|
|
 جواب للبلد..
|
يمة كيفنك
ان شاء الله طيبي ونصيحي في عضامك
يمة نعلو السكري ماهو تاعبك شي .. باقي انا عارفك آآآبتسويلك رجيم لا شيتين..
وباقيلي ان سجنوكي آآبتخلي شراب الشاي.. يمة خصمتك بالنبي تخلي شراب السكر..
يمة انت ماكي دايراني اجي اشوفك..
يمة عبد العزيز خالي كيفنهو.. لا يبقى كفتو الجن تاني وقال داير يرجع للبلد زي عامن أول..
يمة المصاريف قاعد ارسلن ليكي مع شيخ طه الله يخضر ضراعه..
باقي التحويل من هني قاسي وماهو ساهل شي..
فشان كدة ان بقت اتاخرت لا تقلقي بلقالي زولا نازل للخرتوم وبرسلن ليكي معاهو..
وان بقيتي مشتهالك شي من هني قوليلي.. باقي نزار ود الجزيرة قال مندلي لي أهلو في العيد..
كنت داير اجي واعيد معاكي علي وليداتي لليلي يقروا وما اجزولم..
وزي ماكي عارفي ريم السنة دي ممتحني للمتوسط..
الرسول يمة تدعيلا في صلاتك ووكتين تقعدي في الدرابزين تسبحي مع العصر..
يمة ابراهيم اخوي طول مني آآآبعرفوا مالو قاطع الخبر.. ان شاء الله يكون قاعد يرسلك الجوابات..
وماني عارف ولادو جوا ولا لليلي.. الايام دي ياها ايام جيتن..
الرسول يمة ان بقيتي سويتيلك كعكي ناعم ترسليلي علبة مع نزار حتى ان بقى عتت..
وان كمان ما سويتيهو رسليلي قرقوش وويكة ودكوة..
نزار قالي غاشي السعودية.. قلتلو يشتريلك توبين وجزمة وريحة..
ان بقيتي دايرالك شي تاني كلميني فشان اديهو القروش يشيلو ليكي من جدة..
يمة الرسول خالتي زينب الزرقا كيفنها.. الله بيسألني الشوق كاتلني في دربها..
وان بقيتي شوفتي عم عبد الله قوليلو الغرض ماني ناسيهو وبجيبو معاي..
الرسول تسلمي علي عمتي حواء بت الخضر وقوليلا طارق مشتهي ونستك ومشتهي حرف أليل قراصي بي تركين في التُكل اللااااجوووووووة داك..
يمة ان بقيتي نزلتي علي البلد قولي لي مبروك ود الطيب لا تسوي العرس هسي..
قوليلو ينتظرني لامن اجي.. قوليلو لا يستعجل شي داير اجي احضر ((اللعبي)) ألتو..
وان بقيتي نزلتي علي البركل سلميلي علي خالتي أمونة وأسأليها ان بقت الكرجة لليلي قاعدي تجي تسوي كواريكها في طاقة التُكل..
النبي فيك يمة تسلميلي علي خالتي الصيدة وتقوليلا طارق القاعدي تجضميهو داك بقى كبير وضومة سوالو وليدات..
يمة قولي لي حبوبتي الفردوس ((الجر)) أليل القنديلا أليلي تخليهو لي ووتتكيهو في الحيطي المن تالا ناس موزة.. وقولي لي جدي ود ابو دية يدعيلي..
يمة السلام امانة.. سلميلي علي اخواتي ووليداتن وعلي لطفي اخوي وقوليلو لا تضيق كل شي بيتعدل..
وان الله كتبلي العمر ان شاء الله بجي لي عيد الضحيي.. وبجي أصلحلك البرندة المن تالا التُكل..
يمة الغربة طعيمها مر لكني بصبر بالجبر..
العنوان:
مقابر الصحافة شاهد رقم 4652
تليشة:
وكتين يغلبنا الحنين مانا قاعدين نلقى شي غير الكتابي
دحين سامحونا
|
|
  
|
|
|
|
|
|
|
|
Re: جواب للبلد.. (Re: osman righeem)
|
Quote: ينفضك يا طارق ود نفيسي ان ما سوتني
في السلام وقولهم طيبيييييين و جاينكم
|
والله يا ابو النسب نفسي في مشية للبلد
نفسي يجيبولنا ((الترمي)) جنب حيضان البرسيم
وعمي الطيب يقرن المويي ألت الحيضان
ويقطعلو طماطمايي من من الجروف
ويقلعلو بصلايي ويفقشها ويرشلو حرف
ويقولي يلا تعال أكل وخلي مزازات القمري والدباس
وناكل وهو يجر الشوال تحت تمرايي وياخدلو غمدي
وانا امشي آخدلي غتسي في القيفي
| |
|
|
|
|
|
|
|
|
|
Re: جواب للبلد.. (Re: Magdi Ahmed Elsheikh)
|
Quote: ياسلام لمن تاتي لحظات التجلي......!!
فتنساب الاحرف خلال المسامات .....
فتسقي الانفس شهدا..........!!
|
عيييييييييييييييييك هيا دكتور انت حي
يا حبيب وين الحي بيك
| |
|
|
|
|
|
|
| |
طارق جبريل
الطيب شيقوق
osman righeem
Magdi Ahmed Elsheikh
فيس بوك
تويتر
انستقرام
يوتيوب
بنتيريست