في بداية قيام انقلاب الإنقاذ 1989 كانت هنالك العديد من الأشياء التحفة التي زخر بها إعلام الانقلابيين ومن ذلك:
رسمة كانت تتكرر في تلفزيون السودان لمواطن أصلع يشبه عمك تنقو وكان ماشي على هاوية ولكن في يد قوية تخينة مسكته لدرجة إنو المواطن نطط عيونو واتلفت وراهو في هلع، وكان مكتوب في الرسم: أخي المواطن: الثورة أنقذتك من الهاوية ^_______^ يخيل لي الجماعة ديل لو كانوا خلونا وقعنا في الهاوية دي كان أخير
من التحف كذلك: الفرقة الغنائية العسكرية الكان بيجيبوها ترطن بعد نشرة الساعة 9 بكلام الطير في الباقير، أنا لي هسي ما عارفهم كانوا بقولوا شنو وبي ياتو لغة، بالله يا جماعة المتخصص في لهجات أهل السودن أو في جلالات ناس الجيش يكلمنا، لكن من ضمن ما كانوا يبدأون به:
يا هوووووي يا امبردوا ... تم ترمم تررم تم تم ترم بعد داك يقولوا: مليان مليان غزيتو السونكي ركب بي بيتو السونكي ركب غزيتو السونكي ركب بي بيتو
وتاني: أنا ماشي نيالا أو أو أنا ماني ########ا أو أو عمتي مريم كجينة مريم كجينة ^___^ (( أنا ما عارف عمتو مريم كجينة دي الدخلها شنو في جهاز إعلامي يخاطب كل الشعب السوداني؟))
وتاني: أم قيردون الحاجة كل سنة داجة وللا قاجة ما عارف
وكان الجماعة ديل شايلين سلاحهم ورافعنو فوق في إرهاب واضح للشعب السوداني وقتها يعني أي شنكبة عنكبة حنضرب في المليان
بالله عليكم التحف الزي دي الزول لو دايرها يلقاها في ياتو متحف؟
ده كلو كوم وعنتريات رامبو كوم ونهيرات يونس محمود كوم تاني
نواصل بإذن الله
04-08-2012, 09:55 AM
محمد جلال عبدالله
محمد جلال عبدالله
تاريخ التسجيل: 06-24-2011
مجموع المشاركات: 4552
أما رامبو داك ( يوسف عبد الفتاح ) فحاجة تانية خالص كان نايب المعتمد زمان ولمن العيد قرب قال ليك دايرين يضبطوا قصة إنو في بعض سواقين الحافلات وأصحاب المخابز والدكاكين بيقفلوا محلاتهم أيام عطلة العيد وبالتالي فهم طابور خامس دايرين يؤلبوا الناس على الإنقاذ
فأصدر يوسف عبد الفتاح البيان التالي: وكان في نهايته: فمن أراد أن تثكله امه ويرمل زوجته وييتم أولاده فليغلق متجره أو يخفي عربته أو يعطل مخبزه!! بالله ده كلام ده؟ يعني الشعب السوداني كفار قريش وسعادته عمر بن الخطاب ^___^
ياخ رامبو ده أيام عيد الضحية كان بجي نازل من الهليكوبتر بالرشاش ويقول لي بتاع الخرفان: تبيع بي كده!!! ولذلك لقب برامبو عشان كده لمن علمت معاهو مجلة الملتقى لقاء قال: ليس رامبو ولكن عمر بن الخطاب .. صدقتك لاكين ^___^ عمر بن الخطاب رضي الله عنه كان حيضرب قروش المدينة الرياضية؟؟ يمكن ما تقوم مدينة رياضية لكن بالتأكيد لن يضرب القروش
بالمناسبة المعتمد محمد عثمان محمد سعيد الزول ده كان ضعيف خالص ورامبو كان مغطي عليهو الزول ده اختفى كلو كلو من الحكومة من نص التسعينات
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة