وقفة الإحتجاج الأسرية يجب أن تستمر؛ ولتكن إنتفاضة الشـــموع !

Quote: أقول ليكم كلام إنسان بيعز نبتة وبيحب شعبه أقول ليكم شرف الكلمة شرف الأُمّة للحاكم وللداير صلاح أرضه ومعنى الوعي في الفكر البيقود ضالّينا لدربه وعشان أشرح وأقول الدّايرو لنبتة ولناسها بذكّركم بظلم الكهنة يا أهلي ...بدور النّاس تكون حاسّة تقيس أفعالها بالتّفكير وما تتبع مهاوي العادة والكُهّان تفرّق بين عبادة النّجم وبين الخشية والإيمان رفعت مخدّة في بيتنا لقيت خلّيتي لي بسمة فتحت عيوني في الذّاكرة طار بجناحه صوت همسة فتحت كتاب طلع من وسطه نور بصماتك الخمسة سمعت موسيقى حسّيتك تقول تاوقتي لي هسّا هاك فنجان حنان قهوة ومن إيديك أشيل إلفة كبابي الشّاي يزغرد فيني صوت النّاي وأقول ليكِ الغرام جرسة أقول ليكِ القلب بكّاي ملامحك والصّباح والبن وضحكاتك تدوبي معاي يبشّر فينا بوخ الشّاي وأعاين ليكِ راسي يزن وقافية حنينة فيني ترن وأغيب في الحضرة وأتلبّش وأخاف من جنّي بيكِ أجن وإذا ضاقت عليكِ الدُّنيا ألقى الدُّنيا ضاقت بي ونتماسك وتطلعي من شجن ذاتك وأطلع من شجن جلدي نعاين للوطن والنّاس نذاكر في هموم شعبي أميل بريدو في كتفك تميلي عليهو في كتفي ونتشابك تقول نيلين وتضحكي لي في السّكّة تضحك غمزة في الخدّين أقول يا روحي حنّي علي أنا الشّاعر أجيب ليكِ الشّعر من وين ؟ هديمك يا وليد مقدود وصابحنا الفقر والجّوع صبح جلد البطن مشدود شن بتسو ؟ وخيّك من شهر مرفود قالوا صالح عام عشان قال العوج في العود حمد يا رب أخير من قول هديك البغلة في الإبريق أكان ودّوهو بيت أشباح وكان دقّاهو زول هلفوت صبح باب التّكل مسدود كمل حتّى الملح في البيت وشن هم الملح في البيت وقت ملح الدّموع موجود دحين يا وليد وديل مو قالوا ناس إنجاز ؟ وشن سوّولنا ممّا جونا ؟ غير حرقوا الفضل بالجّاز ؟ كُل شيتاً صعب في السّوق من الكبريتة للطّايوق وكان جانا البخت تموين رطيل سكّر وصابونتين نجيب من وين وأخوك مرفود وعدمان الشّهر ملّين أمس زازيت أكوس الدّين مشيت لسميّة بت مامون لقيت جابولها تلفزيون سمح وكبير تشوف الصّورة بكم لون وقت في نشرة الأخبار ظهر مك البلد يضحك جضومو كبار ومزمومة الكرش بزرار ولا مهموم ولا زعلان وشيهو يراري بالألوان وقد في حشاي طُبّاق نار طريت رفد الوليد والجّوع وسال دمع الغبينة الحار أريتك يا ملك فد يوم يخلّي الجّوع عينيك ما تنوم أريتك يا ملك فد يوم تحس بغصّة المظلوم دحين يا وليد هو ديل مالهم ومال الدّين وقت قولهم كلام الله وفعالهم ما فعال صالحين كتير فيهم عديل حُقّار وبالقرآن كمان تجّار وكضّابين أكان بنزين عدم أو جاز يقولولك إرادة الله وكان صعب الرّخيص والغالي في التموين يقولولك دا غضب الله وكان الموية صبحت طين يقولولك دا من أمريكا والعملاء حمونا الشّب ولاد الــ######## عشان الشّعب يحرن تب ويقبّل من سراط الدّين هو ديل مالهم ومال الدّين أكان كنزوا الدّهب والمال بلايينهم تسوّي جبال وعرباتهم تخطف العين وبنيانهم قصور في قصور وحاة الله وكتاب الله أكان أدّونا طوب فد سور أكان سوّينا ألف إويضة لمسكين

(عدل بواسطة محمد الجيلى on 01-24-2011, 09:34 AM)

Quote: حاة الله و كتاب الله وكت نغلي و نكوس التار لا سوراً ...بقيف في وش و لا لهب الغبن بترش و لا صفاً يميل بالقش كل ظالماً يقع و يندش و سيل دمع البلد ينقش لا بحبس حلقنا الخوف و لا بنرجع أكان لعلع كلاشينكوف

Quote: وليستمر النضال السلمى .... حتى يصبح الصبح

Quote: ضوء شمعة يكسر حاجز الظلام