بعض من ملامح العرس الوئيد "يوميات العصيان الأول...
إلى شباب ثورة العصيان المدني: الحرية لا تقبل المساومة!
منبر التجانى الطيب للحوار بواشنطن يقيم ندوة بعنوان الازمة السودانية و افاق التغيير يتحدث فيها على الكنين
العصيان المدني...... تجميع فيديوهات للتوثيق ومزيد من النشر
19 ديسمبر .. إني أرى شعباً يثور !!
صدور... الهلوسة
منتديات سودانيزاونلاين    تحديث الصفحة    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 12-07-2016, 04:21 PM الصفحة الرئيسية

مكتبة حمور زيادة(حمور زيادة)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

يصل الى يد الاخ/سفيان نابرى. يجده بخير

02-24-2009, 01:08 PM

حمور زيادة
<aحمور زيادة
تاريخ التسجيل: 03-28-2007
مجموع المشاركات: 12116

للتواصل معنا

FaceBook
تويتر Twitter
YouTube

كيف احذف مداخلة من بوستى
يصل الى يد الاخ/سفيان نابرى. يجده بخير

    صاحبي سفيان..
    استلمت جوابك الرسلتو لي. ما تتخيل فرحت قدر شنو. من زمن طويل ما جاني جواب.
    لاقيت سحر اون لاين و كنت بنطط .. حكيت ليها و انا سعيد جدا. قلت ليها سفيان رسل لي جواب.
    قالت لي سفيان زول جميل.
    ياخ ده كان اجمل تعليق ممكن يتقال لي على فرحة الجواب. شفت البت دي كيف اختصرت كل الحاجات في ضربة واحده ؟ سفيان زولج جميل عشان كده لازم يرسل جواب.
    الجوابات فيها طعم زمان. و انت عارف اني بحب طعم زمان. مرات بخاف اموت بتسمم ذوقي من شدة اعجابي بزمان. تفتكر ممكن الزول تعجبوا حاجه صلاحيتا منتهية تقوم تعمل ليو تسمم ؟


    تعريف المثقف الرسلتو لي جميل .. "هو ذلك الانسان الذي يفقد طمأنينته من أجل طمأنينه الاخرين " .. لكن يا سوفي مرات بحس انو التعريفات دي بتحمل نرجسية صاحبا .. غالبا الناس في الحاجات دي بتكون بتعبر عن نفسها .. عشان كده في واحد بيعتبر المثقف مفروض يكون اناني و واحد بيشوفو مفروض يكون عايش للاخر .. و كل واحد بيحكم من حتتو.
    شخصيا بقيت اخاف من حتة المثقف الاصطلاحي المعروف للناس اليومين دي .. بقرب ارفع يدي و اقول اللهم احمني من الثقافة .. لكن برجع اقول احتمال اكون بدعي على روحي .. غايتو في الاخر اظني حاموت على دين العجائز .. لانو العبء تقيل يا سوفي.

    ليه خايف من بكره يا سوفي ؟
    ما تخاف.. ابشرك انو بكره اسوأ .. ده يقين .. عيش بيو .. اسوأ الاشياء لم يحدث بعد .. و الخبر السئ لم تسمعه حتى الان.
    انه عالم قذر هذا الذي نعيشه يا صاحبي.
    عشان كده حاولت ابعد من نهر النار البيخوضوهو الناس ده .. هل دي النرجسية القلتها لي في جوابك ؟
    ما عارف.
    لكني زحيت من النهر .. قعدت تحت شجرة .. و ماسك ورقة و قلم .. عاوز احاول اوصف حال الناس .. العايم و المحروق و العاوز يبني كوبري و اليائس قاعد على جمبه و بيبكي.
    ده جبن ؟
    ما عارف.
    انا بحيرتي دي لو قلت لي عرف المثقف حاقول ليك : هو المحتار الذي يطلب يقين في شئ لا يدريه.
    دم بخير يا صاحبي و تقبل شوقي.

    حمور زيادة
    24 فبراير 2009
    الحلفايا
                   |Articles |News |مقالات |بيانات

02-24-2009, 01:11 PM

haroon diyab
<aharoon diyab
تاريخ التسجيل: 06-20-2007
مجموع المشاركات: 23178

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: يصل الى يد الاخ/سفيان نابرى. يجده بخير (Re: حمور زيادة)

    حمور

    Quote: دم بخير يا صاحبي و تقبل شوقي.


    ومثلها لك مني

    مودتي
                   |Articles |News |مقالات |بيانات

02-24-2009, 02:24 PM

سفيان بشير نابرى
<aسفيان بشير نابرى
تاريخ التسجيل: 09-01-2004
مجموع المشاركات: 7675

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: يصل الى يد الاخ/سفيان نابرى. يجده بخير (Re: حمور زيادة)

    Quote: صاحبي سفيان..
    استلمت جوابك الرسلتو لي. ما تتخيل فرحت قدر شنو. من زمن طويل ما جاني جواب.
    لاقيت سحر اون لاين و كنت بنطط .. حكيت ليها و انا سعيد جدا. قلت ليها سفيان رسل لي جواب.
    قالت لي سفيان زول جميل.
    ياخ ده كان اجمل تعليق ممكن يتقال لي على فرحة الجواب. شفت البت دي كيف اختصرت كل الحاجات في ضربة واحده ؟ سفيان زولج جميل عشان كده لازم يرسل جواب.
    الجوابات فيها طعم زمان. و انت عارف اني بحب طعم زمان. مرات بخاف اموت بتسمم ذوقي من شدة اعجابي بزمان. تفتكر ممكن الزول تعجبوا حاجه صلاحيتا منتهية تقوم تعمل ليو تسمم ؟


    تعريف المثقف الرسلتو لي جميل .. "هو ذلك الانسان الذي يفقد طمأنينته من أجل طمأنينه الاخرين " .. لكن يا سوفي مرات بحس انو التعريفات دي بتحمل نرجسية صاحبا .. غالبا الناس في الحاجات دي بتكون بتعبر عن نفسها .. عشان كده في واحد بيعتبر المثقف مفروض يكون اناني و واحد بيشوفو مفروض يكون عايش للاخر .. و كل واحد بيحكم من حتتو.
    شخصيا بقيت اخاف من حتة المثقف الاصطلاحي المعروف للناس اليومين دي .. بقرب ارفع يدي و اقول اللهم احمني من الثقافة .. لكن برجع اقول احتمال اكون بدعي على روحي .. غايتو في الاخر اظني حاموت على دين العجائز .. لانو العبء تقيل يا سوفي.

    ليه خايف من بكره يا سوفي ؟
    ما تخاف.. ابشرك انو بكره اسوأ .. ده يقين .. عيش بيو .. اسوأ الاشياء لم يحدث بعد .. و الخبر السئ لم تسمعه حتى الان.
    انه عالم قذر هذا الذي نعيشه يا صاحبي.
    عشان كده حاولت ابعد من نهر النار البيخوضوهو الناس ده .. هل دي النرجسية القلتها لي في جوابك ؟
    ما عارف.
    لكني زحيت من النهر .. قعدت تحت شجرة .. و ماسك ورقة و قلم .. عاوز احاول اوصف حال الناس .. العايم و المحروق و العاوز يبني كوبري و اليائس قاعد على جمبه و بيبكي.
    ده جبن ؟
    ما عارف.
    انا بحيرتي دي لو قلت لي عرف المثقف حاقول ليك : هو المحتار الذي يطلب يقين في شئ لا يدريه.
    دم بخير يا صاحبي و تقبل شوقي.

    حمور زيادة
    24 فبراير 2009
    الحلفايا


    اما قبل
    لك مني ما تعرفه من مقام الروح في حضرة الاصحاب
    أما بعد
    أنا حقاً اكثر ما يسعدني هو كتابة رسالة لي صديق شرط أن يكون القلم هو (بِك) كما أني لي فلسفتي الخاصة (من حق إي أنسان أن يتفلسف) بأن من يضغط علي القلم حتي يظهر لونه الازرق ازرق لامع ويخرج ريحة الحبر عادةً يوصل احساسه ومشاعره من تلك الرسالة ( أحساس ومشاعر بالله شوف ده كلام ملتبث زملتمس كيف؟) لذا أنا اضغط وربما ذات الضغط يحمل مكنون مافيه نحن من (من جيل) تقطعت به السبل فصار يتعامل مع كل شي بشدة تنبئ عن وقوفنا في هذا المفترق العظيم الذي لم نهئي له سوى سودانيتنا الهشة التى لا بطحاء هويّة قطعة ولا ولا غابتها !
    الرسائل يا صاحبي كما تعرف وهي آدب عظيم شغلت به حين من الدهر وأنت تعلم أن الاديان هي أم الرسائل لذا مهما تعاظم الزمان وتقدم لا أجده يتجاسر علي هذه الرسائل ولك في ما بين (سميح القاسم ودرويش - الذي لا تحب) نموذج وإي نموذج ...
    اذكر ولعي وأنا صغير بكتابته ربما سرقت امر حب الكتابة من والدتي والتي هي من عشاق الكتابة لكنها خجولة تحتفظ بها لنفسها ، كنت كثيرا ما اضبتها تكتب الشعر والخواطر في اوراق وفي كثير من الاحيان تكتبه علي (ضِلف) الدولاب الخشبي أذكر جيداً ولعها هذا لدرجة أنها في بعض الاحيان تكتب علي خشب الدولاب بقلم (الحواجب) ربما بعد أن كبرت أو الأن تحديداً اعلم لما هي لم تنتظر حتي لتاتي بقلم حقيقي ! فهل يا ترى أني اضعت كاتبة؟!
    من ضمن ذاكرة حبي للجوابات هو حصة الانشاء في الابتدائية تلك المادة التى كنت احبها جداً فالاستاذ لا يحول بينك وبين الورقة إلا بتحديد موضوع الكتابة وهذا التحديد هو ما كنت اكره فلذا رغم حبي لهذه المادة لم أنجي من توبيخ أساتذتي لاني عادةً لا التزم بالموضوع وأتفرع منه لموضوع أخر (فيتمحن) الاستاذ ويزجرني موبخاً .
    نوع واحد ومحدد من الجوابات كرهتها وهو جواب التعزية فحين ينادينى والدى لاسطر له جواب تعزية كنت اتزمر (واطنطن) وكل ما افعله هو أن استمع له واكتب ما اقوله ولو أني وجدت طريقة أن لا اسطره لفعلت ونجوت بروحي .
    نعم يا صديقي الجوابات لها طعم زمان (بالجد) والدليل هو غيابها في هذا الزمن وكتير من حاجات زمان ليها سطوته حتي هذا الزمن الجديد ولا يمكن التخلي عنها وفي حاجات كتيرة متعافية في الزمن القديم .

    المثقف وتعريفاته (فعلاً كلام يوجع القلب بس مافي فكك منو) كتيره وكتيره جداً بس تعريف (بيار) ده من التعريفات المبسطة والعجبتني أنا بشكل شخصي (عرفني عليهو ابكر ادم اسماعيل زمااان) وايوة كتير من التعريفات والمقولات الفلسفية بتحمل نرجسية وانانية (زى ما قالوا كتيرين) بس مرات كتير بفتكر أنو القالوا بتحمل ( نرجسية وانانية ديل ) ده موقف منهم زيهم زى لما الكاتب يتحدث عن الناقد باعتباره يأكل من مائدته ولهذا السبب أنا بشكل مباشر باخد التعريف البيتوافق معاي وبفهموا ويدلني علي المسير والمصير المفروض أني أمشيهو في حياتي ربما هو تقليل مخل بالمسألة ومبسط ليها بس بيقني عن تهافت أسئلة لن تتوقف ومكرورة ولم توجد لها أجابات وأنا زي ما عارف آمل البديهيات والاسئلة المكرورة يا صاحبي وفي النهاية زي ما قلته انت كل واحد بيحكم من حتتو فليه يا صاحبي هم يحكموا ونحنا لا ؟!
    دين العجائز أذا مقصود بيهو الموروث الجميل والمفيد كماضي نقرأ به الحاضر لنستلهم به المستقبل فاكيد الموت عليهو محمدة بس للاسف أنا سفيان ده عندي شكك في حاجات كتيرة في دين العجائز ده (كماضي سودانيين) وده كلام كتير جداً طبعاً بس اختصاروا أنو مايسمي بالدولة السودانية الحديثة دي ماضيها الانساني ما مبني علي بنية ثقافية سودانية واحدة أسست لينا بما يعرف بالثقافة السودانية الموحدة من خلال التعايش والتداخل لمجموع الشعوب السودانية بل ستجد أنه (ماضي عجائزى) يمثل نوع واحد من انواع الشعوب السودانية وبي كدا ما بتقدر تقول (ماضي عجائزى) سوداني بل الصحيح (ماضي عجائزى) يخص شعب واحد من شعوب السودان ... شفته الشِبكة دي؟!

    الخوف من بكرة ...
    تعرف يا صاحبي أنا كسوداني خوفي من بكرة لانو ببساطة استعدادي كسوداني لي بكرة ضعيف وضعيف جداً لكن برضو رهاني علي التغيير مستمر والسعي ليهو مستمر .
    و
    Quote: هو المحتار الذي يطلب يقين في شئ لا يدريه.



    تعريفك الفوق ده أنا معاك فيهو بس اضيف ليهو يطلب يقين له ولمجتمعه لانو المثقف
    اصلاً ما منبت ودائماً الحيرة التي تعتريه بتكون حيرة جمعية وليس فردية .


    سفيان نابرى
    24/2/2009
    حلمية الزيتون
    القاهرة .
                   |Articles |News |مقالات |بيانات

02-24-2009, 02:40 PM

حمور زيادة
<aحمور زيادة
تاريخ التسجيل: 03-28-2007
مجموع المشاركات: 12116

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: يصل الى يد الاخ/سفيان نابرى. يجده بخير (Re: سفيان بشير نابرى)

    Quote: مودتي


    هارون دياب
    شغلني ويست ضحية في البوست الاخر فلم ار مداخلتك الا الان
    انت ممن اشتاق اليهم بظهر الغيب و اتمنى لقياهم
    لي في الدوحة اهل كثيرون ربما ازورهم يوما فنلتقي في ظلالها
    او يرفع الله قدمك الى الخرطوم فنحتفي بك كالعادة في قندهار
    ربما لا تذكر لكني احمل لك ود انك من اوائل من تداخلوا معي في بوست انت و عوض المسلمي و سلمى الشيخ سلامة ..
    كنت بعد حدثا غضا في البورد
    فعاملتموني بحفاوة الصاحب و الزميل فازلتم عني وحشة الجديد الغريب
    لك شكري
                   |Articles |News |مقالات |بيانات

02-24-2009, 03:07 PM

حمور زيادة
<aحمور زيادة
تاريخ التسجيل: 03-28-2007
مجموع المشاركات: 12116

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: يصل الى يد الاخ/سفيان نابرى. يجده بخير (Re: حمور زيادة)

    صاحبي سفيان ..
    قريت جوابك الاسفيري حته حته .. و ضحكت من الاستغراب .. تعرف ليه ؟ لأنو فيو الشي الدايما بقولو انو السودان كان بيطلع اجيال متشابهه فجأة حصل شي ما معروف في لحظة ما معروفة فحصل تنوع غريب .. تنوع تضاد عديل يا صاحبي.
    نفس الذكريات و عشق قلم الحبر المضغوط و تحديد الحرف و تسويدو .. وريحة البك لازم تمرق و تعبي الجواب .. و الام المهتمه بالكتابة لكن بتعتبرا خطيئة او تقصير في حق امومتا و واجباتا فبتتنازل عنها طوعا الا في لحظة اشبه بالغيبوبة فتمارسا.
    امي كانت بتكتب شعر و قصة و بدت النشر عن طريق الاذاعة .. فجأة قررت تقيف .. لكن لما تفيق من حاضرا بغيبوبة الابداع (اتخيل زول يفوق بالغيبوبة) بتكتب شعر غنائي جميل و تسجلو بصوتا في شريط ابيض و تدسو في الدولاب.

    لكن انا كنت بحب اتلقى الجوابات اكتر من اني اكتبا .. اتخيل انا طفل في الابتدائي كنت برسم مجلة قصص مصورة كاملة اسبوعيا و اعمل ليها سناريو و قصة لكن كنت بعجز عن كتابة جواب .. كانت حاجه صعبة شديد بالنسبة لي .. عدد الجوابات الكتبتها في حياتي ما اكتر من عشرين جواب ضروريات .. في اخر فترة كتابة الجوابات اكتشفت مشكلتي مع الكتابة دي .. كنت زي بطل ماركيز في الحب في زمن الكوليرا البيكتب الخطابات الرسمية بلغة رسائل العشاق (الكتاب اتعمل فيلم كلو جنس و عري حضرتو ؟ تشويه غريب رغم انو رسم الجو لكن ما رسم الشخصيات) اها انا كنت بكتب الجوابات بلغة الروايات .. في مره رسلت لامي جواب من الشمالية بحكي فيو عن اخباري .. لقيتو اتحول لرواية من سبعة و عشرين صفحة وصفت فيو وفاة واحدة قريبتي و الجنازة و حزن الناس و حال اولادا .. ما كنت بقدر افصل .. تفتكر اكون اخوك موهوب و ما كان مدي الموهبة حقها فكانت بتطلع باي خرم قلم على ورقة تلقاو ؟

    زمان قريت للعقاد كلمة بيعيب بيها الفلاسفة .. انا طبعا بحب العقاد ده شديد .. قال انهم بيجعلوا اوجاعم الخاصة مشاكل عامة للبشرية .. عاين زي نبتشه و فلسفتو .. شوف حياتو و شوف شخصيتو حتلقى انو عادي يحاول يصل لنظرية الانسان السوبر مان .. عاين شوبنهور المتشائم و شخصيتو و بلاويهو ..
    افتكر دي هي نرجسية المثقف او المبدع عموما .. انو يعتبر العالم امتداد ليو .. و البينفع معاو هو ما ينفع مع كل العالم .. العقاد زاتو ما نجا من الحتة دي .. قال انو الفي عقلو هو ما في عقل الله لانو ده المنطق السليم .. انيس منصور لمن وصف الناس الكتبو عن النبي صلى الله عليه و سلم قال انو واحد مشى خلف الرسول يسجل خطواتو و واحد مشى جمبو يحلل خطواتو بينما العقاد مشى قدامو يوصف ليو. اتخيل.

    امبارح كنت مع طارق الامين(ألزول ده جميل شديد) و كنا بتكلم عن الابداع و المبدعين .. قال انو بيتخيل الابداع دا بيجي من وادي عبقر و ليو اكتر من باب .. كل زول بيخش بالباب البيقدر عليو و بيناسبو .. تفتكر ممكن المثقف يكون كده برضو ؟ الثقافة ليها اكتر من باب و كل واحد بيخشها بالباب البيناسبو وبيقدر عليو ؟
    لو امنا بكده ما حنقول من ضروريات المثقف انو يكون و يكون. ما حيكون في ضروريات .. حيكون في اشكال للمثقف بعدد المثقفين.

    دين العجايز اجمل ما فيو اليقين يا ود نابري
    اليقين يا سوفي
    في رحلة الحياة قد يكون العذاب جميل و بيطلع من جواك حاجات حلوه .. و كمان جاذب للنساء ما تنسى .. المثقف المعذب الحائر ده جميل شديد .. مافي انثى بتقاومو .. لكن لحظة نهاية الرحلة .. لمن تشخص .. اتخيل لي اليقين مهم .. لو ما شايل معاك تأشيرة اليقين العبور بيكون صعب.
    اليقين يا سفيان اليقين.

    حمور زيادة
    24 فبراير 2009
    الحلفايا
                   |Articles |News |مقالات |بيانات

[رد على الموضوع] صفحة 1 „‰ 1:   <<  1  >>

· دخول · ابحث · ملفك ·

اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia
فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de