|
|
 هل جميع الرجال راضون عن نسائهم ؟؟؟؟؟؟؟؟؟
|
الزاوج علاقة ازلية تعاقدية
يسعى فيها الطرفان إلى اداء دورهما الأجتماعي
ولكن سعادة الزوجين ترتبط بعمق المشاعر القائمة على الرضاء بين الطرفين
ويعزو علماء النفس التعاسة التي التي تداهم حياة بعض الأزواج
الى سؤ الأختيار منذ البداية وعدم التكافؤ بين الطرفين
سواء كان ثقافيا او تعليميا او اجتماعيا
او في كثيرا من الأحيان عدم المصارحة
وهذه جميعهاهي التي تؤدي الى شرخ في العلاقة الزوجية
عندما يفكر الرجل في اختيار شريكة حياته كثيرا ما يواجه ببعض الظروف
والتي قد تربكه وتعقد من حسابته لما لا وهو الذي يختار
وان تكون حرية الأختيار له وحده
ولكن الأختيار نفسه هو القضية
فهناك من يختار في ظروف استثنائية
وفي هذه مخاطرة
ومنهم من تطوله الضغوط الأسرية وتحديد هوية من يتزوج
وبذلك يكون قد جرد من ارادته وحريته
في المقابل هناك من يتزوج بمحض إرادته ومن تهوى نفسه
ومع مرور الأيام يكتشف بأن اختياره لم يجانبه الصواب
ومن هنا يبدأ عدم الرضا
قرأت لبعض علماء النفس
بأن رضاء كل من الطرفين إذا ماحتمت عليهم الظروف بالأستمرارية
يعتمد على شئ اساسيا
وهو التسليم لما قسم الله وحينها يجب عليهم الأتي:
تقديم التنازلات من كلا الطرفين
التغاضي عن العيوب
الوضوح وعدم الأستغلالية في اتخاز الرأي
وبذلك يمكن لهما الاستمرارية والعيش في سلام
وهذا ينصب في مصلحة الأبناء
رضي الله عن الجميع وجعل نسائكم سكناطيبا
( انه زوجي جنتي وناري)
|
|
 
|
|
|
|
|
|
|
 Re: هل جميع الرجال راضون عن نسائهم ؟؟؟؟؟؟؟؟؟ (Re: رشا بابكر)
|
الاخت الكريمه / رشا
مساء الخير ,,,
Quote:
تقديم التنازلات من كلا الطرفين
التغاضي عن العيوب
الوضوح وعدم الأستغلالية في اتخاز الرأي
وبذلك يمكن لهما الاستمرارية والعيش في سلام
|
--------
في كلامك اعلاه بتصور دي الحاجات البتحصل بصورة تلقائية بين أى أتنين بتزوجوا
في أول فترة في حياتهم , أي زوج و زوجة بداية الزواج ليهم هو الاكتشاف والمعرفة الحقيقية
مهما كان عمق العلاقة والمعرفة قبل الزواج , الحياة اليومية مع بعض بتبدا معرفتهم الحقيقية
وبالتالى ما هي تنازلات بقدر أنو الطرفين حيبتدو يوفقوا كتير من حاجاتهم عشان يصلوا لحاجات
مشتركة بينهم يبقي الاقرب أنها تكون تعديلات في التفكير والسلوك وانماط الحياة للوصول لصيغة
الحياة المشتركة بينهم ماظن في زوج وزوجتو قعدو يختو دستور لحياتهم لكين بمرور الوقت بلقوا نفسهم
الاتنين عملوا نمط حياتهم وكل طرف عّدل في كتير من حاجاتو عشان يصلوا للنمط ده
الحته المتعلقة بالتغاضي عن العيوب أو أى نوع من انماط الحياة أو السلوك البرفضوا طرف وعوز يعّدلوا
في الطرف الاخر _ مثلا أنا مدخن وكانت ومازالت من الحاجات الفشلت زوجتي تلقي ليها حل _ بالتاكيد ما
حاوعده انو سلوكي ده حيتغير لكين ممكن بقي تدخيني في البيت قليل نسبيا تماشي مع رغبته وحقها ترفض
تكون مدخنة سلبية في غيره من السلوكيات ممكن التقاضي برضوا يكون الاقرب للتقوي , حته طرف يعّدل طرف دي نظرية في الممارسة العملية الوضع بختلف يبقي كل طرف يقبل الطرف التاني على نفس حاجاتو القابله والرافضة .
في الحياة الزوجية في إستقلالية حتى في القرار وده ما شي سى بالعكس لانو الحياة برضوا بتتقسم لتلاته دوائر اساسية دائرة للزوج وخصوصياتو وفيها شغلوا واهلوا واصحابو ومثلها للزوجة ودائرة تالته فيها الاتنين وحاجاتهم مع بعض في الدوائر الخاصة بالزوج وزوجتوا القرار فيها فردي وأى طرف ما حيتدخل الا في حته تقديم الراى الاستشارى غير الملزم , وأكيد في دائرة حياتهم بيكون القرار فيها مشترك بعد ما يقعدوا ويتكلموا وكل طرف يوضح نظرتوا للامور , أتفقوا خير وبركة أختلفوا برضوا لازم يكون عندهم طول البال أنو الناس تصل لنقطه اتفاق حتى لو ما متطابقة الاراء فيها 100% لكين بتمثل الحد الادني من التفاهم
مع ملاحظة انو المسألة دي كل ما تمر سنين بين الزوجين بلاحظوا أنو في صبر وأحتمال وتفاهم ما عادي
في أنهم يصلوا لتفاهم يقدروا يقرروا بي مع بعض في حياتهم
----------
أخر حاجة مع التفاهم والمعزة بين الناس ومهما وصل درجة أنسجامهم وتفاهمهم الاتنين لازم يكونوا عارفين
أنو الحياة الزوجية ما فيها أى نوع من البلانتات المسبقة أي يوم بيجيب حاجاتو , والاتنين حاجات كتيرة
ما حتخليهم يمشوا على نمط وأحد فيها المهم كل طرف فيهم متقبل الطرف التاني ومتقبل حياتو معاهو والنصيحة الاهم أى طرف تالت مهما كان قربوا منكم ما يعرف عن حياتكم غير عناوينه الرئيسية وبس تفاصيله حقتكم براكم أى خلاف او مشكلة بتبقي حالة عارضة وبتمر مدام فضلت بينكم وبس وحتقدوا تعالجوها في هدؤ مدام بينكم وبس .
*مع ملاحظة أنو الكلام عن الرضا في الحياة الزوجية نفسها أساسا ما حيكون موضوع مطروح إلا تكون حاصلة مشكلة ما _ غير كده الايام بتمش والاتنين حيتكلموا في أى حاجة إلا النقاط الخلاص بتكون بقت بديهيات زي سؤال السعادة ما حينطرح عادتاإلا بين أتنين تعساء
تحياتي
| |
|
|
|
|
|
|
|
|
 Re: هل جميع الرجال راضون عن نسائهم ؟؟؟؟؟؟؟؟؟ (Re: مريم الطيب)
|
اخي الكريم/عبدالناصر
الف شكر ع المرور
وملاحظاتك واقعية
عزيزتي/اميرة
تحياتي
اول شي الخوف من شنو
الزواج ده شراكة ولمن تقوم على
الصدق والمودة والأحترام
بتكون احلى عشرة
اما الطلاق ابغض الحلال عند الله
بيحصل لظروف كتيرة وما اظن في راجل
بتزوج ويكون مخطط للطلاق
يعني المسألة ما بتحتمل
ولا بتتمرحل
لك شكري
مريم اختي ازيك
يعني تمري ولا حتى سلام مافي !!
ع العموم المرة دي سماح
دمتي طيبة
| |
|
|
|
|
|
|
|
|
|
Re: هل جميع الرجال راضون عن نسائهم ؟؟؟؟؟؟؟؟؟ (Re: رشا بابكر)
|
اليوم مظاهرة مليونية رجالية تهتف:
الـزوج/ يـريـد/ تـغيــير/ الـمــدام
وبعد تلقي الزوجات اتصالات هاتفية من البيت الابيض والاتحاد الاوروبي ...
وتعقيبا على الموضوع صرحت المتحدثة بأسم الزوجات بأنهن يعدن بإصلاحات
من أبرزها:
+ السماح للزوج بتعدد الزوجات
+ السماح له بالسفر أين ومتى شاء
+ تلقي محادثات مجهولة المصدر دون الالتزام بتحديد وجهتها
+ ان يخرج من البيت دون سؤاله ماشي وين؟ وجايي من وين؟
ولكن الازواج رفضوا كل هذه المقترحات لأنها لا تتوافق مع مطالبهم،
مطالبين بإسقاط المدام لطول مدة حكمها....
| |
|
|
|
|
|
|
|
|
Re: هل جميع الرجال راضون عن نسائهم ؟؟؟؟؟؟؟؟؟ (Re: رشا بابكر)
|
لا يوجد ما يسمى الرضا الكامل حتى بين أجمل قصص الحب والغرام والسعادة الزوجية..
هناك شيء ما يظل مفقوداً حتى وإن اكتملت كل أركان التوافق بين الزوجين..
ولكن المرأة تظل لغزاً غامضاً و(متقلباً) لا يستقر على حال..
وفي النهاية مسألة الرضا حاجة نسبية..
| |
|
|
|
|
|
|
|
|
|
Re: هل جميع الرجال راضون عن نسائهم ؟؟؟؟؟؟؟؟؟ (Re: عبدالله كع)
|
ألأخت/رشا بابكر..السلام عليكم..
من ناحية اجابة سؤالك أقول لك بصراحة..أنى راضى عن شريكة حياتى وأحمد الله.
أى علاقة مهما كانت من صداقة من زمالة من حب ...إذا توفر ت لها البيئة الصالحة مثل .ألأحترام..والصدق.والحب..بأذن الله ستكون علاقة مميزة وناجحة.
Quote: لا يوجد ما يسمى الرضا الكامل حتى بين أجمل قصص الحب والغرام والسعادة الزوجية..
|
أخى أيمن الكمال لله وحده..هذا الكلام ينطبق على كل ألأشياء الحياتية..ومثل ماتفضلت هى شىء نسبى أوافقك الرأى وعندما تدخل نسبة الرضا ولو بدرجة تستطيع أن تقول أنت راضى عن زوجتك..
ربنا يسعد كل الناس ويمتعهم بحياة زوجية سعيدة...المرأة الصالحة هى حسنة الدنيا.
شكرآ أخت رشا لأتاحة مساحة لنا بالبوح الجميل..
| |
|
|
|
|
|
|
|
|
|
Re: هل جميع الرجال راضون عن نسائهم ؟؟؟؟؟؟؟؟؟ (Re: ismeil abbas)
|
رضْيان مِن جِنْس الحريم وبهاتي
بقولا قدُر تديني زيدي وهاتي
المَعْضِلة في إتْنين:
(1) المُِصاقرا
أديتا العدو.. ما تِتْصاقرو يا ناس.. لامِن تتِصاقرو يوماتي، بزول "الإنْدِهاش" وإن زال بحصل الجفا والوفا.. ما تظلوا سوا سوا طواااااالي كَدي، ده في وِشْ ده.. عاد ما تدو رقبتكُم فُرصة "للشوق" يِنْمو ويِزْدهِر.. بِسسسسم الله هو بلا الشوق البِشلْهِت شنو.
(2) العادي
لامِن كُل يوم يِشْبه أخوهو.. الروتين.. الرتابة بتْجيب الكآبة والكآبة سَوْدا ولَوْدا يِجيرنا الله.. ياخ بَرْبِكْ ليها/ليهو (من باربيكْيو) إن شاءالله الفول الواحِد ده.. بدِلْ/بدِلي وضع العفش، شيلي الدولاب ده وخُتيهو جنب الشُباك، حرِكي ياخ الكنبه دي، حرام عليك ليها خمسة سنين في فِجتا دي، الشي صَبه يا كافي البلا.
أها أسمعن وعَنْ: دهشة وشوق الأيام الأولى.. أيام الخطوبة والسنة الأولى، الزول بِهاتي ليها لامِن يِوسِدوهو الجابرا.. وها الشي -الدهشة/الشوق- بتْضاءل وبِتْضاعف... بِتْقزم وبِتْضخم.. بِموت وبِيحيى.. مَخَيرين!
| |
|
|
|
|
|
|
|
|
|
Re: هل جميع الرجال راضون عن نسائهم ؟؟؟؟؟؟؟؟؟ (Re: اميرة السيد)
|
أميرة بِتْ السَيِد
| Quote: يعني بكلامك ده اذا ما في روتين المشاكل حتخلص بين الزوج وزوجته؟ |
نعم، ده لو ما في مُشْكِلة... مرات بتلْقي إنو الإتْنين حصل بيناتُم جفا دون أسباب.. يصحى الصباح يخليها نايمه في نوما ويرجع يتغدى.. يِقَيِل مقيلْتو.. يِصحا يِمْرُق يجي يتعشا ويِنْبطِح كالعنقريب المقلوب.. عاوزاهو يِغَيِر! طَيِب ما هي تَغَيِر شِوية.. خليهو يتفاجأ بأي حاجة.. نعم الروتين قاتِل لا رحمة لهُ.. والروتين ما عِندو أيُتُها عِلاقة في كَونو الإتْنين بِتْرايدو.. أصلو السَيِد الروتين ما بِيجي لِلعدو، بِيجي لِلحِبان يِزلْزِل كيانُمْ.. مرات الزول/الزوله بِكون عايِش مع شريكو بأثر رجعي، يعني بِرغم الحياة الرتيبة مُصبِراهو الصُور والذِكْريات المخزنه في عقلو، مِسيكين، يشيل مِن قديم صُورو وذِكْرياتو ويِسْقِطا على واقعو، أهو المُركب ماش. وِكْتين الزول بِيفرح بِهدِية عيد ميلادو.. بِيفرح لامِن يِفوز مِن فواتير مُشْترياتو مِن المول الفي الناصِية، ليه ما نفرِح البِنْريدو يوماتي..
إنتي كيف حالِك؟ علِك طَيبة
| |
|
|
|
|
|
|
|
|
|
Re: هل جميع الرجال راضون عن نسائهم ؟؟؟؟؟؟؟؟؟ (Re: اميرة السيد)
|
| Quote: بس ممكن توريني بتين الراجل بيطلق زوجته .. يعني لمن يصل ياتو مرحلة..؟ وبعدين ما دام هو حيطلق وينفصل من زوجته أساسا هو متزوج لشنو؟ |
والله يااميرة السيد سؤالك ده عايز ليهو فكي كارب هههههههههه ياخي معقولة في زول بيعرس وفي نيته الطلاق ده الا زول يكون عايز يمنع زواج والده ويقوم يدي ابوهو شاكوش ويعرس بنية افشال زواج ابوهو وده طبعا تحريك سري من امو هاهاها تاني حاجة زول يكون عايز يحلل امراة مطلقة بالتلاته
او واحد قروشو كتيره ويحب النساء والسهر وعايز الموضوع يكون شرعي فيقوم يتزوج اربعة بعدين يفك واحده ويغير بدلها واحده جنط 16 وهكذا وهذه النوعية معروفة لا تخفى على احد
المعروف في ظل الظروف الصعبة انو الشباب همهم الاول والاخير هو الاستقرار في حياة زوجية سعيدة وهنية والزواج زي ماعارفة مصاريفو كتيرة جدا يعني تحويشة العمر فماممكن زول يلم عشرين سنة عشان يجي يطلق كده ساكت
عشان كده ماتشيلي هم الطلاق في جميع الاحوال خصوصا لمن الزوج يكون ماشي بي سرعة 140 ماتجري فرملة اليد وتغيري اتجاه العربية هاهاها
تحياتي
زاتووووو
| |
|
|
|
|
|
|
|
|
|
Re: هل جميع الرجال راضون عن نسائهم ؟؟؟؟؟؟؟؟؟ (Re: عزام حسن فرح)
|
اخي / عبدالله
السؤال ما صعب
الأصعب منو الأجابة
يعني تتوقع بعد عشرة سنين طويلة
يقدر راجل يقول انا ما راضي
ما خلاص القسمة وحصلت
ويكفي الوليدات الحلوين ديل
كل الشكر
اخي / اسماعيل
اهنيك من كل قلبي
وأنت السعيد بدون شك
وما الرضا إلا لأنكم طبقتم نظرية الطرف المكمل للأخر
ودي مابتكون إلا بالتوافق الفكري والوجداني
والتقدير العميق لهذه العلاقة السامية
دام بينكم الرضا وسعدتم
اخوي / عزام
اجبرتني جدعاتك
وما لقيت مفر الأ ان ارتجل
هذا المقطع طبعا بلسان واحد اي واحد
ممن كتبوا صك الولاء بأن لا انفصال عن
هذا الكائن الذي يسمى المرأة
..............................
مشدوه لي زمن
وبي ورا الحريم شقيان
كايس لي ودادن
وبي القليل رضيان
تعبت من النهيض
ومن نقة الاخوان
ديل جنة حياتنا
ليهن بقوم حفيان
ادوهن رضكم
وجيبوا الحنان اطنان
والما بكسب رضاهن
بفضل دوام ندمان
| |
|
|
|
|
|
|
|
|
|
Re: هل جميع الرجال راضون عن نسائهم ؟؟؟؟؟؟؟؟؟ (Re: رشا بابكر)
|
عزيزتي / رشا| Quote: هل جميع الرجال راضون عن نسائهم ؟؟ |
الاجابة البدهية يا سيدتي تقول : "بالطبع لا "
وانما هناك تكامل قد تختلف درجته من زوجين لآخرين
املا في الوصول لرضا قد يخيم - ولو لبعض الوقت - فوق
عش الزوجية ربما يمتد لزمن يطول أو يقصر ..
كماأن هناك رجال يعيشون رضا ربما يكون ناقصا
ولكنهم يجهدون أنفسهم للوصول لدرجة معقولة
من الرضامع من يقاسهم مسيرة حياتهم ( أي الزوجة).
المؤكد - في زعمي - أن الوصول لمرفأ الرضا التام
بين أي زوجين أمر تصعب مسالكه وتتعرج دروبه وربما
يكلف الكثير حتى يتحقق وان كان بلون وطعم يكون
بالطبع مختلفا من بيت لبيت أي بين كل زوجين وزوجين
آخرين .
وعليه تكون الحياة بين مد وجزر في مملكة الزوجية
ويكون النجاح فيها- أملا في الوصول لرضا معقول- أمرا
يكون مستمرا باستمرار الحياة وفهم توابعها من حزن
وفرح وغضب وحلم وتسامح ......الخ .. وهذا يظل هو الامتحان
الأهم في حياة كل زوجين !!.
لك مودتي خالصة
خضر
| |
|
|
|
|
|
|
| |
رشا بابكر
مريم الطيب
Dr Salah Al Bander
عبدالله كع
ismeil abbas
عزام حسن فرح
ALZOLZATOO
خضر عطا المنان
فيس بوك
تويتر
انستقرام
يوتيوب
بنتيريست