كتب الكاتب الفاتح جبرا المتوفرة بمعرض الدوحة
|
|
 سراج السفارة السودانية .. وملف خدمة العملاء بالسودان .Customer S !
|
هو سراج الدين مصطفى .. بسفارة السودان بالدوحة – قطر
موظف إستقبال بالقسم القنصلي
لايشبه ( موظفي السودان اليومين ديل ) أقصد ( موظفي المصالح الخدمية ) ،، وعالم التجهم والكركرة والنرفزة والعصبية وضيق الخلق ، وإنعدام بشائر الود والمحبة ، واختفاء ملامح البِشر والصفاء والإبتسام ! إضافة إلى عدم الإعتبار للآخرين .. والمحاباة ! وتغليب المصالح الشخصية ،والمعارف وعلاقات الصداقة وصلات القرابة ، على الصالح العام ،، وعلى مصلحة المواطن من حيث هو كمواطن له الحق في أى خدمة مكفولة للمواطنين على أرض الوطن .
لا أعرف سراج معرفة شخصية ، وليست لي به أدنى علاقة ، ولا أدري إلى فئة ينتمي ! حتى أني علمت بإسمه الكامل من بعض الأصدقاء !
ولكن ثمة معرفة عميقة خفية تجيش بالصدر نحو هذه الشخصية التلقائية الرحبة السخية المريحة ! وأظن أنها المعرفة ب ( السودانوية السمحة ) التي انقرضت وذهبت ريحها ، أو كادت أن تذهب من جميع الساحات والمواقع السودانية ! ومن أماكن استقبال الجمهور خاصة ، بالوزارات والمصالح والأجهزة الخدمية في السودان !
فياله من سراج مضىء يشع رحابة وجمالاَ وضياءً وسعة صدر ! . وياله من ( زول سمح ) بكل ما تحمل هذه الكلمة من معنى ! ... رجل على استعداد لخدمة الجميع من دون فرز ، ومن غير أى مصلحة أو صداقة أو صلة قربى ! ... موظف ذو حس راقي ، لطالما يُشعرك دائماً أنه يسعى إليك ، وإلى نيل رضاك .. وأنه في خدمتك ! ويتطلع دوماً إلى راحتك ، وإنجاز حوائجك دون أى تعنت أو عناء أو منفعة ذاتية ، كأنه هو صاحب العلاقة ! .. فلطالما يُذكرك بذاك الزمان الجميل والإنضباط والنظام ، وتلك الخدمة المدنية الواعية الراقية المنضبطة التي كانت يوماً ما على أرض السودان !
عافي منك يا سراج وممتن لك كل الإمتنان ، وشاكر لك جداً ، جهدك ودماستك ، وخلقك الرفيع وروحك العالية السمحة .............................................. ولك مني خالص التحيات .
هذا من باب الأمانة وإعطاء الناس حقهم ،، ومن أجل إذكاء روح التغيير للأحسن وتمجيد كل ماهو جميل وجيد وممتاز ، من أجل رفعة هذا الوطن ، والسعي للتطوير والتحسين والتقدم !
على النقيض مما نراه اليوم على أرض الواقع في أغلب المرافق والمصالح الحكومية بالسودان من تجاوزات ، ومن هرج ومرج وهرجلة وعدم إنضباط ! ( كل واحد ، واللا واحدة ، جايين داخلين بالعرض والطول ! الشايلة ورق أخوها ، والشايل ورق ودخالتو ، والمدخل صاحبو ، والبتكورك لى فلان والبكورك لى علان ! وطبعاً السيدة الموظفة ، أو الموظف المسؤل أهو ده
عينك ليو .. وعينك عينك وقدام كل الخلق ، يفتح الباب لى صاحبو العزيز أو قريبو أو قريبتو ، وهاك ياونسة وضحك وقهقهات ! وصاحبنا أو صاحبتنا المحتفى بهم ، آخر راحة واطمئنان في ضيافة الموظف ، أو المسؤول ! لاصف ، لا معافرة ، لا مدافرة ، لا عرق ، ولا يحزنون ! وطبعاً خلاص ، أكيد المعاملة قيد الإنجاز ، وبسرعة البرق ! حتى ولو لم تك مستوفية للشروط ، فهي حتتعمل حتتعمل ! لأنو أبوالنسب أو قريبك ، أو صديقك ، أو ود جيرانكم موجود ، وفي يدو القلم ! وعادي جداً بقينا كلنا من دون إستثناء ، نستفيد من هذه العلاقات وصلات القرابة والجيرة والصحبة ، ونفتخر بذلك أيما افتخار ! وأصبح من العادي جداً تقول لى بتك واللا ولدك أمشى لى فلان ، واللا لى علان ، واللا لى فلتكان ، والموضوع مقضي مقضي ! والواحد فينا فرحان جداً كمان ، ومتباهي بى تخطيو للرقاب ! وبإختصار كده مصالح السودان كلو ( بقت خشم بيوت ! ) ولازم يكون عندك إتنين تلاتة ، في أى مصلحة من المصالح ، عشان يخدموا العائلة الكريمة ومعارفم وأصدقاؤم .. ويخدموا كمان ناس الحلة والجيران وأهلم كلهم كمان !
وحسك عينك ، وكدي الله يقدرك تعترض على موظفة واللا موظف واللا تقول كلمة ساكت بالغلط ! ما خلاص واطاتك أصبحت ! ومعاملتك دي تاني إلا السنة الجاية ! واللا تمشي تفتش ليك قريب واللا صديق عشان يجي يحل الموضوع ! وبقينا لافين كده كلنا ! ... بتعرف زول موضوعك إنقضا ! مابتعرف زول كمان ، تاكل نارك ، وما تعشم في أنو أمرك ينقضي بى أخوي وأخوك!
أما في حالة الظروف العادية ، وساعة القيد يحر والصفوف تولع ، وخاصة لو إنت واقف في صف طويل ، وباقى ليك القليل ، وإنت هلكان وتعبان وزاحف من قبيل ، وتكون خلاص قربت ، وفجأة يجوك ناس داخلين بى قدامك ، وعينك عينك ! طبعاً ما بكون فاضل ليك إلا تمسك واحد منهم وتعضيو شديد في نص راسو من الغيظ !! .. ده طبعاً غير ناس زعيط ومعيط البجوك داخلين في النص ، وشايلين ورق العملاء ، وطالبين الرزق ! يكونوا طبعاً مريحين زولم آخر راحة ، وهو قاعد بهناك في الكافتيريا ، أو في الضل ، لا عرق لا زحمة لا مرض ! ويكون بلص لى الجماعة ديل بلصة تكفيهو شر الحر وشر العرق والتعب والمدافرة ! وطبعاً ديل مارقين للربا والتلاف ، يطلعوا في الرقاب ، واللا يتلبوا بى الشباك ، واللا يقعوا في النار ، وتتقطع هدومم ما ضروري ، وما مهم ! المهم يقالعوا الناس كدي ويعافروهم وزي ما تجي تجي ، والمعاملة حتنقضي حتنقضي ! وفي أغلب الظن والأحوال ،، هم طبعاً عندهم ناسم بى جوة !
أما في الظروف العادية جداً ، وإنت جاي لا بتعرف زول ، لا عندك صاحب ، لا رفيق ، لا قريب ، الله قال بى قولك ! وتعال شوف صرصير الوش الما بغباك ، من سيادة الموظفة أو الموظف المسؤول ، وشوف ليك جنس لآمة ، وقطامة ، ما بعدها قطامة ! زي التقول إنت أكلت مال أبوهم ! واللا المصلحة دي أصلاً هم وارثنها ، وهى مسجلة بى اسماؤم !.... الواحد شغال في مرفق حكومي عشان يخدم الناس ويساعد المواطنين المتساوين معاو في الواجبات والحقوق ،، والدولة خاتاهو عشان كده ، وعشان راحة المواطنين الغلابة وخدمتم ،، يقوم يفتكر أنو الناس دي ، هم المفروض يخدموهو ويحترموه كمان ، ويطأطوا راسم قدامو وقدام هيبتو وصولجانو وجلالو كموظف مرموق ، ومهم ، ومحترم ، وعالي المكانة ! ولأنو سيادتو موظف كبير ومرموق ، والناس دي كلها مفترض تكون في خدمتو وإحترامو ! كأنها المصلحة دي أصلاً بتاعتو ومعمولة عشان خاطر سيادتو ! . يعني مفاهيم معكوسة تماماً ، ومسألة جايطة جوطة لا يعلم بيها إلا الله !
وكثرت الأحاديث في الآونة الخيرة بشدة عن الظواهر المزمنة والمستعصية حول سؤ الأداء وسؤ السلوك وسؤ المعاملة ، في كل المرافق الخدمية في السودان ! وتفشي الظواهر السالبة ، والمحسوبية والمحاباة والمجاملات إلى حد لا يطاق ! وعادي جداً يجيك واحد يقول ليك : شفت الزول ده قطيم كيف ! واللا ( البت ) اللئيمة المتفلهمة ديك بتشر الناس ، وبتأخر المعاملات كيف ! وطبعاً تلقاها بتتكلم في التلفون ، واللا سايقة صاحبتا وطالعة من مكتب لى مكتب ! .. وعادي جداً ممكن موظف أو موظفة يلطعوك بالساعات ، وهم بتكلموا في التلفون ! أو كمان لو أخد/أخدت ليها مرقة برة المكتب كده شوية ، يبقا الرماد كال حماد ! .. أو لو عملت/ أو عمل ليك فيها مشغول بى موضوع تاني ، يبقى تتزرع بالصبر الجميل المابعو صبر وترجا الله !
بعدين تكون جنيت ، واللا حلمان ، واللا عاضيك ###### ،، لو حسيت أنو في موظف ممكن يبتسم ليك ، بسمة صافية كده تنعش القلب واللا تخفف عليك هجير المناتلة وعناء التعب وطول الإنتظار ! واللا يطلع موظف يعتذر ليك ، واللا يطبطب عليك لسبب القصور أو التأخير ! يازول هم ديل بقصروا واللا بغلطوا في السودان ؟!! أصلو زول بغلط واللا بقصر عشان يعتذر للناس ده مافي خالص ! .... الناس البغلطوا ويعتذروا ديل ممكن يكونوا في اليابان واللا في الصين ، واللا كوريا ،، أو في كندا ، واللا أميركا ، أو في هولندا !!! .... لكن نحن مكملين يازول ! وهديين ورضيين ، نعتذر لييه ؟!!
يقودني هذا الحديث المستحق لرجل استحق الثناء والعرفان ، إلى قضية هامة من قضايا هذا العصر المنطلق إلى ما لانهاية ، وإلى فضاءات أرحب ، بسرعة الصوت والضؤ ! وهى بالتأكيد قضية مهمة وأساسية ، بل هي ركن هام من أركان الحديث الشامل المرتقب ، في الطريق إلى ثورة السودان الكبرى ، المرتقبة ! والتي هي ثورة ، أولاً على المفاهيم والعادات والتقاليد الضارة المتخلفة ، وعلى الممارسات الخاطئة المعتادة على الواقع السوداني ، والتي ساهمت ولا تزال تساهم إلى قدرٍ كبير في تأخرنا المريع ، وتأخر هذا البلد وتقهقره إلى الوراء !
ألا وهي قضية ( خدمة الجمهور ) أو ( خدمة العملاء ) CUSTOMER SERVICES ، التي اجتاحت العالم وأصبحت مطلب أساسي لتجويد التعاملات والمعاملات الإنسانية الخدمية ، والتعامل برقي وشفافية وبنزاهة ، وبعقلية متمدنة وحضارية ! ... والتي أأسف شديد الأسف لعدم تمكنها من الولوج إلى أرض بلدي السودان حتى الآن ! علماً بأن هذا البلد قد كان في سالف العصر والأوان ، رائداً من روادها ، وعالماً من عوالم التمدن والكرم والضيافة وتبجيل الضيف إلى حد التقديس ، وتوقير الكبير وإحترام الصغير ، وعدم تخطي الآخرين ، وتقديمهم على النفس ، ونكران الذات ، وحب الخير للآخرين ، وللجميع .. وذاك الإيثار السوداني ، الذي كان علامة فارقة وماركة مسجلة في تلك المجتمعات السودانية المتآخية المتحابة ، الراقية المسالمة ! في بلد لم يك ينام فيه إنسان شبعان ، وجاره جوعان ! ولا يجلس فيه شاب على مركبة أو مكان ، وإمرأة واقفة ، أو شيخ كبير أو عجوز واقفان ! وفي بلد كان أهله كلهم ، فضل ظهر ، وكلهم فضل زاد ، وكلهم فضل إيثار ومحنَّة ومحبة ، وتكافل وتعاون ونكران ذات !
إذا فنحن أهل لها قبل أن تكون هي للآخرين على أرجاء هذه المعمورة !
فما هي خدمة العملاء CUSTOMER SERVICES :
وماهيتها ؟! وكيف تكون ؟! وأين هى الآن من السودان ؟! ومن أهل السودان ؟!!
وهل نعشم أن تكون قريباً على أرض الواقع بالسودان ؟!
هذا ما سوف نبحث فيه ، وعنه ، هنا .. كان الله هون
وإلى لقاء قريب
• هذا بعض حديث متواضع في الطريق إلى ثورة السودان الكبرى المرتقبة ..
• فلنجعلها ثورة على المفاهيم !
مامون
|
|
 
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: هاشم الادريسى)
|
Quote: الاخ سراج مصطفى سفارة قائمة بذاتة فى خدمة كل السودانين بالدوحة
الاخ سراج دائما مبتسم فى كل من ياتى الى القسم القنصلى -- |
العزيز / هاشم الإدريسي
هي قيمة ليست بعدها قيمة ! أن تبتسم من القلب وأنت تستقبل الناس في مرفق عام !
هي سفارة بحد ذاتها لكل السودانيين والسودان أن تطرح بشرك للناس ... فلقد قالها النصيح من قبل في مجلس المك نمر ، حينما قال :
( وبشرك أطرحو ماتكون دوام متغير ... كم سبق الأجل خلا العقل متحير )
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: هجو الأقرع)
|
Quote: سلام من الله ورحمة ، رمضان كريم اخى مامون
اخونا سراج شيخ عرب عديل ، له التحية ولك
انت برضو ، برضو لى عودة باذن لذكر فضائل
دعنى اقول اخونا ابومصطفى |
الأخ العزيز / هجو الأقرع
رمضانك كريم ، والله أكرم ،
أبو مصطفى ينتهج نهج كان عليه الأجداد والآباء وكل السودانيين من قبل ... العفوية والسماحة وطولة البال وتقديم العون للجميع والإهتمام بالكبير والصغير ، ومراعاة الناس وتطييب خواطرهم بنفس راضية وصدور مفتوحة ..... هو ذاته نفس النهج الذي يقوم عليه الآن نهج ( خدمة العملاء ) التي اعتمدت كسياسة للتعامل مع الجمهور والناس في كل العالم ! .... أمثال سراج يشجعوننا ويمنحوننا الأمل لتعميم هذا النهج في كل السودان ، وتعليمه للنشء في المدارس ، وحث الناس عليه في جميع المرافق ........ أظن أنو الناس خلاص تعبت من الحاصل بدواوين الخدمة المدنية والمرافق العامة .. ومن التخلف عن ركب الأمم الراقية الواعية ، التي هى ( ليست بأحسن مننا في شىء ! ) ..
تحيات مطر يا هجو
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: محمد فرح)
|
Quote: أكثر الله من أمثاله
خدمة العملاء علم كبير قائم بذاته وقسم مهم أتمنى أن تهتم به كل الشركات والمؤسسات الخاصه والحكوميه في السودان |
آمين .. عزيزنا محمد فرح ،
نعم .. وهذا مانحن بصدده الآن ... سنناقش أمر الإهتمام بالمواطن من جم ، من حيث هو كمواطن ، ونحن بالقرن العشرين ، والعالم يتجه إلى دولة المواطنة والمدنية والحرية وحقوق الإنسان .
خليك قريب.
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: معتز القريش)
|
Quote: ملاك أنزله الله الى الأرض في صورة انسان
شهادتي فيه مجروحة جدا جدا |
عزيزي معتز ،
هي ليست مجروحة في حق سراج ، فالرجل يمارس عمله بإتقان وتجرد وصدق ونوايا طيبة ومشاعر مخلصة من الأعماق ومن دون أى تحيز لأى كان .. ويؤدي عمله بروح عالية وأمانة وصدق قلما يوجد اليوم .. وحرى بنا أن نفتخر به ، ونذكيه ونشد من أذره ونسانده ، ونشد على أياديه .. فالبلد اليوم في أمس الحاجة لأمثاله .... وشهادتنا فيه حق له علينا .. وحق للسودان الذي يفتقر إلى أمثاله .. لعل الله يكثر من أمثاله .
وأنا أنتهز هذه الفرصة لنحتفي به جميعاً وبكل ما هو جميل
وهي فرصة سانحة لفتح ملف خدمة الجمهور
تحياتي
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: محمد حيدر المشرف)
|
Quote: الكلمات حتما ستكون قاصرة فى حق "سراج" ..
وحتما هى قاصرة فى حق "عوض الله" ..
لهما التحية عبرك يا مامون وعبر هذا البوست ال .. بشبهك ! |
ياسلام يادكتور !
ولك ألف تحية يا مشرف ورمضانك كريم ،،
Quote: وسراج وعندما لا يكون هناك ازدحام .. يكون طبيعيا جدا أن يشملك الرجل بلطفه وحسن استقباله وابتسامته الودودة ..
والمدهش حقا أن تلقى ذات اللطف , وذات الابتسامة الودودة والسفارة فى قمة الازدحام ,,
الأمر الذى يحدث لى دوما وسراج ..
يا سلااام ياخ ! |
هي يا مشرف ،، وياسلامين ياخي !! له ألف تحية
Quote: هناك موظف يجلس جوار "سراج" يا مامون ..
صارم القسمات و جادى جدا فى لبسته الاشتراكيه ولكن ..
الزول ده زول فيهو فايده ويقضى حوائج الناس بى اخلاق عاليه و .. زول كريم يا مامون |
والله جد .. وأنا لاحظت نفس الملاحظة ..... وهو لا يخلو من نفس حلو ومن بسمة خفية داخلية !
له ولكل أخ كريم ، ألف تحية .
راجع ليك يا مشرف
تحياتي
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: مامون أحمد إبراهيم)
|
سلامات ياحبيب
ورمضان كريم
والله الذي لا اله الا هو لقد كنت ومازلت افضلنا
عندما انتبهت لهذا السراج ......
رجل من الزمن الجميل
وبهذه الكلمات عبرت عني تماما
لك شكري وتقديري ايها الاصيل
وللحبيب سراج كل الود
Quote: فياله من سراج مضىء يشع رحابة وجمالاَ وضياءً وسعة صدر ! . وياله من ( زول سمح )
بكل ما تحمل هذه الكلمة من معنى ! ... رجل على استعداد لخدمة الجميع من دون فرز ، ومن غير أى مصلحة
أو صداقة أو صلة قربى ! ... موظف ذو حس راقي ، لطالما يُشعرك دائماً أنه يسعى إليك ، وإلى نيل رضاك ..
وأنه في خدمتك ! ويتطلع دوماً إلى راحتك ، وإنجاز حوائجك دون أى تعنت أو عناء أو منفعة ذاتية ، كأنه هو صاحب العلاقة !
.. فلطالما يُذكرك بذاك الزمان الجميل والإنضباط والنظام ، وتلك الخدمة المدنية الواعية الراقية المنضبطة التي كانت يوماً ما على أرض السودان !
عافي منك يا سراج وممتن لك كل الإمتنان ، وشاكر لك جداً ، جهدك ودماستك ، وخلقك الرفيع وروحك العالية السمحة ..............................................
ولك مني خالص التحيات . |
| |
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: haroon diyab)
|
Quote: اخونا سراج شيخ عرب عديل
|
الاخوة هجو الاقرع وهاشم الادريسى
ماذا تعنى عبارة ( شيخ العرب ) فى قصة الاخ سراج موظف السفارة السودانية ( قطر) ؟
هل سراج هذا اذا لم يكن ( شيخ عربا ) لما اتصف او اصبح بهذه الصفات ؟
كلامكم هذا جزء من الثقافة الموجودة فى الشارع السودانى اليوم والتى تقول اذا اخطاء احد من المصنفين للعرب ( يازول ده شنو اللى بتعمل فيه ده , انت ما ودعرب ؟ ) كانو الخطاء والغلط لغير العرب !!!!!!!!
يعنى ناس هرون دياب وعبدالاله زمراوى وعزام حسن فرح حقهم راح على سبيل المثال حتى لو اتصفوا بصفات سراج مادام هم ما شيوخ عرب !!
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: james)
|
| Quote: نوارة السفارة ووجهها المشرق. |
ياسلام يا جيمس !
وفي غاية الإشراق ،، لأنو الروح مشرقة ! ....
نحن بنقول هذا الكلام يا جيمس في حق سراج ، وهو في الحقيقة في غنىً عنه .. لرجل قد لا يحب أن يُحمد عياناً بياناً ! ولكن الواجب يحتم علينا عمل إضاءة ضرورية لازمة لما نشوف قمر منير أو شمس ساطعة في سماء السودان ، الذي جارت عليه الأيام ، بعد أن كان عنوانا لكل العرب والأفارقة ، وكان يًشار إليه بالبنان .... عشمنا ياجيمس أن يعود السودان كما كان ، ويصبح كله أسرجة وشموس تضىء صدر الزمان !
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: خالد حاكم)
|
Quote: Quote: اخونا سراج شيخ عرب عديل
الاخوة هجو الاقرع وهاشم الادريسى
ماذا تعنى عبارة ( شيخ العرب ) فى قصة الاخ سراج موظف السفارة السودانية ( قطر) ؟
هل سراج هذا اذا لم يكن ( شيخ عربا ) لما اتصف او اصبح بهذه الصفات ؟
كلامكم هذا جزء من الثقافة الموجودة فى الشارع السودانى اليوم والتى تقول اذا اخطاء احد من المصنفين للعرب ( يازول ده شنو اللى بتعمل فيه ده , انت ما ودعرب ؟ ) كانو الخطاء والغلط لغير العرب !!!!!!!! |
الأخ العزيز/ خالد حاكم ،
أسمح لي أن أُحيلك لهذا النشيد العظيم .. وهو لإنسان سوداني غير عربي : مرسي صالح سراج
وأرجو أن تجد فيه الإجابة ...... أرجو أن تتأمل هذا النشيد ، فهو من زمن جميل كانوا الناس فيه سواسية :
يقظة شعب
هامَ ذاك النّهرُ يستلهـمُ حُسنا
فإذا عبْرَ بلادي ما تـمنّى
طرِبَ النّيلُ لَدَيْها فتثنَّىَ
فأروي يا تاريخ للأجيالِ عنـّا
*****
ثائرٌ إذ هبَّ من غفوتِهِ
ينشدُ العلياءَ في ثورتِهِ
كاندفاع السّيلِ في قوّتِهِ
عجباً مَن لهُ جندٌ على النّصر يُعين
كُلُّنا نفساً ومالاً وبنين
*****
نـحنُ في الشِّدَّةِ بأسٌ يتـجلَّىَ
وعلى الوُدِّ نـضُمُّ الشّملَ أهلا
ليسَ في شِرعتِنا عبدٌ وموْلَىَ
قسَماً سنرُدُّ اليومَ كيدَ الكائدين
وحدةً تَقْوَىَ على مَرِّ السّنين
*****
قلْبُ إفريقيا بِوَعْيٍ نابِضِ
حَلَّ مِنّا بالـجّنوبِ النّاهِضِ
مِن عدو الغابِ بِلَيْثٍ رابِضِ
قِدَمَاً هي كانت جنّة المستعمرين
مالـَهُم منها تبارَوْا هاربين
*****
نـحنُ أبناء ملوك في الزّمان
توّجوا الفونج وزانوا كردفان
أفسحَ المجدُ ليهم خيْرَ مكان
نسباً نِعْمَ أجدادٍ بِهِم يزهو جبين
خُلُقٌ يسمو وعَزْمٌ لا يلين
*****
شرقـُنا يوم اللقاء كيفَ سعَىَ
حينَ داعي البذلِ بالرُّوحِ دعا
كيفَ بالسَّيْفِ تحدَّىَ المِدْفَعَا
ودِمَاً بذَلوها ثرّةً لا تستكين
للخنا للقيْدِ للعَيْشِ الـمُهين
*****
حِينَ خَطَّ الـمَجْدُ في الأرْضِ دُرُوبَا
عَزْمَ تِرْهاقا وإيـمان العروبة
عَرَبَاً نـحنُ حملْناها ونُوبة
بِدِمانا مِن خلودِ الغابرين
هُوَ يحدونا إلى عِزٍّ مُبِين
*****
هـَمُّنا في العَيْشِ إقْدامٌ وجُود
وعنِ الأوطانِ بالمَوْتِ نذود
لِنَرَىَ السُّودانَ خفّاق البنود
وغَدَاً سوفَ يَعْلو ذِكْرُنا في العالمين
فعُلُوَّاً كان شأنُ العامِلين
بإلله عليك تأمل ياحاكم وحكِّم ضميرك ،، فعبارة شيخ عرب كانت تُذكر بين الإخوة في المجتمع السودانوي المعهود ، بكل حسن نية ... هي مجرد قفشات لكلام إخوان وأصحاب وأولاد حلة ، حتى أنها كانت تقال للعربي وللغير عربي ،،، وهي تنم على شيمة الكرم والحفاوة وكريم الخصال التي كان يتفاخر بها الأعراب في فيافي السودان ، من دون أى هضم لحقوق الآخرين ... ونحن مجتمع إنساني خليط ، ولكنه كان منسجماً جداً أيام عز السودان وتاريخه الضارب في البعيد ! ذاك النسيج السوداني السمح ، كان ولم يزل واقعاً معاش ...
تحياتي
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: keiga2000)
|
Quote:
هذا السراج المنير سيظل سراجاً مضئ ما طال الدهــر
رغم متاعب شغل السفارات الا انه فعلا يكون دائما في مبتسماً وخدوماً ويخدمك كانه يعرفك من زمن
وفقك الله اخي سراج في عمل الخير دائما
وشهادة مجروحة |
ليست مجروحة عزيزنا كيجا 2000 ،، فسراج بعمله هذا أصبح أخو الجميع ،،
نسأل الله له الحفظ والسداد ... ونرجو من هذا كله ، أن يعم الخير ليشمل الجميع
فأمثال سراج يمكن أن يكونوا غدوة حسنة لكل الشباب والشابات والأجيال القادمة .
تحياتي
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: عماد الشبلي)
|
| Quote: بكل حسن نية ... هي مجرد قفشات لكلام إخوان وأصحاب وأولاد حلة ، حتى أنها كانت تقال للعربي وللغير عربي ،،، وهي تنم |
الاخ العزيز مامون احمد ابراهيم
رمضان كريم وكل سنة وانت طيب
معليش على عدم تحيتى لك فى مداخلتى الاولى
عزيزى مامون كثير من المفردات وكثير من العبارات العنصرية فى السودان موروثة ابا عن جد وكثير من الشعب السودانى يستخدمها بحسن نية وكثير منهم ايضا يستخدمها بسوء نية واصبحت ثقافة راسخة فى الاذهان ومتوارثة جيلا عن جيل كما اسلفت , لكن فى النهاية تظل مفردات وعبارات عنصرية تفرق وتميز بين مكونات الشعب السودانى شئنا ام ابينا , وبرنامج السودان الجديد الذى يتحدث عنه الحركة الشعبية لتحرير السودان يصب فى محاربة هذه المفردات والعبارات , وعبارة تحرير السودان فى اسم الحركة تعنى تحرير السودان من مثل هذه العبارات والمفردات لخلق سودان يتساوى فيه الجميع , سودان يسوده الاحترام ما بين مكونات الشعب السودانى بصرف النظر عن اختلاف ثقافاتهم واثنياتهم ولغاتهم والوانهم واشكالهم , والشئ المؤسف بان هذه المفردات والعبارات متداولة وسط المتعلمين والمستنيرين بالضرورة , وكثير منهم يقاومون بمبررات واهية تغير هذا الوضع الذى نحن فيه والذى بسببه تقطع السودان الى دولتين وقامت فى بعض اطرافه الحروب والنزوح والتشرد واللجوء وذاهب الى مزيد من التقطيع والتفكك والتشرذم !
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: نادر)
|
| Quote: تحياتي يا أستاذ مأمون وعبرك التحايا لهذا الرجل الهميم؛ ومعك نتمنى ان ينصلح الحال يوماً ما. |
نادر العزيز ، سلامات وتحياتي لك ولجميع الأهل
آمين يا نادر ،، وحتماً سينصلح الحال يوماً ما ، ونرجع زي ما كنا وأحسن
سأناقش في هذا الخيط كيفية الإرتقاء بالخدمة المدنية وخدمة الجمهور ، وتطوير خدمة العملاء ،، والإرتقاء بالتعامل والمعاملة على جميع الأصعدة في السودان ،، وأظن آنو آن الأوان لبدء ثورة عارمة وواعية للنهوض بالإنسان السوداني ، والإرتقاء بالسلوك والخدمات وطرق التعامل ، ونبذ كل السلوكيات الشائنة والشائهة ، ومادرجت عليه العادة من تجاهل وعدم إكتراث بالقيم الحضارية والمدنية .
تحياتي
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: ABDALLAH ABDALLAH)
|
Quote: هـل كـل من أسـمه سـراج الدين يتجمل بنفس هـذه الخصـال الطيبه الجميله?!!!
تذكـرت صديقى وزميل الكفاح النقابى فى بنك السـودان
الأخ سـراج الدين محمد خـير
تحياتى له من البعد وتحياتى لسرج الدين مصطـفى |
الله الله يا عبدالله عبدالله ! هي بالضبط إسم على مسمى ! وأنا مؤمن جداً بمدلولات الأسماء في أغلب الأحيان !
ويالهم من أسرجة ! ربنا يزيد ويبارك ويجعل سماء السودان كلو نجوم وكواكب وأسرجة مضيئة وأقمار منيرة
ألف تحية لك ولسراج الدين محمد خير
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: خالد حاكم)
|
| Quote: عزيزى مامون كثير من المفردات وكثير من العبارات العنصرية فى السودان موروثة ابا عن جد وكثير من الشعب السودانى يستخدمها بحسن نية وكثير منهم ايضا يستخدمها بسوء نية واصبحت ثقافة راسخة فى الاذهان ومتوارثة جيلا عن جيل كما اسلفت , لكن فى النهاية تظل مفردات وعبارات عنصرية تفرق وتميز بين مكونات الشعب السودانى شئنا ام ابينا , وبرنامج السودان الجديد الذى يتحدث عنه الحركة الشعبية لتحرير السودان يصب فى محاربة هذه المفردات والعبارات , وعبارة تحرير السودان فى اسم الحركة تعنى تحرير السودان من مثل هذه العبارات والمفردات لخلق سودان يتساوى فيه الجميع , سودان يسوده الاحترام ما بين مكونات الشعب السودانى بصرف النظر عن اختلاف ثقافاتهم واثنياتهم ولغاتهم والوانهم واشكالهم , والشئ المؤسف بان هذه المفردات والعبارات متداولة وسط المتعلمين والمستنيرين بالضرورة , وكثير منهم يقاومون بمبررات واهية تغير هذا الوضع الذى نحن فيه والذى بسببه تقطع السودان الى دولتين وقامت فى بعض اطرافه الحروب والنزوح والتشرد واللجوء وذاهب الى مزيد من التقطيع والتفكك والتشرذم ! |
الأخ الحبيب / خالد حاكم ،
أنا أحلتك في ردي السابق إلى نشيد عظيم هو ( يقظة شعب ) ، وهو نشيد يعبر بصدق وبحرارة ، عن كل النسيج السوداني المنسجم آنذاك .. وأنا عشت أخي خالد ، في مجتمع أمدرماني رائع وأعتز به كثيراً .. كان ذلك في منتصف الخمسينات والستينات والسبعينات ، ماكان فيه فرق بين هذا وذاك إلا بحسن الخلق والمواطنة الحقة ،، ورئيسي والكابتن بتاعي في ( فريق الحلة لكرة القدم ) كان جنوبي ، وأعتز به كثيراً ، ورئيس النادي الذي كنت ألعب لديه أصوله من الجنوب . وكان موظفاً مرموقاً في الدولة ... وجاري القصاد داري ، كان أستاذي وأستاذ لكل أبناء الحي الذي أقطن فيه ،، وهو من الجنوب .. وكان بمثابة الأب الروحي لكل شابات وشباب الحي ! وكنا عندما نستمع إليه وهو يتكلم فكأنما تستمع إلى نجم عالمي أو إنسان أسطوري ! وكان في قمة النبوغ والذكاء والعلم والمعرفة والخلق .. وهوبمثابة غدوة حسنة للجميع ،، وكان فوق الإحترام من كل أهل الحي نساءً ورجال ! وبعدين تعال يا أخوي نحن كلنا مافينا زول مافي أصولو زنجية واللا نوبية واللا إفريكانية ! يعني إنتو بتتكلموا زي الكأنو نحن عرب صر ! ياخي ماهو نحن كلنا بنتكلم عربي وبنكتب عربي وجزء كبير من ثقافتنا عربية ،، لكن مافينا زول حبوبتو ما جنوبية ! فهل ده عيب فينا يا خالد ؟؟! واللا حقو نحن نعتز بالأعراق الفينا ؟! وكلها أعراق مدعاة للفخر والإعتزاز ، سواء كانت زنجية واللا عربية . فأنا أعتز جداً بالزنجية في دمي ، كما أعتز جداً بشوية العروبة الفي دمي ،، فالعيب في شنو ؟!! ......... عزيزي حاكم ، أكرر ماقلته لك من قبل : عبارات شيخ عرب ، وسنجك ، ومانجلك ، وكجور ، وزعيم ، وشيخ قبيلة ، وود بلد ، عبارات سودانية تلقائبة عفوية ، ليست لها علاقة بالتفرقة العنصرية ! ..... لكن برضو أنا معاك ممكن تستخدم إستخدامات عنصرية من زول أصلاً مريض أو ردىء ، أو سىء الخلق ! لكن ده ما معناتو أنو إستخدام الناس كلهم ليها خطأ وفيهو سؤ نية ! إستخدام عبارة ( شيخ عرب ) ينم على الإفتخار بالخصال والشيم ومكارم الأخلاق التي كان يتصف بها الأجداد ... وهي ذاتا هسع للأسف إمكن تكون إنقرضت ! ولكننا ماقنعانين من إستعادتها واستعادت كلما هو جميل ورائع في البيئة السودانية ..... ومثل هذه العبارات تنم على الخاصية أو الشيم أو الأخلاق التي يتمتع بها الناس ... يعن هسي لما نحن نقول الزول ده ( خواجة عديل ) فهل يعني أنو خواجة أو إنجليزي واللا اميركي عديل ؟! والا نحن قاصدين بالعبارة ، الصفة البتصف بيها الخواجة من دقة في المواعيد وانضباط وأخلاق ؟!!
على أى حال عزيزي خالد ،، هذا البوست غير مخصص للحوار حول هذه القضية الهامة التي أشرت إليها .. والحوار عنها هنا ليس في محله ! على الرغم من أهمية الموضوع .. ولذ فأنا استسمحك وأرجوك أن نرجىء هذا الحوار حولها إلى مناسبة أخرى تكون أنسب من هذي ........ لك بالغ شكري وتقديري وخالص تحياتي .
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: عبدالأله زمراوي)
|
Quote: تحياتي وعبرك لسراج
أما خالي العزيز خالد حاكم فهو ايضا سراج منير وما طرحه لذلك السؤال الا للتثبت واليقين بان عبارة + شيخ العرب + لم يقصد بها تفضيل جنس على آخر.
نتمنى ان يكون كل الناس في همة هذا السراج... |
المستشار الصديق الصدوق والأب الروحي لسودانيتنا الأصيلة / عبدالإله
هو سراج كل الناس ، وماهو إلا مثال حي لكل ما بنا من خصال وهمم وقيم
وهو صورة مشرفة ومعبرة عن الجميع .. ( وبعض منو يجزي عنو . )
أما العزيز / خالد حاكم ، فهو سراج الأسرجة وقمر من أقمار حبنا وعشقنا للسودان الكبير الممتد
ألف تحية لك وللعزيز / خالد حاكم
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: james)
|
Quote: كفا هو بكرة يقولوا خطف الأضواء من فلان وعلان، وبعدين يا خ في ناس حاقدين في المرارة ،
وقديما قيل ( داري على سراجك من النسمة ) فهمت آ زول. |
عزيزي جيمس ، سلام وتحية ..
الحافظ الله يازول .... ولكنها إضاءة ضرورية كان لابد منها ، لإبراز أشياءنا الجميلة وللمنفعة العامة ،، وإنشاءالله مابتجيهو عوجة
وبعدين الموضوع أكتر بكتير من موضوع سراج كشخص ، ونحن أمام أزمة أو عدة أزمات طاحنة على صعيد التعامل والمعاملة ،
و الأساليب المتبعة في كل المرافق العامة والخاصة .... وما حقو موضوع الإحتفاء بالأخ العزيز سراج ، يشغلنا عن الهدف الأسمى
الذي كان من أجله هذا الخيط .
نمشي لى قدام ونتجاوز موضوع سراج ، إلى الأهم ،، فلقد أبلى بلاءً طيباً وله خالص الشكر والتقدير والتحيات ، ومحفوظ بإذن الله .
تحياتي
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: مامون أحمد إبراهيم)
|
| Quote: قديما قيل ( داري على سراجك من النسمة ) فهمت آ زول. |
الأخ العزيز / جيمس :
لو سمحت ، شوف ليك زول قدرك أو في سنك عشان تخاطبو بهذا الأسلوب ! لأنو أنا زول على مشارف الستين وليس لي من الدنيا الآن غير الإستعداد للرحيل ، وبعمل في اللمسات الأخيرة محاولاً إنهاء هذه الحياة العامرة على خير .. راجياً أن أضع بصمات متواضعة يُقتفى أثرها من بعد .... وما تغرك صورة البروفايل المختوتة دي آزول !
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: مامون أحمد إبراهيم)
|
هذا السودان لايمكن أن ينهض أو يتغير أو يرتقي إلى مصاف الدول المعقولة ، إلا إذا بدأنا جدياً وعملياً بتغيير بضع ممارسات رزيلة ، نرجسية ، أنانية ، متخلفة وغير متمدنة ، ولا حضارية .. ونحسبها هينة وهي عند الله ، والناس ، والمجتمعات الراقية ، عظيمة ! ...
هذه القيمة أو الميزة الإنسانية المتمدنة الآن ، والمتمثلة في خاصية ( خدمة العملاء ) المعمول بها في أغلب الدول على نطاق الأرض ،، تبدأ أولاً بتنظيم وتوجيه من الدولة والإدارات الحكومية والمؤسسية ، وجميع قطاعات الدولة .... وخاصة القطاعات العامة .. لأن القطاعات الخاصة أصلاً ليست في حاجة إلى توجيهها لهذا النهج ، لأنه يفترض أصلاً من صميم سياساتها لإستقطاب العملاء والجمهور لمزيد من الفائدة والكسب .. وهذا حتماً من البديهيات المعروفة لكل إدارات المرافق الخدمية الخاصة ، ذات المفهوم الرأسمالي الربحي ! ....... ولكن المقصود الآن في لب هذا الموضوع ، الإرتقاء بالخدمات بالمرافق العامة .. وإدخال مفاهيم خدمة العملاء بجدية ، وبطرق مدروسة ومؤسسة . كما معمول به الآن في جميع الدول ! ... وإلا فمن العيب كل العيب والإجحاف والظلم أن يظل الإنسان السوداني ، إلى هذا العصر الإنساني المتقدم المتسارع ، وسط عالم أوشك على إكمال كل بنياته التحتية والأساسية ، لتكوين عالم راقي متسامح ومتمدن ،، وهو لا يزال يركض برجليه وأياديه ورأسه ، ويُعاني الأمرين لتحقيق حق من حقوقه أو مصلحة من مصالحه في مرفق من المرافق العامة ، التي عُملت أصلاً من أجله !
ونواصل
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: مامون أحمد إبراهيم)
|
هذا الموضوع بالتأكيد يحتاج لكثير من الجدية والجهد والإهتمام من الصغير والكبير ، لما له من أهمية قصوى للإرتقاء بطرق التعامل والتعاملات ، ومفاهيم المواطنة المتحضرة ، والحقوق والواجبات ، وإحترام كينونة الإنسان السوداني على كل الأماكن والمواقع ، ومن دون أى تفرقة ، تحت كل كل الظروف والأحوال !
وعلى أقل تقدير يمكن أن تكون الإنطلاقة بدءاً من المناهج الدراسية والأندية الرياضية والثقافية والإجتماعية ! فهو أمر يستحق أن ينشأ عليه الأطفال في المدارس ، والأطفال في البيوت ! ويستحق أن يدخل حيز التطبيق والإهتمام بصورة جادة وعملية !
| |
|
|
|
|
|
|
|
|
|
Re: سراج السفارة السودانية .. وملف خدمة العملاء بالسودان .Customer S (Re: مامون أحمد إبراهيم)
|
في الطريق إلى ثورة شاملة ،، لتغيير الواقع المرير لكثير من الممارسات والمفاهيم والعادات الضارة ، ولكثير من المعتقدات الراسخة في الذهنية السودانية ، التي سبطت الهمم وزرعت الإحساس بالعجز واليأس ، والشعور بالضعف والنقص ، وبعدم المقدرة على التطور والتغيير ! وبإستحالة التغيير ! ... مما حدا بالناس إلى التهكم والتعالي على أى محاولة للتجديد أو التطوير أو التغيير لطريقة التعامل والسلوكيات المعتادة ! ... يعني مثلاً يقول ليك : ده عامل لينا فيها أبو عرام ! ... واللا يقول ليك ده عامل فيها خلاص الود مقددها ! ... واللا عامل فيها الود خلاص خواجة !!
لكن بعد ده ذاتو خلاص ، أصبح مافي أى وكت لى أى بلد أو أى مدينة ، أو مجتمع إنساني ، للتلكؤ والتخلف عن ركب الأمم المنطلقة بسرعة الصوت والضؤ ! ولابد من عمل حثيث ومدروس ، للإرتقاء بالأداء الرسمي والشعبي ، وبالتعاملات والمعاملات والسلوكيات ، وأساليب التعامل المناسبة للعصر !
فظاهرة الموظف العزيز/ سراج ، ومن على شاكلته من الناس ، هي في الحقيقة لم تك محض صدفة ولا اعتباطاً ،، ولكنها ظاهرة لجيل تربى في كنف تلكم ( السودانوية ) العامرة الرحبة الثرية التي كانت يوماً ما على أرض بلادي ! .... والتي يجب أن تُدرس وتُدٍّرٍّس بعناية لكل الأجيال الحاضرة والقادمة ،، وتُصقل وتضاف إلى النظم الخدمية العالمية المنظمة المحترمة ، التي انتظمت كل المرافق والمؤسسات والمدن المتطورة على هذا العالم !
أرجو المواصلة
| |
|
|
|
|
|
|
| |
مامون أحمد إبراهيم
معتز القريش
محمد فرح
هجو الأقرع
هاشم الادريسى
محمد حيدر المشرف
haroon diyab
خالد حاكم
james
keiga2000
عماد الشبلي
ABDALLAH ABDALLAH
عبد الحي علي موسى
فيس بوك
تويتر
انستقرام
يوتيوب
بنتيريست