|
|
|
 Re: حولا! الزول دا كان وين? الفنان نجم الدين الفاضل..فيديو حديث, ليالي (Re: وليد عبد اللطيف)
|
Quote:
إبداع والله يا ود الخليفة
إبن الوز عوام
شكرا على الفيديو....أول مرة أستمع لخالد |
سلام , حبيبىَ وأخوىَ العزيزين كوستاوى وود الخليفه.
الأخ كوستاوى
أهو هنا أخونا ود الخليفه ببرهن ليك أنو أهلنا الصوفيه أهل طرب ومواكبين
عشان كده تجد عندهم الطار والنوبه والطبل والنحاس وقلوبهم عامره بالمحبه.
وبالمناسبه قصيده ليالى الأنس من تاليف أبونا وشيخنا الشيخ الجيلى الشيخ
العباس والذى هاتف قلبه نداء محبة إحدى حسان الباديه, فطلب من سائقه ود
باقير أن يذهباالى ذلك الوادى الطيِب بغرض إتمام اللقاء ولكن لشدة الشفقه واللهفه
ضلَ ود باقير الطريق:-
ياد باقير ما قلت خبير.....
طبعا وواضح جدا الأثر الصوفى فى هذه الأغنيه
ليالى الأنس لذاذ بلحيل...رتوع الساحه الخاتيه رحيل
يا ود باقير ما قلت خبير.., وين السلمه وين درب البير
أه ياشيخنا أريت الشفقه تطير...أهو داك الوادى ودرب البير
بحن قلبى الكان بولاد...كحنين الوالده على الأولاد
حنين اللوب فكر تيلاد...للنفسو مسك وعرقو قلاد
وفى معرض آخر من الأغنيه تجد:-
وين الديفات وين بت نايل... والدنيا نعيم عرضا زايل.
رحم الله أبانا الشيخ الجيلى الشيخ العباس والذى ترك أثر واضح للحياه
فى أم ضواًبان والذى تبرع بداره الواسعه لإنشاء أول مدرسه تفتتح فى
أم ضواًبان.
تحياتى وشكرى كذلك للفنان الكبير نجم الدين الفاضل والذى أدى الى إشهار
هذه الأغنيه الخالده عبر وسائل الأعلام.
وبالمناسبه الأخ نجم الدين زاملنا لفتره فى السبعينات فى بنك السودان بالخرطوم.
شكرا لكم جميعا مع ودى.
| |
 
|
|
|
|
|
|
|
|
Re: حولا! الزول دا كان وين? الفنان نجم الدين الفاضل..فيديو حديث, ليالي (Re: Kostawi)
|
الاخ كوستاوي
كيفك
شكرا على هذه الاغنية الجميلة والرائعة حقا ( ليالي الانس)
ات عارف يا كوستاوي نجم الدين وحسين شندى وقبلهم باعوام قلة عبد الوهاب الصادق وابو عبيدة حسن والراحل المقيم عبد العظيم حركة هلاء هم الفنانون الذين صادفوا بدايات تذوق جيلنا للفن فعاش معهم تلك الاغاني وظلت خالدة في وجداننا فمتى ما سمعناها طربنا لها وتعيدنا الى ايام الزمن الجميل .
| |
|
|
|
|
|
|
|
|
Re: حولا! الزول دا كان وين? الفنان نجم الدين الفاضل..فيديو حديث, ليالي (Re: الطيب شيقوق)
|
Quote: مولانا الصديق الحبيب عبدالله بعد ما سمعت منك اليوم تلفونيا أظن إنو عندك الكثير عن هذه الغنية (البتشبه المدحة) أو ربما تكون مدحة ....و خاصة و أنت نسبتها للشيخ الجيلي أظن السيد القارئ يريد المزيد من المعلومات عن هذه الغنية/المدحة ما علاقة هذه الغنية/المدحة بالفنان نجم الدين الفاضل ود حلتنا الكبيرة في أم درمان (مكي /ود نوباوي)..... و زي ما عارف هذه أحياء لها دور عظيم في نشر ثقافة الغنا الصوفي و الكروماتي معا... هات هات يا مولانا!
|
شكرا لك أخى العزيز نصرالدين
فى الحقيقه هنالك عدد من أهلنا ناس أم ضوا بان يسكن فى ودنوباوى وعلى رأسهم أبناء وبنات
وحفدة الرجل الخيِر المرحوم الشيخ العبيد أحمد شضوان والذى كان له الفضل فى إفتتاح المدارس
فى أم ضوابان وبالذات مدرسة البنين والتى إفتتحت بمنزل الشيخ الجيلى مؤلف أغنية ليالى الأنس.
كما تجدر الإشاره أن زوجة الشيخ العبيد أحمد, أستاذة الأجيال ورائدة تعليم البنات فى السودان الأستاذه فاطمه بشير كانت أول من
أشرفت وقادت مدارس البنات فى أمضوابان.
حدثنى أحد أفراد هذه الأسره عن إرتباط الفنان نجم الدين الفاضل به وعن تعلقه بهذه الأغنيه
وعن مدى إرتباطه بأغانى تراث أهل أم ضوابان.
| |
|
|
|
|
|
|
|
|
|
Re: حولا! الزول دا كان وين? الفنان نجم الدين الفاضل..فيديو حديث, ليالي (Re: الطيب شيقوق)
|
يا هجام سلام فى كلام ليك ولي مولانا عبدالله
واهو النص كامل غير منقوص حتى الما اتغنى
و يا مولانا عليك الله اشتغل لينا فيهو زنقه
زنقه لانو جواها كلام فى كلام زى ما قلته ليكم.
وتحياتنا للفنان صاحب الصوت الغريب الجمال
نجم الدين الفاضل .
ليالي الأنس لذاذ بالحيل
رتوع الساحه الخاتيه رحيل
بسم الله وصلت السيال
و ديك ام كتره وهم وخيال
في ساعة و حين طوينا اميال
نصل حكرو ال ما ربي عيال
هود يا اب عرقوب ديل التمدات
واختم النابتي إيديك مادات
داك بلد أب ريش في جمال شادات
صيح بي فوق فوت الحادات
قام بي معجول
و يطمح بي كيف التنور
فوت القلاحيب أغشي عد النور
واقل شلخا في الظلمه أب نور
ال في السيال أديتو قفاك
و في ود راوه شوية كفاك
القاصداك مي خاتياك
فر بجناحك قفي الشايفاك
ود عوض سيد وأولادو سلام
و أغشالي الحر بدورلي كلام
الليل أمسي و الدنيا ظلام
و الشمس طاحت إن بت بنلام
ال لهجو عسيل
في القري والريف مالقيتلو مثيل
في بيتو ملك علي جيلو مدير
والعنبر فاح في الوادي أب سيل
يحن قلبي ال كان بولاد
كحنين الوالدة علي الأولاد
كحنين النوق بكر تيلاد
لي العرقو مسك و نفسو جلاد
وين يا أم ضمير ظعنك شايل
وين الديفات وين بت نايل
براق القبله صبح شايل
و الدنيا خراب العرض الزايل
وين يا أم ضمير ظعنك شد
وختم أب زليق بلد العمده
يبكوا الصابراب جفوا الغمده
والنار في قرين خمدت خمده
العفرت شال تبع الأمطار
للأخدو سمح سكن أم محار
دعاشهم هب مع الأسحار
أنا نومي بصيص ودموعي نهار
يا ود باقير ما قلت خبير
ضهبتني من وادي الإكسير
فكري إشتغل خاني التعبير
وأنا شايل قلبي ال ماهو كبير
يا ود باقير ما قلت خبير
وين الفاصل و وين ام جير
داك الفاصل و ديك أم جير
وصلت يا شيخنا الشفقه تطير
ياخ دا شعر موغل في الصوفيه و المعانى
الشعبيه و اللغة و محنتو زايدة .
شكراً يا هجام للذكرى الله يدخلك الجنة .
| |
|
|
|
|
|
|
| |
Kostawi
ود الخليفه
وليد عبد اللطيف
ABDALLAH ABDALLAH
الطيب شيقوق
سفيان بشير نابرى
فيس بوك
تويتر
انستقرام
يوتيوب
بنتيريست