|
دعواتكم لزميلنا المفكر د.الباقر العفيف بالشفاء العاجل
|
|
 Re: أوقات للقلب .......... أحبك بحبك لما لا نهاية ..... (Re: عاطف عمر)
|
أحبك بحبك
كلمات : الشاعر الكبير محجوب سراج
أحبك .. بحبك .. لما لا نهاية
وأغنيك حنيني .. وشوقي وهوايا
لأنك حبيبي .. وغاية رجايا
******
كتير في بعادك دهتني الليالي
أغالب دموعي وأكابد ملالي
طريقي المنور خلاص أضحى خالي
تعال يا حبيبي .. صدودك كفاية
*******
زرعنا المحنة .. رويناها شوقنا
وعايشين نأمل تقوم تبني فوقنا
نسير في ضراها نسير لي شروقنا
نتوج حياتنا .. بأسعد نهاية
*******
منامي المسهد .. يحن لي عيونك
وشوقي المعذب .. يناشد حنينك
فحكم شعورك .. وترحم سجينك
فؤادي البحبك .. لما لا نهاية
| |
 
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
وعن هذه الأغنية كتبت في 11/04/2006 في بوست للأخ العزيز عمر الفاروق أسماه ( صوت يبكيني ) كتبت معلقاً على الأغنية
Quote: يا الله
يا للذكريات
يا عمر الفاروق
ترجعني هذه الأغنية لتلك الفترة الواقعة في المدى الزمني 13/02/1989 و 28/02/1989 . رجعت للسودان لأتوج حباً كبيراً بزواجي بمن اختارها القلب والعقل . فرح معي أحباب كثر بين رفاعة والخرطوم بحري . احتفلوا بنا كل على طريقته . العامل المشترك بينهم كان ذلك الفرح الكبير وهذه الأغنية . فحيثما تتم دعوتنا نجد الإستريو يصدح بها . يبدو أنها كانت الـ ( Hit Song ) لتلك الفترة . معك أتفق أن حنية الكلمات ، وحنية اللحن ، وحنية صوت أبو السيد تضافروا ليعطوا الأغنية هذا الألق .
شكراً لك
تشريمة
صديقي الحبيب عبدالوهاب عمرابي كان يعرف محبتي لهذه الأغنية وذكرياتها فكان يسخر بالقول
" يا أخي في زول عاقل يتذكر ( ليلة الخناجر الطويلة ) هذه ؟؟؟ " |
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
يا عاطف يا جميل المشاعر
جبتو ودورتو ورميتو .... ورميتنا نفرفر
يا عاطف الأغنية دي بالذات بتلف راسي وبِهوّن كرعي من الواطا لما أسمعها
وبكون مابسمع ولابشوف ملبش ....
وبكون مثل مجذوب في حلقة شيخه ترنم وتمتم بمفردة سريانية
ولا انطق العربية حينها فقط بقول
أنا الكوكو الفجخ الطين ومرق خاوي اليدين
المفردة بسيطة لكنها كانت نابعة من قلب صادق قالها الشاعر محجوب سراج
سكب الفنان الرائع عليه رحمة الله عثمان حسين السنجك فيها كل أحاسيسه لحنا
أجاد الأداء طربا فصرعنا كلما سمعناها لحنا
لكن دعني أقول لك شئ
هذه الفنانة ( منار فتحي ) صدقني مبدعة عندما تتغنى البت دي بتجمع كل مشاعرها الحنينة في حنجرتها لتخرج حروف
مشبعة بكل مشاعرها تعطي اللحن كل مشاعر الشاعر والفنان الذي تغنى بالأغنية
الكثرين قالوا سميرة دُنيا هي من غنت واجادت لعثمان حسين لا أختلف معهم لكن أقول منار فتحي
أحسن من أدت أغاني غيرها من الشدر الكُبار وشبعت مفردتهم بمشاعرها الخاصة بها واجادت وابدعت
أتمنى أن تجد هذه الفنانة كبار في الكلمة واللحن لتخرج لنا تحمل روائع الزمن الجميل للفن
اخي عاطف مابلومك لكن بقول ليك ولعت نار كانت كامنة لكنها ما إنطفئت ابدا
الله يديك العافية ومشتاقين أن نلتقي وراسخ في عُشيشات المخيخ ذلك اليوم الذي إلتقيتك فيه
ومودتي وتحياتي وتاني ماتجيب شئ واصارحك هناك أغاني كثير تفعل بي فعل أحبك أحبك
والتي جملها ( ما لا نهاية هذه )
ذلك التعبير الرياضي وعلماً الرياضيات جافة أنظر كيف طوع الشاعر هذا اللفظ نتغنى به ونهيم
تحياتي ولحين ميسرة
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
عاطف
إن شاء الله طيب
عارف حياءك وأدبك .. لكن عايز اقول ليك البوح ليس قلة أدب .. إنه قمة الحب .
تريد ان تقول لنا بعض بوح .. أحسّك .. وأكاد ألمس حاجتك لهذا البوح ..
انطلق به إلى الأعماق ..
حدثنا عن عميق الحب
والمودة
والعطاء
حدثنا عن ملح الحياة ، المعارك الصغيرة ..
نحن نرهف السمع ..
يمكنك أن تستعين بكتابات المساخيت ودقاسم وأبوساندرا عن فوزية ورشيدة..
وتحياتنا لك ولكل الذين تحبهم ... الحبيبة ، الأولاد ، الأم ، الأب ، والأصدقاء ...
وربنا يحفظكم جميعا ..
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
الأحباب
خالد محجوب
ود قاسم
وضاحة
معتصم سليمان
أميرة السيد
طابت أيامكم وسعدت لياليكم
كل مداخلة من مداخلاتكم الثرة تأخذني نحو واد من أودية الحب والجمال
أحاول أن أقترب منها بما تستحقه من الإهتمام
أتخير لها الوقت والمزاج والعبارة المناسبة
كونوا معي ...
وأوجدوا لي عذراً إن تأخر لبعض الوقت تعليقي على مداخلاتكم
وثقوا تماماً
أنني في شوق أكثر منكم كى تمتزج أحرفي بأحرفكم
تلاقح ينتج حسناً ومحبة وجمالاً
أو
هكذا أرجوه
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
سلامات يا بشمهندس.....و شكرا على البوست الجميل.
تعرف يا بشمهندس...انت مفروض تحمد ربنا ليل و نهار.
كونك تحب زول و يختاره عقلك و قلبك فدى حاجة ما ساهلة ابدا ابدا.
و كون نفس الزول ده يحبك و يختارك من دون العالمين... فدى معجزة.
ربنا يحفظكم و يخليكم لبعض و يفرحم باولادك و اولاد اولادكم. الله يديكم الصحة و العافية و طولة العمر و تعجزو وتخرفوا مع بعض.
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
ربيع الدنيا
كلمات : الشاعر الكبير عوض أحمد خليفة
يا ربيع الدنيا …في عيني
يانور قلبي يا معنى الجمال
يا أخت روحي يا أماني هواى
في دنيا الخيال
*******
أنا فيك عشقت الروعة
ما أحلاها في الدل والدلال
والمعاني الراسمة نور
إشراقة في عينيك ظلال
وابتسامتك لما تأسر قلبي
تحكي عن المحال
تحكي عن شوقك إليّ
وتحكي عن بعد الوصال
*******
من قلبي من أجل المحبة
وهبت ليك شعر الغزل
مع إنو قدامي الطريق
انا عارفو يا السمحة انقفل
ومافي قسمة ومافي يا نور
قلبي حتى بصيص أمل
ما قدرت أقرب من ضراك
وما قدرت لفراقك أصل
*******
يا حبيبة ليه قلبك قِسا
كتمتي ما تخفيه عني
أنا عشت في حبك مقيم
ما عرفت نكران أو تجني
ما عرفت غير حبك غرام
وسرحت فيهو سنين بغني
وهبتو دمعاتي الغوالي
وهبتو عمري وهبتو فني
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
Quote: تسلم خالد ود المنسي .. وفعلا يا سلام على القلب لمن يحب بصدق..
ولا شك ان الشاعر عثمان خالد كان شاعرا يصيغ كلماته بشفافية وبصدق ومن واقع الحياة الواقعية .. وقد ترجم الفنان الشهير
الرائع حمد الريح كلماته إلى سيمفونية رائعة تمس شغاف القلوب ..
والله يديك العافية |
تسلمي يا أميرة
عرفت عثمان من خلال شقيقه الشاعر الدسوقي خالد
حدثني عنه الكثير والمثير شاعر مات من وله وهيام من أجل حب صادق صعب عليه أن يبدله
ويدفع بعجلة الحياة للمضي قدماً وقف مكانه يترجم كل رعشة مشاعر أحرفا
كل لحظة ريد حنان يتدقف تحنانا
وكلمة نهدهد بها نحن من بعده أحزاننا التي عشعشت في القلوب
لذا اسميته ابن الملوح السوداني
وإلى مسافرة هي معلقة تغنى الفنان حمد الريح قفط بمقاطع منها
وتسلمي ومقدرة يا أميرة ولك التحية
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: خالد علي محجوب المنسي)
|
Quote: تعرف يا بشمهندس...انت مفروض تحمد ربنا ليل و نهار.
كونك تحب زول و يختاره عقلك و قلبك فدى حاجة ما ساهلة ابدا ابدا.
و كون نفس الزول ده يحبك و يختارك من دون العالمين... فدى معجزة. |
يعني يا عاطف جبت لينا الهوا ( الهوي ) بي كلامك ده ...
لاحظ انت تحب الاختارو عقلك ... فدي حاجاه ما ساهله !!!
اما نفس الزول يحبك ... فدي معجزه؟؟؟
تخيل ( احنا ما ساهله ... وهم معجزه !!! )
الله يدينا الصبر بس ...
ياخي عليك الله خلي اولادك ديل يرجعوا بي سرعه ...
و الجرسه خلها يا صديقي ...
لكن برضوا عاجبـاني فكتك لي آخرك دي ...
احلي من كده مافي ...
بعدين تحذير ... ابو عفان ده بودر بيك ...
انا كان بديت معاك عثمان حسين حتتعب يا عاطف ...
____________________________________
مره في أيامي الفي السعوديه ...
واحد مصري معاي في الشغل ماسك التلفون مع مدامته في مصر ...
و دموعه ساحه ... و شغال ليك ( يا مقرب البعيد يا رب )
المهم خلصت المكالمه ... رجع يضحك و يتونس و ينطط ؟
قلت ليهو يا احمد .. وين الجرسه ووين ( يا مأرّب البعيد ) ...
يعني خلاص ما قادر تستغني عنها ؟
قال لي لا يا هندسه انا بصراحه مش آدر استغني عن خدماتها !!!
________________________________________
الله يحفظها و يحفظهم يا حبيب ...
| |
|
|
|
|
|
|
|
|
 Re: أوقات للقلب .......... أحبك بحبك لما لا نهاية ..... (Re: عاطف عمر)
|
Quote: سلامات يا بشمهندس.....و شكرا على البوست الجميل.
تعرف يا بشمهندس...انت مفروض تحمد ربنا ليل و نهار.
كونك تحب زول و يختاره عقلك و قلبك فدى حاجة ما ساهلة ابدا ابدا.
و كون نفس الزول ده يحبك و يختارك من دون العالمين... فدى معجزة.
ربنا يحفظكم و يخليكم لبعض و يفرحم باولادك و اولاد اولادكم. الله يديكم الصحة و العافية و طولة العمر و تعجزو وتخرفوا مع بعض. |
ياخي ماتخلو لينا حاجة نقولها!
سلام ياعاطف واولاده*
* شوف زي ناس أولاده ديل!!
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
لعلي أستميح الأحباب عذراً أن أتجاوز التسلسل وأقفز لمداخلة حبيبنا ود قاسم ....
فـ ود قاسم يطالع سودانيزأونلاين ويكتب من خرطوم السودان ....
خرطوم اللهاث والجري
وفي خرطوم اللهاث والجري فإن من ( يباصر ) الوقت ليقرأ لك فقد قدرك ...
ومن يمتطي صهوة الكتابة متداخلاً معك فقد قيدك بلطائف من إحسانه وكرمه ....
وفضلاً عن ذلك فإن مداخلة حبيبنا ود قاسم تمكنني من وضع بعض النقاط فوق حروف البوست أو ( تحت الحروف ) كما أفتى حبيبنا د. بلة موسى ( أنا غبيان عشان أغالط دكتور ؟؟ ) Quote: عاطف
إن شاء الله طيب
عارف حياءك وأدبك .. لكن عايز اقول ليك البوح ليس قلة أدب .. إنه قمة الحب .
تريد ان تقول لنا بعض بوح .. أحسّك .. وأكاد ألمس حاجتك لهذا البوح ..
انطلق به إلى الأعماق ..
حدثنا عن عميق الحب
والمودة
والعطاء
حدثنا عن ملح الحياة ، المعارك الصغيرة ..
نحن نرهف السمع ..
يمكنك أن تستعين بكتابات المساخيت ودقاسم وأبوساندرا عن فوزية ورشيدة..
وتحياتنا لك ولكل الذين تحبهم ... الحبيبة ، الأولاد ، الأم ، الأب ، والأصدقاء ...
وربنا يحفظكم جميعا .. |
إحساسك في محله تماماً
وتلمسك قد أصاب مكمن ( العواطف ) ....
وأصدقك القول
لقد أردت أن أنزل بوستاً في 13 فبراير الماضي فيه ( بعض بوح ) معمق بطيب معتق وقد قضت الأيام أن للطيب إفتضاح ....
فذاك التاريخ يصادف ( اليوبيل الفضي ) لزواجنا ... حفظه الله تعالى وأدامه ....
تشاورت مع شركاء الرحلة فلم ألمس قبولاً ... أو قل لم أجد تشجيعاً ...لهم أسبابهم المنطقية من وجهة نظرهم ...ولنا قراءة من زاوية مختلفة ..... إلتقينا في منتصف الطريق ... أن تماماً كما الصلوات
" ليكن السر في مكان السر والجهر في مكان الجهر ..... "
لذلك يكون هذا البوست
وفي إختصار أرجوه غير مخل
لم نكن إستثناء في الزمان
قصة ربما عاشها آلاف الشباب قبلنا ومعنا وبعدنا
فيها من ( إنفتاح ) عصرنا و ( محافظة ) السابق لعصرنا
إتفقنا على الصدق منهاجاً ومناراً هادياً ....
نفذنا الإتفاق بصرامة لا تقبل المهادنة ....
أسعدتنا الأيام وفرحنا ونططنا
ثم عادت ذات الأيام – كعهدها - تمتحننا حتى زلزلنا زلزالاً شديداً...
وفي هذه وتلك
نتلمس الأولويات...
طاعة وشكراً لله المنعم اللطيف
وترتيب أمورنا ( الأهم فالمهم ) ثم التنفيذ
حاشاكم
لم تكونوا ( مساخيتاً ) ...
بل مثال نرجو تحقيقه ذات يوم ...
نرصد خطاويكم
نهتدي بهداكم
علنا نصل لبعض مرافئكم
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
تحياتي وسلامات عزيزنا خالد محجوب ( الما منسي )
أشواق ومحبات
Quote: المفردة بسيطة لكنها كانت نابعة من قلب صادق قالها الشاعر محجوب سراج
سكب الفنان الرائع عليه رحمة الله عثمان حسين السنجك فيها كل أحاسيسه لحنا
أجاد الأداء طربا فصرعنا كلما سمعناها لحنا |
اللغة في نهاياتها وسيط نقل
المشاعر الصادقة هى الأصل
فعندما تصدق المشاعر تجود الحروف وتأتي طائعة مختارة لتنال حظوة وشرف التعبير ...
تماماً كما أشار شاعرنا الفذ عثمان خالد في رائعته ( رحلة عيون )
غار المساء و الكون صبح
عشاق جمال يتأملوا
كل الحروف الفي الخيال
في لحظة جادو وما غلواQuote: اخي عاطف مابلومك لكن بقول ليك ولعت نار كانت كامنة لكنها ما إنطفئت ابدا
الله يديك العافية ومشتاقين أن نلتقي وراسخ في عُشيشات المخيخ ذلك اليوم الذي إلتقيتك فيه
ومودتي وتحياتي وتاني ماتجيب شئ واصارحك هناك أغاني كثير تفعل بي فعل أحبك أحبك
والتي جملها ( ما لا نهاية هذه )
ذلك التعبير الرياضي وعلماً الرياضيات جافة أنظر كيف طوع الشاعر هذا اللفظ نتغنى به ونهيم
تحياتي ولحين ميسرة |
لا تطفئوا مثل هذه النيران
ففي كمثلها يتجمع أطفال الخلاوي – شيوخ الغد- يتدارسون القرآن الكريم والسيرة النبوية المشرفة ....
وفي مثلها أيضاً يتجمع عشاق يتدارسون الحب وصادق القول ...
وهنا أيضاً لا إنفصام فالذاكرة تحفظ قصة شيخنا العارف بالله قريب الله وكروان السودان عبدالكريم كرومة وبينهما أغنية
يا ليل أبقالي شاهد على نار شوقي وجنوني
يا ليل صار ليك معاهد طرفي اللي منامي زاهد
يغني ( الفنان ) كرومة ويجهش بالبكاء ( الشيخ ) قريب الله
هذا صدق وهذاك صدق
________________
مع بالغ إعجابي بتطويع الشاعر لجملة ( لما لا نهاية ) وهى الجملة الرياضية كما تفضلت
إلا أنني أرجو أن ألتقيك ذات بوست لأنفي لك تهمة ( جفاف الرياضيات ) .... دقتها ممكن
بل لربما ( أثبت ) لك ( مرونتها )
فقد علمتنا تلك المادة.. أنه يخطئ من يظن أن له حلاً ( وحيداً ) لـ ( مسألة ما )
فالمسألة الرياضية يمكن الإقتراب منها وحلها بأكثر من طريقة
وهى المرونة المرجوة في حيواتنا
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
Quote: مع بالغ إعجابي بتطويع الشاعر لجملة ( لما لا نهاية ) وهى الجملة الرياضية كما تفضلت
إلا أنني أرجو أن ألتقيك ذات بوست لأنفي لك تهمة ( جفاف الرياضيات ) .... دقتها ممكن
بل لربما ( أثبت ) لك ( مرونتها )
فقد علمتنا تلك المادة.. أنه يخطئ من يظن أن له حلاً ( وحيداً ) لـ ( مسألة ما )
فالمسألة الرياضية يمكن الإقتراب منها وحلها بأكثر من طريقة
وهى المرونة المرجوة في حيواتنا |
يا عاطف يا أخوي
ما تشكر لي الراكوبة في المطر
قولي شئ تاني يا عاطف
لكن أقول ماقصدته الجفاف في المفردة ولم اقصد جفاف الرياضيات لكن قصدت جفاف رموزها
1
4
0
%
+
=
-
÷
×
كم
نظرية
ساين
كوساين
وإلخ
ماقولك
تحلق بي حيث لا أمنياتٍ
ولا كائنات تمر
من تشبع بحب الرياضيات يجد الحلول لكن من رسب يظل ممحن ينظر الحل
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
مستر قبانى...والله ما قاصدة اى شيء ما كويس. وحتى الجملة ممكن اعكسها و تدى نفس المعنى. قصدى بس الاحتمالات ان نفرين يحبوا بعض... صعبة. باللى انا شايفاه حولي...نادر جدا.غالبا بيكون فى طرف بيحب جدا و التانى just went with the flow ...
| Quote: سلام ياعاطف واولاده |
جيتونا يا ناس "الاولاد", "المدام", "ناس البيت", "الجماعة" ???
بهظر معاك يا د.بلة.
تعرف... شباب دفعتى فى الجامعة. ترسوا منى و ترستا منهم*. اتشاكلنا و اتصالحنا فى كفتريا هندسة دى. شجر اللبخ و القرود يشهدوا على زنقة السمستر و تشيجع الكورة. الناس ديل هسي بيلاقونى بيقولوا لى "يا مدام". ما كلهم طبعا. لكن قلت ليهم اى زول نسى اسمى وعاوز يقول لى "يا مدام"...ما يتكلم معاى تانى.
_______________________________
الترس هو ان تنقل اجابة homework او مشروع من زميلك لكن بفهم. يعنى تغيير الارقام شوية كده و ما تنقل الكلام بضبانته.
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
تحياتي وسلامات مجدداً عزيزنا خالد
وشكر مجدد على تعريفنا بالشاعر الضخم عثمان خالد والظروف التي صاحبت مسيرته أو شكلتها
وعثمان خالد مدرسة متفردة
ومفردة رصينة
وعاطفة صادقة
كل أغنية من أغنياته أعطت زخماً وتواجداً وشكلت إضافة حقيقية للفنان الذي أداها
أحلى البنات
رحلة عيون
إلى مسافرة
الشوق والوطن .... ( يا جنا .. في بعادنا عن أرض الحنان الليلة مرت كم سنة )
...
...
وغيرها
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
قباني يا حبيبنا
جاييك بالرواقة
_____________
لا حولااااااااااااااا يا سمارت
كلمة ( ترست ) لى منها كميات من الزمن ما استعملتها
صديقنا برير الصادق كنا نسميه ( ملك التتريس ) كان عندو فهم ونظرية في التتريس
بيقول ليك ( المترس ) هو أصلاً زول فاهم لكن ما عندو وكت للكتابة بدليل أنو بيظبط الـ ( Report ) المترس ( بضم الميم وفتح التاء ) بيظبطوا على حسب معطيات المترس ( بضم الميم وكسر الراء )
والغريبة كان بيجيب درجات عالية
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
تحياتي وسلامات حبيبنا يحيى
Quote: ياخي عليك الله خلي اولادك ديل يرجعوا بي سرعه ...
و الجرسه خلها يا صديقي ...
لكن برضوا عاجبـاني فكتك لي آخرك دي ...
احلي من كده مافي ... |
بالجد شكراً ليك على هذا المدخل المهم
مرحلة ( التفرق الأسري ) الحالية كما نسميها كانت ( المسكوت عنه ) طيلة سنواتنا الماضية ....
كان الأقتراب منها تماماً كما الإقتراب من مجهول شديد الخطر ....
غذى ذلك الإحساس أننا كـ ( أسرة ) لم نفترق طيلة ما يقارب عقدين من الزمان ...
مشاركة كاملة في كل التفاصيل.... كل التفاصيل
حتى الإجازات السنوية كنا نسافرها معاً
وعندما حانت تلك اللحظة لم يكن أمامنا خيارات كثيرة سوى أن تسافر سعدية والبنات للجامعات والمدارس في السودان
وأظل هنا مع ( محمد الأمين ) ...
إمتصصنا صدمة البدايات .. جزيل الشكر للأهل .. جزيل الشكر للصحاب والأصدقاء هناك ....
عندما أفقنا من صدمتنا تلك إكتشفنا أن للتجربة جوانب إيجابية لم تخطر لنا يوماً على بال......
فجرت فينا طاقات كبيرة.....
إعتماداً على النفس...
تأقلماً مع ظروف تحير اللبيب الحليم .....
الآلام قطعاً موجودة..... بارك الله في عمنا ( سكايب ) فقد قرب المسافات كثيراً
لكن أبوعفان دائماً موجود ......... نجد دائماً عنده السلوى
وإن تسمو في حبك تحس بى راحة في وخز الألم
Quote: بعدين تحذير ... ابو عفان ده بودر بيك ...
انا كان بديت معاك عثمان حسين حتتعب يا عاطف ... |
أبو عفان دا أربعين عاماً من الحب .... يا دوبك ح يودر بى ؟؟
الكان كان يا حبة
ما أحيلاه من تعب توعدنا به
أصلك ما ( ترتا لى )
أتعبني
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: saidahmed shami)
|
| Quote: الترس هو ان تنقل اجابة homework او مشروع من زميلك لكن بفهم. يعنى تغيير الارقام شوية كده و ما تنقل الكلام بضبانته. |
اسمو ( التتريس ) يا هندسه .مش ( الترس ) ..
انتي قريتي ( كيميكال ) ولا شنو ؟
و اوعي تغالطيني ... لأننا ملوك التتريس ... و التريسنج بيبر ...
و بالبلدي معناتو ( تشِفْ ) ...
و بالبلدي في عالم المعمار ... ( بتترس ) رسمتك الكروكي بي ضبانتها ...
______________________________________________
رجعتينا لي زمن عجيب يا سمارت ...
عمك عاطف ده يشهد علي كميات التتريس العملناها في الدنيا دي !!!
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
تحياتي وسلامات حبيبنا بلة
| Quote: ياخي ماتخلو لينا حاجة نقولها! |
عزيزتنا سمارت قارئة ممتازة للبوستات
وتتداخل عادة في أهم جزيئيات البوست
قد تكون هذه الجزيئيات هى الواجهة المخفية Hidden Elevation لذلك تكون مداخلاتها متميزة
مع ذكر الـ Elevation نكون قد وقعنا لمستر قباني في ( الآتو ) بتاعو
Quote: سلام ياعاطف واولاده*
* شوف زي ناس أولاده ديل!! |
أولاده ، الجماعة ، الأهل ، ناس البيت ، ............
برضك تعبيرات ( مبلوعة ) إذا نظرنا إلى ما قبلها
فقد سمعنا الذين من قبلنا إذا ( إضطروا ) لذكر نسائهم يردفونها بـ ( لا مؤاخذة ) ........
الله يستر سمارت ما يكون قد ( أغمى عليها )
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
يحيى قباني يا ذوق يا ذواقة
Quote: عاطف يا صديقي ...
ان تحبها .. و يفيض حبك .. وتأتينا به جمالاً ...
فهو لعمري اصدق ما رأيت .و اجمل ما قرأت ..
اما ان تحبها ... و تستمتع بحبها .. علي انغام عثمان حسين ...
فهذا هو قمة الحب و الريد يا صديقي ...
فعثمان حسين ( السهل الممتنع ) ...
دائماً اقول ... لو لم يبلغ الانسان مبلغاً من تذوق الكلمه و اللحن ...
يصعب عليه فهم كل تلك الجمل الشعريه و الموسيقيه.لابو عفان و خاصة ثنائيته مع بازرعه ...
وها انت اتيتنا من علٍ ...
فهنيئاً لكما ...
و دعني اتجرأ و اهديكما هذه الالياذه ... |
وما أدارك ما القبلة السكرى
ثم ما أدراك ما القبلة السكرى .....
ما فعلته بمداخلتك هذه يا حبيبنا يسميه سادتنا المتصوفة بـ ( المكاشفات ) .....
أى أن يكاشفك الشيخ ( أو يفاجئك ) بما يدور في تلك اللحظة في أعماقك ... أو كنت تهم بقوله .....
أغنية القبة السكرى كانت لحظة تعرفي بـ ( عالم عثمان حسين ) ...
وجواز مروري لـ ( دنياواته ) ....
كانت الأغنية التي عرفتني بعثمان حسين ...
ومنها إنطلقت
وحيث قضت الأيام بأن لا مصادفة في أقدار الله
فقد عرفت أيضاً أن ذات أغنية القبلة السكرى كانت هى الأغنية التي بدأ بها المشوار الماسي بين العملاقين أبو عفان وشاعرنا ( العجيب ) حسين بازرعة
كانت قصيدة القبلة السكرى هى مشاركة ( طالب الثانوية ) حسين بازرعة في إحتفال مدرسته خورطقت السنوي بخريجيها في العام 1954
نشرتها مجلة هنا أمدرمان .....
والتقطها الحس الموسيقي العالي لأستاذنا عثمان حسين
وكانت نقطة إلتقاء الأهرامات
_____________
وتاني شكراً يا حبيب
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
دفعتك بقو حبوبات يا بشمهندس!!!!
صحبتي في الثانوي، بنت كوز شهير، عرس ليها ( بمزاجه) بعد امتحان الشهادة مباشرة. لو قرر يزوج حفيدته ذي ما زوج بنته، بعد سنتين او ثلاثة ح تبقي صديقتنا حبوبة عديل كده.
زمان كنتا متخيلة أني لما أعجز ح ازوغ من بنات دفعتي. لكن بالعكس كلهم رشيقات و محافظات. اللي ح يجيبوا لي الكلام اولاد الدفعة. كلهم بقوا بصلعات و كروش.
| |
|
|
|
|
|
|
|
|
|
Re: أوقات للقلب .......... أحبك بحبك لما لا نهاية ..... (Re: عاطف عمر)
|
تحياتي وسلامات عزيزنا سيد أحمد شامي
Quote: بسمع الاغنية أتذكرت البوست
ربنا يديم المحبة ويخلي ليك الاولاد |
كتر خيرك
تقبل الله تعالى دعوتك الصالحة
إنصاف فتحي صوت واعد
لو جاز لنا أن ننصحها فسوف نقول لها كما كان يقول البروف محمد سيف في برنامج نجوم الغد
" أن تستمع للأغنية التي تريد غناءها جيداً عند صاحبها .....تحفظ كلماتها وتلتزم بلحنها ... "
| Quote: ما تنسي سوق الدهب ^_^ |
ما ناسيهو
لكن الدهب سعرو نازل الأيام دي
عشان كدا ما ح نبيع
لووووووووووووووووووول
______________
لا لـ ( تسليع ) المشاعر يا حبيب
| |
|
|
|
|
|
|
| |
عاطف عمر
معتصم سليمان
خالد علي محجوب المنسي
ودقاسم
وضاحة
smart_ana2001
يحي قباني
Balla Musa
saidahmed shami
فيس بوك
تويتر
انستقرام
يوتيوب
بنتيريست