|
كتب الكاتب الفاتح جبرا المتوفرة بمعرض الدوحة
|
|
 Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: أحلام إسماعيل حسن)
|
لو بكاي هماك ولو شقاي اشقاك
ما كنت يوم فارقتنى خاصمتنى.... وعذبتنى .
ياما دربك كنت بفرشو ورد وحنيه واماني
ياما عهدك صنتو وما خنتو وكان ليك حنانى
ياما من ليلى ونهارى ودمعى بنسج لك أغانى
وكل كلمة من غناي فيها من حبك معانى
إن نئيت برجاك
وإن نسيت بطراك
وإن قسيت بهواك
جيت اعاتبك واشتكيلك واشرح الحب من بدايتو
قلبى خاضع ما برافع بس عليك تسمع حكايتو
انت حاكمو وانت مالكو وانت فى إيدك وصايتو
انت لو حكمت قلبك ما اظن ترضى بنهايتو
العهود صونوها
أوعولا تخونوها
دا حرام تنسوها
تبقى جنبي وننسي كل الدنيا نغرق فى الأمانى
واشتكيلك يا حبيبي منك انت ومن زمانى
فى غيابك ياما ليل الغربة بالآلام رمانى
ابقى عينى وابقى روحى وابقى قلبى يا حنانى
يا أمل يا لطفى يا حنية وينك من عيونى
لو تعود وتجينى
القى فيك حنينى
وانسى بيك انينى
ابتسامتك ربيع دنياي ياما عشت فيها
فتحت فى دربى اشواق الليالى البشتهيها
دى السعادة المن زمان بسأل عليها
بكيانى بشبابى بحياتى افتديها
الإله يرعانا
هنا الغرام ضمانا
ونحن ما أحلانا
| |
  
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: أحلام إسماعيل حسن)
|
والطنابير التَرِنْ تحكي الحكاوي
وأنا أغوص في أعماق عوالم اسماعيل حسن السحرية وفى فنه النادر أجد نفسي في كل مرة أمام عمق يغريني إلى أعماق مسحورة لا نهاية لها. عالم سحري عشت فيه طفولتي وقبل ميلادي، فأنا ثمرة من ثمرات عالم اسماعيل المسحور. واليوم تعود بي ذاكرتي إلى ذلك الزمن الأخضر، إلى مزرعة أبى اسماعيل حسن بالباقير، فأذكر تلك الجلسات التي يخصصها اسماعيل لمطربي وشعراء الطنبور. كانوا يجلسون على شكل حلقة واسعة تحت أشجار النخيل والمانغو يتوسطهم أبى اسماعيل. كانت حلقة الطنبور تضم في كل مرة نخبة من مطربي وشعراء الطنبور من الشباب والشيوخ وعشاق الطنبور من أنحاء البلاد. منذ كنت طفلة صغيرة حتى غدوت إلى مقتبل العمر كنت أجلس دائما إلى جوار أبي اسماعيل في حلقة الطنبور واستمع إليه وهو يتلو بصوته العميق قصائده الكثيرة التي كتبها لأغاني الطمبور .. في درب البنات .. يا حليلك يا بلدنا .. الجواب نص المشاهدة .. أبوك تعبان يغزغز في الهواليك .. وغيرها من عشرات القصائد التي يشدو بها الكثير من مطربي الطنبور. كانت أغنيات الطنبور تصل من الراديو إلى أهلنا في كل الربوع والوديان والقرى في الشمال والشرق والجنوب والغرب. عثمان اليمنى وعمي عبد الرحمن عجيب كانا يحضران دائما حلقات الطنبور في مزرعة أبي اسماعيل يترنمون بأصواتهم الندية وأنغام طنابيرهم تعبر النيل الأزرق إلى الضفة الأخرى وتخالط المياه تهبط وتصعد وتموج معها في كل الاتجاهات.
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: حافظ انقابو)
|
العزيز ه احلام...
سيظل الشاعر الضخم الاستاذ اسماعيل حسن ود حد الزين...
ذلك الرافدالذى يسقى الدواخل بترياق ذلك الدفق المستدام..ذلك
الشاعر الفنان الذى مزج فى امتزاج نقى مبدعا كل ذلك المزيج..
الهوى والصبابه والاشواق والحنين والخرير ..مبدعا فى عطاء اغرق.
كل الخلق فى خضم ذلك المد ,,وحملهم على اشرعة ذلك الجمال واوثق
قيودهم الى الحنيه والرقه وسلسبيل الحب الحلم والامنيات...
تمر الاعوام وستظل تلك الرايات التى رفعها الشاعر الفنان ترفرف
على افق المدى تحكى وتشير وتدل على منابع كل ذلك الجمال..
والشاعر الفنان اسماعيل حسن هو اكاديميه لها قامها ومناهجها ونهجها..
وقواميسها ولغتها وابداعها..وهى محور ومدار...
سيظل اسمه مرتفعا مثل هامات تلك الجبال الشوامخ.وسيبقى اثره عطاءا متدفقا..
يروى ظمأ كل انسان فى بلادنا الحبيبه...وستبقى ذكراه تدوزن الزمن والايام
وهو الشاعر الاستاذ .التربال ابن الارض المبدع الفنان...
تحياتنا لك وللاسره الكريمه الفاضلهاااا
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: أحلام إسماعيل حسن)
|
ينتابني إحساس بالعجز كلما رأيت بوستاً يحمل إسماً لقامة من القامات الذين صاغوا وجداننا
أحسني أعجز من أن أوفيهم حقهم
وأحس أن كلماتي أضأل من أن تصف بصدق إحساسي
إسماعيل حسن
أحد تلك الكوكبة
بل فارس من فرسانها
بل هو حاديها
كلماته كانت
بلسماً
سلوى
مظان حكمة
الحساب ولد
لا أظن أن هناك فرد سوداني لم تسهم في صياغة وجدانه إحدى كلمات إسماعين حسن الموزعة بين الفنانين
والحال هكذا يكون تكريم أو تخليد ذكراه هو واجب علينا قبل أن يكون حق له أو لأسرته
جهد المقل وقد حجبتنا الجغرافيا
أن ندعو لها رباً رحيماً أن يرحمه
وأن يسعده أكثر مما أسعدنا
وأن يفرحه أكثر مما فرحنا
وأن يخفف عنه أكثر مما خفف عنا
________
ثم
لك التحايا أختنا أحلام
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: عاطف عمر)
|
لأخ العزيز اسامة كمال الخولي
لك كل التحايا وأنت تعطر المكان بكلماتك المضيئة
مشاركاتك معى تسعدنى كثير
رحم الله إسماعيل حسن ورفيق دربه الأستاذ وردى فلقد جدد رحيله جرح فقدنا للوالد
أرحب بك كثيرا وتقبل تحياتى
يقام بقاعة الصداقة بالخرطوم مساء يوم الإثنين الموافق 9 أبريل 2012
وسيكون هنالك إحتفال آخر مساء يوم الإثنين الموافق 16 أبريل 2012 م بالنادى العائلى بالخرطوم
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: أحلام إسماعيل حسن)
|
الاخت احلام
تحية و تقدير
Quote: رحيل هؤلاء النفر الذين أثروا حياتنا فى ذلك الزمن الجميل ليس بالشىء السهل
فمعهم رحل إحساسنا بحلو الحياة .... لا نملك إلا أن نترحم عليهم
من الصعب أن يجود الزمان بمن يملأ هذا الفراغ الذى تركوه لنا |
و نسأل الله ان يرحمه و يغفر له و يسكنه فسيح جناته
...……………………………………………
Quote:
ريحة التراب
والله يا ريحة التراب .. شديتني للماضي البعيد .. عبر الزمان
في اللا مكان .. عبر البكون .. جوه اللي كان .. مشوار غريب .. حفيان
وطيت جمر أم لهب .. الروح تهيم .. فوق النجوم … والفاني … .. مطمور في التراب
والله يا ريحة التراب
كيفن يكون درب الوصول … لي ساحة ما شقاها زول
من دوني دونك .. ألف باب .. وكم حجاب .. وكم ستور
مندلي يا ريحة التراب … أصلى مليت العذاب
جيتا خايد في الضباب … شوق ليالي الغربة .. في أعماقي داب
الحنين … جوه جوفي … قصة ما شافت كتاب
الصغيرون.. .. بي شقاوة الدنيا يا ..يمه شاب
والله يا ريحة التراب
العطش يبس لهاتى ... جيت أهاتى … جارى … لي موية الرهاب
والله يا ريحة التراب
جيتا تعبان .. داير ارقد داير أنوم
أنسى نفسي … والشقي القاسيتو … في وادي الهموم
داير ألولي النسمة … بي فرحة صغير كره السموم
والله يا ريحة التراب
ريحة التراب. والله يا ريحة التراب … لازم ..أوصل مهما كان
أوعى!!.. ما توصيني كنا وكان زمان .. الزمان
يا أصلى ماليه أمان
ونحن في ساحاته … !!.. زى خيل الرهان
والله يا ريحة التراب … لازم أوصل مهما كان … حتى كان
سدت سواعد الليل .. !!..دروب الكون وما خلت مكان
حتى كان جار القدر …. !!.. شداني في قاع الزمان
مو ضلام الليل بشيلو …. !!.. وبمشي لي فجر الأمان
يا سلاسل القدرة … ما برضي الهوان
بمشي فوق المستحيل …. !!..بقدل وبتبختر كمان
لازم أوصل … لي مشاتل ريدي … في أرض الحُنان
والله يا ريحة التراب
|
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: أحلام إسماعيل حسن)
|
احلام بت ود حد الزين سلام يغشاك ويلقاك والاهل والوطن بصحة و عافية
رحم الله سماعين ود حد الزين ومثل هولاء لايموتون يظلوا خالدين الى يوم الدين
يستدعيهم العشاق والترابله والفقراء كل حين،
سماعين واحد من الذين لونو دواخل السودانيين وبخاصة العشاق
الذين ما انقطع عشمهم يجدون فى المستحيل قشة ليتعلقوا بها ليطوعو الليالى ..
اصحاب الحظوة الذين توجو حبهم يطلبون هدية فيها حرفى وحرفك
الحردانين يرددوا بعد ايه جيت تصالحنى..
الدايرين ينتقموا لذواتهم المكسورة يتغنون اوعى يا قلبى تنسى فى لحظة الوصية
ويهتفون من القلب زى ما ابكى عينى سهر لى عيونو...
المظلومون من المغرر بهن وقد اوصدوا كل باب فى وجه المحبوبة ينشدون بعد ايه جيت تصالحنى.
الفرحون من الهائمين بالعشيقات تشجيهم ياعجو المحس التقيل التقيل فدع العراجين
ووحاة الشامة الفوق خدك نايمه دليل وعلامة!!
والذين يريدون التأكيد لحبيباتهم نبل المقصد وسمو النية يصيحون
مابدل حبو ما اتنكر ليك لكن الاشواك والنار حواليك يا نور العين
المرجفون يوصون خاف من الله على قلبى من غرامك خاف
من باغتهم ريح العشق وتملكهم الهوى يغنون صدفة واجمل صدفة انا يوم لاقيتك
المشوكشون يجدون فى ضيعوك ودروك سلوى
وعند كل هولاء يكون سماعين حاضراً ومتوهجاً
للترابلة والمزارعين انشد سماعين حسن
ومستحيل نرجع وراء لو مصرانا بالجوع انهرى وجوف النيل بقالنا المقبرة مستحيل نرجع وراء
و ايضاً قال من جلدى الرهيف فصلت نعلت الحفايا..
انسان مثل هذا جدير بالاحتفال والاحتفاء وحقيق بالذكرى والتذكر
رحم الله اسماعيل الانسان الفنان وكافاه رحمة بقدر ما اطرب واسعد وقدم لوطنه
احلام كنا سنشهد العرس ولكن اه ثم اه يا زمن النزوح
العشم فى تنزيل بعض ما يقدم هنا فى المنتدى ولك الود المقيم ،،،
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: khaleel)
|
احلام ....... سلام من تانى
جدير ان نرفد البوست بقصيدة الشاعر الفحل ود بادي في رثاء اسماعيل حسن فهى من اصدق ما قيل فى شعر المراثى:
ارمي الدمعة فوق الدمعتين ياعين
بعد الليلة حابسها الدموع لي مين
نزيف الدنيا من حد البلد غربي
ونزيف الدنيا لاحد البلد شرقي
وجوم عامة الليالي العامره
كل الدنيا خاتة الخمسة فوق اتنين
رحيلك وجعة يا سماعين
رحيلك نجعة من دار الفرح والزين
رحيلك طعنة في لهات الحبى دريفين
رحيلك وقفة فوق درب العليك باكين
فيها نهاية المشوار وحد الفرحة والامال
وحد الفال وحد الزين
ارمي الدمعة فوق الدمعتين ياعين
ويعد الليلة حابسها الدموع لمين
بعد نزلت سكاكين القدر
مسنونة ديل فوق ديل
وشربت من بكرينا المعتق
حالتو ياالداسنو من السيل
وياالمحزون وحرابنا متكلات قدامو
فوق مشنكسات الخيل
وياالداخرنو من زمن الحساب
شفعنا رابطين الحجر بالتيل
وفجاءة يجينا من طرف السماء مريسيل
ينعب فوق كلنكاكول غراب هابيل
ويبقي رحيل
رحيل كل الغيوم الهامعة متواسرات
رحيل كل الشهور العامرة بالخيرات
رحيل الطينة من طرف الجزر يومات
رحيل الخضرة قدام منجل الهدام جفاف وممات
رحيل البادية فوق برقا وراء نجيمات
رحيلك مو رحيل أفراد
رحيل اجيال
رحيل بلدا تمام وكمال
يا العرشت فوق نخل السواقي الشال
واتمددت فوق النيل من الشلال وللشلال
وياالهاجرت فوق ريش الرهو رحال
تظل مرسوم علي باب الليالي سؤال
بعد عشعشت في خاطر الغبش موال
واتبللت من الموية بين السعفة والبلال
بعد عرقك برق في ترابنا حد ما شال
واتمددت غادي وجاي يمين وشمال
بعد الحال
منو البقدر يجيب غربال يغربل روحك المدسوسة في الاجيال
وفي نفس الدغش مبثوثة في الشتلة ونداها السال
بعد الحال
منو البقدر يطاول حرفك المعقود
علي برقا حرير وهلال
مسطر فوق رقاب البرد
فوق الصخرة والتمثال
بعد الحال
رحيلك ياالمشرشر في مداخل الدنيا كالاوصال
رحيلك هزه في العقدة
ومجامع الروح كما الزلزال
ارمي الدمعة فوق الدمعتين ياعين
بعد اليلة حابساها الدموع لمين
كتير من شاف ديارو العامرة
هاجت فوق درب وداي
كتير من عدا فوق درباً
بلا يوادع بلا يناشد كبار القوم وياخد راي
كتير ياعين
كتير الغابوا ماحضروا
وكتير الراحوا ما عادوا
وكتير البمشوا منو جاي
الا الناعي
عمرو الناعي ما طاف البلاد من جم
وتبكي طويرة الاحزان سنين وسنين
مصيرة تساسق المسكينة بين الباسا والباساي
ترفرف من سخاي لسخاي
وتسال عن صدور مغسولة بالدوباي
و تنزل فوق حلقات مجالس الشاي
تقول الشيخ وفي الشاشاي
تبل الريق من الدمع البيوشل من ارامل الحي
وتشرق بالرحيح في الردحه و الووب احي
وتمرق من محاري الناس تولول فيها جرس الصي
وتصرخ فايقة ياجلابة اقيفوا لي
وتسعل ضايقة ما شفتوه زولا لي
تضيع فرخاتا في المجهول
ويرحل من دريبا الضي
آه آه ياطويرة الاحزان
آه لو كان تعرفي البي
جرحك انتي صاب الريش
وجرحا لي مسافر في النسيج الحي
دريبي بعيد وحزني فريد
ومما رحل البلبل الغريد
بسرح في عيون الناس
بسـأل ولوسؤالي يفيد
كيف الدنيا تصبح دنيا
والصيد يبقي ياهوالصيد؟
مين يقدر ينضم عقود منقوشة
ترقد في حزوز الجيد
ومين يضفر كلام الريد
كلو جميل مصيرو يجي ومصيرو يفوت بلاتخليد
كتاب الكون يظل مقفول
بلا خاتمة بلا تمهيد
وحتي النيل مصيرو يكون مجرد موية شاقة البيد
منو البيقدر يجيب ليكم خباراتو
رقصة موجو في الشاطئ
رواويسو , حكاياتو
رقاد القمرة جنب النجمة فوق رملا مراياتو
ولما تغيب ينوم النيل موشح بعباياتو
وزي ما النيل يضيع في الدلتا يتلاشي ويموت مشلول
انحنا كمان تفيض امالنا
تضيع تنشره في ساحل المجهول
وا اسفاي
وا اســــــــــفاي
وا اسفاي علي حرفاً شمخ في الطول
وكيف الليلة في بطن التراب مسبول
حرام تبلينا يا ايام
حرام تملينا شوق وهيام
اتارينا بنشيل من حرفك الجواني يا سماعين
ونقعد في حواشي الحضرة وانت تكب علينا غمام
وماعارفين حروفك نازفة من شريان
من دم القليب الاصلو مابريان
لما شربنا لما طربنا واتلفتنا ما لقيناك يا انسان
وشفنا روحيتك الشفافة ركبت هودج الاحزان
محمل فوق جناج ملكين
ودربو علي مشارف الواحد الديان
قوايمو شقايق النخل الوقع حزنان
مضفور بي سعف يابس
مفرش بي كباد اماتنا والحبان
مزمل بي حبال صبرا فقدناهو زمان
مضلل بالدموع شرقان ........
عجيب ياهودج الاحزان
مواسم الهجرة ما حانت ولا زمن الرحيل قد حان
نسافر ليك وزادنا الشربه من بحر الحزن والاهه والحرمان
وداك اليوم كان وداع الهودج المتهادي
كان جامع رجلات الحضر والريف
طيور السافل المحزونة جات بي ليله
تاركةجناها للريج والمطر والزيف
وروح ترهاقه والعباسي وروح أبواتنا
وريحة الماضي كلها جات
ملوك شايق .. وقف شاويش
منكس بي حرابو واقف بي قفاهو تابعو شايل سيف
وبعد الليلة كل بنية تلبس فوق صديره اكليل
يكون مزروع فيهو قلب الشهيد
وانت شهيدنا يا سماعين
يا الله .. يا الله .. يا الله
بعد ما شلت اسماعين
وفات
معاهو باقي كلام وباقي حنين
يالله بعد الفجعة نظل شاكرين
نظل واقفين علي بابك معاي طلبين
يكون عبود مع ود توم كذا شاهدين
قدام قبر الولي سماعين
نظل واقفين
يوم الليلة والباكر
الي ماشئت يالله
الي يوم الفصل والدين
وداك اليوم يكون يومنا
ونقالد شيخنا سماعين
وداك اليوم يكون يومنا
ونقالد شيخنا إسماعين
وداك اليوم يكون يومنا
ونقالد شيخنا إسماعين
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: mekki)
|
لك التحية والتقدير عادل عثمان
ولد عام 1929م في يوم ليس له تاريخ
كا طفال بلادي انحدر كزورق تائه من بلدته
في ارض الشايقية في القلعة الراقدة تحت
اقدام كلنكاكول تلقى تعليمه ما بين مصر
والسودان الى ان تخرج في معهد مشتهر
الزراعي بمصر عمل بالاصلاح الزراعي
وتدرج الى ان وصل مديرا ليعض المشاريع
في النيل الازرق اختاره اجرء الريف ورعاة
الكواهلة وشعراء البادية نانبا عنهم في اول
مجلس شعب والذي ظل يعمل فيه الى ان
توفاه الله عام 1982
رائد الاغنيلا السزدانية الحديثة
دواوينه
خواطر انسان بالفصحى
ليالي الريف
ريحة التراب
حد الذين
يا سلام
الحرف والوتر
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: أحلام إسماعيل حسن)
|
| Quote: وسيكون هنالك إحتفال آخر مساء يوم الإثنين الموافق 16 أبريل 2012 م بالنادى العائلى بالخرطوم إحياءا لهذه الذكرى العطرة ....... |
بت اسماعيل الحسن..احلام
مساؤك ذاكرة النقاء و لجين حنين لا ينفك يأسرك
سنرجع يوماً الى حينا سنرجعُ ((مهما)) يمر الزمان أخبريني بربك !!! كم مقدار
هذه الـ (مهما) ؟
ود حد الزين كان تناغما جميلا بين العين والمخليلة والاصابع ,
صنع منه فنانا وانسانا وشاعرا
لا يطيل الوقوف علي المنصات بانتظار التصفيق... الرحمة لهذا الرجل الفذ
الذي اجج فينا حب الوطن والعزة
والكبرياء وصاغ شعرا عجيبا , قيما نفتخر به علي مدر الاجيال.
نحن الان بقايا حلمه المدلوق علي وسادة الوطن الغائب ..!!
اين نستطيع ان نجد هذا الكتاب ؟ كم اتمني ان يتم توثيقة الكترونيا حتي يتسني
لنا نحن اليعيدون في هذه البقاع البعيدة الحصول عليه ...
فتك بعافية....
نا
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: أحلام إسماعيل حسن)
|
تحياتي وسلامات أختنا العزيزة أحلام
وضيوفها الكرام
لعلها سانحة طيبة أحكي فيها هذه القصة التي عايشت معظم فصولها
نشب شجار بين زوج وزوجة حديثي الزواج - مثل ما يحدث في كل الأسر - تطور الأمر وأخذ أهل الزوجة إبنتهم وأصروا على طلاقها.
تمسك الزوج بزوجته وكان من رأيه أنه وزوجته لم يعطيا الفرصة الكافية لمعالجة مشكلتهما لوحدهما.
رفض والد وأخوان الزوجة كل الوساطات التي أتتهم ليعطوا الزوج فرصة ليدافع عن نفسه
والزوج كان من المعجبين المتيمين بالفنان الكبير عثمان حسين فقد ألهمه هذا العشق أن يرسل ذات يوم لبرنامج ما يطلبه المستمعون طالباً بث أغنية " حارمني ليه " لشاعرنا المحتفى به إسماعيل حسين وألحان وغناء الأستاذ عثمان حسين ... وكان يهديها لوالد زوجته ولأشقائها بالإسم
تكرر الطلب وتكرر البث والإهداء لثلاث أسابيع متتالية
فوجئ الزوج ذات يوم بشقيق زوجته يحضر إليه يبلغه بموافقة والده للحضور إليه ليسمعه
طار الزوج من الفرح ... قابل والد زوجته... ورجعت معه زوجته لمنزلهما
قالت الزوجة فيما بعد أن والدتها قد رددت على مسامع والدها ( ذات لحظة صفاء ) أبيات الأغنية
يا الناسين ضميركم
وما خايفين عذابو
يوم الحق هناك
يوم واقفين ببابو
يوم يسألكم الله
يا الناسين حسابو
حارمني ليه
ليه والله بحبو
وسألته " ياحاج بتقدر على سؤال الله القالوا الشاعر دا ؟؟ "
فاستغفر الرجل وسالت دموعه
وتقول الزوجة أنها المرة الأولى التي تسيل فيها دموعه وكان ما كان من طلب لقاء الزوج
_____________
جعل الله لم شمل هذه الأسرة ، واستمرارها واستقرارها وما نتج عنها من بنين وبنات في ميزان حسنات شاعرنا الكبير
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: عاطف عمر)
|
تحياتي العزيزة أحلام
رحم الله إسماعين حسن وكل مبدعى بلادى
هو أحد الذين صاغوا الوجدان السوداني
ذات الشامة للعملاق إسماعيل حسن
وحياة الأحلام القلبي سقاها
وحياة أجمل بسمة عرف معناها
وحياة سمرة لونا وحاة محياها
وحياتك
وحياتي عندك
وحياة حبي
النال صدك
وحياة أول نظرة لمحتك بيها
وحياة أجمل صدفة عرفتك فيها
وحياة الآمال العشت حياتي عليها
وحياتك
وحياتي عندك
وحياة حبي
النال صدك
وحياة الأيام الجايرة وظالمة
وحياة حبي الكاتمو براك العالمة
أملي وكل منايا هناك يا حالمة
وحياتك
وحياتي عندك
وحياة حبي
النال صدك
وحياة لونك انتي وحاة السمرة
وحاة حبي اليك من أول نظرة
وحياة طهر غرامي انتي القمرة
وحياتك
وحياتي عندك
وحياة حبي
النال صدك
وحياة صمتك انتي وحاة الشامة
الشامة الفوق خدك نايمة دليل وعلامة
تزيد حسنك بهجة تزيدو وسامة
وحياة أجمل ريد في الكون يا حمامة
وحياتك
وحياتي عندك
وحياة حبي
النال صدك
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: أحلام إسماعيل حسن)
|
العزيز الغالى مزمل خيرى
تحياتى وشكرى
أما حديقة العشاق هى عالم اسماعيل حسن الذى تركه لنا عبر الأجيال نتناقله جيل بعد جيل وحفر اسمه فى وجداننا حرف ووتر
أما الذكريات فتعيش فى داخلنا نفرد لها جناحات ... إنه طائر يطير فى الفضاوات المرتفعة وعندما يصيبه التعب يهبط على الرمال ليستريح قليلاً ويستعد للتحليق مرة أخرى
.. الذكريات هى وطن بأكمل هوسيكون هنالك إحتفال آخر مساء يوم الإثنين الموافق 16 أبريل 2012 م بالنادى العائلى بالخرطوم إحياءا لهذه الذكرى العطر
أتمنى أن يتواصل حضورك
| |
|
|
|
|
|
|
|
|
 Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: أحلام إسماعيل حسن)
|
Quote:
لو بكاي هماك ولو شقاي اشقاك
ما كنت يوم فارقتنى خاصمتنى.... وعذبتنى .
ياما دربك كنت بفرشو ورد وحنيه واماني
ياما عهدك صنتو وما خنتو وكان ليك حنانى
ياما من ليلى ونهارى ودمعى بنسج لك أغانى
وكل كلمة من غناي فيها من حبك معانى
إن نئيت برجاك
وإن نسيت بطراك
وإن قسيت بهواك
جيت اعاتبك واشتكيلك واشرح الحب من بدايتو
قلبى خاضع ما برافع بس عليك تسمع حكايتو
انت حاكمو وانت مالكو وانت فى إيدك وصايتو
انت لو حكمت قلبك ما اظن ترضى بنهايتو
العهود صونوها
أوعولا تخونوها
دا حرام تنسوها
تبقى جنبي وننسي كل الدنيا نغرق فى الأمانى
واشتكيلك يا حبيبي منك انت ومن زمانى
فى غيابك ياما ليل الغربة بالآلام رمانى
ابقى عينى وابقى روحى وابقى قلبى يا حنانى
يا أمل يا لطفى يا حنية وينك من عيونى
لو تعود وتجينى
القى فيك حنينى
وانسى بيك انينى
ابتسامتك ربيع دنياي ياما عشت فيها
فتحت فى دربى اشواق الليالى البشتهيها
دى السعادة المن زمان بسأل عليها
بكيانى بشبابى بحياتى افتديها
الإله يرعانا
هنا الغرام ضمانا |
هذه القيصيدة للراحل المبدع اسماعيل حسن
والأداء المميز الفاتن من الراحل محمد وردي
اعتقد انها من قمة الأداء الرومانسي بين وردي واسماعيل الذي يثير الشجن واللوعة بين المحبين
رحم الله شاعرنا المبدع اسماعيل حسن
رحم الله مطربنا العملاق محمد وردي
وبرحيلهما رحل الابداع الحقيقي عن بلادي واغمضت جفون الصدق في الساحة الفنية السودانية
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: أحلام إسماعيل حسن)
|
قالت ارملة الراحل اسماعين حسن، في الفيديو المرفق، ان الراحل كان بيته مفتوحآ لجميع السودانيين. من الشمال ومن الجنوب. كلهم اهله وعشيرته. بهذه الروح الجميلة، ارجو ان تسمح لي الاخت احلام اسماعين حسن ان اناشد القيادات في السودان، وفي جنوب السودان، ان يحتكموا للعقل، وللحكمة، وللدم المشترك، وللنيل المشترك، بأن يضعوا السلاح ارضآ، وأن يجلسوا لمناقشة خلافاتهم، ومراراتهم، ومظالمهم وعهودهم بسلام، وان يضعوا في اعتبارهم ملايين السودانيين، من الرعاة واهل البادية والمزارعين في الشمال والجنوب، الذين اختلطوا بالمصاهرة، وبالمصلحة المشتركة، وبالحلم في حاضر ومستقبل مسالم لهم ولاطفالهم. كفاية حروب. ثمن البندقية، وثمن برميل البترول، لا يساوي حياة انسان سوداني، هنا او هناك. ما بين جمهورية السودان، وجمهورية جنوب السودان، اكتر من كلمة جنوب التي تفرق بينهما.
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: Adil Osman)
|
العزيز الغالى محمد امين مبروك
التحية عندما أتكلم عن إسماعيل حسن القامة الوطنية تتعثراللغه وتقف حائرة أمام هذا البحر الممتد بجهاته الاربعه واعجز عن وصف أبي الذي أعطي روحه وفكره وزمنه للشعر ..وخدمة المزارعين والبسطاء من أهل بلده ...وكان إنسانا مرهف الإحساس وطنيا من الدرجة الأولي . وكان يحدثني دائما عن الورث ويقول سوف يشارككم أهل السودان في هذا الورث..
لك التحـــــــــيه
| |
|
|
|
|
|
|
|
|
|
Re: إحياء الذكرى ال (30) لرحيل شاعر الوطن إسماعيل حسن بقاعة الصداقة (Re: أحلام إسماعيل حسن)
|
الأخ العزيز عادل عثمان
انا آسفة جدا على التأخير...ممكن تتزل الشريط ، أما بخصوص علاقة اسماعيل حسن با الجنوبين منذ ذلك الوقت كانت علاقة عميقة بين اسماعيل واصحابة الجنوبين ..فأنا يا أخي عادل اضع كفي على كفك وسويا نطير حمام السلام ليعم السلام اراضي السودان كما كان وطنا واحدا.. ويا جماعة النقاش يكون على طاولة السلام وان تقف الحرب وان تجف الدماء وهذه دعوة نطلقها من هنا ليعم السلام الارض الخضراء ارض السودان العامر بثقافته وادبه وسياساته والوان طيفة السياسي وشكرا لكم ولكل محبي اسماعيل حسن وكل محبي السلام كما قال ابي:" الحب عندي ثورة خضراء يعلنها سلاحي"
| |
|
|
|
|
|
|
| |
أحلام إسماعيل حسن
SILVER MOON
صلاح غريبة
حافظ انقابو
عصمت العالم
اسامة كمال الخولي
عاطف عمر
هند محمد
اسعد الريفى
زهير عثمان حمد
ABU QUSAI
محمود الدقم
Adil Osman
يوسف محمد يوسف
صديق الموج
khaleel
عماد الشبلي
mekki
مبارك محمد
مزمل خيرى
محمد امين مبروك
يحي ابن عوف
omer abdelsalam
فيس بوك
تويتر
انستقرام
يوتيوب
بنتيريست