زمان وفي وقت من الاوقات ، ووقتها كنت شافعة ساي .. بعاين بعيوني وبسال بقلبي .. خالتي دي مالها طوالي ماشة الخياط وجاية من الخياط ، شايلة قماش جميل في يديها .. وراجعة بيهو فستان طويل وانيق او قصير فوق الركبة ! وبكرة بتقول ماشة تتصور .. مرة ترفع شعرها لفوق .. وتخت فوقو وردة كبيرة بالجمبة .. ومرة تخليهو مسدول على كتفها .. ومرة تضفره وتربط شرائط ملونة في طرفو .. مرة تلبس باروكة شعرها بني فاتح ، ومرة اسود ومرة احمر !
صور زيزي ودا كان اسم خالتي ، كانت دائما بتخليني .. اسرح بخيالي البكر واطوف عوالم جميلة .. خلاص بتخيل روحي لابسة زي فستانها اللفي الصورة دي .. وبتخيلو ملون .. لان الصور كانت ابيض واسود .. بقوم بختار الالوان بخيالي .. واسرح مع كل لون .. واتخيل لون الشبط .. والشنطة الصغيرة البكون شايلاها في يدي زي ما زيزي شايلة ليها شنطة .. وبلبس بخيالي كل فساتينها .. بنات خالات ، زيزي .. كانن زيها كدا ، نفس الفستاتين .. باختلاف الالوان وبعض الابتكارات .. الخياط كان واحد .. كلهن بمشن ليه.. وكان بطلع ليهم الفستان في مواعيدو .. ولما يكون في عرس او مناسبة .. زيزي كانت بتسوقني وبنمشي نحرس الخياط لمن يخلص ليها فستانها .. وبكون عندو زحمة غريبة خلاص .. بنات ونسوان .. وشفع ! كل واحدة منتظرة يخيط ليها .. في الوقت داك انا كنت بكون بلعب قدام الدكان حقو ... وبتعرف على بعض البنات القدري .. في الوقت داكـ زيزي بتكون وصلت مرحلة البروفة .. وبعد كدا ممكن نمشي البيت .. ومعانا الفستان
... يتبع
06-30-2010, 09:28 AM
عفاف الصادق بابكر عفاف الصادق بابكر
تاريخ التسجيل: 08-10-2009
مجموع المشاركات: 4188
دا كان فستان زيزي .. رجعنا بيهو البيت ووقفت قدام المرايا ساعة وهي قاعدة تقيس فيه ، وتسألني : - اها كيف ؟ سمح الفستان دا ؟ وارد عليها وانا بعاين ليها من فوق لتحت .. - ايوة سمح .. شديد !
اطلب منها تخليني اقيسو .. تضحك وتقول لي .. كبير عليكـ .. شديد ! وتمشي فووو وتدخلو جوة الدولاب ...
طبعا لاني عنيدة ورأسي زي الحجر زي ما زيزي قاعدة تقول لي .. بخليها تدخل الحمام ، وبطلع الفستان والبسو واعاين لروحي في المرايا ، طبعا الفستان الكان واصل في خالتي الركبة بس.. بصل عندي لنهاية قدمي !
وقبال زيزي تطلع من الحمام بكون رجعت الفستان محلو ، وانا بسمعها بتغني في اغنية ..
قطارو حلا يا ناس قطارو حلا تركـ لعمري الالام والمذلة تركـ لعمري الالام والمذلة .. حبيبي سافر .. يا ناس ودعتو الله ...
.. ياخي زيزي دي دائما كانت بتكون فرحانة ومبسوطة .. وطوالي هي بتغني .. وبتسمع برنامج ما يطلبه المستمعون ..
مرة كانت بتحضر في التلفزيون .. وقاموا جابوا البلابل .. لابسات .. فساتين رهيبا كدا .. اها زيزي دي .. فرحت فرح .. وقعدت تنطط وترقص .. وتقول لي انا ماشة السوق بكره وحاسوقكـ معاي ... وفجأة قامت نادت .. اميرة جارتنا بالحيطة وقالت ليها شغلي التلفزيون سريع .. واحفظي لي قصة فساتين البلابل دي ...
اميرة جرت وبعد شوية جاتها بالدرب شايلة ورقة وقلم .. وفيها رسمة للفستان .. حق البلابل ...
...يتبع
06-30-2010, 09:39 AM
سمرية سمرية
تاريخ التسجيل: 01-16-2005
مجموع المشاركات: 2803
ودي كانت اغنية البلابل الجابوها في التلفزيون ... والخلت زيزي تقرر تمشي السوق تشتري قماش وتقصو نفس القصة ...
اها طيلة اليوم كانت زيزي بتغني :
مستحيل عن حبكـ اميل .. اساهر الليل انا يا جميل .. وكيف اطيق من بعدك بعاد وقل هجري وزاد البعــاد متى طيفك يرجع يعاااد يبقى صادق يوفي الميعاد مستحيل عن حبك اميل اساهر الليل انا يا جميل
وهي بتكنس الواضة ، وهي بتغسل العدة ، وهي بتكشح الموية حقت البلاعة بره الحوش .. حتي حبوبا كوركت فيها وقالت ليه : يابت ، خلاص النوديكـ المسرح القومي تغني هناكـ ..
زيزي كانت مبسوطة ، وكل شوية تقول العصر حنمشي السوق .. استحمي والبس شبطك وخليكـ جاهزة !
اها اليوم داكـ زيزي كان عليها تخت الغداء ، قامت رشت الحوش سريع كدا ، وكنستو .. قووام .. وفرشت الفرش اللفي الحوش .. وقوام قطعت السلطة ، وقطعت العيش وكبت فيهو العدس .. وجري جابت الصينية وختتها قدام حبوبا ..
حبوبا عاينت للصينية وعاينت لزيزي .. وقالت ليها : - دي شنو مالكـ ما قطعتي السلطة ناعمة ؟ من بتين قاعدين ناكل السلطة كبارة مع العدس .. هوي يابتـ ؟
زيزي .. سكتت ساي .. وجرتني من يدي ورمتني فوق البنبر .. قالت لي : -اقعدي اكلي .. العدس كان ناااااشف ولا مرشوش كويس .. زيزي كل شوية تغمز لي عشان آكل سريع ... والعدس الناشف قاعد يخنق فيني .. حبوبا .. قداما كان ليييين ، وما جابت خبر .. قمت لكزت زيزي .. وبراحة قلت ليها دايرة عدس .. قدامي ناششششف
الساعة النهرتني ليكم .. لما اللقمة وقعت من يدي .. - طيب من قبيل ما تقولي كدا ، بلا يخمكــ ما بعرف ليه زيزي فجأة مزاجها اتعكر .. وبقت تكوركـ فيني ..
لانو دايما في مشوار السوق دا زيزي بتشتري لي حاجة باردة ... قزازة ليموناضة كلها بشربها براي .. زيزي بتحب تشرب الجنجر .. واميرة بتحب تشرب الليموناضة الحمرا .. مع الصودا .. !
اها زيزي قعدت تقول لحبوبا : - وحات الله يمة ما بنتأخر ، بنجي قووام .. شووفتي قبل الواضة تمغرب بنكون جينا .. ! حبوبا قالت ليها : - مافي مشي وما توجعي لي رأسي .. - يمة انت مالكـ الليلة .. ما كل مرة قاعدة تخليني امش .. - اها الليلة ما دايرة اخليكـ ، حتسوي شنو ؟ - يمة ياخي ، عليك الله ، القماش ما بلقاهو تاني .. - ياتو قماش دا الما بتلقو ... القماش كمان بكمل من السوق ؟ - قماش البلابل يمة ، امبارح جابو الغنية وهسي حتلاقي ... البنات كلن جرن يشترنو .. - غنية شنو ؟ - غنية مستحيل عن حبكـ اميل .. - حبكـ ؟ يا بت قلت ليك مافي مشي ..
اها في اللحظة دي جات اميرة ولقت زيزي تحنس في حبوبا .. وقعدت هي ذاتها تحنس فيها ، لغاية ما حبوبا كرهت يومها ذاتو .. وقالت سمح بوافق .. بس على شرط تجيبن لي .. قماش دمورية انجد بيهو المراتب .. وفتيل محلبية ، وطرحة يكون قماشها بارد ..
وقوام جرتني زيزي من يدي ومرقنا الشارع .. وقدامنا اميرة .. وقبل ما نركب المواصلات كانت اميرة بتعاين في الرسمة ..اللفي يديها ..
وبتغني هي ذاتها :
انا الغيث الـ... هموم وانا الساقي الحساد سموم وانا الكايد اعدائي عموم مستحيل عن حبك اميل اساهر الليل انا يا جميل
... يتبع ..
06-30-2010, 09:46 AM
سمرية سمرية
تاريخ التسجيل: 01-16-2005
مجموع المشاركات: 2803
ووصلنا السوق ... اول حاجة اميرة قالت نمشي لبتاع الكريمات ، لانها دايرة تشوف الكريم الاشتريتو منو المرة الفات ، لانه نفع معاها زيزي قالت : لا نمشي اول لمحل القماش .. اها وقفن في نص السوق ، ويتحاججن سااااي اميرة قالت : بتاع الكريم محلو الاول .. وزيري قالت : هي جاية للقماش وتمشي للقماش الاول
المهم بعد شوية اميرة وافقت تمشي لمحل القماش وكانت زعلانة ..
دخلنا المحل لقيناهو زحمة شديد .. في نسوان وبنات واقفات جوة وبره .. وكل واحدة ماسكة ليها قماش في يدها ..
طوالي زيزي دخلت في النص .. وقعدت تقول ليهو : اديني قماش البلابل حق اغنية مستحيل عن حبكـ اميل .. بتاع المحل قال ليها : دا انتهى .. الليلة جانا القماش اللبسنو في اغنية نور بيتنا .. ودا قماش فيهو لونين .. ! زيزي زعلت وقالت ليه : - ياخي نحنا زبوناتكـ ، شوف لينا القماش دا باي طريقة .. !
بتاع المحل ، قال ليها : - والله انتهى .. ولا في المخزن مافي .. لكن ممكن يجينا بعد اسبوع زيزي وقفت في نص المحل وزي الدايرة تبكي كدا .. قالت ليهو : طيب اسوي شنو هسي ؟ وكانت غازة كوعها في وسطها .. والمحل كان مليان وزحمة وكل البنات بشترن في نور بيتنا ...
اميرة قالت نور بيتنا ، قماشو احلى من مستحيل عن حبكـ .. وهي حتشتريهو .. زيزي بقت محتارة .. وتقول لاميرة انا كان رجعت بدون القماش يمة ما حتريحيني
الوقت داكـ انا كنت بفكر في الليموناضة .. لا هاميني قماش لا نور بيتنا ..
اميرة اشترت تلاتة متر ونص .. وزيزي لسه ما مقتنعة .. وواقفة لما القماش حق نور بيتنا قرب يكمل ...
اها قامت اشترت .. زي اميرة ..
ومرقنا ... مشينا على محل الكريمات
واشترينا الليموناضة ... وكانت باااااااااااااااااااااردة ولذيذة ...
ولما وصلنا البيت ... كان المغرب لسه ما جا ..
طوالي فتحنا التلفزيون ... قلت كدي اتابع كل الاغاني البجيبوها ...لانو زيزي قالت دار تشوف القماش حق نور بيتنا دا اليوم الاول ما جابوا اي غنية للبلابل ..
جابوا غنية بتقول .. شفت التوب ومالاقنى أجمل منو بس التوب وسيد التوب يكون كيفنو نظرة سريعة مرت بيها ما اتمتعت خطوة وحيدة بينى وبينها لو أسرعت خلت طيبها مالى الساحة ما اتشبعت زيها مافى لا شاهدت لانى سمعت
طوالي جريت وكوركت لزيزي .. تعالي جابوا غنية كدي..
جات زيزي جارية .. وكانت بتسوي في العشا..
لما شافت الغنية نهرتني وقالت لي : - توب شنو .. ..يا هبلة ؟ الغنية دي كلمي بيها يمة .. يمكن تعجبها .. !
ناديت حبوبا : وجات فرحانة .. كانو الفنان دا كان بغني ليها هي .. قعدت تسرح في مسايرها وتغني معاهو .. حبوبا كانت حافظة الغنية .. ومبسوطة شديد .. تقول وراهو ..
من جاراتها قادلة حلاتها دخلت بيتها سرت حداها داير ألقاها تب مالاقيتها متكى كتيفها دلت ايدها حتى الحنة ديك ما نسيتها قادت نارى لو تطفيها لى ياريتها استنيت وقلت اظنو ترجع تانى يمكن أشوفها وأصلو الزول حياتو أمانى نظرة بريئة مهما ألاقى ماهمانى لو القاها يرتاح بالى ويصبح هانى
سألت حبوبا ، قلت ليها انتي دا منو يا حبوبا ..
حبوبا .. ردت بعد مسافة .. قالت لي : - قلتي شنو يابت ؟
وقعدت اسمع في الغنية انا ذاتي ... واحاول احفظ زي ما حبوبا .. كانت حافظة ..
لاني كنت مساهرة في التلفزيون اشوف كانو جابو الاغنية حقت نور بيتنا ..
عشان اكوركـ لزيزي .. وطبعا عشان زيزي كانت عندها قراية كتيرة .. حبوبا كانت بتقول ليها : ما تحضري التلفزيون انتي السنة دي ممتحنة ..
اها انا كنت بحضر ليها ولو جابو الغنية اكوركـ ليها من بيت ناس اميرة عشان تجي تشوفها ..
ناس اميرة امها بترفع التلفزيون فوق مرات ، لما جنها يكون قايم عليها .. زيزي كانت بتقول كدا ..
وحبوبا كانت بتشاكلها ، وتقول ليها : يابت خلي عندكـ ادب .. دي مرا بتربي ايتام ودايرهم ينجحوا ليها ...
زيزي كانت بتقول ليها : - - لكن يمة كل مرة بتكره اميرة بحركاتها دي ..
- انت مالك امها ومخيرها فيها .. اريتو لو كان عندي قلب زي حق الشفة دي .. كان وريتكـ العين الحمرا ..
براحة زيزي قالت : ويعني هسي ما مورايني ليها ... ؟
حبوبا ما سمعتها .. انا بس السمعتها .. وكنت عاوزة اضحكـ بس زيزي حمرت لي ..
بعد يومين ، زيزي كانت نايمة فوق اوضة حسن خالي .. قاموا جابوا اغنية سمحة كدا، طوالي قلت خلاص دي بتكون ياها ...
مشيت صحيت زيزي .. قامت قالت لي خليني انوم .. ياخي قلت ليها جابو الغنية .. زيزي طوالي قالت لي : ياتو غنية .. قلت ليها : حقت نور بيتنا
زيزي طوالي نطت من السرير وجرت للتلفزيون ..
لقت الغنية شغالة وبتقول :
اليوم داكـ دقتني جنس دقة ، لغاية هسي ما عارفة ليه .. انا سويت ليها شنو ؟!
وقالت لي خلاص ما دايراكــ تشوفي لي .. نهرتني وقالت لي امشي نومي !
نمت والغنية كانت لسه شغالة .. وبتقول الرقص قيافة .. وفيكـ لطافة .. يا لابس البني ... بن بنـــبنــ تيررررريرا يا نعسان ... يا نعسان وغالبك نومك .. لف شمال .. لف يمين .. دور .. دور يا لابس البنبيييييييييييييييييي !
بنــ بنــ بنـــــ .. يا بنبيييييييييييييييي .. تريرارا اااا ...
يتبع ..
06-30-2010, 09:53 AM
سمرية سمرية
تاريخ التسجيل: 01-16-2005
مجموع المشاركات: 2803
تاني يوم كنت قاعدة في البيت ، وحبوبا قامت مرقت ... قمت شغلت الرادي .. وقعدت اسمع في ركن الاطفال .. يقدمو عمكم مختار ... اكتر حاجة كنت بحبها لما اسمع الولد داكـ بقول ( نكتتتتتتتتتتة ) كنت بضحك من قبل ما يقولوها ذاتو ...
اها قاموا قالوا نكتة كدا : قالوا في مجموعة من الاغبياء في احد الاحياء قالوا كان عندهم حفرة كل يوم واقع فيها زول جايبلو الاسعاف مودنو المستشفي قاموا قالوا احسن يفكرو في حل للمشكلة ، واحد قال نكسر المستشفي ونبنيها جنب الحفرة رد واحد تاني قال احسن حاجة ندفن الحفرة دي ونمشي نحفر واحدة جنب المستشفي الجماعة صفقوا ليهو
اها قعدت اضحك شديد .. لما وقعت من البنبر ...
جات زيزي جارية وقالت لي في شنو ؟ حكيت ليها النكتة قامت قالت لي ، قددددددددددددديمة ...
قامت حكت لي نكتة من عندها :
واحد متخلف قاعد في البيت جوهو ناس الوساخة قالوا ليهو: عندكم وساخة ؟ قاليهم: دقيقة بس.. مشى لأمه سألها: يا امي عندكم وساخة ؟ قالت ليهو: ايوه عندنا.. جاء راجع لناس الوساخة وقاليهم: شكراً جزيلاً قالوا ليكم عندنا ما دايرين!
وقبال ما اضحكـ زيزي هي ذاتها قعدت تضحكـ وتمسكـ بطنها ..
حبوبا جات لقيتنا بنضحك .. شديد ..
قامت سالت زيزي : في شنو ؟
زيزي قالت ليها : ماف شيء بنضحك ساي
حبوبا قالت ليها : الضحكــ من غير سبب .... ووقفت حبوبا تشرب في الموية من الزير
من الجري لمن رجليني وجعوني .. وبطني ذاتها بقت توجعني ... قامت حبوبا جابت لي كاسترد فيه ليمون وموية قنقليز ..
قعدت اشرب فيه .. وبطني بقت توجعني جد جد ..
في اللحظة دي الرادي كان شغال وقاموا جابو غنية ..
شوف العين قالت ده لا لا صدت من تيها ودلالا ريدتك ساكنة الجوف خلالا و الاعضاء امتزجت خلالا براق سنك شق لالا وسهمك صاب احشاي قلالا اسباب الغي و العلالا ضمرتها والخصر العلالا نور في نور ياذا الجلالا وخدانا بالمعه انجلال في الترنيع ماليك مثالا علمتي الغصن الرتالا شوفتك كم عاشق اتالا يانسام اوصف جمالا والقامة السيرك امالا اوصف لي اسباب كمالا وقول لي ام خد هجراني مالا النسام شال الرسالة وفي التوضيح روق رسالا ذكرني الرطب العسالا وهاج الشوق والدمعة سالا .....
لما سمعت الحتة الاخيرة دي قمت بكيت شديد .. لانو بطني قعدت توجعني زي التقول جايني اسهال عديل
يتبع ..
(عدل بواسطة سمرية on 06-30-2010, 09:54 AM) (عدل بواسطة سمرية on 06-30-2010, 09:54 AM)
06-30-2010, 09:58 AM
سمرية سمرية
تاريخ التسجيل: 01-16-2005
مجموع المشاركات: 2803
وصلنا المركز الصحي .. والدكتور قال لحبوبا خليها تفحص الملاريا .. فحصنا الملاريا ، طلعت عندي .. والدكتور قال كريات الدم البيضاء مرتفعة شوية .. الدكتور قام كتب لي دواء كدا لوجع البطن وحقن للملاريا .. ومشينا صرفنا الدواء .. واخدت الحقنة حقت الملاريا .. في المركز ذاتو
رجعنا البيت لقينا زيزي .. قاعدة هي واميرة .. يتونسو ...
رقية قالت هي قاعدة تغسل الهدوم هسي ، واول ما تلخص بتجي طوالي ..
اهن حبوبا رجت رقية ولما اتاخرت قامت مرقت ..
زيزي طوالي جرت لبست فستانها اللخدر .. وشالت طرحتها .. قالت لي : بجي قوام ما بتأخر .. وقبل زيزي ما تمرق .. سمعت صوت رقية خاشة من باب البيت ..
زيزي طوالي رمت طرحتها .. وصنقرت في السرير .. رقية دخلت وسلمت علي وعلى زيزي .. وكنت انا راقدة في اوضة حسن لانها قريب الباب وشباكها بجيب هوا سمح .. .. رقية قعدت تنضم مع زيزي .. زيزي كانت واقفة وابت تقعد كلو كلو .. رقية قعدت تنضم في حاجات كتيرة وتحكي في انها زاتها كانت عيانة اكلت ملاح خدرا بايت سوا ليها وجع بطن ... وقالت اصلو مرت اخوها دي ما قاعدة تسوي الاكل بذمة .. حتى انها مرة سوت ليهم قرع .. تلاتة يوم رقدوا عيانين .. قامت زيزي مشت سوت ليها كباية عصير ، في المسافة دي رقية قامت ادتني الحقنة .. وقعدت تحكي لي عن مرت اخوها .. وانا ولا كنت بسمع فيها ... لانها قصتها كلها ملاحات ساااااااي ...
زيزي جابت العصير وادتو لرقية .. رقية شالتو وشربتو واتكت في المخدة ورفعت رجلينها في السرير ...
في اللحظة دي ، اميرة كوركت لزيزي .. وقالت ليها امرقي .. رقية سمعتها وقالت ليها : مارقين مشوار ولا شنو ؟ زيزي قالت ليها : لالا . ما مارقين ... بس اميرة دايراني اجي اقرا معاها وانا قلت ليها يمة مافي ونا حارسة البيت رقية قالت ليها- قراية شنو في الحر دا ؟ عشان كدا انا خليت القراية ام دق دي ..
قامت زيري جرت لاميرة بفوق الحيطة وقالت ليها كلام ..
زيزي جات ووقفت جمب الدولاب ، وانا عرفتها ابت تكلم رقية انهن ماشات الخياط .. عشان اميرة بتقول رقية دي خشمها خفيف ، وهي خايفة برضو وقت تجي تديني الحقنة تسأل زيزي من الخياط او تكلم حبوبا
.. يتبع ..
06-30-2010, 10:05 AM
سمرية سمرية
تاريخ التسجيل: 01-16-2005
مجموع المشاركات: 2803
في الليل ، فتحت التلفزيون ... وقعدت اتفرج ولقيت في برنامج بجيب اغنيات كتيرة خلاص وفجأة شووفت ليكم الاغنية دي
واول ما سمعت كلمة نور بيتنا اتذكرت قماش زيزي .. والخياط .. طوالي جريت ناديت زيزي ، وكانت واقفة بتكلم في حسن خالي وبتقول ليهو هي دايرة قروش .. لانو عندها قماش عند الخياط .. ودار تمشي تجيبو قبال يودرو ليها .. حسن قال ما عندو قروش هسي وهي قعدت تحنس فيهو شديد ...
حسن قال ليها : - هو الخياط حقكم السجمان دا بعرف يخيط زي فساتين البلابل دي؟ - والله يا حسن ، الخياط دا اي قصة تجيبها ليهو بطلعها ليك ياها ذاتها .. قال هو علمو الخياطة دي واحد هندي كان جارهم في حي العرب ..
حسن قال ليها هاكي دي قروش الخياط ، بس تاني شهر ما اشوف وشكـ دا ..
زيزي . .. زغردت براحة .. وجرت تسوي ليهو العشاء ..
وانا رقدت جمب حبوبا ... قامت سالتني ... خالتك ام خشما زي خشم السمبريا ، بتنضم مع اخوها بتقول شنو ...؟ قلت لحبوبا : ما عارفة .. حبوبا جرتني من يدي ، وقالت لي : - هوي يا بت خلاص بتدوري تتعلمي حركات زيزي دي ..؟! برجعكـ بكرة دي لامـكـ.. قالت ما عارفة قال ...
يتبع ...
07-01-2010, 07:08 AM
سمرية سمرية
تاريخ التسجيل: 01-16-2005
مجموع المشاركات: 2803
حبوبا قعدت جمب الشفة في السرير وانا قعدت في البنبر .. ومليت الكوز موية لانو حبوبا قالت الشفة ما بتقدر تاكل الا وكوز الموية في يدها
- انتي يا الشفة توبك دا مووش ياهو الجابو ليكـ اخوكـ من جدة ؟ - اي ياهو ذاتو - ومالك يختي مجرجارهو في الحلة ، ما تخليهو للمناسبات - مناسبات شنو يا حاجة ، هو انا قاعدة امشي مناسبات ؟ - مالك ما بتمشي ، قالوا المرة كان راجلها مات ما بتطلع ولا تعيش زيها وزي خلق الله ؟ - يابتي انتي لسه صغيرة ، البسي وامرقي وشوفي الدنيا .. - وين الصووغر يا حاجة .. يا حليلو ؟ - مالكـ نايرة وزينة .. وتحمدي الله - انا وقت ابو وليداتي مات ، كنت شايلة زيزي دي في بطني .. وحاتك التوب الابيض دا رميتو طوالي بعد طلعت من الحبس .. وبقيت البس عادي .. مالي بضيع رقبتي وشبابي .. وهو مات وشبع مووت - تقولي شنو ما قدرت .. غلبني .. - هو شنو الغلبك ، انت بتكوني خايفة ساي من نسابتكـ؟ - بري ما خايفة ، اخاف ليه ؟ - طيب مالك ، لمي التياب السمحة للمرقات .. وادقشي باي حاجة من السوق الشعبي .. - السوق الشعبي دا شووفتي ليهو قبال يموت المرحوم ... - سجمي انتي ما نصيحة ؟ كيفن والبجيب ليك اللبس منو .. ؟ - بناتي وقت يمشن برسلن يجيبن لي .. - اصبري يوم بسوقكـ معاي سوق امدرمان ، تشوفي التياب كيف واللبس كيف ؟ - الله يهون ، بمشي معاك اصلو نفسي في توب اب قيجية بااارد كدا .. - خلاص بسوقك ...
- النبي تاكلي من الفسيخ دا يا الشفة مالك تنقدي في الاكل كدا .. - باكل والله ، ما شاكة .. - فضلة خيركـ - يا بت اجري جيبي زيادة فسيخ .. رسلتني حبوبا ..
جيت لقيت زيزي واميرة رجعن .. وشايلات الفساتين ..
زيزي قعدت اميرة في بنبري ..وقالت لي اجري جيبي بنابر تانية .. مشيت تحت سرير حبوبا الجوة .. جبت البنابر وجيت انا كنت قربت اشبع .. قعدنا ناكل وزيزي قالت هي جيعانة شديد.. - مشيتو بشنو ؟ حبوبا سالت ناس زيزي - مشينا بــ حداشر خ يا يمة التفت حبوبا للشفة .. - غايتو البت دي يا الشفة غلبتني .. اسوي معاها شنو - كلكن كدا .. بنات الزمن دا .. - هسي شووفي جنس الحداشر خ دي .. ؟ - يعني مشن بكرعينن .. - اي عارفة .. - كان شووفتي يمة ، الخياط لقيناهو فاضي الليلة .. - مالو قال ؟ - قال الزحمة كانت امس .. بركة الما مشينا - واهن طلعن كيف الفساتين .. - اصبري يمة هسي بنقيسن ليكم ، طلعوا حاجة كدا
بعد الشفة مشت بيتها .. وساقت اميرة معاها .. زيزي نادتني وقالت لي تعالي دايرة اقيس الفستان دا تاني .. قامت لبستو ووقفت قدام المرايا وقعدت تقول لي في حاجة ناقصة .. موووش ؟ عاينت ما لقيت اي حاجة .. الفستان طويل ومخيط كويس ... قالت لي : لا مافي الفستان .. - نان في شنو ؟ - في الهيئة كلها ؟ - هيئئة ؟ سكتت لاني ما عرفت هيئة يعني شنو ..؟ بس اتذكرت ..في واحد جارنا حبوبا بتقول شغال في الهيئة .. قامت زيزي قعدت ترفع شعرها لفوق ... وتحاول تثبتو بيدها وتعاين في المرايا .. قالت لي : كدي اديني المشبك حق الشعر اللفي ضلفتي دي. فتحت الضلفة لقيت مشابك كتيرة وفينوكات .. وتوكات كبيرة وحاجات كتيرة خلاص .. - ياتو مشبكـ يا زيزي ؟ - اللحمر القدامك دا .. - سمح ناولتها المشبك مسكت بيهو شعرها .. وقعدت تعاين لروحها .. وقالت لي : الشعر دا مفروض يكون كدا .. قلت ليها : يكون لفوق يعني .. ؟ نهرتني : لا يا عبيطة ، يكون .. ولا اقول ليك .. خليهو الكلام دا هسي - خليتو ..
- انتي يا فاتن موووش قبيل سويتو دكوة انتي ويمة .. - انا نضفت الفول .. وحبوبا دقتو .. - طيب ما تجري تسوي لينا قنقليز بالشطة والدكوة مووش بتعرفي ..؟ - اي بعرف .. - خلاص اجري شيلي حبة دكوة واعجنيها لينا وتعالي قووام .. خلينا نقزقز شوية جريت كلمت حبوبا .. وادتني دكوة في الصحن الكنت شايلاهو .. ومشيت جبت القنقليز وعجنتو بالدكوة وحلبت نص ليمونة وكبيت شطة .. وملح وناديت زيزي .. وقعدنا في طرف البرندا في الواطة ... وكانت حبوبا قاعدة تصلي في الضهر .. عاينت لينا بطرف عينها وقعدت تصلي .. القنقليز كان لذيذ شديد .. والشطة حرقتنا جنس حريق .. زيزي قالت لي : اجري جري جيبي لي كوز مووية الشطة حرقت زيزي .. واتجرست انا ولا حرقتني شديد .. لاني في المدرسة كنت طوالي بأكل العجور بالشطة ..
بعد داكـ زيزي دخلت استحمت وجات نامت في اوضة حسن .. حسن ذاتو كان راقد بقرأ بجريدة .. ويتونس معاها - شكلكم مشيتو الخياط الليلة ؟ - اي مشينا .. طلعن جنس فساتين . - ياهو الكان لابساهو اميرة دا ..؟ - لالا انا حقي احمر بابيض .. دا حق اميرة - جميل جدا - شووفت يا حسن ، الخياط دا شاطر كيف ؟ - اااي شاطر شديد - وفستاني ما شفتو .. ؟ - لالا ما اظن - ما تظن كيفن ؟ - موووش انت جيت وانا كنت لابسااهو ؟ - ما لاحظت ؟ - وكيفن لاحظت لحق اميرة وما لاحظت لفستاني ؟ - ............. قلتي شنو ؟ - خلاص بوريكـ ليهو بعدين .. - طيب ونامت زيزي ... وحسن ذاتو نام .. بعد ما سمع الرادي شوية ...
(5)
تاني يوم .. بعد شربت الشاي بقرقوش كدا رسلو لينا من البلد .. زيزي قالت لي تمشي مكتبة ود التوم وتجيبي لي مجلة حواء .. زيزي كان جنها المجلة دي .. بس من تجيبها تقعد تتفرج في الازياء وتقول لي : - تعرفي دي منو ؟ - منو ؟ - دي يا فاتن ، رجاء الجداوي .. الممثلة - ياتي دي ..؟ - دي الواقفة دي ، اصلها عارضة ازياء هي .. - مثلت في مسلسل .. وكان سرابا .. متذكراهو . ..؟ ومسلسل احلام الفتي الطائر .. بتاع عادل امام - ما حضرتو .. - انتي بتنومي من المغرب لكن ..
اها قمت مشيت ولما وصلت المكتبة .. لقيت بتاع المكتبة قاعد يفطر .. قام شال مني القروش واداني المجلة ... لما جيت ماشة سمعت واحد بقرا في حاجة .. وكان قاعد قدام المكتبة في مظلة المواصلات .. ومعاهو اتنين تانيين .. الكلام عجبني .. وقفت قريب من المظلة وقعدت اسمع .. وكان بقول ..
من زمن حبوبة زينب ومن زمن رابحة ومهيرة بي تيابن سطرن معنى الشجاعة وديمه كاسرات المسيرة في المعارك جوه قالن وفي الحرب صالن وجالن جرتقن وطن المفاخر ولبسنو كمان حريرة ولابسه سودانية تعجب في الأبيض والجزيرة وحاشا ما بتتبرج أبدا رغم كم عاشق أسيرها
وفيهو لون في السمحة باين باقي زي لون الرتاين في الضواحي وفي المداين توب بيميز لي بناتنا وتوب بيلهم لي شعرنا ونحن نفخر انو كان التوب قدرنا توب بيزيد فينا السماحة وكيف بينور لي عمرنا ولما نلبسو مابنقول ياناس فترنا
رجلي وجعتني قعدت جمبهم في المظلة وعملت نفسي بتفرج في المجلة ..
والبقرأ كان لسه قاعد بقرأ
توب بيجمل للحبيبة وللجميلة الزوقها عالي وتوبنا جاكار أو مراية في أم خديدا زي مراية بيهو تزدان المحافل بيهو تقدل سمحه جايا زاينة عرضها صاينه عرضها رايقه محمودة سجايا والجمال في توبنا أبدا زيو مافي الأمان ناسج خيوطو بتلقا في قولة عوافي توبنا كان عودة نميري وتوبنا في البترول مصافي وتوبنا جاكار ولا توتل توبنا كان نجدة ومطافي زي هلال مريخ في لونو والجميل عاجبنا لونو لبسو ورا الناس فنونو الجميل يالله صونو أب قجيجه الزمنو ناضر والأمير بالفتنة باهر كاسي زهراتنا النواضر والملاك الفيهو طاهر يوم تجيك لابساهو تقدل الله قادر والله قادر توبنا في المليون مربع بالمفاخر كم بيجود لابسه نوره ولابسه عشه وحتى ميري الفي الجنوب توبنا بيلهم للحماس لم تزداد الخطوب وليهو غنى الشادي ردد شوف عيني الحبيب بالحشمه لابس التوب والتوب زاد جمالك زينه يا المحبوب توبنا عنوان لي وطنا ويعكس الفن والأصالة توب مغطي الراس وساتر لي أم رشيم زايد جمالها توبنا زي هيبة جدودنا الفاتو بي غادي الرجالة فيهو من تاريخنا عزة وفيهو من معنى البسالة فيهو فردة من بلدنا وفيهو من لندن رسالة توبنا عزنا ياشموخنا وحشمة في الذوق أم نفايل ستو سودانية حرة وجملت كل المحافل توبنا قدلتنا وسماحنا وتوبنا كم بالعزة حافل وأسمع المثل البيقول لك في تياب العزة رافل فيهو زولا سحرو زايد زي غزالا فر جافل ولم وجهو ينور ويلمع القمر من نوره آفل شوفو كيف التوب محشم يوم تجيك لبساهو عشه وتوبنا عند الكل بيعج زي خريف العينة رش وزي أبوي عز الليالي قام وقف لي ضيفو هشه وعندو تور مضبوح وجاهز قام وقف صينيتو عشا وزي وطنا البابو فاتح للغريب سوفاتو ممشى ولم نحن لعبنا شدت توبنا بيه وصلنا ميس ولي حرير السمحه ساتر تحتو سوميطه وقصيص توب بحفل لي عروسنا وفوقو يلمع قرمصيص وللعروس زايد جمال وتلقى في ساحة الرقيص وتوبنا جرتق وإرث خالد توب ملفح بي العريس وشوف مصر البيضا خايل في أم زمام ست النفايل توبنا مصدر فخر لينا وتوبنا من سودانا شايل روعة النيل في الأصايل والنخيل بي عزه شايل توب بيرفرف زي علمنا وتحت فرع البانه مايل وده الجمال الأصلي زايد وليهو دايما شوقنا طايل والفراد في كسلا تعجب لابسه دي الشامخه وأبية شايله من القاش جسارة وفي الفراد تلمع مراره سمحه عا########ا البنية فيهو من توتيل شموخنا ودي أم شعورا نابضه حية لابسه فوطتها شايله قهوتها أدت الناس التحية شايله من دقنه الجسارة هدندوية هدندوية والجمال في جبلنا مره
لم لابس توبو مره
ولابسه كلتوم لابسه ميرم وعزه عند آمنه ومسرة
بعد الزول البقرأ كمل قرايتو، قعدوا يتكلموا عن سعدية .. وما عرفت سعدية دي منو .. بس واحد قال .. دي الكتبت الكلام دا .. وقعدوا يتكلموا عن التوب ... قمت طوالي مشيت .. وجريت عشان احصل سريع ..
- مالك اتاخرتي كدا .. - ........ - تلقاكـ تلفتي في الشارع بعرفك .. انا - لالا ما اتلفت .. - كدي اديني المجلة دي ..
زيزي شالت المجلة ... وانا مشيت شربت موية ... وقعدت اكلم حبوبا عن الكلام السمعتو .. عن التوب
- اجي الرجال كمان بقوا يتونسوا بالتياب ؟ - لالا ما بتنوسوا .. بقروا يا حبوبا ؟ - كمان التوب بقرو فيهو شنو ، رجال اخر زمن .. - هم ما رجال .. لكن - اجي ونان شنو ؟ - اولاد قدر حسن خالي .. - وحسن ما راجل يعني ، حسن ولدي سيد الرجال .. يابت هوي ! - لكن ما قدر ابوي .. ابوي راجل كبير .. - هي ها ، قال ابوي راجل .. وحسن من ولدتو وهو راجل .. - زيزي قاعد تقول اولاد .. - زيزي دي انتي كان بارتيها .. ما حتنفعي ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سمرية
عفاف الصادق بابكر
عبد الدائم سيد أحمد
فيس بوك
تويتر
انستقرام
يوتيوب
بنتيريست