صديقي الشاعر المرهف الأحساس (ود الملك) أطل علينا من خلال صفحته بالفيس بوك Wad Elmalik Wad Elmalik برائعته الوليدة (إشتهيتك رحلة الوجع الرجع) .... سافر بنا من خلالها في رحلة حروف بين الغناوي و الحكاوي ... كم أنت مبدع أيها (الملك)
إشتهيتك نسمة بي كل التفاصيل البترسم لمحتك بسمة في كل الظروف. يا روعة من عطر الحروف. يا كلمة الشوق الرحل من زول ولوف يا وجعة القلب العشق و راجي العطوف يا رجعة الولد السفر حولك يطوف إشتهيك لما ترحالك يحوم جواي يتقاطر نغم يدخل مساماتي العدم يرحل يسيب حرفي العشم خلاني لا موجود هنا لا راحل معاك سفري الألم إشتهيت رحلتنا فيك يا امدر يا مارقة من النيل يا دخلة جوة النيل من شارع الضفاف اللامي كلماتي الأمل لي سوق الالم سوق الفهم و الحفلة ترتيل الغنا و اللمة تنزيل المنى و الجرتق دموع تنزل مطر و الفهم الحنين نسمات غزل و الرمز البيرسم لوحة الزول الأمل فرشاتو ألوانك و غناهو بستانك و رحيلو جياتك وتراً دخل جوه المسام و أتغزل الوتر الكلام رحلة حروف بين الغناوي و الحكاوي و جوة من صمت الكلام إشتهيتك لما فات فيني الفوات و أنا في محطات رجعت الزمن اللي فات واقف على كل الكلام شايفك و ماليني الكلام وانا مشتهي اللحظة البتجمع بيني بينك و الكلام ما بتكتب فيك الكلام يا كل شئ من كل شئ يا روعة الحرف السلام يا رقصة الجرف المنمق يالزهور مليان عطور يا فجعة العشم الملام يا رجعة من عمق الحضور يا رحلة من قلب الرحيل و الإلتزام يا حرفي لما يغني يرقص بشتهيك ترقص معاي كل الحروف و الناس و كمان رمل العتامير و غابات الصنوبر و حتى الحلة لما يمر نسيمك و إشتهيك وريني بس كيف الوصول يا كل معني الإلفة و الريد والأصول
و إتقسمت أفكاري زيها في المشي Wad Elmalik Wad Elmalik
و إتقسمت بين عنفوان الكلمة و الروح و السراب وبين التسامي و كلمة الشوق الرقد إتقسمت في كل حد و بين المسافات بين عناد النظرة و شوق الفطرة و تقسيم الجسد بين أني جاييك عن قصد و بين الوتر لمان يغني بي كل اللغات النهايات الجديدة و بين تباريح الحروف إتقسمت قاصداني من دون الخلوق و أنا ما بروق شايلني سهم العين عشق شاقيني .....شق دافن شعاع العين ...........دفن بين الضلوع جوة القليب و إتقسمت نظرات عنيفة بسمات خفيفة تدوزن الوتر الفرد و ترجع العقل الشرد إتقسمت ما بيني و الوتر الفرد و إتقسمت جواي و نظرات الجسد و أنا بين مسافات الكلام و في شوارع الهم الرقد و دندنات حرفي المسقم و منفرد خاتيك في صدف البحر كاتبك عنادك و إفتراض الرجعة رغم الوجعة و الحرف الفرد نغمة غناوي الحلة في زمن الحصاد و عودة الولد الوحيد من غربة العمر البعاد و طلة الوردة الحنينة في بستان عنادك و السهاد و عودة من طول الغياب و الغربة من عينيك و راحة قلبي لمان يستريح فوق الخدود نظرة رضا و بسمة ميعاد راسم كلامك و العنـــــــــــــــــاد رغم الكلام و كل القصص و كل الحكايات البقت مكتوبة في كل الكتب و إتقسمت قدامي في مشية غزال شال مني كل النوم... و اداني السهر مشية غزال .... زي بانة في عنفوان الريح تخاطر بالمشي و أنا منتشي بالمشية و الوقفة و تجنب كل نظرات العيون جد منتشي و إتقسمت أفكاري زيها في المشي و أنـــا منتشـــــــــــــــي
07-27-2011, 05:37 PM
معتز زيزي معتز زيزي
تاريخ التسجيل: 11-24-2009
مجموع المشاركات: 1529
ندهت فجرك بي تفاصيل الكلام الجايي منك و منفعل و من عميق الموج وترديد الغنا ناديت فواصل رجعتك ناديت حروف الخوف و ترياق المواجع و رددتك حنين و ركبت زورق من دثارك و ضحكتك شديت حبل فجر الصبر و رفعت ساريتك مع ريح المخاوف و ضحكتك و قصدت إتحدى العناد و قصدت إتحدى البعاد رغم إنحياز حرفك إليك و رغم إجتياز حرفي البجيك لي كل أسوار العناد و كل اسرار البعاد و قريت عيونك خفيةً وقريتني في داخل عيونك فجأةً و لقيتني زي ضل غيمة ممدودة من جواك و لي زي نقطة الغين في الغرام لقيتني قاعد في العناد وواقف على كلمة تعال أو ما تعال و متوسد اطراف الرموش و باسط إيدي علي خدود مليانة من أندى الورود و ملون الخد بالصفار و مدوزن الغنا يا غناي ناديت صباح فجرك عشا وفضلت منتظرك شروق أو إنبثاق ضوءاً قسى رغم العناد الفي المراسي و جوة أصدافك بجيك شان أملى عيني من عينيك و كلام كتير ما بيتكتب ولا حتى بي حروف الدهب أو حرفك الكاتب عنادك عنيةً و راسم على سور البحر كلمة بجيك و أنا ممتطي الفرس البجيك
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معتز زيزي
فيس بوك
تويتر
انستقرام
يوتيوب
بنتيريست