|
كتب الكاتب الفاتح جبرا المتوفرة بمعرض الدوحة
|
|
 Re: شارع غبيرة العام بالرياض بشتنة وقعاد وطة (Re: عبدالله ود البوش)
|
عبدالله كيف حالك
الحال من بعضو فيما يبدو
الثورة بالنص والوادي والشنقيطي
وياهو الحال في الكلاكلة اللفة وبري والصحافة ظلط وبالنص وشارع 15
وكمان الحال في شارع الموردة وبالأربعين وبطول شارع الدويم (الفتيحاب)
كما لا يختلف ناحية الشعبية والصافية لاعن كيلو 8
(الحال يا هو نفس الحال)
أما محور سؤالك/
Quote: في طريقة نخلي الناس تنتبه قدام ... ؟
|
إنشاء دوري لتجمعات الاقاليم في مختلف مدن السودان وكذلك الرياض على أن يعقب كل مباراة إجتماع سريع (يديره الفريق الذي تبارى بإسم الإقليم) ويناقش فيه مسودة لدستور الإقليم وإختيار لجنة تسيير، يعقبه إجتماع آخر خلال أسبوع ينتخب فيه مجلس للإقليم يقوم بتسيير أمور الجماعة إلى أن تستقر الأمور ويساغ دستور دائم وتنتخب لجنة تشريعية موسعة لكل الأقاليم تأتي بلجنة موحدة لكل البلاد..
هنالك صور حول المنطقة موضوع النقاش ..
ودام الود،،
| |
 
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: الطيب عبد الرحيم خلف الله)
|
أخونا الطيب
سلام وتحية واحترام
Quote: الثورة بالنص والوادي والشنقيطي
وياهو الحال في الكلاكلة اللفة وبري والصحافة ظلط وبالنص وشارع 15
وكمان الحال في شارع الموردة وبالأربعين وبطول شارع الدويم (الفتيحاب)
كما لا يختلف ناحية الشعبية والصافية لاعن كيلو 8
(الحال يا هو نفس الحال)
|
بل هو تصدير من غير رسوم انتاج .... والعائد عملية صعبة
.
.
Quote: إنشاء دوري لتجمعات الاقاليم في مختلف مدن السودان وكذلك الرياض على أن يعقب كل مباراة إجتماع سريع (يديره الفريق الذي تبارى بإسم الإقليم) ويناقش فيه مسودة لدستور الإقليم وإختيار لجنة تسيير، يعقبه إجتماع آخر خلال أسبوع ينتخب فيه مجلس للإقليم يقوم بتسيير أمور الجماعة إلى أن تستقر الأمور ويساغ دستور دائم وتنتخب لجنة تشريعية موسعة لكل الأقاليم تأتي بلجنة موحدة لكل البلاد..
|
وتنفض هديرا او تجن ... او تجن
وتضرب النوبة ضربا فتئن وترن ثم تجن او ترن
هههههههههههههههه الطيب يا لذيذ يا رايق
عم عبداللطيف راجل ظريف بس جنو وجن المصاريف .....
مصر الاقيك في الخرطوم يا الطيب الاجازة الجاية ان شاء الله
.
.
شارع غبيرة دا يا الطيب شارع استثنائي جدا
تحياتي وتقديري
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: الطيب عبد الرحيم خلف الله)
|
الاخ عبدالله ود البوش كل عام وانت بخير وعيد مبارك مقدم
في فترة من الفترات كانوا في مجموعة من السودانيين قاعدين في شارع غبيرة العام واتت سيارة تحمل احدي السعوديات وعلي مااعتقد اميرة وكان واحد من الشباب ايعاين ليها فماكانت الي ان امرت السائق وواوقفت السيارة و قالت له ليش تتطالع علينا عندك ىشي مفقود وقالت له اليس لديك حرم في البيت من امهات وااخوات استحي علي وجهك واقسمت لو انه لولم يكن سوداني لتصرفت تصرف اخر وتركته وذهبت
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: حيدر حسن ميرغني)
|
| Quote: بالله لسَه الخلق دي مدورة البشتنة وقعاد ا ل و ا ط ة هناك؟ |
حيدر اخوي سلام وتحية
يا زول بسم الله الرحمن الرحيم اقوليك بقت ظاهرة عديل بكلام المثقفاتية
وياريت المثقفين اعلاجوها لينا الظاهرة دي
.
.
Quote: كنت اشتري التمباك من هناك
|
مالك خليتو ولا بقيت تسف النوع الما كارب ؟ هههههههه
.
.
غايتو يا حيدر حالة اخير منها العرس .
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: محمد المسلمي)
|
الاخ محمد المسلمي
تحياتي وتقديري وعيد اعود عليكم بالخير والبركات
| Quote: لولم يكن سوداني لتصرفت تصرف اخر وتركته وذهبت |
استفادت من الرصيد الذي اودعه اخوانه السابقين
ومازلنا حتى الان نستفيد من هذا الرصيد الذي اخشى عليه ان يصفر
وحينها نسمع ما يسمعه زملائنا الذي ليس لهم رصيد .....
.
.
لابد لنا من جلد الذات وتقويم المعوج من السلوك المشين
في بلاد الاغتراب لايعامل الفرد بما اغترف من سلوك مشين بمفرده
بل يعاقب المجتمع الذي اتى منه .... فهو البيت الذي تخرج منه
الحسنة بالحسنة والسيئة بمثلها ....
والله العظيم يا محمد واحد من اولادي مسافر السودان من الرياض وهناك اكتشفنا انو جوازو منتهي
الموظف رفض وقال لي امشي المدير .... مشيت المدير فلم اجد شفاعة غير اني سوداني
ودا نتيجة لارث قيم وضعه السابقون
وعليه فعلينا نحن اللاحقون تعديل ما يمكن تعديله
ولكن الامر يحتاج لجهود مكثفة غير تحصيل الرسوم !!!!
شكرا يا محمد وتحياتي للحاج
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: منتصر عبد الباسط)
|
منتصر يا ود بلدي
القومة ليك يا بلد
سلام وتحية
وعبرك يطيب الجلوس وتطيب طابت بكم وبنا طيبا وتطيبا
.
.
Quote: وين سفارتنا المحترمة ....
|
جايين لمهمة محددة بالريال والهللة
اباروا ليك كمان الجالية .. حلاة لق لق .
.
.
نشطاء عديل كدي يا منتصر .... كانت ايام يا وطني زي الاحلام يا وطني
تحياتي وتقديري
| |
|
|
|
|
|
|
|
|
 Re: شارع غبيرة العام بالرياض بشتنة وقعاد وطة (Re: أيمن دياب)
|
ايمن دياب يا جميل
تحياتي واشتياقي
.
.
| Quote: كمان ما تنسى الحوامة بالسروال والعراقي. في منظر سخيف جداً.. |
السعوديين عنده نكتة بتقول
بدوي حايم في برج الفيصلية بالبجامة
يعني انا ساكن هنا .........
.
.
هدي المشاكل يا ايمن لكن الحلووووووول !!!!!!!
ياربي نسوي دروس عصر مجان ؟
المهم يا زعماتو .... دا الجرح
والبنسلين يا تمرجي نادوا الحكيم يطعنا في العضل للقدامى
والجدد تطعيم اجباري
| |
|
|
|
|
|
|
|
|
 Re: شارع غبيرة العام بالرياض بشتنة وقعاد وطة (Re: Al-Shaygi)
|
أخونا حسن الشايقي
تحياتي وسلامي يا حبيب
القصد كان تولي الادبار ولا تفوت على فطنة القارئ الحصيف
ولكنه الكيبورد لم يطاوعني ... وي كأنه يريد انحراف البوست
لمنحى يستوجب التسليط عليه
او كما قالت بنت سكسون زوجة الدكتور عبدالله الطيب
حين لم يطاوعها لسانها في نطق نكاية بهم .....
فقال لها البروف له الرحمة اصبتي حين اخطأتي يا ابنة سكسون
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
عبدالله كيف حالك اخوي
وماتنسي مواعيد الصلاة المحلات بتقفل
تلقي الحريم
يسدو مكان الرجال في الفتره دي
الونسه لي رب السماء والكوراك مع الشفع
يمين تجي ماري بس تعرف كعابة النسيبه
والاخوان الاكلو قروشهم
ويمكن كلام اصلا الواحدة المفروض ماتقولو لي امها الولدتا خلي
لي عرفة دقايق الصلاة وفي السوق كمان
الله يكون في عونا
ابقي طيب
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عفاف أبو حريرة)
|
شارع غبيرة .... متنفس للسودانيين بالرياض
والنظرة التي طرحتوها هي نظرة ( سلبية ) ... واكيد باني ضد هذه الممارسات
ولكنها على كل حال هي كغيرها من الممارسات والمتوقعة لكمية السودانيين بالرياض
ولا نتناسي المطاعم السودانية ومحلات التياب و المنتجات السودانية والطواحين
والجلوس امام المحلات هو تجمع سوداني ويكفي ان المطاعم السودانية اصبح محل اجتماع
للرياضيين والفنانيين وغيرهم
فنوثق لشاعر غبيرة ... لانه يحتاج التوثيق
| |
|
|
|
|
|
|
|
 Re: شارع غبيرة العام بالرياض بشتنة وقعاد وطة (Re: عفاف أبو حريرة)
|
أختنا العزيزة أم أحمد عفاف ابو حريرة
سلام وتحية واحترام شديد
.
.
Quote: تلقي الحريم
يسدو مكان الرجال في الفتره دي
الونسه لي رب السماء والكوراك مع الشفع
يمين تجي ماري بس تعرف كعابة النسيبه
والاخوان الاكلو قروشهم
ويمكن كلام اصلا الواحدة المفروض ماتقولو لي امها الولدتا خلي
لي عرفة دقايق الصلاة وفي السوق كمان
|
كما جلدنا نحن ذات جنسنا ام احمد تخت ايدا على جرح غاير
ولكنه مدمدم ومخفي .... وهنا تكون المشكلة داخلية محصورة في نطاق ضيق
فهي غير مزعجة ولا تؤثر علينا كجالية سودانية ولكنها تزعج المجتمع الداخلي
ذات نفسه .... واظن يا ام احمد دي غير الصبر ما عندها حل
ونتيجة الحبسة في الشقق تؤدي لكب النقة في الشارع العام
.
.
مرورك دائما يسعدني يا ام احمد
الدقاقين ازيهم نعلهم طيبين في حيهم وخاصة منة .....
تحياتي وتقديري
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
Quote: شارع غبيرة دا يا الطيب شارع استثنائي جدا
|
عبدالله أخوي،
شوقتنا لشارع غبيرة هذا وشكله كده مركز للسودانيين
قمنا نهابش ونقوقل الشراع شمال يمين فوقفنا على هذه الصور،
نرجو التصحيح إن أخطأنا ونطالب بالمزيد كما نعتذر لصاحب الحقوق.
ونزولا لرغبتكم في لقاء يجمعنا في السودان، أنت مدعو لكوب شاي في الميناء البري بالخرطوم
(أختار الوقت المناسب بأي يوليو تشاء) والدعوة عامة للبورداب وكل من يمر بهذا البوست.
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: هيثم التوم)
|
اخونا هيثم التوم
سلام وتحية
.
.
وهذه نظرة عشق ومحبة لشارع غبيرة العام من زاوية مختلفة
Quote: ياخي كلما اشتقت لي ريحة الدلكة والخان بركب سيارتي واعمل مرور سريع
شارع غبيرة ريحة تعج زي يوم العرس فايحة والناس جاية رايحة
|
شكرا جزيلا اخي هيثم
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: الطيب عبد الرحيم خلف الله)
|
Quote:
شارع غبيرة العام بالرياض بشتنة وقعاد وطة
|
تعرف يا ود البوش شارع غبيرة ده شارع سوداني مأئة بالمائة
تلقى فيهو التياب والجلاليب والعمم والعراريق والسراويل
تلقى فيهو الكوارع والنيفة والشية وكبدة الإبل
التمباك والحرجل والقرض والقضيم....
الكسرة ،،، حتى الحبشية ....
طبعاً زول بي عراقي وسروال وسفنجة دي عااااادي يلاقيك قاطع الشارع وشايل ليه كيس نايلون فيهو خضار ولا لحمة...
أتنين بيشيلوا الفاتحة في نص الشارع برضو ما تستغرب...
مكاتب السفر والحجز جوي بحري أرضي ،، صرافات وتحويلات تحت الطاولة تلقاها في محل تياب ولا تمباك....
والحريم (تكفي مداخلة أم أحمد الشقيقة عفاف أبو حريرة فقد أوجزت وكفت وأعطتنا صورة معبرة عن الوضع)...
بس أضيف عليها: واحده مفنوسة وشايلة وليده في صفحتها، وماشية وتتنونس مع صاحبتها الجارة ليها شافعين بي يديها ولازة كرشها في التامن عااااادي...
كذلك النساء المتسكعات يجرجرن في صناديقن وزاحفات على الرصيف ذهاباً وإياباً ولا تدري هل هن متسوقات أم مسوقات؟؟
تعرف مسألة شراء التياب من غبيرة بقيت أخذ ليها إذن من الدوام وأسوق المرة الصباح تشتري تيابها وملاياتها ونتوكل على الله
وبركز على محلات اليمانية والحضارمة، لأنو جماعتنا دايماً يخرتونا وما عندهم ذمة في البيع....
الشايقي
http://www.youtube.com/watch?v=WjNosdjuv7s
[email protected]
http://alkatwah.com
.
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: Al-Shaygi)
|
Quote: تعرف يا ود البوش شارع غبيرة ده شارع سوداني مأئة بالمائة
تلقى فيهو التياب والجلاليب والعمم والعراريق والسراويل
تلقى فيهو الكوارع والنيفة والشية وكبدة الإبل
التمباك والحرجل والقرض والقضيم....
الكسرة ،،، حتى الحبشية ....
طبعاً زول بي عراقي وسروال وسفنجة دي عااااادي يلاقيك قاطع الشارع وشايل ليه كيس نايلون فيهو خضار ولا لحمة...
أتنين بيشيلوا الفاتحة في نص الشارع برضو ما تستغرب...
مكاتب السفر والحجز جوي بحري أرضي ،، صرافات وتحويلات تحت الطاولة تلقاها في محل تياب ولا تمباك....
والحريم (تكفي مداخلة أم أحمد الشقيقة عفاف أبو حريرة فقد أوجزت وكفت وأعطتنا صورة معبرة عن الوضع)...
بس أضيف عليها: واحده مفنوسة وشايلة وليده في صفحتها، وماشية وتتنونس مع صاحبتها الجارة ليها شافعين بي يديها ولازة كرشها في التامن عااااادي...
كذلك النساء المتسكعات يجرجرن في صناديقن وزاحفات على الرصيف ذهاباً وإياباً ولا تدري هل هن متسوقات أم مسوقات؟؟
تعرف مسألة شراء التياب من غبيرة بقيت أخذ ليها إذن من الدوام وأسوق المرة الصباح تشتري تيابها وملاياتها ونتوكل على الله
وبركز على محلات اليمانية والحضارمة، لأنو جماعتنا دايماً يخرتونا وما عندهم ذمة في البيع....
|
حسن الشايقي صور الشارع كلو في لقطة واحدة تعجز عنها الكاميرة الديجتال
شكرا جزيلا يا حسن لهذه اللوحة المتكاملة
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: الطيب عبد الرحيم خلف الله)
|
اخونا الحبيب الطيب عبدالرحيم
ياخي شكرا جزيلا لدعم البوست بالصور
.
.
فعلا اياها صور شارع غبيرة العام
وقول ما اياها البغالتنا فيها منو ؟ المافي شنو يا زعماتو
| Quote: ونزولا لرغبتكم في لقاء يجمعنا في السودان، أنت مدعو لكوب شاي في الميناء البري بالخرطوم |
كمان قربت لي المسافة جنس قرب ياخي انا بيتي جنب الميناء البري فركة كراع ولا احتاج ركشة حتى
اياني الجاييك طب ....
.
.
.
ملاحظة جديرة بالملاحظة .... ما لاقاني زول اسمو الطيب ولقيتو كعب والله صحي
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
| Quote: وبركز على محلات اليمانية والحضارمة، لأنو جماعتنا دايماً يخرتونا وما عندهم ذمة في البيع.... |
سلام لصاحب البوست والمتداخلين
غبيرة اصبحت نقطة تجمع للسودانيين , غالبية سكان الحى منهم لذلك اصبحت مجتمع سودانى صغير فى الغربة
يسوده الجانب الغير جميل فى عادات السودانيين التى انتقلت معهم الى المهاجر , التسكع , العشوائية
الفوضى اضافة لما ذكره الاخوان ولكن ما لم يذكره الجميع هو السمعة السئية التى ارتبطت بذلك الحى
حتى اصبحت عارا يطارد السودانيون , ولا يستطيعون الدفاع عن سمعتهم حين يعايرهم الاخرون
اعتقد ان التفاقم سببه الهجرة الممتدة الى ما لا يعلمه سوى المولى حتى بعد انتهاء فترة التقاعد (التفنيش)
لكن يصر البعض على المكوث وخصوصا النساء والابناء الذين تربوا وسط هذه البئية فاصبحوا كالسمك
لايستطيع العيش خارج الماء ولذلك تستنبط سبل البقاء الشريفة والغير شريفة وللاسف هى السائدة الان
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: احمد التجانى احمد)
|
أخونا احمد التجاني
سلام واحترام
Quote: السمعة السئية التى ارتبطت بذلك الحى
حتى اصبحت عارا يطارد السودانيون , ولا يستطيعون الدفاع عن سمعتهم حين يعايرهم الاخرون
|
ياخي اسع قعاد الوطة حارقنا فلو كلامك دا صحيح تبقى مصيبة
.
.
حصلت مرحلة العار يا احمد .... طيب الساكتين ليها شنو ؟
كلام خطير
.
.
.
شكرا جزيلا اخي احمد لاضافة هذه النقطة الحساسة
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
الى السيد عبدالله ود البوش المحترم
السلام عليكم ورحمة الله وبركاته،
اما بعد
افيدكم بانيي لاحظت في بوستيكم الذي نقف على ارضيته الملاحظات التالية
عشان تعرف الناس قاعدين اسوا شو ومن اين اتوا
ممكن اكونوا شغالين .. قعاد وطة
ولا كمان اتوا من اولئك يا ربي
.
.
الله أهونيني
لا ادري ما سر تقليب حرف ياء المضارع الى الف
يعني عرب السودان ديل لو ما لحقوا اللغة العربية امات طه حتشوفوا في زمن من الازمان
ولقد تكلمنا في اللقاء السابق عن تغيير حرف الغين الى قاف والقاف الى غين حتى المذيعين لم يراعو ذوق المستمع
وحاليا نحن النوبيون عند مفترق طرق باي لغة عربية يتحدث بها السودانيون المتعوربون
اين ياء المضارع ايها الناس
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
عبد الله ود البوش
اها اوع يكون مشيت مطعم جماعة ذو اليد كمان؟ 
أســـوأ حاجة يا ود البوش النسوان المدخنات
ولافات وماشات اضرعن في الســوق ده يا عبد الله
منظر شين بصراحة ومشــين
مرة يا عبد الله حضرت لي كبسه لناس المباحث
لشباب في سيارة صغيرة كانوا مشتبهين فيهم
بانهم من مروجي المخدرات
المنظر حدث أمام أعيني وقد ادهشتني المفاجأة
حين تم القبض على خمسة شباب
اثنان منهم سودانيان واثنين منهم سعوديان
وواحد تشادي يا عبد الله
ناس المباحث فتشوا السيارة ووجدوا فيها مخدرات
غايتو بطني طمت واتخارجته طوالي من جنبهم
تحياتي
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: الامين موسى البشاري)
|
اللمين البشاري يا صاحبي
تحية واشتياق
.
.
.
يا اخوي الحاجات المغتغته الدخول في دهاليزها يصعب الخروج منه
ولن تصل الى نتيجه ..... ويهمنا الظاهر فقط
والباطن عليمو كريمو
فدحين خلينا نحاول معالجة السلبيات الظاهرة والمكشوفة
والماخفيا واعظم السلطات جديرة بمعالجته هنا مافي يم ارحميني
البقع في ايد الناس ديل من الحاجات البتقول فيها دي
غير اللخرة ما عندهم ليهو مكان
.
.
ونحن نحاحاي علي البنقدر عليهو
تحاياي
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: Zomrawi Alweli)
|
Quote: لا ادري ما سر تقليب حرف ياء المضارع الى الف
|
.
.
اخونا زمراوي
وعليكم السلام ورحمة الله تعالى وبركاته
.
.
يا زول نحن ناس الوسط ( الجزيرة ) يا مضارع شنو وحرف علة شنو
نحن مرات حرفين تلاتة مافي خليهو قلب الحروف هين
هذه الساعة : اسع دي
عاما اول : عمنول
الظلام : الضلام
ظفر : ضفر
البارح : امبارح
مافي سوداني عربي .... افارقة دخلوا عليهم عرب اتعلموا منهم اللغة العربية
فتعاملوا بها كل في منطقته وحسب قدرتو وتعليمو .....
شكرا للمرور والملاحظة
موضوع البوست ما عجبك يا زمراوي اخوي ولا شنو جدعتو هناك ومسك في حروف العلة؟
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
ود البوش...
لعل المقصود "ظواهر" و "سلوكيات" البعض التي تنم على "البشتنه"
الشارع وبطبيعة تواجده بحي شعبي أصبح يكتظ بالعديد من الأجناس غالبيتهم العظمى من السودانين
"اللمه" حلوه ولكن وللأسف "لمة" البلد دي ما حبابه وكلامي دا عن تجارب عديدة ...
كلنا نحتاج "للعراريق والجلاليب" السودانية ونحن لاكلاتنا الشعبية كثيراً
وتبقى قاعدة "الشمال" أكثر حضارة ورقي عن "الجنوب" الجغرافي .. قاعدة ثبات
بكل الدول وبكل المدن .. أقسم على "أثنين" وارحل "شمال"
.
.
لذا المشكلة ما مشكلة "سودانيين" و "حبش"
مشكلة "ظواهر" تحكمها "قواعد" جغرافية...
.
.
خالص تحياتي
تخريمة - اليوم معزوم أم فتفت وأقاشي تجوا معاي ...؟؟؟
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: معتز زيزي)
|
الأخ ودالبوش
تحية طيبة
الواضح انو ما يحدث في السودان يحدث هنا
والظواهر التي تظهر في السودان تنتقل وبسرعة البرق إلى أي مكان نتواجد
قد تكون كما قال معتز زيزي | Quote: مشكلة "ظواهر" تحكمها "قواعد" جغرافية... |
ولكن بالنسبة للسمعة التي وضعها السابقون انتهت تقريباً أو سوف تنتهي قريباً جداً
لأن كل الظواهر السالبة قد ظهرت في السودان ولابد أنها سوف تنعكس سلباً على مجتمعنا السوداني هنا في الغربة
نحن في السودان نهوى اوطاننا
الصادق
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: osman righeem)
|
اخونا
osman righeem
تحياتي وسلامي واحترامي
.
.
Quote: مريت قبل اسبوع علي شارع غبيرا هذا
ولقد كان المنظر مريخا و لم اشعر بشئ مخل
ربما يكون حالة البعد من الاسواق الشعبية في السودان
لعهود و لكن انتم المعايشون تحكمون
|
بالتأكيد يا عثمان مرورك كان مرور الكرام فلا ترى الا كل كريم
تعيش شوية تشوف كتير
.
.
على كل حال الوضع غير مزعج خالص ولكنا نريد ان نكون كما كنا
نحاول اعادة سيرتنا الاولى ...
| Quote: غايتو شفت أجود انواع الطلح |
الطلح يا عثمان بشمو
البشوفو داك الشاف
اسعل الشدر الكبار من شدر الطلح والشاف
اها ما عترت ليك حفرة دخان ؟
ياخي ما دام بتجي الرياض ما تكرمنا بشوفتك ياخي
تحياتي وتقديري
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
Quote: ها ما عترت ليك حفرة دخان ؟
ياخي ما دام بتجي الرياض ما تكرمنا بشوفتك ياخي
تحياتي وتقديري |
هو ده الموضوع الجاب الطلح انا شفت الصناديق الخشبية افتكرتها مناحل
وسألت الجماعة تربية النحل داخل المدينة مسموحة فنظروا اليا مليا و شذرا
فأشرت لهم علي الصناديق .... وعينك ما تشوف الا النور ..... طلعت حفر دخان
وهكذا دلفنا الي موضوع الطلح
ود البوش نحن اولا بنشوف كمية السوس فيهو كيف و بعدين نتشوا و نتفن في بطن الواطه
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: osman righeem)
|
Quote: وسألت الجماعة تربية النحل داخل المدينة مسموحة فنظروا اليا مليا و شذرا
|
الحمد لله يا عثمان انهم اكتفوا بالشذر المليا وطبعا قالوا كلام كتير بقلبهم
كويس انك ما سمعت حاجة ... هههههههههههه
.
.
هذا سوق شعبي توجد فيهو كل الشعبيات من المقشاشة للمنقاش
لو كنت تاجرا حاول استفيد منو للتصدير للامارات والله صحي
.
.
شكرا عثمان وتحياتي
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: الصادق صديق سلمان)
|
اخونا الصادق صديق
تحية واحترام
.
.
Quote: والظواهر التي تظهر في السودان تنتقل وبسرعة البرق إلى أي مكان نتواجد
|
دي المشكلة فالبلد المضيف قد لايقبل ما هو معتاد في بلاد الضيف او الوافد
فحاجاتناالخاصة حقو نعملا جوة بيوتنا وفي استراحاتنا الخاصة ولا من سمع ولا من درا
.
.
| Quote: ولكن بالنسبة للسمعة التي وضعها السابقون انتهت تقريباً أو سوف تنتهي قريباً جداً |
فعلا كان رصيدا كبيرا ولكنه الان قارب الى الصفر او كاد وبالتأكيد لايمكن السحب على المكشوف
صفر معاك الواحد
.
.
كانت ايام يا وطني زي الاحلام يا وطني
.
.
شكرا جزيلا عزيزي الصادق الصديق
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: معتز زيزي)
|
ولدنا معتز زيزي
سلام وتحية طيبة
.
.
Quote: مشكلة "ظواهر" تحكمها "قواعد" جغرافية...
|
Quote: وتبقى قاعدة "الشمال" أكثر حضارة ورقي عن "الجنوب" الجغرافي .. قاعدة ثبات
بكل الدول وبكل المدن |
.
.
حكاية الشمال والجنوب وقفت عندها كثيرا
ولما تكررت اسئلتي عنها كانت هناك اجابة واحدة منطقية وهي :
ان معظم الرياح تهب من الشمال للجنوب وعليه تكون المدن الصناعية غالبا
في جنوب كل مدينة وهي مكان الدخان والمخلفات الصناعية ولا يسكنها الا العمال
والكادحين الغلابا
اما اصحاب المصانع والاثرياء فيسكنون شمال المدينة محل الهواء النقي والبتيخ البارد
.
.
الاجابة اعلاه منطقية فيما يخص المدينة ومطابقة للواقع في معظم الاحيان
ولكن حكاية الدول لا اظن انها تنطبق في كل الاحوال
.
.
| Quote: تخريمة - اليوم معزوم أم فتفت وأقاشي تجوا معاي ...؟؟؟ |
العزومة مقبولة خليها في الحسبان لاحقا .....
لو بتجي كتير ما معتز اكيد نلتقي يوم باذن الله ....
شكرا جزيلا يا فنان وياريت تجدع لينا صورة غبيرية
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
سلامي واحترامي أخي الكريم والاخوة الأفاضل حبيت أشارك بتقرير صحفي أعده الأخ الزميل أيمن أبوالحسن عن شارع غبيرة وسأوافيكم بعدد من الصور التي أرسلها معد التقرير :
شارع غبيراء العام
تحقيق: أيمن مبارك أبو الحسن
أشياء كثيرة يمكن للمر أن يختزلها وهو يتجول في شارع غبيراء العام الذي يقع وسط حي غبيراء المكتظ بالسكان جنوب العاصمة السعودية الرياض. فرغم ادعائي المعرفة غير اليسيرة بهذا الشارع ودهاليزه .. لكنني دهشت حينما شرعت في اكتشافه بطريقة مختلفة من خلال هذا التحقيق. كانت البداية بها بعض المتعة، فقد قررت أن ألمس الجوانب المختلفة للموضوع بطريقة مباشرة.
لقد أصبح هذا الشارع الذي لا يتجاوز طوله 3 كيلومترات تقريباً النبض الحقيقي للحياة السودانية في المهجر بكل تفاصيلها وأبعادها: المطاعم السودانية، مستلزمات المرأة التقليدية من عطور وملابس وغيرها، صوالين الحلاقة السودانية، المستلزمات السودانية المختلفة، بل إن الشارع أصبح مكاناً مشهوداً للغادين والرائحين، المسافرين منهم والقادمين، حيث وكالات السفر والسياحة، ومركز الباصات التي تنطلق صوب الوطن حاملة في بطونها أبنائه الذين تغربوا عنه بحثاً عن لقمة عيش، أو تفريج لهم، أو طمعاً في الحصول على فائدة من فوائد السفر الخمس...
تاريخياً لا يوجد ذكر لمنطقة غبيراء ، ربما أنها كانت جزءاً من منفوحة التي تأسست قبل الإسلام بقرون عديدة واشتهرت بحروبها التي خاضتها مع عدد من القبائل، ولم تشهد استقراراً إلا بعد أن ضمها تركي بن عبد الله للدولة السعودية الثانية في عام 1924م. ولا تذكر منفوحة إلا ويذكر الشاعر ميمون بن قيس الشهير بالأعشى صاحب البيت المشهور: ودع هريرة إن الركب مرتحل، فهل تطيق وداعاً أيها الرجل. وقد عرف عن الأعشى انه أول من امتهن الشعر، فكان يمدح الناس نظير مبالغ مالية يحصل عليها.
أما غبيرا فهي تقع بمحاذاة حي منفوحة من جهة الشرق، وهو حي قديم كما يظهر من هيئة المباني وطرازها القديم. ولا يوجد في هذا الحي ما يلفت النظر إلا شارعه العام الذي يمتد من اتجاه الغرب ناحية الشرق لمسافة 3 كيلومترات تقريباً. ومما يلفت له النظر حقاً هو غلبة الجنسية السودانية في هذا الشارع سواء مرتاديه أو حتى من يعملون في محلاته المختلفة، لدرجة تكاد تتخيل نفسك في شارع الموردة أو الأربعين. ورغم امتداد الشارع لهذه المسافة، إلا أن السودانيين "يحتلون" فقط النصف الغربي من الشارع.
هنا، المطاعم السودانية لا تشكل مكاناً لتناول الوجبات فحسب، بل إنها تشكل بدائل مناسبة للمؤسسات الثقافية مثل الأندية والمراكز المماثلة... فتستضيف حوارات ونقاشات فكرية عميقة. وقد شهدت بنفسي واحدة من تلك النقاشات وكانت تدور حول علاقة المثقف بالسلطة، ولماذا لا يتم الاستفادة من إسهامات المثقفين في ترقية الأداء السياسي في البلاد. والحق انه كان حواراً ثرياً وعميقاً، ولا تقل توصياته عن التوصيات التي تختتم بها بعض المؤتمرات التي تعقد بين الحين والآخر في مجالات مختلفة.
لكن في نفس المطعم تجد المحبط، والحائر، ومن يبحث عن عمل، أو من جاء خصيصاً ليمارس تسلية وضحاكات تخفف عنه حمله الثقيل وهمه الذي ينوء بصدره... كما قال لي أحدهم: "أنا لو ماجيت هنا بموت من المهم". فعلاً مثل هذه الأماكن تشكل زخماً متعدد الوجـوه.
في نفس الشارع من الجهة المقابلة يقف صف طويل من المحلات التي تخصصت في بيع الملابس السودانية خاصة ما يتعلق منها بملابس النساء.
"أبو عبد الله" صاحب محل للملابس والثياب السودانية يجوب المحل الصغير غادياً ورائحاً يستمع لزبون بينما يده تناول ثوباً لإحدى النساء اللائي جئن لشراء "شيلة كاملة" لشقيقتها التي تقيم في السودان.
سألت أبا عبد الله: منذ متى وأنت في هذا المكان: أجابني بأنه يعمل منذ أكثر من أربعة عشر عاماً.. سألته: ولكن كم عمر المحلات في هذا الشارع:: ايييه .. كتير .. أكثر من 30 سنة...
أحد الزبائن كان يرخي السمع للحوار تداخل معنا وقال: إنتو عارفين يا أخوان: .. شارع غبيرا العام دا مشهور في السودان برضو... في مرة من المرات أرادت أمي أن ترسل لي خطاباً (أيام الناس لسع بترسل الجوابات) ... فذكروا لها أن أحد أبناء منطقتنا (وكان يقيم في مدينة جدة) سوف يسافر خلال أيام للسعودية، فذهبت له حاملة معها الخطاب. ولكنه عندما قرأ العنوان على الظرف قال لها إنه لا يستطيع أن يحمل معه الخطاب لأنه يقيم في منطقة مختلفة... فقالت له: يا ولدي إنت وديه شارع غبيراء وبعد داك بيصل ليه!
شي ممتع التجول في محلات شارع غبيرا ومشاهدة أنواع البضائع المختلفة، والشيء المميز لهذه الأسواق هو تخصص كل محل في بيع بضائع متعددة من كل الأنواع، وبالمناسبة حتى الأسماء هي سودانية خالصة: المحسي، الشمالية، ود العباس، ود الجزيرة .. الخ. في محل الملابس وجدت أنهم يبيعون العطور السودانية التقليدية والحناء بجانب الملابس النسائية والثياب والجلاليب الرجالية، والمراكيب وأيضاً زيت السمسم وغيرها من سلع غير متجانسة بتاتاً.
خارج هذه المحلات يشاهد المتجول "كهولاً" يعرضون بعض السبح والعراريق والطواقي، وكلها صناعة سودانية خالصــة. بعضها مصنوع بطريقة جميلة مدعمة ببعض النقوش التي تضفي عليها جزءاً من الفخامة رغم أنها تفرش على الأرض افتراشاً.
وفي مكان ليس بعيد دخلت "طاحونة" وهي أيضاً مكتظة بجميع أنواع المحاصيل: الذرة، الفول، السمسم، بجانب أنواع مختلفة من البهارات وغير ذلك.
شارع غبيرا .. شارع صاخب مملوء بالحيوية والحياة، فيه كل شي يتعلق بالسودان، الناس والحياة السودانية بكل تفاصيلها اليومية، ولا يمكن ان تزور الرياض من دون التبضع من محلات شارع غبيرا. فإذا كنت حديث عهد بهذه المدينة، فلا تضيع وقتك وتوجه الى شارع غبيرا العام حيث تجد أحدث وآخر موديلات الثياب السودانية والعطور وجميع السلع السودانية الأخرى.
قبل أن أهم بمغادرة الشارع، اقتحمت محلاً صغيراً أشبه بالكوخ أو بأكشاك الأسواق السودانية ... المحل يتكون من فتحة صغيرة بالكاد تتسع لدخول شخص واحد، بينما تملأ جنباته العديد من السلع. أول ما يلفت النظر أنها غير متجانسة ولا توجد علاقات بينها... فهناك "الحق" والويكة، البهارات بأنواعها المختلفة، العراريق، الفول السوداني، آخر التسجيلات السودانية التي يتم تسجيلها بدون حفظ لحقوق أصحابها، المراكيب. ويلفت نظرك بشكل أكبر أنهم عرضوا جلداً لتمساح بجانب فروة كبيرة لجلد نمر ... نعم إنه جلد نمر حقيقي. سألت صاحب المحل: بكم جلد النمر: أجابني بـ 2900 ريال ... سألته: وكيف تمكنت من إخراج هذا الجلد من مصدره: رمقني بنظرة فيها شك وريبة.. لكنه لم يجب على سؤالي.
لا أعتقد أنه يعدم وسيلة لإدخال جلد نمر بكامله ... لكني كنت فقط أتساءل: متى يتملكنا الحس والوعي الوطني بضرورة الحفاظ على هذه الثروة .. ومتى نستشعر فعلاً أهمية الحفاظ على البيئة !!! سؤال من بين عدة أسئلة كنت أطرحها على نفسي وأنا أغادر ذلك المحل.
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
أخونا كمال
مداخلتك خلتني اغير رأئ في هدف البوست
وتغير مساربه ليصبح الموضوع جاذبا للزبائن للتبضع من هذا السوق
وتعود الفائدة لتجار السوق ومعظمهم سودانيين وبالتالي تكون الفائدة للسودان والله صحي
وبكدا تكون يا كمال ساهمت في دعم ابناء الوطن وبالتالي الوطن نفسه
هذا البوست وبهذا الانحراف الايجابي قد يؤدي لمزيد من المتسويقين والله صحي
اكرر لك شكري فقد كان لمداخلتك اثرا طيبا ودعما لهذا السوق
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
ود البوش سلام
لايم الناس في شنو! إذا كان إسم الشارع ذاتو يدعو للبشتنة
أسي لو كان إسمو الزهور فتحت والله نسائم الخريف كان الحال براهو إتعدل
بجدية أكتر حاسدكم علي الشارع دا وياريت لو عندنا منو كيلوميتر واحد هنا . ياخي هنا عندنا أخوانا الصوماليين والباكستانيين إحتلوا إتنين من أعرق الأحياء وفي وسط البلد وحولوها بوضع اليد لي مقديشو وكراتشي مصغرة رغم أنف الخواجات
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: أسامة البلال)
|
ود البلال يا رايق
سلام وتحية
| Quote: بجدية أكتر حاسدكم علي الشارع |
ياخي حاسدنا على الشارع دا شاحد الله الكريم باكر من الصباح
يا اسامة في نرويجك دي مرقتك كدي للشارع الجنبك تلقى لافتة مكتوب عليها
العماري الممتاز سف وقارن
.
.
الظاهر نحن في نعمة لا ندري عنها
اها من دربي دا صاين اوت وطوالي عدل على شارع غبيرة العام
.
.
شكرا جزيلا اخي اسامة وربنا احفظكم واغتي عليكم في غربتكم
ويردكم لاهلكم سالمين غانمين انت وكل المغتربين يا رب يا كريم
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: Osman Musa)
|
أخونا عثمان موسى
سلام وتحية طيبة
.
.
Quote: كدي حاول جيب صور للشارع .
وأسعار الايجارات للمحلات التجارية .
|
بالنسبة للصور اهو الاخوة كمال والطيب ما قصروا
فكرت اعمل صور حية لكن عمك دقة قديمة وعندو حساسية مع السوفتيات
نحن ناس بدر وجد القلم وكتب الولد ولد البلد والبلد بلد البنت والولدهههههههه
.
.
اما بالنسبة للايجارات فهي تترواح بين عشرة الف ريال الى تلاتين الف ريال
وذلك حسب المبنى والموقع
وطبعا التجار هنا مرتاحين لاضرائب ولا رسوم ولا تحت تحت
حتى الرسوم الحكومية شئ رمزي في السنة تدفعوا من بيع اليوم الواحد
ياخي هنا الامور ساهلة ومسهلة والدولة ما محتاجة لقريشات الرسوم دي ولا بتجري وراها
بدل الضرائب توجد الزكاة الشرعية ودي تدفعها انت وذمتك وضميرك
وتمشي براك تدفعها حامد شاكر .....
اتمنى ان اكون وضحت لك المطلوب توضيحه
تحياتي
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
أخي ود البوش
تحياتي
كل ما ذكرتم عن شارع غبيرا العام صحيح، وما خفي كان أعظم، لكن كمان شارع العشرين بمنفوحة وطريق الحجاز
أسوء منه بمراحل، وغبيرا هي السودان المصغر، وأذكر حينما أتيت الرياض لأول مرة، سألني سائق الليموزين
وين تروح؟ فأجبته بكل ثقة، وين أروح يعني؟ رائح لديرتنا في غبيرا، فضحك ولم يلتفت أو يسأل حتى أوصلني
شارع غبيرا العام، وحينما سكنت بشرقها بجوار مسجد الصحابة، فقد حدث لي في بادئ أمري بها موقفين، الأول
بجوار مستشفي الفلاح، إذ وجدت كمية من السودانيين، فسلمت عليهم فردا، فردا، وكنت أقرأ الدهشة في عيون
بعضهم، ثم سألتهم خير ياجماعة، فأجابني أحدهم أن لا شئ، فعرفت أنها عادة بعضهم، وأما الموقف الآخر، فبينما
كنت سائقا بواحد من شوارعها، مررت بعدد مهول من السودانيين يكاد يقفل الشارع، فجنبت، ونزلت مسلما عليهم
وسائلا، خير ياجماعة، فأجاب أحدهم بأنها دار جمعية منطقة، فأستوعبت دروس غبيرا، فالعبرة والمشكلة ليست في
شارع غبيرا العام، وإنما المشكلة الحقيقية في السجون يا صاحبي، يقال بأن سجن الملز للنساء به أكثر من 300
إمرأة سودانية لا أمل لخروجها مماهي فيه، ويقال بأن بعض السودانيين بسجن الحائر، وقد تجاوزوا السنوات العددا
بالحبس، وكل ذلك في أمور مالية وأخلاقية، خصما من رصيد سمعة السودانيين، الذي بلغ الصفر أو الصرف بتسهيلات على
المكشوف...... وحينها ستكون الإستدانة كبيرة وسدادها محتم على الكل. عشان كدة يلزم تنظيم أهل الرياض وتكوين
الجالية، ليقودها ربان، لا يهمنا من يكون، أو كيف يكون وإنما يهمنا إلى اين سيقود المركب بسلامة.
شفت يا صاحبي البلاوي متلتلة كيف، وبوستك جاب شنو؟
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: حماد الطاهر عبدالله)
|
عزيزنا عبدالله
سلامات
والله يا أخ عبدالله أنا غايتو ش غبيرة ده حبيتو .
يا عبدالله أنا أول ما جيت نيويورك كنت زي الجماعة ديل .
أشتغلت بايع متجول في نيويورك . حفيت من الشوارع والحمد لله .
يا أخ عبدالله حاكم نيويورك السيد / جولياني
كان متكيف جدا لمنظر الاسواق في نيويورك
قال المهاجرين نقلو ا لوحات جميلة . من لبنان وجزر الكاريبي والمكسيك واليمن .
وقال القصة دي فيها اثراء للتجربة الانسانية والاقتصادية . يا أخ عبدالله نقل
العادات والتقاليد والسلوكيات حاجة كويسة .
وبعدين الناس دي كلها وراء لقمة العيش الي أن يفتح الله لنا جميعا
بالعودة من هجرتنا القسرية الطويلة .
شارع غبيرة جميل . وياهو صورة من السوق الشعبي الخرطوم .
أكعب شيء يا أخ عبدالله السرقة و القعاد بدون شغل . تحياتي يا عزيز
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: حماد الطاهر عبدالله)
|
اخونا حماد الطاهر يا دفعة
سلام وتحية وشوق شديد كمان
.
.
ياخي ائ سطر من مداخلتك دي بوست قايم بذاتو
وكمان داير نقاش مستفيض
يادوب نحن اسع في شارع غبيرة العام
وين يا منفوحة شارع العشرين
ووين يا الملز
والبنك ما مضمون امكن اجيبلوا سجون والفاك بالقانون
وكمان الحكاية جابت ليها سجون اياها دي ذاتا غربة ورقاد وطة
والله حكاية
تعيش شوية تشوف كتير
.
.
.
شوية شوية خلينا نركز في حتة واحدة
الجفلن خلهن اقرع الواقفات
.
.
مرورك دائما يسعدني اخي حماد وخلينا نشوفك ياخي
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: كمال علي ابراهيم)
|
Quote: وماتنسي مواعيد الصلاة المحلات بتقفل
تلقي الحريم
يسدو مكان الرجال في الفتره دي
الونسه لي رب السماء والكوراك مع الشفع
يمين تجي ماري بس تعرف كعابة النسيبه
والاخوان الاكلو قروشهم
ويمكن كلام اصلا الواحدة المفروض ماتقولو لي امها الولدتا خلي
لي عرفة دقايق الصلاة وفي السوق كمان |
واخواتنا الحريم بالعبايات الضيقة والقصيرة وملفتة شديد للانظار
والروائح الما عندها معنى للسوق بس غايتو الله إهديهم
والله الواحد بقى إحاول بقدر الإمكان عدم الذهاب للسوق بسبب الحاجات الما حلوة دي
بس إحتياجاتنا اغلبها متوفرة هناك
سلام يا ود البوش
وتحية عبرك لاختنا وصديقتنا بت ابو حريرة ليك وحشة والله
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
اخونا عبد الله ود البوش
بوست موفق
وموضوع اكثر توفيقا
وادارة حوار راقية وجميلة
جعلت من البوست فسيفساء حقيقية لموضوع ثرى وسمين
شارع غبيراء العام , ليس استثناء
بل انه امتداد لحالة غربة وتغرب , قاربت الوصول الى نقطة الهجرة والتهجير
انها نوع من حالات الرغبة فى نقل الشارع السودانى , الى حيث يكون السودان والسودانيين
حدث ذلك فى العتبة , وقبلها فى شوارع بورسعيد المصرية
وكانت شيبرد بوش مدينة الضباب , شاهدا عليه وما تزال
وحدثنى الناس عن وجوده فى حلب , وفى المسجد الأموى فى الشام
فى العراق وحتى فى حالات التجمع الطلابى فى نواحى الهند القارة
نحن نقلنا معنا كامل السودان , الى الزقازيق ثمانينات القرن الماضى
وشيخنا النمرود الساكى الجداد البطرى الذى بمغارب الدنيا , شاهد على ذلك
كان عندنا فى الزقازيق شارعا يسمى القومية
قبع فى آخره دار اتحاد طلابنا السودانيين فى الزقازيق
كانت لهذا الشارع قدرة عجيبة على التسودن صيفا , ومن ثم العودة الى (مصرنة ) خجولة ايام الشتاء
قال لى ابو عماد , وهو تاجر فلسطينى حصيف , افتتح سيوبر ماركت جل زبائنه سودانيون
انا اقفل محلى بالضبة والمفتاح , بدايات الشتاء , ولا اعود لفتحها الا عندما يبين اول سودانى هناك فى طرف شارع القومية
ولكن هذه الظاهرة الأنتقالية , لاشك وانها مصحوبة بمظاهر شوارع السودان , او قل اذا شئت الدقة
مصحوبة بسوالبه والأيجابيات
ولكن , ولسوء الحظ
فان مظهرا سلبيا واحدا , يكفى ليجب معه الف ايجابية
وتصنيف السلبيات , ماخلى للأيجابيات حاجة , اخوى ود البوش
فالصعوط والتمباك , يجلسان فى ذات الفترينة , مع القضيم والحرجل
وامراة تشتهى قطيعة النسوان , تسير جنبا الى جنب , مع امراة اخرى تصنع كسرة الفتريتة
لا ترتجى من وراء ذلك الا سترة للحال , وتربية للعيال
الحلاقة نحن ما من ناسها , وحرفنتنا فيها قليلة
ولكن احتكاك الحلاقين , ممكن يديك , جيل جديد من حلاقة الشعر
ظاهره سودانى , وباطنه من قبله (الأتراك والبنغال )
هلال مريخ مدورة كمان طوااااالى , لو فى مطعم ريم , ولا كمان مع الأقاشيه حق العباسية
زارنا زقازيقى صديق التحق بالجنسية الأمريكية منذ زمن
تشاكلنا وتعاركنا نحن مجموعة من (الزقازيقاب ) , بعد احتفال به مميز ومحضور
فى من يجود له بكسرة سودانية بملاح لأيوق فى بيته , اشتهاها صديقنا الأمريكانى
فكانت نتيجة الشكلة تلك , ان فاز مطعم ريم بفضل الكسرة والملاح اللايوق
حاتم جبارة , وهو اسم صديقنا الزقازيقابى الذى (امتطى ) الجنسية الأمريكانية
وهو على فكرة نفس دفعة وتخصص بيطرينا الساكى الجداد
اعلن انه من انصار مطعم ريم منذ ان ضاق كسرتهم , ولحس بصوابعه الخمسة ملاحهم اللايوق
وختمها بتحلية خليط بين رز وكاسترد اصفر براق , عليهم جميعا باسطة سمنتها تنقط
هل ترى معى هذه الفسيفساء يا ود البوش اخوى ؟؟
تقديرى وودى على ان اعطيتنى هذه الوجبة الدسمة من الكلام
وكل سنة وانت طيب ياخ
* بمناسبة كل سنة وانتا طيب دى , غبيراء وشارعها اكبر هم لبلدية الرياض فى عيد الخروف
هل تعلم ذلك ؟؟؟!!!
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: منصور عبد الرازق)
|
أخي الكريم منصور عبدالرازق
سلام وتحية واحترام
Quote: بوست موفق
وموضوع اكثر توفيقا
وادارة حوار راقية وجميلة
جعلت من البوست فسيفساء حقيقية لموضوع ثرى وسمين
|
تقييم الاستاذ يفرح تلميذه كثيرا فيجتهد .....
ومن حسن حظي كل ضيوفي نجوم تتللأ وتضئ الطريق فصاروا نورا على درب هذا البوست
افلا تراهو بدأ مظلما فيدخل نجمافيضيف شعاعا من المعرفة ويزيدا توهجا
حتى اكتملت النجوم وصاروا كلهم في فلك يسبحون فيضيئوا لنا الطريق العام
فنزيل اشواك الطريق ونضع وردا يشرئب ويقول انا سوداني
انا سوداني وافتخر
.
.
منصور شكرا جزيلا ياخي
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: ساميه حامد)
|
أختنا العزيزة ام الحسين
سلام وتحية واحترام
والقومة ليك يا بت بلدي
.
.
Quote: والله الواحد بقى إحاول بقدر الإمكان عدم الذهاب للسوق بسبب الحاجات الما حلوة دي
بس إحتياجاتنا اغلبها متوفرة هناك
|
هذا السوق به معظم احتياجتنا السودانية مافي مفر منو
طيب يا سامية اختي ما تخليهو حج وبيع سبح
اشتري احتياجاتك وحاولي تعديل المعوج بقدر ما تستطيعي ..
.
.
وتحياتك واشواقك اوصلها لاختك واختنا عفاف والوصل مستمر
مرورك دائما يسعدني ويشرفني والله
شكرا جزيلا
مع تحياتي لاخونا أبو الحسين
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: ود الباوقة)
|
الحبيب ود البوش ـ تحية لكل ولكل العتامنة ، وكل عام وأنتم بخير
قبل ساعات من مطالعتي لهذا البوست ، كنت أعايش إفرازات هذه الظاهرة غير اللائقة ، حينما اضطررت لأخذ المدام لشراء
بعض الحاجيات التي لن تتمكن من العثور عليها سوى في هذا المكان ، فما عليك سوى الصبر على النظرات التي تلاحقكم أينما حللتم
بصورة مقززة ـ ومن فئات عمرية مختلفة ،
الظاهرة أستفحلت بشكل غير محتمل وأعداد الفضوليين في تزايد ، وبالذات الذين يجلسون أمام المحال التجارية التي تستقبل عدد كبير من الزبائن
الظاهرة من شقين ـ الشق الأول ـ هو ما أشرت اليه أنفاً
أما الشق الثاني:
فهناك أماكن يجلس عليها ويرتادها شخصيات بارزة من مجتمع السودانيين ، ويدور فيها حوار بناء ، ونقاشات تتناول مواضيع مختلفة ـ
وهنا الحال يختلف ، لأن هذه الأماكن لا ترتادها الأسر ، وبالتالي جلوس هؤلاء لا يتأذى منه أحد ، وهذا جانب أيجابي من الظاهرة طالما لا أحد يناله ضرر من ذلك ،
كما أن المكان مناسب للجلوس مثل مطعم (ر.) القريب على مقابر العود ـ هذا لو سلمنا بان الجلوس في الطرقات العامة غير محسوب على سمعتنا كجالية تحظى بقدر من الإحترام والتقدير لدى شريحة كبيرة من أهل هذا البلد الذي أحسن وفادتنا ، والمقيمين فيه من الجاليات الأخرى
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: محمد علي البصير)
|
اخوي ود بلدي محمد علي البصير
السلام عليك يا ود البصير
والسلام على ود البصير
والسلام على ود حبوبة
.
.
Quote: فما عليك سوى الصبر على النظرات التي تلاحقكم أينما حللتم
بصورة مقززة ـ ومن فئات عمرية مختلفة ،
الظاهرة أستفحلت بشكل غير محتمل وأعداد الفضوليين في تزايد ، وبالذات الذين يجلسون أمام المحال التجارية التي تستقبل عدد كبير من الزبائن |
بصراحة هي مزعجة ولكن ينبغي التريث الشديد في تعاطيها والتعامل معها
أئ طلعة في الدقداق لوريك بنقلب طوالي وتبقى في حاو وهش
لانك بتتعامل مع ابناء جلدتك في الاغتراب وفي موضوع حساس
وفي هذه الحالة تعمل تحوطاتك وتضع كل السواتر والباقي تتموا طناش
ونحاول نجد علاج لهذه الظاهرة بطرق شتى دون تجريح
.
.
Quote: أما الشق الثاني:
فهناك أماكن يجلس عليها ويرتادها شخصيات بارزة من مجتمع السودانيين ، ويدور فيها حوار بناء ، ونقاشات تتناول مواضيع مختلفة ـ
وهنا الحال يختلف ، لأن هذه الأماكن لا ترتادها الأسر ، وبالتالي جلوس هؤلاء لا يتأذى منه أحد ، وهذا جانب أيجابي من الظاهرة طالما لا أحد يناله ضرر من ذلك ،
كما أن المكان مناسب للجلوس مثل مطعم (ر.) القريب على مقابر العود ـ هذا لو سلمنا بان الجلوس في الطرقات العامة غير محسوب على سمعتنا كجالية تحظى بقدر من الإحترام والتقدير لدى شريحة كبيرة من أهل هذا البلد الذي أحسن وفادتنا ، والمقيمين فيه من الجاليات الأخرى |
طبعا هذه متنفسات طبيعية لنخرج عبرها الهواء الساخن حق ذو الكفلي
.
.
شكرا جزيلا اخي ود البصير وخلينا نشوفك مهم جدا والله والتلفون على البروفايل
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: ود الباوقة)
|
Quote: وتحديدا مستلزمات القراريص وتوابعها
|
ما بتشوف الشاف يا عمر ؟
.
.
يوجد تخفيض على الطلح وحفر الدخان ....
.
.اخي عمر ود الباوقة
التسوق من هذا السوق يعود بالفائدة لاخوتنا السودانيين
تعال ومعك العيال لمزيد من التسوق ........
مرة يا عمر في يمني في الشارع دا ببيع عطور وعامل فيها بعرف اللهجة السودانية
اكورك .... ريحة حلوة شديد .... حلوة شديد يا زول
ولدي نادر مشى عليهو اهابش في الريحة
اليمني فاكرو سعودي
قال ليهو هادي خرابيط سودانيين اعطيك عطر زيييييييييين
نادر ولدي قال ليهو يا ابو علي انا سوداني ياخي
حاول اعالج الموقف ... اقصد يعني دي ريحة ناس شياب اديك ريحة شباب حلوة شديد
هههههههههه
.
.
شكرا ود الباوقا على مرورك الكريم
تحياتي
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
جاني ايميل ظريف من رجل ظريف اخونا بابكر حسن
.
.
Quote: تحياتى ود البوش : زارنى مؤخرا سعودى مطوع برفقة سودانى لشراء
ماكينات صناعة بلاستيك مستخدمة لعله زهرانى او غامدى
وبعد المجاملات حكى لى أن احد السعوديين كان
فى طريقه الى احد السعوديين فى حى غبيراء
دق الجرس خرج له واحد من السودانيين القادمين زيارة
فتح الباب قالوا اتفضل. السعودى قالو: دا ما منزل فهد الدوسرى؟
السودانى قالو لا لا والله. دا منزل سودانيين
واقوليك حاجة لاتتعب حالك هنا فى غبيراء لايوجد اجانب كلهم سودانيين!!!!
Babikir Hassan
|
شكرا جزيلا يا بابكر على هذه الابتسامة التي اضفتها لهذا البوست
اتوقع المزيد
تحياتي وتقديري
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: ود الباوقة)
|
الأخ ود البوش والأعضاء الكرام
تحياتي ،،
شارع غبيرا العام هو نموذج للسودان بتفاصيله المختلفة. زيارة الشارع والتجول فيه تجعل إحساسك يذهب بعيداً إلى هناك، فتتخيل نفسك حيناً في سوق أم درمان ، وحيناً في الحصاحيصا أو الأبيض، أو أي منطقة أخرى بالسودان... ولأن الشارع اكتسى شخصية سودانية خالصة، تجد الناس تتعامل مع المكان بنفس تعاملها مع أي مكان مشابه في السودان. يوجد مظاهر سالبة دون شك، لكنها لا تنفصل عن سياق الشخصية السودانية التي تكتسب سلبياتها وإيجابياتها وهي سنة الله في خلقه.
نأمل أن يساهم هذا البوست في التنبيه للظواهر السالبة ومعالجتها، لأن صورتنا في الخارج يجب أن تبقى جميلة ونظيفة...
مشكور ود البوش على هذه النافذة.
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: أيمن مبارك أبو الحسن)
|
حبيبنا ايمن مبارك
سلام وتحية طيبة
Quote: ولأن الشارع اكتسى شخصية سودانية خالصة،
تجد الناس تتعامل مع المكان بنفس تعاملها مع أي مكان مشابه في السودان |
هو سوق تتعامل فيه باريحية شديدة
لا تتعب في لهجة ولا طريقة تعامل
والتجار معروفين للكل
والله انا عادي جدا بدخل السوق دا ولا عندي ريال واحد
واشيل الدقيق واشيل اللحم والصابون والمعجون
والفول والطعمية وام فت فت
وكمان احول مصاريف للاهل في السودان
وارجعن براحتي
عايزين شنو اكتر من كدي
بس انا حارقاني القعدة في الوطا ... الصورة دي لازم تتعدل
.
.
شكرا جزيلا اخي ايمن وحاول الصور مرة اخرى
احترامي وتقديري لهذا الجهد المقدر
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: ود الباوقة)
|
أستاذنا عبدالله واثراءً للبوست هذا استطلاع صحفي قام به الشاعر علي حسن الريح ونشر بصحيفة الخرطوم وبه ما يستفاد منه بهذا الخصوص:
في حي غبيره بالرياض وهو من الأحياء القديمة بالعاصمة السعودية وتحديدا في قلب شارعها العام الذي ينبض بالحياة انتشرت عدة محلات متخصصة في الذوق السوداني تتعدد في تخصصها ولكن يطغي عليها الألبسة السودانية خاصة الثوب السوداني الذي يزين الواجهات في مشهد عرض جميل جذاب يوحي بفن العرض لجذب الزبائن كان ذلك ليلة عيد الفطر المبارك بعد ان ثبت وتقاطر الناس صوب السوق لشراء احتياجاتهم وسط هذا الكم من المحلات وما تعرضه من أشكال وماركات تجعل المتسوق في حيرة من أمره ويفقد تركيزه وقديما قال الشاعر تكاثرت الظباء على خراش ولم يدري خراش ماذا يصيد وهكذا بالفعل تكاثرت الثياب على النساء ولم تدري النساء ماذا تشيل .
كان المكان مكتظ بالمتسوقين في الشارع ووصلت في معيتي المصور الماهر ساحر الصورة بشير صالح لننقل لكم عبر هذه الصفحة بالقلم والصورة ما قمنا به من استطلاع عبر هذه المساحة عله يجد القبول .
ابتدرنا الحضور بسؤالنا عن رأيهم في أسعار الثياب هذا العام ؟
فأجابت إسراء صلاح حيث أفادت ان الأسعار مناسبة وليس هنالك ارتفاع شديد عن العام السابق ولكن كان للأخ حسن حسين رأي آخر حيث أجابنا بان الأسعار عموما مرتفعة وهذا العام ارتفعت كثير من الأسعار مقارنة بالعام السابق .
هل المعروض من الثياب اقل من الطلب ام يلبي الاحتياجات ؟
أجابتنا مريم بابكر بان المعروض في منطقة غبيرة يلبي الاحتياجات كما ان الأسعار ليس فيها مشكلة اما جواهر سعيد فقد كانت إجابتها بأنها لفت عدة أماكن ووجدت طلبها متوفر في غبيره والسعر ارخص .
العباية ودخولها على الذوق السوداني وانتشارها بين السودانيات الم يؤثر ذلك سلبا على الثوب ؟
أجابت رشيدة إبراهيم بان ذلك لم يؤثر لان الثوب السوداني يعد من احد مظاهر العيد كما انه يعتبر الزى المميز للمرأة السودانية ونحن نحرص عليه .
سألنا أنور إدريس معرض الرمال عن انتشار عدد المحلات في الفترة الأخيرة وزيادة عددها عما كانت عليه ان كان لذلك تأثير سلبي ؟
ولكنه أفاد على العكس من ذلك زيادة المحلات يعني زيادة العرض بل وزيادة الزبائن الذين يحضرون للتسوق عكس ان تكون الأماكن محدودة وهو يعمل في هذا النشاط أكثر من عشرين عام .
العيد في الاغتراب وبعيدا عن الأهل ليس له ذلك الطعم لماذا تصر النساء على شراء الثياب ؟
أجابت أمال احمد عباس قائله نعم نحن في الاغتراب ولكن الأسر هنا تتعارف والعيد مناسبة لكي يتزاور فيها الناس مع بعض لذلك نصر على شراء الثوب السوداني لكي نلبسه في هذه الزيارات والمعايدة .
مع كل موسم او أحداث تطلق أسماء على الثوب السوداني من أين تأتي هذه الأسماء وهل هنالك ماركات للثياب من حيث المنشأ ؟
أجابنا صلاح احمد معرض الرحاب بالفعل هي مع الموضة بمعنى ان المشتري السوداني متابع جيد للأحداث حول العالم وجميع الأحداث التي تحدث يتم إطلاق أسماء على الموديلات الجديدة المواكبة لتلك الأحداث فمثلا الآن يوجد لدينا ثوب اسمه زنقه زنقه وقبله كان هرمنا اما بالنسبة للصناعات ومصادر الإنتاج فهي من سويسرا وألمانيا وكوريا والصين والهند وباكستان وتايلاند ويتم مراعاة الذوق والمزاج السوداني حين التوريد .
كما أفاد معاوية عبد الرحيم العنبة بأنه يعمل منذ ثمانية عشر عام ودوما يختارون ما يناسب الذوق السوداني أما مصطفي فضل السيد بالمركز السوداني فقد أفاد بأنه يعمل لكثر من عشرين عاما وهم يختارون ما يناسب المزاج السوداني .
كثير من النساء قمن باختيار الثياب غالية الثمن الا يؤثر ذلك سلبا على الميزانية ؟
أجابنا عمر مدثر بنعم وقال بالفعل له تأثيره الواضح على الميزانية وقد يستمر الأثر لعدة شهور
اما صلاح منصور فقد أجابنا بأننا قد نضع في الحسبان احتياجات الأسرة من ملابس عيد وذلك مع بقية المصارف ونضغط الأولويات بعض الشيء .
يأتي العيد هذا العام وكثير من الأسر السودانية في الإجازة بالسودان هل اثر ذلك على السوق ؟
أجابنا بدر الدين عبد الله معرض أماسينا بالفعل هذا العام الإقبال بسيط وليس كالسابق مما اثر علينا كثيرا بالرغم من ذلك فان الأسعار كانت معقولة .
كما أجاب أسامه عبد الله كذلك بضعف الإقبال الواضح هذا العام من قبل الأسر لعدم تواجدهم .
اما عن لون وطعم العيد في الاغتراب عنه في السودان ؟
فقد أفادنا بابكر القدال محل العمري بان العيد في السودان له طعم مميز ولون خاص وذلك للتواجد مع الأسرة الصغيرة والكبيرة والزيارات المتبادلة بين جميع الأهل وخلق البرامج الترفيهية للأبناء والمعايدة ومعارف الصبا وصلاة العيد بين الأهل كل ذلك نفقده في الاغتراب وتظل المعايدة عبر الهاتف وقطعا لا تفي بالغرض .
هل يوجد إقبال على الملايات وبقية المفارش ؟
أجابنا محي الدين محمد يمني الجنسية محل لؤلؤة العالم بنعم وأفادنا بأنهم قد تخصصوا في الذوق السوداني فأصبحوا يوفرون جميع الاحتياجات السودانية من شراشف حسب الموضة ويوجد إقبال عليها في كل الموسم كما أشاد بتميز الأسر السودانية في التعامل وليس كغيرها من الجنسيات .
وعند سؤالنا عن الإقبال على محلات الجلاليب الرجالية والعمم والعراريق هل يوجد إقبال ؟
فقد أفادنا سمير فتحي محل الشمالية بان الإقبال كبير وجميع الزبائن يجدون ما يطلبون ولا يتمسك بالأسعار كثيرا حتى يخلق جو فرح للأسر كما أفاد احد الزبائن وهو على عبد السلام بان الأسعار مناسبة إذا كانت جلاليب او مراكيب حتى التراث السوداني القديم نقوم بشرائه ووضعه على الترابيز ليزين السكن .
والجدير بالذكر ان المحلات ظلت تستقبل الزبائن حتى آذان الفجر والشارع في حركة كثيفة حيث تجد الناس تتعانق مهنئة بعضها البعض بالعيد في لوحة جميلة من الود والإخاء بالرغم من الحسرات على البعد عن الوطن وعدم التواجد بين الأهل وقد التقينا بالإعلامي عبد الحي أبو زيد والتجاني محمود الذين عبرا عن سعادتهم وهم يرون جريدة الخرطوم تستطلع السودانيين ليلة فرحة العيد .
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: أيمن مبارك أبو الحسن)
|
تحياتي العزيز ود البوش
من خلال معايشة شارع غبيرة اماكن وناس اجد ان وجهات النظر هنا جميعها تحمل الكثير من الصواب لان الامر معقد جدا والنظر اليه يكون بعين الحدث لا بمجمل الصورة التي تجمع كل ماهو سوداني في حيز واحد ولكن يظل الاهم كما اورت وكذلك بعض الاخوة هو السعي نحو تشكيل وجه افضل وازالة سوالب العادات التي نخشى ان تذهب في اتجاه المسلمات
شكرا
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: Mohamed Abdelgaleel)
|
محمد عبدالجليل صاحبي المونساتي
سلام ياخ وطولة من ونساتك
.
.
نحن خلاص وصلنا مرحلة النبحي والسكلي في الكبيرة والصغيرة
يا ولد اطفي اللمبة دي
يا بت اقفلي الماسورة دي
.
.
اها شباب العزة ديل قالوا يا عمك انت اسكت بس
مش شارع غبيرة دا نخليهو ليك نضيييييف ومرتب
وماقصروا تب فكانت هذه النفرة
شباب العزة يا غالي اشيل اوطانو للعالي
نفيرو الديمة طوالي ... نفيرو الديمة يا غالي
او حبو .. اوو احبو .... دا طمبور بس مطور ودخل شركة شل
.
.
شكرا جزيلا محمد عبدالجليل وتحياتي واحترامي
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: محمد علي شقدي)
|
Quote: من خلال معايشة شارع غبيرة اماكن وناس اجد ان وجهات النظر هنا جميعها تحمل الكثير من الصواب لان الامر معقد جدا والنظر اليه يكون بعين الحدث لا بمجمل الصورة التي تجمع كل ماهو سوداني في حيز واحد ولكن يظل الاهم كما اورت وكذلك بعض الاخوة هو السعي نحو تشكيل وجه افضل وازالة سوالب العادات التي نخشى ان تذهب في اتجاه المسلمات
|
محمد علي شقدي صديقي العزيز
كلام موجز وكافي ووافي
وتبقى تضافر الجهود
.
.
شكرا جزيلا اخي شقدي
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: عبدالله ود البوش)
|
نجى لى قصة سلبيات الشارع
القربت تغطى على غرضه الأيجابى
اخوى ود البوش ومتداخليه الأعزاء
فسلبيات هذا الشارع
كما ايجابياته الأبتدائية
انعكاس لحالة , ورجع صدى لصوت
ينطلق من سوق الموردة
والعناقريب
وسعد قشرة
والسوق الشعبى
وسوق ليبيا
وسوق الجمعة , والسيت , والأتنين , وكمان الخميس
والسوق , يبقى سوقا
الم ترى وتسمع انه (يلم كل مخلوق )
حتى (صلاته ) , تبقى صلاة سوق
تفضل فيها ( الأخلاص ) , على (البقرة )
و(الفيل ) , على ( آل عمران )
والتفضيل هنا مرتبط , بالكم ومدة القراءة
تصلى فيه بسرعة
ولكن , تتسوق فيه , متمخترا تمشى الهوينى , كما يمشى الوجى الوحل
ولكنهم , مع ذلك , استمرؤا , قفعاد الواطة , التى هى اخت البشتنة , وشقيقتها التوأم
وهى ذات المظاهر , التى تجدها فى الأسواق ,
ولكن لأن الخير دائما ما يعم
بينما يتسم الشر بالخصوصية
فان قاعدة السوق هنا , تسير على نمط عكسى , وقاعدة مختلفة كل الأختلاف
فالذى يلبس عراقيهو ويتمختر بى سفنجته هناك , يكون مجرد سودانى , لا يتذكر منه الناظرون لا اسمه ولا شخصه بعد ذلك
وكذلك من يسىء الأدب , ومن لا يحترم قواعد الطريق
من يتسكع , ومن يتحاوم , ولا تجده فى آخر اليوم مشتريا ولا كيس صعوط , ولكنه وسم امة بالتسكع والتمحرك والبطالة
والصبى الى ضبطته المباحث صحبة اخوياء السوء , فاجبرت صاحبنا على الأنسلال من الشارع كله , وصم (فى عرف التعميم الشرانى ده )
كل حاملى الجواز الأخدر , بأنهم مروجون ومتعاطون للمكروه (عمدا )
افلا ترى انهم (فى غير ما شك يتعا طون الحرام ؟؟)
حتى وقوف السيارت على جوانب الطريق الضيق والمزدحم
يعطيك لمحة -يا اخوى يا ود البوش والمتداخلين - عن كيف يوقف السودانيين سياراتهم
وكيف يتعاملون مع قواعد المرور
لن اتطرق لمزيد ظواهر سالبة , تتجاوز قواعد السلوك العام
وتصل الى قواعد السلوك (الخاص ) , لأنها فى تقديرى تبقى ظواهر وحالات خاصة جدا , ولا يصح تعميمها
مع ان التعميم جاييك جاييك
كان ابيتو جاييك , وكان درتو برضو جاييك
لكن على الأقل , خلينا نتضارى منها , فى هذا البوست المفتوح على البحرى على الأقل
بقى ان نقول , ان هذا التعميم الذى اسهبت كما يبدو فى توضيحه
مع الأعتبار العرفى السائد , ان غبيرة وشارعها العام , هى قطعة سودانية فى بلد غير السودان
فيجب علينا ان نحرص على جعلها خالية من سلبيات سعد قشرة وسوق ليبيا
لأن المراقب الذى يقول فعل فلان كذا فى سوق الجمعة
يكتفى بالقول , ان سودانيا او سودانية فعلت كذا وكذا , فى شارع غبيرا
فتأمل معى الفرق الكبير !!!
* انت صديق الموج ده مالو يا ود البوش ؟؟ سلام كبير لى ود الموج , ود خالتك حسين البشير , قال لى انك كنت بى عافية شوية
| |
|
|
|
|
|
|
|
|
|
Re: شارع غبيرة العام بالرياض بشتنة وقعاد وطة (Re: منصور عبد الرازق)
|
Quote: يعطيك لمحة -يا اخوى يا ود البوش والمتداخلين - عن كيف يوقف السودانيين سياراتهم
وكيف يتعاملون مع قواعد المرور
|
.
.
عزيزي منصور
تحية وسلام
مداخلة سمينة تغدي فكينا والفضلة تجينا
وهي خارطة طريق لتعديل طريق غبيرة
.
.
قبل شهرين تلاتة مشيت العليا مع واحد اخونا سوداني بغرض توظيفه في شركة هناك
وقفنا عرباتنا الاتنين في موقف الشركة وطلعنا على السعودي صاحب الشركة
رحب بينا ووعدنا خيرا وطلعنا وهو طلع معانا طوالي لانو اصلا كان جاي لينا
يا ريت لو ما نزل معانا
ماشي على عربيتو .... والتفت الينا قال دي عربية منو ؟
زولنا قال دي عربتي انا .....
فرد عليه آسف ما اقدر اشغلك معانا ما دام هذه طريقة وقوفك
.
.
بالطول ... بالعرض .... وبالجنبة كمان هكذا الوقوف بشارع غبيرة العام
.
.
| Quote: * انت صديق الموج ده مالو يا ود البوش ؟؟ |
صديق الموج حبيب يا منصور
فقد وضع شامة لتزيد هذا الوجه جمالا
.
ولا اقوليك النجيضة نكاية بصديق لدود مشترك
| |
|
|
|
|
|
|
| |
عبدالله ود البوش
الطيب عبد الرحيم خلف الله
محمد المسلمي
حيدر حسن ميرغني
منتصر عبد الباسط
Al-Shaygi
عفاف أبو حريرة
صلاح غريبة
هيثم التوم
احمد التجانى احمد
Zomrawi Alweli
Asim Fageary
الامين موسى البشاري
معتز زيزي
الصادق صديق سلمان
osman righeem
كمال علي ابراهيم
أسامة البلال
Osman Musa
حماد الطاهر عبدالله
ساميه حامد
الصادق يحيى عبدالله
محمد عبدالرحمن محمد
منصور عبد الرازق
محمد علي البصير
أيمن مبارك أبو الحسن
محمد علي شقدي
Mohamed Abdelgaleel
صديق الموج
فيس بوك
تويتر
انستقرام
يوتيوب
بنتيريست