|
|
 حكايتي مع الرقم (4848)
|
والرقم (4848) هو رقم التلفون الذي خصصته شركة الكهرباء للتبليغ عن الأعطال والشكاوي... بس نصيحة اخوية اوعا تتهور وتتصل بيهو... يبقن عليك اتنين (عدم كهرباء وضياع رصيد)
|
|
 
|
|
|
|
|
|
|
|
Re: حكايتي مع الرقم (4848) (Re: على ميرغني)
|
أمس رجعت من الشغل زي الساعة عشر مسا، لقيت انو الكهرباء قاطعة... انا ساكن في قرية شمال بحري.. اسمها الخليلة... طوالي عملت فيها مقددة والود صحفي لا يشق له عنان... ومفتح وكمان مولود في مستشفى العيون... طلعت موبائلي (ربيكا كمان).. وطبز طبز اتصلت على الرقم (4848).. وردت على بت الكومبيوتر... مرحبا بك في شركة الكهرباء السودانية للغة العربية اضغط على الرقم واحد وللغة الانجليزية اضغـ... ما انتظرتها طوالي ضغطت واحد.. بعدين ما تستغربوا لحكاية للغة الانجليزية دي.. طبعا البلد بقت متقدمة في اللغة الانجليزية وكمان ملانة ناس اجانب بتكلمو بغير العربية... شي يوناميس وكمان يوناميد وغيرهم كتير....
ونواصل
| |
|
|
|
|
|
|
|
|
|
Re: حكايتي مع الرقم (4848) (Re: على ميرغني)
|
قبل ما تواصل يا على :
انا اتصلت اول امبارح ..
الرد جانى انو محادثتى رقم 6 ..
بعد كل دقيقة او دقيقتين بدأ العد التنازلى ..
فى خلال 3 دقائق اتكلم معائ الموظف ..
الساعة كانت 2 صباحا ..
اخد المعلزمات بما فيها تلفونى ..
بعد ربع ساعة جانى اتصال من عربة الصيانة و كانت قريب من البيت ..
الساعة اتنين و نص المشكلة اتحلت ..
بالجد فكرت فى رفع بوست اشادة الى ان صدمنى بوستك هذا ..
و اله على ما اقول شهيد ..
| |
|
|
|
|
|
|
|
|
Re: حكايتي مع الرقم (4848) (Re: على ميرغني)
|
تاني بت الكومبيتر رجعت بلستة طويلة من الخيارات... آخر واحد كان للاتصال باحد الموظفين اضغط الرقم 8... ورانا شنو نضغط الرقم تمانية... وتاني قالت لي انو ترتيبي رقم 8، يعني علي الانتظار لحدي ما يخلصوا السبعة القدامي.. ثم موسيقى اغنية سوداني الجوة وجداني.. ثم بعد كم ثانية كدا، ترتيبك الآن الخامس، طيب مالو برضو صف سريع،، ثم انت الآن الثاني، جاني شعور اني بقيت قدام الشباك .... صلحت قميصي واتنحنحت لزوم تصليح الصوت....
| |
|
|
|
|
|
|
|
|
|
Re: حكايتي مع الرقم (4848) (Re: صلاح أبودية)
|
Quote: بالجد فكرت فى رفع بوست اشادة الى ان صدمنى بوستك هذا ..
و اله على ما اقول شهيد .. |
ود التكينة..سلامات ولك شكري على الطلة ... بس مالك انصدمت قبال ما اجيب سيرة الصدمة .... عموما ربما الحكاية تهميش خاصة انا ساكن في قرية
ــــــــــــــــــــــــ
الاخ ابودية.. سلامات ... بالمناسبة اقترح على ناس 48448 الاستفادة من خبرتك في الطناش والتهميش
| |
|
|
|
|
|
|
|
|
|
Re: حكايتي مع الرقم (4848) (Re: على ميرغني)
|
بس بت الكمبيوتر الله يجازيها خربت السيناريو دا وقامت قالت لي انو جميع الموظفين مشغولين... ياجماعة الخير الصف دا ما كان ماشي كويس وبدون عرقلة.. وحتى لو قلتو انو واحد قوات نظامية عرقل الصف ... طيب الكلام تقولو لزول ماعندو (بطاقة عسكرية)... الشئ البايخ انو منظري بقى بائخ شديد قدام ناس الحلة الحاولت اعمل ليهم اني مقددة... والابيخ من كدا اني وجت المكالمة سحبت رصيدي كلو.. كان خمسة جنيهات كاملة... والقصة لسع ما انتهت
| |
|
|
|
|
|
|
|
|
|
Re: حكايتي مع الرقم (4848) (Re: على ميرغني)
|
هذا الرقم والله غريب من المفترض يكون رقم خدمة مجاني ولكن عند الاتصال به تسمع العجب طبعا ده من يصنف علي انه اكل اموال الناس بالباطل كهرباء ورصيدكمان
ممكن يكون هناك اتفاق بين الشركة وشركات الاتصال علي نسبه معينه
وبرضو كهرباء وسدود
حسبنا الله ونعم الوكيل
| |
|
|
|
|
|
|
|
|
|
Re: حكايتي مع الرقم (4848) (Re: ايهاب الطيب بله)
|
المهم بعد ذلك ذهبت الى موقع العطل، وناس القرية بتناقل المعلومة بعرفو مكان العطل، وجدت ان سلك الكهرباء مقطوع ومرمي في الارض يعني كمين عديل كدا... الحركة الشعبية ماتقدر تعمل زيو... سلك فيهو كهربا ومرمي في الارض والدنيا ليل...
الدور دا بقا الموضوع حياة او موت.. طوالي اتصلت على تلاتة تسعات... على اقل شي ديل بلاش ساكت... رد علي واحد ظاهر انو ما ناقش حاجة في جغرافية الخرطوم... المهم بعد كم دقيقة كدا حولني لزول تاني شكلو من ناس الخرطوم... وطرح علي اسئلة كتيرة.ز. ماقدرت اجاوب على حكاية رقم العمود كم... يا اخي الدنيا ليل والكهرباء قاطعة تقوم تقول لي رقم العمود كم... اعتقد انو ناس الشرطة ما عرفو يختاروا ناس بمواصفات معينة لتلقى مكالمات هامة زي التلات تسعات.. المهم اختصرت ليهو الموضوع انو في خطر على حياة المواطنين وانت وكيفك...
والقصة مستمرة
| |
|
|
|
|
|
|
|
|
|
Re: حكايتي مع الرقم (4848) (Re: على ميرغني)
|
بعد نص ساعة كدا ناس الكهرباء جوا وصلحو العطل، لكن بعد شويتين عادت حليمة لقديمة ورجع نفس العطل، توكلت على الله وجعلت ذلك المساء ليلة مفتوحة للبعوض يتسبيح فيها دمي ودم اطفالي، ربما التزاما بالمثل القائل (الجعلي بعدي يومو خنق) ويعني شنو لو البعوض شرب (كم فنجان دم) على الاقل نجدد دمنا ما دام الحكومة ذاتها وكمان معاها الاحزاب ما عايزة تجدد دمها.
| |
|
|
|
|
|
|
| |
انور التكينة
صلاح أبودية
ايهاب الطيب بله
فيس بوك
تويتر
انستقرام
يوتيوب
بنتيريست