|
|
 يا طارق الامين الحصل شنو لم نتعود فى بيت الفنون على هذا الملل ؟؟!!
|
منذ ثلاثة ايام وانا احاول ان ارسم فى مخيلتى صورة لبرنامج تأبين فقيد الوطن وفقيد الكلمة وفقيد الغلابة محمد حسن سالم حميد
ومع محاولاتى الفاشلة لرسم صورة التأبين الذى كان محدد له يوم الجمعة فى بيت الفنون وفى حوش المبدع طارق الامين تنهدت
وقلت بينى وبين نفسى حايكون رائع بالتأكيد وحلمت فى حينها اننى ساستمع الى نورا وعم عبد الرحيم وغيرها من تلك الروائع التى عاشت فى دواخلنا
ومازالت تعيش
تحركت فى المساء على عجل ووصلت بيت الفنون واخذت مكانى وانا متشوق لامسية استثنائية ووجدت كمية من رجال شرطة المرور بالزى الرسمى
وتعجبت لكن علمت من احدهم ان هذا التابين فيه حنك بمناسبة اسبوع المرور وتنوير للحضور عن الحوادث خصوصا ان شاعرنا المخضرم
حميد رحل نتيجة حادث مؤسف ---قلت بينى وبين نفسى موضوع المرور ده كان بالغ حاياخد ليه تلت ساعة بالكتير بعدها ساستمتع باشعار حميد وبمداخلات
القدال الشعرية الذى كان حضورا انيقا للامسية لكننى اتصدمته عديل كده واظن ان صدمتى هذه كانت مشابهة لحوادث السير التى تحدث فى شوارعنا
الوهمية والتى لايوجد فيه اى اعتبار لسلامة المواطن -
سبب صدمتى والتى جعلتنى انزف من الداخل ان الامسية تحولت بقدرة قادر الى محاضرة طويلة عن المرور مش كده وبس جابت
ليها كمان مدير المرور بولاية الخرطوم واتكلم ساعه وعمل مؤتمر صحفى عديل وانا مابين مصدق ومكذب لكن قلت بينى وبين نفسى اصبر
يمكن الجاى احلى وخلينا نظن خير لكننى مع مرور الوقت شقيت بحسن ظنى خصوصا ان سعادة اللواء قلع الكاب حقو واخدت راحتو على الاخر وحينها غادر عدد مقدر
من المصدومين الامسية وجلست انا اترقب القادم لكن جابت ليها كمان مدير نيابة المرور وامن المجتمع وقعد جنب سعادة اللواء والله لمن قدم نفسو
وقال انا مدير نيابة المرور القاعدين جنبى اتململوا ولمن كمان قال ومعاها نيابة امن المجتمع فى اربعه جنبى طوالى طلعوا وهم يصدرون همهمات تنم عن عدم الرضاء
والاستياء وطبعا قعد يتكلم برضو
يا جماعة لكم ان تتخيلوا ان شاعرنا حميد فى امسيه تخليد لذكراه جات سيرتو مرات بسيطه واستحملنا المؤتمر الصحفى الطويل والممل الذى عقد ببيت الفنون فى
امسية هى فى الاصل للراحل حميد بعدها امسك المبدع طارق الامين بالمايك ليقدم لنا الفنان امير حلفا انا قلت تانى بينى وبين نفسى خلاص يامدثر صبرته ونلته لاننى تخيلت
ان امير اقل شى حايغنى لينا (ياعونك لم تبسم) لكن اغنية امير حلفا كانت عن السلامة المرورية برضو حينها لم يسعفنى الصبر على التحمل وغادرت الامسية وانا تقريبا
شبه منهار وعندما التفت وجدت العشرات قد غادروا اماكنهم .
انا مافاهم ده تأبين ولا احتفال بالمرور ولا شنو بالضبط يمكن اكون غلطان !! حتى لو كان هدف القائميين على الامسية الربط بين حادث السير الذى راح ضحيته حميد وبين
تخليد ذكراه فقد فشلوا فى تنظيم الامسية والمحافظة على توازنها وراح ضحية ذلك الحضور الكبير الذى تسلل هاربا من ملل تلك الامسية التى لاتشبه شاعرنا العظيم حميد
|
|
 
|
|
|
|
مدثر قرجاج
فيس بوك
تويتر
انستقرام
يوتيوب
بنتيريست