|
|
 بوست مسروق من سارق ودعوة لسرقته ان امكن
|
أسماؤنا السودانية القديمة الأصيلة، كان من الصعب بل المستحيل بأن تأتي لها باسم دلع، فمهما بلغت براعتك فلا يمكنك أن تدلّع أسماء مثل: بلة، الطريفي، أب جيبين، التجاني الخزين، عجبين، الزبير، أب كساوي، الصديق، فضل المولى، فتح الرحمن، عبد الجبار، البشير،عكاشة، الجنيد، تيراب، الريّح، الماحي، حمد النيل، حسب الله، جبارة الله، أب سقرة، البي كيفو، تميم الدار، جبر الدار، عمسيب الجاك، الجزولي وغيرها..
عليْ النعمة تحاول تدلع أي واحد من الأسماء الفوق ديل إلا ضهرك (كَع) ينكسر، لأنها أسماء قوية زي الخرسانة.. أسماء مضببة ضد التدليع زي العكاكيز.. أسماء أهلنا زمان أسماء رجال وما في أي طريقة لتمييعها أو تدلعيها،
حتى النسوان عندنا كان أسماهن صلبة ومحتشمة، وتنافس أسماء الرجال! في قوتها وخشونتها، فنلقى أسماء [B]مثل ست النفر، الساتر الله، أم حقين، البتول، سكينة، التاية، نفيسة، النخيل، أم زين، بت الجقمتها وغيرها، والواحدة حتى لو أهلها كانوا متحررين، بالكتير يسموها الصندلية، ومع ذلك ما تقدر تشوفها أو تشم ريحتها، النسوان كانن بنات خدور...
والراجل ذاتو بيكون معجب باسم أمو المحتشم وتلقاهو يحلف بيهو في الصغيرة والكبيرة فنسمع: أنا ولدك آآآ ام زين .. أنا ولدك آآآ البخيتة... هسه أولاد الزمن ده يقولوا شنو ويحلفوا باسم منو.. معقول الواحد يقدر يقول: أنا ولدك يا عبق أو أنا ولدك يا رانيا؟
أهلنا الكبار الزمان كانوا ما بعرفوا الني وكل شيء عندهم نجيض. الني بدوهوا النار..
عليْ الطلاق تنطق الاسم كده لما شعرة جلدك تكلّب، وتتنفخ وجضومك تتورّم من العجب والخيلاء بهذه الأسماء
أب كريق في اللجج
سدّر حبس الفجج
عاشميق حبل الوجج
أنا أخويا مقلام الحجج
أبشر آ جنا .. حررّم تبشر.. أبشر آ جنا التقدْ مركوبك..
مش زي أسماء الأيام دي، شدة الأسماء ما بقت مايعة تقررررّب تخت الاسم في التلاجة عشان يجمد ويبقى اسم رجال.
شوفوا الأسماء دي: وائل، وضاح، وحيد، وليد، وديع، ربيع، مازن، تامر، لؤي، راني، هاني، نادر، حمادة، طلال، أيمن، مهند، إيهاب وغيرها.. والأسماء دي رغم مياعتها لكن الناس برضو دلعوها، فحصل ليها ما يعرف في اللغة بتمييع المايع وهو محرّم لغوياً فسمعنا ب: هنو، ولي، مزوني، تموري، عموري، ندوري، أيموني، هنودي، هوبة وغيرها من الأسماء المايعة الما شادة حيلها..
وكذلك غناهم كان غناء رجال وأصواتهم كانت أصوات رجال،
كان المغني يغني الليل كلو بدون مايك وصوتو تلقاهو زي الجبخانة
يا ليل أبقالي شاهد على نار شوقي وجنوني
وناس زمان ديل حتى كعكهم كان كعك رجال.. تدخل الكعكة في خشمك كده لما يغلبك تلوكها وتقعد تقرقش فيها كُرُم كُرُم زي الخروف القاعد يصقع في الجرة. والآن جابوا لينا الكعك المايع بشتى أنواعو تدخل القطعة في خشمك تجي تلوكها تلقاها عملت (سواح) وما تعرف ! نفسك هل أكلتها ولا ما كانت في قسمتك..
نفس الشيء ده بينطبق على الولادة، زمان الواحدة تلد من خمسة لعشرة وكل سنة تساهم مع زوجها في مصاريف البيت بإنجاب طفل جديد، ومرات لو الظروف ساعدتها ممكن في نفس السنة تلد طفل وتشرع في وضع حجر الأساس لطفل جديد، ومرات الراجل ذاتو من كترة الولادة، ما بعرف أسماء أولادو ومنو الأكبر ومنو الأصغر فيهم.. الراجل يسأل مرتو: إنتِ آآآ الزينة دحين كبير ضيف الله ولا كرم الله ؟ فتجيبه الزينة باستغراب: أجي يا راجل: شن جاب ضيف الله لكرم الله! أنا لما ولدت كرم الله ده، ضيف الله كان يا دوووب بيحبا، لكنهم الاتنين مولودين! في نفس السنة المات فيها خالي عبد الرحمن..
بنات الزمن ده الواحدة إلى أن يتخرج ولدها من KG2، حتى يقولوا ليك فلانة قاعدة تتوحّم.. وهو شن الوحم؟ الواحدة وحمها ذاتو مخالف وضد العادات والتقاليد.. تلقاها متوحمة ليها على تفاح لبناني أو زبيب إيراني أو عنب إيطالي أو مهند تركي، فيطلع ليها الولد مو نافع ومنعّم ومرخ رخ ،والواحدة أصلها ما بتراعي ظروف زوجها.. زمان حتى وحم حبوباتنا وأمهاتنا كان وحم رجال ووحم بسيط وسهل التنفيذ ، الواحدة تتوحم على أم بقبق فيقوم يطلع الولد لايوق وعبيط أو تتوحم على ويكاب مرس فيطلع الولد بتاع مرايس وشطوط! وكمونية .. نحن ناس بتعيش حياتها بالكمونيّة والنيّة السليمة)..
ـــــــــــــــــــ
دي الذكورية الجد يا بتاعين الجندر
|
|
 
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: عبداللطيف حسن علي)
|
| Quote: لما الكلاب كانت بتسك الشفّع وتشرط هدومهم.. الآن نبيحها ذاتو بقى مشروط.. زمان تجي ماشي تلقى الـكلــب منتظرك في الطريق مليان جسارة وعنفوان ولسانو حالو يقول يا دنيا ما فيك إلا أنا، أما الآن فالكلاب بقى مغضوب عليها وضالة ومهمشة |
الطاهر وطار ، في رواية الياطر قال علي لسان
احد شخوص الرواية ان الـكلاب اصلا كانت ذئاب حضرت ذات
مرة لتهجم علي قصر ملك في هجوم شرس وفريد من نوعه
ولكن الخدم داخل القصر باوامر من الملك اخذوا يرمون
لها ببقايا الطعام وبكميات كبيرة ، ومن يومها تحولت
الذئاب الي كلاب ..لكن بعضها رفض الفتات والخنوع مع
الاخرين ومنهم من رجع الي الغابة ومنهم من استتشهد وهو
يقاتل ..
لكن كـلاب اليومين ديل مقهورين سااااكت في ظل ارتفاع
المعيشة واللحمة اسيادهم مالامين فيها ، يعني ماحنكشة
ياصاحب البوست الاصلي ، دا قهر قهههههههر زينا واحد!
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: عبداللطيف حسن علي)
|
| Quote: مشيت لقوقل قال لي الهناي فتشو في بلدكم الهناي داك |
لخصوصية الهناي
فنحن ننادي الشخص في التذكير
به حين نعجز (هناي داك ياخي)
وللشيء نقول هناي
وهكذا لكن أترى هي تتبع لأهلنا الرطانة أم للعرب
قالوا مرة أحد الملوك كان يعمل معه دنقلاوي طبّاخاً
وأجاد طبخ صنف من الأصناف أعجبت الملك
فقال: ويش اسمه
السوداني أسرع بقول اسمه هناي ياخي
فما كان من الملك إلا أن قال والله هناياً زين
ومن يومها أخذ الصنف اسم هناي وبأمر الملك
شفت كيف؟
--
لكن يا عبداللطيف
اسم الدلع يتوقف على صاحبة الشأن أم المسمّى
وبما أن القرد في عين أمه غزالة؛ شوف بلّة قال ليك شنو؟
المهم حوّل البوست إلى مسابقة
في اختبار الإتيان باسم الدلع
وستجد دلال ما في زيّه
| |
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: عبداللطيف حسن علي)
|
الأخ العزيز عبد اللطيف تحية و سلام
محمد بن عبد الله بن عبد المطلب بن هاشم و اسمه عمرو بن عبد مناف و اسمه المغيرة بن قصي بن كلاب بن مرة بن كعب بن لؤي
العاص بن وائل ( أبو عمرو بن العاص)
خالد بن الوليد
هفهاف بن مهند الراسبي (من شهداء كربلاء)
محمد بن تامر التناوتي النفزاوي (ق: 5هـ / 11م)
وضـّاح اليمن (توفي 89 هـ/708 م)
الحسن بن هانى ( أبو نواس)
الصحابي أحمر بن مازن بن أوس بن النابغة
خريم بن أيمن ( صحابي )
حسام بن عبد الرحيم ( دا أنا) ههههههه ..
بعدين ياخ الرجالة بقت ما عضلات و أسامى تخوف , الرجالة بقت (physics) و روؤس نووية و حرب معلومات و سوفت وير و ...
سمعنا تحت تحت زمان مصنع الشفا ضربتو مراهقة عمرها 18 سنة ..
لك خالص التحايا ..
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: حسام عبد الرحيم)
|
Quote: يا اخي بله البديت بيهو دا
فيهو حلاة دلع
الله لا يوريك
بلالي
وبلبل
واتا ماشي
يعني حكاية
والكويس كلها متعلقة بالبلل
والخضرة
الماء والوجه الما كعب داك
كان في داعي تختني يا اخي مع الاسماء
الجامدة البتخوف ديك يا اخي
مع تحياتي واحترامي وعاشت الاسماء
بلبل ههههههه |
يابلة كدي رووق المنقة
انت عايز تدلع نفسك براااك
اها ناس بلالي وبلبل ديل بينتموا لثقافة الزمن الجميل الراجل داك هههه
غايتو بطريقة ناس الزمن دا تطق الاسم في عجزو بورا ممكن يقبل الدلع
يعني يقولوا ليك بلبولي وبكدا نكون خشينا في فقدان حكايةالمنطق التعسفي
شفت بلة دي بتجنن المصريين جن ويقروها ليك بطريقة تحير البلي زاتو
ودا البثبت اصلها السوداني (الكوشي ههه كحضارة بشاشية خالسة لوجه العنصر الزنجي)
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: حسام عبد الرحيم)
|
Quote:
محمد بن عبد الله بن عبد المطلب بن هاشم و اسمه عمرو بن عبد مناف و اسمه المغيرة بن قصي بن كلاب بن مرة بن كعب بن لؤي
العاص بن وائل ( أبو عمرو بن العاص)
خالد بن الوليد
هفهاف بن مهند الراسبي (من شهداء كربلاء)
محمد بن تامر التناوتي النفزاوي (ق: 5هـ / 11م)
وضـّاح اليمن (توفي 89 هـ/708 م)
الحسن بن هانى ( أبو نواس)
الصحابي أحمر بن مازن بن أوس بن النابغة
خريم بن أيمن ( صحابي )
حسام بن عبد الرحيم ( دا أنا) ههههههه ..
بعدين ياخ الرجالة بقت ما عضلات و أسامى تخوف , الرجالة بقت (physics) و روؤس نووية و حرب معلومات و سوفت وير و ...
سمعنا تحت تحت زمان مصنع الشفا ضربتو مراهقة عمرها 18 سنة ..
لك خالص التحايا .. |
مداخلة جميلة ياحسام رغم كمية الاعراب الفيها!
لذيذة المراهقة اللي كانت بتلعب بالنصيبة الضربتنا وماعارفينها
ليوم الليلة دي !
نحن ماعندنا نوع الرجالة العلمية دي ، مش احسن نرجع لناس جيب الله
وجبارة الله ديلاك ..
بعدين ياحسام الاسماء دي لو موجودة قبل التاريخ برضو في احساسنا
حنكوشة لانها ليست من تاريخنا ، مجرد استعراب خلوي زي ماقال
محمد الجيلي !
انت اسمك قوي لكن قابل للتمييع الشديد لدرجة ابتعاده عن اصله
القاطع الي كلمة علي وزن هشومي وايموني الخ اللغوسة
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: عبداللطيف حسن علي)
|
| Quote: شوفوا الأسماء دي: وائل، وضاح، وحيد، وليد، وديع، ربيع، مازن، تامر، لؤي، راني، هاني، نادر، حمادة، طلال، أيمن، مهند، إيهاب وغيرها.. والأسماء دي رغم مياعتها لكن الناس برضو دلعوها، فحصل ليها ما يعرف في اللغة بتمييع المايع وهو محرّم لغوياً فسمعنا ب: هنو، ولي، مزوني، تموري، عموري، ندوري، أيموني، هنودي، هوبة وغيرها من الأسماء المايعة الما شادة حيلها.. |
:( عبداللطيف راجل ظريف
سمعت نكتة السكين الخاتيها زولك لليوم الأسود، وزولك قاليهو "بالله في يوم أسود من ده؟" هاهاهاها كان ما عارفها برسلها ليك في الخاص.
تحياتي يا حبوّب
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: نادر)
|
تحية لكم عبد اللطيف حسن علي
ولكل المتداخلين
البوست دا ممكن يكون مشروع نقاش مثمر
لو إستمرينا في جزئية الكلاب المدجنة دي
أو الكلاب الحمائمية (من الحمام الطائر)
غايتو يا عبد اللطيف لو وريتني الليلة جبتها من وين الكوبية دي ما بتقصر ؟
تحياتي
عاصم فقيري (إسم غير قابل للدلع)
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: Asim Fageary)
|
تحياتي يا عبد اللطيف (طوفي) وضيوفه الأكارم
هذا البوست كتب لأول مرة هنا في هذا المنبر وتم نقله ربما لأكثر من 100 موقع سوداني، وبعضها نقله مبتوراً وبعضهم بدون خجل نسبه لنفسه.
الموضوع في الأصل عبارة عن بوست كوميدي ليس الغرض منه التقليل من الأسماء، إنما تناول أسماء الدلع بطريقة ساخرة ليس إلا مع المفارقة
الكبيرة عند المقارنة بين الأسماء البتملى الخشم وبين الأسماء الصغيرة من حرفين وثلاثة وأربعة حروف.
وبجانب الأسماء تناول البوست اندثار بعض العادات والأشياء القديمة الجميلة والموضوع إن شئت يمكن أن تسميه (نوستالجيا)..
أغلب النقاش انصب في الأسماء وترك بقية المواضيع التي تناولها الموضوع.. وكثيرون تحسسوا وفهموا أنني أهاجم الأسماء التي ذكرتها في البوست
وأنني أحاول أن أفرض على الناس أن يسموا أبناءهم وبناتهم بأسماء قديمة أكل عليها الدهر وشرب وقد قام مجموعة من شباب منتدى سودانت
(على ما أعتقد) بالرد على سوددانيزأونلاين الموقع الذي نقلوا منه الموضوع وكأن المسألة حرب بين منتديين..
سوف أعود للتعليق على البوست إن شاء الله .
مع أكيد الاحترام
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: الرفاعي عبدالعاطي حجر)
|
مرحبا مجددا عبدالفتاح ابوشيمة
بالمناسبة اسمك المفروض يكون في اللائحة الفوق
قبل جيبين مش بلة
Quote: لخصوصية الهناي
فنحن ننادي الشخص في التذكير
به حين نعجز (هناي داك ياخي)
وللشيء نقول هناي
وهكذا لكن أترى هي تتبع لأهلنا الرطانة أم للعرب
قالوا مرة أحد الملوك كان يعمل معه دنقلاوي طبّاخاً
وأجاد طبخ صنف من الأصناف أعجبت الملك
فقال: ويش اسمه
السوداني أسرع بقول اسمه هناي ياخي
فما كان من الملك إلا أن قال والله هناياً زين
ومن يومها أخذ الصنف اسم هناي وبأمر الملك
شفت كيف؟ |
حسب مجلد تاريخ العرب قبل الاسلام ، السودانيين ديل
كانوا موجودين ومذكورين في تاريخ العرب في الجاهلية
ومابعيد يكونوا دخلوا كلمة هناي دي منذ ذاك التاريخ
لانوا ما اظن في جخنون في الدنيا يخلوا من ناس اللخو
Quote: اسم الدلع يتوقف على صاحبة الشأن أم المسمّى
وبما أن القرد في عين أمه غزالة؛ شوف بلّة قال ليك شنو؟
المهم حوّل البوست إلى مسابقة
في اختبار الإتيان باسم الدلع
وستجد دلال ما في زيّه |
شفت نورالدين قال لي شنو :
يا طوفي
واصحابي لما يدلعوني بقولوا لي ياعبداللطيف حسن علي والزمان ترللي
الاسم يطول زيادة زي الفريق طيار ركن معاش منو كدا معتمد العاصمة
القومية وامين الجبهة القومية الاسلامية ماعارف شنو زمن الديمقراطية الفاتت
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: عبداللطيف حسن علي)
|
Quote: :( عبداللطيف راجل ظريف
سمعت نكتة السكين الخاتيها زولك لليوم الأسود، وزولك قاليهو "بالله في يوم أسود من ده؟" هاهاهاها كان ما عارفها برسلها ليك في الخاص.
تحياتي يا حبوّب |
غايتو عندنا صاحبنا احمق اسمو نادر ح يزعل بالجد وممكن يقول لي
زولك دا اسمو منو يعني ، الامين جميز ولّ حيدر حسكة ول عبدالرصاع
كفتيرة ههه، منتظرك علي الخاص عشان نشوف السكين بتاعت اليوم الابيض
سيدها اسمو منو اكيد مابتنطق عشان كدا مافي داعي للسكين
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: عبداللطيف حسن علي)
|
Quote:
غايتو يا عبد اللطيف لو وريتني الليلة جبتها من وين الكوبية دي ما بتقصر ؟ |
طولنا من شوفتك عاصم فقيري ، الكوبية دي مابعيد تكون من الموية
لانو الواحد بقا يهضرب براهو من الصباح والقهر القهر من اي حاجة ماماشة كويس
Quote: البوست دا ممكن يكون مشروع نقاش مثمر
لو إستمرينا في جزئية الكلاب المدجنة دي
|
طبعا الاشارات المتناثرة هنا وهناك كثيرة وربما تقود الي النقاش
الذي تود ، الطاهر وطار قال الكـلـب ليس هو نفسه وانما تحوله
بعد ان قبل الفتات من الموائد بدلا عن قتالها..اشارة واضحة للذئاب
المتحولة في كل مكان ..
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: عبداللطيف حسن علي)
|
اها يانورالدين القلبت عبداللطيف طوفي
اقول ليك نوروا ، نورين برضو ماطلعتك من قائمة
الاسماء الفوق ديك !!
المهم ماكتبته هو الاهم..
والموضوع بكل تاكيد لايعدوا كونه مزاحا جميلا وزهجة
سودانية خالصة من الدنيا
حياة الناس بتمشي نحو الاسهل والاجمل ، مش ناس القروش بتزوجوا من ناس القروش
والسمحين من السمحات ، وتيب ، ما لازم يختفوا ناس جبارة الله وجبر الدار
وست النفر والرتينة ويظروا ناس ملاذ ووابل واسرار، ياخي في يوم من الايام
الناس كانوا بيضبحوا اجمل زول عندهم عشان النيل ، ناس كانت نفوسها غليظة
ولكن تهذبت ..
حتي قوانين الاعدام هناك دول اعادت فيها النظر ، كل شئ يتجه للاجمل
ونحن ماشفنا حاجة لسة
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: Nasruddin Al Basheer)
|
Quote: نصر الدين .. نصر الدين بالصاد يا مولانا ..
كمان جابت ليها سرقة ومغاباة معرفة.. |
قريت اسمك نورالدين ، معليش انا غلطان
حقوق طبعك محفوظة في العنوان !
يعني مافي مغاباة عرفة زي مابتقول
وليه تفترض اني عارف انك صاحب البوست الاصلي
مصلحتي شنو اخفي معلومة زي دي وانت ممكن تجيب الرابط
بتاع البوست الاصلي ..
وليه انا كتبت بوست مسروق من سارق هو الاخر اقر بسرقته
هدفنا جماليات البوست ومفارقاته ليس إلا
ماتبقي حاد ساي يانصرالدين !
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: عبداللطيف حسن علي)
|
Quote: قريت اسمك نورالدين ، معليش انا غلطان
حقوق طبعك محفوظة في العنوان !
يعني مافي مغاباة عرفة زي مابتقول
وليه تفترض اني عارف انك صاحب البوست الاصلي
مصلحتي شنو اخفي معلومة زي دي وانت ممكن تجيب الرابط
بتاع البوست الاصلي ..
وليه انا كتبت بوست مسروق من سارق هو الاخر اقر بسرقته
هدفنا جماليات البوست ومفارقاته ليس إلا
ماتبقي حاد ساي يانصرالدين !
|
تحياتي يا عبد اللطيف
يا اخي أنا بضحك معاك وما قاصد حاجة غير كده يشهد الله
والدليل إني واضع وجه ضاحك في المداخلة بتاعتي..
المهم.. واصل ومتابعين معاك..
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: Nasruddin Al Basheer)
|
Quote: تحياتي يا عبد اللطيف
يا اخي أنا بضحك معاك وما قاصد حاجة غير كده يشهد الله
والدليل إني واضع وجه ضاحك في المداخلة بتاعتي..
المهم.. واصل ومتابعين معاك.. |
انا اتعلمت الوجوه الضاحكة دي مخصوص
عشان حوادث المداخلات دي (الشكر للامين البشاري)
لكن مرات كتيرة بطء النت يظهر علامة المرور بعدما
يحصل الحادث
لاعليك يانصرالدين!
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: عبداللطيف حسن علي)
|
من اكبر المفارقات ان يهدد البشير ونافع
وعلي عثمان وكرتي يوميا الشعب بابشع الالفاظ
ولاياتي رد الفعل مساويا للفعل بل وجوم في الوجوه
وقهر ملامحه لاتزول ابدا...الصمت سيد الموقف
صمت في كل مكان ، حتي اصبحنا نسمع صوت الصمت
السياسيون اليوم يتحلون بقدر كبير من الصلف
وقلة الادب مع شعبهم !
فهل تأكدوا من عدم قدرة الشعب علي رد الصاع ؟!
| |
|
|
|
|
|
|
|
|
|
Re: بوست مسروق من سارق ودعوة لسرقته ان امكن (Re: عبداللطيف حسن علي)
|
عبد اللطيف
تحياتي الطيبة ورمضان كريم
وين مقامك فاقدك في حوار طويل عن العلمانية وضايع الزمن من اصدقاء الامس واليوم الشيوعيين بعضهم
يري ان العلمانية الدعوة لها غلط ولها معاني مش كويسه
المهم تعال في بوستاتها البهناك
الاسماء الاتية غير قابله للدلع
باب الله
حبيب الله
جار توبو
العكيني
فضل الساتر اسم لانثي
حوض العاشم اسم لانثي
حواية الله
منة الله
هبة الله
وقيع الله
الشعراني
النوارني
فضل السيد
الكارب
الناطق
لك التحية والاجلال اذا تذكرت بجيك راجع
| |
|
|
|
|
|
|
| |
عبداللطيف حسن علي
محمد الجيلى
عبدالفتاح أبوشيمة
بله محمد الفاضل
حسام عبد الرحيم
Asim Fageary
Nasruddin Al Basheer
الرفاعي عبدالعاطي حجر
فيس بوك
تويتر
انستقرام
يوتيوب
بنتيريست