شيخ الكارورى يتحدث فى خطبة الجمعه كمن فرغ من يوم الحساب..اتقى الله فى عباده فانك كادح ملاقى ربك

(عدل بواسطة صديق الموج on 01-18-2011, 05:59 AM)

Quote: دلف الشيخ الى نية الحكومة عن خفض الانفاق الحكومى وتقليل مصاريف التنفيذيين من وزراء ودستوريين، حتى ينعكس ذلك على المواطن قال الشيخ اصلحه الله: بدل ان تخصص الحكومه ثلاثة سيارات للوزير كان عليها ان تخصص له سيارتان ويخت لاننا لانستعمل ماحبانا به الله من انهار كوسيلة مواصلات وعندما يعطى الوزير يخت نكون بذلك خفضنا مصاريف الوزير وايضا يمكنه ان ياخذ به عائلته فى عطلة نهاية الاسبوع فى نزهة نيلية وبذلك نكون اصطدنا عصفورين بحجر.

Quote: الموج يا صديق يا سيدي دا بيكون جابوا ليهو الخطبه دي جاهزه علشان يهدئ الشعب اللي بدأ يحس بالضيق والغلاء ، المفسدون في الأرض يعرفوا كيف يأثروا في الشعب الغلبان بخطبه عصماء من رجل دين يعتبروه بيقول كلام حق ولكنه حديث باطل فقط من أجل عيون السلطان ! طيب ما يعملوا لبقية الشعب يخوت برضو وننعم بما حبانا الله من أنهار كوسيلة مواصلات ولا اليخوت دي لحوش بانقا بس !!

Quote: يا مونج ...لك صورة طال عمرو حيا و ميتا شيخ(كارورى) وهو من ناحية ملاقى دى ملاقى....لكن (كادح) فيها قولان.....وقر قر قر

Quote: قد لايصدقنى البعض ان هذا كلام انسان جاهل ناهيك عن شيخ فى مقام الكارورى لكن اقسم لكم بالذى رفع السماء بلا عمد هذا ماقاله شيخنا لم ازيد او ازايد عليه بحرف حتى استعمال اليخت فى العطلات قالها الشيخ ويخت نفسها لم يقل مركب او قارب قال يخت.. شيخنا اتقى الله فى نفسك وانت على عتبات القبر ما بتضمن تكمل ماهية الشهر ام لا وقل قولا جميلا.... استغفر الله لى ولكم من ما قاله شيخنا وسمعت،،،

Quote: يعنى أسع انا لو نقلت ليها كلام شيخ الكارورى القال بطالب ب يخوت (جمع يخت) للوزراء بتظن فينى خير

Quote: ود الموج سبلامات لسة الغريق قدام دي البداية ولكن مين يقدر يقول البغلة في ة في الابريق

Quote: العزيز/ صديق الموج في حياتي لم اسمع ممن يرتقي المنبر بمثل هذا المستوى .. بالله مثل هذا يكون اماما فما بال البقية!!!! لله في خلقه شؤون تحياتي

Quote: سلامات عزيزى صديق , تعرف قبل فترة كنت فى ضيافة صديقى عضو هذا المنبر عماد شمت , وقد حضرت السيدة بيا قوبنشتاين لزيارة الصديق عماد وهى عضوة فى البرلمان السويسرى وتنتمى لحزب الخضر , وبعد ان عرفنى بها الصديق عماد أخذنا نتحدث عن الاوضاع فى السودان حيث سبق لها زيارة السودان ضمن وفد برلمانى سويسرى وقد التقت شيخ حسن عندما كان فى السلطة , سالتها عن مخصصاتها كبرلمانية وسؤالى كان بسبب أنى شاهدتها وهى تقود دراجة هوائية , افادتنى بأن المخصصات الوحيدة التى تقدم لهم كبرلمانيين هى تذكرة قطار سنوية فى الدرجة ليتمكن النائب من حضور جلسات البرلمان , واردفت نحن أصلا موظفون وعمال لدينا مهننا التى نعتاش منها , وعندما تكون هناك جلسة للبرلمان يتم تعويض ساعات الغياب عن العمل بعمل اضافى , وعندما اخبرتها بان نوابنا أمد الله فى ايامهم وحفظهم يتقاضون مرتبات وتخصص لهم سيارات اما الوزراء فلا أستطيع ان احصر لك عدد أمتيازاتهم , ردت على قائلة اذن السياسة عندكم مهنة ومصدر للثراء لذا سياسييكم يتصارعون حولها اما نحن فالسياسة ربما كانت مصدر للتعاسة والهم والافقار , يعنى أسع انا لو نقلت ليها كلام شيخ الكارورى القال بطالب ب يخوت (جمع يخت) للوزراء بتظن فينى خير .

Quote: صديق الموج .. سلامات .. يا اخوى إنت بتفتش للمحن ماااالك !! و داير تجيب لروحك جلطه و سكته !! انا شخصيا جنس ( القنوات ! ) دى ! قنعت منها لى زمن ! حفاظا على الصحة ... و بعدين ده واحد من مجلس كهنة الطاغوت !! إخيّل لى إسمو ( عبدالجليل النذير الكارورى ! ) !! وجه ملتحى , كريه و قمىء .. إكف الرحمة .. عبدالماجد

Quote: الكارورى دا يدوهو عجلة الا يسب الدين مكعب للحكومة! جنى

Quote: والله يا صديق إنت يوم بطق ليك عِرِق من إرتفاع الضغط يا أخوى البوديك تسمع الكارورى شنو ؟؟ حافظ على صحتك وإبتعد عن الحاجات دى

Quote: الاستاذ صديق تحياتي ليس الغريب انه قال ذلك فهو قول يشبهه ولكن الغريب انك كمثقف تبحث عن الفقه في الدين من مثل الكاروري..........هذه مصيبة المثقفين في بلدي

Quote: يكون قاصد زي حق محمد بن راشد دا والا أقل منو ؟

Quote: دحين يا وليد هو ديل ما لهم و مال الدين وكت قولهم كلام الله و فعالهم ما فعال صالحين كتير فيهم عديل حقار و بالقرآن كمان تجار و كضابين أكان بنزين عدم .. أو جاز وتعبوُ الناس و ضاقو خلاص صفوف واقفين يقولولك إرادة الله وكان عدم الرخيص و الغالى في التموين يقولولك ده . غضب الله و كان الموية صبحت طين يقولولك ده من امريكا والعملا حمونا الشب ولاد الكـــــــــــلب عشان الشعب يحرن تب يقبّل من صراط الدين دحين يا وليد هو ديل ما لهم و مال الدين أكان كنزو الدهب و المال بلايينهم تسوى جبال وعرباتهم تخطف العين و بناياتم قصور في قصور وحاة الله و كتاب الله أكان ادونا طوب فد سور كان سوينا الف أويضة لي مسكين

Quote: يا صديق انت متأكد أنو قال يخت عديل دي قوية دي لكن هسي ديل فضلو لماري أنطوانيت دي شنو؟؟؟

Quote: عبد العزيز عيسى.......ازيك والله يا عبد العزيز انا كان ما سمعت باضانى كان قلت لى اى زول يقول لى كده انت كضاب.. شيخ شنو؟ده زول اثبت انه يفتقر الى ادنى درجة التدين زول تهمه رقبته ويقول مايرضى السلطان فقط،،،

Quote: ود الموج ... تحياتي فعلا أدهشتني مثلك خطبة الكاروري التي أتابعها كل جمعة ... واستغربت للوزراء الذين أعرف لأول مرة أن الحكومة تخصص لكل واحد 3سيارات ... وسمعت مثلك كلمة اليخت والاستعاضة عن المواصلات بالمواصلات النهرية ... طيب أنحنا في الأبيض ياربي حنركب اليخوت كيف ؟؟؟ ولا خليك من الأبيض .. جماعتنا ناس عد حسين والأزهري وكمان ناس امبده والثورات وبهناك ناس الحاج يوسف والكدرو ديل يوصلوهم كيف ولا برضو الحكومة حتضطر تشق قنوات من النيل عشان المواصلات النهرية الرخيصة ؟؟؟ مسألة المواصلات دي هينه لكن بين السطور الكاروري قال جمله أظنها بتعني الكتير ولقد توقفت عندها طويلا ... قال ( يعني شنو ابيي وفايدتا لينا شنو ؟؟؟ ) ما الذي يمهد له الكاروري ؟؟؟؟؟؟؟!!!!!!!! غايتو ... الاختشو ماتو !!!!