كلمات لطفل امريكي من اصول سودانية نشأ في المجتمعات المختلطة( هنا في امريكا) و عرف الفرق بينه و بين رعايا الدول العربية مصر سوريا لبنان الجزائر
عرف لونه و عرف قرابة هذا اللون للافارقة من القارة الام اثيوبيا و الصومال و غرب افريقيا هذاالطفل لا يعرف اوهام الطيب مصطفي عن اصوله لكنه عندما يكتشف سيضحك علي غباوة الطيب مصطفي
04-04-2012, 03:30 AM
Mohamed Yassin Khalifa Mohamed Yassin Khalifa
تاريخ التسجيل: 01-14-2008
مجموع المشاركات: 6316
واللغة السودانية هي التي جمعتنا في بلد مترامي الأطراف متعدد الثقافات تحت الهوية السودانية. وإن كان عندنا بعض العرب.. إلا أننا (حتماً) لسنا بعرب. ففينا النوبي والبجاوي والعربي والفوري والمسيري... وفينا الهجين.
الإدعاء بعروبة السودان خطأ مقصود منه فرض ثقافة واحدة أتتنا قريباً.
04-04-2012, 04:03 AM
طه جعفر طه جعفر
تاريخ التسجيل: 09-14-2009
مجموع المشاركات: 7328
واللغة السودانية هي التي جمعتنا في بلد مترامي الأطراف متعدد الثقافات تحت الهوية السودانية. وإن كان عندنا بعض العرب.. إلا أننا (حتماً) لسنا بعرب. ففينا النوبي والبجاوي والعربي والفوري والمسيري... وفينا الهجين.
الإدعاء بعروبة السودان خطأ مقصود منه فرض ثقافة واحدة أتتنا قريباً.
الاستاذ يس سلامات و شكر جزيل اسمح ان اختلف معك لا توجد لغة اسمها السودانية هنالك لغة عربية و هي اللغة الرسمية للدولة نحن نتحدث احد صورها او لهجاتها و العديد من السودانيين لهم لغات اولي غير العربية مثل لغات الفور لغات البجا لغات دافور عموما ( زاقاوا،داجو مساليت الخ) لغات في جنوب النيل الازرق ( سركم و فونج) لغات نوبا الجبال و نوبا شمال السودان الطفل المعني في البوست ينحدر من اصول وسط سودانية و التقي بعرب في المهجر فعرف الفرق
نيلنا ازرق و نحنا سود صغيرنا بتهابوا الاسود
كما تغني خلف الله حمد
طه جعفر
04-04-2012, 04:22 AM
Mohamed Yassin Khalifa Mohamed Yassin Khalifa
تاريخ التسجيل: 01-14-2008
مجموع المشاركات: 6316
طيب يا طه.. تعال نتونس شوية أو خلينا نغني مع خلف الله حمد:
"نيلنا ازرق و نحنا سود صغيرنا بتهابوا الاسود"
وخلني بعدها أسعلك: هل ونستنا دي كانت بالعربية؟ ودي لغتنا الماشة في الشارع؟ نحنا يا طه بنتكلم لغتنا السودانية دي.. فهل درسناها في مدارسنا ولا إتعلمناها من الشارع؟ وليه الشارع وكلام الحبوبات يكونو الطريقة الوحيدة البتعلمنا لهجتنا السودانية-العربية؟
وأرجع معاك للغات الإنتا جبتها دي:
Quote: لغات الفور لغات البجا لغات دافور عموما ( زاقاوا،داجو مساليت الخ) لغات في جنوب النيل الازرق ( سركم و فونج) لغات نوبا الجبال و نوبا شمال السودان
Quote: كلمات لطفل امريكي من اصول سودانية نشأ في المجتمعات المختلطة( هنا في امريكا) و عرف الفرق بينه و بين رعايا الدول العربية مصر سوريا لبنان الجزائر
أنا قايل مصدر الكلام دا عن بحث أو دراسة من باحث ولا عالم مشى لفلف في الخلا والقرى والحلال وفتش لمن لقى الحقيقة دي ونشرها وأنت جيت تنورنا يطلع المصدر طفل جاهل لسه ومش طفل ساي طفل أمريكي نشأ بره السودان وما بعرف حتى العربي ما تقول لي سوداني الطفل دا أمريكي 100% لأنو أتربى في السودان كنا قلنا سوداني تصدق برضه كنت قايله أكتشاف من اكتشافات السيد الأديب حامد البدوي بشير
يا سعادة الأديب طه جعفر الخليفة لو أثبت ليك أنو حامد البدوي عربي حا تبلع بوستك دا ولا حا تسوي شنو ؟
برضه قول لي نوت ريلي ارابس
Quote: عرف لونه و عرف قرابة هذا اللون للافارقة من القارة الام اثيوبيا و الصومال و غرب افريقيا
دي مشكلته مشى يقارن لونه بي لون الناس مال العرب في السودان بي مشكلة الولد دا أمريك يمكن يكون أمه وأبوه من سودانين زنوج أو نوبيين أو أي شيئ ويمكن زاتو ما سودانين مشو أمريكا لجوء قالوا نحنا من دارفور الكيزان والعرب جهجهونا وعذبونا أدونا لجوء ، ما علموا أبنهم هو منو وتاريخه شنو ؟ ويمكن أختلط بي أثنيات محدده من السودان ودي مشكلة أهله طيب لو جا السودان لقى ناس لونهم فاتح وشعرهم سبيبي حا يقول شنو ؟
Quote: هذاالطفل لا يعرف اوهام الطيب مصطفي عن اصوله لكنه عندما يكتشف سيضحك علي غباوة الطيب مصطفي
غايتو الطيب مصطفى دا بقى ليكم مراقة أي حاجة تقشوها فيه
هسع الكلام البقولوا الطيب مصطفى علاقته شنو بي هلاويس الشافع دا ولا بس بهارات تتطعم بيها البوست
أتحداك يا طه جعفر تجيب لي من كلام الطيب مصطفى فيه علاقة بالموضوع دا ولا تجيب لي كلام للطيب مصطفى بباهي بي أصله
أنت يا طه جعفر قاعد تزعل لمن الناس تنتقدك وتقول الناس ما تحكم على حاجه ما قروها أنت ما قاعد تقرى للطيب مصطفى ولا عارفه بقول شنو ولا عارفه بكتب وين بس زي الطيره المباريه السيرة تنبذوا في الطيب مصطفى وتصفوه بالعنصري وما قريتو هو قال شنو
أتحداك يا طــه جعفــر تجيب لي كلام فيه مباهاه للطيب مصطفى بي أصله ولا فيه عنصــريه
بعدين أهل الوالد ديل فاشلين في التربية كيف ولد ينشأ في أمريكا يتربى على العقد العنصرية دي
أي واحــد يتوســخ في العنصرية يجي يقشها في الطيب مصطفى
وهل العرب لأزم يكونوا عرب أقحاح هل المصريين عرب ودولتهم أسمها (جمهورية مصر العربية) هل اللبنانين عرب هل العراقيين عرب هل كل مواطني دول الخليج عرب هل كل مواطني دول شمال افريقيا عرب
العروبه خيمه كبيره الداير يدخل ضمنها يدخل والماعايز يتخارج وماشرط العربي يكون نسبه طوالي للعرب ويمكن أي زول بنطق العربية يدعي أنو عربي
خلو الناس في حالهم
أغرب حاجه أي زول بقول أنا زنجي مافي زول بسألوا لكن يجي واحد يقول أنا عربي مليون نفر ينطوا ليه يطلعوه ما عربي يخلوه قاعد في السهله
هسع نحنا برضه ما زنج وما نوبه وما بجه وما أي حاجه نحنا سودانين وقرطوا على كدا وأرحمونا الله يفكك عقدكم
جننوتونا أي واحد ما يعجبه لونه يجي يشبك الناس نحنا ما عرب وهل العرب لونهم أبيض وعيونهم زرق أي واحد شكله ما يعجبه في المرايه يكورك نحنا ما عرب
أي زول معتقد أنو ما عربي يسكت بعد دا ولو سألوه قالوا ليه أنت عربي يقول أنا ما عربي أنا نوبي زنجي بجاوي زغاوي خلي البعتقد أنه عربي يقول أيوه أنا عربي من حقه برضه
مش ناكرين علي عروبتي يلا أنا ناكر ليكم زنجيتكم دي مره واحده
أمشي قول للشافع دا يا طه أنو ما عربي أنو هو زنجي ال(.........)و بتاعين امريكا وجون قرنق وكابيلا قرايبه وكان داير تبقى قريبه بي جازك
السيد ياسين خليفه
Quote: واللغة السودانية هي التي جمعتنا في بلد مترامي الأطراف متعدد الثقافات تحت الهوية السودانية. وإن كان عندنا بعض العرب.. إلا أننا (حتماً) لسنا بعرب. ففينا النوبي والبجاوي والعربي والفوري والمسيري... وفينا الهجين.
تصدق أول مره أقرى ليك كلام مفيد أو قد يكون صحيح
Quote: الإدعاء بعروبة السودان خطأ مقصود منه فرض ثقافة واحدة أتتنا قريباً.
أنتو منو ؟ وهل أنت بتمثلنا نحنا كلنا ؟
بعدين الثقافة الواحده دي كيف أتقبلتوها وهسع أنت قاعد تكتب بيها وتتعاطى بيها ... ويمكن تسترزق بيها ليه ما لفظتوها وحافظتوا على ثقافتكم الأصلية
بعدين الثقافة أتت حديثاً متين كدا أول امبارح مثلا ؟
عن نفسي أنا ما زنجي فيني دماء نوبيه أعتز بيها وكان عندي حبوبات زنوج أنا ما عارفهم ناكرهن حطب وأصلي عربي وجدودي نازحين من منطقة على شواطئ الخليج أسمها جميرا وسودانكم دا ما دايروا رجعوني محل ما نزح أجدادي وطننوني هناك
دا شنو المرض الواقعين فيه كل يوم من الصباح
----------------------------------------------------------------------------------- في النهاية نحول البوست لبروفنا فهو المتخصص الوحيد لهذه الحالات والمفوض من جانبنا
يا صاحب البوست والزملاء والزوار السلام عليكم ورحمة الله وبركاته بهذا الحرف العربي من حق كل سوداني أيا كانت أصوله ودينه وجهته التي منها أقبل أن يعبر عن إرادته وهويته التي يريد ان يقدمها للآخر ، ومن حق الآخرين أيضا أن يعبروا عن ذواتهم وهوياتهم وليس في ذلك تقليل شان او اعتبار فالعرب موجودين في السودان وفي جميع جهاته وكذا النوبة والبجة والفلاته والمساليت والزغاوة وغيرهم وكونهم يتكلمون بلغاتهم الخاصة فليس الأمر مستهجنا ، واعتقد ان إصلاح الدولة سياسيا في المشاركة في صنع القرار هو المدخل الصحيح لهذه الملهاة ، ولو استفتي الناس في الدستور ومسألة الحريات هي أس كل هذه الترهات ..الآن يا طه اتسع الفتق على الرتق فقد تراجع المجتمع كثيرا بسبب نخبه الفاشلة والأسباب واضحة ..فقضيتنا ليس قضية هذا عربي أو إفريقي فقضيتنا أزمة نظام ديموقراطي لمعالجة التعليم ومناهجه والدستور والصحة والبنى التحتية ومواجهة الخدمةالمدنية المترهلة ومعالجة الاقتصاد وووو .وكثر أمثال هذا الطفل الناشيء في أمريكاوالغالب منهم نتاج أزمة ألمت بالبلد وإلا لما خرج الناس من السودان بحثا عن وطن بديل ..عن نفسي ثقافتي عربية ولساني عربي وأكتب بحرف عربي وليس بالضرورة أن يكون دمي عربي فالعروبية ليس نقاء عرقي ( أبيض ، أسود ) ...فالإسلام عالمي المد والعولمة واقتصاد السوق أفرز ( أبيض وأسود). تحياتي
04-09-2012, 12:15 PM
محمد ادم الحسن محمد ادم الحسن
تاريخ التسجيل: 04-22-2009
مجموع المشاركات: 2177
Quote: في أمريكاوالغالب منهم نتاج أزمة ألمت بالبلد وإلا لما خرج الناس من السودان بحثا عن وطن بديل ..عن نفسي ثقافتي عربية ولساني عربي وأكتب بحرف عربي وليس بالضرورة أن يكون دمي عربي فالعروبية ليس نقاء عرقي ( أبيض ، أسود ) ...فالإسلام عالمي المد والعولمة واقتصاد السوق أفرز ( أبيض وأسود).
تحياتي لصاحب البوست وضيوفة...
إستوقفني الكلام المقتبس أعلاه للأخ الحلاوي : أول حاجة خلينا نفكك المصطلحات المخلوطة في الإقتباس عشان نقاشنا يبقي فيه نوع من الموضوعية..
الدين سواءً كان الإسلام أو غيره ، بالتأكيد ليس له علاقة بالهوية التي أشار إليها الأخ هنا بالعرق.. لان الدين معتقد وهو علاقة بين المعتقد (بكسر القاف) والمعتقد فيه (بفتح القاف).
ويقول هو ثقافتو عربية ولسانو عربي ، ويكتب بحرف عربي - ولكن ليس بالضروري أن يكون دمو عربي (ويعرف العروبة أنها ليست نقاء عرقي) ويقفز إلي ربط كلامو بالإسلام..
طيب: أعتقد أن التعبير الصحيح عن نفسك وفق ما جاء في كلامك أعلاه هو أنك كنت شئ آخر ...وتم إعادة تشكيلك (أي تم تعريبك) ثقافةً ولساناً وحرف. إذن : They cahnged & rearranged you وتم تعريف المنتج الجديد داعلي أنه لبلبلبلبلبلبلب الكلام الفوق الإنت قلتو داك.
طيب : معظم ناس أمريكا الجنوبية ديل بتكلموا أسباني ، ثقافة وحرف ,كمان فاتوك بميزة (إنهم بشبهوا الأسبان) - لكن يوم واحد ما شفنا لينا أرجنتيني ولا شيلي ولا نيكاراقوي قال أنا أسباني!!!
التنميط الجديد لهوية السودانيين دايماً بتربط بالإسلام وإنو الرسول عربي : ودا زعم كافي أنو الواحد يفتخر بنسلو العربي.. هذا هراء وإستهبال في رأيي: زول رسلوا الله إنو يوصل رسالة للبشر - علاقة البشر بجنسوا ولا عرقو شنو؟
القهر المارستو الثقافة السائدة الان كان قهر عنيف للغاية ويعرف هنا (بعنف الثقافة المسيطرة) مقابل ثقافة خاضعة اللي هي ثقافتك وثقافتي وثقافة كل الناس؟ لغاية ما تم تشويهها - وحامليها بقوا ضحايا.
زيك وزي شافع أمريكا دا - لانكم الاتنين ضحايا.
04-10-2012, 08:42 AM
عبدالرحمن الحلاوي عبدالرحمن الحلاوي
تاريخ التسجيل: 10-10-2005
مجموع المشاركات: 5714
الأخ محمد آدم الحسن لا يحتاج الموضوع لكل هذه الفلسفة ..دخل العرب في أزمان وظروف مختلفة لإفريقيا الشمالية ولكن أقواها كان مع بدء انتشار الإسلام وهذه مسلمات تاريخية أنت أدرى بها مني ووصل الإسلام لهذه الأرض قبل أن يصبح دولة بهذا التنوع ثم عم مناطق واسعة وقامت دولة سنار ثم جاء الأتراك ووضعت خريطة وسمي دولة السودان ثم ظهرت حكومة وطنية شبه قومية ( المهدية ) وعزز الإنجليز ما بدأه الاتراك بل أبقوا الأمور الإدارية وأضافوا وعدلوا وأوقفوا ..فهذا الشتات لم يخضع لمعاييرك الفلسفية وإنما شتات من شتات وواقعيا لا يمكن أن تبدل مبادي الناس بل يمكن ان تؤثر في أفكارهم نوعا ما ففي نظري السوداني أيا كانت جذوره يستخدم اللغة العربية كوسيلة تخاطب وهي لغة عامة أهل السودان حتى قبائل الجنوب تستخدم عربي جوبا ..لكن من الخطل تقسيم شعوب السودان على أساس النقاء العرقي ( عربي - إفريقي ) فالعامل النفسي المشترك بين السودانيين هو الثقافة السودانية وهي ثقافة يغلب عليها المزاج السوداني .فلو أني كنت شيئا آخر وتحولت شكل آخر أليس هذا من سنن التغير ..ألم يحدث ذلك في أمريكا من هنود حمر إلى أجناس متداخلة ومتنوعة ؟؟؟ كون الرسول عربي لا ينقص من قدره وكونه شرف برسالة عالمية فهذا اختيار رباني لحكمة يعلمها الله لا يحق لي الخوض في إرادته لخلقه ..وأتفق معك أن الدين أوسع وعاء من العروبة التي وقفت عليها برامج أحزاب وبنوا عليها فكرهم !! فالرسول صلى الله عليه وسلم ضد التمييز العنصري وشواهد المواقف كثيرة في ذلك . لكل مجموعة سودانية أن تعبر عن ثقافتها التي تعبر عنها ، يعني الرطاني ممكن يعبر عن حاجاته بلغته وكذا الناطق بالعربية وهذا كما ذكرت سابقا لا يتم إلا في دولة ديموقراطية دستورها يحترم المواطن على أساس الحقوق والواجبات وليس اللون أو العرق أو الدين .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
طه جعفر
Mohamed Yassin Khalifa
عبدالرحمن الحلاوي
محمد ادم الحسن
فيس بوك
تويتر
انستقرام
يوتيوب
بنتيريست