الاربعاء 7 مارس 2012 وفى السابعة والنصف مساءً كان الضيف على الصالون الدكتور يوسف حسن الصديق فى ندوة تحت عنوان
موسيقى الطفل : تجربة سودانية
مسيرة طويلة حافلة سكب فيها د. يوسف عصارة تجربته المتفردة فى التعامل مع موسيقى واغنية الطفل , يعمل بهدواء وبعيداً عن الاضواء , لذا لم يعرفه الكثير من الناس فى ظل قانون من يلهث خلف الاضواء هو الاكثر شهرة .
03-10-2012, 01:28 PM
مركز الخاتم عدلان
مركز الخاتم عدلان
تاريخ التسجيل: 01-21-2008
مجموع المشاركات: 3485
الرجل الذى اسهم فى ذاكرة طفولتنا الباكرة , د. يوسف حسن الصديق .
الرجل الذى خطط للامسية وادارها باقتدار , الأستاذ عماد آدم .
هى المرة الاولى التى يشهد فيها المركز هذا العدد الكبير من الاطفال , ادركنا عندها مدى الحاجة الى تخصيص انشطة راتبة تهتم بهذه الشريحة الحيوية , فكرنا بصوت مسموع , واقترحنا الكثير من الانشطة والفعاليات الصباحية .
بدرى صحيت من نومى فرحتا مشيت على امى وابوى صبحتا شربتا الشاى بكل لطافة وبين اخوانى كنتا قيافة انيقة فى لبسى وكلى لطافة وكانت جنبى صديقتى سلافة بدرى صحيت من نومى .. انا بدرى صحيت من نومى شلتا معاى اقلامى وكتبى , ما اتأخرتا مشيت فى دربى والاخوات حلوات بقربى بكرة نجاحنا عليك يا ربى بدرى صحيت من نومى .
03-10-2012, 03:21 PM
مركز الخاتم عدلان
مركز الخاتم عدلان
تاريخ التسجيل: 01-21-2008
مجموع المشاركات: 3485
بين عرض النماذج المختلفة كانت ونسة دكتور يوسف ببساطته المعروفة عنه :- سعيد انى اكون فى المركز العملاق ده لاول مرة , الاستضافة دى والاهتمام شىء بسعدنى شديد وبخلينى ابذل مجهود اكبر واكبر فى المستقبل لو فضلت لى ايام فى الدينا. الاطفال ديل اهم شريحة فى حياتى وافتكر فى حياة الناس كلها , لو عايز انكلم عن تجربتى , انا زى اى واحد تانى بيمارس طريقته فى الحياة , انا يوسف حسن الصديق سودانى الجنسية لا شايقى لا جعلى لا حلفاوى , سودانى بس , ماعندى فريق رياضى خاص لا مريخ لا هلال , فريقى هو السودان , برضو انا ما اتحادى ولا حزب امة او مؤتمر , انا سودانى ح اموت من اجل السودان . اشتغلتا فى مجال الطفل اكتر من 40 سنة , وزى 15 او 20 سنة شغال فى مجال التربية الموسيقية . الطفل عايز عناية فى كل المناحى , وتجربتى رغم بساطتها هى ترس من تروس البتدور عجلة الابداع , وانا واحد من ناس كتيرين , لما اشتغلتا فى مجال الطفل فى بداية السبعين لقيت قدامى عملاقةوعلى وجه الخصوص المرحوم عبدالله الفزارى وكان شغال مع رياض الاطفال وقدم حاجات كتيرة حلوة حتى اخر ايام حياته , وكان فى سليمان زين العابدين من ناس شمبات وقدم الكتير زى خواطر فيل ويا ميطيرة , وفى الوان الطيف , والصادق محمد احمد , واسامة بريش واحمد بريس , واحمد الفكى , وناس كتار تانين انا استفدت منهم فى تقديرى انو الموسيقى او التربية الموسيقية بالنسبة للطفل هى حياته لانها بتنمى فيهو الابتكار والاستقلال وتكوين الشخصية وبتفتحو على الحياة وانو يتفاعل مع الجماعة ومع الاخرين , بتديه الثقة فى النفس . فى ناس بتفتكر انو الانشطة الموسيقية والرياضية والثقافية بتبعد الطفل عن الاكاديميات , لا , بالعكس , فى كل العالم النشاط والاكاديميات مع بعض ومن البداية بيكون طفل سليم. الام من البداية بتقوم بتهدهد الطفل الرضيع (اللولى) وهو بيتمايل معاها وبينوم على اغنية , وفى اغنية فى كل السودان معروفة وبتتقال بطرق مختلفة وهى اغنية النوم النوم
النوم تعال سكت الجهال النوم تعال ريح الكبار
وطبعاً مع العولمة الاغنية دى اتنست , انا بالمناسبة بدايت مع اغانى الناس الكبار فى العزف والتلحين , لكن لقيت ان الصدق مع الصغار اكتر , ولقيت انو القيم البنادى بيها موجودة عند الصغار , والدليل انى بسمع وجهة نظر الاطفال البشتغل معاهم لو قالوا لى العمل جميل بقدمه طوالى , لو قالوا لى العمل ده فيهو تكرار وبيشبه العمل التانى براجع نفسى , لانى شغال ليهم هم . انا قدمتا نماذج فى مسيرتى وهى اضافة لنماذج الاخرين وبتشكل المسار الفنى للطفل وفى اجيال جديدة فى الطريق ح تقدم الاجمل فى ظروف اجمل , فى اعمالى الاولى ما كنتا دارس لكن حبى للطفل هو الكان بحركنى فقدمتا متشكرين ومقدرين , ودنيتنا الجميلة , بعد كده حصلت الدراسة . اغنية بدرى صحيت من نومى قدمتها قبل 25 سنة وفى سنة كم وتسعين كانت هى الاولى على العالم العربى وهى من كلمات الاستاذ اسحاق الحلنقى , اتذكر فى برنامج الاطفال كان فى ملف فيهو كل الاغنيات المجازة واغنية بدرى صحيت كانت مكتوبة فى ورقة شكلها تعبان استلمتها ولحنتها, وانا بلحن الاغانى وانا ماشى فى الشارع او وانا قاعد فى مكان ما , بلحن فى وقت ووضع .
03-10-2012, 03:51 PM
إبراهيم عبد الحليم
إبراهيم عبد الحليم
تاريخ التسجيل: 10-31-2008
مجموع المشاركات: 3563
عطر السماء بنماذجه التى قدمها لنا دكتور يوسف , كان منها واحدة تناولت قضية الاطفال الذين يعملون فى بيع الاكياس
ما اسمك كيس اسمك محمود فى بطن السوق تلقاك مولود شيال للهم من عمرك كم ؟ نفسك مقطوع , حيلك مهدود كيس .. كيس .. كيس نادوك ما لقوك فى المدرسة ديك يا غايب وين ؟ وين الكراس وكتاب الدين ؟ .
لو درتا ضل وافر ظليل حولك نسيم اهى دى الارض مد البصر واهى دى الشتول قفا من يشيل اسقيها موية من الصباح قبال تروح المدرسة مد سور جميل شان يحرسها تلقى الغصون حولك تميل والجو جميل بكرة الحلم واقع يكون ما بين زهور من كل لون واسراب طيور حولك تدور والجو بديع .
مش أ اسد .. الـ أ امان مش حاء حرب .. الـ حاء حنان انا عايز اقرا بكل سرور ما عندى هم حق الفطور ولا خايف الاستاذ يقول - جبتا المصاريف يا ولد ؟ . مصروفى يبقى على البلد وعلي اذاكر واجتهد واصبح كبير واطل على العالم واضيف انسان سليم مش زول ضعيف ما عندى خوف والدنيا تصبح امنا وتضمنا .
03-10-2012, 04:20 PM
مركز الخاتم عدلان
مركز الخاتم عدلان
تاريخ التسجيل: 01-21-2008
مجموع المشاركات: 3485
التحية والتقدير لك يا فنان . كل الشكر على الهدية فى البوست , وعلى هذا الاسهام الرائع فى حقل اغانى الاطفال . شكراً ابراهيم , وفى انتظار مزيد من الابداعات .
03-10-2012, 04:36 PM
مركز الخاتم عدلان
مركز الخاتم عدلان
تاريخ التسجيل: 01-21-2008
مجموع المشاركات: 3485
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة