|
نعــــلات زوجـــة الرئيـس(توجد صورة)
|
كلو زول بيدلع مرتو.... قدر قدرتو.. كل زول بيريد مرتو بي يريد ليها السمح.... والمكجنا داك ما داخل معنا في الحسبة.... اتظكر لما قام انقلاب في الفليبين ضد الديكتاتور الفلبيبني ماركوس..... ناس الديش قعدو يكوسو ويبحتو في املاك وممتلكات ماركوس ومرتو اميلدا ماركوس( اميلدا دي كانت قبال يعقد عليها ماركوس كانت عارضة ازياء زي النسوان المعصعصات ديل والما عندهن طعم ويلبسن الهدوم ويجن يتلولون بهن).... لقو في دواليبها اكتر من تلاتة الاف جوز نعلات.... يعني المرا دي تلبس وتغيّر في اليوم بي عشرة جيزان نعلات... واحدة في الاتنين يا اما المرا دي..مفترية وتغيانة وفايقة .... وكل دقيقة تملص نعال وتلبس التانية... وهي راقدة فوق عنقريبا.. يا امتن مرا حوامة... وفوق كرعيها ديل والنعلات بيتملن ويدمسن واطا.. وهي تغيرن... في اليوم تلبس لها عشرة جيزان نعلات..... وترجع انصاص الليالي لي اهلها....يعني باقي لي لو دايرة تمرق من اهلها لعند ناس ابوها تباريها عربية بوكسي شايلة نعلات عشان تغيّر بهن.... ليلى مرت بن علي يا ربي يكونن نعلاتا قدر شنو؟؟؟.... غايتو ترانا راجين يعدوهن...
نُقُلتي... حكم رومانيا .....هو نيكولاي شاوشيسكو...كان بيسوي ويخيط النعلات.... وقام من نعلاتو ديل ولقى نفسو رئيس.... لدولة ليها شنّة ورنّة.. رومانيا.... حكمها النُقُلتي دا اربعة وعشرين سنة.... وبقى لناس رومانيا في رقبتن... لحدي ما زهجو وهاجو عليهو وشالوهو برا... واعدموهو هو ومعاهو مرتو قدام كميرات التلفزيون.... قالو كان من تغاهو وقلة ادبو.. كل يوم يلبس نعلات جُداد... وفي الليل يحرقن.... اها احسبو معاي الزول دا حرق كم نعال من حكم لحدي ما اعدموهو...ما بعرفو كان بيشتري لمرتو معاهو نعلات واللا لا؟.... لكن ما اظنو كان بيشتري ليها لانو لو كان بيشتري ليها كان حدسونا بيهن!
ايفا براون زوجة رئيس الارجنتين خوان بيرون... كانت نعلاتها مصنوعة من جلد حيوان اسمو (المنك).. كان جلدو غالي خلاس... وهو زاتو كان مهدد بالانقراض... لكن نعلات ايفا دي قطع شك يكونن لحقنو امات طه.... الغريبة ايفيا براون كانت في الارجنتين معشوقة الفقرا والمساكين.. غايتو جنس غبا على الفقرا والمساكين...!.. رايح لهم عشق!!!!!
شُدرة الدُر ..الملكة المملوكية الحكمت مصر... قالو كان عندها نعلات ... بيطرقعن في الاتجاهين... ورا وقدام... يعني يقولن( فطق ...فطق).. فطق قدام وفطق ورا....وقالو نفس النعلات ديل قتلت بهن عز الدين ايبك وحكمت بعدو.... لكن جات ام علي مرت ايبك وقتلتها برضو بي نعلات.... والله ما بعرف الناس البيقتلهن النعلات ديل شنو؟.,,,,, الشي ضُبان.... غايتو التاريخ دا فيهو جنس كضب..
قفل الباب:-
حُبُّك طيرٌ أخضرُ ..
طيرٌ غريبٌ أخضرُ ..
يكبرُ ياحببتي كما الطيورُ تكبُرُ
ينقٌرُ من أصابعي
ومن جفوني ينقُرُ
كيف أتى ؟
متى أتى الطيرُ الجميلُ الأخضرُ ؟
لم أفتكر بالأمر يا حبيبتي
إنَّ الذي يُحبُّ لا يُفكَّرُ .
اريتو حباً طاير يا نزار... الكلو نقيّر دا
|
|
|
|
|
|
|
|
Re: نعــــلات زوجـــة الرئيـس(توجد صورة) (Re: موسى أحمد مروح)
|
بوست جميل يا سجيمان استمتعت بقرايته جدا
و من باب الشوز الدخلت التاريخ و بعد مراجعة ذاكرتي و القوقل
خفي حنين و درس في بعد النظر
حذاء سندريلا و دلالاته
جزمة ابو تحسين، الضرب بيها صور صور صدام حسين بعد الاطاحة به
ريشتارد ريد، الراجل البي سببه جننا في المطارات و مشانا حفيانين، كان داسي مفرقعات في جزمة ، الله لا كسبه
و جزمة الصحفي الحاول يضرب بيها جورج بوش و جزمة نيكيتا خروشوف رئيس الاتحاد السوفيتي السابق القلع جزمتة و ضرب بيها الدرج في اثناء اجتماع عمومي لليو ان 1960، بعد اتهام الفلبين في اجتماع الامم المتحدة انه الاتحاد بلع كل شرق اوروبا و هضم حقوقها السياسية
http://www.youtube.com/watch?v=Yho1Eydh1mM
| |
|
|
|
|
|
|
Re: نعــــلات زوجـــة الرئيـس(توجد صورة) (Re: Rihab Khalifa)
|
Quote: و جزمة نيكيتا خروشوف رئيس الاتحاد السوفيتي السابق القلع جزمتة و ضرب بيها الدرج في اثناء اجتماع عمومي لليو ان 1960، بعد اتهام الفلبين في اجتماع الامم المتحدة انه الاتحاد بلع كل شرق اوروبا و هضم حقوقها السياسية |
اشهر جزمي عندي هي الجزمة الجابها لي ابوي من الخرتوم وانا في رابعة اولية. وهي جزمه ام رباط وارضيتها مثبته بالحديد(renforced) تأتي شهرتها الى ان لبستها بنسبة 1:40 من عمرها الأفتراضي. والسبب انو كل يوم بيلبسها واحدمن التلامذةال39 آخر اليوم ويجيبها باكر وانا كنت عندي يوم زيهم واحد. اخونا صلاح على كان عندو يومين وراء بعض لانو قال اهلو بعيد في "المشرع اللبيض" تقول لي جزمة مش عارف فلانة
| |
|
|
|
|
|
|
Re: نعــــلات زوجـــة الرئيـس(توجد صورة) (Re: Rihab Khalifa)
|
Quote: لووووووول دي اشتراكية جد جد يا محمد، تقول لي خوروشوف! |
كيف يا رحاب وجمعتك خير تتصوري صلاح على دابتاع الدبل هسع عندو جنسية امريكية وهو يقرب لي سجيمان دا لكن والله العظيم برغم من انه عاش نصف عمرو في واشنطن ... لكن والله مازال عائشا بثقافة "تلك الجزمة" له التحية حيث يعيش الأن بين غنيماته في راكوبتو الضليلة في السليت ويحلب لبنو في جركانة المغرب ويمشي اهلو في الصحافةبالرغم من انو يمتلك مطعما في واشنطن باسم " الخرطوم".
| |
|
|
|
|
|
|
Re: نعــــلات زوجـــة الرئيـس(توجد صورة) (Re: Rihab Khalifa)
|
اها يا رحاب
عارفة... البوسطي دا لنعلات النسوان.... ناسك ديل لما افضى من دا بشوف لهم بوسطي براهو.... جبت طاري نعلات شاوشيسكو... عشان كل يوم بيحرق جوز نعلات.. وما قاعد يشتري لي مرتو نعلات... حسب السرد التاريخ ... لنعلات سيادة الرئيس شاوشيسكو
| |
|
|
|
|
|
|
Re: نعــــلات زوجـــة الرئيـس(توجد صورة) (Re: سجيمان)
|
سيجمان المسخوت زكرتنى قصة الراجل المشى مع مراته السوق تشترى شبب واقفة جم بتاع الاحزية تعزل دا و تشيل و تخت قام سيد المحل عزل ليها واحد كعب قزاز عالى النوع البقد الحجر قام راجلها حمر لى الزول قال ليه دا ما انفع الزول قال ليه وأنت مالك بيه ؟الراجل همم كدا وقال كيف مالى انا انا البدفع القروش الزول رد قال ليه اها دفعت القروش داير تلبسوا أنت؟امكن هى عاجبها وقام جاطوا كدا فى الأخر الراجل قال انا ما بلبسه لكن بتنضرب بيه أنت؟
| |
|
|
|
|
|
|
Re: نعــــلات زوجـــة الرئيـس(توجد صورة) (Re: سجيمان)
|
Quote: و من باب الشوز الدخلت التاريخ و بعد مراجعة ذاكرتي و القوقل
خفي حنين و درس في بعد النظر
حذاء سندريلا و دلالاته
جزمة ابو تحسين، الضرب بيها صور صور صدام حسين بعد الاطاحة به
ريشتارد ريد، الراجل البي سببه جننا في المطارات و مشانا حفيانين، كان داسي مفرقعات في جزمة ، الله لا كسبه
و جزمة الصحفي الحاول يضرب بيها جورج بوش
و جزمة نيكيتا خروشوف رئيس الاتحاد السوفيتي السابق القلع جزمتة و ضرب بيها الدرج في اثناء اجتماع عمومي لليو ان 1960، بعد اتهام الفلبين في اجتماع الامم المتحدة انه الاتحاد بلع كل شرق اوروبا و هضم حقوقها السياسية |
تجيبي ديل كووووولهم .... وتنسي الطمبوري؟
مالو (حذاء الطمبوري)؟ عيبيهو لي.
| |
|
|
|
|
|
|
Re: نعــــلات زوجـــة الرئيـس(توجد صورة) (Re: سجيمان)
|
سجيمان
ازيك ياخ
كلامك التحت دا سعيلي الله ماهو صاح!
""""نُقُلتي... حكم رومانيا .....هو نيكولاي شاوشيسكو...كان بيسوي ويخيط النعلات.... وقام من نعلاتو ديل ولقى نفسو رئيس.... لدولة ليها شنّة ورنّة.. رومانيا.... حكمها النُقُلتي دا اربعة وعشرين سنة.... وبقى لناس رومانيا في رقبتن... لحدي ما زهجو وهاجو عليهو وشالوهو برا... واعدموهو هو ومعاهو مرتو قدام كميرات التلفزيون.... قالو كان من تغاهو وقلة ادبو.. كل يوم يلبس نعلات جُداد... وفي الليل يحرقن.... اها احسبو معاي الزول دا حرق كم نعال من حكم لحدي ما اعدموهو...ما بعرفو كان بيشتري لمرتو معاهو نعلات واللا لا؟.... لكن ما اظنو كان بيشتري ليها لانو لو كان بيشتري ليها كان حدسونا بيهن!"""""
والله بتذكر لليوم, كيف ناس التلفيزيونات والصحافة كانوا بفتشوا دواليب شاوسيسكو. اظنهم لقوا كم شراب وكم جزمة وكان احباطهم كبير لدرجة. لانهم كانوا عايزين انو الشيوعيين يطلعوا حرامية زي ماركوس لكن فشلوا. اها يا اخوي صلح نضميك! نعم هو كان ديكتاتور, لكنه ما كان بتاع سرقة ولا بعزقة. كان جيراني هنا في امريكا من رومانيا, والله يوم ابوهم-في حوالي السبعين- بحكي لي عن الحياة زمان يعني زمن شاوسيسكو, وهسع, والله العظيم قرب يبكي!!!!
--- اها انا رفعت ليك بوستينك. عندي واحدن باير كدة لو لميت فيه ارفعه, ان شاء غلاط, سمح!
| |
|
|
|
|
|
|
Re: نعــــلات زوجـــة الرئيـس(توجد صورة) (Re: سجيمان)
|
سجيمان
ازيك ياخ
كلامك التحت دا سعيلي الله ماهو صاح!
""""نُقُلتي... حكم رومانيا .....هو نيكولاي شاوشيسكو...كان بيسوي ويخيط النعلات.... وقام من نعلاتو ديل ولقى نفسو رئيس.... لدولة ليها شنّة ورنّة.. رومانيا.... حكمها النُقُلتي دا اربعة وعشرين سنة.... وبقى لناس رومانيا في رقبتن... لحدي ما زهجو وهاجو عليهو وشالوهو برا... واعدموهو هو ومعاهو مرتو قدام كميرات التلفزيون.... قالو كان من تغاهو وقلة ادبو.. كل يوم يلبس نعلات جُداد... وفي الليل يحرقن.... اها احسبو معاي الزول دا حرق كم نعال من حكم لحدي ما اعدموهو...ما بعرفو كان بيشتري لمرتو معاهو نعلات واللا لا؟.... لكن ما اظنو كان بيشتري ليها لانو لو كان بيشتري ليها كان حدسونا بيهن!"""""
والله بتذكر لليوم, كيف ناس التلفيزيونات والصحافة كانوا بفتشوا دواليب شاوسيسكو. اظنهم لقوا كم شراب وكم جزمة وكان احباطهم كبير لدرجة. لانهم كانوا عايزين انو الشيوعيين يطلعوا حرامية زي ماركوس لكن فشلوا. اها يا اخوي صلح نضميك! نعم هو كان ديكتاتور, لكنه ما كان بتاع سرقة ولا بعزقة. كان جيراني هنا في امريكا من رومانيا, والله يوم ابوهم-في حوالي السبعين- بحكي لي عن الحياة زمان يعني زمن شاوسيسكو, وهسع, والله العظيم قرب يبكي!!!!
--- اها انا رفعت ليك بوستينك. عندي واحدن باير كدة لو لميت فيه ارفعه, ان شاء غلاط, سمح!
| |
|
|
|
|
|
|
Re: نعــــلات زوجـــة الرئيـس(توجد صورة) (Re: سجيمان)
|
تعرف ياسيجمان ام الأولاد قالت عايزة مفراكة بتاعت كهرباء وأنا ما صدقته طوالى جبتها ليها وأتخصلت من مفراكة الخشب الطويلة العارفة ديك هي مستغربة لسرعة الأستجابة وداقسة ما عارفة انه عندى اجندة خفية فى التخلص من المفراكة التقليدية طبعا انت سيد العارفين
| |
|
|
|
|
|
|
Re: نعــــلات زوجـــة الرئيـس(توجد صورة) (Re: 7abib_alkul)
|
حبيب الكل
Quote: تعرف ياسيجمان ام الأولاد قالت عايزة مفراكة بتاعت كهرباء وأنا ما صدقته طوالى جبتها ليها |
يا زول انت نصيح؟؟؟؟؟؟؟؟؟.. تزود المرا باسلحة الدمار الشامل؟؟؟؟..... علي بجملة الايمان مكوة الكهرباء انا مخوفاني وقاطعة قلبي...ووقت تكون ام العيال قاعدة تكوي..اطوطو في طرف العنقريب.هنوووك.... والبد ساكت..لمن تنتهي....
| |
|
|
|
|
|
|
Re: نعــــلات زوجـــة الرئيـس(توجد صورة) (Re: سجيمان)
|
سيجمان يازول الأدوات الكهربائية دى عندها تكتيك خاص بتمحور فى انك تبعد سريرك من اي بلك كهرباء مسافة اطول من مسافة اي وصلة كهرباء عل الما عرفته ليه حل وخلانى انوم بى عين واحدة الجك السخانة بتاع الكهرباء عنده قاعدة موصلة بالكهرباء والجك بعد الموية تغلى بتفكة من القاعدة وابقى سلاح جوال قاطع قلبى
| |
|
|
|
|
|
|
|