سؤال لخريجي مدرسة حنتوب الثانوية

Quote: ود البصير سلام يا زول في زمنا كان ناس دقنة يطلق عليهم الكدايس لكن الكـــلاب ديل بكونوا جو بعدنا هاك الهدية دي يا ناس حنتوب 79 الى 1982 شوفو الصورة وورونا الناس ديل وين

Quote: ايوااااااا اذكرت الان صاح يقال في ذاك الزمان ان هذا الحليب البودرة مكتوب على شوالو for cats and dogs عشان كدا ناس داخلية دقنة سموهم الكدايس كونهم يشربون هذا الحليب . . ونحن ناس ضيف الله اهل العوض كنا بنلغفوا لغف لكن ما سمونا كدايس عشان الفينا مكفينا

Quote: عشان كدا ناس داخلية دقنة سموهم الكدايس كونهم يشربون هذا الحليب .

Quote: الاقتباس اعلاه يا ود البوش به نوع من تحريف لحقائق تاريخية ثابتة لجميع من درس في حنتوب علي مر السنين ، فمنذ ان وطئت أقدامنا هذه المدرسة العريقة وجدنا ان من يطلقون عليهم عبارة (بس) هم طلاب داخلية كيلك وليس دقنة حيث كان الهتاف الشهير في السفرة او اثناء مباريات كاس الداخليات هو (كيلك بس ودقنة البص). أرجو تصحيحي ان كنت مخطئا،،أو تصحيح تلك المعلومة في مداخلتك ان كان المخطئ انت. علي العموم فان ما قيل بهذا الشان لا يعدو في كونه مداعبات جرت بين طلاب الداخليات ولا أساس له من الصحة. مع شكري وتقديري

Quote: For dogs and little horses كنا بنسميهو كدة بس بيطلع منو احسن زبادي في الدنيا تجيب الصحن الالومنيوم قطر 20 سم وتملاهو حليب وتحلب فيهو ليمونة وتختو تحت السرير واهم شي تغطيهو كويس وتحت فوق الغطاء طوبة عشان هوام الليل تاني يوم الصباح تلقاهو زي الجروف لما يرجع منها الفيضان مع فارق اللون طبعا الله على الزبادي بتاعو تقول لي المراعي ونادك وهلم جرا

Quote: فى داخليه تسمى اسرائيل من هى ؟ ولماذا سميت بذلك؟

Quote: شكرا ليك انت ياخوي ود البصير،،،، بالمناسبة كل الأغذيةالتي كانت تقدم كوجبات لطلاب الداخليات في ذلك الوقت كانت تأتي من المعونات الخارجية مثل الفول والفاصوليا والعدس وحتي علب الساردين الذي كان يقدم في أيام الأحد والأربعاء -ان لم تخني الذاكرة- كان من بين تلك المعونات. أما عبارة (For Cats &Dogs ) دي عمرو ما في حد شافا ولا قراها في الشوالات بتاعت لبن البودرة دي. فاذا كان ده صحيح برضو شوالات الفول والعدس مفروض يكون مكتوب عليها(For Horses & Donkeys)

Quote: ولكن ما يدعو للريبة هو طعم ورائحة ذلك الحليب ـ وعجزنا عن إستعماله طيلة فترة الدراسة

Quote: طيب نشوف ذاكرتكم مازالت بخير ام لا ؟ فى داخليه تسمى اسرائيل من هى ؟ ولماذا سميت بذلك؟

Quote: يا ود البصير كان كدي انت ماك دفعتي عديل كدة،،، وجاري في الفصل(غاندي) وفي الداخلية كمان ،،معقول أكون ما عرفتك؟بس حكاية منتصف الثمانينات دي بالغت فوكا ،،،هي قبيل المنتصف بي شوية كده. انت نسيت انو كان في لجنة طعام تشكل من عدد عشرة طلاب من كل داخلية ومهمتها الاشراف علي نوعيةالأغذية التي كانت تقدم للطلاب ولا شنو؟

Quote: عنجة الدابي وجماع الدروة دقنة كان فيها زول لعاب ياخ عادل حبشي ويا سلام علي احسن ثيردباك في العالم مضر ويا سلام علي العضة في الصفرة وعمك المقلي وحنتوب الجميلة بهديك تحياتي

Quote: ود البصير يا دفعة بهديك تحيات وبهديك أشواقي (حنتوب الجميلة) التحيات النديات لك وللزملاء الأكارم ... شجن وأي شجن يحمله هذا البوست الجميل ... الحليب المفترى عليه بالمناسبة هو من أجود أنواع الحليب ... كان يعد تحت إشراف منظمات الأمم المتحدة ... برنامج الغذاء العالمي تقريباً (وورلد فوود بروغرام) ... وأظن أن الرائحة التي كانت تفوح منه سببها أن به إضافات تجعله أكثر تغذية وفائدة ... علمها من علمها (ناس كيلك) وجهلها من جهلها ... تحياتي ولنا عودة ...

Quote: الأخ صديق لك تحية الود والله الحقبة دي ما واكبناها ـ بالنسبة لي ـ أول مرة أسمع في داخلية إسمها إسرائيل بعد الأخ محمد إبراهيم أفاد أنها دينار ـ ياريت تورينا سر التسمية وفي أي عهد تم ذلك ـ ومن أطلق الإسم

Quote: الأحباب الأشقاأبناء حنتوب الجميلة حنتوب ليست مدرسة ،حنتوب وطن كل من ينتمي إلية وارتحل عنه ينازعة الشوق إليه ما بقي الدهرُ لم تترك فيني أي مدرسة أو حتى جامعة الخرطوم صدى كالذي نحتته حنتوب في نفسي، أكاد أبكي كلما مرت بمخيلتي ذكريات حنتوب. حنتوب وصفها الشاعر الفذ أشرف محمد أحمد البشير (سقى الله أيامه) حين قال: فإن الحاءَ منك لهم حنان والنون نور زائد اللمعان والتاء تبرٌ في التراب معفرُ والواو واها للزمان الفاني والباء بدرُ ضاء في غسق الدجى فأنار يا حنتوب كل مكانِ وبالمناسبة هذا الرجل كتب قصيدته العصماء من تقريبا ستين بيتا وهو طالب في الصف الأول وهو كان صديق شخصي لشخصي. ومنها: أعزّ الله دينار الرجال وأورثها قيادات الجمال سعت للمجد يوم يفرُ منه رجالٌ فوق سادات الرجال رؤساءها من جدِهم جعلوا لها تلك الثريا أقرب الآمال وقد ارتّقت حتى السماء لأنها قد سيّرت بأوامر القدال* ---- واصلوا واتحفونا بذكريات حنتوب سرقة المنقة من الجناين الكسر(بكسر السين) رمال حنتوب بعد إنحسار النيل جوافة المشتل المناكفات أمام أبواب السفرة مسابقة المسرح كرة القدم السلة الطائرة __________ القدال كان هو الأستاذ المقيم