اولا نرحب بكل الاعضاء الجدد و نتمنى التوفيق للراغبين في العضوية ولا زالوا حبيسي قوائم إنتظار عمك اهديكم بعض النصائح و الفنيات من واقع الفترة اللتي قضيتها في البورد و اتمنى من اخوتكم الأعضاء القدامى ان يرفدوا البوست بنصائحهم المستمدة من خبراتهم و تجاربهم
ابدا للاعضاء الجدد بشوية مواضيع بيض كدا
اولا الإقتباس لما تكون عايز تقتبس من مداخلة غيرك جزء من الحديث عشان ترد عليه او تستعين بيه او ساي بس و بعد ضغطك على زر اقتباس , بظهر ليك ويندو بالشكل دا غالبا
تقوم تظلل الخارم بارم دا كلو وتديه البحر و تلصق الكلام العايز تقتبسه من المداخلة الأصلية و تضغط اوكي وكدا
اهم حاجة الكود بتاع الكوت تتاكد انه مقفول كيف يعني ؟ يعني زي ما الكود بادي بي كلمة quote بين قوسين مربعين يكون مقفول بـ /quote بين قوسين مربعين برضو لو ما كدا البوست حيجوط و يبقى شكلو ما انزل الله به من سلطان
اخوانا طالبي العضوية , المتصفحين , اعزاءنا القراء قبل ما ابدا النصايح في شوية حندكة You don't know what you miss
تخيل انك بتتصفخ في البورد لقيت موضوع دسم و فيه حوار جيد و اراء مختلفة و انت عايز تدلي بدلوك فيه او تكون هلالابي نار منقد قريت واحد مريخابي بغالط انو الهلال ما يستاهل يشيل الدوري الأخير عشان الحكم ما عارف شنو او قريت واحد واقع افتاء في موضوع من صميم تخصصك و يشيل و يلبس في الباقين العمة او واحد ناقل موضوع تكون انت كاتبه و تعبان فيه و غير ليه كلمتين تلاتة في الأول و قاشر بيه و خاتي اسمه او في بوست بتاع ذكريات عن الجامعة او المدينة او المدرسة و الشله كلها بتكتب و جايبين سيرتك او لقيت واحد - او واحدة - دفعتك او صاحبك من سنين ما لاقيته كاتب هنا او خاتي صورتو وعاوز تتواصل معاه بكل براءة تضغط زر رد - عامل فيها ما عارف حاجة تجيك دي ناطة
يا سلاااااااااااام حارة ياخ
دي بالمناسبة صفحة الرد عاملة كدة - للعلم فقط
لا ولسة شوف إنت محروم من شنو كمان - عزيزي القارئ
سمعت بالمسنجر , يازوووووووول دي حكاية تانية كدي كحل عينك بمنظر ما اظنك شفتو قريب
وشوف كمان
اها المسنجر دا براه قصة إن الله هون لي قدام بديك طرفها
بمناسبة التشكيل دا يا عمك جدا واجعاني قصة انو اليوزر نيم بتاعك مكتوب غلط بالألف المقصورة حسي عليك الله كان لمت فيك ايمان صالح في حملتها المشهورة على الأخطاء الإملائية حتتصرف كيف؟
06-10-2008, 06:53 PM
لؤى لؤى
تاريخ التسجيل: 06-01-2003
مجموع المشاركات: 14343
اها يا عزيزي المتصفح الطريق للحاق المولد اعلاه يمر - فقط - بعمك بكري و عمك صاحب مزاجات طبعا الحديث فيما يلي موجه للمتصفح - طالب العضوية - العادي الغير معروف و اللذي ليس علما في مجال الإعلام او الصحافة او الشعر او الإدب او ليس من دفعة بكري في الجامعة ولا يقيم في امريكا - اريزونا تحديدا , و ليس من الحلفاية
هذا العضو العادي يحتاج للحصول على العضوية لترشيح و تزكية من اعضاء آخرين يفضل ان يكونوا من ذوي الحظوة او وثيقي العلاقة بعمك يعني يا المتصفح العادي ما تضيع وقتك في تدبيج الإيميلات و الرسائل ساي إيميل واحد لشخص وثيق الصلة بعمك و يا حبذا لو كان من المذكورين اعلاه كفيل بفعل ما تعجز عنه آلاف الإيميلات
نقطة تانية مهمة و فعالة و هي إذا تيسرت لك مقابلته شخصيا فمن السهل حينها الحصول على العضوية ودي دايرة مقص لإحدى رحلتي الشتاء و الصيف السنويتين للخرطوم و يا حبذا لو كان طلب العضوية بعد او اثناء لقاء البورداب يمكن توسيط بورداب الخرطوم في الأمر
هذا لا ينفي امكانية الحصول على العضوية عن طريق الإيميل و احيانا من رسالة واحدة كما حدث للبعض - في النهاية ارزاق
(في بعض النصائح و التكتيكات فعالة و مجربة لكن ليس من الحكمة طرحها على الملا فقد تلحق البوست الزينين)
اتمنى عزيزي المتصفح ان توفق في سعيك وتنال العضوية وترى هذه الرسالة السحرية
دندونتو وكدا الله يسلمك ياخ ومشتاقين شايفك متألقة في الصور قصة الريسيت معاك حق فيها لكن انا عشان اعتدت على الشورت كيز الموضوع بياخد 0.037 ثانية معاي Ctrl+A و Ctrl+X وكدا
Quote: وذلك اذا ارتكب احدى الموبقات الكم ما عارف ::::
وستكون عزيزى البرلوم فى غضب الله اذا تدرعك او تدرعتك احد قدامى البورداب من العتاقى
فاحذر لدغاتهم وامشى جنب الحيط عند مرورك باحد النجوم اللامعة
تقرا البوستات لمالها او لجمالها او لحسبها البوردى او لنسبها لنجوم البورد فاظفر
بذات الصور والفيديو تربت يداك
عزيزي العضو الجديد نصيحة لله كلام خالتك مفراكة دا تظلله وتديه البحر برضو شنو تمشي جمب الحيط دي نصايح مثبطة للهمة و لها اثر العطرون في الدماغ يا انتي العضو كامل الأهلية يمشي و يقدل في نص البورد في عين اجعصها سينير البورد دا ما حق زول - حتى الان حسب نظرية ود جبر الله
المهم يادندونتو باللاي ادينا نصائح مفيدة خلي الناس تستفيد ياخ
Quote: حقى وين
اموت وافهم قصتك مع الحق دي شنو؟ (وش اب شنب بدخن ايامو الكان لسة بشنب)
06-10-2008, 09:26 PM
salma subhi salma subhi
تاريخ التسجيل: 06-29-2006
مجموع المشاركات: 4817
Quote: واصل واصل أخونا محمد متابعين وما زلنا نستفيد!
بطلي التواضع دا ياخ انتي استاذتنا ومنك استفدنا الكتير اتمنى انك تضيفي لينا في البوست من خبراتك و انطباعاتك عن البورد الكتير
عزيزي العضو الجديد.... لما الواطة تسخن و العجاجة تقوم و البورد يبقى كلو حروب و معارك و حاجة جدا تعيسة و مزعجة شوف وين اختنا سلمى كاتبة و انخ بعيرك هناك (نصيحة ذهبية)
07-20-2008, 06:56 PM
ابوعبيدة حسن محمد ابوعبيدة حسن محمد
تاريخ التسجيل: 03-02-2004
مجموع المشاركات: 483
حصص المجانيه زمان كانت وين؟ يعني فتحت بوستات واتعلمنا منكم بعد ذلك يعني دي دروس مجانيه ولا الموضوع فيه ان؟ انا واثق ..ولكن حمودي البقنعو منو؟ وبالجد موضوعك ده يستحق بوست ماجستير
06-12-2008, 04:16 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
المسلمي ياعمك ازيك ياخ اها وقت جيت يلا احكي للشباب ديل تجربتك ايامك الجديد و اديهم فكرة عن بداياتك
نصيحة فضية.... الدنيا ما طايرة عزيزي العضو الجديد اقرا اكتر مما تكتب في الأول و افهم ما بين السطور جيداالناس هنا عندها المحن وباطن حديثها غالبا لا يشبه طاهره وعموما شيل رجلك من البنزين (فاكرها يا العوض)
06-10-2008, 09:09 PM
النذير الطاهر عثمان النذير الطاهر عثمان
تاريخ التسجيل: 06-08-2008
مجموع المشاركات: 103
ود البشرى بالله البوست ده أرفعو لكليه أو جامعه ,, كلنا محتاجين للكورسات دى , وممكن تستعين بمساعدى تدريس زى أختنا دينا . مستعدين لدفع المصاريف بالسودانى أو الدولار أو اليورو , وممكن تكون المحاضرات عبر المسانجر , بس فى حالة المحاضره سوف يقدمها مساعد التدريس مستعدين لركوب الاهوال والسفر لأى دوله يقام فيها الكورس ,,
أستاذى لك حبى ,,
06-12-2008, 04:24 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: بس فى حالة المحاضره سوف يقدمها مساعد التدريس مستعدين لركوب الاهوال والسفر لأى دوله يقام فيها الكورس ,,
عاد جنس دفيق و حتحته.... مبالغة لكن خايف عليك بالجد يا عمك
Quote: أستاذى لك حبى ,
الأيام دي معليش اعفيني يابا
نصيحة ماسية... عزيزي العضو إن كانت لك رغبة في الحنك ,الدفيق أو الحتحتة فحاول ما تظهرها عاملة و جيبها بي فوق فوق , وإن كان في بعض الحالات الإستثنائية يفضل انك تختها دج عديل كدة (مزيد من التفصيل لاحقا)
06-10-2008, 10:52 PM
Maawya Hussein Maawya Hussein
تاريخ التسجيل: 12-27-2007
مجموع المشاركات: 10136
Here we go... عزيزي العضو الجديد مبروك حصولك على الباسويرد السحري جواز مرورك لعالم عجيب عجيب ومفتاح صندق الدنيا بالنسبة لمن يشاء وصندوق بندورا للبعض تخيل انت قاعد في امبدة ممكن تحنك ليك دامة شديدة في فلاديلفيا تشبكها ورود و بتاع و يا شفيفة و يا كلماتك بتعمل شنو فيني و يا حرفك بطلع عيني و كدا
المهم عزيزي العضو الجديد النرد على تعليقات الاخوان و نجي نكمل الحكي
06-11-2008, 11:06 PM
عمر صديق عمر صديق
تاريخ التسجيل: 06-06-2008
مجموع المشاركات: 14776
والله ياعمك الآراء بتختلف من زول لي زول طبعا لكن عن نفسي ما كنت ح آخد الكلام دا على محمل الجد باعتبار انو الباسويردات هنا متساوية و ليها نفس الصلاحية و المثل بقول البلدغك عضيهو في نص راسو و البدرعك احدر ليه في الضلمة
وكدا
06-12-2008, 08:48 PM
دينا خالد دينا خالد
تاريخ التسجيل: 06-26-2006
مجموع المشاركات: 8736
عزيزي القادم الجديد لو لاقتك المفردة دي : (جرجير) فلا تستانس ولا يسيل لعابك لذكر أحدي مكونات (السلطة) لانك ستكتشف خلال تجوالك بين بوستات وردود ومداخلات المدعو ود البشري أن الكلمة من ( جرجرة ) . دي مساهمة مني في الحصة دي ..
06-12-2008, 05:03 PM
Elawad Elawad
تاريخ التسجيل: 01-20-2003
مجموع المشاركات: 7226
لأنه في المنبر دا كان شكرت عضو من الجنس الآخر ممكن تخسر من سمعتك نسبة تتراوح بين 5% لي 65% أما إذا شكرت عضو من نفس الجنس فأنت تخاطر بنسبة 100% لي 250% من سمعتك. تحياتي ود البشرى... بأمانة كدا ما جابتني الدروس... جابني الشمار قلت أشوفك قاعد تتآمر على البورد كيف يا ولد يا شقي إنت.
06-13-2008, 00:39 AM
كمال سالم كمال سالم
تاريخ التسجيل: 02-13-2008
مجموع المشاركات: 4786
نعيد الترحيب باخوانا الأعضاء الجدد ونواصل وللمتصفحين و طالبي العضوية ابشركم يبدو ان ليبيا قد فتحت مرحبا بكل يحترم هذه القوانين ما عليك إلا ان تتعهد باحترام اللائحة وكدا وفرصة بالمناسبة لمن يرغب في نيك نيم آخر من الأعضاء القدامى - انصح باختلاق اسماء معقولة و البعد عن الأقارب وكدة
07-01-2008, 03:05 PM
بشير جبريل علي بشير جبريل علي
تاريخ التسجيل: 08-02-2006
مجموع المشاركات: 785
سلامات يا لذيذ تسلم على الحاجات الحلوه دي تتصور الناس الجدد ديل محظوظين أنا شخصيا لمن اشتركت فى مارس الماضي ما لقيت زول ينور ليّ الطريق ببوست زي ده أو يمكن ما فتشت فى أرشيف المنبر بس إجتهادات من حبيبنا هارون دياب معاي ومساسقه وعكلته من صحبك لمن عرفت الدرب
تخريمه خشنه ________________ صحبك حموووووودى العسل عندو صور تحفه فى أبراج الحمام بارك حأنزلها فى بوست رحلة العمر ما تنسى رأيك وتعليقك مهم جدا مع إنى عارفك ما بتتوصى
07-01-2008, 03:19 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
وقت السيرة جات احب انبه عزيزي العضو الجديد للحتة بتاعة العناوين يا قول هناي " لكل داء دواء يستطب به .. إلا الحماقة أعيت من يداويها" اها يا عزيزي العنوان دا هو الحماقة نفسها القال عليها كل الكلام البتكتب داخل البوست ممكن تعيد النظر فيه تعديلا و تصحيحا و حذفا إلا العنوان كالرصاصة كان طلعت تاني ما بترجع او كحكم وصل آخر درجات التقاضي غير قابل للنقض او الإستئناف يعني يا حبة لو غلطت في العنوان شربت زيت زي الما حصل شي ما بتعدل ولا بتصحح و البريفيلج دا عند عمك فقط ونادرا ما يستجيب للنداءات بتعديل العناوين فعشان ما تقع في الغلطة دي و تبقى في الجرسة تمهل و اعد البصر كرتين تلاتة قبل ما ترسل كتابتك وكدا عموما القاعدة الذهبة بتقول " شاهده قبل نشره "
07-01-2008, 07:56 PM
Maawya Hussein Maawya Hussein
تاريخ التسجيل: 12-27-2007
مجموع المشاركات: 10136
الأخ: معاوية تحياتي ..إنابة عن ود البشرى ..أستأذنك وأستأذنه حسب علمي ..ملفك تعني بروفايلك ..لكن لايمكن أن تعدل بوست أو بروفايل شخص آخر ..وجرب يا معاوية أفتح بروفايل أي شخص آخر وأعمل كلك في ملفك .. بفتح معاك ملفك أنت مش ملفو هو؟
مع خالص تقديري
بشير
07-01-2008, 08:18 PM
Maawya Hussein Maawya Hussein
تاريخ التسجيل: 12-27-2007
مجموع المشاركات: 10136
طلحة تنظير.... ياخ ما تدي الإخوة الجداد نبذة عن التنظير السليم و فكرة عن اكبر المنظراتية عبر التاريخ
عزيزي العضو الجديد... اخونا طلحة خير نموذج لشخصية سيتم تناولها لي قدام باذن الله وهي شخصية الكاتب ذو الإتجاه الواحد او الموضوع الواحد و تعرف اصطلاحا بالفرمالة
العوض ... يعجبني فيك انك في الصورة دايما و ما بتفوتك المطايب
كمال سالم... وحاة النبي سكاك سك روق يا عمك واحلى
07-02-2008, 07:16 AM
بشير جبريل علي بشير جبريل علي
تاريخ التسجيل: 08-02-2006
مجموع المشاركات: 785
ياعمك والله ما مقصر مع الشباب وكدا لكن شايف اعمامك جمركوا البوست حالتو ما جاك ودشيقوق ولا واحد من الهمباتة ... اهم حاجة يا عمك ما الاكواد الاهم منها المصطلحات يعني مثلا واحد يخش البوست يلقي الكلام كلو الخور،المستنيرين،كبشروا،شرحوا،عشان خاطر الباندوث،...الخ ده كوم ومصطلحات عمك بشاشا ديك كوم غير كلام ناس محسن خالد والجماعة الادباء ديل. اها تلقي الواحد خشي البوست وزي ما دخل زي ما طلع وافتكر انوالناس بتتكلم رندوك ساي فيا عمك كلم ناذر واب شنب وكيكي وتمبس وباقي الشباب اعملوا القاموس ده ولا جيب لينك البوست الكان بدا فيهو كلام زي ده ونزلوا لينا هنا(وش اب شنب الاخدر البدور ظاتو) ...
شوتة: نقشت اسبوع من اجل ابنائي ولا اشرحو ليك هناك
07-03-2008, 09:02 AM
كمال سالم كمال سالم
تاريخ التسجيل: 02-13-2008
مجموع المشاركات: 4786
عزيزي العضو الجديد... في العديد من الأفكار المواضيع العايزين نتناولها ولأني زول ما مرتب فالحاجة الفي بالي ح اكتب عنها و يمكن قبل ما تكمل تجي نقطة تانية وممكن نرجع للأولى بعدين - او ما نرجع ما مشكلة
ح انتاول بداية موضوع كبير شوية هو المقصات او الكماين و يطلق عليها احيانا الشرك او التيراب يعني عايز تجيب رجل شخص او جماعة معينة او عايو تبعدهم و تطفشهم وما داير خلقتهم تعرض عليك او ممكن يكون ما عندك شخص معين قاصدو او متوقع ردود افعال معينة من ناس بعينهم او عايز تتاكد من حاجة
اها الأساليب المستخدمة لتحقيق الغايات اعلاه هي موضوع الحديث القادم
نكمل بعد الصلاة
07-03-2008, 03:18 PM
احمد محمد بشير احمد محمد بشير
تاريخ التسجيل: 06-17-2008
مجموع المشاركات: 14987
عملا لي الله نتكلم في حاجة مفيدة حتى نرجع لفلم المقصات
الصور و ما ادراك ما الصور من اللنكات اعلاه الموضوع واضح لكن في تيب تبين كدة قد تكون لهم فائدة اولا حجم الصورة و الفورمات تبعها مواقع رفع الصور بتحدد حجم معين و فورمات معينة حجم اقل من 90Kb مناسب و فورمات jpg & jpeg معقولة لأغلب مواقع الرفع لتقليل حجم الصورة و تغيير فورماتها توجد العديد من الوسائل و لكن لأن المعني بالشرح هنا هو عزيزي العضو الجديد على عالم النت و الصور نتكلم عن ابسط وسيلة و اكثرها شيوعا باستخدام برنامج الرسام Paint المتوفر مع اكسيسوريز الويندوز
بعد فتح الصورة المراد تصغيرها على البينت في قائمة Image اختار Resize/skew
راعي اختيار نفس القيمة للطول و العرض لنسبة التصغير عشان تحتفظ بالتناسب بين ابعاد الصورة ما تتفلسف و تخت قيمتين مختلفات بعدين الصورة تتكعوج (حتى لو اتفلسفت و عايز ترجع الأصل قبل ما تـ save أضغط Ctrl+z أو Undo)
بعد ما ظبطت ابعاد الصورة احفظها باختيار save as من قائمة file راعي اختيار الفورمات المذكورة فوق
بكدا الصورة جاهزة للرفع
اذا حابب ترفع في سودانيز اون لان يوجد لنك تحميل الصور فوق بوديك على صفحة التحميل
Tip: روابط الصور المحملة على سيرفر سودانيز اونلاين بتخلي الصورة في السنتر و عليها عنوان الموقع ولا يمكن حفظها في الجهاز - باخوي و اخوك- نطام حماية و كدا
إذا الحكاية دي ما عاجباك - او مبري منها زيي كدا - تقوم بدل ما تاخد الرابط الجاهز تلقى في واحد تاني بقول ليك لوضع الصورة في البروفايل تشيلو زي ما هو و تستخدم "اضف صورة " الموجودة في مربع الكتابة - بجانب ناس اقتباس و ضع خط و الجماعة ديك بعض المواقع لتحميل الصور :
عزيزي العضو الجديد .... في موضوع مهم - من وجهة نظري - حبيت اطرحه هو موضوع الإدانة لموقف او كلمة او تعدي او غيره كتير ح تفابلك هنا عجاجة و عوا بين عضوين او جماعتين او اكتر وفي خضم الكعة قد تقرا كلام جارح جدا فيستفزك و بكل اريحية تدخل و تدين الطرف الصدر منو الكلام المعني الطرف المتضرر حيحمد ليك موقفك جدا و يشكرك عليه - عادي المشكلة وين ان الطرف الأنت ادنت موقفه او تصرفه اسهل حاجة ح يرد ليك وكنت ين حضرتك من زمان لما فلان قال لي و هناي فعل لي وما تجي داخل من النص بدون ما تلم بخلفيات الموضوع و بتاع و هناي و تبقى في اليحلك و بصورة تانية برضو اذا في عضو توقع منك تتضامن معاه او مع الراي العام في موقف معين يقوم يلم فيك في حتة تانية ما عندها علاقة بالموضع و يسالك ليه ما شفناك كتبت او سجلت موقفك هناك؟ وليه ما و ليه هناي و ليه بتاع , سؤال الملكين بس
انا شخصيا ما قاعد تفرق معاي و بعتير انو كل عضو هنا راشد و مسؤول عن كلامه ما من حق حد يسالك ليه وما ليه و لو عايز ادين حاجة بدينها لأنو بعبر عن نفسي و رايي ما علي بالآخرين تقبلهم و رايهم شنو عن تصرفي وان كان في نوع من المنطق في الجزء الأول من الكلام بتاع انك حقو تلم بخلفيات المشكلة - لو كانت عندها خلفيات - قبل ما تبدي رايك اما حكاية ليه ما وقفت معاي و بتاع دي فانسى انا شخصيا لو حد غلط علي عندي خيارين يا رديت ليه و جهلت فوق جهله او ضربت صفحا و نسيته وفي الحالتين لا احتاج او ارغب في دعم من احد - كما اسلفت كلنا راشدين و نملك نفس الآكسس و مستوى الباسويرد بالتالي ارى نفس في حل من حملات التضامن
عزيزي العضو الجديد اعلاه راي شخصي لا اكثر
نواصل - إن الله هون
07-05-2008, 10:37 AM
ناهد بشير الطيب ناهد بشير الطيب
تاريخ التسجيل: 02-08-2008
مجموع المشاركات: 4180
عزيزي العضو الجديد... وانت فرحان بالباسويرد و العالم الجديد اتمنى ان لا تنسى ان العالم دا عالم سايبري لا اكثر ولا يصلح كرفرنس او ستاندر للعالم الحقيقي لا تأخذ مراجعك عن العالم الحقيقي من هنا - او على الأصح لا تعتمد عليها تمام الإعتماد هنا الوضع فيرشوال و الكل يتحكم فيه و يخلق و يختلق ويرسم من الصور ما يشاء حتى الأسماء الحقيقية و الإنطباعات اللتي تولدها لديك هنا لا يعني ان هذه هي الشخصيات الحقيقية على ارض الواقع ممكن عادي تقرا لواحد ليل نهار يكتب عن حقوق المراة و الإستنارة و بتاع و يكون في واقعه الحقيقي المراة لاتعني اكثر من متاع مملوك له ممكن تقرا هنا من يلعن سنسنفل جدود الحكومة و في الواقع يرسل خطابات الشكر و التاييد للمشير وقس على ذلك كمان هنا في جاكات معينة اتمنى انك ما تاكل منها يعني ما كل لقاء لبورداب كان رائع و دافئ و جميل و بتاع و ما كل من كتب معجبا بنثر او قصيدة فاهم الكلام القراه وما كل من ادان موقف و تصدر في لعنه مقتنع حقيقة بالخطا الحاصل
باختصار هذا ليس عالما حقيقيا وحتى لا تحبط او تحس بالخذلان تعامل معه على هذا الأساس عزيزي العضو الجديد
07-05-2008, 10:52 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: حتى الأسماء الحقيقية و الإنطباعات اللتي تولدها لديك هنا لا يعني ان هذه هي الشخصيات الحقيقية على ارض الواقع
محتاج اوضح هنا ان المقصود ليس الأسماء الوهمية وكدا لا بتكلم عن الأسماء الحقيقية لأصحابها و الشخصيات الراسمنها لنفسهم و في الواقع خلاف ذلك على سبيل المثال انا مقدم نفسي هنا على اني زول تفتيحة و ظريف و بتاع لو قابلتي في الحقيقة - ولا احبذ - ح تلقاني زول بيض و دمي تقيل و ما تقدر تكمل عشرة دقايق ونسة معاي خد عندك مثال تاني اب شنب او حمممودي العسل اخونا محمد عبد الماجد طارح نفسه هنا زول وجيه و حبيب و بتاع جكس و حنكو سنين لو شفته شناة السنين عليه و لو اتكلمت معاه حنكو عاضي و حكايته بطاله خلاص - اخير انا فس على ذلك عزيزي العضو الجديد وشوف كم واحد وواحدة فاكنها فيك هنا دي ما مشكلة كلو واحد يرسم الصورة الهو عايزها دا سايبر مفتوح و من رحمة ربنا اتاح لينا فرصة نعيش فيها بالشكل الحابين نكون عليه الفكرة انك يا عزيزي ما تاخد الموضوع على محمل الجد تصدق الصورة المطروحة هنا مالم تقابل الشخص او تتعرف عليه بشكل واقعي وكدا
07-05-2008, 11:11 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
ياخوي انت قايل روحك آدمن هنا كمان مالك على مشاركة الزول كمان
بشير جبريل...
Quote: ياخ أنحنا عناقلة
دناقلة قصدك ... من وين؟
اب شيمة...
Quote: يا شباب أهم حاجة الملافظ سعد
و اهم من الملافظ الكلام الموزون وفي محله يديك العافية و ما تقول آمين
ود الزبير...
Quote: الاهم منها المصطلحات
جاييك ليها لقدام ابوي - ان الله هون
كمال سالم...
Quote: بحث عن الحقيقه ,, يمكن يوم نعتر لينا فى دقسه
اها وقووول عترت , وبعد دا ؟ مشي حالك يابا غمض عينك تاكل ملبن
جدو يا عمك...
Quote: بس وصيهم يبعدوا من بوستات الحجة والكتاحة عشان ما يطفشوا فرد طفشة..
في دي ما معاك ابوي العضو الجديد يكابس محل ما يعجبو حتى يشتد عوده و يحدد مساره و اتجاهو انا بفضل انو يخش و يدقش كويس كان سلك فبها وإلا يشيل الوردة الحمرا ويقع بوستات الغاوون - وما اكثرها
هلا احمد محمد بشير و مبروك العضوية شرفت البورد و سعدنا بك في اللينكين اعلاه خاصة بوست لؤي في شرح وافي بالإضافة للتيب الوردت فوق
يا بلد ... انتي المهمة و مكانك فوق والله مثال جيد عزيزي العضو الجديد على كسير تلج على خفيف - لي قدام نتكلم عن كسير التلج على تقيل
دكتورة ناهد ... مشكورة ياخ وكلك ذوق
07-05-2008, 04:53 PM
عبدالفتاح أبوشيمة عبدالفتاح أبوشيمة
تاريخ التسجيل: 04-15-2008
مجموع المشاركات: 4163
عزيزي العضو الجديد وانت الآن بصدد كتابة اول بوستاتك احب الفت انتباهك للتالي تفاعل المتداخلين معك بالردود مهم و يعطي الحيوية للبوست و يزيد حماسك للمواصلة - ان كنت لا تحسن العزف المنفرد او المنولوج عشان الحتة دي في نقاط مهمة نتعرض لبعضها - بدون ترتيب اولا من الذوق و الأهمية بمكان عدم تجاهل التعليق على مداخلة اي من زوارك حتى ولو بعبارات شكر مثلا ان كنت لا ترغب - او لا تجد - ما يناسب من العبارات - الإكليشهات - المتداولة - شكرا على المرور - اسعدنا مرورك و مشاركتك - خليك قريب وكدا دي القوالب الرئيسية من الممكن تشكيلها حسب الذوق و المزاج
ثانيا اختيار العنوان الجاذب... بصورة عامة هنا ما يدفع المتصفح او العضو لفتح يوست ما - وسط آلاف البوستات - شيئين - اسم الكاتب - العنوان اسم الكاتب دي خليها اسي - نجيها لقدام - خلينا في العنوان كل ما كان العنوان مثير و محفز يضمن ان يطلع على البوست عدد كبير من القراء اكثر عبارة - تجيب دخل - هي "توجد صور" او " صورة" او ما شابه لكن هناك محاذير حكاية انو العنوان يكون مثير فقط ولا علاقة له بالموضوع او يعكس صورة مغايرة للواقع قد ينجح فعلا في جلب عدد كبير من الزوار لكن على المدى البعيد سيكون له تاثير سيئ على مصداقيتك و على الإنطباع اللذي تثيره مواضيعك في نفس القارئ بالتالي سيؤثر سلبيا على من يهتم بالمشاركة معك هناك نماذج عديدة لعناوين مضللة و لأعضاء اشتهروا فقط بكتابة العنوان المثير و اللذي لا علاقة له بالموضوع - نجيب النماذج لي قدام فمن المهم عزيزي العضو الجديد ان تراعي في عنوانك - مع الإثارة و الجذب- المصداقية او العلاقة الحقيقية مع الموضوع حتى لا تسقط في فخ سقط فيه الكثير ممن سبقوك
نواصل ...
07-15-2008, 07:23 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
نقطة أخرى تتعلق باختيار الموضوع و التوقيت المناسب من المهم ان تتجنب المواضيع المكررة اللتي اثيرت اكثر من مرة او على فترات قريبة و التوقيت و الإتجاه العام ايضا مهم يعني مثلا ما ممكن تفتح موضوع بتكلم عن الزهور او الصداقة بين الجنسين مثلا في ايام زي دي الحنك الوحيد المدور فيها اوكامبو و ما ادراك ما المحكمة الدولية وتشتكي من قلة الزوار و المشاركين او من غتسة موضوعك في الصفحات الداخلية نصيحة ... تجنب فتح اي موضوع جديد صبيحة اليوم التالي لمباراة هلال مريخ لا سيما ان كان الزعيم راشي الوصيف كالعادة
بالنسبة للمواضيع المكررة غالبا ما يحصل اللبس في حالة كونو في حدث معين او خبر عاجل زي خبر حادث طيارة سودانير الأخيرة مثلا عشرات البوستات فتحت بصورة متعاقبة تكاد تحمل نفس العنوان و المحتوى انصح بالقاء نظرة سريعة على الصفحة الأولى على الأقل مرة و مرتين قبل اضافة الموضوع الجديد
بمناسبة التكرار ... في موضوع قتل نشرا في البورد و البوردات المجاورة بعناوين متشابهه كلها تدور حول (انت سوداني عشان بتسوي كذا وكذا) عبارة عن رسالة مدورة في الإيميل - بالله يا عزيزي العضو الجديد و رجاء حار لو جاتك الرسالة دي اقراها في محلها و خليها قبلها حتى الآن احصيت اكثر من سبعة بوستات تناولت الرسالة المعنية و كلها تقريبا خلت من الإشارة للنقل - ودا موضوع تاني إن الله هون نجيه لي قدام
07-15-2008, 07:58 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
بالغ الزمن و بكري قبل فترة بديت واحد بعنوان فنيات البورد امهن و ابوهن سبعة ولا تمانية مداخلات و عمك لحسو الزمن داك مافي مكتبة فلف في الفاضي وكدا
اب شيمة... فطك ...فطك
ود الزبير يا عمك ... المصطلحات دي باب كبير و متشعب والمشكلة انها متجددة و متناسبة مع المرحلة دايما فمن الصعب حصرها بمعزل عن الأحداث يعني مثلا لو ما كنت متابع ما حتفهم السبب الخلا ابشنب يبقى حمودي العسل في ليلة و ضحاها شفت كيف ابوي ______________________________________________ نتكلم عن وضع اللينكات في المداخلات الزر المكتوب عليه"URL" لما تضغط عليه بيفتح ليك مربع حواري يطلب منك تكتب الأدرس العاوز تلنكو لاحظ( http:// )بتكون موجودة تلقائيا و مظللة لو انت ناسخ الأدرس بتاعك كامل مشتمل عليها احرص على ازالتها و عدم تكراراها وإلا ح يضرب اللنك و يكون غير مفيد بعد ما تنسخ الأدرس بطلب منك تاني كتابة كابشن للرابط ممكن تخليه زي ما هو و ممكن تكتب الفي بالك (راعي لأن لنكات البوستات الأخرى من المنبر سيظهر عنوانها الأصلي فقط مهما حاولت تغير فما تتعب ساي ) ملاحظة اخرى.. لو لأي سبب عدلت مداخلة فيها رابط بعد التعديل ح تلقى اللنك لحق الزينين و اتعولق احسن شي* تنسخ كامل المداخلة العايز تعدلها و تفتح نافذة رد جديدة في TAB او WINDOW جديد وتقوم تلصق المداخلة و تدخل الرابط من جديد عن طريق زر الـ URL عادي وتعدل تعديلك ثم تنسخ كامل المداخلة بعد التعديل و اعادة ادخال الرابط بطريقة صحيحة تلصقها في النافذة الفتحتها قبيل للتعديل و كدا
* احسن شي الواردة اعلاه قصدي بالنسبة لي انا ومن تجربتي وليست على إطلاقها من الممكن ان يفضل الآخرون اساليب غير
07-19-2008, 08:13 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
لازلنا مع التكتيكات المتبعة لجذب المتداخلين و رفع بوستاتك عزيزي العضو الجديد من اشهر واقدم التكتيكات المتبعة هو المجاملة بمعنى ان من تزورهم في بوستاتهم و ترفعها لهم صار لك عليهم جميل واجب الرد و استحقاق لابد من سداده برفع بوستاتك و التداخل معك يعني لازم تكون زول مجامل و تتداخل مع الأعضاء عشان تتوقع انهم يعاملوك بالمثل دا بقودنا لحتة تانية لاباس من الحديث عنها حاليا الا وهي نماذج المداخلات في نماذج معينة تعارف عليها البورداب لمداخلات و تعليقات تناسب المواضيع المختلفة نتناول جانب منها هنا
في حالة الترحيب بعضو جديد او تزكيته لنيل العضوية : - مرحب بيك اضافة جديدة للمنبر و اكيد عندك الكتير تقولو - ان شاالله الدار ترحب بيك وفي انتظار مساهماتك واضافاتك - حبابك عشرة بلا كشرة (لو معاها وردة يكون كويس خالص) - نورت المكان و عسى ان يطيب لك المقام - ادخل لا جوة و جر بمبرك - صورة الورده الشهيرة وكدا ... دي بعض القوالب الرئيسية طبعا يمكن تشكيلها واضافة لمسة شخصية بالنسبة لتزكية الترشيح : - فلان يحتاجه المنبر يا بكري - اثني و ازكي و اؤيد و بتاع - هناي على بابك يا بكري - فرتكان اضافة للمنبر و للنضال و للبطيخ - إذا كانت المرشحة سيدة على قدر من الشهرة يفضل استخدام الخفة الملاسية الشهيرة (هي رائعة روعة نصاح .. اثني طبعا) وكدا
في حالات المجاملات الإجتماعية و الواجبات كالدعاء بالشفاء و التعازي و التهاني يمكن الإكتفاء باقتباس اول مداخلة و تكرارها او نسخ احد صور الورود او الصور البنزلها بكري و خلاص
من القوالب المهمة لما الموضوع يكون جاد او صعب عليك او دمو تقيل لكن لازم توري وشك فينصح في الحالة دي تكتفي بنقطة او فوق او احدى ادوات الرفع الأخرى لكن يجب مراعاة ان هذا النموذج لايصلح عندما يكون الموضوع آكتف و في اعلى الصفحة الأول فعلا قالب آخر ممكن يساعد هو شكر صاحب الموضوع على اثارة النقاط المهمة و تختم كلامك بـ(حتما لي عودة) او (متابعين باهتمام) او ( تسجيل حضور) او (واصل) المهم انك وريت وشك و سديت الدين العليك او جاملت و بقيت دائن
في حالة التداخل على قصيدة او اغنية او اي مجال ابداعي ليس للنقاش اصلا فينصح بـ ( اكتب يا فلان ) ( يا رائع) ( يا شفيف ) إذا كان صاحبة المداخلة سيدة لاتنسى ان تزرع وردة ولا اتنين من الورود العويرة البتفتح وتقفل براها دي قالب آخر شهير و هو ان تقتبس جزء من القصيدة - كيفما اتفق - و تلصقه في مداخلتك بدون تعليق منك وكفى
في حالة ادانة او توقيع او حملة جماعية .. يمكن ان تكتفي باقتباس المداخلة الفوق ليك طوالي و تضع اسمك تحتها مع أويد او اتفق او 100% او اي شي هذا النوع من البوستات اهمية حضورك نفسه تفوق ما تكتبه
من المستحيل طبعا حصر كل النماذج المتبعة هنا ولكن هذه بعضها و اللتي اسعفت الذاكرة بها , نتكلم المرة الجاية عن كيف تكتسب الشهرة بسرعة في البورد
Quote: ود الزبير يا عمك ... المصطلحات دي باب كبير و متشعب والمشكلة انها متجددة و متناسبة مع المرحلة دايما فمن الصعب حصرها بمعزل عن الأحداث يعني مثلا لو ما كنت متابع ما حتفهم السبب الخلا ابشنب يبقى حمودي العسل في ليلة و ضحاها شفت كيف ابوي
يا معلم عارفنها باب سنط وكدا ما تعمل لي فيها ولد صالح جبريل انا ما قلت ليك باري المصطلحات كلها لكن ممكن تنزل للشباب ديل الشي المهم والمتكرر او البساعدهم يكونوا ناقشين الحاصل وكدا اها بعدين انت حمودي العسل ظاتو غلطان اداك سرو .. تتذكر يا محمد كان كيكي ولا ناذر ما عارف بدا ليهو بوست ذي ده لو متذكرو عليك الله جيب لينا الرابط وكدا
_____________ مبروك التلاتة لكن الله شافكم
07-20-2008, 05:44 PM
عصام علي أحمد عصام علي أحمد
تاريخ التسجيل: 07-16-2006
مجموع المشاركات: 2419
ود الزبير يا عمك... ما وقع ليك كلامي اظنو , نعيدو تاني ما مشكلة انا كريم وانت تستاهل ابوي انا المصطلحات مربوطة باحداث و غالبا مع نهاية الحدث او مرور الزمن عليه يختفي المصطلح او يبقى مع نسيان سبب وجوده لكن لا يمنع انوفي بعض المصطلحات نظل باقية لفترة طويلة اديك مثال مصطلح عربي و مصطلح طوكراوي ظهروا في فترة معينة و ارتبطوا ببوستات معينة اتأرشفت حاليا فتدريجيا اختفى و خف استخدامهم ومن ناحية تانية مصطلح سوركتي رغم ارشفة و حذف اغلب البوستات المتعلقة به إلا انه لازال مستخدم و بقوة ففتح باب زي دا يحتاج لوقت و مجهود ورجوع للأرشيف لتحري الدقة واخوك شغال من الذاكرة و بالمزاج لكن لو بديت لينا بنجادع معاك
لكن الرئيس اتمسكن جنس مسكنة العنوان ده ما تشتغل بيه ........دي حركة مني ساي .....لفحتوا لإرهاب البرالمة بقدرتنا كبرالمة قُدام على فعل الأفاعيل .......أها في الكوتييشن في خيار بدل التظليل تعفص reset وكدا ياعمك .... وحذر الزملاء من بوستات الصهاينة ديناً وكورة ...... ينوبك ثواب ........أها فتك بخير
(عدل بواسطة Ahmed musa on 07-21-2008, 01:56 PM) (عدل بواسطة Ahmed musa on 07-21-2008, 01:58 PM) (عدل بواسطة Ahmed musa on 07-21-2008, 02:02 PM) (عدل بواسطة Ahmed musa on 07-21-2008, 02:03 PM)
هلا دلال و مرحب بيك شكرا على مجاملتك اللطيفة و كدا لكن صدقيني انا - وكثيرين - شخصياتنا الإسفيرية اظرف و الطف كثيرا عن الواقع
ابارو يا عمك ... ما فهمت سؤالك بالضبط لكن ما دام الكلام عن العنوان ففي حتة مهمة وقت السيرة جات اكواد الـ HTML معطلة بالنسبة للعناوين وهي الأكواد البتسمح بالتحكم في الخط و اللون و غيرها من العمليات كالإقتباس و إدراج صورة و كدا عشان كدا مرات بتلقى عناوين ما انزل الله بها من سلطان تلقى الكود معلق في العنوان للبولد و الألوان و بدون فعالية العناوين في بورد بكري زي الإنقاذ لا بتغير لا بتعدل لا بنشال ليك باخوي واخوك فاخير العناوين دي يتم التعامل معها بحذر شوية
هاشم يا عمك لكن لقيتك اقتباسي خلاص مرحب بيك يا عمك ومنور بالنسبة لليوتيوب اها دا اسهل حاجة دايما في الصفحة الفيها الفيديو بتلقى خانة على اليمين مكتوب فيها Embed تقوم ابوي تشيل الكود الفيها بصمة خشمو و تليسوا محل ما داير ولو داير تتفلسف كمان في رابط مكتوب عليه Customize ممكن يخليك تعمل اطار حول الفيديو و حركات راعي ابوي للصورة دي
شفت كيف و بالمناسبة دي خليني النطعم البوست القداد دا
(ياخ الزولة دي عادية غايتو كبكبة منكم ساي)
يلا متعنا يا عمك و عذب اليوتيوب في حنانو
أحمد موسى ياعمك... ياخوي لنكك دا ما على عديلو ما تقنعني انك جبتو ساي لله كدا
نصيحة مهمة ...
Quote: (عدل بواسطة Ahmed musa on 21-07-2008, 01:56 م) (عدل بواسطة Ahmed musa on 21-07-2008, 01:58 م) (عدل بواسطة Ahmed musa on 21-07-2008, 02:02 م) (عدل بواسطة Ahmed musa on 21-07-2008, 02:03 م)
الكوت اعلاه نموذج لعدم استخدام" شاهده قبل نشره" بصورة جيدة ... تجنبها ما امكن عزيزي العضو الجديد
ناصر البدوي يا عمك... مرحب بيك ولك كل التقدير ايضا منور
07-21-2008, 07:20 PM
AWAD MAHMOUD OSMAN AWAD MAHMOUD OSMAN
تاريخ التسجيل: 06-08-2008
مجموع المشاركات: 370
رجاء ابايزيد مرحب بيك و منورة مداخلتك دي امي إلا بالصدفة حتى لقيتها لو رديتي باستخدام زر اضف رد الموجود في الآخر بكون احسن لأنو بضمن ليك ظهور كلامك في آخر البوست انا بعد ذكرت حكاية انك تكون في اريزونا من الحلفايا استدركت بالتالي
Quote: هذا لا ينفي امكانية الحصول على العضوية عن طريق الإيميل و احيانا من رسالة واحدة كما حدث للبعض - في النهاية ارزاق
شاكر متابعتك وان شالله نكون عند حسن ظنك
عوض عثمان يا عمك.. تسلم ياخ و جدا شاكرين _____________________________________________________________________ Tip: بخصوص الصور تاني عزيزي العضو الجديد لو في صورة اوردها احد الزملاء و عايز تجيبها تاني مافي داعي انك تحفظها في جهازك و ترفعها من جديد من الممكن تنسخ عنوان الصورة من الـ Properties و تستخدم نفس العنوان مع كود اضف صورة و كان الله يحب المحسنين (البروبرتيز بتصل ليها بضغط الزر الأيمن ماوس على الصورة المعنية) نفس الكلام ينطبق على اي صورة منشورة في موقع ىخر صحيفة مثلا او اي موقع آخر لا اعي لجحفظ الصورة عندك يكفي نسخ رابط العنوان كما يمكن استخدام نفس النظرية للحصول على الأيقونات المختلفة زي التحت ديل او ايقونات او وجوه ضاحكة من مواقع او منتديات ثانية كلها تعامل معاملة الصور و الوش الأخضر البلف و غيرو من الوشوش و وردة الغاوون البتفتح و تقفل براها وكدا
07-22-2008, 07:14 AM
أبوبكر أبوالقاسم أبوبكر أبوالقاسم
تاريخ التسجيل: 11-27-2007
مجموع المشاركات: 2805
Quote: أحمد موسى ياعمك... ياخوي لنكك دا ما على عديلو ما تقنعني انك جبتو ساي لله كدا
جابوا ليك بمناسبة نصيحتك الغالية اللى هنا ( كمثال حى ) من صاحبك نوبى :
Quote: وستكون عزيزى البرلوم فى غضب الله اذا تدرعك او تدرعتك احد قدامى البورداب من العتاقى
فاحذر لدغاتهم وامشى جنب الحيط عند مرورك باحد النجوم اللامعة
بعدين ما تكلمت عن تكتيكات حشد المشاركين قبل فتح الموضوع الجديد وتوزيع الأدوار ، يعنى واحد يفتح ليه بوست وتشاهده إنت أول واحد وقبلما تتصفحه ( لمدة دقيقة ) يدخل ليك واحد يدعى العبقرية بتحليل للكلام كأنو عندنا قنابير.....
أو مهمة وفود لمقدمة فى تشتيت البوست والمناكفات .....
واصل....... فكلنا شهود( دى جديدة)
07-23-2008, 09:10 AM
Dalal Ezzaldin Dalal Ezzaldin
تاريخ التسجيل: 06-19-2008
مجموع المشاركات: 1406
ابوبكر ابو القاسم يا عمك ... كيف ما تشارك ياخ انت استاذنا كلنا
Quote: جابوا ليك بمناسبة نصيحتك الغالية اللى هنا ( كمثال حى ) من صاحبك نوبى
النصيحة المذكورة دي ما مني ولا من نوبي وبالعكس انا ما متفق معاها كما سبق و اشرت
Quote: بعدين ما تكلمت عن تكتيكات حشد المشاركين قبل فتح الموضوع الجديد وتوزيع الأدوار ، يعنى واحد يفتح ليه بوست وتشاهده إنت أول واحد وقبلما تتصفحه ( لمدة دقيقة ) يدخل ليك واحد يدعى العبقرية بتحليل للكلام كأنو عندنا قنابير.....
أو مهمة وفود لمقدمة فى تشتيت البوست والمناكفات .....
يا عمك خاتي بالك و ناقش الكنتة ما قلت ليك استاذنا حاضر نجيها لي قدام و اتمنى مشاركتك الفاعلة
اختنا دلال تشكري يا ذوق
08-09-2008, 12:44 PM
رانيا قاسم رانيا قاسم
تاريخ التسجيل: 07-03-2008
مجموع المشاركات: 517
الاخ البشرى انا واحد من هؤلاء الجدد وعندى مشكلة فى رفع Videos from YouTube فهلا تكرمت بالشرح او اى من اهل العلم فى هذا المجال ال Video codes ماتقدر تعرف بدايتها من نهايتها عاملة زى خيت الجبادة لما يتشربك والشكر مقدما..
08-11-2008, 07:17 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
بنتنا رانيا .... كيفك وعساك بخير بالعكس احنا الاستفدنا منك بالجد يكفي انك صاحبة اجمل مبادرة بالنسبة لبورداب الإمارات - في ميزان حسناتك ان شاالله
الفاضلابي يا عمك ... نجيب ليك الكوت دا من ورا
Quote: بالنسبة لليوتيوب اها دا اسهل حاجة دايما في الصفحة الفيها الفيديو بتلقى خانة على اليمين مكتوب فيها Embed تقوم ابوي تشيل الكود الفيها بصمة خشمو و تليسوا محل ما داير ولو داير تتفلسف كمان في رابط مكتوب عليه Customize ممكن يخليك تعمل اطار حول الفيديو و حركات راعي ابوي للصورة دي
تمام كدي يا عمك
08-11-2008, 08:10 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
العزيز ود البشرى اسم على مسمى : لاعدمناك .. قمت بتجربة فى احد من بوستاتى الحردوها الناس وشرحك جاب فايدة . لكن بدور اسعلك تانى من باب انو الواحد لايوق وكده .. اصلى بعيد عنك انا محامى .. او من باب جحا دخلوه قال يدخلوا حمارى .. سعالى ليك .. ال Frame الاحمر اللى شرحت بيه كيفية رفع الفيديو فى ردك على سؤالى سويتو كيفن.. لك منى كل الود..
فاضلابي ياعمك... العفو ما في لياقة ولا حاجة بالنسبة للتعليق او اضافة مربع او دائرة او خطوط للصور في برامج كتيرة و معقدة خلينا في ابسطها الرسام Paint brush من اكسيسوريز الويندوز امكانياته بسيطة لكن بقضي الغرض بعد تفتح فيه الصورة باستخدام ادواته ممكن تحررها بالطريقة اللتي ترغب
عادل عبد العزيز.. نرحب بيك وكدا لكن ما تعبت الذال و الزين تعب شديد ياخ
08-16-2008, 06:09 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
اها يا عزيزي العضو الجديد ... طبعا للآن ما اظنك لسة عضو جديد كنا واقفين وين واقفين وين .... أيوة هنا
Quote: نتكلم المرة الجاية عن كيف تكتسب الشهرة بسرعة في البورد
عيني عشان تكتسب الشهرة بسرعة في البورد في اكتر من طريقة , شخصيا لا افضل اغلبهن لكن في النهاية المسالة اختلاف آراء اسهل و اسرع طريقة انك تكتب موضوع يثير ضجة و خلاف و يدفع الأعضاء للتداخل معك و نقد الموضوع او تخالف لتذكر يعني في موضوع معين و الناس شبه مجمعين او عل الأقل ماخدين نفس الإتجاه تجي براي معاكس يثير الحنق و يدفع الأعضاء للتعليق و الرد عليك ممكن برضو تصدر ليك عنوان بالهجوم او نقد شخصية مشهورة او ذات حظوة او ذات شلة ممكن تنقل من الحوار المتمدن او الملحدين العرب مثلا العناوين اللتي تثير حفيظة المسلمين و شهية العلمانيين و تنال قدر لا باس به من الشهرة ايضا النقطة الأخير - النقل- تحتاج لحذر شديد فكما انت عثرت على ما تريد و نقلته فلا تنسى ان عمنا قوقل متاح للآخرين ايضا و يمكنهم العثور على منقولاتك و ايرادها من مصادرها الأصلية و حينها لن ينفعك الإعتذار فمن الممتع في البورد هنا شرشحة النقلتية و فضحهم و شيل حالهم لذا عزيزي العضو الجديد الله يرضى عليك لو نقلت اي شيئ لا تنسى ايقونة من وسائل الشهرة ايضا ان يكون لك استايل مميز يونيك - نجيه بتفصيل اكتر لي قدام
عزيزي العضو الجديد مسالة اكتسابك للشهرة في رايي لا يجب ان تشغل حيز في تفكيرك وتسعى لها , دع الأمور تمشي على طبيعتها و كن كما انت افضل لك بكثير اي سؤال...
08-27-2008, 12:57 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
هلا هلا بالشباب و جدا آسفين على التاخير عدم الرد على المتداخلين تصرف ما لذيذ - ما لم يكن مقصود - انصحك عزيزي العضو الجديد بتجنبه و الرد ولو فقط بتحية او رد سلام على كل متداخل معك ولو بعد حين فالرد المتاخر خير من التجاهل وكدا للاخوان خالد و محمد الباقر العتبى ( خالد الجبل انا مقوم الحجة على حسك و حس قصيدتك المركركة , بغم ما تقولها يا راجل) عزيزي العضو الجديد ... نواصل ما انقطع من حديث قبل كدا اهديكم الإقتباس ادناه ورد على لسان اخونا ناذر في معرض ترحيبه باخ جديد العضوية
Quote: ويا زول ولا يهمك .. أهم حاجة إنك جيت بي أسنانك .. أنا والله من زمان بنصح القادمين الجدد بقول ليهم أوعو تجونا مساكين ومضبلنين زي الزول الأكلت عشاهو غنماية وهو بيعاين ليها متمحن وما عارف يسوي شنو ..!!
دا منبر حوار .. وكل الأسلحة فيهو متاحة .. البيضربك بي طوبة تضربو ام دلدوم والبيكتب ليك كلمتين ما ياهم تكتب ليهو صفحتين لمن راسو يسخن ، لانك لو دخلت هنا مسكين وما قدرت ترد بدعوى تترفع عن القول الكعب ، ما بتقعد هنا ساعة واحدة ..!!
من هنا Re: التحايا و عظيم التشكرات للاخوة الاعزاء أأمن تماما على كلام ناذر بس اضيف عليه في معرض ردك على هجوم تعرضت له او سخف او غيرو ما لازم تجاري و ترد بنفس اسلوب الهجوم عليك , ضع دائما خطوطك الحمراء امامك و تقيد بها فكونو شخص غير محترم و النوع الما بفرق الخاص من العام اتعرض ليك بسوء نفسه و سخفها يمكنك رده ووقفه عند حده باسلوبك انت و بطريقتك اللتي تختارها , لا تسمح لأحد ان يجرك او يفرض عليك كيفية التعامل ففي النهاية كلنا راشدين و مسؤولين امام الله و انفسنا عما نكتب
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد البشرى الخضر
salma subhi
لؤى
mohmed khalail
دينا خالد
ابوعبيدة حسن محمد
Raja Abayazid
العوض المسلمي
النذير الطاهر عثمان
كمال سالم
Maawya Hussein
AWAD MAHMOUD OSMAN
عمر صديق
ASHRAF TAHA
عبدالفتاح أبوشيمة
Elawad
بشير جبريل علي
محمد خليل ساني
جدو
احمد محمد بشير
ناهد بشير الطيب
عمرو كمال ابراهيم
عصام علي أحمد
محمد عبد الماجد الصايم
ممدوح أبارو
Dalal Ezzaldin
هاشم ودراوي
Ahmed musa
أبوبكر أبوالقاسم
رانيا قاسم
عبدالعزيز الفاضلابى
عادل عبدالعزيز عبد الرحيم
عزام حسن فرح
خالد الجبل
osman righeem
فيس بوك
تويتر
انستقرام
يوتيوب
بنتيريست