|
|
 يوميات طالب أغبش ببحري الحكومية (1975-78)
|
في زمن قبل الزمن دا كانت بمنطقة الخرطوم بحري الكبرى
بس مدرستين ثانوي عالي حكومية، بحري الحكومية، والجيلي الحكومية
والاخيرة دي كانت داخلية.... تقبل طلاب المناطق البعيدة من شرق النيل
وحتى جنوب ولاية نهر النيل .. حجر العسل وغيرها
والطالب الذي ينجح في امتحان الثانوية العامة ويجيب مجموع يدخلو
بحري الحكومية، كان زي البجيب مجموع في الشهادة ويدخل كلية الطب جامعة الخرطوم
في اليومين ديل
ـــــــــــــ
المهم كنت احد الذين نجحوا في امتحان الثانوية العامة ودخلت بحري الحكومية
ودا كان شرف كبير لي وكل الحلة تقريبا عرفت انو اولاد فلان وفلان وفلان قبلوهم ببحري الحكومية
شخصياً فرحت بدخولي لمدرسة بحري الحكومية عشان حاجات كتيرة
اولاً اهو خطوة في الطريق لجامعة الخرطوم
وثانياً كل يوم حامشي للخرطوم (بحري)
وبعد داك حاجات تانية حامياني
|
|
 
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: على ميرغني)
|
طفرة كبيرة أن تنتقل من مدرسة الكباشي الثانوية العامة الى مدرسة بحري الحكومية
من مجتمع بدوي وريفي الى مجتمع مدني
المهم...
انتهت الاجازة الفاصلة بين آخر ايام الثانوية العامة بالكباشي وأول ايام الثانوية العليا
ببحري الحكومية
ــــــــــ
كنا تقريبا ثلاثة طلاب من مدرسة الكباشي
في بحري الحكومية وجدنا ست (6) فصول للسنة الأولى
تبداء بفصل ابوبكر وتنتهي بفصل خالد او ابو عبيدة
قيل لنا ان ترتيب التنسيب لهذه الفصول بحسب الدرجة
لحصل عليها الطالب... وجدت نفسي بفصل أولى (علي)
صدمت للمعلومة اعلاه... كان مجموعي نوعا ما جيداً
بعدها علمنا ان أدارة المدرسة الغت هذا النظام من السنة القبلينا
ـــــــــ
لسؤ حظي كنت الوحيد من خارج مدينة بحري بالفصل
ومن هنا بدأ مسلس المفارقات
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: على ميرغني)
|
اللبس كان رداء رمادي وقميص رمادي بس درجة أقل
كان الجدول اليومي
تقوم من الصباح بدري تتجهز وتلبس سريع سريع
عشان اللوري بتاع عمنا عبد الله البشير (له الرحمة) ما يفوتك
طبعا كان في برضو بصات نظام اللوري البقلبوهو باص بكنب
ناشفة عود
بس كان المصروف اليومي (واحد شلن)......
بالعربي كدا خمسة قروش
لا تكفي حق المواصلات وصحن الفول من داكان سليمان ابو دقن
ـــــــــــ
كنا، الطلاب الجايين من مدرسة الكباشي العامة، زي الشامة وسط بقية طلاب بحري الحكومية
تخيل ان تركب لوري به كمية من تراب الاسمنت لمسافة ساعة
تصل الخرطوم بحري وانت عبارة عن (فولة مدمسة)
والمشكلة الاكبر لمن تخش الفصل
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: على ميرغني)
|
فعلاً مشكلة لما تخش الفصل،
وأنت مكسو بالغبار!
مسألة محرجة جداً،
لكن بصراحة ما كنا نلحظ ذلك،
أقصد نحنا أولاد بحري المدينة،
وتلقائيا كانت تزول الحواجز بين الطلاب!
ياااه والله أثرت في النفس شجوناً!
وسافر خيالي إلى تلك الأيام الغراء،
إذ جمع الله بينك وبين كوكبة من الفتيان الرائعين!
لكن كان النشاط السياسي هو الذي يستقطب ذلك التجمع الحيوي،
ودوري الفصول في كرة القدم،
وإبداعات ماريو وطه في كرة السلة!
طمعتُ في تواصل أكثر حيوية!
المهم متابعين، واصل ذكرياتك!
وشهر مبارك!
صلاح عباس فقير
(77- 1980)
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: على ميرغني)
|
اخترت ان أجلس في اول صف على اليسار
قعدت الحصة الاولى كلها صامت بدون حديث مع بقية الطلاب
طبعا كلهم كانوا بعرفوا بعض تقريبا
كلهم من مدرسة الاميرية واحد واثنين ومن المزاد
يعني لاميهم الحي والمدرسة
بعضهم كان بجي المدرسة كداري
وبعضهم بالعجلات.. اصلو كلهم قريبين للمدرسة
حلة حمد وخوجلي والصبابي والمزاد والشعبية
والبعيد خلاص من شمبات الحلة
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: على ميرغني)
|
اذكر من المعلمين.. ونحن في سنة اولى
استاذ أحمد أدريس معلم الأحياء
واستاذ الصايم معلم الكيمياء
واستاذ محمد حسين زكي
معلم التربية الاسلامية
ومعلم التأريخ طيفور او عبد اللطيف
اختلطت على الاسماء بس متأكد انو اسمو فيهو
حرفي الطاء والفاء
بعض المعلمين لم يكونوا يدرسونا في الفصل
لكن سيرتهم كانت تعم كل المدرسة
على رأسهم استاذ عبد الله حامد
معلم اللغة العربية
ولا تسألني عن المدير
دا كان زي الشخصية الاسطورية
نمر بمكتبو في الصباح والظهر وهو مغلق
نحنا ناس سنة اولى كان بعيد عنا رؤية هذا المدير
| |
|
|
|
|
|
|
|
|
 Re: يوميات طالب أغبش ببحري الحكومية (1975-78) (Re: على ميرغني)
|
** الأُستاذ على ميرغنى..
** سلام ورمضان كريم..
## ياخى رجعتنا 38 سنه للعهد الجميل زمن بحرى الحكوميه الكانت جامعه لكل أحياء بحرى وريفى بحرى وشرق النيل ..
## واصل هذا السرد الجميل لعل ذلك يُنعش ذاكرتنا التى أصايها الزهايمر ..
## يُصادف نهاية هذا العام اليوبيل الذهبى لمدرسة بحرى الحكوميه وكان هنالك بوست من د. الزين حسن محجوب "المزاد شمال"..
(ودام الود بين كل من درس فى هذه المدرسه الجامعه)
(ابو محمد فؤاد) - دُفعة1975 - 1978 - ا\أبو عبيده - 2\الخليل - 3\ الخوارزمى..
| |
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: عبدالكريم أحمد الامين)
|
شكرا ليك اخي عبد الكريم
واهو بوست مفتوح لكل اولاد بحري الحكومية في عصرها الذهبي
ــــــــــــــــــــــ
من الحاجات الشدتني من أول يوم في بحري الحكومية
فصحة الفطور.... ربع ساعة كدا ويجوك ناس سنة تانية وتالتة
يلعبوا كورة الباسكت او الكورة الطائرة
ناس كابوس وعصام (من اولاد الاملاك او الختمية) تقريباً
وفي نفس الوقت يجو ناس الفرقة الموسيقية
بقيادة عزيز حسن (اسع عميد بحري متقاعد) وصاحب صحيفة
سيتزن باللغة الانجليزية
المهم انتهت الفترة الأولى وانا لا زلت اعاني من برلمة مزدوجة
والنتيجة سقوط في مادتي التأريخ واللغة الفرنسية.. التانية دى بسبب عدم وجود استاذ فرنساوي
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: على ميرغني)
|
انتهت سنة اولى بحلوها ومرها
ثم اتينا لسنة تانية
وفي ذلك الزمن تم تأجيل التخصص علمي وأدبي الى السنة الثالثة
لذلك كنت بفصل تانية جماع
ـــــــــــ
اول ملاحظاتي عن الدراسة كانت شكل العلاقة بين الطلاب والمعلمين
شبه علاقة الواحد بأخوهو الكبير
ويمكن احسن لانو مافيها حرج ومفتوحة على الآخر
الحاجة التانية كانت النشاط السياسي الظاهر
وكان اجنحته الحزب الشيوعي
وحركة الأخوان المسلمين
واولاد مايو ناس الاتحاد الاشتراكي
أذكر من طلاب الحزب الشيوعي
متوكل باشا.. كان قصير القامة لكنو كادر قوي شديد
ومن ناس الاتحاد الاشتراكي طالب من حلفاية الملوك
نسيت اسمو لكن تقريبا كان يلقب بـ(نيفيا)
وأتذكر اني قررت الانضمام الى الحزب الشيوعي
على الرغم من اني من اسرة (اخوان مسلمين)
باي ديفولط
واتذكر ان من عمل على تجنيدي للحزب الشيوعي السوداني
كان اسمو عوض القاضي
من اولاد الوابورات
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: على ميرغني)
|
كنت اكره حكومة النميري .. لأنها أعدمت أخي الكبير
د. عبد الله ميرغني بعد ان شارك في احداث يوليو 1976
وغضبت لأن الأخوان المسلمين ما عملوا حاجة لاخذ ثأر اخي
(مش هم الخلوهو يشارك في هذه الاحداث)
المهم زميلنا عوض القاضي
بدأ يدينا اول الدروس في العمل الحزبي
اتذكر من ذلك ضرورة ان نعمل ضمان او تأمين قبل اي جلسة عمل تثقيفية
ما استمريت كتير في العمل مع الحزب الشيوعي
اولا لعدم قناعتي بطرحهم
وثانيا لان جلسات التفاكر كانت تتم اثناء فسحة الفطور
يعني لمن ناس عزيز حسن بيعزفوا الاغاني الغربية
وناس كابوس بيلعبوا الباسكت
كابوس دا كان فنان في لعب الباسكت
زول طويل ونحيل وكفة يدو زي الطالوش
الشئ التاني الخلاني اترك جلسات الحزب الشيوعي
انهم طلبو منا (شلن) كامل شهريا لتمويل طباعة صحيفة الميدان
كلوا الا الشلن دا
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: على ميرغني)
|
اجمل مافي النشاط السياسي الاتفاقات غير المكتوبة بين القوى الطلابية السياسية
اذكر كان بالمدرسة طلاب اثنين من ابطال الكراتية
واحد اسمو طه ...
والآخر اسمو اسامة
الاتنين تقريبا من اولاد حلة حمد
طه هذا كان من طلاب الاتجاه الاسلامي
بينما اسامة من انصار المايويين
كان طه يقوم بحراسة الجريدة الحائطية بتاعت
طلاب الاتجاه الاسلامي... وتحدث صدامات بين طلاب
الفريقين.. لكن اطلاقا بالغلط كدا ما حدث تصادم بين طه واسامة
طبعا قيادات طلاب الاتجاه الاسلامي كانو ضعيفيين
وما عندهم في حكاية الصدام مع زي ناس اسامة دا
تقريبا كان جسمو زي جون سينا
ـــــــــــــــــــــ
في الفترة ديك كانت الدورة المدرسية مهرجان حافل
وبخاصة منافسات كرة القدم
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: على ميرغني)
|
كان ابرز لاعبي بحري الحكومية
عصام سليم قبل ان ينتقل الى مدرسة الشعب
وسامي ابراهيم (لعب لفريق التحرير لاحقاً)
بس عقدة بحري الحكومية كانت مدرسة الشعب
ديل كان عندهم لعيبة محتفرين عديل كدا
ونص المدرسة بيلعب في الهلال والمريخ والباقي
في التحرير
زي ناس تنقو، وعمو وآخرون
ــــــــــــــ
كل يوم الصباح كان زملائنا اولاد بحري يحكوا عن اشياء
نحن اولاد الريف كنا شايفنها زي الخيال
يعني مثلاً يوم جينا لقينا ليك المدرسة كلها بتحكي عن
ترافولتا و ستر داي نايت فيفا
لحدي الحصة السابعة حتى عرفنا الموضوع شنو
ودا كلو كوم ولمن وردي (الله يرحمو) غنى جميلة ومستحيلة
يأخي لقينا انو المدرسة كلها كانت امس في جامعة الخرطوم
وحضروا الحفلة من اولها
طبعا كان قدامنا نوائم بين الصدمات الحضارية دي
وبين تلقي الدروس
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: Nasir Ahmed Elmustafa)
|
| Quote: لا تكفي حق المواصلات وصحن الفول من داكان سليمان ابو دقن |
هو بالله عمنا سليمان ابودقن دكانو من زمنك 75
انا غايتو جيت بحري الحكومية سنة 95 يعني بعدك بي 20 سنة وبرضو كنا بنفطر عن عمك سليمان
قبل فترة جيت ماري بي دكان عمك سليمان وراودني الحنين وفطرتا فطره كااااربة من ذلك الفول العجيب
......
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: حذيفه ابراهيم الكباشي)
|
اخ علي
ذكريات جميله اتمني ان تواصل
كان هناك بوست مفتوح عن بحري الثانويه ابتدره اخينا باشمهندس هشام المجمر لكن اضعف الرواد توقف
شانه شان بوست افتحته عن الاميريه واحد وايضا توقف
المهم فرقة موسيق بحري الثانويه نحن لنا شرف تكوينها
بالات موسيقيه اهدانا اياها المرحوم محمد التوم التيجاني وكيل وزارة التربية والتعليم حينها
وكانت تتكون من ايقاع درمز وساكسفونين وكلارنيت وطرمبه وجيتار وباص جيتار
طارق ميرغني
1970- 1973 او 1969 - 1973 لو حسبت السلم التعليمي الجديد حينها
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: طارق ميرغني)
|
الاخ طارق ميرغني
لك شكري.. لم اكن اعلم بوجود بوست آخر عن بحري الحكومية
والاخ هشام المجمر كان من الطلاب الظاهرين في بحري الحكومية
طبعا نفس دفعتنا
واتذكر نقاش دار بينه وبين طالب آخر حول المفاضلة بين الطب والهندسة
وكانت وجهة نظرو انو الطب مجرد حفظ ومافيهو طريقة للابداع على عكس الهندسة
ـــــــــ
انقابو يا شليق
نعم انا (علي الخلاء) على وزن هيثم الخلاء
بس برضو خلاء الخرطوم مش خلاء ام صفقا عراض
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: مازن فيصل هلال)
|
الذكريات دائما جميلة وخاصة عن مدينة كالخرطوم بحري ، تذكرني الخرطوم بحري بمدينة الشارقة مقارنة بمدن الإمارات الأخرى فهي مدينة تألفها منذ لحظة دخولها مدينة تتنفس الحب وتوزع المودة عربونا متاحا لكل قادم إليها ....
ومدرسة الخرطوم بحري الحكومية مدرسة من طراز خاص ...
ميادين للباسكت والكرة الطائرة ، ميدان كبير لكرة القدم ، أنشطة الكديت ، الرسم والتلوين ، الموسيقى .... وفسحة الفطور هي باختصار إندماج للأساتذة مع الطلاب في الأنشطة المختلفة ...
جحا التربية الإسلامية يلتف حوله الطلاب باختصار لأنه يفقههم في أمور دينهم التي لا يجدونها في مكان آخر ...
عقيد مدرس الجغرافية يرى جزر المالديف كأنها حذاء عتيق بال فيه سكران فأغرقها .
عزام مدرس الجغرافية يكفيك لأن تقرأ " السبوتنغ " الذي يضعه لتحصل على 70 % من نسبة الشهادة الثانوية .
رستم مدرس الفنون ، يلون الحصة بونسته الراقية وكلامه الظريف ...
السجاد مدرس الأحياء ... تتمنى أن تكون مدرسا عندما تراه يجهز لحصة الأحياء قبل نصف ساعة من بدايتها ... سبورة جميلة وأدوات مكتملة ومعلومات ثرة ...
السر الإمام مدرس الرياضيات ، عندما قال له أحد الطلاب " مافاهم " رد بسخريته اللاذعة "لو الرياضيات فهموها ناس كثيرين بتمسخ ذاتوا "
عبد الحميد الشايقي مدرس اللغة العربية ، عفت الديار محلها فمقامها بمنى تأبد غولها فرجامها ، ينقل المجتمع الجاهلي بكل تفاصيله لساحة الفصل ، كان الطلاب يتنافسون على حضور حصته وكان رجلا يهضم الأدب كما يهضم الطلاب فتة أبو ظريفة أو فول أبو الهول ...
عبد اللطيف البوني مدرس اللغة الإنجليزية لفترة قصيرة ، مثال للأستاذ المتفلهم المعجب بنفسه يتكلم الإنجليزية بلكنة مختلفة .
عبد الله حامد إمبراطور جعل من مدرسة بحري الحكومية مثالا للإنضباط ...
عبد القادر شيخ إدريس أبو هالة ، مدير المدرسة ، إنسان لطيف كالنسمة ، أديب من طراز خاص ، كان يشغل بعض الحصص الفارغة فيملأها أدبا
وغيرهم كثر ....
على العموم رمضان كريم وكل سنة وإنت طيب
أنور الطيب بحري الحكومية 80- 83
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: Nasir Ahmed Elmustafa)
|
الاخ ناصر كل عام وانت بخير
عارف.. استاذ رستم كان ابو فصلنا في سنة تالتة
نسيت اسم الفصل بس كان غرب شعبة الرياضيات مباشرة
وكان علمي
اعتقد انو فصل تالتة ابن رشد
المهم استاذ رستم عمل لينا رحلة الى منطقة ام دوم
الغريب فيها انها كانت يوم الخميس
طبعا بعد ما اقنع ادارة المدرسة بان الرحلة يوم الجمعة حتحرم الطلاب
من عطلة الاسبوع ومعناهو يجو يوم السبت وهم نائمين
استاذ رستم كان زول خفيف الدم وقول كدا زي ود القاضي
وود الصائم وآخرون
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: على ميرغني)
|
ايام الدراسة في بحري الحكومية كانت متعة حتى الثمالة
مدرسة بامكاينات جامعة في زمنا دا
معمل فيزياء مكتمل ومعمل احياء وآخر كيمياء
ومسرح وغرفة للموسيقى ومعمل للفنون
وبها باحث اجتماعي وكديت (تدريب عسكري)
المهم فترة بحري الحكومية ظلت محفورة في الذاكرة
ـــــــــــــــــ
واذكر ونحنا في سنة تالتة كان الجهاد كتاب لحالو ضمن المقرر
وكانت حصة الجهاد بعد فسحة الفطور.. وكانت في مظاهرة طلابية قاموا بيها طلاب الشعب
وجو لينا في بحري الحكومية
المهم كنا مجموعة من الطلاب شاركنا فيها ورجعنا للفصل متأخرين شوية
استاذ محمد حسين زكي سالنا
(لماذا تأخرتم عن حصة الجهاد)
قام احد الطلاب، واسمو ابراهيم (الجقر من اولاد الختمية)
قال ليهو (يا استاذ كنا في جهاد عملي...
| |
|
|
|
|
|
|
|
|
|
Re: يوميات طالب أغبش ببحري الحكومية (1975-78) (Re: الحاج حمد الحاج)
|
شكرا اخي الحاج
صحيح بحري الحكومية كانت مدينة بحالها
طلابها قرابة الألف طالب
واساتذتها من خيرة اساتذة ذلك الزمن الزين
استاذ مختار معلم الخرائط، او الخلائط كما كان ينطقها بسبب (لزغة)
في اللسان
طلابها كانوا صفوة بالجد بالجد (ما مريخاب)
واستاذ عبد المنعم (القذافي) له الرحمة
| |
|
|
|
|
|
|
| |
محمد المسلمي
عبدالكريم أحمد الامين
حافظ انقابو
عماد حسين
Nasir Ahmed Elmustafa
حذيفه ابراهيم الكباشي
انور الطيب
الحاج حمد الحاج
فيس بوك
تويتر
انستقرام
يوتيوب
بنتيريست