تطير قمرية من عُشه تفتش لسه لي قشه يحش جنحاتها صقر الريح تقع مكتوله بالدهشه صباحاتي الحلم مضبوح صباحاتي الفرح غَشهّ ........... مباهجنا أنتحر لونها مرابعنا أنتهت حُفرة حدايقنا أتسقت صُفره مقابرنا إتملت خُضره . نزح دُخرينا لي طينا وفى جوفها السمح خَشّ وبين الحوش وودسلفاب صبح جرح الوطن ممشي ......... ......... ......... مذياع الوطن متعوس يساسق من فراق لفراق يرازي الموت عريشة الفُل يشقق فى سِِقِفْنَا الضُل ويسد بي كفو نور الطاق. أيا والي الغُبش والحوش وتر مصبوغ بحزن " الدوش" مغص مغروس فى صوت مقروش . ( هلال ( من فوق نجيل مرشوش صعب حنضل أساك ينطاق . وزي كل الجميل وأصيل فى بلد الحُرقه والدقداق تفوت بسراع كأنك ضو شلع فى الجو. كأنك ضيف كأنك طيف رسم للناس شِعر بالساق جدع فى الطين بذور سرو طلع فى غفله بالرقراق. .......... بين الحوش وودسلفاب كفر .... ووتر عذاب ..... وسفر غُبار .... وحُفر سهام الحرقه من َنشّاب أسف خلي الشدر هاجر وشاب قش الجزيرة الشاب .......... بين الحوش وودسلفاب قدم دوزن حرافه تًسُر وتر ضمد هوان الاُمه بي حرف القصيد الحُر. بين الحوش وودسلفاب بريق نجمين نقيح جرحين دعاش ءاسمين بذروا النشوة فى الأوصال وخلو الكون رقيصو كُتر وكان ثمر الحصاد الشوك وتبريح السهام المُر ورسم أسمين علي نصبين ممددّة فى فيافى خراب ........... تقع لوزتين فى سدر الطين تنقرش فى خلا الأحزان علي عود الهشاب ريشتين خريف الرازّة حتّل غيمو ناح محسور على الولدين. يغيب والي القلوب الزين ومدفوسه الرفوف والين وودسلفاب تفارق الروح وأرواح الهَتَش بايرين ........... يمرقوا الناس ديوش وخلوق علي دخري الوطن باكين لا إعلان لا إذعان لا ترتيب لا تغييب لا ترهيب بحرف الدين . بلد يعزف صِدق نفسو دليلو هواهو فى قلبو ومتوكل بروح يسن . ............ ............ بين الحوش وود سلفاب شليل والليل وعين السِدْره ِبتْفَتّح على القمرة وبُكره صباح بيتمطا ويقوم مرتاح ولد ممراح يسوق الكوره بي قلبو يحاور بيها فى المطره يدندن بيها بالاقدام ويساسق بيها فى الأحراش ِويْنَقرش بيها فوق الراس . يخلب بيها لُب زهره ويِبَشّر بيها فوقَ شجرة تزغرد أُمو وتكبّر - دَقُر يا عين يا ( والي الدين ) تخاف العين تَجِر بسراع تجيبلو حجاب من الفُقرا . ............ بين الحوش وودسلفاب ناى الراعي ِبتبتب شجون نغماتو وتصّبح على الضامرين على البُسَطا كمنجه تنوِح علي الوالي تََقَطّع فى جنون وترها رقصة " زوربا " (1) بالكوره وأغاني العزة لي " طيبه " ولي " نورا " وللفقرا . دموع نخله ِبْتبدّع تكب فى الوادي نافوره تطرشق بالحُزُن عُشَره وتتكرفس غصون ليمونه في شوكها تقول محشوره في الوكره ........... بين الحوش وودسلفاب يقيف " فارماس" (2) علي التله يأذن لي خلاص الناس ويكبّر صوتو للحِلّه يأشر بي ضراع وعيو علي الطاغيه علي الكهنه علي المافيا علي العله ويصير صوتو عزا الايام ونور فانوس فى قطيه وضل ممدود فى ضهريه . قمح مدروش عشا الايتام ضمير عاشق هوي الأرحام مسادير تضفر الأحلام عيون مفتوحه لي ِقدّام صبر مشدود على الآلام جدول فى اليباس دفّّاق وزي كل الجميل وأصيل في بلد الحرقه والدقداق يفوت بسراع تقول زي ضو شلع في الجو تقول زي طيف تقول زي ضيف جدع فى الطين بذور سرو طلع في غفله بالرقراق. ............. ............. ............. مما قُمنا كان دخرينا بتسّرب ويقع فى البير. مما صحينا كان لافينا توب سيّدنا كان قابضنا من حلقومنا برضو " مشير" . مما شفنا كلْ أحلامنا كان بتموت من ( التخدير) مما عرفنا كلو ( حريف ) ( وزول رايع) مصيرو عسير. مما وعينا يا ما سمعنا ناس بتقول صحيح ما بتدّي - أصلو حريف صحيح ما بتدّي أصلو شريف. زَِرعْنَا يطول يَقَيف قندول نحاحي الطير يرك الموت فى عيش الريف . .......... وبين الحوش وودسلفاب نعيش ونشوف جُرعنا الزايده بالتخدير غيومنا الراحلة دون تفسير كنوزنا الرايحه بالتقصير رؤانا الواقعه بالتكسير وكلو ( حريف) و( زول رايع ) قصادو هدف ويقاوم جرحو ويتحمّل ويتبتب فى جروح الناس ويتأمل ويحلم بي وطن أجمل تدوسو المافيا فى جرحو وفى حلمو ويتكعبل ......... بين الحوش وودسلفاب زمن ما بدّي زهرة شمسو غير الذله والتنكيل وطن أورادو موت أقمارو بالتعجيل يقع جديّ الخلا الساساق بعد رسم الشعر بالساق وزان ترنيمو كلو نجيل ويغيب ( فارماس ) (وود ( سلفاب وست الجيل"(3) " بعد خلي القصيد قُدره تجمّل كون عذاب الناس بريشة الصحوة والفكره . يقول للناس بفوت الليل وبتفتّح شمس بكره علي جبل الهموم يطلع مهّوم فى عذاب الجيل يقبض بالثبات إزميل وينحت بالصبر وطناً هواهو أصيل
" عذابو نبيل" ........ بين الحوش وود سلفاب تتفتح جروح مريم (4) وست الجيل تصير شمساً بتطلع ضاحكه مليون ميل ونجمات فى خلا الأحزان تسوق خطوات مسافر ليل . مزارع للغُبش ميراث ملاعب تخلب الأنفاس مسارح حره دون حراس وغنوات للبنات والنيل. ........... تطير قمريه من عُشه تفتش لسه لي قشه يحش جنحاتها صقر الريح تقع مكتوله بالدهشه صباحاتى الحلم مضبوح صباحاتى الفرح غَشَه
(عدل بواسطة ناظم ابراهيم on 02-11-2012, 07:35 PM) (عدل بواسطة ناظم ابراهيم on 02-11-2012, 07:43 PM)
02-11-2012, 07:38 PM
سلمى الشيخ سلامة سلمى الشيخ سلامة
تاريخ التسجيل: 12-14-2003
مجموع المشاركات: 10754
Quote: كلْ أحلامنا كان بتموت من ( التخدير) مما عرفنا كلو ( حريف ) ( وزول رايع) مصيرو عسير. مما وعينا يا ما سمعنا ناس بتقول صحيح ما بتدّي - أصلو حريف صحيح ما بتدّي أصلو شريف.
02-11-2012, 09:02 PM
ناظم ابراهيم ناظم ابراهيم
تاريخ التسجيل: 04-18-2008
مجموع المشاركات: 3734
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ناظم ابراهيم
سلمى الشيخ سلامة
Nasr
فيس بوك
تويتر
انستقرام
يوتيوب
بنتيريست