|
|
 مظروف بني واللا راسي بياكلني ... قصه اقعيه عن محاضره بمجلس الوزراء..
|
مظروف بني واللا راسي بياكلني ... قصه محاضره بمجلس الوزراء..
الموضوع القيم الذي تحدث فيه الاستاذ هشام المجمر عن لــمة مجلس الوزراء ذكرني بقصة محاضره قدمتها في مجلس الوزراء عن إتخاذ القرار وامن وتأمين المستندات اخترت لنشرها مساحه خارج موضوع الاستاذ المجمر للاختلاف مع تحياتي للاستاذ المجمر
بالبلدي كدي القصه ومافيها انو في مره من المرات دعاني زول من مجلس الوزراء لتقديم محاضره فيما إعتقد اسمه إن لم تخني الذاكره مركز صنع القرار او حاجه من هذا القبيل.
طبعا الواحد لامن يقولو ليهو تعال حاضر في مجلس الوزراء وكمان عن كيفية اتخاذ القرار بتوقع انو علي الاقل ناس الامن وناس تاكل عيش كلهم بكونوا عارفنوا ليك لي جد جدو واللا دخول مجلس الوزراء ده يشمو قدحه.
طبعا يا زول انا سايق لي اكسنت جديده نيش جاي بي شارع النيل وعلي الرغم من انو مافي حاجة تزمبر قدامي واللا وراي ، العساكرالقافلين شارع النيل وكل واحد مادي بوزو شبرين من الحر والعرق البهتف مالي صدروهم وضهورهم ، مما شافو ليك الاكسنت والزول المتوهط اخر بدل ونظارات سوده قالوا القبه فيها فكي . ومما شافوني بأشر شمال داير اسألهم ادخل مجل الوزراء بي وين ..راحو موقفين ليك الحركه وهاك يا مرور الكرام لامن دقيت ليك في باب المجلس عدل . في خشم الباب مرق لي واحد وبي منتهي التهذيب سألني سعادتك منو ؟ قلت برفسير محمد مصطفي مجذوب. قال لي جاي اجتماع المجلس؟ قلت ليهو لا عندي محاضره هنا . الراجل قال لي اتفضل. يا مؤمن ومصدق انا اتبهرت وقلت حضاره وتهذيب زي دهولا في اروبا ما شفت زيها . اول ما دخلت لمحت لي ضل يمكن يشيل ليهو حكاية بتاعة تلاته اربعة عربات من النوع الجامبو .. قلت رحمتك يا كريم ....اركن هنا .
وانا بفتح ليك في ضهرية العربيه عشان اتناول منها شنطة اللاب توب وشنطة يد من النوع السفري الخفيف. . مرقو لي من وين ما عارف ، تلاته صبيان الواحد فيهم يجر التمساح من البحر. وكل واحد لابي ليهو Walky-talky ودافن ليهو مسدس من النوع البحاول يخفي نفسو ولكن هل يخفي القمر في سماهو .. اتحاوطو ليك الجماعه عربيتي زي التكني يازول عارضتها ليك في ال Runway . ومن بعيد هناك حربسوا ليك نفرين جناح يمين وجناح شمال كل واحد فيهم شايل ليهو مدفعا ماخمان.
جاني ليك راس الحربه بتاع التشكيله. والباقين قاعدين يكحلوني لي ليك من بعيد بي قعر عينوهم. يازول راس الحربه راح داخل ليك معاي في سين وجيم. قال ايه ؟ قال لزوم يتعرف علي .. عرفتو طايره البدا يسألني ليك سؤال منكر ونكير .
انت منو؟
والجابك هنا شنو؟
مفروض تقابل منو؟
عندك معاهو مواعيد؟
تلفونو كام؟
قال ليك قاعد وين ؟.
يا زول انا مليت وقلت ليهو يا ابني صلي علي النبي هو انا داعني عشان احاضر ناسكم ديل ...واللا معزوم فطور عندكم ؟
هو الموضوع شنو تقعد تحاكك فيني كدي . ويعني شنو هسع ناطين علي بي هنا وهناك بعد ما اتحشرت جوه المجلس . سمح ما سألتوا أسإلتكم هناك في شارع النيل قبال اتورط جوه كدي.
الراجل راح قالب الموضوع معاي نصو ضحك ونصو .... . وانا العن سنسفيل اليوم الجابني لي مجلس الجن ده.
الشئ المحني اكتر انو فجأة راح سائلني سمح وقفت عربيتك هنا ليه؟
فتحت خشمي وقلت ليهو يا ابني المحاضره العازمني ليها ده طولا ساعتين يعني من 12:00 لي 2:00 ويمكن تجر اصلوا موضوعا كلو شبك في شبك . انا قلت اخلي عربيتي في الضل الكبير ده عشان لامن اجي مارق عشان ما القاها قلايه بوخا مولول.
قال لا يا حاج الحته ده ما بتنفع لانها بتاعت عربية الرئيس .............!
قلت ليهو هي عربية الرئيس دي دفار .......ما الضل ياهو ده حدادي مدادي
قلت سمح ازح للريس واركن في الحته الجمبها دي.
قال لي لا دي برضها ما بتنفع ........... ليه؟
قال دي عشان دي حتة .............شيخ علي
قلت سمح الجمبها؟
قال لي لا .........دي برضها محجوزه لكن كضم ابي يجيب اسم سيدها قلت اكيد تكون بتاعت طيب الذكر قوش واللا نافع واللا مصيبه قدر الليله وبكره ...............
قلت ليهو سمح النتخارج بس وريني ابركن وين ؟
قال لي امشي بي هناك اكان تلقي ليك حته ...........
وانا داير اتحرك .....الراجل قام قال لي ....اها يا حاج ده عرفناهو لاب توب .... الشنطة التانيه ده شايل فيها شنو؟
قلت ليهو مصلياتي وفرشه ومعجون وشوية غيارات ..........
اتوكلت علي الله ومشيت بي هناك وركنت ليك العربيه في حراية تقلي.
بعد ما نزلت لابي اللاب توب وشنطتي السفريه كايس هاك يا حواسه جوه مجلس الوزراء محل محاضرتي.
الف زقاق زقاق و ما لاقي لي زول يعدل لي رأسي.
اخيرا ربنا فتح لي بي واحد من المراسلات قال لي هو ماشي جمب قاعة المحاضره ووصلني لغاية الباب.
النصيحة لله الناس المدعوين للمحاضره كلهم بي امين مجلسهم جو وكانو اخر انضباط و هندمة من نوع البدل اللي بالك عليها.
قلت ليهم انا جيتكم ومتوقع القي قاعتكم مليانه (سفاري) عشان كدي جيت جاهز بي شنطتي.
المحاضره كانت عن موضوعين اولهم اتخاذ القرار والتاني امن وتأمين المستندات. اتكلمت في المحاضره عن المسئوليه التضامنيه والتسلسل الهرمي لاتخاذ القرار وقياس الرأي وإدارة النقاش علي مستوي الاجتماعات المليانه زحمة بلا رحمه . طبعا اخدت راحتي في الحديث عن معالجة مسألة الامن والتأمين مستمدا ماده حيه من دخولي للمجلس وبركنة العربيه والحواسه بلا رقيب ولا عتيد داخل المجلس ... الي اخر القصه.
بعد ما خلصت كلامي كلو انفتح نقاش حر من النوع الفعلا بستحق الواحد يكون مجهز شنطتو السفريه معاه. انا اقتنعت انو النا جاده في انها عاوز تتعلم عشان تحسن ادائها. وفيهم ناس فعلا فهم وعلم من اللي بالك عليه ويعجب اي محاضر لانو النقاش بكون ثر وبشد الانتباه للمحاضر والمتلقي.
عموما لامن قلت سؤال اخير لانو عندي مواعيد قام واحد مسلط قال لي المحاضره وعرفناها يا دكتور وكانت من ادسم المحاضرات اللي شاهدناها هنا في المجلس وانت اتكلمت بشجاعه تحسد عليها واستفدنا منها اكثر مما تصور. بس في حاجه واقفه لي في حلقي وما ليها علاقه بالمحاضره ممكن اسألها. قلت ليهو شنو هي؟
قال لي الشنطه التانيه دي انت علي سفر واللا شنو؟
قال لا والله وانت الصادق .. بس انا لامن قالو لي مجلس وزراء واتخاذ قرارا وامن وتأمين قلت ياواد اصلوا الدنيا ما معروفه والواحد بعد محاضره من النوع العيارو تقيل ده ما بضمن يروح بيتهم ولا بتستضيفوهو يومين ثلاثه. الجماعة اتفقعوا بالضحك وهاك يا تعليقات ... مافي داعي نفتها هنا ..لكن الشاهد عجبتني روح المشاركه والتبسط في النقاش علي الرغم من حرارة الموضوع وجديتو
عموما بعد ما اتخارجت من المجلس اتقلقل في عربيتي البوخا طالع رغما عن مكيفها الشغال فل بلاصت ، جمب الكويتيه موبايلي ضرب . سألني الزول الضارب لي وقال لي انت وين هسع يا دكتور ؟ قلت ليهو جمب الكويتيه . قال لي سمح بركن وارجاني
اتحسبنت ووقفت. لحقني ليك بعد عشره دقايق . قال لي الجماعة اتبسطوا من محاضرتك وقالوا عنك كلام طيب وراح مارق لي مظروف بني وقال لي هاك.
قلت ليهو ده شنو؟
قال لي حاجه بسيطة بس افتحها في البيت. قال ليهو يازول ما بشيل لي حاجه ما عارف المدفون فيها شنو.
قعد يضحك . لامن فتحت المظروف لقيت ليك فيهو 375 جنيه.
قلت ليهو ده شنو؟
قال لي حاجه بسيطه بدوها لكل زول حضر المحاضره. انت ظرفك كان مفروض يكون اكبر لكن الناس إعتذروا وقالوا هم ما قدروا يقروك تقدير صاح لانو ما كانو عارفين انت منو بالضبط ووعدوا يعوضوك في المحاضرات الجايه
قلت ليهو سمح امضي ليك في شنو ؟
قال لي امضاء شنو يا دكتور ... نحن ناس مظاريف ساي.... نظامنا كدي
براي (استرغبت) زي ما ود اختي لامن كان شافع صغير بقول
كدي خلوني من حكاية امن وتأمين دي
وحكاية مجلس الوزراء الممكن بس تعدي البوابه وناس الامن اللي في الوش ديك ممكن تقعد تتحاوم جواهو النهار كلو زول يقول ليك تلت التلاته كام مافي
الحاجه المدوهلاني لي يوم النهار ده انا ما عارف الظروف البنيه دي فساد واللا ما فساد..
وماعارف أكان حكاية الايصالات والامضاءات والحسابات دي بقت في سودان الاعمال بالنيات موضه قديمه واللا شنو
والله اتاريهو المراجع العام وافنديتو ديل ماكلين نيم بي كلامهم الكتير ومسيخ وما جايب تمنو
|
|
 
|
|
|
|
محمد مصطفي مجذوب
فيس بوك
تويتر
انستقرام
يوتيوب
بنتيريست