طبعا الرمتلة دي خشم بيوت !! وخشم دكاكين ... وخشم عمدان كهربا وخشم نوادي وخشم ستات شاي .. وخشم بنشات جامعة وخشم كافتيريات وخشم داخليات اها انا برضو كنت رمتالية ... ( خشم داخليات) واجمل وقت للرمتلة كان ... بعد المغرب مباشرة نكون قاعدين في اوضتنا ... ونترمتل !! يا التاكا 23 ... التاكا 23 وطبعا نحن ما 23 ... نحن غرفتنا 11 نقوم نتغاتت ونرد ... مافيشن .. مافيشن !! مافيشن ... مافيشن .. كان عندهم زيارة !! ويا سلام لما الواحدة تجيها زيارة !! الاوضة كلها .. تتطاقش !! جيبي لي طرحتي .. الجديدة لا.. لا هاك البسي حقتي دي !! ياخ .. دي ما ماشة مع الجيب !! طيب.. يا اخلاص .. وينها ريحتك العاجباني ؟ بس دي آخر مرة .. كوني نفسك !! اها كدا كيف ؟؟ عسل بس !! اسمعي الليت .. الليت .. ما تنومي بوشك !!
اها بقية الرمتالات .. قاعدين يترمتلن !! العشا كيف ؟؟ ياااخ زهجنا من البوش دا !! بوووش .. والله الليلة ما نأكل بووش !! طيب الحل ... شنو !! انا سمعت قالوا الماليزين عندهم معرض .. ارح نشوفو!! ماليزين شنو ؟؟ بنتكلم عن العشا والبوش الكريه ؟؟ ومالو الماليزين ... عندهم معرض للآكل !! للآكل ؟؟ بسم الله ... ارح ارح !! بقروش ؟؟ ايوة بقروش .. بس قروش شوووية !! يلا كل واحدة تتطلع العندها .. سررريع ونطلع للمعرض !! *** دا ياهو المعرض !! وينو الاكل ؟؟ دي شنو .. مكرونة !! يا سلاااااااااااااام شكلها رهييييييييييب !! ودي شنو شوووربة ؟؟ الللللللللللللله .. شكلها لذيذة !! هاك دي القروش ..!! جهز لينا ... مكرووونة كتيرررررة .. وكب من الشوربة دي !! خلي البنات ديل يتغذن !! وكمان عندكم عصير ... مبالغة !! انتو وين من زمان ؟؟ يلا تعالن ... الاكل وصل !! همممم .. بسم الله تفووووووووووو .. يخخخ دي مكروونة شنو .. فيها سككككككككر ولا شنو ومالها طعمها كدا ... يخخخ !! واااي الشوربة ... معتتة !! تفووووو برضو العصير كعبببببببب ... سجمي .. سجمي العصير مدود !! اتغشينا !! دي فكرة منو ؟؟ فكرة أسعد الله يجازيهو!! اسعد منو ؟؟؟ يا بتي انتي شربتي من العصير دا ؟؟ آآي اسعد مش قبيل لاقيتو زاايع من المحاضرة وقال جاي ياكل هنا !! طيب الحل شنو هسي ؟؟ من نسى قديمو تاااه !! نرجع للبوش !! بووش ياتو بوش ؟؟ بوش الداخلية !! للاسف مافي طريقة !! ليه ..؟ بكون خلص ؟ البووش راقد القروش الخلصت !! شنو ؟؟ سجمنا وواطتنا صبحت انا جيعانة عندي فكرة ... ارح كافتيريا قانون !! كافتيريا قانون بتكون زحمة هسي !! وما دي الكنتة زاتها !! ارح ارح ** عندكم عشا شنو ؟؟ عندنا كبدة وفول وبيض وعدس وسلطات !! ادينا 4 كبدة و2 بيض و2 فول وسلطات !! هوي يا بت ؟؟ ندفع من وين ؟؟ اصبرن بس .. وما تقيفن لي هنا شوفن حتة نقعد فيها !! هاك الماركات دي .. 4 كبدة و2 بيض و 2 فول ودي السلطات !! وهنا تحين ساعة الصفر ( ودي عملوني ليها رمتالة دفعتنا كده) !! قبل ما يستلم الماركات بتكون في ابتسامة ( بلانتي ) عرفت طريقها الى المرمي وسجلت الهدف الاول !! ومع عذوبة الابتسامة بكون قايل نفسو شاال الماركات .. لكن وين ؟؟ الماركات معانا .. اديتو حقت الفول والسلطة وبس !! ولغاية هسي ماركات الكبدة والبيض واللحمة قاعدت في شنطتي .. زي ما هن !! اكلنا بيهن اربعة سنين .. وعاشن لغاية هسي !! لو ما بتاع الكافتيريا قفل وجا واحد غيرو وغير ماركاتو كان هديل اختي زاتها قرت بيهن قصدي اكلت بيهن
( لو كنا حاضرين كنا عملنا مظاهرات وطلبنا توحيد الماركات في كل الكافتيريات .. حقوق طلابية وكده ...)
بجي تاني ..
04-01-2008, 06:22 AM
سمرية سمرية
تاريخ التسجيل: 01-16-2005
مجموع المشاركات: 2803
وبرضو في رمتالة انترنت ودي رمتلة ترطيبة خالص تلقى الواحد مترمتل في مسنجره وقاعد !! يبرم ... في الماوس اليوم كلوو !!
- البت دي ما لها ما دخلت الليلة !! - النت دا مالو بطيء كدا - دا شنو الزول الوهم دا ؟ - داير لي موقع شددددددددديد كده بتاع اغاني رااااب !! - اسمعني ... قصدي اقراني .. يااخ ركز معاي !! - دقيقة اخت السفة !! - رسلي لي صورتك ؟ - شغلي الكاميرا .. داير اوريك حاجة !! - بفتش لي في غنية - مسنجرك دا فيرشن كم ؟ - تعال في البالتوك - الزولة العرفتني عليها ايميلها راح مني .. اديني ليهو !
والمصيبة لو اتلمو شووية رمتالة مع بعض .. كم رمتالي كده في مسنجر واحد ( شووف الخبر يا رمتالي .. اظن مبلكني انا ما داري ) الله يكفينا شر .. رمتالة المسنجرات !!
اها عشان ما يحصل تداخل في الاختساسات .. نرجع للرمتلة حقت النسوان !! وفي رمتلة بطن بيوت ... ودي الرمتلة لما الكهربا تقطع في بيت مليان بنات !! ودي رمتلة بتكون ... عجييييييييبة !! برضها ما اختساسي !! وفي رمتالة كشاتين .. ودي رمتلة لا ليها اول لا ليها آخر !! بس طول اليوم يولعو .. حريقتكم ... واقلب هارد .. وبوشت وسيييك ودي فرمالتك.. !! بالله شوف الدامة دي شديدة كيف ؟؟ ودا برضو ما اختساسي ..
كدي نرجع لرمتلة الداخليات .. وخاصة ايام الامتحانات .. الواحدة تشتهي الرمتلة .. نكون قاعدين نقرأ .. نسمع ليك صوت السينما ... جمبنا حيطة بالحيطة !! والصفافير وعووووووووك وعيييييييييك و .. رررووووووك.. !! واحدة معانا رمتالية خيالها اوسع ... من مشروع الجزيرة !! تقول اللقطة دي حتكون ... البتلة .. نطت في البحر !! اها طيب الناس صفروا لييييه؟؟ .. قالت بكون عشان .. البتل ياخذ باله ويتلب وراها !! والصفافير مدورة ... ونحنا المغصة قاتلانا ..!! قررنا الا كان نمشي السينما .. !! والامتحانات .؟؟ تطير الامتحانات !! بس بكرة دي نمشي السينما !! اختلفنا.. تلاتة .. مصرين يمشوا !! اتنين خرخرو .. واحدة .. اتحنست !! والتانية اتحنكت !! ومشينا ... وي وي !! قطعنا التذاكر .. !! واشترينا فيشااااااااار .. فول .. تسالي وترمس !! قعدنا بلكونة .. والفيلم بدأ .. موسيقي عجيبببببببة والصفافير دددددي !! والبطل رهيببببببببب والصفافير ديييييي وبدينا نندمج .. قومي يا الكهربا اقطعي !! هوي ما في واحدة تقوم !! نتسمر قبلنا يعني ؟؟ خلن الكهربا تجي !! امسكن شنطكن عليكن ..!! مافي جنريتر ؟؟ اها برجعو لينا حق التذكرة ولا نجي نحضر بكرة مجاني !! الكهربا دي متين بتقطع هنا .. ولا عشان قلنا نفرق شوية ؟؟ الكهربا طبعا لا جات لا حاجة !! قلنا نرجع نجي بكرة رجعنا داخليتنا .. ولا قرينا قرايتنا !! رجعنا نفتش البوش وباقي العدس !! صحبتي الرمتالية الخيالية .. قالت تتم لينا الفيلم .. من رأسها !! قالت البتل .. حيقابل البتلة صدفة يدقشها بالموتور تقوم كتبها .. تتدفق في الووواطة ينزل يرفعها .. ( تبسم اليه .. ابسم معاها معاها ) يسمع غنااها .. غناااها ومع صوت المووووووووووووتور .. يقوم يحبها .. الخيانة .. يخطفوها .. ويضربوها ... يجي البتل .. ينقذها ... وبعد كم رقصة وحبوكانات تطلع .. البتلة ( امه ) !! ضحكنا ونمنا .. وقلنا بكرة الا نرجع السينما ما بنخلي ليهم قروشنا !! اصبحنا بالله قرينا اليوم كلوووو جات الساعة ستة لبسنا وطلعنا .. على وين ؟ السينما برضو ؟ آآآي بتاع التذاكر .. اتجنن وقال الا نقطع قلنا ليه ( نحنا بتوع الاتوبيس ) بتوع امبارح !!مش كهربتكم قطعت ؟؟ دايرين تأكلونا ؟؟ هسي بتاع الاتحاد دا مش جا بهنا .. وينو وينو ؟؟ عمك .. لقى نفسو محاصر لا اتحاد لا غيرو .. ادخلن خلاص !! قعدنا في نفس المكان الفيلم بدأ .. لكن ما بتاع امبارح !! دايرين حق امبارح !! مالو موسيقتو سخيفة كدا !! وقدددددددديم ... لا حولاااااا كابوي من زمن حفرو البحر !! شفنا واحد .. نزل من حصانو .. دخل .. المقهي بتاع الكابويات دفر الباب .. القاعدين جووة طوالي طلعوا مسدساتهم تااخ ترااخ .. كبنج .. كبنج كبنج .. تررراخ ... دشدشدشدش المقهي رقد خشب !! لا تربيزا .. لا كرسي .. لا قزاز !! طبعا من طريقة ضربو عرفنا انه البتل !! طلع ... من المقهي.. نفخ في مسدسو .. كده !! وركب حصانو .. وشتت !! والموسيقى السخيفة تاني !! و ثا اند ... !! انتهي ؟؟ دا كلام شنو ؟؟ هو بدأ لمن ينتهي ؟؟ قصتو شنو ؟؟ وفجأة سمعنا ليك ... دشددددددشش .. !! دشدشششددددش .. دششششدددش .. سجمنا .. الدشدشة دي وين ؟؟ اجرن .. جرى !! الدشدشة دي مالها زي الفي رأسي !! سجمنا .. اجرن .. اجرن !! قبال تجينا قزازة طايرة !! ( وانا مالي ومال كدا ) وجرينا .. وجرينا جري نضيييف !! وتاني توبة أي رمتلة الا رمتلة السينما دي .. !!
بجي بعد شوية كده
04-01-2008, 06:25 AM
سمرية سمرية
تاريخ التسجيل: 01-16-2005
مجموع المشاركات: 2803
مرات الرمتلة دي .. بتبقى عادة وعبادة !! يعني مثلا ... اول ما نزلت الجامعة ( برلومة حلااااتي ) ود جيراننا اتسنير علي وقال لي : شوفتي المحاضرات الاولى دي كلها بتكون برلمة سااي .. اعملي حسابك !! وفعلا .. محاضرة .. محاضرتين وكلها طلعت برلمة قررنا تاني ما ادخل وبرضو زميلة ليه كدا تعرفت عليها قبل يوم ( ولغاية هسي فردتي شديد ) .. وبرضو صحبت صحبتها وصحبت صحبت صحبتها !! وبقينا نجي ونقعد في بنشات ( المين رود ) اليوم كلو نمشي نفطر ونجي راجعين ، نصلي ونجي راجعين وطبعا ما بنمشي كلنا عشان نحجز البنش لانو بنش في موقع استراتجي !! بنكون قاعدين وفي برالمة معانا بدخلوا المحاضرات ويطلعو مبرلمين يقوموا من بكرة يترمتلوا معانا في البنش !! وبقينا شلللللللللللة كبيرة .. والبنش بقى ما بشيلنا .. حاولنا نستولى على بنش سناير هندسة .. لكن طلعوا مفتتحين .. !! البنش حقنا دا مستحيل تلاقو فاااضي .. طوالي ملييييييييان .. غير القاعدين والواقفين .. بكون في اتنين اتنين مطرفين ... وديل سبب الفرقة الحصلت فيما بعد !! الله يجازي الحب وسنينو !! طبعا دا كلو .. ولسه البرلمة مدورة في المحاضرات !! واحدة من الرمتالة .. المعانا ,, قررت تدخل محاضرة كدا !! واصرت الا كان نمشي معاها .. ياااخ كان ما موسم البرلمة دا انتهى نحنا ما بندخل !! البت دي شخصيتها قوية خلاااااااااص اصرت والحت .. واجبرتنا على دخول المحاضرة !! أمرنا لله !! جا الاستاذ ولا الدكتور ما عارفة !! المهم وقف في الاستيج .. ومسك المايك !! وسالنا كم سؤال ما في زول عرف يجاوب ولا براهم ابو يجابوا ما عارفة !! غايتو انا كان عندي هيت فون بسمع في ابو عركي .. واحشني ,,, واحشني .. ترتن تتن !! الدكتور قام يهزأ فيهم .. انا غايتو ما معاهم لاني اصلا ما معاهم !! وفجأة اشوف ليكم صحبتنا الجابتنا .. تقوم فووق وتتشاكل معاهو !! هوي دي مالها ؟؟ وسمعتها ليك .. اسمع هوي نحنا حركات البرلمة دي خلاص زهجنا منها !! ما تعمل لينا فيها دكتور وتقعد تقشر لينا بكم سؤال تعسفي !! كرهوتونا الجامعة زاااتو .. وخليتونا مشردين ومترمتلين في البنشات.. وانا بقلبي قت .. مالها رمتلة البنشات والله لذيذة !! وقعدت تكورك والدكتور يعاين ليها .. مندهش طبعا قال ليها اتفضلي براا بعد ما شال اسمها .. قامت طلعت .. ونحنا وارها فووووووووووو مش صحبتا ... وجارتا .. وبت بنشنا ؟؟!! قابلتنا واحدة سنير جمب الباب مالكم .. هايجيين كدا ؟؟ حكينا ليها الحاصل .. قامت تاوقت بالباب وشافت الدكتور !! رجعت لورا ونطتت عيونها فينا.. انتو جنيتو ؟؟ دا دكتور شمس الدين ... لا حولاااااااااااااا اعوذ بالله ... والليلة والليلة ... والليلة دوب .. والليلة روب .. ومن ديك وعيك ... الرمتلة بقت مؤسسة ومقننة .. ويعلم الله من يومها تاني مافي مدرج شافنا جواهو !! لغاية ما اتخرجنا ... ونحنا مقاطعين !! قرينا الجامعة ... من بنشاتهم !! وقعاد البنشات دا علمنا حاجات في الجامعة ما كان ممكن نتعلمها بدخول المحاضرات !! في البنش انت بتكون قاعد والكون حولك كلو مكشووف !! شايف الناس من فوووق كدا ... !! وانا اكتشفت انو الواحد لما يكون قاعد في مكان لفترة طووويلة ... ببدع !! لانو العباقرة كلهم ... ابدعوا بسبب ( الرمتلة ) في مكان واحد !! صدقوني .. !! المهم ... ابتدينا نبدع !! عملنا رندوك خاص بينا !! الجامعة تنضم نضم .. ونحنا نضمنا برررررررررانا !! والشلة حقتنا .. بقى عندها اسم ( اول حرف من اسم اي زول معانا) انضمت لشلتنا ( شلتين ) لكن طبعا نحنا بقينا العمداء ومافي زول يعمل حاجة الايرجع لينا .. خاصة لو داير ( يخلط ) الخلط عندنا كان ... ( جريمة ) لاننا كنا نعتقد ان الخلط حيساهم في فرتقة الرمتلة .. والبنش حقنا بحكم موقعة لا يصلح للخلط .. فأكيد حيفكر الرمتالي الابتعاد من الاعين .. !! حاربنا الخلط .. في بداية الامر .. ( لو عارفنو حلوا ما كنا عارضنا ) المحاربة كانت تتم بتشنيف ( المخلوط /ة ) اشد تشنيف !! بالله شوفها كيف زي العسكري !! خشب الله عبد الناشف !! دا شنو أب جضوم دا ؟؟ يااخ زولتك دي موللنيكس !! عينو زااايعة والله !! آل العوض !! وهكذا حتى يقنع الخالط .. عن خلطته !! استمر الحال والمنوال .. لغاية ما وصلنا سنة رابعة وخلااص خريجين وكدا !! جات الامتحانات .. !! وفي قاعة الامتحانات .. قاعدين جابوا ورقة الامتحان !! الحمدلله لقيت نفسي ناقشة حاجة !! بديت احل الامتحان .. فجاة رفعت راسي .. شوووفت ليك واحد ضابط بدابيرو واقف في نص القاعة .. واشوف ليك .. زملائي دا يناديهو بجاااي ودا بجااي .. استغربت .. وقت الا اعرف هسي دا يطلع شنوو ؟؟ جمبي واحد .. من الرمتالة .. سألتو قال ما عارفو !! سالت واحد تاني .. ما بعرف اسمو منو !! انت الضابط دا شنو ؟؟ زميلي رفع رأسو وعاين لي ... بدهشة كدهشة بت جيراننا لما سرقوا موبايلها وهي بتكلم بيهو !! وقال لي يا هبة .. دا الدكتور !! قت ليهو العيان منو ؟؟ قال لي قولي بسم الله .. دا الدكتور حق المادة دي .. الدرسنا ( الباسكال ) !! باسكال .. باسكال ؟؟ رمتلة باسكال .. رمتلة باسكال .. رمتلة باسكال .. !!
والحمدلله اتخارجنا !!
04-01-2008, 06:30 AM
سمرية سمرية
تاريخ التسجيل: 01-16-2005
مجموع المشاركات: 2803
وطبعن رمتلة الداخليات بتعلم الواحدة حاجات كتيرة .. على سبيل المثال لا الحصر .. كيفية عمل زيت الكركار .. هههههههه لكن انا الله يسالني من يوم دخلت الداخلية كرهت زيت الكركار وسنينو ... واتعلمت الاكل ... من اوسع كقتيرياتو ... ومرة تانية بحكي ليكم عن رمتلة الكفتيريات .. !
كدي هسي اسمعوا الرمتلة الرياضية دي ؟؟
اها في ناس رمتالة كورة !! تلاقي الواحد .. بس يسمع ليك .. طرف مباراة .. يروح ماسك الكورة من ايدها البتوجعها !! يطلع من الشغل من صلاة الضهر ... ويركب مواصلات الاستاد .. ومن الساعة 2 ضهر .. يحرس الاستاد ... ويحرس ستات الشاى وستات التسالي .. طبعا بكون خاتي طوبة لانو شباك التذاكر ما بفتح قبل الساعة 4عصر .. وطبعا الرمتلة المن النوع دا مكلفة جدا .. لانو الواحد بصرف فيها دم جيبو كلو .. حق التذكرة وحق الجرايد لانو ما ممكن يصنقر جنس الصنقيرة دي وما يقرأ جريدة .. التسالي ورم ليهو شلاليفو .. ودا غير .. حق الضل الضل زاتو بقى بقروش .. لانو في واحد بتاع سجاير عندو بأجر الضل حق كشكو الساعة بمية جنية .. اها لغاية ما ناس الاستاد ينشفو مويتو .. ويطبعو تذاكر المباراة .. الاخوة الرمتاليون ديل .. ينتظروا وين ؟؟
وطبعا الرمتلة دي بتبدأ من الحلة ... والرمتاليون من هذا النوع .. بكونوا ( شعيرية ) في الكورة .. بس تلاقي الواحد .. من تجي الساعة تلاتة .. يقول لناس البيت ختو الغدا .. عندنا كورة .. !! والرمتالة ديل .. بحبوا قعاد المساطب ... ( يومه اسود العامل مسطبة قدام بيتو ) .. وطبعا الواحد فيهم بكون مثقف( كوريا ) وليس صينيا .. في الاخبار الكورية ( اسبيراتها ارخص طبعا ) .. بكون عارف جميع الفرق الفي المنطقة .. واخبار اللاعبين العاطفية .. والمحاولات الفاشلة لتسجيلهم في احد الفرق الكبيرة .. !! طبعا ما بكتفوا بالمتابعة وبس .. لكن بتلاقيهم سباقين لزيارة اي لاعب لو كسر ترقوته او رجله .. او لو جات في الانكل زاتو !!
والامر لا يقف عند هذا الحد ... وبما انهم بكونوا مصنقرين في اوقات .. خطرة جدا ... وبكونوا عارفين ... حتى اخبار بنات الحلة .. وقشراتهم العصرية !! مما جعل بنات الحي .. ينتظرن انتهاء الكورة بفارق الصبر .. ليخرجن .. دون متابعة العيون الرقيبة !! او عصرا بدري .. والشمس .. قايدة !!
واضح جدا انو الرمتلة اعلاه ما اختساسي ..
انا كان اختساسي ... دوري الجامعات !! وكنت بشجع .. هندسة وآداب .. وطبعا لا خريجة هندسة لا آداب !!
وكان نشاطي الرمتالي ببدأ من الساعة 12 ضهر .. اخير (ناس الاستاد ) والنشاط .. بكون بمتابعة الجرائد الحائطية الكورية .. والقصائد التي تنجر .. حول الكليات والمناظرات التي .. تدور حول المباريات !! هندسة غرب السنتر صلاة النبي فوقها .. كلية زي السكر صلاة النبي فوقها ونحنا رغم ( سميستر ) الجكس فينا مكسر .. صلاة النبي فوقها !!
واسكول جنوب السنتر ( ودي طبعا كليتي الله يحرسها ) صلاة النبي فوقها كلية اوضة وعنبر .. صلاة النبي فوقها !! الدومة قالوا رئيسها .. صلاة النبي فوقها .. عضت اضاني كديسة !!
وبعدين .. ( الخير ) بتاع عقد الجلاد .. كان المايسترو بتاع تشجيع مباريات هندسة .. يا حليل زماااااااااااان .. ودوري الجامعات زماااااان .. !!
ودا غير .. الشمباتة .. كانوا لاعبين لكن .. بس كداراتهم كانت بتكون مليانة طين ... ويقعدو يبطبطوا في الميدان الشرقي لمن المغرب يأذن ( انا ما عارفة علاقة المغرب شنو بموعد انتهاء الكورة .. ) !!
اما .. ناس ( ســـــ س سس ) استاااااااااااااااااذ .. الحبة ما بعرفوها .. بس فالحين في ( اسكت يا بليد )
والليل الليل يا ليل .. يا حلاة آداب بالليل !!
اها ديل ناااااااااااسي .. وتاج رأسي !!
ومن ما يبدأ الدوري كنت بشجعم .... وبكون شااايلة صورة سيبوية وفرويد ... ومكيافيلي ... !! اها جات كورة اسكول وشجعت آداب ... جات كورة الشمباتة وشجعت آداب .. وجات كورة طب وشجعت آداب .. وكورة تربية وشجعت آداب ..
وقبل ما انسى في رمتلة في الميدان الشرقي ... تانية غير رمتلتنا دي ... والرمتالة من النوع الخاص دا .. ببدأ نشاطهم الرمتالي من .. الساعة 10 صباحا ويستمر حتى ( الليت ) .. الله يكفينا شر الرمتلة دي ... والرمتالة ديل فعلا من نوع خاص لانهم ما بحبوا ( الكترة ) .. وجوة المركب فضلو يغنوا .. شوية شوية وسكت المركب ... ّ!!
كنا نعتقد ان فعاليات الدوري .. سيجعل هؤلاء الرمتالة .. يعزلو .. لانو البكان بكون ملييييييياااااااااان .. وضجة ازعاج !!
لكن اتضح انو بالنسبة ليهم الذ حاجة الرمتلة حقتهم دي وسط الجوطة ... ززززول بكون جايب خبر ماااافي !!
اها نرجع للاختساس ... وجات كورة هندسة .... صلاة النبي فوقها ... وطبعا انا انجعصت .. مع ناس آداب .. وهاك يا تشجيع آداب .. آداب .. تخي جولي !! ويي ....... سلو تخافاي ... سلوتخافاي دا بالفرنسي طبعا !! والحمدلله ... فازت آداب .. ولفينا الجامعة .. سيرنا ناس هندسة لمحلهم .. ورجعنا الداخلية وسيرنا .. جاز هندسة لاوضو ... وانا رجعت اوضتي ... وشوفو قوة عيني ... ساكنة مع صحباتي بنات ( هندسة ) .. رجعت وعاملة فيها البت خلاص ... دخلت الاوضة لقيت الناس كلها مغطغطة وراقدة والنور مطفي .. قلت الليلة مالها اوضتنا مليانة كدي !! براحة براحة .. مشيت سريري .. ورقدت !! فجأة اسمع ليك .. وردلوب .. وردلوب !! وبطانية ... لفوني بيها .. وعصروني عصر وهاك يا ضرب لمن اتخيلت النور ولع !! في شنو يا حلوين ..؟؟ قالوا لي .. ( طابور بطانية ) حرام حرام .. حرام عليكم ... ودا كلو عشان ... شجعت آداب ... طيب لو شجعت طب كانن عملن شنو !!
آحييييييييييي .. العلقة لغاية هسي ... محرقاني !!
04-01-2008, 11:30 AM
Hatim Yousif Hatim Yousif
تاريخ التسجيل: 06-17-2007
مجموع المشاركات: 697
لاحولاااااااااااااا انتى مصيبة كبيرة كارثة حقيقية تعرفى المحلة الوقفت فيها كتبت تحتها عشان اعمل شخيت واجى اقرا باقى الحاجات تانى لاحولا دا عالم ما دخلناه قبل الان عالم برئ وانسانى وجميل بشكل بسيط وحلو غاية البساطة مدهش عارفة ليه؟ لانه تلقائى تحس انك كنت ضمن الرماتلة
دى نوع كتابة اول مرة اشوفا تسلمى
04-01-2008, 06:28 AM
تماضر الخنساء حمزه تماضر الخنساء حمزه
تاريخ التسجيل: 10-13-2006
مجموع المشاركات: 5215
انا ذاتي ما عارفة معناها لكني رمتالية درجة اولى .. !
والرمتلة مالها ... ؟؟
مش احسن الزول كافي خيرو شرو ... وقاعد في حالو .. وما شغال بحال غيرو ؟؟
اها الرمتلة دي موهبة يعني ما اي زول بقدر عليها ، وحتى الرمتالة هم زاتهم خشم بيوت !!
وانا ما عارفة علاقة الرمتلة بخشم البيوت شنو .. كلما نجيب سيرة الرمتلة .. نلقي نفسنا قدام خشم بيت !!
اها قلت ليكم الرمتالة خشم بيوت !!
يعني في رمتالة هاويين وديل بتكون الرمتلة عندهم بالفطرة يعني الواحد فجاة بلقى نفسو بقى رمتالي بدون ما يشعر !!
وفي رمتالة محترفيين وديل ( ضهبنجية الرمتلة ) يعني الواحد بكون لا رمتالي لا حاجة ولا عندو الموهبة بس بكون معجب بالرمتالة وحياتهم ويقوم يجرب الشغلة .. شوية شوية .. ويتعود عليها لما خلاااااااس ويبقى رمتالي محترف !!
دا كان درس مجاني عن الرمتالة ... ولو اي واحد محتاج لاي معلومات اضافية الرجاء الاتصال بالضابط المناوب !!
سمعت تحت تحت انو في رمتالة بيوت اعراس !!
الرمتلة دي بالذات ما اختساسي !!
وبرضو سمعت في رمتالة حفلات عقد الجلاد .. وديل رمتالة اصحابي
طيب نرجع ... لرمتلة الداخليات ..
اها مرة قريب الامتحانات ، كنا بنعمل معسكر بالداخلية وبجن بنات الخرطوم ( طبعن انا عاملة نفسي من بنات مدني ) .. ويقعدن معانا بالداخلية عشان يقرن قالوا .. اها اليوم داك كان جمعة ... وكنا قاعدين نذاكر .. وصفحة وراء صفحة .. الزهج حصل وانا لمن ازهج لازم اعمل ( عمايل ) .. في واحدة رمتالية قالت لي نقوم نجيب الغدا .. مشينا الكفتيريا لقينا عيش مافي ... قلنا نمشي لقدام نفتش .. المهم .. الجوعة ما كانت ملحة .. وفضلنا نمشي انا وهي من حوش لحوش .. وطبعن الداخلية ما كبيرة ... حيشان السرور ... لغاية ما وصلنا داخلية .. كدا اول مرة نشوفهااظنها داخلية درسات عليا .. ... والغرف كلها فاضية .. لاسراير لا غيرو ... بس في شوية اشياء مبعثرة هنا وهناك ... وبعض الدولايب المهملة ... دخلنا غرفة غرفة ... وبقينا نتفرج في الغرف وفي الكتابة على الحيطان .. وعلى الدولايب ..وبقايا زيت الكركار ... في اطراف الدولايب ... ولقينا ورق كتير .. ورق كراسات مليان محاضرات وورق مذكرات مصورة .. وورق كتب .. وجرايد ومجلات ... زحمة ورق واكياس ... .. وفجأة زولتي المعاي لقت ليها ظرف .... مليان صور ... والصور دي كلها الغريب في الامر ابيض واسود ...
تاريخ الصور كان قديم خلاااااااااااس ، عدد الصور كان اكتر من المية .. !!
قعدنا نتفرج في الصور واللي كانت صور لفتيات في عمر الزهور ... العندها ضفيرة طوويلة .. والقاصة شعرها ... والمسرحة ضنب حصان ... والعاملة قُصة ... مختلف التسريحات ومختلف الملامح .. النعومة والخشونة ... الرقة .. والدشانة ... الطيبة والاخلاق ... وقيلنا قبلنا ... نتفرج ونضحك ... ونقرأ التذكارات خلف كل صورة ... وقعدنا كمان نتخيل حاجات غريبة ... مثلا منو في البنات ديل اكتر واحدة صحبة لغاية هسي للزولة الكانت ساكنة هنا ، ومنو العايشة ومنو في ذمة الله ... ؟ منو الواصلت تعليمها ومنو الاتزوجت وقعدت في البيت .. وطبعن نحنا بنصل لنتائج مرضية من خلال ملامح كل واحدة وانطباعنا عنها .. اتخيلوا ؟؟!!
اها رجعنا غرفتنا... والصور دي اوحت لينا بخطة غريبة .. لا تخطر على بال !
الله يجازي الرمتلة ... بتخلي الزول خيالو واسع ( اوعى تفهموا غلط ) ..
سألونا وين الغدا .. ؟
ابينا نجاوب ؟!
يا بنات نحنا منتظرينكن تلاتة ساعات لمنا شفقنا ... وتجوا بدون غدا وعاملات زي بنات ابو الهول ؟؟
واحدة فيكن تنضم مالكن ؟
اها نحنا ابينا نتكلم كلو كلو ... بس ساكتين وانا دي ... لمن اقوم على التمثيل ...مثاااااالة ..
في الغرفة ... كانت في كالابالا ... دا اسم الدلع طبعن ... وهي فعلا تستاهل الدلع .. بت من بنات الخرطوم حلوة ودلوعة وشاطرة شطارة ... وطيباااااااااااانة شديد ومشكلتها الوحيدة في الدنيا دي انها صاحبت ليها رمتاليات زينا ...
Quote: بديت احل الامتحان .. فجاة رفعت راسي .. شوووفت ليك واحد ضابط بدابيرو واقف في نص القاعة .. واشوف ليك .. زملائي دا يناديهو بجاااي ودا بجااي .. استغربت .. وقت الا اعرف هسي دا يطلع شنوو ؟؟ جمبي واحد .. من الرمتالة .. سألتو قال ما عارفو !! سالت واحد تاني .. ما بعرف اسمو منو !! انت الضابط دا شنو ؟؟ زميلي رفع رأسو وعاين لي ... بدهشة كدهشة بت جيراننا لما سرقوا موبايلها وهي بتكلم بيهو !! وقال لي يا هبة .. دا الدكتور !! قت ليهو العيان منو ؟؟ قال لي قولي بسم الله .. دا الدكتور حق المادة دي .. الدرسنا ( الباسكال ) !! باسكال .. باسكال ؟؟ رمتلة باسكال .. رمتلة باسكال .. رمتلة باسكال .. !!
الله يجازي رمتلتك ياسمرية
04-01-2008, 09:06 AM
سمرية سمرية
تاريخ التسجيل: 01-16-2005
مجموع المشاركات: 2803
الله يجازيك يا سمرية.. عملتي لي (( رمتلة )) في النُخاع الشوكي
بس بس بس الله عليك يا ممكونة ... !!
الرمتلة معناها الركلسة !!
بس الفرق كبيييييييييير بين المترمتل والمركلس !! ونسبة لحيثيات كتيرة وخطيرة ما بقدر اغوص في الفرق بيناتم اكتر من كدا .. لظروف البلد السياسية والاقتصادية والنشرة الجوية !!
الممكونة ... سمعتي بالرمتلة الاختيارية ؟!!
اها انتي الجاب ليك رمتلة النخاع الشوكي .. الرمتلة من النوع دا .. لانو مهما اتسعت البطون .. فهي اضيق من خرم الابرة ..!!
صااااااااااااااح ولا انا كضابة ؟؟
دقيقة دقيقة
نسيت اقول ليك ... مشتاقيييييييين والله .. ولو في طريقة اسمع صوتك ... قولي عيييييييييييييييك !!
دا كلام قلتو ليك زمان ... وهسي بقولوا ليك تاني .. نفسي اترمتل معاك في بطن بيتك !
04-01-2008, 07:48 AM
Nasr Nasr
تاريخ التسجيل: 08-18-2003
مجموع المشاركات: 11163
يا حليلكم حننتيني لمن دمعتي جرت أكلتو بوش في الجامعة؟؟؟؟؟؟؟ كنا بنضرب الإسبيشل (وعينك ممكن تشوف أنوار الدنيا) ونجي نشجع الباسكت، ولمن واحد من الجامعة يعلب مع فريق من برا طوالي نهيج فيهو :إدينا باسطتنا بالله زمان دكان الحلة ما ببيع موية الفول، هسع بقت طعام طالبات جامعة؟؟؟؟ لكن أظنو العصرة و(الرمتلة) خلتكم بقيتو حكايين شديد واصلي
04-01-2008, 10:19 AM
سمرية سمرية
تاريخ التسجيل: 01-16-2005
مجموع المشاركات: 2803
طيب اقول ليك حاجة مرة كنا قاعدين في كفتيريا السوق الشعبي .. وكنا مجموعة كدا .. طلبنا اكل والاكل نقص .. فكرنا نمشى نواصل اكل في حتة تانية .. معاي واحد زميلي رمتالي كبير .. باشارة منو فهمت انه ناوي على حاجة ... قال ليهم : اسمعوا حقو نمشي نجيب اكل من كفتيريا بيت النمل عندهم ملحات رهيبا ناكل الليلة بلدي وخلاص !
وقام على حيلو يقلع الشيرين قلع ... وانا اقلع بناحية تانية ... لمينا قروش كتيرا ... وقلنا ليهم خلاس مسافة السكة ونجي بالاكل ...
ومشينا ... ونسينا ليك حنانهم ... اشترينا لينا عصير منقة باااااااارد .. واسكريم .. وانا كان عندي ورق صورتو .. واكلنا شوية تسالي .. بعد داك انا رجعت الداخلية بعدما خليت زميلي قاعد عند ست الشاي الجمب شارع دار النشر .. يشرب ليهو في فنجان جبنة ويقرأ في كتاب اشتراهو قبال شوية!
اخدت لي دش ونمت ... بعدما قفلت الباب بالترباس !
لكن وين .. !
خبط شديد على الباب .. ودوشة شديدة .. وحالة صعبة .. ببرة .. انا قلت يا الله دي مظاهرات ولا شنو ؟
ولا يكون في حرامي نط في الداخلية ..
وسمعت ليك البنات بكوركو ... يا سجم انتي ؟
والله الليلة ما بنخليك ... كلو كلو ... افتحي الباب يا ... شنو ويا شنو ... ما خلو لي ضلفة اقبل عليها ...
فتحت الباب .. خوفا من الفضيحة ... ودخلن !
عايني دايرين قروشنا ؟
قروشكم ؟؟ وطبعن عملت فيها رايحة ياتو قروش .. بسم الله ؟
قروش الشيرين .. !
اها .. القروش دي ما معاي .. مع هناي !
يا زولة نحنا هسي دي دايرين قروشنا .. طيب قلت ليهم انتو دايرين تاكلوا ولا دايرين قروشكم ؟
واحدات قالوا دايرين قروشنا ووحدات قالوا دايرين ياكلن ... اها انا قلت ليهم .. انا عندي ليكم حل ... الدايرين ياكلن انا عندي ليكم أكل ... اما الدايرين قروش .. القروش عند هناي بكرة في الجامعة يشيلوها منو ...!
الرمتلة هي حالة هجين ما بين الضهب والشيطنة والدردحة تصيب أولاد وبنات الداخليات... وتنتقل عدواها سريعا بين القادمين من الهوامش المتحضرة والمدرحين والمدردحات من الشهادة العربية
ان شاء الله أكون قربت المعني يا سمرية...
وأنا مستمتع جدا بهذا البوست
ومزيدا من الرمتلة بلاهي عليك... عرجي لينا علي رمتلة المقاهي والشيشة...لو كان رمتلتكم حالتها قد تأخرت لذلك الحد
04-01-2008, 10:44 AM
Giwey Giwey
تاريخ التسجيل: 09-02-2003
مجموع المشاركات: 2130
قريبات دى عملت واحدة عينة... أسألوها على حفل عقد الجلاد فى قاعة الشارقة للإحتفال بمبارك الكودة ... أسألوها عليكم الله ... وكان ما ورتكم أسألونى فقد كنت من الشاهدين...
رمتلة مزمنة أجاركم الله
ودى
عبد الرحمن قوى
04-02-2008, 06:54 AM
سمرية سمرية
تاريخ التسجيل: 01-16-2005
مجموع المشاركات: 2803
Quote: قريبات دى عملت واحدة عينة... أسألوها على حفل عقد الجلاد فى قاعة الشارقة للإحتفال بمبارك الكودة ... أسألوها عليكم الله ... وكان ما ورتكم أسألونى فقد كنت من الشاهدين...
يا قوي ... هسي في داعي تجيب سيرة الرمتلة العائلية دي ؟؟!!
اها عشان تأمن حاحكي ليك رمتلة ما بطالة معاك ..
مرة كنا في الداخلية قاعدات مترمتلات رمتلة شديدة واليوم كان جمعة ، فكرنا نعمل حاجة نكسر بينا الروتين ... قلنا خلاص نعمل تمثيلية ( عروس وعريس ) اها نحنا كنا تقريبا 13 بنت كل واحدة حتقوم بدور معين ..
العريس : اميمة العروس : اخلاص
ام العروس : رباب ام العريس : لوسي
اخوات العروس : رشا ، هند
وزير العريس : مي الماذون : خنساء
المعازيم : باقي الموجودات
وانا كنت بتاع الفيديو ...
وبديت نمثل ... العريس شاف العروس بتكشح في موية العدة قام كلم امه وجات خطبتها ، كلمو العروس اتخجلت ووافقت !
العروس حبوسها كم يوم كدا لزوم التجهيزات .. وجا يوم العرس .. وكل زول بأدي في دوره على اكمل وجه ..
العريس سايق العروس والبنات يزغردن ... وشغلنا المسجل .. ( المعلمة في الكرسي دايراني اشوف درسي .. درس ايه ..؟ جامعة ايه ؟ الليلة يوم عرسي ) ... ايووووييييوويي !
وكرهت ليك العروس الخجل ذاتو ... اعمل نفسي قاعدة اصور ... واقرب الكاميرا الوهمية قرررريب شديد من وشها ... ومن حلقها الواحد لانو الفردة التانية ما لقيانها ... ومن الفستان المعولق اللبستو .. والعريس اصور ليك عمتو ( توب واحدة معانا ) الكل دقيقة بتقع من رأسه .. واصور ليك وزير العريس الكان عامل نفسه مكسر في اخت العروس .. وما اديتم فرصة عشان يتسمتعوا بالعرس .. مش انا بتاع الكاميرا ؟؟
ولما العريس يعمل نفسو بكب الحنان للعروس يلاقيني كاميرتي في خشمو .. مش بتاع التصوير مفروض يكون متابع كدا ؟؟
اها العرس دا استمر ساعات وساعات ... لانو الخطوبة وسد المال والعرس وكلو كان في يوم واحد ... !
وبتاع الكاميرا صدقوني اكتر زول تعب في اليوم داك ... لانه في النهاية جاتو علقة من العريس لانه اغتاظ منه شديد !!
بس امانة في ذمتك يا قوي ... بتاع الكاميرا بعدين خليهو يختاني في اليوم داك
04-02-2008, 06:26 AM
سمرية سمرية
تاريخ التسجيل: 01-16-2005
مجموع المشاركات: 2803
Quote: الرمتلة هي حالة هجين ما بين الضهب والشيطنة والدردحة تصيب أولاد وبنات الداخليات... وتنتقل عدواها سريعا
قتلتها عديل يا نزار ياها دي ذاتها الرمتلة ...
وشكرا لمتابعتك واستمتاعك ..
اها انا الليلة حأحكي ليك عن رمتلة قريبة من رمتلة المقاهي والشيشة وبما انها رمتلة نسائية .. فخلينا نرجع الداخلية تاني ..
في الجامعة كنت نشطة سياسيا وبما اني كنت ساكنة في الداخلية ومرات بتكون عندنا برامج بتكون بعد مواعيد الليت ، اها اليوم داك كان تأبين شهيد الحركة الطلابية ( طارق ) والتابين كان في كلية الرزاعة بشمبات وانا كنت في الكورال الحيغني في تلك الليلة اها قمنا مشينا شمبات وبدات الحفلة ولظروف طلابية بائسة بدأت متاخرة والكورال حقنا طلع المسرح الساعة تسعة وهي ساعة الليت في الداخلية قام واحد من القيادات السياسية طمنا شديد وقال هو بنفسه حيصل معانا لغاية الداخلية ويتفاهم مع الحرس الجامعي اها غايتو نحنا بهنا لهنا واصلنا التأبين وتسعة ونص البص اتحرك نحو السنتر .. ووصلنا لباب الداخلية ومعنا زميلنا المتبرع بمواجهة حرس الداخلية والمرابطات ... الله يقبحن !
اها قام زميلنا كلم الحرس والمرابطة الكانت موجودة عن سبب تأخرنا .. والحرس صلاة النبي فوقو دخلنا طوالي ونحنا العبيطات صدقنا وقايلنو اقتنع ..
كنا حوالي 35 طالبة ، دخلن من الباب الرئيسي للداخلية ولكنهم لم يسمحوا لنا بالمغادرة بالباب الذي يفضي الى الداخلية وظللنا في بهو الاستقبال ( محبوسات ) بعض الطالبات بدن يتجرسن خاصة وان الساعة قاربت الحادية عشرة ليلا .. وفي ذلك الحين كانت هناك مرابطة تحاول رصد اسماءنا .. ففكرنا ان نقوم بافتعال مشكلة حتى نشغلها عن تسجيل الاسماء فطلبنا من طالبة ان تتدعي المرض ( ازمة وضيق نفس ) وفي تلك اللحظة كانت هناك بعض الطالبات تحاولن ايجاد مخرج لكل القياديات الموجودات في هذا الحبس التعسفي .. وفعلا تم وجود مخرج عبر بوفية الاستقبال حيث توجد هناك فتحة تحت الحائط ( مجري ) يفضي للداخلية .. وبعد مرور خمسة عشرة تم تسلل سبعة طالبات وكنت انا بينهن وذلك لان وجود اسمنا في كشف الحرس كان حيكون مشكلة كبيرة .. !!
وما عارفة كيف اقدر اوصف ليكم لحظة عبورنا تحت ذلك الحائط او المجري والذي رأيت فيما بعد ان الكلاب هي الوحيدة القادرة على عبور ذلك النفق بمرونة عجيبة ... واذكر تلك الفتاة التي رأتنا ونحن نخرج من تحت الفتحة .. والدهشة تكاد تقتلها .. وانا اقول ليها ( هوووووس ) !
وصلنا غرفنا ولبسنا التياب ( تنكرنا ) ورجعنا تاني لنعرف ماذا سيحل ببقية الفتيات .. بعد مرور نصف ساعة تم الافراج عنهن .. وذلك لعدم وجود اي اسم wanted في القائمة ... وبكدا اقتنعوا بالحكاية القالها ليهم زميلنا القيادي البارز !
ودي يا متابعين اسمها رمتلة سياسية ...
04-01-2008, 12:27 PM
سمرية سمرية
تاريخ التسجيل: 01-16-2005
مجموع المشاركات: 2803
طبعن الرمتلة يا ابو العزائم ،، معدية جدا خلي بالك ...
وتقعد ترمتل لي في البوست دا ... لمن تلقى الكيبورد ولع نار ...
واخير ليك ترمتل هنا .. بدل تمشي ترمتل في حتة تانية ...
داك اليوم طلعت نتائج سنة تانية وطلع عندي ملاحق متلتلة .. انا والركشة صحبتي ودا كان اسمها .. لانها بتشبة الركشة في حركتها السريعة كانت بتحب في اليوم الواحد تمشية لصاحباتها في هندسة وفي علوم وترجع اسكول وتفطر في اقتصاد ... مرورا بالمين رود ... اها لقينا نفسنا موقفنا سيء شديد والملحق في اسكول ملحق السرور ... انا كنت قادة في مادة واحدة حقت الدومة .. شيلوني كل مواد الحاسوب .. وقادة في مادة تانية اسمها التحليل الحقيقي .. وبرضو شيلوني كل مواد الرياضيات عليكم الله دا سمعتوا بيهو .. !!
امرنا لله .. حنمشي نمتحن من اول جديد ودا بسموهو ريسيت .. !!
عاد كيفن ما اكون ريسيت وانا رمتالة بالشكل دا ...؟؟
قلت للركشة صحبتي ما في حل غير نجي نقعد في الداخلية ، الركشة قالت لي : الداخلية فاضية وكل الكليات في اجازة نقعد وين ومع منو ؟؟
دخلنا الداخلية ( البركس ) بعد تحايل شديد .. وقعدنا نفتش عن داخلية مناسبة ... نسكن فيها ...
ايام الاجازات ناس الداخلية دي .. يطراهم الله بكل خير بقوموا ياجره الداخليات لطالبات تانيات .. وبسموهو سكن تجاري ... اها بعد لف طويل لقينا داخلية كبيرة فيها اربعة طوابق ... الطابق الاول بس فيهو برلومات وباقي الطوابق فاضية تماما .. على عروشها !
كلمنا المشرفة اننا عاوزين لينا غرفة ، قالت بالطابق الارضي ما عندها غرف شاغرة والطوابق الفوق قاطعين منها الكهربا .. لانها فاضية ... قلنا ليها خلينا نسكن فوق .. حتى لو مافي كهربا لاننا محتاجين لهدوء .. ومحتاجين لغرفة والكهربا ما مشكلة لانو الدنيا كانت برد شديد .. وبالليل بنوم بدري ... !
يعني نقرا مع ضوء الشمس وبس ...
المشرفة احتارت فينا ونحن نشيل ونحنس فيها ، ياخ عليك الله ونحنا موقفنا والاسكول دي قرايتها صعبة والنبي والرسول ..
المشرفة وافقت بعدما ما اخلت مسؤوليتها عننا وقالت هي ما ليها دخل باي حاجة بتخصنا !
طلعنا نشوف الغرف ... خرابات بس ولا غرفة تنفع ونطلع من طابق وننزل لطابق ... لغاية ما لقينا غرفة وسط كدا وفيها بابين ... وسراير حديد بالكوم ودولايب حديد بالهبل ... اول حاجة قفلنا باب ببعض الدولايب وتاني حاجة شلنا باقي السراير والدولايب غير المحتاجين ليها الى الجانب الاخر من الغرفة .. وختينا لينا سريرين حديد جمب بعض واخترنا اسمح دولايب طبعن السماحة بتكون بسبب وجود رزة ( قفل طبلة ) ... وطبعن مافي مراتب ... ودي ما مشكلة لانه اسهل حاجة في الداخلية تلاقي ليك مرتبة ... ( سرقتها ساهلة ) ... دبرنها لينا اربعة مراتب .. عشان كل واحدة تشيل اتنين !
وسكنا ... واحدة صحبتنا قالت لينا دي سكنة مجانين كيفن تسكنوا في الخرابة دي ..
اها بقينا نصحا بدري ونقرأ وناكل وننوم ومحبوسين قبلنا في الداخلية ... انا لمن بقيت حلبييييييييية والركشة صحبتي هي اصلا حلبية بقت كرواتية عدددددددددددديل !
ومن المغرب بنوم ونقفل الابواب شديد عشان اكيد بنخاف من الضلام ومن الاصوات الغريبة ومن .. ومن !!
اها الاكل كان غريب خلاس تلك الايام ... أمي جابت لينا سلطة كتيراااا وابو الركشة برضو ما قصر ورسلت لينا ام الركشة برطامنية فسيخ كبيررررررررة ، فيسخ مركز شديد الا نحلو بالطماطم حتن نقدر ناكلوا
وبسطرمة .. ام الركشة دي كانت بتعمل لينا بسطرمة منزلية رهيبا وما علينا الا نحمرها في الزيت ونطبخ معاها البيض ...
حناكيش موووش ؟؟
دي رمتلة حناكيش برضو ...
اها اليوم داك ... كنا نايمين فجأة سمعنا صوت بت بتكورك ... وصريخ شديد .. وسمعنا كلمة ... حرامي ... الركشة نطت في سريري ... ولقتني انا ذاتي ناطة في سريرها لو ما ربنا ستر كان رأسنا اتدشدش من التصادم الرأسي !
وجنس رجفي ، لا حولااااااااااا ... انا لمن جاتني حمى ... حرامي وصريخ ونحنا ما عارفين الحاصل شنو بالخارج ..!
والضلمة كابسة على المكان ... والبنات يكوركنا ... اها ما عارفين الحرامي دا جاي علينا ولا ماشي مننا ؟؟
الركشة بكت ، وحلفت هي تاني حتذاكر من اول السنة .. وما حتملحق كلو كلو .. عشان ما يحصل الحصل دا تاني ... بلا رسيت بلا ... فسيخ !!
والرمتلة لسه مدورة ...
04-01-2008, 11:05 AM
محمد أبوالعزائم أبوالريش محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
سمريه سلامات يا ام الرمتله انتي كثر خيرك ان بدأت الحكي عن بؤس طلابنا وان كنتم بحكم العمر في ذلك الوقت.....وجمال الصداقات التي ربما جعلت البعض لا يرى كم البؤس و فظاعة ظروف الطلاب.....من خلال هذا الحكي ..وبدأ كانكم مستمتعين/ات بكل هذا...رغم ثقتي انها لم تكن كلها ممتعه....لكن الحمد لله ان خففها لكم لله بالصداقات الجميلة.
لهم الله الطلاب الذين عاصروا ما يعرف بصندوق دعم الطلاب...الذي هو صندوق تعذيب وبهدلة الطلاب وليس دعمهم.
هنا غايتو مبالغة:
Quote: ومشينا ... ونسينا ليك حنانهم ... اشترينا لينا عصير منقة باااااااارد .. واسكريم .. وانا كان عندي ورق صورتو .. واكلنا شوية تسالي .. بعد داك انا رجعت الداخلية بعدما خليت زميلي قاعد عند ست الشاي الجمب شارع دار النشر .. يشرب ليهو في فنجان جبنة ويقرأ في كتاب اشتراهو قبال شوية!
اخدت لي دش ونمت ... بعدما قفلت الباب بالترباس !
لكن وين .. !
خبط شديد على الباب .. ودوشة شديدة .. وحالة صعبة .. ببرة .. انا قلت يا الله دي مظاهرات ولا شنو ؟
ولا يكون في حرامي نط في الداخلية ..
وسمعت ليك البنات بكوركو ... يا سجم انتي ؟
والله الليلة ما بنخليك ... كلو كلو ... افتحي الباب يا ... شنو ويا شنو ... ما خلو لي ضلفة اقبل عليها ...
فتحت الباب .. خوفا من الفضيحة ... ودخلن !
عايني دايرين قروشنا ؟
قروشكم ؟؟ وطبعن عملت فيها رايحة ياتو قروش .. بسم الله ؟
قروش الشيرين .. !
اها .. القروش دي ما معاي .. مع هناي !
يا زولة نحنا هسي دي دايرين قروشنا .. طيب قلت ليهم انتو دايرين تاكلوا ولا دايرين قروشكم ؟
واحدات قالوا دايرين قروشنا ووحدات قالوا دايرين ياكلن ... اها انا قلت ليهم .. انا عندي ليكم حل ... الدايرين ياكلن انا عندي ليكم أكل ... اما الدايرين قروش .. القروش عند هناي بكرة في الجامعة يشيلوها منو ...!
تعرفي يا تراجي انا في تعريفي الشخصي للرمتلة بقول انها نتاج لظروف اقتصادية وسياسية واجتماعية بحتة .. تلك الظروف التي جعلت الكثير من الشباب يلجأ للرمتلة الجماعية هروبا من مواجهة الواقع المفروض ، ولتخفيف عبء الضغط النفسي الذي يواجههم !
فرمتلة الحلة يكون معظم الرمتالة الفيها ( عطالة ) خريجين او طلبة في فترة اجازات ..
اما رمتلة الجامعة والداخلية للبؤس الذي يعيشه هؤلاء الطلاب .. والهم الجماعي البخليهم عصبة واحدة .. يخمسوا السيجارة .. يتشاركوا البوش .. وسراير الداخلية ... والدولايب ايضا ... فكرة الشيرين في حد ذاتها افراز لمعاناة الطلاب الاقتصادية .. !!
في الداخلية رغم التباين الكبير في الظروف الاجتماعية والاقتصادية لكل طالبة لكن الحياة المعيشية تكاد تكون متشابه .. لانها الغرف ياها نفس الغرف الدولايب ياها نفس الدولايب .. الحمامات .. ( ماساة فادحة) .. الاكل في الداخلية .. باااااااااااائس جدا !
صحبتي ( الركشة ) شهادة عربية ساكنة معانا في الدخلية تخيلوا لا بتاكل رجلة لا فاصوليا .. لحظها السيء الاكل في الداخلية يومي على الله رجلة وفاصوليا ... كانت بتاكل جبنة بس لمن جاتها املاح في الكلى وفقر دم قربت تروح فيها ( فسيخ امها برضو بكون السبب )!
وانا جيت من بيتنا دلوعة جدا ، ما باكل دا وما باكل دا ... ومرات ما باكل الا لمن ارجع البيت !
لكن بعد دخولي الداخلية .. تغير حالي والجامعة برغم مآسيها حلوة ودا اكيد بس ما عندها طعم بدون الداخلية والله يبارك في مشورة استاذ امين الله يديهو العافية محل ما يكون واستاذ أمين دا استاذي بتاع الرياضيات الاضافية وكان بدرس في جامعة الخرطوم آنذاك قمتو سألتو عن الجامعة وعن الكلية القدمت فيها فقال دعاني لزيارة الجامعة وعرفني على الكلية والكليات المجاورة واداني نصيحة : لو عايزة تستمعي بالجامعة صح اسكني داخلي !!
بس كان عندي مشكلة عشان يقبلوني بالداخلية وهي اني من سكان الخرطوم فقال لي استاذ امين الله يطراهو بالخير جيبي اي شهادة سكن من خارج العاصمة وفعلا طلعت شهادة سكن من مدني عندي قرايب لي هناك جابوها لي في غمضة عين !!
وسكنت الداخلية وبحقي طبعن !!
وانا بالنسبة لي الداخلية كانت نقطة تحول في شخصيتي وفي حياتي كلها ، وتعلمت منها اشياء كتيرة وفي فترة وجيزة جدا !!
يا حسين انت شوفت حاجة لسه ؟ الرمتلة التقيلة جاية ورا ...
في رمتلة خشم مكاتب حكومية .. دي رمتلة قديمة خلااااااااااس ... اها دي انا ما بحبها ولا بدروها ولا اي حاجة ... لانها بتعطل ( دولاب العمل ) ... دا في حالة يكون في عمل !
04-03-2008, 03:23 PM
حسين محي الدين حسين محي الدين
تاريخ التسجيل: 09-21-2007
مجموع المشاركات: 2852
الجيتنق دا حق من الحقوق الطلابية وحلال في اي حاجة في الجامعة ماعدا ورقة الامتحان .. !
بالنسبة للجيتنق بتاع الكفتيريات فهو محلل ، لانو الكفتيريات دي كلها بتاعات الدولة .. ( والطلاب اصحاب الحق ) عشان كدا كنا بناكل من حلال ما سلب منا !
في جيتنق تاني ودا الجيتنق حق الداخلية فهو حلال في اثاثات الداخلية من مراتب وسراير ، كراسي وترابير .. شماعات .. يعني عادي جدا لمن نكون دايرين لينا مرتبة نمشي نجيتها من جيراننا او داخلية تانية .. بس الجيتنق حرام في الهدوم والاكل والاغراض الشخصية .. ودي تبقى سرقة عديل !
اها نحنا كنا بنحترم شديد اعراف الجيتنق .. !
شووووفت كيفن ؟؟!
04-01-2008, 04:17 PM
Nasr Nasr
تاريخ التسجيل: 08-18-2003
مجموع المشاركات: 11163
Quote: زول (أو زولة) قارية في سيستر سكول وسان فرانسيس والخرطوم القديمة يكون رمتالي كيف؟؟؟ في زمنا دا كان يكون حنكوشة عديل كدا
نوع الحناكيش البخافو من النشاط وما بيمشوا في المظاهرات
ايوة قريت فيما ذكرت لكن يعني انت قايل الحناكيش ما بعرفوا الرمتلة ولا شنو ؟؟
اها نحنا في ستسر اسكول كنا رمتالة .. درجة اولى .. ومرة من ذات المرات عندي شلتي كانوا ما بحبو حصة الرسم والاستاذ الاثيوبي كان اي واحدة ما بتجيب كراس الرسم بطردها بره فالواحدة فيهن حتى لو كان معاها الكراس كانت بتقول نستو فكان بيطرد طوالي انا كنت بحب الرسم موت وبحب الحصة .. بس اليوم داك سمعت البنات بحكن عن شمار بحصل دايما في ذلك الوقت .. وعن استمتاعهن بتلك الطردة .. والقعاد تحت الشجر والدردشة ... اها انا قلت الا اجرب الطردة دي .. واقول للاستاذ ما جبت الكراس .. وفعلا قام طردني ولحقت بزميلاتي ...
قعدنا برا .. واتونسنا وضحكنا .. وحكوا لي عن الشمار ... الكان خطير جدا لدرجة ..
المهم بعد شوية ظهرت سستر جوزيفين وهي سستر صعبة وبنخاف منها موت .. جات وسالت ليه نحنا برا الفصل وكلمناها .. ونحن واثقين من نفسنا .. مشت سألت الاستاذ وحكي ليها ان الطالبات ديل طوالي ما بجيبوا الكراسات .. قامت السستر القوية بحبسنا في معمل الفيزياء والعلوم .. المليان كائنات غريبة وحشرات مخيفة جدا .. وانا اكتر حاجة بخاف منها لغاية هسي الصراصير الكان حجمها ضخم .. وموضوعة في زجاجات كبيرة ... ومقززة .. !!
اها انا ما حنكوشة ولا حاجة ... بما ان الحناكيش كانوا ما بمشوا مظاهرات فانا كنت بمشي ومن ايام الثانوي العالي .. واتجلدا كمان !
احكي ليك عن رمتلة المظاهرات ؟ ولا بلاش منها ... تقوم تهيج علي الحساسية الجابها لي البمبان .. الله لا عادو.. !
04-02-2008, 06:40 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8629
المتركمج والمترمتل بينهما تشابه المتركمج بركب الموج ... والمترمتل بركب رأسه لانه في حالات الرمتلة ما بكون عنده حاجة يركبها غير رأسه .. !!
دا غير التشابة اللفظي في الكلمتين !
Quote: رمتلة لفظه مقنعة تماماً لاحتواء معنى التبطل والفراغ المشوب بالقلق والاستمتاع بفعل أشياء غير مفيدة الا انها فى ذات الوقت غير مؤذية !! رمتلة ...عبقرية الشارع وحدها هى القادرة على إبداع مثل هذه التسمية !!.
وشكرا للاطراء يا المطر ... وصدقني طعامة الكتابة جاية من حلاوة الرمتلة ذاتها ... والله حلوة بشكل !!
يديك العافية
04-02-2008, 08:01 AM
محمد أبوالعزائم أبوالريش محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
عندنا صحبتنا حبوبة .. اهلها رحلوا آخر الثورات اها قامت بالمناسبة دي قالت الا تعزمنا في بيتها غداء .. كلمت ناس اوضتنا الاوضة الجمنا ( السناير ) وكنا حوالي عشرة بنات ما شاء الله علينا ، اتحركنا التقول من الساعة حداشر صباحا .. لانه آخر الثورات دي بعيدة خلاس .. ركبنا للسوق العربي ومن هناك قلنا نركب السوق الشعبي امدرمان ما لقينا مواصلات ركبنا الموردة ونزلنا في ( عشرين ) قصر الشباب والاطفال .. وفضلنا منتظرين مواصلات لغاية ما جات التقول الساعة وحدي .. بعد خراج روح لقينا دفار ماشي السوق الشعبي .. اتخيلوا .. بقشرتنا ديك ركبنا الدفار الشين ولمن وصلنا وين كدا ما عارفة قام لستكو ضرب نزلنا .. وانتظرنا دفار تاني .. ... ووصلنا غايتو .. السوق الشعبي .. ودي كانت اول مرة لي امشي السوق الشعبي امدرمان .. زحمة كدا عجيبة ... وعشان نصل بيتهم من الحتة دي ركبنا بوكس .. اجرناهو ...
والحمدلله حوالي الساعة 3:30 وصلنا بامن وامان ...
ولقينا ناس بيتم منتظرننا ... اخواتها الظريفات مجهزات الغدا .. وشربنا كترة موية ... وعصاير وحلويات ... اها لمن اخواتها قامن يجهزن الغدا لقوا انبوبة الغاز انتهت ... وكانت حكاية لغاية ما رسلوا جابوا فحم .. وولعوا النار كان المغرب قرب ياذن وطبعن نحنا مفروض بعد دا نفكر في رحلة العودة .. والدفارات الراجيانا .. المهم بعد تلتلة طلع الغدا .. بس ما قدرنا نأكل كويس ... سريع سريع كدا .. اكلنا التحلية .. على نص بطن كدا ... ومرقنا ... وتاني السوق الشعبي .. بس المرة دي لقينا السوق العربي طوالي .... واتحركنا ... لمن وصلنا شارع الاربعين بدات بوادر الرمتلة تظهر علينا بنات اوضتنا فقط .. وفجأة قررنا ننزل ونمشي لاصحاب لينا في الاهلية بقروا بالمسا ... وتلبنا ... وباقي البنات .. اندهشن وفتحن خشومن .. ماشات وين ؟؟
الاهلية .. الاهلية ..
الساعة كانت بالضبط 6:30 مساء .. ودخلنا الاهلية والحمدلله بعد كم مدرج وقاعة كدا لقينا جماعتنا قاعدين ... في امان الله ... شربنا معاهم قهوة سمحة خلاس في كافتيريا النشاط .. وبعد داك قلنا ليهم هوي نحنا زمننا جا .. وبندور نرجع ... قالوا لينا خلاس اقعدو حبببببببة .. بنوصلكم بعربية الليلة هناي سايق بوكس عمه ..... ركبنا البوكس كلنا باصاحبنا زاتم ووصلنا الخرطوم ... في اللحظة ديك .. اتذكرنا انحنا ما اتغدينا كويس ... وقعدنا نحكي ليهم عن الغدا الخستكت بيهو انبوبة الغاز ...
قام هناي الشغال مع عمو واصلا هو زول حارة وكريم شديد واخلاقو عالية ومرطب شديد ... قال الا كان يعشينا .. بكون حنا علينا .. وطوالي وقف البوكس قدام الحاتي ... وطلب لكل واحدة فينا نص فرخة .. !!
نزلنا ولمن جابوا لينا الفراخ كان فضل لليت ربع ساعة ... ( الليت كان الساعة تسعة مساء بث )
اها اتجرسنا .. وخلينا الفراخ في تربيزتو وطلعنا ... صاحبنا قام فكر وكلم بتاع المطعم يلف الفراخ في اكياس وجابوا لينا ...
حل برضو ما بطال ... وفرحنا طبعن .. ووصلنا الداخلية ودخلنا قبل ما يقفوا الباب بدقيقتين ...
لا هي شمت كووووويس وجابتها ريحة الفراخ ، الزولة دي انا بعرفها كووويس يا نصر!
وبما انك متابع كويس كدا ، رأيك شنو أحكي ليك عن رمتلتنا في السنة الاخيرة وطبعن السناير دايما بتكون عينهم أقوى .. اها اليوم داك اجرنا غرفة بـــ حقنا ودفعنا فيها قروش عشان نكون انا والركشة والكاشف اخوي ( هههههه )
لقينا غرفة في داخلية بنات (بزينيس ) وكان فيها سريرين ( دبل بيت) واربعة دولايب وطبعا لمن لا يعرف دولايب الداخلية فالدولاب من اصل حديدي وضلفة واحدة لا غير وفيه في الغالب رزة ( قفل ) مكسورة ... اها طبعن نحن الرمتالة ديل لازم دولايبنا تكون فيها اقفال والزرة سليمة والا بنعمل مشاكل ..
السريرين بدون مراتب ، وطبعا مهمة سرقة المراتب بتكون من اصعب المهام خاصة لمن يسكن في طابق علوي .. لانو رفعة المرتبة فوق السلم بتكون صعبة لبنات في عمر الزهور زينا كدا ...
اها بدينا حملة البحث عن مراتب ... والحمدلله اتسلهت لينا ولقينا اتنين بيسر غير متوقع .. فضلت لينا المرتبة الثالثة .. ودي انا عملت فيها مناورات اليوم كلو لغاية ما نشنت على مرتبة حقت بنات دراسات عليا ... ولمن حانت ساعة الصفر .. ( البت دخلت الحمام ) ناديت الرمتالة المعاي وخطفنا المرتبة ويا فكييك ..!
وطلعنا المرتبة فوووق .. وبكدا صار عندنا تلاتة مراتب ... ونسبة لانو نحنا عندنا صحبات كتار .. وعندنا بنات بجن يقرن معانا ... فعليه نشنت على مرتبة اخرى ... حقت جيراننا كانوا بخلوها برا وبمشوا الجامعة ( عشان تاني الواحدة تتعلم ترفع مرتبها اول ما تقوم من النوم ... فوضى )
وبدينا نفتش وندخل الغرف المهجورة .. والفاضية .. دا غير اننا كنا بنختلس النظر .. ونفتش داخل الغرف المأهولة ..
اليوم داك لقينا تربيزة ما بطالة .. دي ختينا فوقها .. الهيتر .. وعدة الشاي ... وعلبة السكر والملح .. طبعن هذا ما يسمى بالمطبخ في روايات اخرى ...
ونزلنا في الطابق الارضي نواصل البحث ... وفي اخر الممر لقينا صالون كبير فاضي ... دا بكون ساكنات فيهو جلقـــمية طالبة .. اها دخلن وكترة سراير ودولايب ما تديك الدرب ... وكرعين كراسي مكسرة وكرعين سراير ... الغرفة تدل على انها كانت مسكونة لوقت قريب ... الفوضى الفيها لسه ما بردت .. وعجاج الطالبات ما زال يلوى في الغرفة اها بدينا نفتح في الدولايب ونشوف الحاصل شنو ... الدولاب الاول لقينا فيهو توب قددددددددديم .. قدم لا حولا ... وريحة الكركار ... اعوذ بالله ...
وفي دولاب لقينا ... فردة سفنجة جديدة .. الكاشف اخوي قال خلاص الفردة التانية ذاتها بتكون في ... وبدينا نفتش فردة السفنجة ... فتحنا دولاب كان موجود وسط مجموعة الدولايب دي ... وانا لقيت فيهو كرتونة ... مقفولة كويسة .. ونضيففففففففة ... فتحت الكرتون بجمبة كدا ... ويا للهووووول ... دا شنو الفيها دا ..... ؟؟ معقوووول ...... بسكووووووووووويت شاي معمول في البيت ... الله الله !
وقبال ما اخليهم يشوفوه ... انا طوالي شلت الكرتونة وقمت صووووووف ... وجري على الاوضة حقتنا !
وفي غمضة عين كنت فووووق ... وختيت الكرتونة نص الاوضة ونفسي قايم ... وظهر الكاشف اخوي ومعاهوالركشة ... وفتحن الكرتونة ... واطل عليهما اجمل بسكويت رأته عين .. والافتاء بدأ نرجع البسكويت وحرام وما حرام ... والبسكويت دا يمكن اهلو نسووه عشان كدا اخير ناكله بدل يعتت ... ويمكن واحدة جابوا ليها اكلها وقامت دستو من بنات اوضتها .. عشان تاكوا براها ... خلاس برضو يبقى حلال علينا ... وتاني نقول لا لا ... البسكويت دا يمكن كاميرا خفية ولا حاجة ...
اها ونحنا في سنة ثالثة اسكول .. ( انترموت ) وقاعدات في الداخلية لزوم ( الكسر ) وما شابه .. قررنا اننا لازم نجد حل لمشكلة الاكل المخستك بتاع الداخلية دا .. واقترحنا نعمل ميز كارب كدا ونجيب اكلنا من برا ، اول الاسبوع جمعنا القروش ونحنا كنا حوالي الثمانية بنات وقررنا نجيب الخضار من ( الملجة ) حقت سوق بحري ، وعملنا جدول اول اسبوع نمشي انا والبت ( حبوبة) الزولة دي سميناها حبوبة لانها حركاتها تشبه حركات الحبوبات ، في كل شيء !
المهم تحركنا انا وحبوبة الى السوق ركبنا مواصلات بحري ، ووصلنا الملجة وطبعن انا كعادتي دائما اول مرة ادخل سوق الخضار بتاع بحري دا ، حبوبة ذاتها ما اظنها جات برضو لانها من سكان امدرمان انذاك ..
والسوق مليان ناس رغم انو الوقت كان قبل المغرب بقليل ، وبدينا نشتري .. كيلو البصل بكم .. اول ما يورينا السعر نقوم نفاصله لمن يصل نص السعر ... ويقعد الراجل يقول لالا دا ولا رأس ماله .. وما بخارج ونحنا نصر ونلح على سعرنا المقترح ... وطبعن دا كلو نظام البنات عارفات الاسعار ويخربنا لا عارفين لا حاجة .. بس حركات شفتنة مننا ساي ...
وكيلو البطاطس بكم ؟؟ والخيار دا ادينا منو بألف ، وادينا سلطة .. بس اوعى من الطماطم المعفص ، وادينا أسود بألف برضو .. والفلفلية دي ما طازة .. وجيب معاهو خس .. ونقعد نفاصل في السعر لمن الراجل يامن ذاتو .. ولغاية ما يقعد يشرح لينا هو بشتري بكم من التلجات وما عارف شنو ؟ والبحر الايام دي زايد والخضار كلو .. غالي الايام دي .. طيب لو كنا عاوزين سمك كان قال لينا شنو ؟؟
وبعد داك نمشي نشتري الرز والمعكرونة ... والدقيق حق القراصة .. والبهارات كمان ...
وقمت شوفت ليك عند بتاع الدكان دا ، كاسترد الهلب ولا شنو ما عارفة .. قمت قلت ليهو ادينا كاسترد .. قامت حبوبة قالت لي الكاسترد دا حنبردو كيف ما عندنا تلاجه .. قلت لينا نشتري تلج نبردوا بيهو المهم الكاسترد دا لازم نشيلو .. ..
بعد داك مشينا الجزارة .. اللحم .. اللحم .. ياخ دا طولنا منو طووول !
شكلو رائع .. احمر جميل .. الضأن جميل !!
اشترينا كيلو كامل ... وطبعا اللحمة بالذات قاعدين نتعشى بيها دايما يوم السبت عشان ما تبوظ علينا لانو ما عندنا تلاجة او بالكتير فطور يوم الاحد الصباح بكون دمعة من يدين كلابالا ...
واشترينا بصل كتير ... مؤؤنة شهر من الدمعة !!
وختينا الحاجات في كيس كبير جدا ... وبدينا رحلة العودة ...
ووصلنا الداخلية والكيس الكبير ، يصعب حمله ... انا وحبوبة الكحيانة .. استنفرنا بنات جارات لينا وجدناهم بالصدفة قدام باب الداخلية ... ووصلنا الاوضة بعد جهد جهيد !
اها .. قسمنا المهام وكل واحدة عرفت يومها متين ؟ وقسمنا الطبيخ ذاتو وغسيل العدة بقى مشكلة ذاتو بعد ما الحكاية جابت ليها طبيخ وحلل ودهون .. !
كان عندنا هيتر رهيب كدا ، ونسبة لانو غرفتنا دي ياها محل نومنا وقومنا .. شوفنا لينا بكان تاني نطبخ فيهو ... ولقينا غرفة فاضية كدا لاسباب مجهولة ... وجبنا تربيزا صغيرة ورفعنا فوقها الهيتر وبدينا الطبيخ ... اليوم داك اتعشينا بفول وطعمية لذيذة ... واجبان ... وقلنا بكرة نطبخ اللحمة ونفطر بيها ... اها يوم اللحمة .. نزلت مع كالابالا وجهزت ليها عدة الطبيخ لانه الطبيخ كان عليهاهي .. وكالابالا ذاتها كانت حبوبة اخرى ... وصنقرت ليها في كرسي كدا وهاك يا طبيخ ... البصل وما ادراك ما الدموع .. وضحكتني قالت لي انا عرفت ليه سموها ( دمعة ) لانها ممزوجة بكترة دموع موبالغ فيها ... والهيتر كان كحيان بشكل ... المهم بجاي لجاي الفطور طلع الساعة حداشر ... ووحاتكم مافي واحدة فينا نزلت الجامعة لغاية هسي محاضرات الصباح ببح ، وطبعن لو واحدة عملت فيها طالبة نجيبة.. حتجي جارية جري ... عشان تحصل الفطور وتاني ترجع لباقي المحاضرات .. نسبة لانو مصاريف الاسبوع كلها بقت في الميز دا ، مافي طريقة لاي فطور في الجامعة !
اها فطور كالابالا طلع ... وفطرنا فطرة كاربة خلاس ، حاولنا ننزل الجامعة طوالي ما قدرنا .. رخمنا اكيد وهاك يا نومة .... لغاية ما جات الساعة واحدة كدا ... صحينا لانو كان عندنا محاضرة الساعة اتنين .. طلعنا المحاضرة قوام ... وصلنا قبل دخول المحاضر بخمسة دقايق ... وبعد المحاضرة فورا .. تسللت الركشة ومعاها الكاشف اخوي ... لتجهيز الغداء .. وتسللت انا معهما لعمل الكاسترد ..
المهم ،،، وجودنا في الجامعة بقى ضعيف جدا ... يعني بقينا بنحضر المحاضرات حسب جدول الطبيخ ... البكون عليها الفطور او الغدا .. دي ما بتحضر اي محاضرة .. بنقوم نحنا الما علينا بنقل المحاضرة لها وبعد داك بنشرحها ليها لو ربنا قدرنا ...
الحكاية جاطت عليها جوطة شديدة وقررنا من الاسبوع الجاي الفطور نطلعوا برا جدول الطبيخ وكل واحدة تفطر بطريقتها عشان محاضرات الصباح بقى فيها ( اتندنز ) ولازم كلنا نحضر ...
اها بقى الميز مختصر على الغدا والعشا ... ويوم الغدا كان علي .. قمت طبخت ليهم عدس اصفر زي الدهب .. وخليت الكاشف اخوي يساعدني ويعمل لي سلطة الاسود ... !
الطبيخ حقنا بقى معروف لكل الجيران ، وبقن الرمتاليات الاخريات يعزمن ما طاب لهن من الصديقات لاوضتنا ... والاكل بقى شوية علينا ... لقمة لقمتين ونلاقى الغدا انتهى ... !
Quote: اها في ناس ما عارفين الرمتلة دي معناها شنو ؟؟
العزيزة سمرية
عروس الموسم
لك التحية والتبريكات والتهانى الجميلة لك وللعزيز قوى
بصراحة انا كنت محتار فى كلمة رمتلة دى لانى بسمعها كثير وبعيد عنك نحن من الناس المنفيين قبل المصطلحات دى وكنت بقرأ لى واحد فى منتدى سودان نت بتكلم عن رمتاله سودانيين فى ايطاليا برضو كان يجنن ...
ياخى انا قضيت يومى ده كله فى بوستك ده مع الرمتله وبصراحة ابداع عديييييييييل كده ...
يديك العافية يا ستى
04-08-2008, 08:49 AM
سمرية سمرية
تاريخ التسجيل: 01-16-2005
مجموع المشاركات: 2803
طبعا الرمتلة عندها ميزة جميلة انها بتكون صالحة لاي زمان ولاي مكان ، واجمل حاجة الرمتلات البتكون خارج البلد دي لاني بعتقد دوما ان الرمتلة متنفس لكثير من الضغوط التي تواجههنا عشان كدا امانة ما في رمتلة في السعودية ... عجيبة خلااااااس حكي لي عنها واحد رمتالي مقيم بالسعودية يطراهو الله بالخير !
اها خلينا من رمتلة الجماعة ديل وتعال احكي ليك عن رمتلة غريبة جدا ...
اليوم داك صحينا بدري اصلو كان عندنا مشوار مهم كدا ما متذكرة وين ، الايام دي انا كنت ساكنة مع صحباتي بنات هندسة والداخلية كانت خاصة بطالبات آداب .. شوفو اللخطبة دي كيف ؟!
اها اوضة بنات هندسة دي كانت الاوضة الوحيدة لطالبات هندسة وسط طالبات آداب .. ويا سبحان الله انا روحي ونفسي كان في آداب دي .... تلقاني من الصباح مترمتلة في بنشاتهم وكمان مرات في قاعاتهم من هنا لهنا .. درست فيها رسميا فلسفة وعلم نفس .. ( اسكول دي فيها العجايب اصلو ) وبكدا طعمت مواد الرياضيات والاحصاء بطعم المنطق والجمال والادب السياسي .. ودي كلها كانت حركات رمتلة مني .. معقول الزول يترمتل حتى على دراسته ... ويزاحم الاخرين في قريتهم بالشكل دا ؟؟ وما اتكفيت من الرمتلة الدراسية .. ودخلت لي كورسات بتاعت لغة فرنسية ... دا كلو عشان اصحابي الفي آداب كانوا مرات بتكلموا فرنسي وانا ما ناقشة ابو النوم ... !
رمتلتي في آداب كانت شخصية جدا ... والوحيدة القدرت اجرها معاي للرمتلة دي كانت الركشة بحكم انها كانت قريبة مني شديد ولانها كانت بتجي ماشة كتير بشارع موسكو ... متنقلة ما بين علوم وهندسة ... وكانت بتلقاني قااااعدة وحولي شلة كبيرة ... في الاول كانت بتروح وسط الجوطة دي .. لكن تاني شوية شوية اتعودت علينا ... وبقت عضو اساسي ... ومرات كمان بتجي تحجز لينا البنش ...
وعشان ادي البنش دا حقو .. حاوصف ليكم مكانه بالضبط ... البنش دا يقع على خور ... الخور دا فاتح على شارع موسكو وغرب شارع المين رود ... في الناحية الشمالية كانت توجد مكتبة الشنقيطي وهي الجزء الجنوبي للمكتبة الرئيسية ... اللي يامها اترمتلت فيها برضو ....
البنش كان فوقو في شجرة لبخ ظليللللللللة جدا ... ( والهمبريب يفتح شبابيك ... القلوب الله يعلم )
اها انا قلبي شباكو اتفتح في الوقت داك ... على البكان دا بصراحة كدا وبقيت مترمتلة ليل نهار فيه ... صيف وخريف كمان .. !
طيب الجاب هسي سيرة البنشات وآداب دي شنو .. ؟؟
نحنا كنا وين ؟
آهه كنا في المشوار حق الصباح وطبعن اول حاجة لمن نصحى بنشوف درب الحمامات وما ادراكم ما حمامات الداخلية ... والموية الطافحة والزحمة الشديدة ... اها مشينا انا ومعاي واحدة اسمها طقوشة كدا ... لمن وصلنا الحمامات لقيناها فاضية ومافي اي زحمة ... قبال ندخل قابلتنا واحدة انا بعرف بنات ساكنات معاها ووقفت اسالها عنهن .. قومي انتي يا طقوشة ادخلي توووش الحمام .. وافتحي الدش .. نقط ليها شوية موية كدا ... مش تعرف خلاص الموية دي ما بتكفي عشان حضرتها تستحم .. وتعرف ان الموية قاطعة ... غايتو ما طقوشة نقول شنو ... وقامت كدا شالت الصابون وهاك يا دعك .... وفجأة انا اسمع ليك الكواريك يا هبة يا هبة جيبي لي موية ... الموية قاطعة .. !
وجيت جري ... شوفت كل الحمامات المجاورة ولا نقطة موية ... دا كلام شنو ؟؟
المهم طلعت برا قلت اشوف لو لقيت موية في الكولر القريب دا اشوف لي جردل واشيل منو ... مشيت لقيت الكولر .. عدمان الحبة ... صنقت دنقرت ما عرفت اعمل شنو وهي العويرة تكورك لي والصابون وما الصابون .. !
كرهتها ليك جنس كراهية البت المطقوشة دي ... وفجاة عرفت ان الموية قاطعة في كل الداخلية ... مشيت كلمتها قلت ليها اطلعي بصابونك انا ما بعرف ليك حل .. اتغاظت مني وشاكلتني .. وحنستني في الاخر اشوف ليها صرفة ...
مرقت وقفت برا وقعدت افكر دي يسوا ليها شنو هسي ..
جاتني فكرة ما بطالة قلت خلاس اطلع بكان الصهريج قاعد ولو لقيت فيه حبة موية بس كفاية عليها ...
اها طلعت للصهريج .. في الطابق الخامس ( السطوح ) وغايتو هجمني عديل الصهريج ... اوضة وبرندا ... كبير ... كبر ... وكمان عنده سلم حديدي بالجمبة كدا ... طلعت تاوقت بفوق يا الله يا الله شووفت قعره ... ولقيت فيه موية كتيرة كدا .. بس بعييييييييييدة ... وانا ما بحصلا الا اتلب جوووة ... طبعن فكرة التليب دي ما راقت لي ... لكن لقيت فكرة احسن وهي اجيب حبل واربط بيهو الجردل وبعدين انزلو واسحب الموية .. نزلت الطوابق التحت وفتشت حبل وما لقيت خالص .. رجعت اوضتنا وجبت لي توب كدا بتاع بولستر .. وربطت بيهو الجردل .. وبقيت احاول املاه موية ... وغايتو بعد تلتلة شديدة ... الجردل اتملى نصو بس لكن ... والفكرة عجبتني قمت ... نزلت وجبت جردل كبير وبقيت املى بالجردل الصغير واكب في الكبير والموية دي اول مرة اعرف انها حلوة وغالية كدا ...
وبعد الجردل اتملى قمت شلتو ونزلت السلالم ديك وانا عيني طالعة ... واجمل حاجة كان منظر البنات وهم مدهوشات من جردل الموية المليان وسط ... الجفاف والتصحر الكان في الداخلية في اليوم دا ... في بنات قالن لي ... انتي دي كنت مخزناها في دولابك ولا شنو ؟
وطبعن لاني طيبة جدا قمت كلمتهن بمكان الموية ... وبعد داك عينكم ما تشوف الا الجرادل تتطاقش فوق السطوح .. ويا الصهريج جاك بلا .... والبنات قيلن يشيلن في الموية ... لغاية ما النهار كمل ...
وانا نعمت بحمام بااااااااارد بعد التلتلة ديك ... وطقوشة ما صدقت لمن حكيت ليها انا جبت الموية كيف ...!
ازيك يا سمرية اقصد هبة لكن ما لقيتك حكاية حكاية حكاية لمن غلط
الف الف مبروك اولا مع انه قالوا في المثل اسال مجرب ما تسال طبيب هاهاها
جاياك عندي ليك شرشحة كتييرة نحن ناس مصر مسمنها شرشحة وخنشرة ، لكل زمان ومكان مصطلحاته لكن هاك دي عالطاير المهم في مرة من المرات بنات شقتنا قالوا ياجماعة ما في طريقة سنة تالتة دي صعبة خلاص ولازم نلتزم ونحضر المحاضرات واهم حاجة نسكن في سكن الجامعة(الداخلية) بالسوداني زولتك المتشرشحة او المترمتلة بلغتكم قالت ليهم يا جماعة والله انا ما معاكم هو الواحد بعيش عمره كم مرة معقول انا ادفن روحي بالحيا يعني ادخل الداخلية من ستة حرم دي ما بتحصل على كيفكم، وبعدين مالا الملاحق عيبوها لي ما الذ حاجة تجي في الصيف وتكتر من العنب ولا ما كدة المهم الجماعة راسهم والف سيف الا يسكنو في سكن الجامعة اول حاجة لانه رخيص الشهر كلو بخمس جنيه تاكل اكل مجيه بجداده ولحمته وسكن مهيا كل اتنين في غرفة وصالات تلفزيونات وصالات مذاكرة ودوليب طبعا البلد باردة مع دفايات غايتو دي داخليات جامعة الزقازيق لكن ناس الجامعات التانية ما بعرفهم، المهم جماعتي اصروا وانا اصريت على الشقة لانه قلت ليهم انا حياتي بتبدا بعد ستة مساء بالله خلونا نعيش حياتنا اركان النقاش والتنس في دار الاتحاد نخليها لمنو ولا المراكز الثقافية ولا الافلام ولا السفر للاسكندرية نهاية الاسبوع انتو جنيتو ولا شنو يا بنات. اها بواصل ليك في الشرشحة بتاعت مصر ولا صحي النسالك بالاوال هي ياها الرمتلة بتاعتكم ولا انا راكبة اوتوبيس غير؟؟؟ بجيك تاني كان في العمر بقية
وونستك ممتعة شدييد اقصد رمتلتك واصلي صفية تحياتي
04-09-2008, 08:51 AM
سمرية سمرية
تاريخ التسجيل: 01-16-2005
مجموع المشاركات: 2803
والله يبارك فيك ، الغريبة اني سألت لكن تقولي شنو السألتهم الظاهر حاسدين ( وش خااااايف بشكل )
Quote: ولا صحي النسالك بالاوال هي ياها الرمتلة بتاعتكم ولا انا راكبة اوتوبيس غير؟؟؟
ياهو نفس الاتوبيس ، بس الاتوبيس الزمن دا بقى طابقين وانت شكلك ركبت مع ناس الطابق الفوق طوالي .. اها انا يا ستي جيت وركبت ورا ... والكنبة الاخيرة كمان .. !!
لا ريحت الجوة لا البرا ارتاحوا مني ... !!
اها خلينا نسمع رمتلتك حق الزقازيق دي ... وشكلها حتطلع رمتلة ع الطريقة المصرية ...
وبعدين غايتو بالنسبة لي كان سكن الداخلية هو الفيهو الشرشحة بحق وحقيقي ... يعني مثلا لمن كنت ساكنة خارجي ( في البيت يعني ) كنت برجع من المغرب لانو بعد المغرب ما كنت بقدر ارجع لوحدي والدنيا بتكون فللت .. وانا في الوقت داك كنت خووووووووافة .. !!
لكن لمن سكنت داخلي كنت برجع الداخلية العصر وتاني بعد المغرب بنزل ... لاسباب متعددة مرات بكون عاوزة اذاكر ودي حصلت فقط لمن كنت برلومة ... ومرات كنت بكون ماشة دار الاتحاد لحضور ندوة / حفلة / تكريم / تأبين والخ ....
ومرات بكون نازلة رمتلة سااااااااااااااااي كدا ... ومرات كتيرة جدا ... للــــ .. يا قوي غمض !
ايوة الليت وزمن الداخلية كان مقيد شديد لانه كان الليت تسعة .. الا في رمضان برفعو للساعة عشرة ... ولمن اكون عاوزة احضر لي حفلة بتنهي حداشر طوالي كنت بكلم اخوي يجي يرجعني البيت .. ولا ليت ولا يحزنون .. وكمان كنت بسوق معاي صحباتي .. ونبيت في البيت والصباح نجر النومة ونفطر حتى بعد داك نمشي الجامعة .. آخر ترطيبة !!
مش اي مشكلة وليها حل ؟؟!!
صفصف ... يلا تعالي احكي .. النبي فوقك !
04-08-2008, 11:44 AM
ناهد بشير الطيب ناهد بشير الطيب
تاريخ التسجيل: 02-08-2008
مجموع المشاركات: 4180
انتى حقيقى رائعه فى سردك للاحداث خاصة (رمتلة الداخليه) التى غاصت فيها قدماك فى وحل احباطات الحياة المتوارثه وبصراحه اعجبنى البوست ده اشد الاعجاب وانا ارضع ابتسامتى الطالعه كشمس تقرر ان يبرز فجر الاشراق كى يرى الناس بعضهم ببعض ...من خلال (رمتلتك الماخمج) احسست بانفاسك المضمخه بعبير التراب تتلاحق وانت تحكين وتكتبين بعشقك الازلى( للرمتله )واحسبك تقولين (يارمتلة مافيك الاانا)
سمريه .....سااجلس هنا بين شهيقك وزفيرك لاستمع بل لا...................... سااطلب منك ان ترمتلينى برمتلة (كاااااااااااربه)اترمتل بيها للسنة الجايه
تسلمى
04-09-2008, 09:55 AM
سمرية سمرية
تاريخ التسجيل: 01-16-2005
مجموع المشاركات: 2803
طيب هاكي دي رمتلة واظنها كاااااااااربة حسب التوقيت المحلي لجامعة الخرطوم!
ودي رمتلة بمناسبة شهر ابريل ... وكل سنة وانتي طيبة ..
الفترة دي انا كنت قاعدة في البيت ، لاني كانت اجازة طبعن وانا في الاجازات ما كنت باخذ برضو .. لاني الاجازات ما بتكون شاملة يعني اسكول شغالة آداب مأجزة .. اداب ماجزة هندسة شغالة وهكذا ... اها في اجازتي كنت بكون قاعدة في البيت بس لكن كل يوم بجي الجامعة .. وللمعلومية شلتي في الجامعة غير شلتي في الداخلية ، المهم كانت الساعة اتنين ضهر هي ساعة الصفر حقت الشلة حقتنا .. يعني لازم الساعة اتنين نتلاقي عند ضهر التور ونقعد ننتظر لغاية آخر واحد ما يجي ... وضهر التور هو عبارة عن مسطبة غريبة الشكل ... عدا ... بالقرب من مكتب بريد الجامعة وفي اول شارع النشاط ... على يدك الشمال وانت داخل من بوابة النشاط ... مقابل كافتيريا قانون ... !
اها القعدة هنا سمحة سمااااح ... فكنا بنقعد وبعد داك ندخل على كافتيريا قانون نتغدا ونقعد نترمتل لمن الله يغفر لينا .. ... وبعدين كل حي يروح لحاله ... !!
اليوم داك كنت جاية من البيت متاخر حوالي الساعة واحدة ضهر كانت .. ونزلت من الحافلة وقدام بوابة الشناط لاقيت واحد صاحبنا شديد ومن شلتنا ومعاهو واحد تاني برضو صاحبنا بس ما شديد ومن شلتنا برضو .. الاولاني اسمو .. ( هنيدي ) لانه بشبه محمد هنيدي والتاني اسمو ... ( عبود ) ... اها قام هنيدي سلم علي سلام باااااااااااااايخ شديد جدا واختصرني ... اختصار غريب خلاس ... عبود سلم علي عادي ... قامك هنيدي طوالي نط ليهو في اقرب حافلة وانا محتارة في سلامو الغريب لي ؟؟!!
سألت عبود وقال لي والله ما عارف بكون بس لان قال مستعجل .. قلت ليهو لا لا ... هنيدي دا صاحبي شديد وعمره ما اتصرف معاي كدا ... والا في حاجة زعلتو مني ... لكن عبود قال ما عارف !
دخلت الجامعة ونسبة لانو حانت الصفر لسه ما هانت مشيت افتش بقية الشلة في بنشات آداب .. وصلت هناك وكان عبود وراي ... ولقيت واحد برضو صاحبنا شديد واكتر .. اسمو ( الداف ) لقيتو قاعد قدام الشنقيطي .. وطوالي سالتو انت هنيدي مالو ؟ لاقتيو ما سلم علي كويس واختصرني وشكلو زعلان مني ؟؟ وركب طوالي بكون ما يكلمني ولا كلمة .. هو مالو ؟ قال زعلان مني ولا حاجة ؟ لازم اعرف !!
والمهم جهجهت ليك .. حنانو .. وحننت قلبو شديد ... قام طوالي قال لي مافي حاجة دي حركات منو ساي ؟؟
قام قال لي ياخ كنا دايرين نعمل فيك ... كذبة ابريل !!
كذبة ابريل .... لا حولاااااااااااا لكن ما جهجتوني شديد .. قام طوالي طلع لي من جيبو جواب .. ورقة فلسكاب وقال لي اقري ... قريت الجواب وضحكت ... والحمدلله قريتو بعدما عرفت ... لانه فيه شتائم لي من نوع غريب وكلام يحير زاتو ... وكان مفروض الداف يتم بافي الكذبة علي ويديني الجواب بنفس طريقة هنيدي ويكون صاري وشو ... ومتغير معاي لكن وين ... طلع قلبو رهيف ... شديد !
غايتو لو كنت قريت الجواب بدون ما اعرف انها كذبة كنت بموت وبقع من طولي ... بس الحمدلله طلع الداف طابور خامس !!
اما عبود ... المتأمر السري .. فكان عارف كل حاجة بس غتيت ... شديد !
اها انا شلت الجواب وقمت قت للداف انت اعمل نفسك كملت المهمة وما تقول لهنيدي انك افسدت الكذبة ... خليهو يصدق اني ما زلت مصدقة حركاتو ومتاثرة بسلامو البايخ دا .. وبرضو وصيت عبود ما يكلموه بحاجة !
شلت الجواب ورجعت البيت ... وقمت حكيت لاخواتي عما حصل اليوم ... وقريتم الجواب فضحكوا على .. وقال لي عندك شلة دمها خفيف والله !
اها انا قلت خلاص اقوم ارد على الجواب كأني بكل زعل .. ويكون كلامي عاطفي جدا ويقطع القلب .. كلام زول مظلوم بجد الجد !!
تاني يوم الصباح ... مشيت الجامعة من بدري ولاقيت الداف ووريتو الجواب وحكي لي انه امبارح كلم هنيدي انو انا اتضايقت شديد من حركتو ... وشكيت ليهو بس هو ذاتو ما قصر وضايقني وقال لي راجعي نفسك يمكن هو زعلان منك في حاجة وبرضو فهمو انه اختصرني وفات خلاني بعدما اداني الجواب !
وحكي ليه انه هنيدي برضو .. حاول يقول ليهو خلاص بكرة طوالي نقول للبت الحقيقة عشان ما تحصل عليها حاجة .. لكن الداف قال لي انا اصريت عليهو نواصل حتى آخر قطرة من الكذبة !!
اها لمن الداف قرا ردي ... ضحك ضحك شديد ... وقال لي الزول دا حيموت عديل من كلامك دا .... !
اها الداف شال الجواب مني ومشى وانا رجعت بيتنا بدري عشان ما الاقي اي زول تاني ... !!
الساعة ستة مساء رن تلفون البيت وكان المتصل هنيدي وقال لي يا بت القصة ديك كلها كانت كذبة ابريل ... وكل الكلام الفي الجواب داك كذب × كذب ... وانا هسي اتصلت عليك لمن شوفتك متاثرة شديد كدا في ردك لجوابنا ... ويلا خلاس الحكابة انتهت !
قمت قلت ليهو لا ما انتهت ... خلينا نواصل ... وسالتو طوالي الداف عارف انك جاي تتصل علي ؟؟
قال لي : طبعن لا ... لانه هو مص يواصل الكذبة .. !
قلت ليهو خلاص خليهو على كدا واوعى تكلمو انك وريتني ... قال لي خلاص تمام اتفقنا !
اها قام هنيدي رجع الداخلية وقابل الداف واظهر ليهو تاثيره بجوابي وما كتب فيه .. وطبعن زاد البهارات حبة لزوم مواصلة الكذبة ... فقام الداف طوالي حكي ليهو وقال ليهو انه الزولة دي عارفة اننا بنكذب عليها لاني كلمت من ساعتها ... بس هي حبت تواصل في الكذبة ..!!
قام الداف طلب من هنيدي يعمل نفسو ما عارف اني انا عرفت وانو جوابي فشنك ساي !
طبعن هنيدي في الحتة دي طلع غتيت جدا وما كلم الداف انو اتصل علي وكلمني بانه الجواب والحكاية من الاول كذب × كذب !!
وبعد داك ... اصبح الصباح !!
قام هنيدي قابل ( سيد جرسة ) ودا واحد صاحبنا كان بعيد اليومين ديلك ... وقام وراهو جوابي ... وقام هنيدي حكي ليهو القصة كلها بدون ما يفهموا اني عارفة انها كذبة ... قام سيد جرسة عجبتو الفكرة وقال انا داير اشترك معاكم !!
هنيدي قال ليهو مافي مانع طوالي .. تشترك ... !
وطوالي جوني في بكان بقعد وقام سيد جرسة سلم علي برضو بطريقة بايخة ، قمت فهمت انه كان مشترك معاهم بس ما كان ظاهر ولا متابع التطورات فقمت أظهرت ليه زعلي برضو من حركات اصحابو وهو كمان ما قصر وطلعني غلطانة وقعد يألف من رأسه تأليف غريب لمن انا رأسي سخن وشكيت ياربي دي قصة جديدة بالجد ولا الزول دا زايد العيار حبتين ؟؟
المهم قررنا اننا نتلاقي كلنا الساعة اتنين .. واتلاقينا ... واول كلمة كانت .... هههههههههههههههههه!!
وبعد داك ... كلنا طلعنا خونة .. وما عندنا ضمير لانو اي زول فينا طلع مكذب على التاني ... حتى المسكينة الركشة انا كذبت عليها وخليتها تقرا الجواب ... بسبب الجندر وما الجندر طبعن اتضامنت معاي ... شديد !!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سمرية
Hatim Yousif
سلمى الشيخ سلامة
abubakr
انعام حيمورة
mamkouna
Nasr
محمد أبوالعزائم أبوالريش
nazar hussien
Giwey
Tragie Mustafa
حسين محي الدين
حمد فتح الرحمن
أبوذر بابكر
انعام عبد الحفيظ
خضر حسين خليل
الجندرية
قرشـــو
ناهد بشير الطيب
فيس بوك
تويتر
انستقرام
يوتيوب
بنتيريست