كتب الكاتب الفاتح جبرا المتوفرة بمعرض الدوحة
|
|
 الرحمتات
|
دي من العادات الجميلة القربت تنقرض
حتى الاسم نفسه يكاد يغيب عن ذاكرة الكتير من الناس
وفي ناس اصلو ما سمعوا بيهو كلو كلو خاصة مواليد 89 وليجاي
ويلاحظ ان معظم العادات الجميلة بدأت تنقرض من 89 وليجاي السبب شنو ما عارف
.
.
الرحمتات هي ضبيحة في اخر جمعة في رمضان وفيها الناس توسع على رقبتا شوية
بان يتم الاشتراك كل مجموعة في الحلة لشراء بهيمة وذبحها وتقسيمها بينهم
الرحمتات مشتقة من كلمتين الرحمة تأتي
.
.
يا ربي في ناس لسع عندهن رحمتات في الجمعة اللتيمة الجاية دي
ولا خلاص الرحمة قلت ؟ وان شاء الله ما تنعدم
|
|
 
|
|
|
|
|
|
|
 Re: الرحمتات (Re: عبدالله ود البوش)
|
الرحمتات وبليلة الاربحاء لكن يا عبد الله على حسب علمى الرحمتات
زى صلاة الاستثقاء بسوها عندما يتاخر المطر كدى ادنى رايك فى كلامى
وبجيك راجع
| |
|
|
|
|
|
|
|
|
|
Re: الرحمتات (Re: خالد المحرب)
|
مرحب بشيخ العرب
.
.
عشان كدا انا كتبت البوست دا لانو متاكد في ناس كتار بدو ينسوها
قول واحد اسع انت قربت تنساها
اخر جمعة في رمضان يا خالد الناس تجمع قريشاتها
وكل تلاتة اربعة بيوت يشتروا ليهن عتود ولا سخلة
.
.
لا اعتقد تكون عشان المطرة
.
.
المطرة كانوا بسو ليها كنيش
كنيش كنيش تجيب المطر والعيش
وكنيش دا اياها بليلة العيش وبنجضوها بالبعر هلا هلا
بعدما تنجض ناكل منها ونشتت منها في السماء
ونقول كنيش كنيش تجيب المطر والعيش
اما بليلة اللربحا دي حقت الخلوة
يا شيخ العرب ات طولت من البلد
وناس طال عمرك ديل سهكو ذاكرتك سهك
| |
|
|
|
|
|
|
|
|
|
Re: الرحمتات (Re: عبدالله ود البوش)
|
Quote: المطرة كانوا بسو ليها كنيش
كنيش كنيش تجيب المطر والعيش |
الله ياخ رجعتنا سنين عددا القهقرى
والله يا عبد الله زمن اسطورى
بلاهى شفت العنبلوك ولا السخله
لمن يضبحوها كلنا بنكون مبسوطين
عشان نلقا لينا كضم واحد بتاع لحم
وفعلا انا اذكر كنيش تمام التمام
الزمن داك كنا بنعلب الكار
وبعد مايجى المطر نسوى الجبين
بضم الجيم والله ياعبد نسيتو فى حاجه بتتعمل
عشان اللبن يبقا زى الزبادى يعنى يجمد شنى بلاهى
| |
|
|
|
|
|
|
|
|
|
Re: الرحمتات (Re: خالد المحرب)
|
Quote: وبعد مايجى المطر نسوى الجبين
بضم الجيم والله ياعبد نسيتو فى حاجه بتتعمل
عشان اللبن يبقا زى الزبادى يعنى يجمد شنى بلاهى |
ان ذكرت الجبين فلابد ان تذكر معه لبن الحجر
.
.
تضاف بذور الحنضل للبن فيصبح جبين فبذور الحنضل تجبنه
وفي بعض المناطق تضاف بذور الحميض فتحمضه
شفت كيف
اما لبن الحجر فيسخن الحجارة لمن تبقى حارة
وتصب داخل الاناء الذي به اللبن فيخليه اسوي كحا بو
.
.
Quote: لمن يضبحوها كلنا بنكون مبسوطين
عشان نلقا لينا كضم واحد بتاع لحم
|
وبعضهم كان يتمنى ضلفا او حتى ابو البعار
| |
|
|
|
|
|
|
|
|
|
Re: الرحمتات (Re: عبدالله ود البوش)
|
أخي عبد الله
رمضان كريم - وكل عام وانت بألف خير
طبعاً عادة الرحمتات من العادات الجميلة ، وهي تدل دائماً على مجتمع التكافل عندنا
فالفكرة إنو لما تذبح ذبيحة في الفريق بغض النظر من أن كيف تم شراؤها لكن الهدف
الأساسي إن كل الناس يستطعمون ويأكلون منها من أسهم بالمال ومن لم يستطيع أن يساهم
وهذه هي عظمة مجتمعنا - مجتمع النفير والتضامن والتعاضد - المجمع البسيط البرفض الشين
ويتقبل الزين وبالجملة
وأظنك إنت عارف السبب في فرتقة الملمات منو ولي شنو
فياخي ما كبر اللفة ساي تعطشنا
دمت بألف خير
| |
|
|
|
|
|
|
|
|
|
Re: الرحمتات (Re: نورالدين بابكر بدري)
|
اخونا نور الدين بابكر
رمضان كريم
وكل عام وانت بخير
Quote: وأظنك إنت عارف السبب في فرتقة الملمات منو ولي شنو
|
عادات زي دي يصعب على ابليس ان ينسينا اياها
فاما وانه قد حصل
الجفلن خلهن اقرع الواقفات
بالبندقية فان لم تستطع بالضقلة والعكاز المضبب
.
.
نور الدين شكرا جزيلا ياخ وتصوم وتفطر وتعيد بجلابية مشتخة
| |
|
|
|
|
|
|
|
|
|
Re: الرحمتات (Re: عبدالله ود البوش)
|
سلام يا ود البوش
ورمضان كريم .
يازول ها انت بصحك !!!
هسي القروش هي ذاااااته ويني عشان يجمعوها
و يشتروى بيها بهيمة يقسموها بينهم!!!!؟
الرحمتات دي يا عزيزي خلاص انقرضت أو قول
بقت شبه معدومة وبقت بدون بهيمة تنضبح
وتتوزع ... وحاة الله من زمن طوووويل بقى
القادر يشتري كيلو للحمة لي يوم الرحمتات
دا بيشتريهو و الكيلو دا ذاااااتو يقسموهو
علي تلاته جزء شية ودي تطلع في صينية الرجال
للشارع وجزء للشــرمــوط بتاع بكرة أو بعدو
وجزء للعشاء بالليل أو إي حاجة كدا.
غايتو نحنا ناس حلتنا ديل بيفطروا في الشارع
وكل سنة من زماااان عارف انو البيعرفو الرحمتات
فيهم اربعة أسر من جيرانا وبس ... علا السنة دى
اظنو نحنا ذاتو حننسى الرحمتات .
شكراً ليك
ودمت.
| |
|
|
|
|
|
|
|
|
Re: الرحمتات (Re: سفيان بشير نابرى)
|
اخونا سفيان
سلام وتحية ورمضان كريم والعيد مبارك
.
.
كويس انو الرحمتات في ناس مذكرنها
وانت واحد منهم وعشان ما تنقرض يا سفيان لبعدين ساعة الفطرة
قول لناس قعدتكم الرحمتات كيف يا جماعة ؟
بالله دي وصية والوصية في الذمة ائ زول يقرأ البوست دا ساعة الفطرة
اونس جماعتو بالرحمتات ولو كان ما بعرف اونس بس اقول يا اخوانا الرحمتات
كيف ؟ وبعد كدا انا متأكد الجماعة ح اقول يا سلاااااام ياخ
بس خلونا نحي ذكرى الاشياء الجميلة عشان يا سفيان لمن تجي القروش تكون موجودة ما تكون راحت
وانتهت كلو كلو
شكرا سفيان للاضافة الجيدة
شكري وتقديري
| |
|
|
|
|
|
|
|
|
|
Re: الرحمتات (Re: عبدالله ود البوش)
|
جدو ود البوش.. والله طلعت راجل تراثي..
نحنا بنتذكر الرحمتات..
لحدي قريبات دي..
وكنا بنسميها (الحارة).. حتى عندها نشيد مخصص..
الحارة ما بردت..
ست الدوكة ما مرقت..
ربنا يرحم أمواتنا جميعاً.. ويغفر لهم..
| |
|
|
|
|
|
|
|
|
|
Re: الرحمتات (Re: أيمن دياب)
|
هلا ود البوش
وعساك من عواده
الرحمتات او الرحمة اتت فعلا هي في الجمعة اليتيمة
ممكن الناس تتشارك في خروف او تعمل توسعة في ذلك اليوم
وما زلت اذكر الاطفال
وهم يتغنون
الحارة ما بردت وست الدوكة ما برزت
| |
|
|
|
|
|
|
|
|
|
Re: الرحمتات (Re: khaleel)
|
أبو الخل يا جميل
رمضان كريم
وكل سنة وانت طيب
والعيد مبارك عليك
.
.
ممكن نحي هذه العادة الجميلة بابسط ما يكون
ان شاء الله جدادة
او حتى جوز فراخ
بس تكون موجودة بيننا او حتى نتونس بيها
ونسة ساهي
واكرر رجاي كل من يقرأ هذا البوست ان يتونس الليلة ولا بكرة بالرحمتات مع ناس فطرتو
بس ان شاء الله الواحد اتمغى كدي بعد الفطور واقول الرحمتات
طوالي بتعمل ريفريشن للذاكرة وعمك الجنبك ح اقول يا سلااااااااااام
.
.
شكرا جزيلا ابو الخل وتحياتي والبركات تغشاك
| |
|
|
|
|
|
|
|
|
|
Re: الرحمتات (Re: أيمن دياب)
|
ايمن دياب
تحيات وسلامات
.
.
| Quote: ربنا يرحم أمواتنا جميعاً.. ويغفر لهم.. |
اها دي انا كنت ناسيها
اشكرك لانك ذكرتني بان ثواب هذه الضبيحة يعود للميتين من اهلها
.
.
اتمنى الا تنقطع عنا الرحمات يا ارحم الراحمين
شكرا ايمن لكن ما عصرت علي شديد ياخي
لسع بدري على الوجل
| |
|
|
|
|
|
|
|
|
|
Re: الرحمتات (Re: Mayada)
|
الاخت العزيزة ايمان
رمضان كريم وتصوموا وتفطرو على خير
والعيد مبارك عيكن وان شاء الله اكون سويتو الكعك
دي ذكرتني كورة الطلس المكتوب على غتايتها رمضان كريم
.
.
المجتمع كان متراحما
متكافلا
الواحد اجيك في بيتك جوة البيت واديك اللحم بالقوة
والله ما تشيلوا اضاربك عديل كدا
لانو ما بعرف ياكل براهو لازم اشارك الناس معاهو
اللقمة كانت موزعة بالتساوي يا ايمان
تحياتي وسلامي وشكري وتقديري
| |
|
|
|
|
|
|
|
|
|
Re: الرحمتات (Re: طه إبراهيم عبد الله)
|
طه ابراهيم
سلامات ومشتاقين
بقت مكشوفة برا غتاية
.
.
لكن ات بالذات تعال راجع للرحمتات دي
شارك
اضبح
اسلخ
قسم الكيمان وام تلاتة
.
.
كدي اصلو ما مقبولة منك
خاصة انتو كان عنكن دكان الحلة
فيهو الجرورة
وفيهو بضبحو الرحمتات
| |
|
|
|
|
|
|
|
|
|
Re: الرحمتات (Re: عبدالله ود البوش)
|
ياسلام ياود البوش
كانت الرحمتات .. أتذكر جيدا جارتنا (الفنجرية) ست الجيل عليها رحمة الله تعالى هي وذريتها أينما حلو .. كانت لا تلعب في صحن الرحمتات ولا تبخل عليه بلحم أوعظم بل تزينه بالكبدة والكلاوي .. وكانت تحمله على كتفها وتضعه بين الصغار من الجنسين ... وتشرف على جلوسنا ، وتنظيمنا ومراقبة وضبط المشاغب ، وإعانة المحتاج بالعظم الكبير وقطعة الكبدة ... بعضهم كان يحضر صحن الرحمتات مع الفطور ، لكن بعضهم كان يقدمه للصغار من الصباح كفطور أوغداء ، هي عادة تهتم فيها بقدر كبير الأمهات لكن الأباء لا يرفضون طلبا كهذا لأنه لا يتكرر إلا مرة واحدة في السنة.. حتما آيلة للزوال ...
الشفيع
| |
|
|
|
|
|
|
|
|
|
Re: الرحمتات (Re: Alshafea Ibrahim)
|
الشفيع اخوي
تحياتي وسلامي يا ابو الدكتور
ذاكرتك جيدة بل وممتازة خالص خالص
.
.
.
بل كان يجب عليك ان تتذكر ام تلاتة لانك قربت ليها
ام تلاتو دي في الرحمتات
حتة كبدة صغيرة
حتة كرشة صغيرة
وحتة فشفاش صغيرة
عشان تحوق يعني
.
.
واليوم داك حتى الكلاب تشبع
يوم استثنائي في رمضان يوم الجمعة اللتيمة
شكرا جزيلا اخي الشفيع
وشد حيلك على المشروع
| |
|
|
|
|
|
|
|
|
|
Re: الرحمتات (Re: عبدالله ود البوش)
|
Quote: لكن ات بالذات تعال راجع للرحمتات دي
شارك
اضبح
اسلخ
قسم الكيمان وام تلاتة |
والله يا عبد الله أخوي دي حاجات بقينا ما حملها
ياخي دي شجون عجيبة
أحكي ليك موقف صغير .. سنة 90 القريبة دي
اتسلط علينا ود ابشقة وسرق مننا ستة بقرات ومعاهن عجل
الكلام دا تقريبا في منتصف شهر اتنين وكان باقي على رمضان في ديك السنة زي شهر ونص
المهم مشينا ورا البقرات والاتر وصلنا لين قيفة بحر أبيض جهة الصوفي
وبعد داك الدرب راح لينا في الموية .. قطعنا العشم واتعوضنا الله
وقف أبوي وقال لناس الفزعة جزاكم الله خير ..
وقبلنا صادين ..
بعد كم يوم ، بعد ما فطرنا وبنشرب في الشاي أبوي قال لي:
رمضان دقش كر والله يا طه ما واجعني غير العجل ..
تعرف يا ود البوش أخوي نقشتها طايرة ..
قلت ليه : آي والله يابا عشان رحمتات الكمبو
وهكذا كان
عجل خاص لرحمتات الكمبو .. اتقسم لناس الكمبو بيت بيت لا قرش ولا تعريفة
كل رمضان لو ما عندنا في حقنا يشتريه من السوق
..
من وعيت الدنيا دي
يوم الرحمتات أسوق العجل مع أمحد علي ود اللمين وامحمد ود السماني ( الضباحين )
وفي نص الكمبو نتمركز
وتعليمات أبوي واضحة : ود اللمين و ودالسماني اضبحو واكسرو واقطعو
لكن إت تقسم وتدي الناس ، والبقول ليك زيدني ما تقول ليه لا
والكلاب كان حرستكم اجدع ليها ..
..
نخلي ليك الضبان إنوني لي صباح العيد
..
الله الله يا عبد الله
الدنيا بي خيرها والناس مليانة محنة
كان قدري أن أكون لصيقا بأبي ( متعه الله بالصحة وأطال عمره )
وهذه شهادة أشهدها له أمام الله في مثل هذه الأيام
يطعم الطعام ويراحم الناس من يعرف ومن لا يعرف
لا يبتغي إلا الخير وحب الله وحب الناس ولا يحسب للدنيا حساب أبدا
..
وأحسب أن قرى ونجوع السودان مليئة بأمثال هذا الرجل
والرحمتات كعادة مرتبطة برمضان يجوز إنها في طريقها إلى النسيان
ولكن التراحم بين الناس لا يندثر والرجال والنساء الخيرون لا يفتئون يلدون أمثالهم
ولكل زمان عاداته وعوايده
..
أها قلت لي 89 ؟؟
| |
|
|
|
|
|
|
|
|
|
Re: الرحمتات (Re: طه إبراهيم عبد الله)
|
علي بالطلاق يا طه طلاقا احاسبني بيهو رب العالمين
دمعتي خرت كرررررررررررر
ولن اكمل بعد دي
Quote: وتعليمات أبوي واضحة : ود اللمين و ودالسماني اضبحو واكسرو واقطعو
لكن إت تقسم وتدي الناس ، والبقول ليك زيدني ما تقول ليه لا
والكلاب كان حرستكم اجدع ليها ..
..
نخلي ليك الضبان إنوني لي صباح العيد
|
| |
|
|
|
|
|
|
|
|
|
Re: الرحمتات (Re: ود الخليفه)
|
ود الخليفة
تحيات وسلامات وتبريكات
هذه العادات الجميلة لا يمنع ان نحاول اعادتها للمجتمع مرة اخرى
فيسهل الان ارجاعها ما دام في ناس متمسكين بيها لانو بعد شويةبتنقرض وتنعدم
.
.
نحن يا ود الخليفة في منطقتنا كانت بليلة الاربعاء
وبنفس الطقوس بس اختلفت الايام
.
.
.
شكري لمرورك البركة
| |
|
|
|
|
|
|
|
|
|
Re: الرحمتات (Re: ود الخليفه)
|
ود البوش
وعموم المتداخلين
رمضان كريم
وتصحب الرحمتات عملية عطن التمر البركاوي بكميات كبيرة في الماء الذي يوضع فيه الزنجبيل وبعض البهارات
العجيبة وتري الصبية يحومون بالكواري علي المنازل وهو يوم حصاد اكبر كمية من هذه الرحمة.
وفي يوم التوسعة او الرحمتات الذي تكثر فيه اللحوم وملاح ام رقيقة المي خمج والكمونية المجيهة في هذا
اليوم ينصرف الناس قليلا عن البليلة ولا يظهر صحن البليلة الا نادرا وفي هذا اليوم يصاب الجميع بالتخمة خاصة
الصبيان الفاطرين حيث تجدهم مجدعين علي البروش او قوز الرملة تلك ايام مضت لكنها محفورة في الذاكرة
والجمعة الماشة علينا دي هي اليتيمة وبعض اهلنا في قري نهر النيل لا زالوا متمسكين بهذه العادة السمحة
ونبعث لهم من ديار الغربة التحايا النواضر
ولكم كل الود والتقدير
| |
|
|
|
|
|
|
|
|
|
Re: الرحمتات (Re: عبد اللطيف السيدح)
|
Quote: والجمعة الماشة علينا دي هي اليتيمة وبعض اهلنا في قري نهر النيل
لا زالوا متمسكين بهذه العادة السمحة
|
اذن الرحمتات ما زالت موجودة بين ظهرانيننا
.
.
لكن في الوسط انتهت نهائي ما عارف السبب شنو
.
.
شكرا جزيلا يا السيدح على الاضافة والافادة الجيدة
ورمضان كريم
وتصوم
وترحمت
وتفطر على خير
| |
|
|
|
|
|
|
|
|
|
Re: الرحمتات (Re: عبدالله ود البوش)
|
يوم الزفارة هكذا بعض الناس تسميه
وديل الناس المتفلهمين
لانو اليوم داك زي يوم سمك البخار
الشارع مليان زفارة
والكلاب تتساكك في العضام
والشفع بعد الشبع تب في اللحم
اجيبو علبة الصلصة واجلدوها بالمصران الكبير ( ابو البعار ) عشان تبقى دلوكة
.
.
والسلات مالي الطشاشة
والعجيب العجيب الربيت
.
.
نواصل
| |
|
|
|
|
|
|
|
|
|
Re: الرحمتات (Re: عبدالله ود البوش)
|
الرحمتات هو يوم التوسعة لكل الاسر
فقير على غنيان علي سيد الدكان في اليوم داك كل الناس تشبع لحم
هو يوم قريب جدا من يوم عيد الضحية
.
.
اسع لمن اذكرت الربيت لو ما صائم كان طرشت
من كترة البعبعة في ذاك اليوم
قت ليك سمك بخار بس خريف ابو السعن
| |
|
|
|
|
|
|
|
|
|
Re: الرحمتات (Re: عبدالله ود البوش)
|
| Quote: والعجيب العجيب الربيت |
ودالبوش رمضان كريم
الربيت ده ماترجمه للحناكيش لوووووووووووووول
يا اخي رجعتنا لايام عجيبه وعادات انقرضت والرحمه زاتها قلت
والربيت ده بالزات نحن كان متوفره عندنا بكميات مبالغه بحكم انه خيلاني جزارين
والرحمتات بكون في بيت حبوبتنا .
لكن الرحمتات كانت على ما اظن دايما لزكرى الميت لانه انا صغير كنت اسمع
حبوبتي دائما تقول لينا دي رحمتات جدكم وجدي منذ ان خلقت وجدته متوفي .
تعرف ابني الاول "الباسل" اتولد قبل تلاته سنوات وكان ميلاده في الجمعه
اليتيمه ومع غمرة الفرح تلك بميلاده زكرت انه ولد في يوم الرحمتات
الحناكيش شالوا حسي 
| |
|
|
|
|
|
|
|
|
|
Re: الرحمتات (Re: حمزه بابكر الكوبي)
|
Quote: اتسلط علينا ود ابشقة وسرق مننا ستة بقرات ومعاهن عجل
الكلام دا تقريبا في منتصف شهر اتنين وكان باقي على رمضان في ديك السنة زي شهر ونص
المهم مشينا ورا البقرات والاتر وصلنا لين قيفة بحر أبيض جهة الصوفي
وبعد داك الدرب راح لينا في الموية .. قطعنا العشم واتعوضنا الله
وقف أبوي وقال لناس الفزعة جزاكم الله خير ..
وقبلنا صادين ..
بعد كم يوم ، بعد ما فطرنا وبنشرب في الشاي أبوي قال لي:
رمضان دقش كر والله يا طه ما واجعني غير العجل ..
تعرف يا ود البوش أخوي نقشتها طايرة ..
قلت ليه : آي والله يابا عشان رحمتات الكمبو
وهكذا كان
عجل خاص لرحمتات الكمبو .. اتقسم لناس الكمبو بيت بيت لا قرش ولا تعريفة
كل رمضان لو ما عندنا في حقنا يشتريه من السوق
..
من وعيت الدنيا دي
يوم الرحمتات أسوق العجل مع أمحد علي ود اللمين وامحمد ود السماني ( الضباحين )
وفي نص الكمبو نتمركز
وتعليمات أبوي واضحة : ود اللمين و ودالسماني اضبحو واكسرو واقطعو
لكن إت تقسم وتدي الناس ، والبقول ليك زيدني ما تقول ليه لا
والكلاب كان حرستكم اجدع ليها ..
..
نخلي ليك الضبان إنوني لي صباح العيد
|
شكرا جزيلا طه ابراهيم على هذه الوثيقة التاريخية الخالدة
| |
|
|
|
|
|
|
|
|
|
Re: الرحمتات (Re: حمزه بابكر الكوبي)
|
Quote: اجيبو علبة الصلصة واجلدوها بالمصران الكبير ( ابو البعار ) عشان تبقى دلوكة
. |
نحن نسميه ابوالكبور
المصران الكبير
---------------------------------------
الشى التانى
الجبين نفسه هو نبات اسمه الجبين
| |
|
|
|
|
|
|
|
|
|
Re: الرحمتات (Re: خالد المحرب)
|
| Quote: الجبين نفسه هو نبات اسمه الجبين |
صاح
.
.
اتصلت على واحد من رواعيتنا والله ضحك ضحك كان فاطر كان شرق بكسر الشين وطلع زيتا
لمن سألتو من الجبين
وطبعا الان اتذكرتها
اخخخخخخخ
نبتة اتقول بتباري الرواعية
| |
|
|
|
|
|
|
|
|
|
Re: الرحمتات (Re: خالد المحرب)
|
شيخ العرب خالد المحرب
تصوم وتفطر على خير ,,
الرحمتات مازالت بألقها في بعض القرى رغم ان هنالك من يعمل على محاربتها
مازالت والدتي (متعها الله بالصحة والعافية) محافظة على الرحمتات (في الخرطوم)
ولكن تواجهنا مشكلة اساسية من وين نجيب الشفع عشان يتلمه للرحمتات
ديل لو عملت ليهم رحمتات بيتزا عديل كده ما بقوم ليك من البلي ستيشن ,
رحم الله امواتنا وامواتكم واموات المسلمين جميعاً
عامنول كتبت ,,,
إِ نْديَلٍقٍي أرْهًمٍيرٍنْ __ الرحمتات
| |
|
|
|
|
|
|
|
|
|
Re: الرحمتات (Re: حمزه بابكر الكوبي)
|
حاجة سغنتوتة يا عبد الله
لمن زول زي شيخ العرب المحرب ينسى الرحمتات
والله دي حاجة تخوف
هي الغربة دي حا تعمل فينا شنو أكتر من كدا ؟
لكن أبا حفص دا أفقدوهو
ما إكون نسى حاجات تانية حامياني
..
وتحية خاصة للمحرب
| |
|
|
|
|
|
|
|
|
|
Re: الرحمتات (Re: حمزه بابكر الكوبي)
|
حمزة الكوبي
تحية وسلامات
ورمضان كريم
وايضا كذلك العيد
| Quote: الربيت ده ماترجمه للحناكيش |
الحناكيش ديل ربيتن كزام
.
.
| Quote: لكن الرحمتات كانت على ما اظن دايما لزكرى الميت |
كلامك صاح لان الناس البضبحو الرحمتات بقولوا دي حسنة واجر لروح
ابوي فلان ولا امي فلانة
الرحمة تاتي لناس القبور
وللاحياء اشبعوا لحم وربيت
شكري وتقديري يا حمزة
| |
|
|
|
|
|
|
|
|
|
Re: الرحمتات (Re: عبدالله ود البوش)
|
Quote: حاجة سغنتوتة يا عبد الله
لمن زول زي شيخ العرب المحرب ينسى الرحمتات
والله دي حاجة تخوف
هي الغربة دي حا تعمل فينا شنو أكتر من كدا ؟
لكن أبا حفص دا أفقدوهو
ما إكون نسى حاجات تانية حامياني
..
وتحية خاصة للمحرب |
طه ود حاج ابراهيم ياخ ربنا يحييك
الغربه والضغط الشديد شايلين اوفر لود عليك امان الله
عشان الوليدات يتعلموا والعمر كلما تقدم المومرى بتبقا
ضعيفه لكن زمنا كان ساهل لا وقتا قريب
ود البوش بجيب لينا المحن والاحن
تحياتى لك
| |
|
|
|
|
|
|
|
|
|
Re: الرحمتات (Re: خالد المحرب)
|
Quote: ود البوش بجيب لينا المحن والاحن
|
الاحن عرفتها فما هي المحن يا اخ العرب ؟
.
.
ياخي يوم الرحمتات دا يوم عجيب ما تحس فيهو بالصيام ابدا
بل العكس تحس بروحك شبعان شبعة شديدة
من الصباح ضبح وسلخ وتقسم كيمان والضبان انوني
والواحد انهور واحاحي في الجداد
والعجب العجيب كان جات الحدية
كفففففففف تشيل نص الكوم
والجدادة جنبها تسوي كحا بو قائلة الحدية شالت سوسيوا
غايتو اليوم دا البوم دا اشبع شبع
اها اسع شوف براك يوم الجمعة الجاية القريبة دي يوم الرحمتات
تمر زيها وزي يوم الخميس بس علا تصوبن الجمعة بس
اخخخخخخخخخ زمن لا يعود ابدا
حمودي ولدي قلت ليهو دا البيت الولدوك فيهو
قال لي لو اقدر اجر الساعة لوراء !!!!!!!
ناس الكرتون بجروها
| |
|
|
|
|
|
|
|
|
|
Re: الرحمتات (Re: المر)
|
المر
اخو الحلو
سلامات ومشتاقين ياخ
ياخي اكتب فلا الرحمتات تمنع الجمعة اليتيمة ولاالباقيات الصالحات تنقص الصلوات
شكري وتقديري
| |
|
|
|
|
|
|
|
|
 Re: الرحمتات (Re: عبدالله ود البوش)
|
ود البوش تحياتي و رمضانك كريم و مبارك و سؤالنا عن أسرتك إن شاءالله العيال طيبين
مازاااال اهلي و ناس بيتنا مواصلين هذه العادة الحميدة
الجمعة الاخيرة من كل رمضان يعملوا ديييك يا الفتة بالنهار للشُفع و معاها جردل عصير
و كمان بوزعوا للااطفال قلل موية صغيرة كدة و يقعدوا الاطفال يشربوا منها سنة كااااملة
و كنا بنفرح بالقلل دي فرح ما عادي ههههه و انا لغاية الان بطالب عمتي كل سنة انها ما تنسي
قلتي لما تمشي تشتري القلل و كل سنة شكلة في انه انتي اصلو ما دايرة تكبري ؟؟ ههههههه
و زي ما قالوا الاخوان دايما يوهب اجر الاكل و الموية و العصير للاموات و في نهاية الجلسة
يُطلب من الاطفال قراءة الفاتحة علي ارواح الميتين من افراد الاسرة و اموات المسلمين جميعا"
يااااه زكرتنا بي ايام جميييلة و لا اتوقع أن يعيش اولادنا مثلها ..
تحياتي
| |
|
|
|
|
|
|
|
|
|
Re: الرحمتات (Re: heba Elmahi)
|
الاخت الغالية
heba Elmahi
السلام والتحايا ورمضان كريم عليكم
وترحمتو وتعيدو على خير
.
.
كلامك يوضح بان ناس منطقتكم ما زالوا متمسكين بهذه العادة الجميلة
والله كدا طمنتينا عليها بعدما كنت اعتقد بانها من العادات المنقرضة
.
.
لكن يا هبة كلامك دا جديد ولا طولت من البلد وما سألت من القلل قريب
شكرا جزيل الاخت هبة الماحي مع تحياتي لاسرتك الكريمة
والله استر عليكم في الغربة القاسية
شكري وتقديري الذي تعلمين من التقدير والاحترام لشخصك المحترم
| |
|
|
|
|
|
|
|
|
|
Re: الرحمتات (Re: عبدالله ود البوش)
|
ود البوش سلامات
| Quote: ولا خلاص الرحمة قلت ؟ |
علي حسب رأيي أنها قلت لأنه ميسوري الحال الآن بيجيبوا كيلو عجالي وبيعملوهو فتة ورز وبتكون دي الرحمتات
وعلي حسب علمي ايضا انها بتطلع في البرش المغرب لأنه شفع الزمن دة ما بيشتغلوا بالفتة وما عندهم غناء للرحمتات
مودتي
| |
|
|
|
|
|
|
|
|
|
Re: الرحمتات (Re: Abd-Elrhman sorkati)
|
الله يا ود البوش مالك علينا
كل سنة امي ما كان بتنسا الرحمتات والفتة حقتها خصوصا ولمة الجميع في البيت ..البعيد والقريب
رمضان الفات سالناها بعد الجمعة اليتيمة
انتي السنة دي لي ما عملتي الفتة قالت لينا نسيت
شفت كيف؟
| |
|
|
|
|
|
|
|
|
|
Re: الرحمتات (Re: Nazik Eltayeb)
|
شكرا يا نازك على الصور
ولنا ان نقارن بين هذه الصورة
وتلك التي رسمها لنا اخونا طه ابراهيم بالكلمات
عن الرحمتات ام ضبانا ينوني
وكلو بطعمو
كل رحمتات وانتو مرحمتين
| |
|
|
|
|
|
|
|
|
|
Re: الرحمتات (Re: Nazik Eltayeb)
|
اختنا الرائعة ورايقة
Nazik Eltayeb
والله يا نازك ديل نسونا روحنا وبقينا هايمين زي المجانين
لخمونا عشان ما نتذكر ائ حاجة ونكون دايشين كدا طوالي
.
.
ربنا اطول ليك في عمر الوالدة واديها الصحة والعافية
وعليك الله يا نازك ذكريها الرحمتات من اسع دي
وصية في الذمة ما تنسي ات كمان لوووووووووول
شكرا نازك
احترامي الشديد وتقديري الذي تعلمين
| |
|
|
|
|
|
|
|
|
|
Re: الرحمتات (Re: Abd-Elrhman sorkati)
|
اغايتو نحن اهلنا الحلفاويين كانوا يوم الجمعة اليتيمة ( الرحمتات ) بيعملوا فطور
و يطلعوهو برا في الشارع للشفع بتعاعين الحلة و الاكوان المجاورة. و النسوان يمشن
في نفس اليوم المقابر و يختوا البلح و الحلوة في حفرة غير عميقة في مقبرة المرحوم
على جهة الراس . عشان المساكين ياكلوا منها كذا يعود الثواب للمرحوم
______
الشفع كانوا بيقولوا وهم شايلين صفائح بيضربوا فيها
بعصي .الحارة ما مرقتا ست الدوكة ما ظرتت ليمونة ليمونة
ست الدوكة مجنونة...الخ , الكلام دا في الخرطوم
تحياتي
| |
|
|
|
|
|
|
|
|
|
Re: الرحمتات (Re: فيصل محمد خليل)
|
فيصل يا فنان سلامات
وكل رحمتات وانت مرحمت
.
Quote: الشفع كانوا بيقولوا وهم شايلين صفائح بيضربوا فيها
بعصي .الحارة ما مرقتا ست الدوكة ما ظرتت ليمونة ليمونة
ست الدوكة مجنونة...الخ , الكلام دا في الخرطوم
|
قلت لي ديل ناس قلبابقولوا جنس الكلام دا
وناس قعرا اسوا شنو ؟
.
.
فيصل يا جميل
بقدر ما تستطيع حاول احياء هذه العادة الجميلة
حتى ولو بالتلفون فقط اتصل على الجماعة وقول ليهن ما تنسو الرهمتات لووول
على الاقل ذكرن ليها وخليهن علي كدا امكن السنة الجاية تنقلب والناس كلها ترحمت منهن
.
.
شكرا يا ابو النسب
احترامي وتقديري
| |
|
|
|
|
|
|
|
|
|
Re: الرحمتات (Re: Abd-Elrhman sorkati)
|
اغايتو نحن اهلنا الحلفاويين كانوا يوم الجمعة اليتيمة ( الرحمتات ) بيعملوا فطور
و يطلعوهو برا في الشارع للشفع بتعاعين الحلة و الاكوان المجاورة. و النسوان يمشن
في نفس اليوم المقابر و يختوا البلح و الحلوة في حفرة غير عميقة في مقبرة المرحوم
على جهة الراس . عشان المساكين ياكلوا منها كذا يعود الثواب للمرحوم
______
الشفع كانوا بيقولوا وهم شايلين صفائح بيضربوا فيها
بعصي .الحارة ما مرقتا ست الدوكة ما ظرتت ليمونة ليمونة
ست الدوكة مجنونة...الخ , الكلام دا في الخرطوم
تحياتي
| |
|
|
|
|
|
|
|
|
|
Re: الرحمتات (Re: Abd-Elrhman sorkati)
|
الاستاذ الفنان عبدالرحمن سوركتي
رمضان كريم
Quote: علي حسب رأيي أنها قلت لأنه ميسوري الحال الآن بيجيبوا كيلو عجالي
وبيعملوهو فتة ورز وبتكون دي الرحمتات
وعلي حسب علمي ايضا انها بتطلع في البرش المغرب لأنه شفع الزمن دة
ما بيشتغلوا بالفتة وما عندهم غناء للرحمتات
|
كدا صعبتها يا عبدالرحمن
يعني الكبار والصغار قنعانين منها
.
.
انا لاحظت بان هذه العادة ما زالت مستمرة في الشمالية
الخرطوم با باح
الوسط قروشن قصرت
تاني مافي طب
.
.
بصراحة برنامجك قهوتي ما بتفوت نهائي
سلم على البشرى ونضال عليك الله
اسع ما جنبك لووووووووووول
| |
|
|
|
|
|
|
|
|
|
Re: الرحمتات (Re: عبدالله ود البوش)
|
Quote: لكن في الوسط انتهت نهائي ما عارف السبب شنو
|
سلامات يا عبد الله
الرحمتات تسبغ الرحمة علي المسلمين الأحياء منهم و الأموات ..
تعرف في نص أم درمان دي ما حصل عدي رمضان بدون أمي ما تعملهاوبقدر الفي ..
شفع حلتنا بستمتعو بيها عديل
ياخي عندها أطعم فتة في التاريخ ..
وشية و بعدهما .. عصير
أسع إتمطقت عديل..
عادة بتكون الضهر بعد الصلاة
عندي ود أختي مقرم بلم شفع الحلة و ينظمهم
الله يدي الأمهات العافية
ويخليهن
ويرحم من رحلن منهن
ويجعل مثواهن الجنة
| |
|
|
|
|
|
|
|
|
|
Re: الرحمتات (Re: توما)
|
توما
ام يوسف
تحية وسلام ورمضان كريم
وكل سنة مرحمتين
.
.
ومن هنا اذكرك بان تذكرني من هناك ان يقوم باللازم لرحمتات الجمعة الجاية
وهي الجمعة اليتيمة
عادة الامهات هن اكثر اهتماما بهذه العادة الجميلة
وعليه يجب عليكن مواصلة هذه العادة الجميلة
.
.
الحالة كانت متيسرة والناس تضبح التيران والخرفان
وشوية شوية عتان ######لان
المهم الناس تستمر على هذه العادة بقدر المستطاع
عشان ما تنقرض هذه العادة الجميلة
الوصية في الذمة يا ام يوسف كلمي الجماعة هناك اهتموا بيها وباقل ما يكون
شكرا جزيلا توما
تحياتي وتقديري
| |
|
|
|
|
|
|
|
|
|
Re: الرحمتات (Re: عبدالله ود البوش)
|
ود البوش سلامات
| Quote: دي من العادات الجميلة القربت تنقرض |
لا شك فى أنها من العادات الجميلة و جميلة جدا .. لكين كيلو اللحمة حصل 36 جنيه والخروف بما يقارب المليون جنيه!!
تحاياى
| |
|
|
|
|
|
|
|
|
|
Re: الرحمتات (Re: حسام عبد الرحيم)
|
اخونا حسام عبدالرحيم
تصوم وتفطر وترحمت علي خير
| Quote: لكين كيلو اللحمة حصل 36 جنيه والخروف بما يقارب المليون جنيه!! |
وهل بطل الناس اكل اللحم ؟
بنفس الكمية دي يوم الجمعة اللتيمة اسوا الرحمتات
القصد ان العادة تستمر حتى ولو ببليلة
وحتى لو ذكرت هذه العادة اخي حسام في جلسة الفطور يوم الجمعة
جيب اسما ساهي او كلمتين تلاتة عنها برضو احياء لذكرى هذه العادة الجميلة
شكري وتقديري اخي حسام
| |
|
|
|
|
|
|
|
|
|
Re: الرحمتات (Re: عبدالله ود البوش)
|
يا عبد الله
وصية و في الزمة و في رمضان .. بالغت معاي
الخبر اليقين إنو
رحمتات الجمعة اليتيمة قائمة برعاية الوالدة يديها العافية
ويديكم..
| |
|
|
|
|
|
|
|
|
|
Re: الرحمتات (Re: توما)
|
توما
سلامات بالرحمتات
حرصت ليك علي الاجر يا توما
لانو غيرك انت واخونا طه ابراهيم ما شايف ناس مستمرين
على هذه العادة الجميلة وحريصين عليها
ولذلك ركزت عليك انت بالذات
وربنا اطول عمر والدتكم واديها الصحة والعافية
وللجميع موفور الصحة والعافية
مع تحياتي للولد يوسف الصايم صيام الفار
| |
|
|
|
|
|
|
|
|
|
Re: الرحمتات (Re: عبدالله ود البوش)
|
اخوي عبدالله رمضان كريم
وتصوم وتفطر على الف خير
وتسعد في مستقبل ابامك
محبتي
الرحمة تأتي مع الدعاء لك مرحوم فارق دنيانا والرحمة تشمل مواتنا ومونى المسلمينوكل الناس
كلمة رحمة دي انا بعتبر من الكلمات الزي التلج تنزل على فلبك ساقطه زي التلج كلمة لابتتشرح ولا حاجة بتحسه
زمان اهلنا فكروا في الرحمة لي كل الناس واخترعوا الرحمتات وهو الاسم المخفف لكلمة الرحمة تأتي او الرحمة اتية
وتفسيرك صاح ,,
الرحمتات كان بتتعمل في اخر جمعتين الناس الماتوا ليهم ناس من اهلهم خلاال الاعوام الماضية بعملوا طبق الرحمة بتاعهم في اي جمعة فبل رمضان ينتهي لكن المات ليهم زول في نفس سنة رمضان بعملوها في الجمعة اليتيمة..
وديل البضبحوا للكرامة لكن باقي الناس بتعمل فتة بالموجود ونخيل الناس كلها بتعمل طبق الرحمة لانو يربط الحلة كلها في تكافل وديع وبسيط وحتى الاطفال المتعففين بيجو وياكلوا من اطباق الرحمة على امتداد الحي والطقس بيدا دايما بعد الفطور بكون كل اولاد مستعدين وعندهم فكرة عن انو اليوم الرحمتات يجهزوا انواع من الايقاعات المصنعة من
علب الصلصة والاخشاب والصفائح ويجوبوا الشوارع بعد المغرب وهم يغنون :
.الحارة ما مرقتا
ست الدوكة ما ظرتت
ليمونة ليمونة
ست الدوكة مجنونة
ودي الكلمات الخام التي غنيناها اكان في مدني واو في القطينة
وندخل البيت الفيهو رحمتات اوعاملين الفتة والبيوت بتتعرف العامله العادة دي انو قدام البيت بتلقى قلل
لدخل ناكل الفتة ونشرب موية القلة المليانة بلح بالسكر وكان يطلبوا من ان نكسر القلة رمز لطرد الشرور
الرحمتات لابد ان تعود وبقوة هي رمز للتكافل والوداعة والرحمة والمودة بين الناس وافشاء المحبة
والان نعكف شخصي والفنان الشاعر والممثل موسة الامير على الانتهاء من اوبريت (( الرحمتات ))
لنعيد هذا الطقس الجميل وبكلمات جميلة وهادفة وتحمل مضامين انسانية عميقة ولنعيده العام القادم باذن الرحمن الرحيم ...
محبتي ابدية...
| |
|
|
|
|
|
|
|
|
|
Re: الرحمتات (Re: محمد سنى دفع الله)
|
الان نحن نحتاج الى
فانوس
وفتة باي امكانات الظروف بقت صعبة جدا
يعني صحن فيهو ربع كيلوا ما مشكلة
صحن فيهو رز وعيش وسليقة يكفي
وقلل وتمر
بالله يا اخوي عبدالله شوف كم زول بتكسب
ناس الفوانيس والقلل واللحمة والرز والموية
لابد ما احياء الرحمتات
عله يرحمنا الرحمن ويشملنا بحفظه
اللهم امين
| |
|
|
|
|
|
|
|
|
|
Re: الرحمتات (Re: محمد سنى دفع الله)
|
الاخ الفاضل محمد السني
تحياتي وسلامي لك وللاسرة الكريمة محمد السهروردي وسهر احلامو
ورمضان كريم والعيد مبارك مقدما
Quote: والان نعكف شخصي والفنان الشاعر والممثل موسى الامير
على الانتهاء من اوبريت (( الرحمتات ))
|
.
.
وسوف يكون اثر هذا العمل قويا خاصة بانه اتى من عملاقة الفن والابداع
محمد السني وموسى الامير
ويا ريت كل فترة تحيوا لنا تراثا كاد ان يندثر
.
.
شكري وتقديري واحترامي اخي محمد السني دفع الله
| |
|
|
|
|
|
|
| |
عبدالله ود البوش
خالد المحرب
Research In Motion BlackBerry 9300(1600x1200).JPG)
نورالدين بابكر بدري
سفيان بشير نابرى
khaleel
Mayada
ود الخليفه
عبد اللطيف السيدح
حمزه بابكر الكوبي
عمار عبدالله عبدالرحمن
Abd-Elrhman sorkati
Nazik Eltayeb
فيصل محمد خليل
توما
حسام عبد الرحيم
محمد سنى دفع الله
فيس بوك
تويتر
انستقرام
يوتيوب
بنتيريست