في زول منكم شاف البت دي قبل كدا؟؟وهي منو؟؟ فيديو

Quote: يا بت الحسين البت دى ما واقفة حطبه ولا شى بتتعرجن كالعرجون القديم لكن المخرج اتفاداها ...

Quote: طيب يا مريومة و ود البشرى.. اهو دي الزولة دي بتقول: هسع .. انحنا جينا قوه.. و بدينا في التغيير.. بنشجع في النضال و حرية التعبير..!!

مسألة الاستحماض دي personal preference ما اكتر، يعني زي مثلا اقول ليك اني ما بحب اسمع اغاني فرفور، او بكجّن الغنا بتاع عمرو دياب، لكن بحب اسمع Jazz و R&B، بستمتع بي اني اشوف الHipHop though! بس الراب ده نهائي ما وقع لي في مزاجي، بحس بيه جوطه كده، صحي هي مقصودة لكن ما نوع الجوطة البحبها...... كلمات البت نهائي ما مجال التفضيل ولا حتأثر على رأيي، يعني مثلاً كونها تنادي بي حرية او انها تعبر عن استياءها للجوع في العالم ما بالضرورة يخليني استمتع بأداءها... ده ما بنقص بأي شكل من ريادتها في الشي البتعمله واكيد ليها جمهورها البستمتع بي البتقدّمه... مثلا انا ممكن اقوم اشتعل وطنية لما اسمع قصيدة حمّيد الله يرحمه "من حقي أغني لشعبي".... لو جات البت دي قالت نفس المعاني دي بلون آخر، قد اتفق معاها...

والدي بقول، الزول مما يشعر بالفن إزعاج، معناها كِبر في العمر... ، اها شكله الكبر حصل...

نجي لموضوع التوب، من الواضح بما لا يدع مجال للشك ومن دليل اشرف الحلبي (انت كنت حاضر يا اشرف) انها الزوله دي جات من غير التوب، ولفحته من اقرب مزيعة ولا معدّة برنامج... في "عِسّيمه" كده لما الواحده تلبس التوب بتوريك انه علاقتها معاه مااااااا علاقة طويلة الامد... انا متأكده انها لو خلوها على راحتها، ولا كان كانت حريقة زي نانسي عجاج ولبسته الكسكته كانت حتكون أحلى... اعتقد كون التوب ملفوح بغيّر كل النظريات بتاعت انها she was trying to make a statement...

Quote: عاطف ياخ ما تحرمونا التوب عشان ما بنعرف نلبسه كويس مش كفاية شكة الخمسمية دبوس عشان ما يقع؟

Quote: a style of popular music, developed by disc jockeys and urban blacks in the late 1970s, in which an insistent, recurring beat pattern provides the background and counterpoint for rapid, slangy, and often boastful rhyming patter glibly intoned by a vocalist or vocalists. from reference.com

Quote: سلام يا مريم و معاك حق لاستظرافك او عدمه لانواع معينة من الموسيقي انا ما كل الراب بحبه، ولا كل الجاز ولا كل اي حاجة. بغض النظر عن انها جات لابساه التوب ولا لا، انا تمنيت انها تكون لافحاه بالطريقة المبهدلة دي و بي كبكها عشان تعمل ستيتمنت انا واحدة ناس بلفح التوب و عشان اعمل ستيتمنت تقول انا سودانية وكت احتاج، كان تشوفيني في زيارة رسمية، لافحاه، و بحضر ليها الزيارة دي من اسبوعين يجي، و مافي اي زول ناولني التوب، حضرته برااي :) و اذا ناولوه ليها في الاستديو، انا كان منها بعمل منه حركة لقدام، مش عشان سوداني ولا فلكلوري، بس عشان الاستيتمنت انه فرض الاشياء لا يعني تطويعها و عملها رمز مقاومة كمان، او لاي ستيتمنت تانية تحبها

Quote: انا كنت جايه اكاويك يا رحاب الخليفة، قلت رحاب بتدافع (لشيء في نفسها)... شفتك بالتوب وعارفااااك بتدبسيه عشان كده ساكنه في البوست ده.... بالمناسبة، انا حريفة في التوب لكن ما قاعده احب ألبسه برضه عشان اعمل statement... لما اكون في السعودية بحب ألبسه شدييييييييد عشان اعمل statement... لما اكون في الامارات ما بطيق البسه برضه عشان اعمل statement... مرات بحس اني عايزه اكاوي المجتمع وبس! لكن الاعتزاز بيه موجود وبقوة.. زي حبي للمشاط والحنّة وملاح ام رقيقه... Mariam