حوار الدكتور عبدالماجد بوب والقاضي الدكتور حسن علوب (1)

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 23-09-2018, 04:21 AM الصفحة الرئيسية

مدخل أرشيف الربع الثالث للعام 2012م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
09-06-2012, 10:50 AM

A/Magid Bob
<aA/Magid Bob
تاريخ التسجيل: 23-04-2005
مجموع المشاركات: 224

للتواصل معنا

FaceBook
تويتر Twitter
YouTube


حوار الدكتور عبدالماجد بوب والقاضي الدكتور حسن علوب (1)


    حوار الدكتور عبدالماجد بوب والقاضي الدكتور حسن علوب (1)

    أمارة أم القوين
    بتاريخ الأحد 20 مايو 2012
    --------------------------------------

    تقـــــديم:
    هذا هو الجزء الأول من حواري مع القاضي الجليل الدكتور حسن علوب، متعه الله بالعافية. هذا الحوار بكامله استغرق مايزيد على ثمان ساعات. تحملها مضيفي على كبر سنه وآلام المفاصل القاسية بخاطر طيب. وللحقيقة كان حفياً وكريماً وأهم من ذلك لقد حباه الله بذاكرة صافية ومتقدة. وفى بعض المواضع كان يردد من الذاكرة فقرة من تقريره الاصل.

    قمت بتفريغ المادة المسجلة وحجبت منها الأشياء التى لا تمت للحوار بصلة أو تتطرق لإفراد ووقائع لم أرى أهمية لتضمينها تفادياً للحرج – وبكل تواضع هذا جزء من مسئوليتى وضرورة صون الثقة مع مضيفي وقد طلب منى أكثر من مرة وقف التسجيل فى مواضع بعينها غير ذات صلة بالموضوع الذى يهمنى والقارىء العزيز.

    وعلى كل، لا أدعى حق ‘الملكية الفكرية‘ في توسلى للامساك باللحظة التاريخية بدون ابطاء. ولم يكن من ضمن مشاغلى قطع الطريق على أحد – فالحكمة ضالة المؤمن، أنى وجدها فهو أحق الناس بها - وليت مزيداً من الباحثين تتضافر جهودهم لتكملة مالم يسعفنى الوقت والجهد لسبر أغواره. والقاضى الجليل الدكتور حسن علوب حثنى أن أنقل عنه استعداده لمقابلة كل من يرغب فى لقائه والتحدث اليه.

    ودون أن أضفي على ما أنجزت أكثر مما يستحق من الأهمية أستميح القارىء العذر لأذكر بتواضع ان اهتمامى باحداث يوليو 1971 يرجع الى عشرات السنين وبعض أصدقائى ربما وقفوا على عملي فى هذا المضمار. وقد نشرت فى عام 2001 مقالتين فى صحيفة (الأيام) حول مذبحة بيت الضيافة. وتداخلت مع كل من يرغب فى مداخلتي فى الموضوع المعني. وقد قيض الله لى أن اصدر هذه الأيام كتاباً وثائقياً عن تلك الأحداث لكل من يتوسم فيه الفائدة. والمهم رأيت أن أبدأ فى الحلقات التالية – حسبما يتسنى ذلك – نشر الحوار كتابة ومرفقاً بالتسجيل الصوتى.

    وقد رأيت أن الجزء الاول ربما لا يكون موضع نزاع يتطلب اصطحاب المادة الصوتية. وفى الاجزاء التالية سوف اقوم بعرض للمادة المسجلة كتابة وصوتياً. وهذه بحد ذاتها عملية شاقة، دونها خرط القتاد. وبالطبع أكون ممتناً ومرتاح البال اذا كان جهدى مفيدأ للبعض. ولن يشق عليّ فى شىء اذا جَرت على مهمة البحث فى أحداث يوليو 1971 بعض اللوم باعتبار ذلك فى طبيعة الأشياء والنقد الذى لا يفضى الى الموت من ضرورات المعرفة الانسانية وصون الحقيقة. أقول هذا وأنا أقر سلفاً بأنه كان بالإمكان أحسن مما كان.؟
    مع كل تقديرى.

    **** **** **** ****
    بداية الحوار
    (دار حديثنا بالعامية السودانية)

    • بوب: السيد القاضى الدكتور حسن علوب شكراً لك على تفضلك باستضافتى فى منزلك الرحب، لاجراء هذا الحوار حول الأحداث والنتائج التى خلصت اليها فى تقريرك بشأنها. ونبدأ بسؤالك كيف ولماذا تم ترشيحك لرئاسة لجنة التحقيق فى انقلاب 19 يوليو؟

    • علوب: وأنا أشكرك وسعيد بمقابلتك. وان شاء تكون ماتعبت.
    وكل زول مهتم وعاوز يتعرف على عمل لجنة التحقيق فى انقلاب 19 يوليو أنا مستعد لمقابلته. والحقيقة مسألة تعييني فى حد ذاتها احاطت بيها ظروف وملابسات وأشياء من توافق الصدف. فقبل تعيينى لرئاسة اللجنة، كنت منتدب كمحاضر أول فى كلية القانون بجامعة الخرطوم. ودكتور سعيد المهدى (سعيد محمد المهدى) كان محاضراً ورئيس للشعبة. والاساتذة الوقت داك أغلبهم كانوا من الأجانب. ورئيسي فى القسم مثلاً كان من سيرلانكا. وكانت دايماً بينى وبينه مشاكل بسبب اصراري على تدريس الجوانب القانونية للقضية الفلسطينية، ودا كان قرار من جامعة الدول العربية فى الوقت داك. ومشيت أقلب فى المكتبات العامة لتوفير المراجع الأساسية لتدريس المادة. ولحسن الحظ وجدت أشياء مفيدة جداً فى مكتبة "أبوالريش". ومن أهم المراجع اللى وجدتها كتاب عنوانه "بنى صهيون". ورئيس الشعبة كان لما يقابلنى طالع والا نازل السلم يدينى ‘كتافي‘ كده. المهم لما كترت المشاكل قرروا ينهوا انتدابي فى الجامعة. وبعد داك رجعت للقضائية.

    قابلت رئيس القضاء (مولانا) عثمان الطيب. وكان تعليقه على انهاء انتدابي انه قال ‘الزول ده (علوب) اذا كان جاب دكتورة ما حيريحنا‘. وتانى يوم رسل لى خطاب مع السواق. لما قريته لقيت فيه قرار بنقلي للعمل فى مديرية دارفور. فحلفت بالطلاق ما أنفذ النقلية. وطالبت بتكوين لجنة للتحقيق فى انهاء انتدابي. وعثمان الطيب قال لي ده ما من صلاحياته، والشخص الوحيد اللي عنده الحق فى تكوين اللجنة هو الرئيس نميري باعتباره راعى الجامعة.

    بعدين مشيت قابلت محيى الدين صابر وكان وزير التربية والتعليم. وشرحت له الموضوع وكان كلامه انو ناس الجامعة ديل ما عوزننا نتدخل فى شغلهم وبيقولوا اتدخلنا فى استقلال الجامعة وكده وكده. وقال لي أكتب للرئيس (نميري). وفعلاً كتبت لرئيس مجلس الثورة وراعي الجامعة جعفر نميري. فقابلني وكان وقتها يتمتع بقدر من التواضع واحترام اللوائح وكان معاه على ما أعتقد ابو القاسم هاشم، لا. والله اعتقد ابوالقاسم محمد ابراهيم. وشرحت ليه المشكلة. وسمع كل شىء، وقال لي انو حيتشاور فى الموضوع مع بقية أعضاء مجلس الثورة. وبعد أيام جاءنيى خطاب بتعييني مستشار قانوني لمجلس الثورة ومجلس الوزراء. وده كانت بداية العلاقة مع نميرى اللي أظنها كانت سبب تعييني كرئيس للجنة التحقيق فى انقلاب 19 يوليو 1971.

    • بوب: هل تعتقد بأن رئيس القضاء الأسبق بابكر عوض الله كان عنده يد فى موضوع اختيارك لرئاسة لجنة التحقيق.؟

    • علوب: لا ما أعتقد. وكل شيئ كان فى يد نميري يعين ده ويشيل ده وكده.

    • بوب: طيب يا دكتور تفتكر لو عادت الأيام أدراجها فى ظروف مماثلة، تانى حتقبل رئاسة لجنة التحقيق اياها؟

    • علوب: والله طبعاً الطاقة قلت.

    • بوب: لا. أنا بقصد اذا عادت الأيام الى ماكانت عليه ونفس الاجواء وكده...

    • علوب: بالتأكيد. مابتردد لأنو ده واجب وطني ما بتقاعس عنه. ومش كان أحسن ليكم أجى أنا من يجيكم زول تانى. وهسع ماحيكون عندك موضوع تكتب فيهو (ضحك). وبالمناسبة فى عمل اللجنة أنا استعنت بتجربة لجنة التحقيق بتاعة وورن اللى حققت فى مقتل جون كيندى chief justice Earl Warren لأنها كانت تجربة كبيرة قصدنا نستفيد منها فى عمل لجنة التحقيق فى إنقلاب 19 يوليو 1971.

    • بوب: وكيف تم اختيار أعضاء لجنة التحقيق الباقين: عميد عبدالرحمن محمود الفكى، ممثل القوات المسلحة، والكمندان حسين عثمان ابو عفان ممثل الشرطة، والعقيد على محمود سوار على نميري عن جهاز الأمن، ومكاوي أحمد ممثل وزارة العدل؟

    • علوب: الحقيقة زى ما قلت لك اللجنة عينها نميري. ولكن انا قمت باختيار الكمندان حسين عثمان ابوعفان، لأنو اشتغل معاي قبل كده فى ود مدني. وهو انسان ممتاز وكفء ويقدر المسئولية. ولم تكن لي يد فى اختيار الباقين، ولكن برضو علشان نطمن نميري تم تعيين العقيد سوار على نميري وهو من اقرباه. وللحقيقة أشهد بجهد العميد عبدالرحمن محمود الفكي. وكنا كثيراً ما نختلف ولكنه مع كده كان بيجيب لي كل الوثائق التى أطلبها منو. وواضح كان عنده صلة وتأثير على ناس مجلس الثورة ونميري. وبيشيل الأخبار عن شغل اللجنة لنميرى وبينقل لنا رأيه.

    • بوب: طيب يا مولانا، لماذا لم يتم اختيار مدنيين أو ناس بره الاجهزة الرسمية فى لجنة التحقيق؟

    • علوب: زى ما قلت ليك، نميري هو اللي حدد تشكيلها وأنا بالذات ما استشارنى فى مسألة التشكيل. وطبعاً ده كان من اختصاصة زى ما ورد فى قانون لجان التحقيق لسنة 1954.

    • بوب:وانت ما طالبت بضم أشخاص تانين للجنة؟

    • علوب: لا. هو اللى أصدر أمر التكوين وصلاحيات اللجنة حسب قانون لجان التحقيق لسنة 1954 اللى بيديه حق تكوين لجان التحقيق.

    • بوب: وكيف كان بيدار عمل اللجنة. يعنى كيف بتتخذوا القرارات؟

    • علوب: والله كويس سألت عن ده. فبصفتى رئيس لجنة التحقيق كان لي صوت واحد مثل بقية الأعضاء الا فى حالة تعادل الأصوات، ففي الحالة دي يكون للرئيس صوت اضافي للترجيح. "إذا تساوت فى أية حالة أصوات أعضاء اللجنة فيما يتعلق بأي مسألة تنشأ أثناء الإجراءات التى تقوم بها اللجنة، "يكون لرئيس اللجنة صوتأً ثانيأً" أو صوت ترجيحى. (الفصل الرابع والخمسون. قانون لجان التحقيق لسنة 1954).

    • بوب: طيب ومنو الكان بيتولى استجواب الشهود..؟

    • علوب: هو ما كان فى استجواب أو كده. الشاهد بيجي ونخليه يقول كل ما عنده ويمشي. يعني ما كان فى استجواب. كل زول بيجي ويقول أنا شفت كده أو عملت كده.. وكده.

    • بوب: وانتو من جانبكم ما حاولتو تستفسروا عن أشياء معينة؟

    • علوب: لا.

    • بوب: ومنو من أعضاء لجنة التحقيق كان الأكثر مشاركة فى مداولاتكم وكده؟

    • علوب: بالتأكيد أبو عفان.

    • بوب: والله؟

    • علوب: ومحمود (العميد محمود عبدالرحمن الفكى) كان نشيط زى ما قلت ليك فى جمع الوثائق واحضار الشهود وكده.

    • بوب: ومنو من الشهود كانت مساهمته قيمة وملفتة للانتباه؟

    • علوب: بالتأكيد معاوية ابراهيم.

    • بوب: لكن معاوية ما كان عندو دور مباشر فيما يتعلق بانقلاب 19 يوليو؟

    • علوب: نعم. لكن شهادته كانت مهمة وقال كل اللى فى صدره بخصوص تكوين الحزب الشيوعى ونشأته. وقبل كم سنة شفت مذكراته اللى وصى بنشرها بعد وفاته وكانت مطابقة لكلامه قدام لجنة التحقيق. وأعتقد كان أمين مع نفسه.

    • بوب: ومنو من الشيوعيين غير معاوية شهد قدام لجنتكم؟

    • علوب: لا. كان معاوية وبس.

    • بوب: وماذا عن أحمد سليمان.؟

    • علوب: أحمد سليمان؟ لا. ما جاء شهد. لكنه كان مهتم شديد ومتابع لعمل اللجنة. وكان طوالى بيسأل عن الحاصل. واظنه الوقت داك كان وزير العدل.

    • بوب: تفتكر يامولانا هل اتسم أعضاء اللجنة بروح العدالة؟

    • علوب: والله اعتقد بأنهم كانوا منصفين. وبرضو طبعاً بتأثروا بالجو العام. لكن نميري كان متضايق من طريقة عمل لجنة التحقيق. وهاجمنا اكثر من مرة فى اجتماعات عامة وفى لقاءاته. وبيقول الناس اللى سلمناهم المسئولية تقاعسوا فى الاداء وكده. ومرات لما كان بنتقابل فى المكاتب أو كده يعاين لى كده بدون مايقول حاجة. بالرغم من أنو مجلس الوزراء أصدر اشادة بما انجزته اللجنة؟ وبعدين قاموا طلعونا من المكان اللى كنا بنجتمع فيهو فى مبنى البرلمان القديم. مشيت لى زاهر سرور السادات (محارب مشهود له فى حرب فلسطين عندما قاد كتائب المتطوعين السودانيين الى جبهة القتال فى عام 1947 ¬¬- بوب) وماكان عنده لينا محل. وبعد داك مشيت لصلاح عبد العال. وطلبت منه يدينا محل نجتمع فيه. وصلاح قال لى بديكم مكتب ليومين. فرديت عليهو وقلت ليهو ولا شهرين! بعدين قال لى فى مكتب تحت لكن مافيهو تهوية، لكن فى مكيف متحرك يمكن نشوفه ليكم. فقلت له: ما عندك مانع...

    • بوب: تفتكر يادكتور ليه نميرى كان متضايق من شغل لجنتكم؟

    • علوب: لانو أنا أصريت على سماع كل الشهود وأداء المهمة بالطريقة الصاح. فكان محمود (العميد محمود الفكى) كل مرة يجينى ويقول لى" انت زى الارنب. بس تبحت .. تبحت لامن كل شئ يتهدا فوق راسك. والله انت حتودينا معاك فى ستين دهية!" ومرات كان يجي يقول لى "والله حقو نحل اللجنة دي.." وأنا قلت ليهو أنا ما بحل اللجنة ودى مسئولية أمام الشعب السودانى." وبعد ما انتهنا من عمل اللجة صدر قرار باعادتى الى القضائية. لكن كان مرات بيجينى أحمد سليمان يقول لي والله الريس مبسوط منكم شديد. انتو أصلوا كتبتوا شنو فى تقريركم؟

    • بوب: وتفتكر الشىء اللي عجب نميرى شنو فى تقريركم.؟

    • علوب: والله اعتقد الجزء الخاص بالتوصيات اللي قدمناها لسد الثغرات أمام تغول العسكريين المتطلعين للسلطة. ومحمود (عبدالرحمن الفكي) قال لي الجزء ده من التقرير كان بيناقشوه كل سنة مع الضباط فى قيادة الجيش؟

    • بوب: طيب تفتكر الماعجبو فى تقريركم شنو؟

    • علوب: والله هو ما كان دايرنا نطول الموضوع ونبحث فى أشياء هو ما دايره. وانا قلت اذا كان ما ح أأدى المسئولية بالطريقة الصاح، أنا حاستقيل. ومحمود (عبدالرحمن الفكى) كان بيقول ليهم (نميرى ومجلس الثورة) علوب ده ماتنسوا أنه قانونى ولازم يمحص الاشياء..يعنى كان بيهديهم شوية.

    • بوب: طيب بنرجع للمسألة دى. دلوقت يامولانا أنا جبت معاي وثيقتين. واحدة عبارة عن جزء من التقرير بتاع لجنة التحقيق، منقول بخط اليد وهو حوالي 150 صفحة. والوثيقة التانية اسمها ‘ملخص تنفيذى‘ – وأنا ما عارف ده معناهو شنو. المهم فيما يبدو أنو دي الوثيقة اللي قالوا اللواء عثمان السيد كان ماسكها في يده, وقال عليها بأنها تقرير لجنة القاضي حسن علوب.. وكان بيقرأ منها في برنامج الطاهر حسن التوم (مراجعات).

    • بوب: طبعاً جزء من تقريرك كما نعتقد رسلوا ليك أخونا عدلان (عبد العزيز) بالبريد السريع وهو بالمناسبة ماكان عارفني أنوي الحضور لمقابلتك. وقد أرسل تلك النسخة على عنوان ابنك علاء.

    • علوب: لم تصلني أى واحدة من الوثيقتين.. وعلاء قال جايي بعد شوية..

    • بوب: المهم حصل خير. أنا جبت معاي صورة التقرير المنسوخ بخط اليد والتقرير التاني اللي اسمو ملخص تنفيذى. فا رجو الاطلاع على الوثيقتين وأديني رايك في كل واحدة..

    • علوب: شوف لما اتكلم معاي الطاهر وقال هو في طريقة للدوحة وحيجي يعمل معاي مقابلة. قلت ليهو أنا موجود وجاهز لأي زول عاوز يعرف شىء عن عمل لجنة التحقيق. وبعدين قلت له أنا عندي رأي فى كلام عثمان السيد. لكن ما حاقولو ليك الا بعد ما تصلني هنا.. لكن انت (بوب) ممكن تقول لي هل التقرير بخط اليد ده هل نقلوا عدلان؟

    • بوب: لا التقرير ده مانقلوا عدلان . نقلوا شخص نحتفظ بأسمه فى الوقت الراهن حسب رغبته. لكنه زول اكاديمي وموثوق به. وبالنظر لكل الاشياء اللي ينسمعها ونقراها عن احداث يوليو أعتقد انو الجزء ده من التقرير (authentic). وعدلان الأيام دي بينشر الجزء المكتوب بخط اليد في الانترنت. واعتقد أي زول ممكن يشوفو ويقول رايه.

    • علوب: طيب قلت منو اللي نقل التقرير ده؟

    • بوب: نقلوا واحد صديقنا فى الفترة بعدما سلمتوه نميري. وهو شخص أكاديمي كان عنده فى الوقت داك إهتمام بعمل لجنة التحقيق. وأعتقد بأنو شخص موثوق به. ونترك لك الحكم على ذلك بعدما تشوف التقرير. وأحسن حاجة أنا أخلي معاك الوثيقتين علشان تشوفهم برواقة وتمعن أكثر وأنا أعاودك بعد يومين أو كده – ولن أثقل عليك لوقت طويل وكده – المهم ، علشان نقطع دابر الشك باليقين؟

    • علوب: شوف أنا أي كلمة كتبتها فى التقرير ده اذا مرت علي بعرفها طوالي. ودلوقت يبدو لي أن التقرير بخط اليد هو جزء من التقرير بتاع لجنة التحقيق. لكن أنا لازم اقراهو كويس واقول ليك رايي النهائي. لكن حكاية ملخص تنفيذي وكده أنا أطلاقاً ما كتبت ملخص أو كده. أنا حدي مع نميري التقرير ده وبس. لكن يمكن ناس محمود (عبدالرحمن الفكي) واخرين بطريقتم يمكن يكون كتبوا ملخص للرئيس لأن التقرير كبير والرئيس ماكان بيقرأ التقارير الطويلة. لكن الكلام اللي قريتو والقالو عليهو ملخص تنفيذي وشنو ده ما عندو علاقة بالتقرير اللي انا كتبته. الحقيقة أنا مليتو للزول اللي بيطبع. وبعدين من عرفك: الطابعة حقتم، والشخص اللي بيطبع من الامن.. وزي ماقلت لك أنا كان عندي صوت واحد وهم بامكانهم عمل أى شىء عاوزنو. لكن أنا ما سمعت بي شىء اسمه ملخص تنفيذي. أنا ما عندي شىء اسمه ملخص تنفيذي. وشكله كده منزوع من التقرير الاصلي. وقلت للطاهر فى التلفون أنا عندي رأي فى التقرير اللي بيقرأ منه عثمان (اللواء عثمان السيد) في برنامج مراجعات، لكن ما حأقولو ليك لامن تصلني هنا..

    • بوب: طيب يامولانا زي ما حتشوف بعد مراجعة ‘الملخص التنفيذي‘ فى أشياء انت قلت في البداية بأنو ماتطرقتوا ليها بتاتاً فالحاجات دي جات من وين؟ وبعدين يامولانا الامضاء اللي في الصفحة المرفقة covering letter مع التقرير هل هذا توقيعك؟

    • علوب: الإمضاء تبدو بتاعتي.. لكن لسع بحتاج اشوفها واقول لك.. لكن زي ما قلت لك أنا ما شفت حاجة اسمها ملخص تنقيذي ويبدو مسألة الامضاء في الخطاب المرفق حصل ليها عملية ‘مونتاج‘ زي ما بيقولوا باللغة الفرنسية التى اتذكر شوية منها.. يعنى ده عملية كده بتاعة تزوير.forgery) ) لكن نشوف لحد يوم الثلاثاء.. .

    • بوب: كويس. الكلام ده واضح وبعدين نرجع ليهو تاني لما نتقابل يوم الثلاثاء.. لكن خليني أسألك: هل كانت للواء عثمان السيد علاقة ما بلجنة التحقيق؟

    • علوب: أبداً ما كان عنده صلة بلجنة التحقيق.

    • بوب: طيب يامولانا هل استلمت رسالة من أسد شيبون (سكرتير مجلس الوزراء انذاك) كتابة أو شفاهة لإرساله المستندات بطرفك وهل وردت في خطابه أو ردك عليهو اشارة لي ملخص تنفيذى؟

    • علوب: الجواب الجاني من أسد شيبون قال لي سلم كل المستندات اللي عندك لدار الوثائق. وأنا رديت له وقلت له أنا ما عندي أي مستند يعني شهادات الشهود أو الوثائق اللي جاتنا. وكل شىء عندي قمت يتسليمه لدار الوثائق ولو عاوزني أساعد في تصنيف المستندات ما عندي مانع. لكن ما كان في كلام عن ملخص تنفيذى والله كده.

    • بوب: يعني يامولانا تضمين الخطاب بتوقيعك والوثيقة دي (ملخص تنفيذى) مافي صلة بيناتهم.. طيب انت شفت الحلقات اللي عملها الطاهر مع اللواء عثمان السيد؟

    • علوب: شفت جزء منها..

    • بوب: ورأيك شنو فى شهادته..

    • علوب: ده زول ما ملم بي أي شىء عن الاحداث. وكل تاريخه فى المخابرات وشغال مع (....) وشركة لونرو . وعمل مسألة نقل الفلاشا لإسرائيل.. ولما سأله الطاهر بعد ما رسل ليهم سؤال ابونورة (الاستاذ المعز أبونورة) عن انو ده ما تقرير لجنة التحقيق قال (اللواء عثمان) التقرير اللى كان بيقرأ منو أداهو ليهو منصور خالد.

    • بوب: طيب هل يمكن يكون اللواء عثمان اتحصل على نسخة من تقربر لجنة التحقيق بتاعتكم؟

    • علوب: التقرير بتاع لجنة التحقيق أنا شلتو بي نفسي للمطبعة الحكومية وحرستو علشان ما يشيلوه العمال أو زول تانى. وبقية أعضاء اللجنة ما كان هاميهم انو التقرير يشيلوا زول والا كده. وأنا وقفت عليهو لحد ما تم تجليده. وطلعت تلاته نسخ. اتنين سلمناها نميري والثالثة احتقظت بيها فى خزنتي ولما انتهت فترة عملي في سنة 1976 قمت بتسليم النسخة اللي عندي لي عبدالله الحسن الخضر – وزير شئون مجلس الوزراء فى الوقت داك.

    • بوب: طيب يامولانا هسع نقيف هنا وبعدين نشوف مسألة بيت الضيافة والحاجات التانية وكده)

    نواصل..
    انتقل الى الاعلى
                   |Articles |News |مقالات |بيانات

09-06-2012, 11:06 AM

خالد العبيد
<aخالد العبيد
تاريخ التسجيل: 07-05-2003
مجموع المشاركات: 21529

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: A/Magid Bob)

    Quote: علوب: ده زول ما ملم بي أي شىء عن الاحداث.
    وكل تاريخه فى المخابرات وشغال مع (....) وشركة لونرو .
    وعمل مسألة نقل الفلاشا لإسرائيل



    حضور ومتابعة

    شكرا استاذ بوب
                   |Articles |News |مقالات |بيانات

09-06-2012, 12:32 PM

Muna Khugali
<aMuna Khugali
تاريخ التسجيل: 27-11-2004
مجموع المشاركات: 22503

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: خالد العبيد)

    ....

    مع المتابعة والتحايا..
                   |Articles |News |مقالات |بيانات

09-06-2012, 03:16 PM

سفيان ابوقصيصه

تاريخ التسجيل: 06-04-2010
مجموع المشاركات: 32

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: A/Magid Bob)

    Quote:
    وعلى كل، لا أدعى حق ‘الملكية الفكرية‘ في توسلى للامساك باللحظة التاريخية بدون ابطاء. ولم يكن من ضمن مشاغلى قطع الطريق على أحد – فالحكمة ضالة المؤمن، أنى وجدها فهو أحق الناس بها - وليت مزيداً من الباحثين تتضافر جهودهم لتكملة مالم يسعفنى الوقت والجهد لسبر أغواره. والقاضى الجليل الدكتور حسن علوب حثنى أن أنقل عنه استعداده لمقابلة كل من يرغب فى لقائه والتحدث اليه.


    لك الشكر الدكتور عبدالماجد بوب على هذه الروح وكذلك المجهود الذي قمت به..
    وكذلك كل الشكر للدكتور المعزابونوره وهو من جعل الوصول لمولانا القاضي علوب ممكناً..
                   |Articles |News |مقالات |بيانات

10-06-2012, 00:44 AM

خالد العبيد
<aخالد العبيد
تاريخ التسجيل: 07-05-2003
مجموع المشاركات: 21529

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: سفيان ابوقصيصه)

    حضور ومتابعة

    شكرا استاذ بوب
                   |Articles |News |مقالات |بيانات

10-06-2012, 02:19 AM

A/Magid Bob
<aA/Magid Bob
تاريخ التسجيل: 23-04-2005
مجموع المشاركات: 224

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: خالد العبيد)

    الأستاذ العبيد .. تحياتى وامتنانى على تفضلك بالمتابعة، وأرجو أن تكون المادة المتاحة مدخلاً مواتياً لنقل الحوار من حيز الزج بالاتهامات وتسعير لدد الخصومة فى الغالب الأعم الى حيز الجدل المتمدن. خاصة والأمر هنا يتعلق بأرواح عزيزة أهدرت على جانبى الحدث. المعتقلون الذين استشهدوا فى بيت الضيافة ضباط عزل تحرم كل الشرائع التعدى عليهم أو حتى ابراز صورهم. ولعلم الجميع لم يكن كل المعتقلين فى بيت الضيافة قد تم تصنيفهم كاعداء لانقلاب الرائد هاشم العطا. فعلى سبيل المثال المقدم عثمان محمد أحمد كنب توجه الى ‘كتيبة جعفر‘ للوقوف على الحاصل. وطلب منه الضباط الموالون للانقلابيين فى حداثة تجاربهم كملازمين - أن يعود الى بيته فتجادل معهم فى لحظات حرجة، مما حملهم على اصطحابه الى بيت الضيافة. وفى اليوم التالى زاره المقدم عثمان أب شيبة – حسب شهادة المقدم كنب المضمنة فى ‘كتابى الوثائقى عن 19 يوليو‘ بأن عثمان اب شيبة وبينهما صداقة أحضر له والدته فى بيت الضيافة للاطمئنان على حاله. ويقول كنب "والله لن أنسى له هذه المعاملة." وزيادة على ذلك كان من بين المعتقلين فى بيت الضيافة الضابط محمد عثمان كيلة – لا أحد يعرف ظروف اعتقاله قبل أمد وجيز من وقوع المذبحة المخزية – هذا الضابط أقرب سياسياً وشخصياً لقادة الانقلاب. ومعروف لدى أصدفائة أنه كان عازماً على تقديم استقالته من القوات المسلحة بعد ابعاد المقدم بابكر النور والرائدين فاوق حمدالله وهاشم العطا. الا أنه أثنى عن عزمه بعد تقليب الرأى.
    والشهداء فى بيت الضيافة لم يكونوا جميعهم مصنفين كسند لنميرى أو داعمين لنظامه ولكن ضرورات اللحظة التاريخية فى حينها حتمت تطبيق اجراءات أعتقد بأنها متعجلة ومجحفة فى حق البعض من حيث التقدير السياسى وللاسف أفضت الى نتائج كارثية يتعين علينا أن نتناولها بالتقدير اللازم. ومما يبعث على الغبن أن الجناة الحقيقيين لم تطالهم يد العدالة.
    واذا اطلعت على أمر التكليف الذى أصدره نميرى للجنة القاضى علوب لم ترد فى الصفحات المائة وخمسين التى تولى عدلان نشرها أو جزء منها – لم ترد كلمة واحدة من قريب أو بعيد عن شىء اسمه بيت الضيافة.. ولذلك يقول القاضى الجليل الدكتور حسن علوب بأن لجنة التحقيق التى ترأسها لم تر ما يدعوهم لتناول ذلك الحدث على جسامته. وكان هذا الموضوع مما تحاورت فيه طويلاً مع مولانا الدكتور حسن علوب.
    وبقدر ما أكرر حزنى وغضبى على كل ما أحاط بمذبحة بيت الضيافة وحجب الحقائق لتحديد الجناة أرى بأن هنالك أرواحاً عزيزة أهدرت خلال المحاكمات الجائرة فى محاكمات الشجرة بحق العسكريين والمدنيين. وفى حوارى مع القاضى الدكتور حسن علوب تطرقنا الى محاكمة المقدم بابكر النور والرائد فاروق حمدالله ولم تثبت لهما ادانة فى التخطيط أو تنفيذ انقلاب 19 يوليو. والى محاكمة الملازم أحمد عثمان عبدالرحمن الحردلو الذى صدر الحكم بواسطة محكمة عسكرية ترأسها العقيد تاج السر المقبول وقضى بسجنه بضع سنوات، لاشتراكه فى مرحلة لاحقة بعد وقوع الانقلاب (جاء الملازم أحمد منقولاً من القيادة الشرقية الى حامية الشمالية وانضم الى أبناء دفعته وأصدقائه فى انقلاب هاشم العطا فى يوم 22 يوليو 1971 وكلف بحراسة المعتقلين فى بيت الضيافة بعد الساعة 12 ظهراً أى قبل أرع ساعات من وقوع المذبحة هناك. اصر نميرى على اعادة محاكمته غير مرة ثم اتخذ بنفسه قراراً بكتابة اسمه فى قائمة كتبها بخط يده بمن يتم اعدامهم. والقاضى علوب فى سياق حوارنا يتفق بأن ذلك كما تسميه القوانين المتعارفة بشكل اجمالى double jeopardy وهذه القاعدة القانونية تحرم تعرض المتهم الى المحاكمة أكثر من مرة بنفس التهمة.. وللقاضى علوب دراسة فى هذه القاعدة القانونية..

    طال الحديث فى هذا الموضوع الذى يحتل كل اقطار عقلى وقلبى منذ عشرات السنين .. ومرة ثانية شكراً لك وللعزيزة منى خوجلى ونحن سعداء ‘بمعاودة الصدور... وان شاء الله خطوة عديلة‘. وشكرى الجزيل للعزيز سفيان: على تلطفك وتقديرك لأهمية ما نحن جميعاً بصدده.. ولا تقف عن المشاركة بالله..وأنا أعمل بمساعدة أصدقائى لانزال أجزاء من التقرير كتابة وبالصوت ارضاءً لمن يتطلع الى ذلك..

    (عدل بواسطة A/Magid Bob on 10-06-2012, 02:26 AM)

                   |Articles |News |مقالات |بيانات

10-06-2012, 03:30 AM

النذير حجازي
<aالنذير حجازي
تاريخ التسجيل: 10-05-2006
مجموع المشاركات: 6203

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: A/Magid Bob)

    الدكتور بوب،
    تحية طيبة

    شكراً جزيلاً على هذا الجهد المقدر، وحوار في غاية التشويق والمتعة، وبلاشك سيكون كتابك عن أحداث يوليو كذلك، لكن يا دكتور أظن بأنك قد استعجلت بطباعة كتابك عن أحداث يوليو فعلى ما أعتقد بأنك كتبته قبل حوارك مع القاضي مولانا د. علوب، فهل نحن موعودون بنسخة منقحة من كتابك تشمل هذه المستجدات؟!

    تقبل تحياتي وتقديري
                   |Articles |News |مقالات |بيانات

10-06-2012, 04:58 AM

A/Magid Bob
<aA/Magid Bob
تاريخ التسجيل: 23-04-2005
مجموع المشاركات: 224

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: النذير حجازي)

    العزيز الأستاذ النذير حجازى
    شكراً على تعليقك.. وبخصوص استباقى لمقابلة القاضى الدكتور حسن علوب باصدار كتابى، لا أعتقد بأن مسألة الاستعجال الذى ترى احتماله دقيقة فى مضمار البحث العلمى أياً كان وتراكم المعلومات لن ينتهى بشهادة القاضى علوب. وسمة المعرفة الانسانية الحركة والتراكم. كما أن تطوير الجهد الذى شاركت فيه مسئولية جماعية ولن تقف عند نقطة بعينها. أسهم ويسهم فيها غيرى. وفى ذلك ‘فليتنافس المتافسون‘ وهذه دعوة لكى يسهم كل شخص جاد باضاءة أحداث التاريخ من موقعه وبمنهجه الخاص. وبالطبع لن يهدأ لى بال مادام هنالك طلاسم عصية لا بد أن تنجلى. وقبل مقابلتى مع القاضى الدكتور حسن علوب ظهرت معلومات جديدة حول انقلاب 19 يوليو 1971 سوف أسعى لتضمينها فى نسخة قادمة اذا قيض الله لنا نتممها.
    ومرة ثانية لك محبتى وتقديرى على اهتمامك..
                   |Articles |News |مقالات |بيانات

10-06-2012, 10:31 AM

Abutalib Elgorashi

تاريخ التسجيل: 26-11-2004
مجموع المشاركات: 348

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: A/Magid Bob)

    العزيز الدكتور عبد الوهاب بوب
    خالص التحايا ومتابعين
                   |Articles |News |مقالات |بيانات

10-06-2012, 02:23 PM

Sabri Elshareef

تاريخ التسجيل: 30-12-2004
مجموع المشاركات: 21083

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: Abutalib Elgorashi)

    تحياتي الطيبة يا دكتور بوب

    والله اشواق كتيرة فقدت تلفونك ولم اجد دليل للوصول اليك

    رغبتي في معرفة كيف الحصول علي كتابك الوثائقي عن يوليو 71 وايضا علمت من المناضلة الاستاذة سعاد ابراهيم ان لها كتاب لم ير النور الي الان عن يوليو وهو لشخص مسئؤول عن النشر والطباعة امسك بالكتاب لمدة 15 سنة ولم ينشر اتمني ان ينشر
    المعلومة ملك للناس وحرام ان تتاخر او لا تكتب


    مستمتع بالحوار مع القاضي علوب امد الله له في الصحة والعافية

    في انتظار اكمال التحقيقات ومعرفة خبايا ما تم في ال 50 سنة الماضية

    محبتي وسلامي لك وللاسرة

    (عدل بواسطة Sabri Elshareef on 10-06-2012, 03:50 PM)

                   |Articles |News |مقالات |بيانات

10-06-2012, 02:55 PM

عدلان أحمد عبدالعزيز

تاريخ التسجيل: 03-02-2004
مجموع المشاركات: 2225

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: Sabri Elshareef)

    العزيز د. ماجد بوب، التحايا الطيبات ..

    في غمرة استمتاعي بقراءة الحوار الذكي الذي أجريته أنت مع د. علوب، طاف بذهني أن كم آلاف من الدولارات أنفقت في سبيل ذلك اللقاء .. أن كم من الأيام و الساعات استقطعتها من سوسن و العيال الكبار لتعبر الأطلنطي و بحر الشمال و حتى الخليج .. أن كم باهظ على صحة بدنك التي تحتاج الرعاية .. أن .. و أن .. لكن، هكذا هو قدر الباحث الجاد المسكون بحب المعرفة و سبر أغوار الحقيقة.
    ربُنا يعوض التعب و يبارك لك في مجهود الأجيال الذي تبذله فقطعاً يجد مكانه اللائق في سد ثغرات تاريخ السودان الحديث و دروبه الغامضة لمصلحة زمن جاي و شعب ولود.

    لك و لجهودك تقدير أمد حد السمي

    عدلان
                   |Articles |News |مقالات |بيانات

10-06-2012, 04:14 PM

سفيان ابوقصيصه

تاريخ التسجيل: 06-04-2010
مجموع المشاركات: 32

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: A/Magid Bob)

    الغزيز د. عبدالماجد بوب
    لك التحيه والشكر مجدداً
    لا شك ان حصيلة ما خرجت به من لقاؤك بمولانا علوب سيكون اضافه قيمه لكتابك "يوليو...اضاءات ووثائق" الذي فيه الجديد من احداث وشهود ووثائق...
    اما فيما يختص بأحداث بيت الضيافه، فقد استوقفتني جملتان اثارت انتباهي، ولا اود التعليق استباقاً، في متن مداخلتك على الاستاذ خالد العبيد..
    الجمله الاولى:
    Quote: ومما يبعث على الغبن أن الجناة الحقيقيين لم تطالهم يد العدالة.

    الجمله الثانيه والتي يقول فيها مولانا القاضي علوب عن احداث بيت الضيافه:
    Quote: لجنة التحقيق التى ترأسها لم تر ما يدعوهم لتناول ذلك الحدث على جسامته.
                   |Articles |News |مقالات |بيانات

10-06-2012, 05:10 PM

عمار عبدالله عبدالرحمن
<aعمار عبدالله عبدالرحمن
تاريخ التسجيل: 26-02-2005
مجموع المشاركات: 8668

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: سفيان ابوقصيصه)

    متابعة .....
                   |Articles |News |مقالات |بيانات

10-06-2012, 08:27 PM

A/Magid Bob
<aA/Magid Bob
تاريخ التسجيل: 23-04-2005
مجموع المشاركات: 224

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: عمار عبدالله عبدالرحمن)

    تحياتى وشكرى الخالص لكل من تفضل بالتعليق على حوارى مع القاضى الدكتور حسن علوب المقيم حالياً فى امارة أم القوين. وكم أنا مدين له بالشكر على تفضله بالحوار معى وصبره على أسئلتى والحاحى بالرغم من أننى كنت أراه يتلوى من الام المفاصل وأنا انتزع الكلمات منه انتزاعاً وكنت لبعض الوقت أجلس تحت أقدامه وألح عليه أن يستلقى لكى نواصل الحوار. على كل قصة الحوار هذه قد تطول واتمنى أن أعود اليها باعتبارها تجربة انسانية عظيمة الفائدة بالنسبة لى.
    وللعزيز عدلان يا أخى هذه مسئوليتنا جميعاً تجاه حدث فى ضخامة انقلاب يوليو ومذبحة بيت الضيافة ومحاكم الشجرة. وهنالك من الباحثين والوطنيين المهمومين بثبر أغوار الحقيقة يتحملون ما لا طاقة لهم به فى مهام تفوق عشرات المرات ما قمت به من حيث الاهمية والرهق. وأنا شاكر لمشاعرك.. لكن برضو ما كان فى داعى! وانت ذاتك تحملت مشقة نشر الاجزاء المتاحة من تقرير القاضى علوب التى تأكد منه بأنها مطابقة لتقريره الاصلى..

    عزيزنا ياسر .. أنا سعيد واحس باطمئنان عميق لأنك على الخط لتكملة مالم يكتمل.. ولن امل الحديث عن ضرورة استنهاض أى باحث مقتدر للغوص فى مسألة انقلاب يوليو وتداعياته. وهنالك أحداث لاتقل أهمية مثل انقلاب المقدم حسن حسين وحملة الجبهة الوطنية لاسقاط نميرى والتى قادها الشهيد محمد نور سعد وكذلك جريمة القتل الجماعى لشهداء انقلاب 28 رمضان وغيرها من الاحداث التاريخية الجسيمة.
    وللأعزاء النذير والقرشى أنا شاكر لمتابعتكم وحثى على استعجال نشر الاجزاء المتاحة لتعميم الفائدة. والشىء الذى يؤخر كل ذلك هو حرصى على وضع التسجيل الصوتى فى متناول الجميع خاصة فى مواضع تحتاج الى توثيق وحرص يبعث على الطمأنينة لدى المتابعين..

    ويا أخى أبو قصيصة وعمار صبركم شوية:
    ويأتيك بالاخبار من لم تبايعه بتاتاً
    ولم تقطع له يوم موعد
                   |Articles |News |مقالات |بيانات

10-06-2012, 08:40 PM

أمير عثمان
<aأمير عثمان
تاريخ التسجيل: 11-08-2009
مجموع المشاركات: 804

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: عمار عبدالله عبدالرحمن)

    الأخ د. بوب ... سلامات ...
    ومشكور جدا على الجهد المقدر جدا ...
    وياخى أنا أعتذر بشدة بما صدر منى فى حقك كباحث
    حينما إختلط عليك الأمر فيما يخص وجود د. علوب
    على قيد الحياة ... أمد الله في أيامه .. ومتعه الله بالصحة والعافية ..
    فلك العتبى حتى ترضى عزيزى .. وأكرر إعتذارى ...
                   |Articles |News |مقالات |بيانات

10-06-2012, 10:56 PM

sourketti
<asourketti
تاريخ التسجيل: 27-02-2002
مجموع المشاركات: 1206

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: أمير عثمان)

    تدور بنا الاحداث ولا يعلم اسرارها ومآلاتها الا الخالق الواحد الديان وربما من اصطفى من عباده وهو الأعلم بأمرهم وبشانهم
    يوليو 71 شان لا يخصنا والسودان فقط بل يتعدانا لكل العالم من حولنا والذى لم ولن يتركنا نتحسس الخطى سيراً فى درب الاستعدال والاصلاح كلما تمايلت بنا الاهواء واستهوانا السلطان أوغوانا الشيطان...

    مولانا علوب لا يعلم حقيقة ما حدث فى بيت الضيافه بصفة رسميه وعدليه وربما علم بالأمر على هامش جلسات وإفادات الشهود التى جاءت كما أرادوا وليس كما أرادت لجنته وخارجها...
    الأمر لم يكن متروكاً للجنة علوب التى قُصد من تشكيلها تبرير وتجميل وتقنين مجازر الشجرة بعد همس الشارع وربما البحث الدقيق عمن تبقى من شهود عيان للحدث والتعامل معهم واسكاتهم
    إفادة علوب بعد شهور قلائل من الحدث لم تكن لتأتى بأمر كان قد سبق السيف فيه العزل فما بالكم ب 41 عاماً ...

    ذكر لى المقدم بمدرعات الشجرة أنه كان أحياناً وفى أمسيات مناوباته فى الثمانينات يستيقظ على اصوات طرق خافت على باب مكتبه ليلاً وعندما يفتح الباب لا يجد أحداً فى الجوار...وعندما تكرر الأمر سأل شيخاً عن تفسير ما يحدث وأكد له عدم وجود أى شخص عند البحث حول المكتب فكان تفسير الشيخ (لابد أن هناك أرواحاً أزهقت ظلماً فى ذلك المكان لن تهدأ أرواحها أبداً الى يوم القيامه)

    وقبل الحدث باسبوع كان يحزم أمتعته إستعداداً للسفر فى مهمة رسميه لاوربا فى يوليو 1971 عندما تذكر طلب الشيخ منه أن يقابله لامر هام جداً قبل سفره
    تذكر حديث الشيخ اليه فى آخر الليل وقبل سفره بساعات قلائل فترك أمتعته وخرج بسيارته يبحث عن شيخه مهتدياً بضؤ سيارته بين اشجار اللبخ الكبيرة خلف جامعه الخرطوم ...
    فوجده يتوسد يديه ويلتحف السماء على فراش التراب الذى تعود أن يضطجع عليه وان يصبغ جلبابه الابيض به وكان نائماً فنهض مع سماع صوت محرك السيارة التى تقترب منه
    قال له الشيخ (شوف وانت مسافر هناك إذا سمعت حد جرالو حاجه هنا ماليكشى دعوه نميرى وراهو قوة مسيراهو)
    كانت تلك الكلمات هى كل مادار بينهما وماقاله الشيخ لصديقه قبل ان ينصرف ليواصل نومه...
    انصرف الصديق وهو لا يعرف ما يعنيه الشيخ بوصيتة .... وسافر فى مهمته وكان العطا يبحث عنه فى غيابه مساء 19 يوليو 71
    وفى المانيا وعلى المطار فى بوم 19 يوليو 1971 شاهد على شريط الاخبار بالتلفزيون (Atta took over power in sudan)
    وفى اليوم الثالث مساءاً وهو يتابع الاخبار استمع لمقدمها وهو يردد (Nimeri got back to power)
    تذكر هنا وصية شيخه قبل سفره وعرف قصده ...
                   |Articles |News |مقالات |بيانات

11-06-2012, 00:16 AM

A/Magid Bob
<aA/Magid Bob
تاريخ التسجيل: 23-04-2005
مجموع المشاركات: 224

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: sourketti)

    العزيز أمير محمد عثمان
    أشكرك على لطفك ومعاودة الاتصال. ولا يهمك يا أخى وأعتبر الأمر كأنه لم يكن. خاصة وأنا أعرف عن قرب شديد صدق نواياك من خلال معرفتى منذ عشرات السنين باحبابى ابراهيم ومنعم. والمهم أنا أحتاج لمعاونتك فى مشروع اقترحته على مركز عبدالكريم ميرغنى للاحتفال بمئوية للمهندس حسن بابكر. وخلال تواجدى فى أم القوين وقبل ذلك شرعت فى عمل اتصالات بأبناء الراحل العزيز منهم الأستاذة نفيسة حسن بابكر وزرجها المفضال. وبالمناسبة أنا ممتن لنفيسة فقد قدمتنى تقديماً طيباً للقاضى الدكتور حسن، وأوصلت له مقالاً كتبته قبل بضعة شهور ، يدعو للاحتفال بمئوية المهندس حسن بابكر. وسوف أعاود الاتصال بك واخرين لهذا الغرض حالما أخلص من تقديم جزء من الحوار مع الدكتور حسن علوب. وبالمناسبة هو نفسه تطرق لما يقال عن موته بروح طيبة مما خفف على فداحةِ الخطأ الذى وقعت فيه وسعيت للاعتذار عنه اعتذاراً صادقاً.
    ولك خالص شكرى على لطفك وتحياتى لكل من تطرقت لذكرهم..
                   |Articles |News |مقالات |بيانات

11-06-2012, 04:39 AM

أمير عثمان
<aأمير عثمان
تاريخ التسجيل: 11-08-2009
مجموع المشاركات: 804

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: A/Magid Bob)

    Quote: العزيز أمير محمد عثمان
    أشكرك على لطفك ومعاودة الاتصال. ولا يهمك يا أخى وأعتبر الأمر كأنه لم يكن. خاصة وأنا أعرف عن قرب شديد صدق نواياك من خلال معرفتى منذ عشرات السنين باحبابى ابراهيم ومنعم. والمهم أنا أحتاج لمعاونتك فى مشروع اقترحته على مركز عبدالكريم ميرغنى للاحتفال بمئوية للمهندس حسن بابكر. وخلال تواجدى فى أم القوين وقبل ذلك شرعت فى عمل اتصالات بأبناء الراحل العزيز منهم الأستاذة نفيسة حسن بابكر وزرجها المفضال. وبالمناسبة أنا ممتن لنفيسة فقد قدمتنى تقديماً طيباً للقاضى الدكتور حسن، وأوصلت له مقالاً كتبته قبل بضعة شهور ، يدعو للاحتفال بمئوية المهندس حسن بابكر. وسوف أعاود الاتصال بك واخرين لهذا الغرض حالما أخلص من تقديم جزء من الحوار مع الدكتور حسن علوب. وبالمناسبة هو نفسه تطرق لما يقال عن موته بروح طيبة مما خفف على فداحةِ الخطأ الذى وقعت فيه وسعيت للاعتذار عنه اعتذاراً صادقاً.
    ولك خالص شكرى على لطفك وتحياتى لكل من تطرقت لذكرهم..


    ولك من الشكر أجزله على هذه الأريحية ...
    وأنا رهن الإشارة ..
    وخالص إحترامى وتقديرى ..
                   |Articles |News |مقالات |بيانات

11-06-2012, 05:24 AM

mohmmed said ahmed
<amohmmed said ahmed
تاريخ التسجيل: 25-10-2002
مجموع المشاركات: 7055

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: أمير عثمان)

    لك التقدير د ماجد

    على هذه الجهود الكبيرة
    وانت تبحث عن الحقيقة
    كشيوعى اصيل وكباحث يلتزم امانة وموضوعية البحث
    امتدادا لمساهمات د القدال - د المعز ابنورة- الراحل خالد الحاج

    البحث حول مجزرة بيت الضيافة ضالتنا فىه العدالة والحقيقة وليس النجاة او التهرب من تحمل المسؤلية
                   |Articles |News |مقالات |بيانات

11-06-2012, 08:19 AM

Hussein Mallasi
<aHussein Mallasi
تاريخ التسجيل: 28-09-2003
مجموع المشاركات: 26226

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: mohmmed said ahmed)

    بدل اللف و الدوران دا كلو؛ أما كان من الأوفق و الأسهل سؤال السيد علوب عن
    هل ثبت في يقين اللجنة أن جبارة و الحاردلو هم من أمر و أطلق النار على الضحايا؟!!
                   |Articles |News |مقالات |بيانات

11-06-2012, 08:32 AM

نصر الدين عثمان
<aنصر الدين عثمان
تاريخ التسجيل: 24-03-2008
مجموع المشاركات: 3750

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: Hussein Mallasi)

    دكتور بوب .. سلام،
    ألف شكر لك على إشراكنا في متابعة هذا الحوار الهام جداً ..

    • بوب:
    Quote: طيب يامولانا زي ما حتشوف بعد مراجعة ‘الملخص التنفيذي‘ فى أشياء انت قلت في البداية بأنو ماتطرقتوا ليها بتاتاً فالحاجات دي جات من وين؟ وبعدين يامولانا الامضاء اللي في الصفحة المرفقة covering letter مع التقرير هل هذا توقيعك؟


    • علوب:
    Quote: الإمضاء تبدو بتاعتي.. لكن لسع بحتاج اشوفها واقول لك.. لكن زي ما قلت لك أنا ما شفت حاجة اسمها ملخص تنقيذي ويبدو مسألة الامضاء في الخطاب المرفق حصل ليها عملية ‘مونتاج‘ زي ما بيقولوا باللغة الفرنسية التى اتذكر شوية منها.. يعنى ده عملية كده بتاعة تزوير.forgery) ) لكن نشوف لحد يوم الثلاثاء.. .


    وكنت قد أوردت في بوست آخر ( .. فإن وضع خطاب مولانا علوب لمجلس الوزراء في صدر الملخص (المجهول المصدر) أمر يثير الاستغراب! وذلك بالنظر إلى عدم ورود أية إشارة بفحوى الخطاب المعني تتعلق بالملخص أو أي تكليف صادر من جهة ما بإعداده أو خلافه.. فلماذا عمدت الجهة التي أعدت الملخص إلى تضمين خطاب مولانا علوب لملخصها وإعتباره جزءً منه آية ذلك أن ترقيم أول صفحة في الملخص تبدأ بالرقم (2) على أعتبار أن الخطاب قد أخذ رقم الصفحة (1) مما ينفي تماماً فرضية أن الخطاب قد ضم إلى الملخص في فترة لاحقة عن طريق المسح الضوئي (اسكانر) )

    وأيضاً: (ظني بأن كل المؤشرات ترجح بدرجة كبيرة صحة إفادة مولانا القاضي حسن علوب من أنه لم يقم بكتابة هذا الملخص، فقاض بمنزلة الدكتور علوب كان سيتحفظ كثيراً – مهنياً على الأقل - على فكرة تصديه للقيام بإعداد مخلص لتقرير قضائي مطول ومتشعب في قضية شائكة مثل أحداث 19 يوليو. كما أنه ليس من المتصور أن يغفل أي قاض على أعتاب السلم القضائي - ناهيك أن يكون ذلك القاضي هو الدكتور علوب - الإشارة إلى أمر التكليف الصادر إليه بإعداد المخلص والجهة التي طلبته والتاريخ وتوقيعه على ذيل الملخص والذي جاء خالياً من كل ذلك )

    (عدل بواسطة نصر الدين عثمان on 11-06-2012, 08:35 AM)

                   |Articles |News |مقالات |بيانات

11-06-2012, 10:31 AM

Yahia Abd El Kareem
<aYahia Abd El Kareem
تاريخ التسجيل: 26-02-2005
مجموع المشاركات: 829

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: نصر الدين عثمان)

    شكرا للدكتور بوب على هذه الاطلالة المفيدة

    نتابع بشغف وكما اسلفت فى بوست ابونورة انا عازم على مقابلة مولانا علوب لاستجلاء بعض النقاط القانونية

    فوق

    يحيى عبدالكريم

    مستشار قانونى بابوظبى هاتف 0505853276
                   |Articles |News |مقالات |بيانات

11-06-2012, 10:49 AM

Hussein Mallasi
<aHussein Mallasi
تاريخ التسجيل: 28-09-2003
مجموع المشاركات: 26226

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: Yahia Abd El Kareem)

    أداني كتافي .. زاهر سرور السادات حارب في فلسطين ..
    منقول بخط اليد .. ملخص تنفيذي .. علاء قال جايي بعد شوية ..
    نقلوا شخص نحتفظ بأسمه لكنه زول اكاديمي وموثوق به!!

    _____
    هل ثبت في يقين اللجنة أن جبارة و الحاردلو
    هم من أمر و أطلق النار على الضحايا أم لا؟!!
                   |Articles |News |مقالات |بيانات

11-06-2012, 11:54 AM

النذير حجازي
<aالنذير حجازي
تاريخ التسجيل: 10-05-2006
مجموع المشاركات: 6203

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: Hussein Mallasi)

    Quote: هل ثبت في يقين اللجنة أن جبارة و الحاردلو
    هم من أمر و أطلق النار على الضحايا أم لا؟!!


    سلام يا ملاسي،

    يا ملاسي تقرير علوب ليس عن مجزرة بيت الضيافة،
    وقد لا يكون أنه تطرق لها أصلاً من الأساس، فلما إختزال
    كل هذا العمل المضني فقط في مجزرة بيت الضيافة؟!
    وقد ذكر علوب أنهم لم يتهموا أحداً بضلوعة في إرتكاب
    مجزرة بيت الضيافة، وكذلك فعل محمود الفكي
    ممثل القوات المسلحة لم يذكر بالاسم من إرتكب
    المجزرة ولم يتطرق للحردلو أو أحمد جبارة. في رأيي
    الشخصي قد تكون القوات المصرية التى أتت لإنقاذ حكم
    نميري هي من إرتكبت المجزرة ولذا المايويين قد
    جعلوا من هذه المجزرة سراً، والمقولة المأثورة
    الشهيرة تقول: يتكتم الشخص في حالتين يا أما خوفاً
    من الفاعل يا أما خوفاً على الفاعل، واللبيب بالإشارة
    يُفهم.

    تحياتي
                   |Articles |News |مقالات |بيانات

11-06-2012, 11:57 AM

أحمد طراوه
<aأحمد طراوه
تاريخ التسجيل: 25-12-2006
مجموع المشاركات: 4110

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: Hussein Mallasi)

    الصبر يا حسين

    علوب Vs بوب .. حديد لاقى حديد .. والمستفيد الاول و الاخير من هذا اللقاء هو الحقيقة
    .. الحقيقة في صلتها بتلك الشروط و الظروف و الملابسات التاريخية الخاصة جدا"

    إن ما سمي بشهادة المدعو عثمان عبد الرسول المطروحة في برنامج الشراكة الأمنية التلفزيوني، و الهادفة كذبا
    و تهافتا" لتجريم الحزب الشيوعي،
    هي اصدق دليل على حقيقة ان الحردلو و جبارة لا علاقة لهم بإطلاق النار داخل تلك الغرفة التى كان بداخلها عبد الرسول نفسه، و كان اول ضحاياها
    شقيق خالد حسن عباس
                   |Articles |News |مقالات |بيانات

11-06-2012, 01:01 PM

Hussein Mallasi
<aHussein Mallasi
تاريخ التسجيل: 28-09-2003
مجموع المشاركات: 26226

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: أحمد طراوه)

    Quote: إن ما سمي بشهادة المدعو عثمان عبد الرسول المطروحة في برنامج الشراكة الأمنية التلفزيوني،
    و الهادفة كذبا و تهافتا" لتجريم الحزب الشيوعي، هي اصدق دليل على حقيقة ان الحردلو و جبارة لا علاقة
    لهم بإطلاق النار داخل تلك الغرفة التى كان بداخلها عبد الرسول نفسه، و كان اول ضحاياها شقيق خالد حسن عباس

                   |Articles |News |مقالات |بيانات

11-06-2012, 03:12 PM

A/Magid Bob
<aA/Magid Bob
تاريخ التسجيل: 23-04-2005
مجموع المشاركات: 224

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: Hussein Mallasi)

    العزيز ملاسى
    تحياتى.. وأنا أعتقد أن ماتراه لفاً ودوراناً هو من ضرورات التأصيل لاستنباط الحقيقة. والمسألة عاوزه صبر لا معدى عنه. ولا يمكن القفز لما تتطلع اليه كمثل من يريد مشاهدة فيلم من نقطة النهاية. وانت فى بعض المواضع تبدى ملاحظات باطنية ذكية ومليحة، لكن يا أخى لكل مقام مقال.. وبدون مباهاة أو امتنان عليك، اذا كان قدرى أن أتحمل مشاق السفر ومتطلباته فماذا يضيرك أن تستريح اينما كنت ، وتطول بالك شوية. وسنأتى على ذكر بيت الضيافة. وهذه المسألة ليست من باب التسلية أو الهرولة بجزء من الحقيقة لأن الأمر يتعلق بأرواح عزيزة أهدرت على جانبى الحدث مما يدعو الى الموضوعية والتدقيق فى تقصى الحقائق.. وشكرأ لتفضلك بالمتابعة ..
                   |Articles |News |مقالات |بيانات

11-06-2012, 03:34 PM

A/Magid Bob
<aA/Magid Bob
تاريخ التسجيل: 23-04-2005
مجموع المشاركات: 224

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: A/Magid Bob)

    حضرة المستشار يحى عبد الكريم
    أنا سعيد بعزمك على استنطاق القاضى الجليل الدكتور حسن علوب حول المسائل العديدة التى لم تكون ضمن ما تطرقت له فى مقابلتى معه. وهذا ماتطلعت اليه من نشرى لهذا الحوار. وكما ذكرت فى موضع سابق فقد حثنى القاضى الجليل لنقل استعداده لمقابلة كل من يرغب فى محاورته والتحدث اليه. وسوف أكون على أتم استعداد للتعاون معك جهد طاقتى.. وهذا هو رقم هاتفى للاتصال :


    (510)
    0193 -525
    em: [email protected]

    (عدل بواسطة A/Magid Bob on 11-06-2012, 03:50 PM)

                   |Articles |News |مقالات |بيانات

11-06-2012, 04:46 PM

المعز ادريس
<aالمعز ادريس
تاريخ التسجيل: 18-05-2009
مجموع المشاركات: 1569

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: A/Magid Bob)

    آن أوان البحث عن علوب آخر
    أقترح (حسن العماس)!
                   |Articles |News |مقالات |بيانات

12-06-2012, 11:31 AM

Yahia Abd El Kareem
<aYahia Abd El Kareem
تاريخ التسجيل: 26-02-2005
مجموع المشاركات: 829

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: المعز ادريس)

    د. بوب

    اشكر لك الاهتمام والرد على مداخلتى

    سوف أكون على صلة للتنسيق وأتمنى ان تسبح لى فرصة لزيارة مولانا فى أم القيوين

    لايزال المشوار طويلا لرفع النقاب عن مجزرة بيت الضيافة ومحاكمات الشجرة وهذا أدعى لشحذ همم البورداب والمهتمين ببذل المزيد

    من الجهد والمساهمات والعمل على جمع الأعمال فى كتاب لفائدة الجميع ولعل ذلك ينتج عن تحرك رسمى لفتح هذه الملفات واعادة التحقيق

    فيها وعلى الأقل جذب الاهتمام الرسمى نحو " نشر تقرير لجنة القاضى علوب " أو التحقيق للعثور على التقرير الأصل
                   |Articles |News |مقالات |بيانات

12-06-2012, 02:13 PM

sourketti
<asourketti
تاريخ التسجيل: 27-02-2002
مجموع المشاركات: 1206

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: Yahia Abd El Kareem)

    للأخوة المتلهفين لمعرفة أمر ما جرى فى بيت الضيافه عصر 22 يوليو 1971من مولانا القاضى علوب
    أرجو أن أؤكد لهم أن علوب ومن معه من أعضاء اللجنة لا يعلمون شيئاً عما جرى فى بيت الضيافه وأن التضارب الذى أتى فى أقوال الشهود الذين عرضوا أمام لجنتهم كان أمراً مقصوداً ومرصوداً ومدبراً وأمر اللجنه برمته كان شأناً صورياً
    أب شيبه المتهم الأول بأصدار الأوامر بتصفية المعتقلين فى بيت الضيافه لم يواجه بهذه التهمة عند محاكمته وهذا النوع من ضباط القوات المسلحه الذين تحركوا جهاراً نهاراً لقلب مايو وحرصوا فى الساعات الأخيرة عصر 22 يوليو71 على حرق كل أوراق وأوامر التحرك وبرقيات التأييد واصوات ضرب الدانات والجبخانة تهز أرجاء القصر لا يقدمون على خطوة ########ة مثل هذه بأى حال من الأحوال
    الملازم عبدالعزيز محمود الذى شهد ضد جبارة عند محاكمته بأنه من نفذ العمليه ذاك الاسمر ممتلئ القامه قوى البنيه من الدناقله السود كان من صفوفى مايو بالمدرعات ومن الذين ترقوا ضباطاً بصفه استثنائيه وأمثاله كُثر من الصفوفيين الذين كانوا يترددون على حكام الشجرة طالبين مساعدتهم (سعادتك ماعاوزين شهايد) وكانوا يقصدون بالشهايد الشهود ....
    تحدثت مع الفريق ابكدوك والعقيد عبدالوهاب البكرى وكانا رحمهم الله من حكام محاكم الشجرة سألتهم مباشرة وقبل فترة قصيرة من وفاتهم وهما على فراش المرض عمن قام بالعمليه وأكدا لى دون تردد بأن الفاعل غير معروف وكان يبدو جلياً أن أمر ماجرى فى بيت الضيافه وداخل القصر الجمهورى قُصد منه التخلص من كل من شارك نميرى فى قيام مايو 69 تحسباً لعدم تكرار يوليو 71
    نميرى خرج من القصر الجمهورى هارباً من البوابه الغربيه بجلبابه تاركاً زملائه من مجموعة الرواد تحت حراسة رقيب شلكاوى هائمين على وجوههم بحديقة القصر لا يدرى ماذا يفعل بهم
    شاهد ماحدث عياناً بياناً القومندان فاروق هلال شقيق اللواء طبيب بالمعاش هاشم هلال اخصائى الاطفال وقائد مستشفى الاطفال العسكرى سابقاً وكان برفقة الخضرجى بُر من مبنى المتحف الطبيعى والرائد فاروق عكود
    شاركت قوات مهام خاصه من مصر بمشاركة عملاء المخابرات المصريه فى المدرعات والمظلات وبأمر السادات فى العمليتين تهريب نميرى وبيت الضيافه وهذا ليس بالأمر الغريب ولم تتوقف اعدامات الشجرة إلا بزيارة يونس موفد القذافى من ليبيا
                   |Articles |News |مقالات |بيانات

12-06-2012, 04:47 PM

A/Magid Bob
<aA/Magid Bob
تاريخ التسجيل: 23-04-2005
مجموع المشاركات: 224

للتواصل معنا

FaceBook
تويتر Twitter
YouTube


Re: حوار الدكتور عبدالماجد بوب والقاضي الدكتور حسن علوب (1) (Re: sourketti)

    العزيز سوركتى،
    الحمد لله تهيأت الفرصة الان لتحيتك وشكرك على جهودك التى تواصلت لأمد طويل. ومامن شك فى أنك مهموم بما حدث فى بيت الضيافة ولك أياد على رهط من الباحثين فى هذا واحد من أخطر أحداث السياسة السودانية. وأنا لا أملك الان ما اضيفه للمعلومات التى تفضلت بها، وسوف أسعى للاستفادة منها. وفيما يبدو أن الفصل الاخير فى ما يتعلف بانقلاب يوليو ومذبحة بيت الضيافة لم يكتب بعد. والامر يحتاج الى تضافر جهود عديدة فى هذا الصدد وأنا أثق بأنك من اقدر الباحثين على فض الطلاسم التى أحاطت بما حدث فى بيت الضيافة.

    وبالمناسبة من بين الأسباب الرئيسية التى حملتنى على الاسراع بمقابلة القاضى الدكتور حسن علوب هو اطلاعه على وثيقتين على قدر من الاهمية لكل من يسعى للاحاطة بالمقدمات والتداعيات الى أسدلت الستار على انقلاب 19 يوليو 1971:
    أ. التحقق من صدق authenticity الجزء المنسوخ بخط اليد كجزء من تقرير لجنة القاضى علوب حول 19 يوليو
    ب. اطلاع القاضى الدكتور حسن علوب على الوثيقة التى استند عليها اللواء (أمن) فى شهادته عبر برنامج تلفويونى للطاهر ح. التوم

    فبينما أكد القاضى الدكتور حسن علوب سلامة وصحة الجزء المنسوخ بخط اليد باعتباره مطابقاً للتقرير الذى أعدته لجنة التحقيق برئاسته.
    وفى المقابل نفى القاضى الجليل أى صلة له من قريب أو بعيد بما يسمى ‘تقرير تنفيذى executive summary‘ الذى أستند عليه اللواء عثمان السيد فى شهادته عبر برنامج ‘مراجعات‘ ووصفه بأنه استعارة غير مشروعة لخطاب منه موجه الى السيد أسد شيبون - سكرتير شئون مجلس الوزراء أنذاك (1971) فى شأن اخر، جرى الصاقه بعمل ‘مونتاج‘ مفضوح. وتم تجميعه بعد عملية وصفها القاضى الدكتور حسن علوب بأنها عبارة عن عملية ‘تزوير forgery
    أ
    رجو أن تواصل جهدك القيم لاجلاء الحقائق حول انقلاب 19 يوليو وتداعياته. ولك تقديرى ومحبتى..
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de