الـــشــاعــــر الــفــحـــل الــدكـــتــور مــحــمــد بــادي،،،هـــــــــوى يا ولـيد يا دلوعة

Quote: انور التكينة هوى يا وليد .. حصل صحاك عز الهجعة شوقا لابداع الدكتور المبدع ود بادى ؟ اقسم بالله ان ذلك الشوق لذلك الابداع يتملكنى دوما .. أعاد الله ود بادى بفنه و ابداعه .. قول ليهو مشتاقين ايها الاتحادى القح .. لكليكما الود و التقدير ..

Quote: محمد الكامل عبد الحليم تحية.....ما يحزن يا عز الدين هو هجرة المبدعين امثال ود بادي وود المكي والقائمة تطول...ورغم انا نقاسمهم الاغتراب الا اننا نظل دوما في ظمأ ان لم نجد كلماتهم المترعة الوارفة الظليلة.... واقع فادح يتركه رحيل علي عبد القيوم...سند...محمد سعد دياب...جيلي عبد الرحمن... لنبدأ مرحلة الحضور غيابا ولا تجد اثرا لود بادي وبقية العقد النضيد.... بالله يا طير المشارق ...هل عرفت لهم اثر .... لك الاحترام

Quote: tariq التحية للاخ الدكتور بادي في كل مكان وزمان واليك اخي عزالدين وضيوفك الكرام من قبل ومن بعد ... والاهداء ... ياوطن هادي وجميل

Quote: Osman Musa عزيزنا ودالفحل سلامات ودبادي من الشعراء الكبار الكبار له التحية

Quote: محمود بكر التحايا النواضر للدكتور ودبادي شكرا لك ود الفحل لتقديم هذا الرحيق وكانت ايام الجامعة ايام ود باي والقدال طلب ياود الفحل ودبادي كتب اعظم مرثية في عمود الشعر الغنائي اسماعين حسن ود حد الزين بالله لو عندك النص نزلوا هنا

Quote: 21-04-2011, 09:45 ص فاروق أبوحوه الوجنات الشعّن بقّن ود العين النايم زرقّن مو زايغ رسيان وميقّن زولهن كان خدران ومحقّن من الشوفه عروقو يطُقّن والله يا عز الدين الله يديك العافيه ياااخ فتحت ليك باباً قاسي سدّو.. من حسن المصادفات أني طيلة هذا الأسبوع كنت أعيد الإستماع لبعض أشعار ود بادي العكودابي الصوتيه سآتيك ببعضها هنا إن شاء الله ونحفظ الكثير لمحمد بادي العكودابي بحكم الجيره كامل المودات

Quote: abdulhalim altilib أخي العزيز / عزالدين عباس تحياتي وتقديري ،،، لقد كتبت عن رجل مبدع ، وشاعر نحرير ، تحلو فيه وعنه الكتابة ، والذي يحز في النفس أننا افتقدناه في ساحة الثقافة والشعر في داخل الوطن ، فقد جرفه تيار الغربة ، وكم كنت أتمنى أن أراه بجانب أولئك الأفذاذ من أضرابه في روعة الابداع وسمو الشعر وجميل نظمه ، وفي شتى مناحي الحياة .. مثل حميد ، والقدال وأزهرى محمد علي والنخلي وغيرهم من شعراء سوامق يشكلون ذاك العقد الفريد الذي أضاء ومازال يضيء أماسي الوطن ويفرح خلق الله ممن ضاقت بهم الأرض بما رحبت ، ولم يجدوا متنفساً لهم سوى الاحتماء بأشعار أولئك القابضين على جمر كل قضايا شعبهم . ليتنا نراه ونسمعه ، مثلما نحن نقرأه هنا وهناك ، في قديمه الذي لا يبلى أبداً ، وفي جديده الذي ، يهبط علينا بين فينةْ وأخرى ، فنسعد به وننتشى حتى الثمالة . ومن حلو قديمه المحبب لنفسي أهديك والآخرين ، قصيدته المسماة (مسدار جزيرة عِبدِلِة) : أنا أخو البِتْ اللَكعَت قَرن الخُمرة النازَّة علي وِِردان الصبوة الراكزة الجِنيات الهازَّة ..صُدورُهُن لازَّة و رقّ النُص زي خيت الشَلَّة بالحيل آ جني هي والله الجِنيات الحَزَمو الجِبَّة وعرَق الشتوي عليهم نايَا و صبَّ قول ما دِلَ .. رُجالاً حصدوا الحَبَّة عيشهُن هادو إنكال واتعبَّ ومِنُّو كتير في الواطا انكبَّ وباقِي مَصوبر واقِف قُبة الحَمُد آلاف .. الشُكُر آلاف العيش الرقَد أصناف ..أصناف الولد الكال..عزَّام ..حلاَّف...ضيَّاف الرِزِق الجانا مَدَلَة.. الحَلِق الجاف اِتبلَّة بالحيل آ جني هي والله الوادي الجَانا مَترقَّن مدَّ جِناحو الطايِل شَرقاً وغرباً القِبلِي بُروقُو علي القلعات إتضربَّن الدُكُن البِعدَن قِربَن فوق صَنقور المَحَلَة الطالت كَبَّن قُول للمَحَلَة بِيوتِك خِربَن قُول ما دِلَة.. الحَلِق الجَاف إِتبلَّ بالحيل آ جني إيه والله مُرحَاتنا شرابهِِن يوت ما غبَّن شبعانات في الشِقِل أب شوك..ما شبَّن الحُمَّل وِلدَن ..وربَّن حلماتِن تِقلََن.. جَرَّن.. فوق سيقانن كبَّن اللبن العاتِم في ضِرعاتِن جبَّن المَغسَة إن كان ضِرعاتِن خِربن.. القَرعَة آ وِليد .. السِعِن آ بنيَّة القِربَة كمان... كُبُوها الميَة المَغسة إن كان ضِرعاتِن خِربَن.. شُوفوا النِعمة السالت فوق قيزان الرملة ناس البندر لبن الشاي بالعُملة؟ سَمِح الخَمَج الفوق أسيادُو سَمِح العِز المِن أجدادُو الجِنيَات المَشُو ما عَادُو كان بالرِِد دَا أكّانوا اتنادُو غرَّب حامِد وشرَّق بَلَّة كانُوا بِحلبُو الضَرِع الدَلَّة كانُوا بِحضروا الخير القََدحُو مَعَلاّ الجِنيَات ما كفرت بي نِعِمة الله !! بالحيل آ جني إي والله ذات في يوم والغيمة تَهتّف مَطراً نَقَّع فوق نُوَّار الطَلِح الفقَّّع رِيحة البَرَم إن جاتك .. عِطراً فايت خُمَر الفوق أردافَا مَجَدَّع شُفنا الوادي يقشقِش في دمعَات الليل والتِعِل الشايِل بدا يتفقَّع تَلَّب حامد فوق مخلُوفة أب زُور واِتربَّع طلَق الرَسَن أب زَمة وسوَّا خَبِيباً بدّع هـوّد في رُقَّّاب الصَيْ لاقوه تلاتة زِبيديَّة خالفِين سيقانُن فوق السِنكِيت ورُقَاب أَلبِل بيناتُن مَرخيّة مَحجُوبات بالخرَز الفَصلُو السومِيت كُل واحد درَقة وسيف وطبنجية وباقي جُرابُن مليَّان دلميت الجِنيَّات اِتقَبلُو وضاقُوا الحارَة وضاقُوا المُرة وكان حجَّازُن صقر الجَو حامد كان عارفين ..ضاقوه رُجال قبَّالكُن شُوفوا أرزاقكُن أخير من ضَو حامد عوَج الطُندُب آ وليدات عوَج الطُندُب نار القصَب الهَبلَت ما بِتعدلو شُوفُوا شُلُوخو مَطارِق رقدَن وكل تلاتة يمين سيَّاف إِتقبَلو حامد راضِع مُخ التُرُك البَزْبَز من ضرب أهلُو نِهار الركزوا تمام وإتعَدلُوا حَبوب القارِح ... ما دِلَة ولداً ما ختَّالِن زَلة شِنْ قولك فيهو عليك الله ؟ بالحيل آ جني هي والله وينا مَراتع الدَرَت الباسِط دايماً ببكي عليهِن وين بنوت الحِلة البُكّر عصراً بَدري يسوَّن في شاهِيهِن بعد الليل ما يهوِّد ونحنا نهوِّد.. عاد أُماتِن ينادن ليهِن نمشي على القيزان نِتقادَم.. أقيس الختوة مع التاتاي ومَشيهِن والله البُعد الحاصِل ما نَسَّاني وحاتكُن في قَمراتنا بشُوفو وشِيهِن الا النَضِم أب غُنة اللهَج السُكر وين بَلقاهُو بنات الرِيل ..الدوب ليهِن الخوف آ ناس كان يبقى الشوق الحاصل بينا مِعَشعِش فيهِن مُقنَع سابِل وين بَلقاهو؟ وطرفاً ذابِل وين بلقاهو ؟ وعين بِتدَنقِر من واليهِن الوَجنات الشَعّن بقَّّـن ود العين النايِم زَرقَّن مُو زايغ ..رَسيَان ومَيقَّّن زولهِن كان خَدران ومَحَقَّّن ؟ من الشوفة عِرُوقو يطُقَّّن كان الدنيا بِصَح تِتخلىَّ ؟ كُنا بَركنَا مَعاهِن فوق رَملاة الحِلة إلا كمان بِنشُوفا مَذلَّة الجِنيات الغابَت..جابت إنتَ الجيب بس قايلُو قميص افرنجي وكرتونات كَرمِلَّة؟؟ لالا ..وحاتَك حاشَا وكلاَّ ديل يوم عادُوا إتلافوا الجاهِل بي حُقوق الله ديل كم لِحقُوا البِشهَق ضايِق وداوُوا العِلَّة الولد الجايب حقايب سفرو تُقََال تُقال من جِنِسِ كتاب ومجلة الحِكمة النَضِم إيَّاهُو الكان الحِكمة الولد إتوضا وصلّى عادة البلد الدَخلت فِيهُن سكنَت سَكنَت ..مَا بـتِتخلاّ نِحنا كمان طارين الحِلة ودُرنا الطَلَّة نشِيلا معاهم فرحة ومِيتَة حَلاة الموت كان في عِبدِلة مودتي ، ( ليمو )