|
|
 وصية اب شمالي لابنه دقوه جنوبيون دق العيش
|
ضمن المكالمات العادية مع العيال في السودان
كانت هذه المكالمة غير العادية مع ابني فريد
كيف ان شاء الله كويسين كل شئ تمام
اتعشيتو ولا لسع
اتعشينا وين يا با الليلة نادر لاقوه اربعة جنوبيين ودقو دق العيش
وياريت لو بقت علي العلقة دي بس قالوا ليهو كل يوم بنتلقاك بهنا ونجلدك
.
.
كدي اول حاجة يا فريد طمني عليهو اسع اديني ليهو انكلمو
لا لا مافي حاجة كويس ما عندو عوجة واسع في الحمام
وهنا زادت ضربات قلبي ( قلب الوالد كعب ) والبقولو قلب الوالد
ما تشوفو العين يا رب زي ما بتقول امي الله اديها العافية واطول عمرها
انت يا ولد داسي علي حاجة انا ما برتاح الا اكلمو
كورك ليهو جوة الحمام خليني اسمع صوتو
والله غايتو يا يابا بتبالغ دايرني اتكلم مع زول في الحمام
ياخي اسمع كلامي ودق ليهو الباب
كو كو ونادر من جوة باعلى صوته ... يا ناس ياهو في الحمام لاحقننا يعني نمش وين
هنا اطمئن قلبي وانتهت الهواجس ....... وعدت لفريد بنفس بارد
اها يا فريد المشكلة شنو شكلة عادية وانتهت ما تدي الموضوع اكبر من حجمو
يا ابوي ديل اجانب وكمان استهبلوا علينا بلغة الجنا كان اجنبي ويعرف التعامل بهذه اللغة
يا ولدي اسمع كلامي كويس وهاك العبارة دي اول حاجة ختها حلقة في اضانك
احبب حبيبك هونا ما عسى ان يكون عدوك يوما ما
وابغضك عدوك هونا ما عسى ان يكون حبيبك يوما ما
يا ولدي حتى الان نحن ما مصدقين ان جنوبنا الحبيب انفصل وهنا نزلت دمعة مني غصبا عني
وشعرت فقط في هذه اللحظة الم الانفصال .......
ومواطن الجنوب العادي مثلي ايضا غير مصدق بان انفاصلا قد حصل
ومازال يتعامل مع الشمالي بطريقتو القديمة وبنفس عزة النفس ويشاكل واضارب عادي
ولبعدين دي فرصة لاخوك نادر يتعلم الشكل يعني تدريب مجان
وهو ما عامل لينا فيها بتاع تاكدنو في الرياض طيب الفرصة جات لعندو بيان بالعمل .
يا ولدي انت كبير البيت وانا خليتك في العقب ومطمن على اخوانك بان تواصل ما ربيتكم عليه ......
لاتحقد
لاتنتقم
لا تتعنصر
حب كل الناس يحبوك
والله احبك
وتعيش الفانية وترحل عنها وانت مرتاح وتقابل ربك بقلب قوي
الله يحفظم يا ولدي
والليلة اهم حاجة تدي سيد اللبن حقو .... اتصل علي قال داير مية وعشرين الف
والمبادئ غالية ترخص امامها متاعبنا الخاصة يا ولدي ......
|
|
 
|
|
|
|
|
|
|
|
Re: وصية اب شمالي لابنه دقوه جنوبيون دق العيش (Re: عبدالله ود البوش)
|
ربنا يحفظ نادر حبيبي كم افتقدهم
نعم الوصايا يا ود البوش
والشباب في العمر دا اصلهم بتعرضوا لاشياء من النوع دا
زمان اتدكر ونحن في المدارس الاوليه درافين
ما بنمش الا كارات
لانه لو اتلاقينا مع بنات مدرسه تانيه
الكبع بقع
عشان كدي ما بنمش الا في جماعه
والبتنكرم من اخواتها لاي سبب ياها الدقه محمداها
ونفس الحكايه لو لقينا واحده مطرفه منهن وقالت كاني ماني بتندق ياها شقاوه الشفع
وبالنسبه للاولاد قد تمتد الي مرحله الشباب الباكر .
| |
|
|
|
|
|
|
|
|
|
Re: وصية اب شمالي لابنه دقوه جنوبيون دق العيش (Re: الامين موسى البشاري)
|
ود البشاري يا تور الجواميس اب رقادا لخ
Quote: وينك أنت يا زول من ديك وعيييييييييك
|
والله يا اللمين اخوي دخلت في معمعة زي الشرا في القندول
انتو اصلو ما بتتفقدوا الواحد كلو كلو دي خوة شنو اللذيذة دي
.
.
اها النتاحة هجست ولا العقرب في نتحيها ؟
اللمين مشكرين وضروري نلتقي
Quote: وطالما أنت ترعاهم بمثل هذه الوصايا فلا خوف عليهم
ولا هم يحزنون....
|
ما جبتا حاجة من عندي جيرت ليهم وصية الجدود
تحاياي ياخي جننتا اليايات جن
| |
|
|
|
|
|
|
|
|
|
Re: وصية اب شمالي لابنه دقوه جنوبيون دق العيش (Re: doma)
|
اختنا الغاليو زينب الفحل
الشوق كورجة
.
.
طولة شديدة وانقطاعة للظروف ولاعبين عكس الهواء ومنتظرين الهاف الجاي
عشان احاحي معانا ...
ورباية العيال صعبة
ودائما وصية الوالدة ترن في اذني
تربية العيال زي قرش الحصحاص
.
.
وعودا حميدا يا دومة حبيبة الكل
مع تحياتي وتشكراتي
| |
|
|
|
|
|
|
|
|
|
Re: وصية اب شمالي لابنه دقوه جنوبيون دق العيش (Re: محمد فرح)
|
Quote: لاتحقد
لاتنتقم
لا تتعنصر
حب كل الناس يحبوك
والله احبك |
لو وعاها السودانيون منذ امد بعيد لكانت بلدنا يشار اليها بالبنان ...
ولكن .....آآآآآآآهـ .......... آآآآآآآآآآخ ..... وتسلم يا أخونا عبد الله ....
يا ترى هل الوصية هذه أيضا ستكفل لنا عودة المليون ميل مربع ... يا ليت الجميع يطبقها حتى لا نفقد الباقي الذي تدور عليه الدوائر ...
| |
|
|
|
|
|
|
|
|
|
Re: وصية اب شمالي لابنه دقوه جنوبيون دق العيش (Re: ismeil abbas)
|
Quote: : انتو اصلو ما بتتفقدوا الواحد كلو كلو دي خوة شنو اللذيذة دي
.
أخ/عبدالله تحياتى.....ربنا يحفظ ألأولاد..وزى ماقالت ماما دومة ده حال الشباب فى هذه المرحلة.. |
الزعيم اسماعيل
سلام وشوق
وبصراحة مقصرين معاك لانك دائما تتفقد الرعية
لكن الرعية غبيانة ساهي اعذرا
| |
|
|
|
|
|
|
|
|
|
Re: وصية اب شمالي لابنه دقوه جنوبيون دق العيش (Re: عبدالله ود البوش)
|
Quote: يا ولدي انت كبير البيت وانا خليتك في العقب ومطمن على اخوانك بان تواصل ما ربيتكم عليه ......
لاتحقد
لاتنتقم
لا تتعنصر
حب كل الناس يحبوك
والله احبك
وتعيش الفانية وترحل عنها وانت مرتاح وتقابل ربك بقلب قوي
الله يحفظم يا ولدي
والليلة اهم حاجة تدي سيد اللبن حقو .... اتصل علي قال داير مية وعشرين الف
والمبادئ غالية ترخص امامها متاعبنا الخاصة يا ولدي ...... |
والله يا ود البوش ولدك كان طبق الكلام البتقول فيه دا معاتو نسف لغة العنصريه
والهامش والعبيد والاسياد والمشير والغفير وبقينا كلنا اهل ل بلد واحد اسمه السودان
لكن هل اهل الجنوب واهل الغرب واهل الوسط واهل الشرق والريس زات نفسسو
يقدروا يتخلو من هذه العا ده بمجتمعنا السودانى
| |
|
|
|
|
|
|
|
|
|
Re: وصية اب شمالي لابنه دقوه جنوبيون دق العيش (Re: خالد المحرب)
|
Quote: لكن هل اهل الجنوب واهل الغرب واهل الوسط واهل الشرق والريس زات نفسسو
يقدروا يتخلو من هذه العا ده بمجتمعنا السودانى |
خالد المحرب
سلام وتحية
والله يا خالد لمن مشيت اطلع الجنسية لولدي دا ذاتو من السفارة في الرياض
وقتها كان في ثالثــــــــــة ثانـــــــــــوي
وبدأ بنفسه يعبي في الاورنيك
كتب اسمه رباعي وبعدا طوالي للاسف خانة القبيلة
اتلفت علي وقال القبيلة شنو ؟ علما بان فريد دا بعرف ملاح ام تكشو وبعرف الحمت رمت
قلت ليهو يا سلام علي انا دا الماورتيك سجم الرماد دا خليها فاضية
انشوف الضابط بقول شنو ؟ وعلي الطلاق جنسية بقبيلة ما دايرنهالان الجنسية سوداني وبس
الضابط : قبيلتك شنو يا فريد
فريد : ما عارف
الضابط ملتفتا علي : قبيلتكم شنو يا عبدالله
انا عارف لكن ما داير ولدي اكون متخلف زي وزيك
الضابط منطرا عيونو من راسو وزعل في حكاية انو متخلف
وانتقم لنفسه بان اخرنا حتى اليوم التالي وطلعت الجنسية
لكن ما عارف كتبوا في خانة القبيلة شنو ؟
كان كتبوها صاح اشاكيهم والاقيهم يوم الحق عز وجل
وكان كتبوها غلط برضو اشاكيهم والاقيهم يوم الحق عز وجل
لانو فريد اول ما طلع من السفارة اموت واحيا عشان اعرف قبيلتو شنو ؟
لانو عرف انو دي حاجة تهتم بها الحكومة .
| |
|
|
|
|
|
|
| |
عبدالله ود البوش
معاوية المدير
doma
الامين موسى البشاري
عبدالرحيم أبراهيم العبيد
محمد فرح
othman mohmmadien
ismeil abbas
محمد عبد الماجد الصايم
صديق الموج
خالد المحرب
فيس بوك
تويتر
انستقرام
يوتيوب
بنتيريست