|
كتب الكاتب الفاتح جبرا المتوفرة بمعرض الدوحة
|
|
 Re: هل تفضل أن تكون زوجتك (عاملة) أم (عاطلة) ؟ (Re: صبري طه)
|
بالنسبة لي العمل في البيت كـ ( ربّة منزل ) هو في حقيقة الأمر وظيفة بدوام كااااااامل !
ولكن في النهاية الأمر متروك لرغبتها إذا أحست بإمكانية التوفيق بين الوظيفتين ..
كما أن أغلب بيئات العمل ( خاصة في السودان ) غير مهيئة - بعد - لتقبُّل النساء كزميلات فقط ! ..
لذلك من الأكرم لها البقاء في منزلها إن لم تكن هنالك حوجة للعمل ..
| |
  
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: Mutwali Malik)
|
بداية اعترض على كلمة عاطلة
وللكلمة معنى دلالي جمالي عند العرب
العاطِل من النساء التي ليس في عُنُقها حَليٌ وإِن كان في يديها ورجليها.
والعَطَلُ: تمامُ الجسم وطوله
http://www.btalah.com/showthread.php?t=100037#ixzz1m40aFkfw
وعاطلة عن الزينة لعدم حوجتها لها لجمالها غير المجلوب وهو حسن البداوة
كما وصفه المتنبئ
حُسْنَ الحِضارةِ مَجـلُوبٌ بِتَطْرِيٍـة ** وفـي البِـداوةِ حُسْـنٌ غَـيرُ مَجـلُوب
ولعل العبادي نظر في هذا البيت حين انشد سرور
انزل يا(سرور) وشوف يد القدرة وشوف حسن البداوة الما لمس بدره
وقد تغزلوا في المراة التي لا تحتاج لادوات التجميل من حلى وغيرها
دار التي حليت بالحسنِ عاطلة
فوسْوسَ الحليُّ من غيظٍ على العطلِ
ومَا تَركْتِ بـذاتِ الضّـالِ عاطِلَـةً
مـن الظّبـاء ولا عَـارٍ مـن البَقَـرِ
قَلّـدْتِ كـلّ مَهـاةٍ عِقْـدَ غانيَـةٍ
وفُزْتِ بالشّكْـرِ فِـي الآرامِ والعُفُـرِ
ومن هذا الباب فانا اختار الاثنين عاطلة عاملة لزوجها راضية
| |
|
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: صبري طه)
|
دكتورة داليا ..سلامات ..
| Quote: هل تفضل أن تكون زوجتك (عاملة) أم (عاطلة) ؟ |
اعتقد الحكم على عمل المرأة بكون من ناحية شخصية تخص كل واحد وليست حكم على عمل المرأة بصورة عامة ..
وانا شخصياً وبحسب ظروف بيتي وابنائي فافضل ان تكون زوجتي عاملة في بيتها ومع اولادها ..
تحياتي ،،
| |
|
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: محمد عبد الماجد الصايم)
|
تحية ..
العنوان غير موفق ..لأن العاطل من يرغب فى العمل ولا يجده ،
ولكنى أرى فيه موضوعا للساعة ، لكثرة الطلاق والخلافات بين الزوجين بنسبة مقلقة
فى كل البلاد وبالأخص البلاد المتقدمة ذات النسبة العالية من الحرية والتحرر ،
فأصبح عمل الزوجة أو الأنثى سائدا مثله مثل عمل الذكور وبالتالي صار تواجد ( الشقالة )
أمرا ضروريا فى بيت الزوجية لخروج الإثنين معا للعمل وتقاسمت تربية النشىء الخادمة
وربة المنزل على السواء وربما للخادمة نصيبا أكبر فى دور الرعاية والتربية ..
ومن هنا فقدت الزوجة جانبا هاما من مهمتها الأساسية فى حق الأمومة وهو الدور الطبيعي
والطليعي لها ، ..
ثم تأتى جوانب لاتكون محسوبة أو محسومة عند الزواج والإقتران فإن كان مسلما فالشرع
لا يسمح بأخذ مال الزوجة إلا برضاها إن كانت موافقته من البداية على عملها وارتضيا ذلك
أو قد تتداخل الكثير من جوانب الخلاف فى غير إتفاقهما لأن الزوج يرى فى بعض الأحيان
نقصا فى بيته وحقوقه الزوجية ، ..
أما إن فرضت ظروفهما الإقتصادية لعملها ، فيستوجب عليها أخذ موافقته للإسهام معه
وبرضاها فيما تنفقه أو ما يتفقا عليه ، مع حرصهما على التوافق فى مسيرة الأسرة فى
ما لاينعكس سلبا عليهما ،
اللهم إلا إن كان الزوج غير محتاجا لعملها ويكون لها من باب الممارسة واكتساب المعرفة وعدم
تعطيل مكتسباتها العلمية ، ...
إذن أخلص للقول ، بأن التفاهم من البدء أفضل والتوافق مطلوب وأن يتعفف الزوج عن مالها ، بل
يجعلها معينة له من تلقاء نفسها ولا أعتقد أن رجلا يرضى إبعاد زوجته من العمل وهى مؤهلة له
إلا إن كانت له رؤآه فيما يأتى ذلك سلبا عليهما وعلى مصلحة بيتهما وتربية أطفالهما أو عدم
حوجته أصلا لعملها ...
أرجو أن أكون أوضحت مقصدي ، ولكم تحيتي ..
محمد مختار جعفر
| |
|
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: اساسي)
|
داليا سلامات
دا معناه يا إما الزوجة العاملة ما تنجب ........(عشان ما تجهجه عيالا )
يا إما ما تشتغل كلو كلو ......( وبرضوعشان ما تجهجه عيالا )
يا إما كمان تنجب وتشتغل وتجهجه زواجا.
- لو غلب اتجاه التفرغ يبقى من بكرة بطلعا من الشغل ..
ولا الراي شنو؟
| |
|
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: اساسي)
|
( عامطة ) .. " أفضلها " عامطة ..
مع إنه " أفضلها " دي كلمة عجيبة !!! .. أفضلها بتاع شنو ياخ ..
في مفردات كده لما تخش عليها أدوات النسب و الملكية و التبعية الملصقة في ضمير المتكلم و و و و و بتاعت العربي ديك , بتبقى شينة شناة العدو .
المهم .. نرجع للعامطة ..
و قيل أن العمط هو ( فري ) العمل فريا .. يعني تمسك أي شي تطقطقو و تجضمو و تنجضو . إنتهى .
عَمَطَ , يعمطُ , فهو عامِط
- و هل أنعل و لا أضـرط من بيت مفتوح يقيامتو الرابطة ليل نهار , و شفع مسلطين بطلباتهم و همومهم و عواليقهم , و راجل أشولنجي لا يعجبو العجب و لا الصيام في رجب ؟؟
- و الحال كذلك فالزولة " العامطة " لغوياً هي : زوجة و أم و شغالة و كمريره ( بتعرف الكمريره يا أساسي يا بلدي إنت ؟ ) و مدرسة و هوفر متفرغ لكنس و نضافة و تصليح و تعديل و مضايرة و تقويم بلاوي الدهر الرماها فيها ربك لا إيدا لا كراعا .
عاااااامطة ..
هذا , و الله أعلم .
...............
تمبس يا وهم ..
داليا دي تنفجخ تقعد في بطن الواطة , تجيهك و تدلعك باقي عمرك الكعب الفضل ليك ده ..
صحتك يا إبني أهم , و إنت زول راحات و عضة و إستكانات .. و فوق ده و داك عضمة كبيره كمان ..
بلاش دكترة بلاش كلام فارغ ..
الله !!!!
| |
|
|
|
|
|
|
|
|
 Re: هل تفضل أن تكون زوجتك (عاملة) أم (عاطلة) ؟ (Re: Emad Abdulla)
|
احييك يا عمدة النظرية العامطية و امير قرامطة الشرق الادنى،
اما فيما يخص افتراع أختنا الدكتورة داليا لهذا الخيط و درعه في رقبتنا ساي (لا ايدنا لا كراعنا)
فنعلن اخلاء طرفنا من السؤال المفصلي صدر البوست، حيث كان سؤالنا و نقاشنا مع الإخوة
اساسي و خليل و اماني عن هل تحبذ(ها يا عمدة) طبيبة ام غير ذلك، حيث لا ننتهج خطاً املائيا على
من جمعتنا بهم الحياة كاصدقاء ناهيك عن كونها زوجة و رفيقة درب، فالتعمل ان استطعنا ان نوفق بين البيت و العمل
و لتلزم بيتها ان شاءت فالقول اذاً ما قال عمدة القرامطة اعلاه بالعامطية السودانية ؛)
| |
|
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: داليا الكباشى)
|
التحية ليك يا دكتورة
ومشكور على فتح البوست
| Quote: هل تفضل أن تكون زوجتك (عاملة) أم (عاطلة) ؟ |
الموضوع ليس تفضيلات وانما الشراكة الزوجية تفرض تقاسم المسئولية .. ولكننا كمجتمع شرقي يفضل فيه الرجل المرأة المتفرغة لاعمال منزلها .. وعن نفسي اعتبر كل من يشترط على زوجته البقاء (عاطلة) فهو ظالم .. وبما اني عاذب حتى الان باذن الله لن اقع في فك الظلم هذا واترك الخيار لـ(شريكتي) .. واتمنى من كل رجل ان يترك لزوجته الخيار حتى لا تشعر بالظلم في ممارسة حياتها.. واقترح لمن هم مقبلون على الزواج ويبحثون عن امرأة عاطلة ان يستجلبوا خادمات فهو افضل بكثير من الوقوع في فخ الظلم
تحياتي
حافظ
| |
|
|
|
|
|
|
|
|
 Re: هل تفضل أن تكون زوجتك (عاملة) أم (عاطلة) ؟ (Re: حافظ انقابو)
|
Quote: تمبس يا وهم ..
داليا دي تنفجخ تقعد في بطن الواطة , تجيهك و تدلعك باقي عمرك الكعب الفضل ليك ده ..
صحتك يا إبني أهم , و إنت زول راحات و عضة و إستكانات .. و فوق ده و داك عضمة كبيره كمان ..
بلاش دكترة بلاش كلام فارغ ..
الله !!!! |
مش كدا عليك الله يا عماد ..؟
ياخ اقوليك حاجة .. انا الفترة الفاتت دي وانت مافيش بقيت اسمي دكتور تمبس .. حسع كان فتحت ليك الشنطة دي ..
عندي ميزان ضغط .. وسماعتين .. وحقني في جيبي ..
يعني بي صورة أوضح :
حسع دي ممكن افتشك هنا دا .. واديك حقنة في راسك الكبير دا ..
ياخ اقوليك انا بقيت ازازي معاها في العيانين عديل كدا .. واحنس دا .. واقنع دا ياخد الدواء في الوقت المناسب ..
نوعيتك دي الواحد لو ما بورد بكري دا .. حسع دي كان تلقاني استشاري بتاع غدد صماء يا بتاع جراحة عظام دقيقة..
لكن اهو الواحد قدرو انو اتحاصر بيكم من كل الجهات ماف اي طريقة للابداع .. لكن اهو الواحد قاعد يفرفر ..
..
| |
|
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: حافظ انقابو)
|
الخيار عندي ومن تجربة عملية الاتنين ممكن...
تشتغل اذا كان لديها مهنة تمارسها...
وتوقف الشغل اذا تعارض ذلك مع تربية
الاطفال...
وتعاود العمل مرة اخري..اذا تجاوزت
مرحلة التربية بأمان...
وهكذا....الحياة مباصرة...
فأنا لا اقبل بخادمة لتكون مقام المربي الفطري والاصيل
ولا أقبل بحضانة...لطفل عمره شهور...
حدي ...(وفصاله في عامين) ثم يأتي التفرغ للعمل
| |
|
|
|
|
|
|
|
|
 Re: هل تفضل أن تكون زوجتك (عاملة) أم (عاطلة) ؟ (Re: nazar hussien)
|
| Quote: و راجل أشولنجي لا يعجبو العجب و لا الصيام في رجب ؟؟ |
بعدين يا عمدة من ناحية أخــلاق الاشولنجي دا بفضل طول حياتو اشولنجي ..
ولو حاول ينعدل شوية .. ربك كمان ما غفور رحيم شديد العقاب .. يثديك ليها عيانا بيانا عشان تأمن وتعظ ..
احكي ليك قصة صغيرة .. وللاخوان عشان تعرف الاشولنجي ممكن يتوب كيف :
مرة الزميلة دي شغالة بالضهرية من الساعة اربعة لحدت الساعة واحدة صباحا ..
المهم اخوك بجي بلقى اكلو جاهز .. يسخن ويعضي ويضرب ليهو حجر شيشة أو ما تيسر .. واخوك عندو قراية كبر مرات بيقرا .. ومرات بعمل فيتنام ..
المهم
الزميلة جات متأخرة زي ساعة من المواعيد .. ودا طبعا بعدما دقت كرت الدخول للبيت .. إنت قايلني ما عامل ليها كرت دخول واللا شنـو ..؟
يللا حنكنا مع بعض .. واتعشينا ويمنا عايز يبدا ..
قوم يا تلفون دق .. والكلام دا زي الساعة كم ..؟ زي اتنينات وشوية .. وانا بصحى الساعة سبعة .. بمشي ببيع اللبن والموية الماسكة دي افتحه واجي اللبس امش الشغل ..
| |
|
|
|
|
|
|
|
|
 Re: هل تفضل أن تكون زوجتك (عاملة) أم (عاطلة) ؟ (Re: فايزودالقاضي)
|
| Quote: لله كده ولا فيها نسبة ؟!! |
داير النجيضة يا ود القاضي ..
والله فيها ..
مرة (كتمت) معاي .. بصلح في ماسورة المطبخ والمجاري قمت كبيت acid ولي شلاقتي شميتو ليك .. اها النفس راح كلو كلو ..
خموني ليك ناشف كنيشة بس ..
اها
ظبطتني ليك بي اوكسجين وحقنتين في الوريد .. حتين حرقته تش ..
مرة جاني ليك وجع جمبات وصداع حاد وهبوط .. خموني شاتوني ليك بي حقنة بلاي دقيقتين بس قمت زي الحصان ..
اها حسع دي ما نسبة ..؟
اقوليك حاجة :
كدي ابقى مارق انا بقسم معاك من النسبة دي ..
غايتو الحمد لله الدنيا اونلاين بس .. حسع دي كان كتبت ليك بالرندوك
| |
|
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: عمران بابكر بدري)
|
Quote: مرة (كتمت) معاي .. بصلح في ماسورة المطبخ والمجاري قمت كبيت acid ولي شلاقتي شميتو ليك .. اها النفس راح كلو كلو ..
خموني ليك ناشف كنيشة بس .. |
.. مخير الله عليك .
أهو ربك ربك الخير عارفك بايظ خلقة قام نفحك إتنين .. جوز ما يخسر : مره و عامطة ..
نفحك نفح جد .. شفت رحمة ربك ؟؟ ..
بعدين حكاية الشممان دي أنا بقول تبطلا شوية .. عادة ما كويسة و عندها دلالات ما ياها !!
دي حاجة ..
الحاجة التانية : الزول الأشولنجي شبه عمك منصور ده كان بس تديهو غمتة و اربعة منو بردلب في الإسعاف .. و تلبسو قناع الأوكسجين و داليا تهبهب ليهو ..
يسوق براهو كيف يعني ؟؟ .. ده تفريط في أوضاع إنسانية كريتيكال , و ممكن وضع زي يجيب لمرتك المشوطنة دي التحقيقات و الهوا .. و إنت ياخدوك شبهة مع تريننق سوتك داك نبقى في عاك عيك .
بركة الطلع يشبه عمنا منصور ما بقى شبه بشاشا ..
كان هسه جابوك في النشرة ( فساد في الأرض و ترويع الآمنين ) .. و : نفذ الحكم في ساحة العدل بمنطقة الرياض .
في بالي إقتراح ليك .. و إنت راجل أخو .
شوف يا مسلم : تقدم تشتغل كادر طبي متطوع في الليل ..
افتكر في حركة زي دي في السعودية .. و ظابطة مع نوعك ده .
كلما بالليل بالليل تقوم تسخن عشاك من مشلعيبك تندفس جد ..
تلبس لبس خمسة و شيشتك في ختراتك و شنطة حقنك في أباطك .. و طظظظظظ الإسبتالية ..
تلازم الوليه دي بوظيفة دايمة بدل البهدلة المجانية دي .
منها تبقى الزولة دي ( هن رحمة لنا ) .. و إنت تبقى ( الكاظمون الغيظ ) .
آخر الشهر تقسم ليك نص الستة و تعشيك في برج المملكة .. سمك .
و تعال بعد داك أديني حقنة شرقية لو ما خريف خريفين عينوك إصطشاري ..
و داليا الواحدة دي بقت داية غانونية .
......
مساء الخير يا دلوش ..
كان ختيتي كلامات سعد ده ما بتجيك عوجة ..
أمسكي اب كرنك بتاعك ده و أرجي الله .
| |
|
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: عمران بابكر بدري)
|
ولو ان الكلام موجه ل(عزيزي الزوج) لكن حاتشالق وارد
اولا
ساتحفظ على كلمة (عاطلة) واستبدل الكلمة بكلمة (ربة المنزل)
وعليه
يكون الفرق بين (ربة العمل) و (ربة المنزل) ان الاولى بتأخد راتب ثابت
والثانية لا
السؤال مطروح طبعا باعتبار ان العمل داخل المنزل (طبخ وكنس وغسل ومكوة) هو عمل خاص بالمرأة فقط...
(دي زي العفش داخل البص مسؤلية صاحبه)
مسؤوليتها التي من اجلها
تزوجها الرجل...يعني درجة اعلى من الشغالة شوية..بفارق ان الشغالة بتأخد راتب برضو، والزوجة لا
عليه
النعكس السؤال....مين قال اساسا ان هذه من وظائف الزوجة؟!
!!!!!!!
ثانيا
باعتبار ان (تربية الابناء) من مهمة المرأة الاساسية دون الزوج
مين قال؟؟؟!!!
ثالثا
ان القرار بيد الزوج...باعتباره الامر الناهي له الامر وللزوجة الطاعة؟؟؟!
برضو مين قال؟؟؟!!
باعتبار ان الرجال قوامين على النساء
لا غضاضة..لكن...اين ( بما فضل بعضهم على بعض)
؟؟؟!!
مسؤولية المنزل وأعماله الشاقة ليست من مهام الزوجة على فكرة...وليس هذا من الدين في شئ ولكنه العرف والمجتمع
ال مسئولية مشركة بل ان الزوج يجب ان يتحمل جلها...ولا اعني ماديا فقط كان يكون الزوج
مجرد البنك المركزي للعائلة
ده حتى إرضاع المرأة لابنها في الدين...تؤجر عليه ولا اعني جزاء الله فقط..بل اعني انه من حقها ان (تأخذ فلوس رسمي) من الاب في هذه العملية الشاقة
لماذا تتنازل المرأة عن طموحها وسني دراستها واجتهادها لتحمل مسئولية يجب ان تكون مشتركة بينها والزوج؟؟!!
| |
|
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: داليا الكباشى)
|
عنى
تتوقف الإجابة - إن جاز لي أن أقول إجابة- على ما هو العمل وطبيعته
إن كان عمل يكسب الشخصية منافع عدة ما كانت أن تتوفر فى (العطالة) فمرحى
ثم إن تبينت المنافع وتأكد أنها ستحدث نقلة نوعية فسنستأذن أحبابنا الصغار فى ان يبقوا ولو لوقت قليل فى الحضانة ريثما تتحقق المنافع ليعودوا إلينا بعد موسم الحصاد أكثر طمأنينة وسعادة
نعم
دكتورة إزيك
| |
|
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: walid taha)
|
محمد المرتضى سلامات ياخ ..
أولاً بالتبادي تصحيح معلومة :
إنت قايل البيتولدوا في الديم ما ناس راحات ؟؟ .. غلطان يا ابن خالتي ..
كنت في طفولتي الغضة أتمتع بكمريرة حبشية الجنسية .. و بلبس بربتوز اب لستك و أنا ما أزال في ميعة براءتي . و تأتيني عربية الزبادي خشم الباب الهط منها كورتين بنات حفرة ..
و كذلك ندخل السينامات لوج عائلي ( و أنا محمول على الحجر .. و البزازة أم حليب كافوري تتدلع في حضني ) ..
هذا علماً أني مولود في مستشفى الخرطوم و على يد دكتور سمير وليم ( المعلومة دي لأساسي و تمبس و الحاجات البالشكل ده و رهطهم .. ناس ولادة الحبل ) ..
و قيل أن أمي كانت خمجانة و دلوعة .. و عامطة في بطن بيتها, أنجبتنا نحنا أربعة تيران ما شا الله و زهرتين عسل
لذلك كان عندنا برضو - من ضمن العنديات - سرير دبل ابو مخده طويييييله داك .. و بقربه سرير للبيبي ( اللي هو أنا ) ..
و سهارة .. أي و الله سهارة , لمبة مدردمة كده لونها أزرق خفيييييييييييف .. تتغز في الكوبس و تداعب احلامي طول الليل و انا متجدع في سريري اب مرجيحة .
قسماً عظماً هذا ليس من قبيل الفنكهة .. ده الحاصل ..
أخوك كان " عب كبير " .. و تراطيب , و ابوي سواق قطر أصلي , و لا سائل في ناس ابو العلا زاتم .
عليه فإن " مربيتي " كانت كمريرة بفستان مكشكش و نقس نجاشي تليد ..
و تناديني بـ " نيمان " .. لعجمة في لسانها الأمهري طلعت إسمي نيمان بدلا عن عماد .
و ارتدت روضة ست صفية .. روضة معتبرة زيها زي الروضة بتاعت السيد مساعد الرئيس .
و عندي ###### كمان .. اب صوف فروة داك و اسمو جيمو .. أها !!
و لي قطةٌ صغيرة برضو .. لكن بايخه كانت , ما زي جيمو .
دي فذلكة تاريخية للرهط الحاقدين الهنا ديل ..
و اهو ربك رب الخير قيّض لنا سعد يزازي بداليا .. داليا تزازي بعزيزي القاريء و عزيزها تمبس ..
و أنا أزازي بأساسي و شيعته المتضهبين .. الما بيعرفوا قيمة الكمريرة و أولاد الذوات الزينا .
..............
التحية للمرأة العامطة ..
و أي إمرأة شايلة شيلة هذا العالم و ما قالت بغم .
| |
|
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: صبري طه)
|
يا د. داليا ، إزيّك، وود ناس بيتنا..
الحكومة عندي ما شغالة، وهي بتاعت رياضيات وفيزياء وحاجات زي دي
ودي طبعاً كُرهتي في الدنيا..
أها تدوّر في قصة دايرة تشتغل دي زي كم شهر كده وتصر عليها
وأخوك طبعاً (حريف توظيف) يعني أشغلها أمبارح لو داير، لكن أعمل فيها غمران
في الآآآآخر لمن أوافق وأقول ليها خلاص جهزي نفسك الشهر الجايي إنتي نازلة شغل
تقوم هي تاخد ليها كم يوم كده، وتقول لي البت لسة صغيرة، خليها تكبر شوية
وبعد البت تكبر شوية، تكون هي منتظرة ليها ضيف جديد،
تقوم تقول لي بعد ما أولد ح أنزل شغل طوالي
وبعد ما تولد، تقول لي خلي الود يكبر شوية
ومُدورين في القصة دي لينا سبعة سنين.
لكن بصراحة في زمننا ده أخير الشغل من قعدة البيت..
| |
|
|
|
|
|
|
|
|
|
Re: هل تفضل أن تكون زوجتك (عاملة) أم (عاطلة) ؟ (Re: Salah Abdulla)
|
الخدامة بى 400 جنيه ...
الغسيل والمكوة تقريباً مية جنيه تاني ...
خمسة ستة مرقات في حدود الف جنيه في الشهر ...
المشكلة في طبيخ البيت ...
طيب الواحد يجيب طباخ ولاّ يعرس؟
بعدين لو مرتك شغالة حا تقعد تقول ليك عربيتي ومشيت الكوفير وشنو ما تعرف .... والكلام دا كلو بدون إذن لأنو انت ما دافع ..
طيب العمل شنو؟
والله مرّة قابلنا - انا وعشة طيور - بت شابة سغيرة وجميلة ما قادرة تدخل في ارتباط مع أي شاب بسبب ثروتها الطائلة ومسؤولياتها في إدارة اعمالها ... قالت لينا انو ثروتها ومسؤولياتها بقت ليها لعنة عاطفية ... ما دايرة زول يحبها ويتزوجها بخلفية انها مقرّشة ... وما حا تسلم ثروتها لى زوج المستقبل يديرها ليها لأنها تجد نفسها في إدارة اعمالها وعندها أم واخوات سغار ما بتسلم مصيرهم لى زول ... مثقفة وذكية ... قالت لى زول حبتو انها عندها اربعة ركشات وهي عندها خمسة ستة شركات ... عشان تفسر السيولة العندها دايماً والصرف السهل وانشغالها المفاجئ بين الحين والآخر ... قالت لينا انو بعد اكتشف الحقيقة فلسع كالعادة ...
هل مشكلتنا مع المرأة العاملة مشكلة مع توزيع الوقت والمهام؟ أم مشكلة "بما أنفقوا وما فضل الله بعضهم على بعض"؟
... المهم ....
| |
|
|
|
|
|
|
| |
داليا الكباشى
محمد عبد الماجد الصايم
طلحة عبدالله
نادر النور آدم
Hani Arabi Mohamed
العوض المسلمي
Mutwali Malik
Hassan Bakri Nugud
khaleel
Mubarak Eltayeb
ود الخليفه
فايزودالقاضي
الخير محمد عوض
محمد مختار جعفر
ALZOLZATOO
Awadallah Bashir
Emad Abdulla
saadeldin abdelrahman
زهير عثمان حمد
alsngaq
محمد المرتضى حامد
حافظ انقابو
tmbis
بدر الدين محمد
عمران بابكر بدري
بت قضيم
jini
أحمد الشايقي
تبارك شيخ الدين جبريل
فيس بوك
تويتر
انستقرام
يوتيوب
بنتيريست