركتي المباشرةthis disclaimer أنا عندي باسورد و شغالة لكني مقاطع البورد لانعدام الخصوصية و عدم احترام مالكه لحقوق اعضائه في الخصوصية، و كنت ضمن المجموعة الموقعة على العريضة المنعونة بعنوان (معا للحفاظ على سودانيزاونلاين) و توقفت عن الكتابة هناك بعدها احتراما لالتزامي بتلك العريضة و لعدم زوال الاسباب التي دعتني للمقاطعة ابتداءً. في البداية انا لم اسع الى نشر هذا الموضوع في سودانيزاونلاين قمت بكتابته و نشره على الفيسبوك، و قد قام الاخ اسامة بنشره بعد ان ترك لي ملاحظة على الفيسبوك و لم يكن يعلم بموقفي من المقاطعة و انا لا الومه على ذلك و اقدر ما قام به و اتفهم دوافعه و اسبابه.و انا لست ضد النشر في موقع عام يستفيد منه الناس للنقاش و إثراء الفكرة غير أنه كان لزاماً علي توضيح موقفي الثابت من عدم المشاركة في سودانيزاولاين من الاساس و هذا مالزم توضيحه.)))))) انتهى الاقتباس
دة الباشمهندس حاتم العاملنو (باشمهندسكم ) وزي كانو بتخوفونا بيهو او مهندس اي كلام .... الزول موجود لحم ودم وعندو باص ورد وعندو موقف..... انا ( علي شلاقتي ) شايف موضوع الكاروري ده موضوع فارغ - استندت - على كلام وتحليل باشمهندس حاتم والذي احترمه واقدره ..... دخل - كالعادة - الشفيع ورجاغ لانو الموضوع عن اسيادو ناس الحكومة المنتمي ليها الكاروري _ لمعلوميتك الكاروري ده انا بعرفو زي وش يدي ، أحد (حيرانه ) خال اعز صديق لدي وعقد ليهو ايام ( التمكين ) وكنت انا شاهد على الزواج . الحق يقال لو عاوز تناقش ناقش بي ادب النقاش ( رغم اني واعتذر عن ذلك اسأت لك في مناسبة سابقة ) ناقش علمي خليك من الادبي بتاع (فلترق منا الدماء) لأنو دمكم بقا ما بطلع من الجسم زاتو ....
لكم الشكر وللشفيع ورجاغ ارجو قبول اعتذاري و( اقلب علمي ) خلينا من الادبي حقنا ده ,
08-19-2012, 07:19 PM
الشفيع وراق عبد الرحمن الشفيع وراق عبد الرحمن
تاريخ التسجيل: 04-27-2009
مجموع المشاركات: 11406
Quote: لكم الشكر وللشفيع ورجاغ ارجو قبول اعتذاري و( اقلب علمي ) خلينا من الادبي حقنا ده ,
وانا اقبل اعتذارك اخي اسامة، وعارف اني "مرات" برفع الضغط ونعتبرها "عيدية" ولا مانع من فتح "صفحة بيضاء" جديدة وصافية لبن
ومن هنا ايضاً اعتذر عن اي اساءة وصلت لي "مهندسكم"، عفوا، المهندس المضرب الاخ/حاتم، رد الله غيبته هو ورفاقه، وحقيقة غياب المجموعة دي كان له اثر بالغ في مسار المنبر، واهو انتو شايفين "هيافة" ما يثار من مواضيع وغابت عنه "الدسامة" الزمان، بس نقول شنو، الله غالب وما عندنا غير احترام مواقفهم وفي الحلق غصة
شكراً لتوضيح سبب مقاطعتك للمنبر، لكن يا حاتم أظن جميع الموقعين على تلك العريضة قد عادوا إلى المنبر، إلا القليل جداً، وبالمناسبة المقاطعة ليست بذات جدوى مع بكري، بكري أحسن حاجة الناس تعملها معه هو الإتصال المباشر معه بالتلفون أو الإجتماع معه، وبالمناسبة بكري كان في السودان، وكان مفروض الناس اللي مقاطعة المنبر تعمل ندوة عديل كدا في حضور بكري ومناقشة الموضوع مع كامل احترامي لقرارتكم، ونتمنى أن نشوفكم قريباً في هذا المنبر.
ويا الشفيع رأيك شنو في بروفايل حاتم علي الآخير دا؟! فكما يتضح من البروفايل بأن المنطقة وعرة ومن الصعب بمكان تصميم قناة فيها، ناهيك عن طبيعة التربة التى ذكرها الباشمهندس كيكي، فهذه المنطقة صحراء جدباء وجبلية وصخرية، فالسودان لا يملك الأدوات لتصميمها ولا يملك أيضاً الميزانية لها، بالإضافة بأنها فكرة عقيمة ولا تحد من التبخر، فالتبخر في النيل كما ذكر الباشمهندس حاتم في منطقة جونقلي بالمناسبة قناة جونقلي دي رسالة الدكتوراة للدكتور جون قرنق فيمكن الإطلاع عليها في أي جامعة أمريكية، وأيضاً التبخر يحدث عند مناطق السدود والخزانات التى على النيل والتي عبثت بها الأيادي البشرية.
تحياتي وكل عام والجميع بألف خير
08-20-2012, 11:19 AM
الشفيع وراق عبد الرحمن الشفيع وراق عبد الرحمن
تاريخ التسجيل: 04-27-2009
مجموع المشاركات: 11406
Quote: ويا الشفيع رأيك شنو في بروفايل حاتم علي الآخير دا؟!
الصحيح يا النذير (راي حاتم في بروفايلي شنو؟) انت ممكن تمسك القلم وترسم اي مسار وتصعبه وتسهله على مزاجك مسار حاتم بقول اكتر من 70% منطقة مرتفعة وتحتاج للقص ومساري بقول انها اقل من 25% والعايز ينفذ اكيد ح يختار اسهل مسار والطبيعة already اختارت مسار (وادي المقدم) كافضل مسار المسارين ماشين في خط مستقيم، والموية كما تعلم ما زي امواج الاتصالات والسكة حديد، وممكن تمشي في مسار متعرج كما هو موضح ادناه
وعودة لمداخلة حاتم هو اشار لارتفاع 482 متر كانما هي ما يراد قصه وتنازل عن الـ600 متر السابقة، وفي الواقع المفروض يطرح منها ارتفاع المنبع (الخرطوم) من بروفايلي ما يتوجب قصه اقل من 50 متر في المتوسط، ولو اتبعنا المسار المتعرج قد لا نحتاج لكل هذا القص اما بخصوص عرض القناة، حاتم اشار الى انه المفروض تكون 2.8 كلم استناداً للعرض في اسوان وده غير صحيح، مئات الامتار تكفي للقناة لدي قاعدة بيانات ضخمة لكل الجبال والهضاب في السودان من ناسا ويمكن عمل دراسة تفصيلية نظرية اذا تطلب الامر
08-20-2012, 01:36 PM
adil amin adil amin
تاريخ التسجيل: 08-01-2002
مجموع المشاركات: 37020
سيد البوست اسامة سلام الورجغة ما بتاعة الشفيع وراق بس.كما يزعم ادعياء الذكاء والفهم ديل المعارطة السودانية الغبية ايضا اسهمت في افساد هذا البوست بي كلاما الفارغ الزعل صهيب وفي ناس بتابع وبتقرا وتفرق بين الورجغة والعنتظة والكلام العلمي يا خ ذى نوع ديل من 1964 معطل السودان بالالقاب الكبيرة سعادة اللوا وسعادة البروف والباش مهندس وكدا عشان كده الجمال لا زالت تمشي كدراي مصر بدرب الاربعين. ولو كان في سكة حديد جيدة كانت مشت بالقطر من دنقلا لي مصر(راجع السكة حديد في المشروع
اسائلتك مشروعة قبل ما ارد عليها خلي الباش مهندس يرد اولا هل ممكن نقل جزء من مياه النيل الابيض الى وادي المقدم الى النيل مرة اخرى ولا في عائق طوبوغرافية ؟؟كما يزعم هؤلاء وهل خزان جبل اولياء في النيل الازرق كما هو في الخرطة ام في النيل الابيض؟
ونرجع لاسئلتك
08-20-2012, 01:50 PM
adil amin adil amin
تاريخ التسجيل: 08-01-2002
مجموع المشاركات: 37020
اسئلة للاخ عادل امين 1. هل ستؤدي القناة الجديدة الى تقليل التبخر و توفير المياه ؟ واذا تبخر الماء في حزام الجفاف في المنطقة بيرفع الرطوبة النسبية ويسقط الاامطار ويقلل الجفاف والتصحر..كما اني حددت اوجه اتسهلاك هذا الماء في استصلاح اراضي هذه المنطقة
ام ان استكمال حفر قناة جونقلي اجدى و ارخص ؟ قناة جونقلي ضرورية ومكملة للمشروع لانها اذا اتحفرت حتزيد موية النيل الابيض واذا زادت موية النيل الابيض وظلت مخنوقة جنوب الخرطوم حتعمل فيضانات مدمرة على طول النيل الابيض.لذلك يجب عمل قناة امتصاص تتجه غربا ان شاء الله لي وادي ملك..للتحكم في مياه النيل الابيض.. 2. الفائدة الاقتصادية و الزراعية المردوة من القناة المقترحة و هل اجدى هي ام تعلية قناة الروصيرص ؟ اجدى هذا المشروع لانه يستصلح اراضي مهولة جديدة وثروة حيوانية في شمال كردفان التي ستتركز حول مصدر المياه الجديدة..تعلية خزان الرصيرس ماذا ستفيد شمال السودان وكردفان ..واصلا الاقليم الاوسط مكتفي كهرباء ومشروع الجزيرة الذى دمره الكيزان.. 3. كيف ستؤثر هذه تقليل منسوب النيل و تأثيره على الزراعة و السكان على طول نهر النيل من امدرمان حتى ما بعد مروي (برغم ان النيل الازرق يجلب الجزء الاكبر من مياه النيل الا انه موسمي بمعنى انه يجلب ماء اكبر ابان الخريف في اثيوبيا، بينما النيل الابيض Steady و عليه يكون الاعتماد عليه كبيرا خصوصا في الفترة ما بعد سبتمبر )؟ لن تؤثر في النيل الرسمي ابدا لانها محدودة وايضا نهر عطبره يشكل اضافة مدمرة للنيل يمكن التحكم فيها ايضا ونهر عطبره خارج اتفاقية مياه النيل مع مصر.ممكن تحويل مياه الى مستودع احتياط او تمريرها تحت النيل غربا ايضا(ذى نقل المياه تحت قناة السويس في مصر الى سيناء) 4. إقامة السدود و الخزانات و احداث اي تغيير في في اي نهر مائي لابد ان تصاحبه دراسة جدوى هندسية و اقتصادية و زراعية شاملة مضافا اليها اعتبار ال human environmental factors فاي تغيير في نمط و معيشة السكان و البيئة لابد من وضعه على الاعتبار قبل القيام بهكذا مشاريع، ماهي الاثار المترتبة على حفر هذه القناة بيئياً و انسانياً على سكان المناطق شمال الخرطوم جنوب مروي ؟ حتخلي الاقليم الشمالي ذى الاقليم الاوسط (مشروع الجزيرة )العملو الانجليز زمان وتحول الرعاة الى مزراعين..وذى مدينة شينتجن الصينية بعد ربط الصين بهونج كونج بالسكة حديد...وسيصبح السودان ذى البرازيل فهل ازمة السودان في موارد ام في توظيفها زول داير يمد ترعة غرب النيل مش عايز اعمل مفاعل ذري عشان كده المشروع لازام يؤخذ بصورة متكاملة بمحاروه الثلاث المياه السكة حديد- الكهرباء وبدقة ومن غير فساد وشركات مشبوهة عشان كده منتظر الديموقراطية
ارجو الرد المفصل على كل سؤال لو سمح وقتك بذلك . اسامة محمد
08-20-2012, 02:00 PM
adil amin adil amin
تاريخ التسجيل: 08-01-2002
مجموع المشاركات: 37020
الاخ العزيز اسامة امسك محور محور من المشروع مثلا السكة حديد من الاسكندرية الى ممباسا؟ هل تستطيع ان تتصور الحراك البشري والسلعي المهول الذى يمتدد عبر اربعة دول مصر -السودان -جنوب - السودان -كينيا والله كفاية سكة كتنشر اليها 100 سنة دي طيب خليك من المشروع السياحة الاثرية-كرمة- كريمة-شندي لو بس مليون سايح من 10 مليون البجو مصر لحدت اسوان ديل كملو مشوارهم بالسكة حديد عبر شمال السودان من كرمة لي كريمة للنقعة والمصورات وكل سائح استهلك فقط 1000 دولار يعني دخل السياحة الاثرية بقى الف مليون دولار وطبعا بعد اكتمال البنيات السياحية والنقل النهري بين كريمة ودنقلا بي بصات نهرية سياحية وهم لاحقين شنو..وكده كيف ستيغير نمط حياة الناس في الاقاليم الشمالي بالكامل الى الاسوا ام الى الافضل طبعا التساؤل ده للاذكياء الزييك مش المولولين الملو البوست حاصل فارغ ديل احسن يتابعو ناشونال جغرافيك شوية
08-20-2012, 02:26 PM
adil amin adil amin
تاريخ التسجيل: 08-01-2002
مجموع المشاركات: 37020
يا اسامة تحية طيبة هل اتاك حديث (النعر) اقرع النعر من بوستك ده لا يفقد قيمتو العلمية.. والنعر ذكرهم منصور خالد في كتابه النخبة السودانية ادمان افشل ويتوزعون بين المعارضة والحكومة الان وفي هذا البورد.. الواحد فيهم ما بيقرا اذا قرا ما بفهم والعنتظة لي رب السما والبكى والزغاريد والجنازة(ك.لب)
الكاروري فقيه بتاع دين ما ليه في المشاريع من هذا النوع لكن القضية المطروحة لا زالت قائمة بس النعر في قال فلان وصحيح البخاري وجايي يولول على القبائل في الشمال الكاروري سائح الماني مثلا والله فعلا سجم رماد ذى ماقال صهيب ضمنا انتو ما هو بديلكم لتطوير الاقليم الشمالي خلو ولاية الفقيه بتاعة الكاروري؟؟ عرفناها ما بتفنع خلاص... انقرعو
08-20-2012, 02:42 PM
adil amin adil amin
تاريخ التسجيل: 08-01-2002
مجموع المشاركات: 37020
Quote: اما بخصوص عرض القناة، حاتم اشار الى انه المفروض تكون 2.8 كلم استناداً للعرض في اسوان وده غير صحيح، مئات الامتار تكفي للقناة لدي قاعدة بيانات ضخمة لكل الجبال والهضاب في السودان من ناسا ويمكن عمل دراسة تفصيلية نظرية اذا تطلب الامر
كلام ذى الورد يا شفيع وراق والخارطة ومسار وادي المقدم يوضح تماما جدوى المشروع
شكرا كلامك علمي تماما ولكن اكثر النعر لا يعلمون واصل حجتك تماما في البوست ودي من فوائد الديموقراطية في هذا المنبر الحر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Osama Mohammed
ibrahim fadlalla
أحمد الشايقي
سيف النصر محي الدين
الشفيع وراق عبد الرحمن
ياسر مكاوي
adil amin
الرفاعي عبدالعاطي حجر
jini
النذير حجازي
محمد على طه الملك
عبدالكريم الامين احمد
أحمد طراوه
Abureesh
فيس بوك
تويتر
انستقرام
يوتيوب
بنتيريست