فى العاده ما بعرف اقرى القصائد المكتوبه باللغه العاميه السودانيه لان فى مصطلحات بتغلبنى عديل العجججججججججججججججججيب انى لاول مره اليوم اقول اجرب اقرها من اول كلمه لتانى سطر لفقره البعديها لقيت عقليتى متااااااااااااااااااااااابعه بشغف المكتوب لاول مره اكمل قصيده لاخر نقطه فيها بلا اى انقطاع واستفسار وحيره ومع شدة سعادتى حسيت بقلبى عااااااااااااااااااااااصرنىىىىىىىىىىىىىىىىى ألم لان كل حرف وصف الحال الفينا اندلع هل فهمتها عشان بقيت عبقريه ولا عشان وجعها ياهو الكاوينا .... يا ناس القول والقرار يا الراعى يا الحتتحاسب يوم السؤال انت بتنوم بليل كيفين ؟!؟!؟!؟!؟!؟!؟ القصيده بقلم صلاح سيد أحمد الغول - لطشاها من منتدى عكس الريح
إيه قوَّمَك يا جِدَّنا ؟ ................... لا الشَّمس في يوم مُضطرِب ضهبانه مَرَقَتْ مِن غَرِب لا الأعوَر الدَّجال طَلَع بى جَنَّتو ونارو وغِضِب لا الدّابه ظَهَرَتْ في الدَّرِب لا اتفاجأ النَّاس بى كلامه إيه قوَّمَك يا جِدَّنا ؟ّ! ما لِسّه بدري على القِيامه قوّمني صوتاً شَقَّ حَلْق اللّيل وفااات ضَرَب الحَنَك زي التَّكَنّو في حدِ مات والنّاس مدومسه في شَخيره وفي منامه وكتين صَرَخ ظَنّيتو دا الصّور اتنَفَخ عضّيتْ أصابعين النّدامه وقُتَّ أخ ومَسَكتَ يا اللّه السّلامه وحسيبي ربّي عليهو اتوَكَّلتَ فجّيت الرِّمال ودَفَرتَ زَحزَحتَ الجبال ولقيتو زولاً ود حلال سوداني أغبَش وحالو حال شايل بَلا وداقش الخَلا فالقَا الصّلا وعاضي الفَقـُر دَنقَر عَصَر عين الصَّبُر سَكَبْ الأحَرَّ مِن الجَمُر سيف الغلا .. أكل العيال وحبْل الديّون زامِّيهو زَمّه لافِح أساهو ودارعو شال وفي راسو كارِب هَمّو عِمّه كُل شيتاً أصبح طَعمو مُر بتمنّى لو كان يومو تَمَّ لا قادِر اطفَحو يبلَعو لا لاقي ريقاً يبصُقو وعارِف سؤال النّاس مَذَمّه لمتين تلوك قَش الشَّقا اللا بِِلين لا بِِنقََرِض يا وليد أخير ليك تستَجِم وتعيش معاي تحت الأرِض مُرتاااح ومصيون العِرِض مستور أبوي في فَد هِدِم لا خوته لا قولة بِغِم لا الدَّعم للسِّلَع اترَفَع لا ألحقوا السُّكَّر عِدِم لا سَرقَه لا الدّولار طَلَع لا نَفرَه لا نِقَّه ونَضِم لا الدَّعم والقَرض اتبَلَع لا النّور قَطَع وحِرق الفِلِم لا حَسره لا النّاس ابتَلَتْ بالرَّشوه لا أمن انفَلَتْ لا النّفس رِخصَتْ وأُهمِلَتْ لا العِفّه لا الأخلاق غِلَتْ لا العَجَزه لا المايقوما شَت بالعار وبالعيب اتمَلَتْ لا الحِلم في السّودان طِرِش لا الحِكمه في دارفور عِمَتْ لا دَخلو هجليج الغُبُش لا مرَقوا مِن أبياي دُغُش لا الأرزَقي المَدّا الكَرِش لا الفي المجاري بينكَرِش لا شيخ موالي ومُنبّرِش لا شاب مُعارِض ومُندَرِش لا سُلطه لا حاكِم بِغِش يلاك معاي ما عِيشه دي كُل حاجه نار ما بتنهَبِش وفجأه اختَفى وفجأه ارتَحَل قوّام كِده وغلبو الصّبُر ضاقَتبو فوق ووِسع القَبُر جِدّي اللِكان للشّيل جَمَل جِدّي اللِكان يا ناس جَبَل معقوله بس يا جِدّنا ؟ ما لينا غير الموته حل ! خلينا عاد لى رب كريم مَن لَجَّ في طلَبو ولَهَج لا بِنسا لا بِرضالو ضيم حارِنّو مِن عندو الفَرَج وأمَلنا فيو دايماً عظيم
Quote: جِدّي اللِكان يا ناس جَبَل معقوله بس يا جِدّنا ؟ ما لينا غير الموته حل ! خلينا عاد لى رب كريم مَن لَجَّ في طلَبو ولَهَج لا بِنسا لا بِرضالو ضيم حارِنّو مِن عندو الفَرَج وأمَلنا فيو دايماً عظيم
06-09-2012, 03:11 PM
أبو عبيدة البصاص
أبو عبيدة البصاص
تاريخ التسجيل: 09-29-2006
مجموع المشاركات: 4127
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة