|
|
 أضحك مع أبو الزوز.. /القاموس اللغوى الإنقاذى!!!/
|
بلا مقدمات ندخل لعالم القاموس اللغوى الإنقاذى و الذى يحتوى على كلمات تمثل الأنقاذ و تتمثل بها الإنقاذ..
و أحبها إلى نفسى على الإطلاق كلمة ( رويبضة)
فى واحدة من غرف الجات العربية، الخلجيين بيتونسو (السودانيين كسلانيين و ما إلى ذلك)
واحد سودانى نطه فى الخليجى و هاك يا شكل، السودانى قال للزول داك : يا رويبضة!!
الخليجى: أش هذا يا سودانى، ترى هذا عربى؟؟
السودانى: أيوه عربى..
الخليجى: هذا الكسلان حتى ما يريد يصلح الإمـلاء!!!
|
|
 
|
|
|
|
|
|
|
|
Re: أضحك مع أبو الزوز.. /القاموس اللغوى الإنقاذى!!!/ (Re: Abuzar Omer)
|
ملف السلام و ملف الأمن و ... و هلمجرا
مشيت أفتش فى الملفات الكتيرة دى، أقوقل بى جاى و أقوقل تانى و تالت.. بس بى نية طيبة ( ما بغرض السرقات القوقلية)
لقيت ليك ملف و الملف دى إنقاذية خالصة لوجه ...
المهم ، لما كترته اللف و الدوران من ملف لى الملف. القوقل جاب لى ( قوم لف )
ياخ قعدة أضحك ضحك هستيرى.. و ما عرفته القوقل ده قاصدنى أنا، و لى قاصد الزول الفارة الجاب الكلمة دى للقاموس الإنقاذى...
| |
|
|
|
|
|
|
|
|
|
Re: أضحك مع أبو الزوز.. /القاموس اللغوى الإنقاذى!!!/ (Re: Abuzar Omer)
|
الإحتساب
واحد داير لى من زول قروش
كلما الزول يجى داير قروشه، يلقى ليك الزول شادى الناس (نحتسبه، نحتسب، نحسب، ...)
يوم صاحب القروش زهج، و قال ليهو ياخ مع الإحتساب الكتير ده ما تحسب لى قروشى!!!
يداك ردة عليهو: قال ليهو الكلام ده كلو ليك إنته عشان تحتسبها، ياخ إنته ما بتفهم؟؟
| |
|
|
|
|
|
|
|
|
|
Re: أضحك مع أبو الزوز.. /القاموس اللغوى الإنقاذى!!!/ (Re: عبدالكريم أحمد الامين)
|
حياتى يا عبد الكريم ياخ
عساك طيب و الأسرة كمان..
بمناسبة ج ا خ + يا شيخنا دى
كان عندنا واحدة شابة شغالة فى مكتب مسجل الكلية و كانت نشيطة و بتساعد الناس شديد، لكن جزاك الله خير دى كانت بتقوم عفاريتها ما عارف لى؟؟
المهم.. مرة واحد من الجماعة قال ليها: ج ا خ يا أخت نسيبة!! قالت ليهو: ( تصدق نحنا أنا ما عندى أخوات.. أولاد بس)، ثم ثانياً إنتوا ما عندكم غير الكلمة دى؟؟
الداير يقولا لى يقول لى: جزاكِ اللهُ خيراً ، باللغة العربية الفصحى!!
| |
|
|
|
|
|
|
|
|
|
Re: أضحك مع أبو الزوز.. /القاموس اللغوى الإنقاذى!!!/ (Re: Abuzar Omer)
|
المشروع الحضارى!!؟؟
مرة قالوا الأستاذ قال للتلاميذ أى واحد يطلع ورقة و يرسم لينا فكرتو عن المشروع الحضارى..
الأول رسم ناس بيبنو فى صينية جميلة، و جمبهم ناس بكسرو فى شارع الزلط.. و كتب تحتها (المشروع الحضارى حاجة كدة زى التنمية و التدمير)..
التانى رسم ناس جارية و عساكر جارية و دفارات و بكاسى كندورة،... و كتب تحتها ( المشروع الحضارى زى سباق الدرجات، لا سباق ناس و لا سباق عربات)..
التالت رسم حيوان زى الثعلب!!
الأستاذ قال ليهو: أها نحن نفهم شنو يا إبنى؟؟
الطالب قال ليهو : طبعاً ما ح تفهم أى حاجة يا أستاذ، الثعلوب الحضارى دة تجيهو بى جاى يجيك بى جاى!!
تجيهو بى دقن، تلقاهو مجكس، تمشى الجامع ، يمشى السوق!!!
| |
|
|
|
|
|
|
|
|
|
Re: أضحك مع أبو الزوز.. /القاموس اللغوى الإنقاذى!!!/ (Re: Abuzar Omer)
|
زاد المجاهد!!
قالوا الأولاد أمهم تخت ليهم الأكل دايماً تبيخ و كسرة، و مرات بيلقوا فواكه و شية و حاجات كتيرة مكدسة..
بيسألوا أمهم ده حق منو؟؟ الأم تقول ليهم ده ما حقنا، ده حق ناس زاد المجاهد!!
لما الحاجة دى كترت، الولد الصغير قال لى أمو: صحى يا أمى ناس زاد المجاهد دى بيمرقوا من التلفزيون، يشيلوا أكلهم و يرجعوا تانى؟؟؟
| |
|
|
|
|
|
|
|
|
|
Re: أضحك مع أبو الزوز.. /القاموس اللغوى الإنقاذى!!!/ (Re: Abuzar Omer)
|
الحاجـات الشعبية
السوق الشعبى، الدفاع الشعبى، الإسكان الشعبى، ...
الصيدليات الشعبية ، اللجـان الشعبية، ...
قالوا مرة الرئيس زار ليهو مدرسة و خاطب التلاميذ و بعد داك الأستاذ دعاهو للفصل و قال للتلاميذ يلا ورونا إنجازات ثورة الإنقاذ..
الرئيس بستمع و فى نفس الوقت بناقش مع المستشارين الزيارة البعديها، يعنى ملخوم شوية!!
الطالب الأول قال: اللجـان الشعبية!!
الطالب التانى قال: الصيدليات الشعبية!!
الطالب التالت عجبتو الشعبية دى لكن ما لقى حاجة فجأة قال: الصين الشعبية!!
الرئيس طوالى نطة و قال للمستشارين: لا لا لا يا جماعة، الناس ديل لو دايرننا يجونا هم!!
| |
|
|
|
|
|
|
|
|
|
Re: أضحك مع أبو الزوز.. /القاموس اللغوى الإنقاذى!!!/ (Re: Abuzar Omer)
|
الصالـح العـام!!
قال ليك الراجل نزلوهو الصالح العام، فلس و راسو سخن.. واحد من أولادو الفى المدرسة كل مرة يجى يسأل أبوهو
- يابا الصالح العام ده شنو؟؟
الأبو: يا جنى خلو!!
كل مرة الولد يسأل و الأبو يقول ليهو يا جنى خلو.. يوم من الأيام البيت نشف عدم أى حاجة، و للمساء الناس ما أكلت..
الولد تانى سأل عن الصالح العام..
الجماعة دايرين يجازفو ليهم وجبة. الأب يقول للولد بتاع الصالح العام، أمشى جيب القرقوش الفى المطبخ، لما يجى يرجعو تانى، فى واحدة تحت الطبق، و تانى فى واحدة وراء التلاجة..
أمشى الدكان (الدكان بعيد شوية) جيب موية فول، أمشى الأوضة فى واحد من العراريق فى جنيه جيب بيه زيت سمسم، أرجع فتش فى البناطلين فى خمسين جيب بيها بصلة، أرجع المطبخ جيب باقى الملح. لحدى ماالولد قلب المطبخ و قلب الغرفة و بقى مافى أى حاجة، المهم البوش طلع، الأبو قال للولد أمشى لبتاع الدكان قول ليهو أبوى قال ليك دينى جبنة بجنيه..
طبعاً بتاع الدكان أبى، الولد جاء راجع، لقى الجماعة أكلو البوش و ما خلو أى حاجـة.. الأبو قال للولد بتعرف المطبخ، و الغرفة، و الدكان أمشى شوف ليك حاجة أكولها!!
الولد كورك: ده شنو يا جماعـة؟؟؟
الجماعة كلهم بى أمهم صرخوا بى صوت واحد: ده الصــالح العااااام م م م م!!!!!
| |
|
|
|
|
|
|
|
|
|
Re: أضحك مع أبو الزوز.. /القاموس اللغوى الإنقاذى!!!/ (Re: Abuzar Omer)
|
سياسـة التمكـين
قالوا الحرامية جو فى حلة جديدة، و قالوا لازم ننضف الحلة دى..
إجتمعوا عند شيخهم، و قالوا ليهو أها الخطة شنو؟؟
الشيخ قال ليهم عندنا كم مرحلة، و لابد أن تتبعوا الخطة، قالوا ليهو المرحلة الأولى ياشيخ..
قال ليهم: الكـلاب!!! ما تسرقوا أى حاجة بس تشيلوا لحمة تختوها لل###### تدخلوا فى شوال، لا من شاف و لا من درى..
بعد كم يوم قالوا ليهو، عدمنا الحلة الجريو.. قال ليهم تمشو الحلة بيت، بيت واحد يعمل إزعاج، سيد البيت يطلع، تدخلوا الشوال فى راسو، تسوقوا بعيد،
تدقوا دق النوبة و ترجعوا، بدون إزعاج لى بيتوا.. بعد كم يوم قالوا ليهو دقاناهم كلهم، ما فى زول قال بغم و لا فى زول كلم التانى لانو ما فى حاجة إتسرقت...
أها نعمل شنوا يا شيخ؟؟ الجماعة سألوا.. تمشوا تسرقوا الدايرنو يا بجم!!
قالوا ليهو و ناس السوارى؟؟ قال ليهم ديل أنا بقسم ليهم من نصيبى..
قالوا ليهو: دى حاجة عجيبة، الخطة دى أسمها شنو؟؟
قال ليهم: دى سياسـة التمكــين!!!!
| |
|
|
|
|
|
|
| |
Abuzar Omer
عبدالكريم أحمد الامين
محمد كابيلا
Ahmed Elyas
فيس بوك
تويتر
انستقرام
يوتيوب
بنتيريست