|
دراسة حالة الثورة: قوي التغيير و قوي الثبات
|
هي لحظة تغيير لمسار إجتماعي/إقتصادي/ سياسي الذي تتجاذبه عدة قوي، هذه القوي بين مؤيدة للمسار الحالي و ناقضة له و قوي محايدة و قوي مشتته لا تعمل علي المفاصل الحقيقيه للتغيير. التغيير لا يتأتي إلا بالدفع الواعي والتنظيم لصفوف القوي التي من مصلحتها التغيير. هذا البوست هو محاولة لإثارة نقاش لتحديد 1- ماهي القوي التي تدعم المؤتمر الوطني حاليا" ومن مصلحتها بقاء النظام؟ 2- ماهي القوي التي تدعم المؤتمر الوطني حاليا" ومن مصلحتها إصلاح النظام؟ 3- ماهي القوي التي تدعم المؤتمر الوطني حاليا" و من مصلحتها تغيير النظام؟ 4- ماهي القوي التي تعارض المؤتمر الوطني حاليا" و من مصلحتها بقاء النظام؟ 5- ماهي القوي التي تعارض المؤتمر الوطني حاليا" و من مصلحتها إصلاح النظام؟ 6- ماهي القوي التي تعارض المؤتمر الوطني حاليا" و من مصلحتها تغيير النظام؟ 7- ماهي القوي المهمشة و البعيدة عن الصراع؟ 8- ماهي القوي المحايدة في هذا الصراع؟
البوست مفتوح للمنظمين و غير المنظمين ، المؤيدين و المعارضين
|
|
|
|
|
|
|
|
Re: دراسة حالة الثورة: قوي التغيير و قوي الثبات (Re: aydaroos)
|
Quote: 6- ماهي القوي التي تعارض المؤتمر الوطني حاليا" و من مصلحتها تغيير النظام؟
|
دا الكاتوقوري البمثلني
اها ختينا طوبتنا
-----------
بس سؤال :
Quote: التغيير لا يتأتي إلا بالدفع الواعي والتنظيم
|
طالما القصة فيها وعي القوى الاخيرة ( المهمشة / المحايدة ) مع تحفظي على الحياد دا - لا حياد في الصراع الاجتماعي .. كلو عندو دين لكو عندو رأي .. ليه تسمح لغيرا بالكلام باسمها ( الشعب يريد اسقاط النظام .. و لّ الشعب يريد معمر العقيد!؟ ) بعدين الدولة البنتكلم عنها ما الواغ الواغ .. و التغيير/ عدمو دا على حسابها هي .. ضداو مع مصالحها. و قيل حتى حقوقا الاساسية : حق الحياة ( السلامة و الكرامة ) قبل المعيشة. دي حتة لا حياد .. حياد كيف بس!!؟
الوعي .. الوعي هو العلامة الفارقة للاصطفاف دا و قيل الاستقطاب في نهايتو ( لحظة المفاصلة) يا كدا يا كدا ( ناس ترقيع شملة كنيزة، بخيتة و سعيدة عليهم هي تلاتية و قدها رباعي ) .. و لّ شنو؟
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: قيقراوي)
|
ده الأسود ذاتوو:
Quote: 1- ماهي القوي التي تدعم المؤتمر الوطني حاليا" ومن مصلحتها بقاء النظام؟
|
وده الرمادي
Quote:
2- ماهي القوي التي تدعم المؤتمر الوطني حاليا" ومن مصلحتها إصلاح النظام؟ 3- ماهي القوي التي تدعم المؤتمر الوطني حاليا" و من مصلحتها تغيير النظام؟
|
وده البيجي
Quote: 4- ماهي القوي التي تعارض المؤتمر الوطني حاليا" و من مصلحتها بقاء النظام؟ 5- ماهي القوي التي تعارض المؤتمر الوطني حاليا" و من مصلحتها إصلاح النظام؟ 7- ماهي القوي المهمشة و البعيدة عن الصراع؟ 8- ماهي القوي المحايدة في هذا الصراع؟
|
وده الأبيض ضميرك
Quote: 6- ماهي القوي التي تعارض المؤتمر الوطني حاليا" و من مصلحتها تغيير النظام؟
|
نحن طبعا مع الستات هه
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: Elawad Eltayeb)
|
قيقا و العوض الطيب كيفكم شكرا" لي مداخلاتكم وداير أنبهكم لي أنو البوست دا ليه غرضين مهمين : * إثبات أن الكتابة التفاعلية في الإنترنت أغني من الكتابة التقليدية (الصحف،الكتب.. الخ) . لأن القراء يشاركون الكاتب في لحظة الكتابة (و قد يكون فيهم من هو أجدر بكتابة البوست لمعرفته الأعمق بالموضوع) وقد تكون نتيجة الكتابة بعكس ما يريده الكاتب أو قد تدعم رأيه وترفده بأراء ووجهات نظر جديدة لم يكن الكاتب منتبها" لها لحظة الكتابة.
* محاولة تنبيه بإن دعم نظام سياسي ما أو الثورة عليه ليس حلما" أو تمنيات أو شعور جمعي يتلبس الناس بليل أو بالعدوي و إنما يجب أن يتم بصورة علمية تدرس القوي الداعمة للنظام والقوي التي تريد تغييره (مع علمي بأن هذا البوست ليس بوستا" علميا" ولكنه يحاول أن يقوم بدراسة القوي دراسة واقعية)
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: aydaroos)
|
يا أستاذقيقراوي بالنسبة لي في قوي مهمشة ودي غير القوي المحايدة القوي المهمشة بي تشمل الناس الما منخرطين في النشاط الإقتصادي المنظم و مبعدون عن مركز القرار الأقتصادي/ الإجتماعي/الثقافي/ السياسي غالبا" هذه القوي هي صاحبة المصلحة الكبري في تغيير النظام السياسي القائم الي نظام يعالج مسألة التهميش بصورة جذرية. ولكن يغلب علي هذه القوي عدم التنظيم و قلة الوعي السياسي. القوي المحايدة هي القوي التي تتمتع بمكاسب من النظام القائم ولكنها تختلف معه ، ولتقديرها لإرتفاع تكلفة التغيير فضلت هذه القوي الوقوف علي الحياد ( عدم القيام بدور في التغيير)
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: aydaroos)
|
الأستاذ العوض الطيب التصنيفات اللونية بي تختصر الكلام( لكن رايك شنو نخلي شعار موقفك هو اللون الأسود، وهو لون شعبي .. لون زينب و لون الأنسان الأول) ... المهم كما يقول الأستاذ تبارك ،الغرض الأساسي ما تصنيفكم شخصيا" في سودانيز ، ولا تصنيف القوي في البورد ، المطلوب هو تعريف و تصنيف القوي في الواقع. انا بقترح نحدد الخرطوم العاصمة جغرافيا" للدراسة مع ترك كل الحرية للمتداخلين لإختيار ما يرونه مناسبا".
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: aydaroos)
|
و للجميع : ممكن ناخد حدث قريب وهو ثورة أبريل للمقارنة. يعني دايرين اكبر معلومات عن القوي الكانت بتتصارع في ابريل * القوي الكانت بي تأيد نظام مايو توجهاتهاالسياسية/مكانها في التراتب الإجتماعي/موقعها من الإقتصاد المنظم/ حجم هذه القوي إحصائيا" بالتقريب إن امكن.(أين موقع هذه القوي الآن من الصراع الإجتماعي/الإقتصادي/ السياسي؟) * القوي المعارضة له توجهاتهاالسياسية/مكانها في التراتب الإجتماعي/موقعها من الإقتصاد المنظم/ حجم هذه القوي إحصائيا" بالتقريب إن امكن..(أين موقع هذه القوي الآن من الصراع الإجتماعي/الإقتصادي/ السياسي؟)
* القوي المنظمة التي قادت التغيير في أبريل(النقابات و الإتحادات الطلابية و الجماعات السياسية المنظمة.. الخ .. إلخ) ...هل ما زالت هذه القوي فاعلة و قائدة؟ و ماهو موقعها في صراع القوي القائم حاليا"؟
* أدوات قوة السلطة ، الشرطة الأمن و الجيش ، ماهي أدوارهم في أبريل؟ و ما هي الحالة الآن؟ * ماهي القوي التي لم تكن موجودة أوان أبريل و هي موجودة الآن؟ وما هو موقفها من الصراع السياسي؟ * كيف أنجزت أبريل ؟( سؤال عن طريقة إنجاز التغييير) . هل هذه الطريقة صالحة الآن؟ إذا كانت الإجابة بالنفي، فما هي البدائل الآن؟
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: aydaroos)
|
عيدروس
تحياتي
كلامك دا: "القوي المهمشة بي تشمل الناس الما منخرطين في النشاط الإقتصادي المنظم و مبعدون عن مركز القرار الأقتصادي/ الإجتماعي/الثقافي/ السياسي غالبا" هذه القوي هي صاحبة المصلحة الكبري في تغيير النظام السياسي القائم الي نظام يعالج مسألة التهميش بصورة جذرية."
منطقيا ما ممكن! اذا كانوا ما منخرطين في النشاط الاقتصادي ومبعدين من مركز القرار الاقتصادي و الاجتماعي و الثقافي والسياسي مصالحهم مستندة على شنو? طبعا المدارس مختلفة في تعريف اساس المصالح في مجتمع الانسان, لكن المهمشين بتعريفك ما عندهم اي اساس لاي مصلحة عشان يدافعوا عنها! وتعريفك دا اقرب لتعريف البروليتاريا الرثة "lumpen proletariat" في المدن منه للمهمشين في السودان. المهمشين في السودان في الحقيقة هم المنتجين الفعليين. مثلا في دارفور وكردفان الانتاج الحيواني, وانتاج الصمغ, والمحاصيل الاخرى, تكاد تكون الان هي عماد الاقتصاد السوداني, خاصة بعد تدهور الانتاج والانتاجية في مشروع الجزيرة و المشاريع الزراعية الكبري الاخرى, وسيكون ذلك اوضح بعد خروج البترول كمصدر للدخل القومي بعد انفصال الجنوب ولو جزئيا. و بالتالي عمليا, هم منخرطون في الاقتصاد, بل, ويقومون باغلبه! وعلى ذلك تقوم مصلحتهم في التغيير السياسي والثقافي لياخذوا دور يناسب ما يقومون به في الاقتصاد.
(عدل بواسطة بدر الدين احمد موسى on 04-12-2011, 10:08 AM)
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: بدر الدين احمد موسى)
|
يا بدر الدين إزيك و شكرا" ليك
Quote: اذا كانوا ما منخرطين في النشاط الاقتصادي ومبعدين من مركز القرار الاقتصادي و الاجتماعي و الثقافي والسياسي مصالحهم مستندة على شنو? |
يا بدر الدين "النشاط الإقتصادي المنظم" و المقصود بيه بي كلام يقع ليك براحه، بعيدين عن علاقات الأنتاج الراسماليةالوصفتها الماركسيه كما هي في الغرب وحاول الماركسيون السودانيون توطين مفاهيم نقديه تجاهها هنا في سودان نتاج الإستعمار‘ و غاب علي الماركسيين أن المنخرطين في هذه العلاقات الإنتاجية التي قسرها الإستعمار كنتاج لعملية النهب الإستعماري، غاب عليهم أن المنخرطين في هذه العلاقات الإنتاجية هم قلة قليلة إستخدمهاالأستعمار لدعم خط قطاره الإستراتيجي(مجازا") لنهب البلاد. إذا" (علي حد علمي) لم تكن هناك دراسات علمية للأنماط الإقتصادية ما قبل الإستعمار، مع أنها استمرت بعد الإستعمار و مستمرة لحد الآن (ربما كنا سنخرج بعلاقات إنتاج سودانية يوازي نمط الإنتاج الأسيوي) طيب قلتا " مصالحهم مستندة علي شنو؟" بالضبط دا هو سؤالي في أعلي البوست
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: aydaroos)
|
يعني يا بدرالدين ياصديقي في النقاش أنا رايي انو الإنتاج السلعي و السوق بالمعني الذي توصفه الماركسية حين دراستها لما بعد الثورة الصناعية دا ما حصل في السودان إلا بعد الإستعمار و في مناطق إنتاجية محددة حددها الإستعمار إعتمادا" علي مدي إستفادته من نهب المنتجات والموارد. إنخرط في هذة الدورة للنظام الإقتصادي الإستعماري جزء بسيط من الشعب السوداني في المدن الحضريةو في مناطق الإنتاج في الريف، فيما بقيت الأكثرية من الشعب السوداني في الريف و في البوادي علي انماط إقتصادية مختلفة (مثال:قبائل كثيرة مابي يبيعو ماشيتهم و بي يعتبروه عيب مثال تاني: نمط إنتاج زراعي كان سائدا" حتي في شمال السودان يغطي إحتياجات الأسر والعشائر فقط و يفيض منه القليل للتبادل السلعي)
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: aydaroos)
|
عيدروس
اهلا
يا عيدروس النظام الاقتصادي لا يقوم باختيار الناس ووجود انماط انتاج غير مرتبطة في السودان بالسوق تمت دراستها وفي ادب حولها و ممكن تجد بعضها لو مشيت مكتبة الدراسات العليا في جامعة الخرطوم-انا هنا بتكلم عن الماضي الان يمكن نكون في اضافات من جامعات اخرى. الدراسة العلمية ليس بالضرورة يقوم بها الماركسيين. فاي انتاج علمي رصين يمثل جزء من الارث المعرفي الذي يستند عليه الماركسيون لمقاربة الواقع, ومع دا ممكن تجد في الماركسية وقضايا الثورة الوطنية كلام عن اختلاط الاقتصاد السوداني, ياخ الناس ديل ما قصرو ياخ ههههه! وستجد- في مكتبة الدراسات العليا او حتي في مشاريع تخرج طلاب الاقتصاد او العلوم السياسية او غيرهم-ان التطور القسري في اتجاه السوق الذي فرضه البنك الدولي وصندوق النقد ونفذته الانقاذ قد قلص من مساحة الاقتصاد غير الراسمالي بشكل كبير جدا, واكبر دليل هو سيادة الانتاج الحيواني التقليدي و احتلاله المرتبة الاولي في الاقتصاد السوداني. يا عيدروس الناس ديل كانت حيواناتهم دي بس للتفاخر والضبيحة لعشاء الضيوف!
عموما انا نقطتي كانت تتمثل في انه اذا انت عرفت المهمشين بانهم غير مشاركين في النشاط الاقتصادي و لا غيره فانك سوف لن تنصفهم اذا نجح تغييرك الذي تدعو له. عشان كدة حاولت انبهك انك تضبط التعريف بحيث يعترف بالدور الكبير الذي يلعبه المهمشون في الاقتصاد السوداني, والذي لا يتناسب مع المسموح لهم بلعبه في مجالات النشاط الانساني الاخرى سواء اكانت سياسية, او اجتماعية, او ثقافية. يعني مفروض تكون واضحة في ذهنك وانت تدعوهم لمشاركتك في التغيير انهم اصحاب جلد وراس عشان بعدين ما تصدر نفسك وتوركها وتجنحهم!
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: بدر الدين احمد موسى)
|
مرحب عيد الروس وحمد الله بالسلامة تاني
بوست ممتاز لو ختى المصنفين وتجار الوان ناس نحن نحسن اسياد الشي ذاتا
السوال ده مهم والاجابة عليه اهم منو
Quote: و سؤال آخر: لماذا لا يدافع الشعب السوداني عن النظام الديمقراطي عند الإنقضاض عليه؟ |
اعتقد انه الاجابة عليه بتوضح سبب تعثر وتاخر الثورة في السودان الان
مودتي ومتابعتي
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: وليد محمد المبارك)
|
بدر الدين موسي بعد التحيه داير أول حاجه اقول ليك انو عينة كلامك دا هو الانا فكرت فيهو و بفكر فيهو عشان اعرف ليه الناس( كل المفكرين و المنظرين و الاحزاب و المثقفين في السودان) بي تبذل جهود جبارة للتغيير وكلو في النهاية ما بي يجيب حق مريسة تامزين. اها
Quote: الدراسة العلمية ليس بالضرورة يقوم بها الماركسيين. فاي انتاج علمي رصين يمثل جزء من الارث المعرفي الذي يستند عليه الماركسيون لمقاربة الواقع, ومع دا ممكن تجد في الماركسية وقضايا الثورة الوطنية كلام عن اختلاط الاقتصاد السوداني, ياخ الناس ديل ما قصرو ياخ ههههه!
|
ما عندي إلا إعتراض واحد علي كلامك و بي يتضح من النتيجة التالية: ليه معظم عمل الحزب الشيوعي بي يتركز في المناطق الحضرية مافي الريف مع إنو اكثر من 80 في المائة من السودان ريف؟ إجابتي أنا لانو النسخة الشيوعية السودانية ما قدرت تجاوب علي اساس المشاكل في السودان و ما قدرت توظف الكم المهول من الدراسات الإتعملت في مجال دراسات الريف و العلاقات الإقتصادية/الإجتماعية فيه لصالح التغيير الإجتماعي يعني بالعربي كده: خطاب الحزب الشيوعي بي يخاطب المنخرطين في النشاط الإقتصاد المنظم ديل معظمهم في الحضر لا في البادية لا في الريف.
مشكلة مشروع الحزب الشيوعي السوداني و مشروع الحركة الإسلامية و باقي المشاريع السياسية/الإجتماعية/الإقتصادية أنا جاييها في بوست منفصل. و ما تنسي لي كلمة المنظم دي يا بدر لانو انا كل مره بكتبها ليك و انت بي تنساها (و انا بي كلمة المنظم دي بقصد إقتصاد السوق الرأسمالي الأدخلو الإستعمار لي نهب البلد).
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: aydaroos)
|
Quote: مرحب عيد الروس وحمد الله بالسلامة تاني بوست ممتاز لو ختى المصنفين وتجار الوان ناس نحن نحسن اسياد الشي ذاتا |
الله يسلمك يا وليد، و مرحب بي اي زول و أي تصنيف حا نناقشوا حتي يقتنع الديك :) .
Quote: و سؤال آخر: لماذا لا يدافع الشعب السوداني عن النظام الديمقراطي عند الإنقضاض عليه؟ اعتقد انه الاجابة عليه بتوضح سبب تعثر وتاخر الثورة في السودان الان
|
بالضبط يا وليد، عشان كده لازم نعرف الديمقراطيات الفاتتت دي كلها ذاتا كانت لمصلحة كل السودانيين ولا لي مصلحة قوي معينة (انا طبعا" يا وليد مع الديمقراطية و أسئلتي دي لي معرفة المشاكل و حللتها).
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: aydaroos)
|
Quote: (انا طبعا" يا وليد مع الديمقراطية و أسئلتي دي لي معرفة المشاكل و حللتها). |
وانا زاتي طبعا يا عيدروس لكن بي حقها وعلى اصولها .. موش مطية يركبها البعض ويتشدق بها بغية الوصول الى الحكم والسلطة .. ثم بعد ذلك يتناسوها ويبحثون عن المغانم
الدمقراطية وسيلة يا عيد الروس وليسة غاية
الوسيلة دي في فهم البعض للوصول السلطة وففي فهم اخرين للوصول الى حياة كريمة مستقرة امنة وعادلة للجميع
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: aydaroos)
|
عيدروس
كيفك
الحاصل على هو ذاتو البقولو عليه "على نفسها جنت براقش" النقاش معاك حلو, لكن والله زمن تب مافي, لكن...
يا عيدروس الله يهدينا ويهديك. ياخ من وين جبت احصائية انه 80% من السودانيين يعيشون في الريف? ياخ هسع دي اظنه 80% من السودانيين بعيشوا في امدرمان! انا لما طلعت من السودان-1997-كانت في 24 حارة في الثورة-امدرمان هسع قالوا جبل كرري بقى في نص الثورة تقول لي ريف? عموما يا عيدروس مفروض تعرف ان الحزب الشيوعي شغال في الريف, زي ما شغال في المدن, لكنك ما مفروض تنسى ان الحزب ما لاقي فرقة يشتغل زي ما هو عايز! يعني شوف الانجليز طاردوا الحزب, وناس عبود ما قصرو, و بعد اكتوبر تم حله وفي ظل الديمقراطية, ومايو طاردته لاخر يوم في حياتها, والانقاذ مازالت. يعني الاسبوع الفات بس جهاز الامن منع توزيع الميدان اكثر من مرة, دا بعد ما تم طبعها واخذها للتوزيع ناس الامن قالوا للحزب امشي بلها حلومر! مفروض الناس تكون منصفة يا عيدروس, الظروف الشغال فيها الحزب والله اي شي يعملوا يعد معجزة, مش انجاز!
بعدين هسع انت مالك ناطي جوز في الحزب? ياخ انت عملت بوست وقلت عايز الناس تشارك لما نشارك يبقى ليك حار? ياخ السودانيين بقولوا اسمع كلام الببكيك! انا كلامي كان للمساهمة الايجابية, انت عارف انا كنت ممكن اخش واقول ليك كلامك دا اجمل ما قيل في النثر والشعر واطلع, وما اكون افدتك باي حاجة بالرغم من ان الكلام الحلو ممكن يضحكك!
بعدين يا عيدروس والله انت اتلومت معانا ياخ, لو عندك كلام كامل متكامل منتظر بيه ايه ياخ? نزلوا لينا و ليك على نحفظه زي المعلقات السبع ربما تكون وصلت للوصفة السحرية!
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: بدر الدين احمد موسى)
|
يا بدر هو سمح ساكت، ذكرتنا ايام النقاشات في الجامعة ايام القلب خالي و الجيب خالي والنفس فرحانه :)
Quote: يا عيدروس الله يهدينا ويهديك. ياخ من وين جبت احصائية انه 80% من السودانيين يعيشون في الريف? ياخ هسع دي اظنه 80% من السودانيين بعيشوا في امدرمان! |
أول حاجه يا بدر الدين نقاشي دا تفكر ساي (ونسة في الافكار) والارقام البقولهادي تقريبيه، تاني حاجة أنا بتكلم عن البدايات و الوسط من الإستعمار و لي جاي (الحاصل هسه دا نتاج الفات ... صاح) يعني في الفترة الزمنية القلتها ليك دي أرقامي تقريبا" صحيحة. وبعد داك لو عاينت لي الجغرافيا بي تلقا برضو نسبة 80% في السودان ريف (قلنا ليك تقريبا" :)) نزوح الناس من الريف ما بعيد من نقاشنادا لكن زي ما قلت ليك عندي بوست لحدي يوم الاحد يمكن أكون نزلتو فيه الحاجات دي متماسكة و مترابطة اكتر. و ممكن برضو ترجع للبوست ده و اكان قدرت ياخ برضو ساهم فيهو: ما الذي يجمع بين السودانيين؟
Quote: عموما يا عيدروس مفروض تعرف ان الحزب الشيوعي شغال في الريف, زي ما شغال في المدن, لكنك ما مفروض تنسى ان الحزب ما لاقي فرقة يشتغل زي ما هو عايز! |
انا يا بدر ما قلت ما موجودين في الريف ، قلت معظم عملهم في الحضر و دا لا جاي من كسل ولا تهميش و لا عنصرية، دا جايي من طبيعة تكون النخب المثقفة/القوي الحديثة/ الافندية منذ الإستعمار، كل نتاج المدارس و الجامعات و الوعي المجتمعي الجاء من الدولة السودانية الانشاها الاستعمار عاجز بي تكوينه عن علاج مشاكل التهميش، إلا إذا إنتبه للمشاكل التكوينيه في وعيه وعمل علي تجاوزها.
Quote: مفروض الناس تكون منصفة يا عيدروس, الظروف الشغال فيها الحزب والله اي شي يعملوا يعد معجزة, مش انجاز! بعدين هسع انت مالك ناطي جوز في الحزب? |
أها إن شاء الله الفقرة الفوق دي رضتك :) يا بدر انا ما داير اقول ليك لي قريب كنت عضو حزب و عارف عارف و الله عارف، لكن دا ما بي يمنع النقد انا غايتو قصة شيلو النظام و بعد داك تعالو نتفاهم دي ما معاي النضال و النقد بي يمشو مع بعض ، بس المفروض يا بدر تفترض فيا حسن النية و ما جايي من حتة عداء (وحتة لو من حتة عداء كلامي كان صاح اقبلو ياخ) و يا بدر الواقع الصعب دا فيهو ناس بي يموتو بالألآف عشان كدا النقد المفروض يكون حار قدر الهدر الإنساني الحاصل في البلد دي.
Quote: ياخ انت عملت بوست وقلت عايز الناس تشارك لما نشارك يبقى ليك حار? ياخ السودانيين بقولوا اسمع كلام الببكيك! انا كلامي كان للمساهمة الايجابية, انت عارف انا كنت ممكن اخش واقول ليك كلامك دا اجمل ما قيل في النثر والشعر واطلع, وما اكون افدتك باي حاجة بالرغم من ان الكلام الحلو ممكن يضحكك! |
بالعكس يا بدر أنا شكرتك، و الراي ما فيهو حار و لا بارد نتناقش و كلامك كان أنا معاهو و لا ضدو برضو حا إستفيد منو و شكرا" ليك تاني يا بدر
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: aydaroos)
|
يا بدر سلامات
Quote: وقلت عايز الناس تشارك لما نشارك يبقى ليك حار? ياخ السودانيين بقولوا اسمع كلام الببكيك! |
بعد ما رديت عليك جيت لي كلامك دا بي مهلة و لقيت نفسك هنا حار شوية و بعداك راجعت البوست لقيت ردي لي وليد: الله يسلمك يا وليد، و مرحب بي اي زول و أي تصنيف حا نناقشوا حتي يقتنع الديك :) . بس حبيت اقول ليك إنو وليد عارفني بدافع عن من يسمون بالرماديين في سودانيز و أنا رديت عليهو في السياق دا و يعلم الله ما قاصدك ولا قاصد زول و الديك المقصود هو ديك النكته بتاعت الزول القايل نفسو حبة عيش و لك العتبي حتي ترضي
| |
|
|
|
|
|
|
Re: دراسة حالة الثورة: قوي التغيير و قوي الثبات (Re: aydaroos)
|
عيدروس
تحياتي
ياخ والله العظيم ما شفت ردك لوليد ولا قريته الا هسع! وما كنت عارف انه في ديك قاعد يقنعوا فيه!
بعدين البوست دا انا ما شايف فيه اي محل للاقناع. العنوان دراسة حالة الثورة الخ..... يعني في احسن افتراض محاولة تشخيص, ودي الزاوية الانا نظرت بيها للبوست ومداخلتي الاولي و البعدها ولحدي هسع من المنطلق دا. يعني انت اساسا ما طارح ارقيومنت للنقاش, و لا انا دخلت من نقطة خلاف, وانما محاولة لتقويم تعريفك للمهمشين لتحسين النظر للقوي المهمشة في السودان, وانصافها, بتعريفها بحسب قدرها.و مداخلتي جات بعد ما انت عرفت من هم المهمشين في رايك انت, وهو تعريف في احسن الفروض ناقص! لانه المهمشين الهسع بحاربوا الانقاذ هم الفئات الاكثر مشاركة في الاقتصاد السوداني, وهم يطالبون بان يكون لهم دور مساوى في مجالات السياسة والثقافة. اما محاولتك انك تربط تعريفك بكلمة "منظمة" فهو زي ما انت قلت زي نقاشات الطلبة زمان! وانت عارف داك كان غلاط اكتر منه نقاش. لانه الارقيومنت لا يقوم على الاجندة المغطاة, وانما كل الادلة والاسانيد مفروض تكون مطروحة من الاول, والتعريفات مضبوطة مسبقا. يعني بكون فاول عديل كدة في الارقيومنت لو قلت: انا كنت قاصد كدة, لان دا بطعن اما في نقص الفصاحة او ضعف الصياغة. لحد الان كلمة "منظمة" ما واضحة. فكدي ادينا تعريف عشان نعرف نتناقش, او نتغالط! هههههه
كان الله هون بطل على البوست التاني.
| |
|
|
|
|
|
|
|