بغرت عديل من منظر شباب الأردن وتجمعهم مطالبين باصلاحات سياسية و الغاء سيطرة المخابرات العامة على الحياة في المملكة وقبلهم شباب سوريا الذين اثمرت دماء شهدائهم السبعة والثلاثين عن زيادة الرواتب و العمل على رفع حالة الطوارئ ولسة الأسد ماشي في سكة التنازلات وارضاء الشعب يمد الناس ديل ما فايتننا في ضيق الحال و العصرة و المعاناة المعيشية بأي حال طيب ليه ؟ ضيق الحال في السودان لايخفى على أحد عطالة خريجين وغلاء و تردي في التعليم و الصحة و فساد مستشري وضارب جذوره في اجهزة الدولة الدولة التي لا يعلم عنهاالسواد الاعظم وما شايفين منها شيئ غير جباة الضرائب و العوائد و تسلط الشرطة والأمن عليهم سيدنا علي كرم الله وجهه نسب إليه العجب من أن لا يخرج من لا يجد قوت يومه شاهرا سيفه على الناس ويقيني أن الغالبية كذلك بالكاد لاتجد قوت يومها ومن يجده يقضي بقيه يومه وليلته تضرعا للمولى أن لا بتليه او اسرته بمرض يستدعي البحث عن علاج رفعت الدولة يدها عن دعمه أو توفيره الفقر و غياب العدالة أكبر و امضى من مليون فيس بووك وتويتر لحث الناس على الشكوى و التذمر ومطالبة الحكومة بالقيام بواجبها نحو رعاياها أين الخطأ ؟ لماذا يقف المسحوقين واسياد الوجعة الجد جد و اللناس العينها طالعة موقف المتفرج ايام نميري و الاحزاب كانت المظاهرات ضد الغلاء وتردي الخدمات امرا روتينيا و تلقائيا ا لحصل اسي شنو؟ هل يعتبر الشعب ان اصحاب دعوات التظاهر الحالية لهم اجندات اخرى وما أتو للبحث عن حقوقه فعمل ليهم التجاهل و كررها ثلاثا ام أن الخطاب الديني للحكومة تمكن من وجدان الجماهير و الناس دي صدقت فعلا جاكات زي الاستهداف و دول الاستكبار و الصبر على المكاره ... إلخ ام هو سؤال من البديل ؟ الغريبة اي زول تقابله يشكي و زهجان من الحكومة ومن الغلاء ومن تسلط الشرطة و الأمن و الضرائب طيب خليهم ناس الأحزاب و الاجندات ليه الناس ما بتتحرك تلقائيا مظاهرات مارس 21 فداسي تحديدا كان فيها اشارة مختلفة لكن للاسف طلعت مقرونة بحادث سير وزيها وزي مظاهرات مطبات الجريف في خطا في مكان ما خليها الدعوة لإسقاط النظام عندها ناسها وين الدعوة بل و الإلزام للحكومة بالقيام بواجبها من دعم وتوفير المتطلبات الاساسية من علاج وتعليم وخدمات دي حقوق وليست تفضلا أو منحا من الحكومة كونها تقصر فيها مفروض من يعاني ان يرفض و يعلّي صوته ويوصّله لأهل الامر ودا الكان بحصل قبل كدة الجد شنو؟ أخشى ما أخشاه ان تعتبر الحكومة دعوات اشعال الشموع و مواعيد شرارة وغيرها هي اقصى اماني و قدرات الشعب وتنوم لينا على كدة وتواصل في غيّها و عصرها و تجاهلها للمعاناة التي فاقت القدرة على الإحتمال
ام أن الخطاب الديني للحكومة تمكن من وجدان الجماهير و الناس دي صدقت فعلا جاكات زي الاستهداف و دول الاستكبار و الصبر على المكاره ... إلخ
صباحك خير وجمعتك مباركة ..
الخطاب الدينى دا بسببو ماتو الاف الشباب ابان حرب الجنوب وفى كل مرة بكون فى ثوب جديد .. من ناحية متمكن من وجدان الناس متمكن ودى ما دايرة اتنين تلاتة وخلا الناس زى العايشين فى غيوبة
تعرف ياود البشري حكومه لاتعرف مقدرات شعبها مصيرها مؤلم للغايه وهي حكومه كافره هي تؤمن بنفسها فقط ولاتبالي انشاء الله الشعب يحرق مادام الامن (اكثر بند للمنصرفات في ميزانية الدوله) تمام اي شئ مقدور عليهو
انها أمة الامجاد .... ونحن نؤمن بها احس بوجعك تمام .
03-25-2011, 11:06 AM
omer osman omer osman
تاريخ التسجيل: 06-09-2007
مجموع المشاركات: 15218
لماذا لايثور السودانيون ؟ سؤال على غرار الكتاب الشهير للكاتب المصري علاء الاسواني (لماذا لايثور المصريون) رغم أن المصريون نجحوا أخيراً في ان يثوروا ... بالطبع الاسباب قطع شك مختلفة تلك التى كانت تمنع المصريين من الثورة أو تلك التى ما زالت تكبل الشعب السوداني ومرد واساس ذلك الاختلاف راجع الى طبيعة وشخصية الشعبين. الشعب السوداني وبكل صراحة ودي ماشتيمة (شعب عفوي لحظي) احد اصدقائي يصف صديق مشترك بيننا بأنه (يغير رأيه مع كل نشرة أخبار !!!!) الشعب السوداني يحب ويكره ويسب ويثور ويرضي ويسخط بعفوية شديدة دون تمحيص او تدبر ومن السهل جداً التأثير عليه اذا عرفت ان تخاطب فيه هذه العفوية ودونك خطابات البشير الجماهيرية ومدي تجاوب الجماهير معها وفيهم او جلهم جيوبه افرغ من فؤاد ام موسي وقبلها خطابات النميري وغير بعيد عن ذلك تعلق عضوية حزبي الأمة والاتحادي الديمقراطي بزعاماتهم التاريخية والرفض القاطع لأي إنتقاد يمسها كل ذلك دافعه الحب العفوي. أمر أخر نحن شعب بقدر ما نتصف بالشجاعة التى قد تبلغ درجة التهور إلا اننا نحب حياتنا هذه على بساطتها ونحب بعضنا البعض بشكل غريب ولا نتمني ان نفقد من نحب وبالتالي لانقبل بسهولة فكرة تعريض حياتهم للخطر او ان نجعلهم يعرضون حياتهم للخطر (ياولد اوعك تمشي المظاهرة ....... يابت كان قامت مظاهرة طوالي تجي البيت ...... يا اولاد قالوا الخرطوم احتمال تقوم فيها كركبة زول يطلع مافي ... وانت ذاتك يا ابو فلان المارق ليهو شنو ..... اقعد يا ابوي يبقي علينا فقر وموت ...الخ) شاهدت كيف يتعامل كثير من الشعوب مع فكرة موت صديق أو ابن او جار هدوء وبرود ليس لاسباب دينية من باب الصبر والاحتساب لكن هم كده وتعال شوف الشعب السوداني وكيف يجرسنا موت الاصدقاء والاخوان والجيران .... هذه الحساسية اتجاه فكرة الموت تربك الحسابات وتمنع الاندفاع في أمر غير مضمون النتائج. امر اخير كل الدول العربية التى قامت فيها الثورات موخراً لاتوجد بها احزاب حقيقية تتمتع بعضوية كبيرة مثل ما هو الحال لدينا في السودان مكابر من ينكر ان احزاب الامة والاتحادي والشيوعي وغيرها باقية وموجودة في السودان وتتمتع بعضوية كبيرة ومقدرة وبالتالي اى حراك خارج اطار هذه الاحزاب لن يفلح ولن يكتب له النجاح يمكن ان ينجح فقط في اشعال الفتيل لكن بدون دعم الاحزاب وعضويتها سيخمد هذا الفتيل بااسرع مما تتصور وحتى الأن واضح ان احزابنا الكبيرة تقف على الحياد تراقب وتفاوض ونأمل ان نصنع بالمفاوضات ما صنعته الشعوب بالثورات حقناً لدماء الشعب السوداني.
03-25-2011, 11:18 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: لماذا يقف المسحوقين واسياد الوجعة الجد جد و اللناس العينها طالعة موقف المتفرج ايام نميري و الاحزاب كانت المظاهرات ضد الغلاء وتردي الخدمات امرا روتينيا و تلقائيا ا لحصل اسي شنو؟
ويبقى السؤال قائم أخي ود البشرى. الحصل للشعب السوداني شنو؟؟؟ لك مني السلآم وعاطر التحايا أخي محمد البشرى الخضر. جمعتك مباركة، ونسأل الله ببركتها أن يرفع البلاء عن بلآدنا...
03-25-2011, 11:14 AM
محمد عبدالله حمدنا الله محمد عبدالله حمدنا الله
تاريخ التسجيل: 11-24-2009
مجموع المشاركات: 616
ود البشرى... التحايا النواضر.... . . جميع الثورات "تفرخ" أوضاعآ سياسية....إجتماعية...إقتصادية...إلخ ..جديدة... . . تاريخ الثورات السودانية الحديثة يؤكد أن "كتف" المواطن هو الذي حمل نفس البدائل في 64 و 85....و سلمهم "الرسن" الديمقراطي على طبق من ذهب..... نفس هذا "الكتف" قرف من عمايلهم و خرج يحمل "صغار" الضباط و المغامرين ثلاثة مرات 58-69-89....و لا تنسى إستقباله لنميري 1998. يبدو لي أن هذا "الكتف" قد مل من برنامج "شيل سيدي"...و "خت سيادتو"..."أرفع جنابو"....و "نزل الرفيق و الحبيب والزميل"... . . الشخصية السودانية-يا أبوحتحوت- بكل تناقضاتها هذه...تفكر في عقلها الباطن عن البديل "المقنع" و الغير "مجرب" قبل التغيير....و إلا ف "جنآ تعرفو...و لا جنآ ما تعرفو".....لذلك ما لم يهتم الراغبين في التغيير بطرح أنفسهم كبدائل و وجوه جديدة.....سيظل الحال كما هو عليه....و على المتضرر أن يشرب من بحر "أوكامبو"... . . هذا مع إتفاقي "الجزئي" مع الأستاذة/أميرة في بعض ما ذهبت إليه... . . . . .مودتي... ودحطب الله
03-25-2011, 11:29 AM
محمد حيدر المشرف محمد حيدر المشرف
تاريخ التسجيل: 06-20-2007
مجموع المشاركات: 20357
Quote: * أخشى ما أخشاه ان تعتبر الحكومة دعوات اشعال الشموع و مواعيد شرارة وغيرها هي اقصى اماني و قدرات الشعب وتنوم لينا على كدة وتواصل في غيّها و عصرها و تجاهلها للمعاناة التي فاقت القدرة على الإحتمال
ودا الحيحصل بعد المرقات الفاشلة دي تأكدت الحكومة انه الحبة ما بتجيهم.. من جنس ديل
03-25-2011, 11:51 AM
حمور زيادة حمور زيادة
تاريخ التسجيل: 03-28-2007
مجموع المشاركات: 12116
Quote: الخطاب الدينى دا بسببو ماتو الاف الشباب ابان حرب الجنوب وفى كل مرة بكون فى ثوب جديد .. من ناحية متمكن من وجدان الناس متمكن ودى ما دايرة اتنين تلاتة وخلا الناس زى العايشين فى غيوبة
أنا زاتي قلت كدا المعاناة المعيشية غير عادية ومن قبل كانت تخرج المظاهرات عفوية وتلقائية لنقص وزن الخبزز فقط أو لإنقطاع الكهرباء فقط مظاهرات زهج ومطالب لاسقوف مرتفعة لها اسي دي زاتها ما بتحصل افتكر هو التفسير المنطقي تخويف الناس من قولة يمسكوكم الشيوعين و الكفار و يشيلو الشريعة ويقفلوا المساجد ويفتحوا البارات لكن دا برضو مفروض ما يمنع الناس ترفع صوتها برفض الفساد و الغلاء واعادة الدعم في اطار النظام الحالي دا زاتو بي شريعتو وبي خطابو الديني لحظة الحوجة الحقيقية الناس مرقت في الجريف وفي الكلاكلة وفي فداسي احتجاجا على عدم وجود المطبات و الإشارات وتكرار الحوادث طيب المشكلة وين ؟
انتي الإقتباس ما شغال عندك ولاّ كيف؟
Quote: هي تؤمن بنفسها فقط ولاتبالي انشاء الله الشعب يحرق مادام الامن (اكثر بند للمنصرفات في ميزانية الدوله) تمام اي شئ مقدور عليهو
أخ يا نجلاء من حكاية ميزانية المن و الدفاع تلتهم سبعين في المية من ميزانية الدولة على حساب التعليم و الصحة ليه ياخ ليه سيدنا عمر قيل فيه عدلت فامنت فنمت انا لو محل الحكومة دي وبعد عرفت الوزن الحقيقي لناس " يريد اسقاط النظام" كنت وجهت جهودي وميزانيتي بدل تروح في الأمن لرفع المعاناة عن الشعب و دعم علاجه و تعليمه و توفير على الأقل متطلبات الحياة الأساسية ما دام ديل هم المنهم الخوف الحقيقي لو اتحركوا لكن تقولي شنو بس لسوء الحظ الشعب أني لست كذلك
وعليكم السلام يا جنابو و جمعتك مباركة خليها ثورة السودانيين ذات السقف المرتفع - أو اللا سقف - وين التذمر العادي دا من ضيق الحال منو في جيلنا دا ما كان بطلع كل سنة في مظاهرات المدارس ايام نميري هل كانت بتحركها الأحزاب ؟ بالليل الكهرباء قاطعة اولاد الحلة مافي موضوع بنجيب لستك نحرقو في نص الزلط نرجى البوليس نقلقوا و نجري و خلاص تاني يوم في المدرسة تلاتة اربعة شباب من اولاد العالي يجوا يهتفوا و تلاتة اربعة حجار في الزنك صفافير بتاع ها ها ها مظاهرة و طلعت اسي الكلام دا نهائي ماف رغم انو الحال اسوأ - للامانة الكهرباء اتحسنت - لكن الوضع المعيشي اسوأ بالتاكيد
Quote: يمكن ان ينجح فقط في اشعال الفتيل لكن بدون دعم الاحزاب وعضويتها سيخمد هذا الفتيل بااسرع مما تتصور وحتى الأن واضح ان احزابنا الكبيرة تقف على الحياد تراقب وتفاوض ونأمل ان نصنع بالمفاوضات ما صنعته الشعوب بالثورات حقناً لدماء الشعب السوداني.
يا ريت والله أي حل للمعاناة المتفاقمة و المتوقع انها تداد سوءا خصوصا بعد انفصال الجنوب و إن كنت غير متفائل بأن الأحزاب الكبيرة ستضع المواطن في مقدمة اولوياتها فهي كانت في الحكم يوما ما ما شفنا منها همة في خدمة المواطن دا غير انو حقا ترجاه من الآخرين ولا بجي حقك تقالعه براك واحنا عندنا حق عند الحكومة حق في العيش الكريم حق في العلاج المجاني حق في التعليم حق في قوانين تحد من سلطات الشرطة والأمن حق في تطبيق حت القوانبن التي وضعتها الحكومة بنفسها وهي اول من خرقها الله غالب
حبيبنا حمور اجاد التعبير عن الموضوع دا ذات استيتس احنا كشعب بقينا يا ماعارفين حقوقنا شنو يا إما ما فاكرين زاتو انو عندنا حق عند الحكومة تخيل الناس تشتكي مر الشكوى وفي نفس الوقت يفتشوا العذر للحكومة و يقوليك البديل منو ناس أبو عيسى ؟ رحم الله العميري
يا ود حطب الله يا صاحب الطبقات حياك الله و ابقاك وينك يا رجل تساؤل البديل منو فعلا دا كلام حاصل ما نقدر ننكر وجود التساؤل دا لكن انا حديثي ليس عن المطالبة بالتغيير زي ما قلت فوق دي ليها ناسها انا قصدي العينو لي ولده بضيع قدام عيونو عشان ما عندو حق الجامعة و البطنش علاج السكري و الضغط عشان ما عندو و البطلع ولدو المدرسة بدون سندوتش او حق فطور عشان الالف جنيه بقت تجيب اربعة عيشات بس بدل خمسة و البخلي بتو تمشي كداري بالكيلو و الاتنين عشان ما عندو حق المواصلات يديه ليها معقول دا يسيطر على انفعالو و ضيقو من الحاصل بتساؤل البديل منو خليك من البديل, القاعد دا زاتو سمعوا صوتك انك متضايق من واجبو عليك يفرج عليك ضيقك ودا ما تفضل ولا منحة ياخي الحال بلغ من السوء درجة منسوبي المؤتمر الوطني نفسهم مفروض يطلعوا و يحتجوا قبل الباقين
اشتقنا نقرا ليك ياخ بطل الغياب
وعليكم الـ * و رحمة الله يا دكتور المشرف
Quote: ودا الحيحصل بعد المرقات الفاشلة دي تأكدت الحكومة انه الحبة ما بتجيهم.. من جنس ديل
هي مالو يا بيان الحبة ما بتجيهم بعد دا ما يخافوا الله في الباقين طيب و يريّحوهم شوية او نوع من العرفان ساي طيب و رد الجميل كون الشعب خذل اصحاب الدعوات وما اشتغل بيهم الحكومة بغض النظر عن شرعيتها راع ومسؤولة عن رعيتها ساكت الأموال المختلسة البتجي في تقارير المراجع العام والتي يعلم الله ان كانت تسترد او تروح في باب التسويات و عفى الله عما سلف وخلوها مستورة كان اندعم بيها العلاج ساي كان الوضع اتحسن
03-25-2011, 12:22 PM
Sana Khalid Sana Khalid
تاريخ التسجيل: 02-01-2005
مجموع المشاركات: 2740
بالعكس يا أميرة.. الخطاب الديني البيتملك وجدان الناس دا كان زمان.. في بداية الأنقاذ و لما الناس (اتخمت) في الأول..
لكن هسة الناس كلها بقت عارفة انو الخطاب الديني دا هو كلمة المرور لتنفيذ غاياتهم حلالها و حرامها.. قطعة اكسسوار زيو زي حجاب النساء و دقون الرجال!
للأسف يا ود البشرى الناس فيها حاجات كتيرة ماتت ، و رغم انو كتيرين زي ماما دومة و سلمى تاور قالوا الكلام دا قبل كدا و أنا واحدة من الناس كنت بغالط فيهم من واقع إيمان كنت بعتقدو راسخ في أولاد و بنات السودان.. اتزعزع كتير جداً مع المشهد اليوم..
الحاجات دي ما ماتت فجأة.. لكن أبيدت شوية شوية في نفوس الناس.. و اتعود معظم السودانيين العيش بكرامة منقوصة .. و ما عايزة أقول بدون كرامة ..
تتذكر لما قلت انو كلام وائل غنيم مثلاً كان فيهو حاجات أعمق كتير من بكاه مع انو الناس ركزت شديد على موضوع البكاء؟
غنيم قال في كلامو ما معناه انو المحكوم لما يعيش تحت الإهانة و يتعود يتقبلها بدون اعتراض يبقى بتنتزع منو كرامتو.. و بيبقى زول عايش ساي!
في ظني انو العشرين سنة الفاتت دي قاموا فيها أجيال بتعرف قليل جداً عن معنى الحياة الكريمة بعيد عن المعنى المادي! بتعرف قليل جداً عن حقوقها و واجباتها..
انتشر الفساد و بقت الرشوة و الاختلاس شيء عادي و ما مستنكر
ما بيعيب الشاب منهم في المجتمع العايش فيهو انو يكون نصاب و بيلعب بالبيضة و الحجر.. لكن بيعيبو الفلس، و ضيق ذات اليد!
القرش الحرام دخل بيوت كتيرة.. و البدن لمن يقوم من حرام بتضعف النفس و بتضعف فيها الغيرة على أي شيء حتى كرامتها!
و بالرغم من كدا يا ود البشرى يا أخوي.. من رحم ربي موجودين.. و إن كانوا مادين حبال الصبر لكن مصير صبرهم ينفد.. و يطلع المارد الجواهم يوم ما بإذن واحد أحد
03-25-2011, 12:19 PM
عاطف عمر عاطف عمر
تاريخ التسجيل: 11-26-2004
مجموع المشاركات: 11152
توارد خواطر عجيب يا هندسة عندما استنهض الأخ د. بلة موسى همم الشعراء أو من ( يأنسون في أنفسهم شعراً ) للإسهام معه في بناء ( تحريضته ) التي أسماها ( صحيني يا خرطوم ) ورغم أن علاقتي بالشعر تماثل علاقتي باللغة الصينية ، فقد وجدتني أدندن معهم دون الإدعاء أن هذه الدندنة ترتفع لمقامات الشعر ، لكنهم ومن ذوقهم الكثير لم ( يكسروا بخاطري )
يا عزة قومي كفاك يا عزة نومك طال خليهو ذاك الدل قبيل خليل شن قال أخواتك الوراك في الدور بالهمة نحسهم زال زلزلوا الباطش العاتي وأمرو أضحى وبال شدي الرسن يا أم زين نادي أولادك والعم والخال قولي ليهم كفاكم غربة أصلو الفرحة بدونك محال
إن جاز لي أن أختصر إجابتي على سؤالك ( الكبير ) فسوف أختصرها في كلمتين
الإستكانة الإحباط
غافل من يقلل من معرفة ( الجبهة القومية الإسلامية ) لواقع السياسة في السودان . لذلك فهى قد إستصحبت تجارب أكتوبر 1964 وأبريل 1985 وأدركت منذ أيامها الأول أن الخطر عليها ( إن وجد ) فسوف يأتيها من قوى المجتمع المدني ( الحية ) المتواجدة داخل السودان ، أما الذين هم خارج السودان فهؤلاء تأثيرهم جد محدود ،وحتى هذا التأثير المحدود فقد تمكنوا من حجبه عمن هم بالداخل بـ ( إلهائهم ) في معيشتهم ومكابدة هموم يومهم . ذلك فقد بعثرت الطلاب في جامعاتهم كل مبعثر وسهلت خروج من يود الخروج . تأمل البوست الموجود الآن على الصفحة الأولى من المنبر عن حفلات الفنان عصام محمد نور في أمريكا وتأمل صور الشباب أو ( القوى الحية ) وأنت تعرف ما أقصد . تلفت حولك في إماراتك أو في خليجك العربي وأنت تعرف ما أود أن أقول . لقد راهنت الحكومة على أمر أثبتت الأيام صدقيته خروج قوى المجتمع المدني الحية من السودان يقلل من الحركة المناوئة لها ، كلما طال بقاء هذه القوى خارج السودان كلما تعقدت وتصعبت إحتمالات رجوعهم نظراً لتغير أوضاعهم الإجتماعية ، فمن خرج من السودان في بداية التسعينات شاباً أو شابة هو اليوم والد أو والدة لأنجال في سن الجامعات ، أنجال إرتبطت حيواتهم بالواقع ( الجديد ) الذي نشأوا فيه . تلك هى المعضلة لا نلوم بالطبع أحد فكلنا جزء من هذا الوضع ، لكن إبرازه أمر أراه حيوياً إن أراد الناس تفاكراً حقيقياً
__________________
ليس هذا بالطبع هو السبب ( الوحيد ) أرجو أن أتمكن من العودة
الحاصل انو الناس هناك ما عندها فرصة تفكر في معاناتا...بفكروا في المحافظة علي النفس الطالع ونازل وبس...وصلوا اعلي منحنيات اللامبالاة...
هو انا فاضي اتظاهر لاسقاط الحكومة... وبعدين الحكومة مالا؟ اتصور دي الاجابة البسيطة اللقيتا هسي دي...عبر اتصال مع زول بسيط... الناس مشغولة بتفاصيل الحياة اليومية من اكل وشرب ومواصلات...وتعليم...24 ساعة في اليوم و7 ايام في الاسبوع.. الهامش البسيط البلقوه بشغلوه في قضايا من حولهم...
هل انت نسيت ان جيلا كاملا بالغا راشد لا يعرف غير هذه الحكومة...وديل امكن يكونوا قايلين الحكم كده واللذين يعرفون الحكم الرشيد هم الآن خلف الكيبوردات في المهاجر المختلفة...
03-25-2011, 11:31 PM
محمد إبراهيم علي محمد إبراهيم علي
تاريخ التسجيل: 08-10-2009
مجموع المشاركات: 10032
ماركيز في روايته ساعة نحس قال على لسان احد شخصيات الرواية (من يستطيع ان يرغم من لديه عشرة افواه يطعمها ان يكون غير محايد) للاسف الاحزاب ترسل اشارات خاطئة ومضللة فهي تتحاور مع النظام وتريد الشعب ان يطلع عنها او زي ما بتقول انت للحبشي تأشر يمين وتلف شمال
ـــــــــــ لكن ارجع واقول ان التغيير ات ومن الافضل ان يكون تغييرا منظما وله اهداف واضحة بدلا من ان يكون تغييرا مدمرا الاحزاب دي لو بتثق في الشعب ده بكرة توقف البتعمل فيهو ده وتخرج للشارع بناسا في المقدمة انا متاكد انو الشعب ده حيحمي ضهورهم لكن قصة ينتظرو الشعب ده ياكل الرصاص براهو ويجو هم يشيلوها باردة دي تاني مافي
03-26-2011, 00:03 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
حمور ياخوي راحة المواطن دي آخر حاجة تهم حكومتنا لدرجة حتى البوسة يبخلوا بيها عليه
سعد الدين ازيك يادابي شنو؟ يا دابي اكتشفت انو الناس لا تبالي بمعاناتها و محتسباها و راجية الآخرة وكدا؟ مع الظروف الصعبة في السودان كنت اتوقع ان يتحرك اسياد الوجعة براهم يدفعهم الضنك و الاحساس بالضيم ما عولت كتير دعوات الفيس بووك و الاسافير عموما لاسباب كتيرة لكن شريط مظاهراة امبدة و اللامبالاة الواضحة من المارة و سائقي السيارات و الركشات هي التي اثارت تساؤلاتي
يااااااه يا دكتورة سناء معقول الصورة بالقتامة دي؟ لا أظن - للدقة لا أتمنى مداخلتك محزنة بحق يا سناء لكن معاك اقول
Quote: من رحم ربي موجودين
عاطف يا هندسة قلوب المهندسين عند بعضيها خلي بالك
Quote: الإستكانة الإحباط
الاستكانة ما عارفها غايتو لكن الاحباط دا في حد ذاتو سبب كافي للناس ترفع صوتها وتقول انها محبطة ومحبطة عشان كيت وكيت يا هندسة
Quote: غافل من يقلل من معرفة ( الجبهة القومية الإسلامية ) لواقع السياسة في السودان . لذلك فهى قد إستصحبت تجارب أكتوبر 1964 وأبريل 1985 وأدركت منذ أيامها الأول أن الخطر عليها ( إن وجد ) فسوف يأتيها من قوى المجتمع المدني ( الحية ) المتواجدة داخل السودان ، أما الذين هم خارج السودان فهؤلاء تأثيرهم جد محدود ،وحتى هذا التأثير المحدود فقد تمكنوا من حجبه عمن هم بالداخل بـ ( إلهائهم ) في معيشتهم ومكابدة هموم يومهم . ذلك فقد بعثرت الطلاب في جامعاتهم كل مبعثر وسهلت خروج من يود الخروج . تأمل البوست الموجود الآن على الصفحة الأولى من المنبر عن حفلات الفنان عصام محمد نور في أمريكا وتأمل صور الشباب أو ( القوى الحية ) وأنت تعرف ما أقصد . تلفت حولك في إماراتك أو في خليجك العربي وأنت تعرف ما أود أن أقول . لقد راهنت الحكومة على أمر أثبتت الأيام صدقيته خروج قوى المجتمع المدني الحية من السودان يقلل من الحركة المناوئة لها ، كلما طال بقاء هذه القوى خارج السودان كلما تعقدت وتصعبت إحتمالات رجوعهم نظراً لتغير أوضاعهم الإجتماعية ، فمن خرج من السودان في بداية التسعينات شاباً أو شابة هو اليوم والد أو والدة لأنجال في سن الجامعات ، أنجال إرتبطت حيواتهم بالواقع ( الجديد ) الذي نشأوا فيه .
يا هندسة معقول دي تكون استراتيجية لادارة دولة؟ اخشى - بل اتمنى - تكون نظرية مؤامرة لكن يا عاطف سؤالي عن اللسة قاعدين جوة ومنكوين كي حقيقي و روحهم مارقة أو على وشك
اكيد راجي عودتك
حاضر يا دينا واحدة واحدة تابعي وادينا المفيد
يا نزار كلامك فيه وجاهة الناس انشدهت بالحياة وتفاصيلها و المعاناة الفيها لكن كلامي مش عن ناس الشعب يريد اسقاط الرئيس انا اسال عن من يريد لفت نظر الرئيس لمعاناته
Quote: هل انت نسيت ان جيلا كاملا بالغا راشد لا يعرف غير هذه الحكومة...وديل امكن يكونوا قايلين الحكم كده واللذين يعرفون الحكم الرشيد هم الآن خلف الكيبوردات في المهاجر المختلفة...
كذلك الكان بخرج في مظاهرات العيش و الكهرباء ايام نميري هم طلائع مايو و الكشافة ومن شبوا على ناس ابوكم مين و اب عاج و يا فارسنا رغم كدة المعاناة و الألم كان دافعهم للاحتجاج
Quote: بغرت عديل من منظر شباب الأردن وتجمعهم مطالبين باصلاحات سياسية و الغاء سيطرة المخابرات العامة على الحياة في المملكة وقبلهم شباب سوريا الذين اثمرت دماء شهدائهم السبعة والثلاثين عن زيادة الرواتب و العمل على رفع حالة الطوارئ ولسة الأسد ماشي في سكة التنازلات وارضاء الشعب يمد الناس ديل ما فايتننا في ضيق الحال و العصرة و المعاناة المعيشية بأي حال طيب ليه ؟ ضيق الحال في السودان لايخفى على أحد عطالة خريجين وغلاء و تردي في التعليم و الصحة و فساد مستشري وضارب جذوره في اجهزة الدولة الدولة التي لا يعلم عنهاالسواد الاعظم وما شايفين منها شيئ غير جباة الضرائب و العوائد و تسلط الشرطة والأمن عليهم سيدنا علي كرم الله وجهه نسب إليه العجب من أن لا يخرج من لا يجد قوت يومه شاهرا سيفه على الناس ويقيني أن الغالبية كذلك بالكاد لاتجد قوت يومها ومن يجده يقضي بقيه يومه وليلته تضرعا للمولى أن لا بتليه او اسرته بمرض يستدعي البحث عن علاج رفعت الدولة يدها عن دعمه أو توفيره الفقر و غياب العدالة أكبر و امضى من مليون فيس بووك وتويتر لحث الناس على الشكوى و التذمر ومطالبة الحكومة بالقيام بواجبها نحو رعاياها أين الخطأ ؟ لماذا يقف المسحوقين واسياد الوجعة الجد جد و اللناس العينها طالعة موقف المتفرج ايام نميري و الاحزاب كانت المظاهرات ضد الغلاء وتردي الخدمات امرا روتينيا و تلقائيا ا لحصل اسي شنو؟ هل يعتبر الشعب ان اصحاب دعوات التظاهر الحالية لهم اجندات اخرى وما أتو للبحث عن حقوقه فعمل ليهم التجاهل و كررها ثلاثا ام أن الخطاب الديني للحكومة تمكن من وجدان الجماهير و الناس دي صدقت فعلا جاكات زي الاستهداف و دول الاستكبار و الصبر على المكاره ... إلخ ام هو سؤال من البديل ؟ الغريبة اي زول تقابله يشكي و زهجان من الحكومة ومن الغلاء ومن تسلط الشرطة و الأمن و الضرائب طيب خليهم ناس الأحزاب و الاجندات ليه الناس ما بتتحرك تلقائيا مظاهرات مارس 21 فداسي تحديدا كان فيها اشارة مختلفة لكن للاسف طلعت مقرونة بحادث سير وزيها وزي مظاهرات مطبات الجريف في خطا في مكان ما خليها الدعوة لإسقاط النظام عندها ناسها وين الدعوة بل و الإلزام للحكومة بالقيام بواجبها من دعم وتوفير المتطلبات الاساسية من علاج وتعليم وخدمات دي حقوق وليست تفضلا أو منحا من الحكومة كونها تقصر فيها مفروض من يعاني ان يرفض و يعلّي صوته ويوصّله لأهل الامر ودا الكان بحصل قبل كدة الجد شنو؟ أخشى ما أخشاه ان تعتبر الحكومة دعوات اشعال الشموع و مواعيد شرارة وغيرها هي اقصى اماني و قدرات الشعب وتنوم لينا على كدة وتواصل في غيّها و عصرها و تجاهلها للمعاناة التي فاقت القدرة على الإحتمال
... كلام عجيب و فى المليان كمان .. .. بس ! غايتو لو ما كنت رشاشه ! ما عارف كنت حأقول ليك شنو يا أبو حتوت .. .... دشليون سلام لود البشرى و عياله و أسرته و أسرة أسرته .. ... عبدالماجد
03-26-2011, 08:45 AM
nazar hussien nazar hussien
تاريخ التسجيل: 09-04-2002
مجموع المشاركات: 10408
Quote: كذلك الكان بخرج في مظاهرات العيش و الكهرباء ايام نميري هم طلائع مايو و الكشافة ومن شبوا على ناس ابوكم مين و اب عاج و يا فارسنا
لا الجيل الحالي اكتر يا محمد...
احسب معاك المولودين من سنة 1980 -1981 -1982-1983-1984-1985-1986-1987 1988-1989-1990-1991-1992
جيل اعمارو من 31 سنة الي 18 سنة وحسب التعداد السكاني الاخير فان هؤلاء يمثلون 43% من السكان في السودان واذا اخذنا في الاعتبار ان المظاهرات المؤثرة في اسقاط الانظمة تاريخيا تبدأ من العاصمة الخرطوم...فهذه العاصمة نفسها بها 574321 اكثر من ثلثينهم من الاعمار المذكورة وما دونها...وربع من المهمشين.. ناس معايش الساكت.. يبقي عندك 2/3 +1/4 يعني الباقي ليك عدد بسيط جدا...الممكن يقول ويفهم تبعات الشعب يريد اسقاط النظام..من آخر ضميرو
03-26-2011, 09:13 AM
مهيرة مهيرة
تاريخ التسجيل: 04-28-2002
مجموع المشاركات: 943
Quote: انا لو محل الحكومة دي وبعد عرفت الوزن الحقيقي لناس " يريد اسقاط النظام" كنت وجهت جهودي وميزانيتي بدل تروح في الأمن لرفع المعاناة عن الشعب و دعم علاجه و تعليمه و توفير على الأقل متطلبات الحياة الأساسية ما دام ديل هم المنهم الخوف الحقيقي لو اتحركوا
عارف ياأبو حتحوت آخر هدايا الحكومة النجيضة لشعبها ( المنجض ) كانت شنو؟!!!
Quote: وقال الناطق الرسمي باسم الخارجية من المنتظر ان يلتقي رئيس الوزراء د. عصام شرف برؤساء وممثلي بعض الاحزاب السودانية خاصة حزب المؤتمر الوطني ، والحزب الاتحادي ، وحزب الامة وآخرين وتتويجا للقاءات الرسمية يستقبل الرئيس السوداني الوفد المصري ببيت الضيافة مساء يوم الاحد للتفاكر والتباحث ومباركة ما ستسفر عنه المباحثات المشتركة بين البلدين .
واضاف ان الوفد المصري سيشهد في محجر الكدرو صباح يوم الاثنين بدء ترحيل خمسة الف رأس من البقر الى مصر وهي هدية الرئيس عمر البشير الى الشعب المصري والتي اعلنها اثناء زيارته الأخيرة الى القاهرة وسيغادر الوفد المصري الى جوبا للقاء رئيس حكومة الجنوب الفريق سلفاكير واعضاء حكومته .
في حاجات الناس لازم تنتبه ليها * الثوره ما تمني ولا بالعدوي ، لكن عمل علمي و فهم للواقع و تغييره. * الحركة الأسلامية قبال إنقلاب 1989 قامت بدراسات إحصائية و علمية للواقع الأجتماعي السياسي و كانت مدركة تماما للقوي الفاعلة في المجتمع لذلك قدرت و بمخطط واعي بهدم هذه القوي او تحييدها مثال: أيام مايو إذا حصل إضراب يتم سجن أعضاء النقابة أو فصلهم في عهد الإنقاذ إذا حصل إضراب يتم فصل العاملين و تغييرهم و تعيين نقابة موالية للنظام.
نحن شاركنا في انتفاضة 1985 على أمل أن يكون البديل أكثر وعياً ومهموماً بتطلعات الجماهير وآمالها. فماذا كان البديل؟ كان البديل الأحزاب الطائفية التي أدارت ظهرها لمطالب الجماهير وتفرغت للكسب السياسي والكيد لبعضها البعض. الصادق يوافق الميرغني يعترض. الميرغني يرفض الصادق يوافق. الميرغني يوقع اتفاقاً مع قرنق والجماهير تنظره لاستقباله استقبال الفاتحين، الصادق يغادر خارج البلاد. الجكومة يتم تشكيلها لتسقط بعد أقل من شهر بفعل الكيد السياسي. عبث واستهتار وعدم التفات للكوارث المحدقة بالوطن. كل من عاصر تلك الفترة يخشى من تكرار نفس السيناريو لذلك تجده يفكر ألف مرة قبل الخروج ضد النظام الحاكم. ويسأل نفسه لماذا أُضرب وأُسجن ليأتي من لا يهمه أمري؟؟؟ لا أتفق مع ذلك فالديمقراطية لها ثمنها ولا بد من الصبر عليها لكن الكثيرون قل حماسهم للتغيير خوفا من عودة ديناصورات الحزبين. لم يكن للأحزاب دور يُذكر في قيادة الانتفاضتين التونسية والمصرية ولكن قادتها جماهير الشباب المؤمنة بضرورة التغيير. ولكن هؤلاء الشاب الذين قادوا الثورتين المذكورتين لم يعانوا ما عانيناه نحن من أحزابنا، لذلك كان حماسهم رائعا ومدهشاً. لابد من ثورة داخل الحزبين الكبيرين حتى تتحقق الانتفاضة.
يا ود البشرى يبدو أن كبرتة عازة ستطول وستظل عروساً إلى أن أن ينضب الطلح في سوداننا وتغير أحزاب أسيادي جلودها.
Quote: أنا زاتي قلت كدا المعاناة المعيشية غير عادية ومن قبل كانت تخرج المظاهرات عفوية وتلقائية لنقص وزن الخبزز فقط أو لانقطاع الكهرباء فقط مظاهرات زهج ومطالب لاسقوف مرتفعة لها اسي دي زاتها ما بتحصل افتكر هو التفسير المنطقي تخويف الناس من قولة يمسكوكم الشيوعين و الكفار و يشيلو الشريعة ويقفلوا المساجد ويفتحوا البارات لكن دا برضو مفروض ما يمنع الناس ترفع صوتها برفض الفساد و الغلاء واعادة الدعم في اطار النظام الحالي دا زاتو بي شريعتو وبي خطابو الديني لحظة الحوجة الحقيقية الناس مرقت في الجريف وفي الكلاكلة وفي فداسي احتجاجا على عدم وجود المطبات و الإشارات وتكرار الحوادث طيب المشكلة وين ؟
غايتو لو خليتوني أنا بفتكر ان المشكلة تكمن في صدمة الشارع من نتائج تجاربه السابقة بما خلق لديه إنطباعا سيئا عن السياسيين وجعله لا يثق في أيا من يتولي الحكم . كلما ثار الشعب من أجل واقع أفضل يجد نفسه قد عاد إلى ذات واقعه وأسوأ عشان كدا المرة دي صهين ولسانه حالو يقول أحسن المروءة الفيهو دي يوظفا لمجابدة الظروف الحياتية وأكل لقمة العيش والعمل لدنياه ودينو . أعتقد أن المشكلة ليس في خوفه من حكم الشيوعيين ولا الإمبرياليين ولا التوسعيين ولا حتى الشيطان الرجيم بل هو الخوف من تكرار التجارب الفاشلة التى ضحي فيها بالغالي والنفيس وكانت النتيجة صفر أكبر من الأول .
03-28-2011, 12:02 PM
حمزه بابكر الكوبي حمزه بابكر الكوبي
تاريخ التسجيل: 04-13-2009
مجموع المشاركات: 2121
تحياتي ود البشرى بوست مهم جدا تونس ومصر واليمن وليبيا وسوريا والاردن والجزائر والمغرب ديل في لحظات الزنقه الحكومات قدمت تنازلات ورضخت واغلب التنازلات تمثلت في الحريات ورفع حالات الطوارئ . هسع الكيزان لما تجيهم الزنقه حايقدموا تنازلات عن شنو ويخلوا شنو ؟؟؟!!! مجانية التعليم مجانية الصحه الغلاء البنيه التحتيه وغيروا وغيروا والله قائمتهم اطول قائمه في المنطقه !!!!
03-28-2011, 12:28 PM
shammashi shammashi
تاريخ التسجيل: 03-10-2002
مجموع المشاركات: 2278
أمس واحد بيتكلم في واحدة من القنوات السودانية (مدير مركز شنو كدا ما عارف) قال الصادق قال نحن أهدينا الشعب التونسي والمصري ثورتين من قبل وقريبا سنهديهم نوعا جديدا من أدوات التغيير (دا معنى الكلام ) أها كدي النصبر نشوف النوع الجديد دا شنو. يمكن عازة تقوم.
03-28-2011, 02:44 PM
nazar hussien nazar hussien
تاريخ التسجيل: 09-04-2002
مجموع المشاركات: 10408
Quote: أمس واحد بيتكلم في واحدة من القنوات السودانية (مدير مركز شنو كدا ما عارف) قال الصادق قال نحن أهدينا الشعب التونسي والمصري ثورتين من قبل وقريبا سنهديهم نوعا جديدا من أدوات التغيير (دا معنى الكلام ) أها كدي النصبر نشوف النوع الجديد دا شنو. يمكن عازة تقوم.
هه...
والله الا يهديهم اطلس جديد فيه خريطة دولة جنوب السودان .. ويجمع منهم الاطلس القديم
03-28-2011, 08:37 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: لكن ارجع واقول ان التغيير ات ومن الافضل ان يكون تغييرا منظما وله اهداف واضحة بدلا من ان يكون تغييرا مدمرا الاحزاب دي لو بتثق في الشعب ده بكرة توقف البتعمل فيهو ده وتخرج للشارع بناسا في المقدمة انا متاكد انو الشعب ده حيحمي ضهورهم لكن قصة ينتظرو الشعب ده ياكل الرصاص براهو ويجو هم يشيلوها باردة دي تاني مافي
الحديث عن التغيير دا موضوع كبير ومن الخطأ تحميل مسؤوليته للاحزاب وحدها سؤالي عن الغضب الطبيعي و الشعور بالغبن و القهر دا حتى انصار النظام ممكن يكونوا شعروا بيه بشكل أو بآخر وين التعبير عنه ؟ خليها المظاهرات الراسها عديل حصل زول شال ليه فحمة كتب في حيطة أنعل ابو الحكومة أو افعل و أترك لأمها يعني معقول الناس دي راضية كدا و مرتاحة ؟ في لامبالاة غريبة
هلا عبد الماجد عبد الماجد الصهيوني المانشستراوي كيفك والعيال بخير إن شاالله
Quote: كلام عجيب و فى المليان كمان ..
لكنه يبقى كلام يا عبدالماجد اخوي وما حيلتنا غيرو ودا البمغس زيادة من طرف امسك اي زول من اهلك او معارفك واسأله عن الحال طوالي تلقاه يسب ويلعن و يشتكي وواقف زي غيرو في محطة الكلام
والله يانزار حسبتك دي راحت لي في النص لكن الفكرة وصلت , بس لو قارنا مع ليبيا مثلا - مع اني مقتنع ان لكل شعب ظروفو التي تختلف عن الآخرين ح تلقى العالم دي اغلبها اتولد في الاتنين واربعين سنة الحكمها القذافي وشبوا على الكتاب الأخضر و الأكبر منهم عاشوا عهد السنوسي , يعني ديمقراطية بتعريفة ما ضاقوها الجوع يا نزار و القهر و الظلم ما عايزين ليه عمر معين او خبرة أو سابق تحربة عشان تحس بيهم و تتململ منهم الموضوع ما طبيعي - لاحظ انا ما بتكلم عن ثورة لاسقاط نظام بل مجرد مظاهرة احتجاج صغيرة ململة هرجة ولو حتى كتابة على حيطة تتسق مع الشكوى و ضيق الحال البادي على الجميع
يا مهيرة لكن اذا كان الشعب مدي ضوء اخضر للحكومة انها تاخد راحتها وكل ما تعصره لسان حاله بقول ليها هل من مزيد (تعصره دي غير حقت حمور ههههههه)
ياعيدروس كلامك وجيه , في شغل استراتيجي اتعمل ونتايجه بانت اسي اكيد دا ما تطور - او تقهقر - طبيعي الحصل للشعب السوداني دا ياخي لدرجة النكات البتمسخر بالحكومة وقفت أو قلت - ىخر مرة سمعت نكتة عن ناس الحكومة متين كم سنة لا ورا , مش كدا
يا شماشي تحميل وزر الخنوع و اللامبالاة الحاصلة دي للأحزاب فقط فيه جور وحيف كبير في حق الاحزاب و حق الشعب في آن طيب قول الناس ما دايرة تقوم بثورة عشان ما تجي نفس الوجوه بتاعة كل مرة هل دا سبب كافي للناس تتحمل الفساد و القهر و الغلاء و المعاناة بدون حتى محاولة احتجاج خجولة دي مشكلة كبيرة تبقى
هلا يا كيكي وحباب المتابعة و المشاركة (عملت ليك C.C في بوست د.أمين اقراها بالله )
تنظير
Quote: غايتو لو خليتوني
لا ما بنخليك خلاص داير تقوم تملانا تنظير وفقر دا بالإضافة لأنو كلامك معاد ومكرر وممل كما انو معاد ومكرر وممل أيضا
شفت التنازلات القلت عليها دي يا كوبي هي زاتها الأنا كايسها خلينا من قصة الشعب يريد اسقاط الرئيس الشعب يريد الحياة الكريمة أولا ويريد رفع المعاناة ويريد العدالة ويريد سيادة القانون ويريد محاسبة الفاسدين ويريد... إلخ بيني وبينك فعلا اطول قائمة أها الـ"يريدات" ديل كلهن بجن كيف واحنا قاعدين مربعين يدينا و شغالين فراجة البتهبشوا كلوا زهجان ومتضايق لكن حد زهجو وضيقه دا لسانو بس وانت قلتها فوق التنازلات بتجي مع الزنقة, بدون زنقة -او حتى محاولة زنقة - فرد تنيزيل سغير كدا ما نعشم فوقو
ياخوانا تقريبا كلكم قاعدين برة كلمنا نظري و مبني على افتراضات وقراءة قد تكون خاطئة للواقع كنت اتمنى اسمع من الناس العايشة الواقع جوة وتقديرها للحاصل اكيد ح يكون افضل و أدق
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد البشرى الخضر
نجلاء قرافي
omer osman
معاوية المدير
محمد عبدالله حمدنا الله
محمد حيدر المشرف
حمور زيادة
saadeldin abdelrahman
عاطف عمر
دينا خالد
nazar hussien
محمد إبراهيم علي
مهيرة
aydaroos
عبدالكريم الامين احمد
حمزه بابكر الكوبي
فيس بوك
تويتر
انستقرام
يوتيوب
بنتيريست