|
|
 طاااااااااااازج وقائع آخر جلسة لمجلس الوزراء لهيكلة الحكومة
|
الرئيس: بسم الله الرحمن الرحيم عايزين نشوف الحكومة دي ونهيكلها وفقا للمستجدات الحصلت
نائب الرئيس : نقلص عدد الوزرا
وزير(1): بس جارين تقلصوا عدد الوزرا
مساعد رئيس(1): نخلي الوزرا زي ما هم ونقسم الشعب
وزير دولة (1) يا جماعة انتو مصعبنها كدة ليه هسة البلد ما ماشة كويس
الرئيس : الحاصل انو بعد الانفصال ( الله يجازي الكان السببب ) بقت ما في قروش ونسوانا اتعودوا على نمط بتع حياة معين فلازم ناس يضحو ، فالناس العندهم مهن زي الاطباء والمهندسين ديل حقوا براهم يتخارجوا والماعندهم هن وبتاعين معاشات ديل يقعدوا في الحكومة لحد ما الامور تتصلح
وزير دكتور: بس كدة يا ريس ما ظلمتنا
الرئيس: كيف؟
وزير دكتور : انت مش عايز تلغي وزارة الصحة :
الرئيس : ايوة
وزير دكتور : وطيب ما كدة نحن صعنا ، لانو حنتعين وين
نائب الرئيس : افتحو عياداتكم
وزير دكتور : والبجينا منو ؟انت قايل الغبش ديل داقسين؟ يقولوا ليك اوع تمشي للدكتور الكان وزير ده بقتلك
الرئيس: والله كلامك صاح انتو الواحد فيكم 20 سنة ما كتب روشتة شابكنها لي كلها تصريحات كضب في كضب
وزير دكتور : ما لازم نكضب يا ريس ما اهو المية وزير ديل قاعدين يكضبوا بس بقت على الدكاترة
مهندس وزير : طيب يا ريس ما في واحدين جامعة ما مقروا وبرضو مدنهم وزارات هندسية اشمعني بس نحن ؟!!
الرئيس : اها زي ده يمشي وين ؟
زول عنده شهادة ثانوي حيشتغل شنو ونحن بتاعين الماجستيرات خليناهم يسوقوا ركشات بالله الزول ده بالذات ما عنده اي طريق غير يكون وزير
مساعد رئيس ( 2) طيب انا عندي اقتراح
الرئيس: اقتراحك شنو؟
مساعد رئيس (2) وزارة الزراعة والثروو الحيوانية والتجارة والتعاون الدولي ووزارة شئون البرلمان ندمجهم في وزارة واحدة
وزير الشئون البرلمانية : يازول انت ما نصيح تدمجنا نحن مع الثروة الحيوانية ؟! والله دي حقارة
مساعد وزير (2) : خلاص ندمجكم مع الرعاية الاجتماعية ووزارة الشئون الدينية والاوقاف ووزارة الاستثمار
وزير الاستثمار: بالله عشان بتاعين الاوقاف ديل يخمونا
الرئيس : ياجماعة نحن لازم نشوف حل
،ائب الرئيس : الحل في الحل
رفعت الجلسة لاداء صلاة الظهر
|
|
 
|
|
|
|
|
|
|
|
Re: طاااااااااااازج وقائع آخر جلسة لمجلس الوزراء لهيكلة الحكومة (Re: د.محمد حسن)
|
الرئيس : بسم الله الرحمن الرحيم تقبل الله صلاتكم
الوزراء والمستشارين وبتاعين التسجيل : منا ومنكم اجمعين
الرئيس : اها نواصل
وزير(2) : ندمج الدفاع والداخلية والامن ووزارة شئون الرئاسة مع بعض
وزير (3) لالالالالالالالالالالالالالا انا مابرضى كدة وزير الدفاع حيكشنا بالولد
وزير الدفاع : انا زاتي ما عايزك انت بالذات حقو بعد كدة تغترب وترجع البلد الجيت منها كفاك كرشك زاتها كبرت اكتر من اللازم
وزير(3) قل هو الله احد عايز تسحرني
مساع رئيس (2) ياجماعة بالله سيبو االكلام الجانبي وخلونا في المصيبة الجايانا ياريس انا اقترح المساعدين تبقيهم ولاة
الرئيس : طيب الولاة نوديهم وين ؟
مساعد رئيس (2) الولاة ديل رجال اعمال ندخلهم الغرفة التجارية والتجار القدام زي ود البرير نعتبرهم مستشارين للغرفة التجارية مش فكرة حلوة
الرئيس: فكرة حلوة اهو دي حليناها يبقى دي اعتمدت
نائب الرئيس : ياريس ناس الذكر والذاكرين ديل نوديهم وين
الرئيس : والله باتع مشروع سندس من يوم دخلناها معانا نشفها ده نشف الموية في مشروع سندس ما ينشف الحكومة!! خلاص نعفيه اصلوا بقى بتاع شعر في التلفزيون ، وبمناسبة التلفزيون يا اسماعيل الحاج موسى انت اعفيناك برضو لانو بتقبض من التلفزيون
اسماعيل : لكن يا ريس قروش التلفزيون دي شوية
الرئيس : اتصرف شوف ليك رعاة لبرنامجك واعمل ابو القاسم مع القسم التجاري
اسماعيل : والله يا ريس ورطتني لكن امرك انا موافق بس كبر لي الغميتة بتاعة نهاية الخدمة
الرئيس : ههههههههههههههههه والله يا اسماعيل عامل صلعتك دي تراكا ما هين، ما عليك حنكبر الغمتة
وزير الزراعة: يا ريس لما تدمجو الوزارة بتاعة الزراعة الحيكوم الوزير منو
نائب الرئيس : انت يا المتعافي تسكت ساااااااكت وما تتكلم
المتعافي : ليه؟
نائب الرئيس: انت عارف ليه ، زرعت بنجر بدل القطن لا البنجر نجح وعملنا السكر لازرعنا قطن يجيب عملة صعبة
وزير الصناعة: بالله هو البنجر الزرعوا المتعافي للسكر ، انا الزمن ده كلو قايلو للسلطة وكل يوم اسال السواق جبت بنجر المتعافي يقول لي لسة ما قام ، كرهتنا يا خلف الله
اذان العصر
رفعت الجلسة لما بعد الافطار
| |
|
|
|
|
|
|
|
|
|
Re: طاااااااااااازج وقائع آخر جلسة لمجلس الوزراء لهيكلة الحكومة (Re: د.محمد حسن)
|
الرئيس : بسم الله الرحمن الرحيم
شوفوا الكلام القبيل ده كلو انا بعتبرو تخاريف صيام الا انو الولاة نعينهم في الغرفة التجارية ، هسة الحمدلله فطرتوا وشربتوا المويات الطاعمة رغم انعدام السكر احمدوا الله
الوزراء وبتاعين التسجيلات البقعدواوراهم : الله اكبر
الرئيس : ما قلنا تكبير قلنا احمدو الله
الوزراء وبتاعين التسجيلات البقعدوا وراهم : الحمدلله
الرئيس : شوفو ا انا قعدت وفكرت انتو 100 وانا عايز منكم بس 25
وزير من احزاب الفكة : 25 بس يا ريس؟
الرئيس : ايوة
وزير (22) : والباقين ؟
الرئيس : يخشوا السوق
الوزراء كلهم : نخش السوق ؟ يا ريس كيف الكلام ده
الرئيس كلام واضح تخشوا السوق
وزير (15) : ياريس السوق ناااااااااااااشف
الرئيس: النشفوا منو ؟!!!!
وزير(15) : نشفناه نحن وناس الضرايب ما شايف الخزينة فضت
الرئيس : طيب هسة انا ما صرفت للنواب كل واحد 15 مليون
وزير المالية : يا ريس دي اخر قروش في الخزينة فاضل بس مرتباتك لباقي الفترة والخصصات
الرئيس: كويس مادام مرتباتي في بنحاول نجيب مرتبات للخمسة وعشرين وزير
وزير من غير وزارة : يا ريس شايفك مصر على ال 25
الرئس : ايوة
وزير من غير وزارة تاني : طيب حتعملها كيف ؟
الرئيس: انا قلت اي وزير قعد اكتر من 20 سنة معاي بعد كدة كفاه
وزير ليه 21سنة : ياريس تشيلنا كدة بالسرعة دي قبال ما اطهر المرة واحجج الوليدات بتاعين المرة الجديدة؟
الرئيس: ههههههههههههههههههه تطهرها عديل ، الكترابة
وزير الدفاع : طيب ياريس ما انا الوحيد العارف اسرار الدفاع تشيلني كيف
نائب الرئيس: طيب يا ريس ما كدة الاسلاميين ما حيكون عندهم امير
الرئيس : ما اا فكرت لما كل زول يكون وزير او امير منو البسوق الحمير ؟
الوزرا كلهم : ما انت يا الرئيس سير سير يالبشير ونحن بس الحمير
الرئيس : طيب في زول عندو اقتراح ؟!!
طبيب الاسنان مستشار الرئيس لحاجات كتار: ايه رايك يا ريس تعملها قرعة ؟ بس على شرط انا برة القرعة
الرئيس : قرعة سيكافا
الوزراء كلهم : ههههههههههههههههههههههههههههههها يا ريس نكتة حلوة ، دمك خفيف
الرئيس : خلاص يامستشار نعمل القرعة نختار 24 وانت عشان فكرتك الخطيرة نخليك نمرة 25
طبيب الاسنان المستشار : تكبير ( صمت من القاعة ) الله اكبر الله اكبر ( برااااه ) تهليل ( صمت من القاعة ) لا اله الا الله ( برااه)
وزير (97) : والله يا ريس نحن وراك لكن الوزارات حتعمل فيها شنو
الرئيس : الوزارت سهلة ممكن تتنجر ما في مشكلة المشكلة فيكم انتو
انا شايف اذان الفجر قرب نقوم نتسحر وونواصل بكرة ، بالله نوموا كويس لانو جلسة بكرة حاسمة ما عايز اي تخاريف
رفعت الجلسة لليوم الثاني
| |
|
|
|
|
|
|
|
|
|
Re: طاااااااااااازج وقائع آخر جلسة لمجلس الوزراء لهيكلة الحكومة (Re: د.محمد حسن)
|
الرئيس: بسم الله الرحمن الرحيم نفتتح الجلسة
وزير(75) : يا ريس انت مصر على القرعة؟
الرئيس: ايوة في حاجة
وزير (75): في حاجات
الرئيس :في شنو ؟
نائب الرئيس : والله يا ريس الموضوع ده جهجه العوايل بتاعتنا جهجهة ما اعتيادية
الرئيس: الكلام ده كيف ؟
مساعد الرئيس (1) : والله النسوان فرشوا عدييييييييييييييييييييييييييل
الرئيس : والنسوان دخلهم شنو في الموضوع ده ؟
وزير (37) : يا ريس بصراحة احكي ليك الحصل لي اللليلة ، بالتلتلة لقيت لي شوالين سكر جابهم لي مدير مكتب الوزير(12) وجابهم لي بطلوع الروح ، اها لمن نسيب الوزارة نلقى السكر وين تاني ؟عليك الله يا ريس الموضوع ده انساه ؟
الرئيس: انساه كيف؟
وزير (22) : باختصار يا ريس معايشنا كلها بنجيبها من الوزارة الفراخ من المتعافي ، اللحمة من ناس الصادر بتاع ماليزيا والاردن ، الخضار من الاتراك اها لو سبنا الوزارة نتعايش من وين ؟
الوزرا كلهم : ايوة يا ريس والله (22) ده كلام في الصميم
الرئيس : لكن الخزينة ما بتستحمل نعمل شنو؟
مستشار(9)ى: يا ريس جيب حمدي تاني
الرئيس : تااااااااني حمدي ليه؟
مستشار (9) : حمدي احسن زول يقلع الضرايب قلع ، والله شهر بس يملا ليك الخزينة لمن تدفق
وزير المالية: وانا امشي وين
الرئيس : ايوة ده نوديه وين
مستشار(9) : نوديه جهاز المغتربين يشل ضرايبهم
الرئيس : وكرار
مستشار (9): كرار اساسا اقامتو ما لغاها وبعدين من عيناه عاملة لينا سفر ومؤتمرات صحفية ، يا ريس فكنا منو خليه يرجع الرياض ويبقى رئيس رابطة الصالحية
الرئيس : نصوت على كرار
نائب الرئيس : تصويت شنو يا ريس ، اجماع سكوتي
الرئيس: هههههههههههه باللهى انت لسة متذكر يا حليل زمن الاجماع السكوتي
| |
|
|
|
|
|
|
|
|
|
Re: طاااااااااااازج وقائع آخر جلسة لمجلس الوزراء لهيكلة الحكومة (Re: د.محمد حسن)
|
سلامات يا دكتور معليش خربنا ليك السرد،
بالمناسبة تكلفة الإجتماعات دي كانت كم؟؟
بعدين قصة تشكيل الوزارة دي محلولة،،،
لعبة الكراسي مدورة ليها 22 سنة، بس الظريف إنها غير تقليدية،
بمعني كل ما يجي لاعب جديد لازم يكون في كرسي إضافي،،،،
طيب المستشارين ديل يمشو وين؟؟
الولاة أخبارم شنو؟
وزراء الدولة؟؟
السفراْء؟؟
المعتمدين وين راحوا؟؟؟
وزراء الولايات وين طاروا؟؟
روساء المصالح والموءسسات الماخج؟؟؟
أها أهم وزارة بتاعت البترول وين بتقبل؟؟
وكمان بتاعة السدود والكهربا والخزانات؟؟؟
ونهاية المطاف البرج الجنب النيل داك ووزارتو الجديدة، ما تبقو حاسدين يا جماعة
أدونا معاكم فرقة شوية،،،
يديكم دوام الصحة وتمام العافية
| |
|
|
|
|
|
|
|
|
Re: طاااااااااااازج وقائع آخر جلسة لمجلس الوزراء لهيكلة الحكومة (Re: د.محمد حسن)
|
رفض السيد حمدي تولي الوزارة لانه مشغول بانشاء بنك لاولاده حتى لا يقعدو من بعدو فقراء
وسبب تاخير البنك هو بترول الشمال الذي اتلحس بواسطة دولة جنوب السودان كبترول مستحق وفقا لترسيم الحدود ورغم شماتة ابلة ظاظا على ناس الشمال.
المهم
حمدي الان عاكف على دراسة كيفية ايجاد مال للسودان يدعم خطته البنكية او اخراج مال من السودان يضمن بعد حين من الدهر الا تطاله مساءلة قانونية في حالة اي تغيير في السياسة الداخلية لدولة السودان
| |
|
|
|
|
|
|
| |
د.محمد حسن
د.السيد قنات
فيس بوك
تويتر
انستقرام
يوتيوب
بنتيريست