|
|
 خدر FM
|
مرحبا بكم اعزائي المستمعين في اولي حلقات برنامجكم خدر FM الذي يبث علي الموجة القصيرة 104.0 ميقاهيرتز , سنتحدث في كل حلقة عن موضوع قديم جديد سنستعرض الكثير من القضايا الاجتماعية و السياسية و الثقافية و سنستضيف المتخصصين و سيكون هناك اتصال هاتفي مفتوح علي المستمعين للمشاركة في برنامجكم خدرFM . والان الي الحلقة الاولي
|
|
  
|
|
|
|
|
|
|
|
Re: خدر FM (Re: خدر)
|
حلقتنا اليوم عزيزي المستمع عن الحنين و العلاقة المتينة بين الحنين و الريحة , موش الريحة العطر , لا الريحة في عموما. و الليلة انا عندي حنين غريب لشئ بعيد اليف ملامحو ما واضحة يمكن حنين لي صديق غائب او بنات او نكهة مكان. السودان زمان كان كل حاجة فيهو عندها ريحة , الخريف و الحبوبات و زيت السمسم و علبة العسل الخدرا الفيهو صورة اسد , وابوي و اليماني سيد الدكان كانت ريحتو دكان اليماني , جد والله , ريحة دكان اليماني ماركة مسجلة للكناتين آنذاك و المدهش انو الريحة كانت موحدة في كل انحاء البلاد و علي متابعينا في الاقاليم مراعاة إختلاف الريحة إن وُجد . مثلا حبوبة كان ريحة توبها بهارات و فليردمور و سرتية - الخريف كان ريحتو ريحة طين و البنات ما كان عندهم ريحة ,كانت ضحكتهم ريحة و كانت كل واحدة بتلبس توب بشبها و انا عزيزي المستمع كنت بحب ربطة التوب (فتقة واحدة) الفي نص البنات ديك , كنت بتلصص الربطة دائما و اظنها كانت السبب في حصولي علي مجموع ضعيف في امتحانات الشهادة السودانية اول مره مما ترتب عليه مقاطعة كاملة للبنات و تياب البنات التي كادت ان تطيح بمستقبلي . شجر الحنة كان عندو ريحة , تخيل عزيزي المستمع !! المهم في الامر انو كان كل شي عندو ريحة .. فهل لازالت لكل شي رائحة الان ؟ نسمع اغنية عن الحنين للاستاذة بشائر فرح و بعدها نستقبل اتصالاتكم علي الارقام الموجودة علي الشاشة
| |
|
|
|
|
|
|
|
|
|
Re: خدر FM (Re: خدر)
|
خدر ازيك ياخ ........
سؤال انت عسل الاسد ابو علبة خضرا ده صنع خصيصا للسودان والا شنو ماحصل لقيتو في اى بلد تاني ...... 
| |
|
|
|
|
|
|
|
|
|
Re: خدر FM (Re: omer osman)
|
سلامات يا عمر
انالاقاني في لندن قبل 8 سنوات , لكن ما فتشتو تاني
زي ما سامع عزيزي المستمع , مقدم البرنامج سعيد جدا انو لاقي واحد من جيلو متزكر معاهو علبة عسل الخدرا ماركة الاسد
| |
|
|
|
|
|
|
|
|
|
Re: خدر FM (Re: خدر)
|
| Quote: زي ما سامع عزيزي المستمع , مقدم البرنامج سعيد جدا انو لاقي واحد من جيلو متزكر معاهو علبة عسل الخدرا ماركة الاسد |
كيييييف ياخ نحن جيل ماقبل ثورة (اكياس البلاستيك) زمن الطحنية والجبنة بالصفيحة يدوك ليهم في ورق الجرايد ...
الطحنية ما مشكلة لكن موية الجبنة تلخبط ليك حبر الجريدة فوق تحت وناااااكل ساكت يوم واحد فينا مشي الدكتور مافي .........
دكتور شنو زماااان والله ياخدر شوف رغم انو نحن اولاد نمرة 2 بنمشي العيادة
او اسمها المركز الصحي زينا وزي باقي خلق الله .... الصبااااح في دفتر اسمو دفتر العيادة تسجل اسمك فيهو ويقوم واحد من ناس سنة سادسة يسوقكم
يوديكم العيادة ....... اهااااااااااا دي عندها علاقة بالريحة ...... ريحة واحدة في اى عيادة في السودان وبغض النظر عن مرضك الدواء واااااحد تاخدو
بتبقي كويس طواالي .................
| |
|
|
|
|
|
|
|
|
|
Re: خدر FM (Re: omer osman)
|
العيادة كان عندها ريحة يا عمر , ميكروكروم و بنسلين علي ما ازكر لكن المدهش بالنسبة لي العقل المتآمر لدي مؤسسة المدارس السودانية , العقل الابتدع فكرة انو التلميذ مُدان حتي يثبت تمرجي المركز الصحي مرضو من عدمو. ده كان ارهاب غريب عزيزي المستمع و سنفرز له حلقة منفصلة لاحقا عنوانها الارهاب المدرسي في زمن الرئيس المخلوع جعفر النميري.
نعود لموضوع الحنين و رائحة الامكنة في سودان الامس . كل مكان يتمشيهو بكون عندو ريحة يعني مثلا تمشي زيارة لي ناس او يجيكم ضيف من الخليج , و ضيوف الخليج الوكت داك كان كلهم ريحتهم ون مان شو , ما عارف ليه !! و ون مان شو دي ريحة دخلت السودان عن طريق البواخر القادمة من جدة حين بدأ الاغتراب في منتصف سنوات جعفر النميري الي السعودية و تحديدا الي جدة , حينها كانت جدة فقط قبل ان تتحول الي عروس البحر الاحمر و تصير بقدرة قادر بعد ثورة الاتصال الاخيرة الي جملة اعلانية في محطات التلفزة (جدة غير) و اظن كثيرين حتي الان و انا منهم لازلنا ننتظر تتمة الجملة , غير شنو ؟ المهم في الامر ان تلك الرائحة ارتبطت في كل بقاع السودان بالمغترب القادم بقوة من السعودية باحثا عن عروس , و تشرئب أعناق الجميلات في محاولات مستميته منهن للفت نظر الغازي المتسلح بون مان شنو اليهن ..
معنا إتصال الان ..
الو .. منو معاي ؟
| |
|
|
|
|
|
|
|
|
|
Re: خدر FM (Re: omer osman)
|
الو ... الو ..خدر FM
عاطر التحايا لك وللاخ عمر
ياخ السودان كان جميل وزي ماقلت اي مكان له رائحة تميزه
لو قمت الصباح لازم تفتح بي ريحة الزلابية والشاي المقنن
ياخي الواطة دي لمن يقشوها ليها ريحة مميزة وكمان كان ادوها رشة
ياخي دي قمة المتعة وريحة قهوة الحجاج الصباح وريحة البن
دا كله والناس في الضل ولسه ما قامت علي أشغالها ومدارسها
ياخ الزمن ما كان ممحوق كده.
ياخ والله رجعتنا لي زمن جميل ما اظن برجع
| |
|
|
|
|
|
|
|
|
|
Re: خدر FM (Re: خضر حسين خليل)
|
شكرا كتير صديق البرنامج حمزة و فعلا السودان كان كل شي فيهو ليهو ريحة و طعم و كانت الدنيا مهلة و الناس ممهولين , ياريت نسمع منك حكي و تداعي اكتر في موضوع الحنين ده و معانا تلفون
الووو ..
خضر حسين سلامات يا استاذ و سعيدين بي إتصالك , اتفضل المايك معاك
| |
|
|
|
|
|
|
|
|
|
Re: خدر FM (Re: omer osman)
|
نحييى خدر
اف ..ام
ونتمنى لها خدمه ممتعه ممتده .. الفكره حلوه وطبعاً
الصندوق المختوت تحت ده .. ماقاعد اعرف افتحو او هو
عندو حساسيه معاي , لكن موضوع الحلقه الاولى محفز للمتابعه
اذا كانت سمع او اطلاع واسمح لى كمستمع من دول العالم التالت
ان اسميك .. وناساً سودانياً اصيل ..
نرجع ليي موضوعة الريحه والحنين .. تعرف ياصديق
ده واحد من المواضيع الما بتخلص .. يعنى باختصار
ممكن تربط بيهو المستمع الى ما لانهايه وتكونوا انت
والمستمع بتاعك فى قمة الاندماج
.. شوفت صندوق الذاكره ده عجيب كيف
ما اشبهه بالصندوق السحرى
دكان فى امستردام
اطلع ليك شارع فى العبيديه
او نفحة عطر صباحي ما لي زوله تشاركك المترو فى طريقكم
للعمل , توديك للحظه مقرفص فيها على الارض والدنيا عرس
وفنان شعبى وشيالين وبنات حلوات بعزموهم للرقيص وهن
متدللات
..
.
بنجيكُم تانى
.
.
شكراً على التلفون والعطر الصباحى
.
.
| |
|
|
|
|
|
|
|
|
|
Re: خدر FM (Re: khatab)
|
ألووو إزيك يا فنان
في الحقيقة عندي كلام كتير عايز اقولو ممكن أجي باكر فقد (أليل ليل) الخرطوم
يامولانا ؟
لو مافي سكة قول عادي برجع ليك تاني هسي ؟
ـــــ
كنت برفقة الاصدقاء يامولانا فما تشيل حالنا مع البرنامج
| |
|
|
|
|
|
|
|
|
|
Re: خدر FM (Re: خضر حسين خليل)
|
- ألوووووووووووو
.....
- هولندا ؟؟
.....
- أيوه أيوه أنا متصل من هنا !
.....
- ممكن والله أقترح
.....
- نعم ؟
.....
- أيوه إقترااااااااااح
.....
- يعني تعدد الأغنيات في البرنامج قليلة وياريت بس تزودوا الجٌرعة شوية
.....
- لا لا نفس الفنان
.....
- شكراً
<>
أما حكاية ريحة الحبوبات فده شعراً ما عندي ليهو رقبة أقصد رقبة ما عندي ليها شعر حسي
في البرد ده ، الدموع بتزيد البرد في الوش ، أصلو وشنا نِشف .
وشنا نِشف يا خدر ياخي
نِشف .
| |
|
|
|
|
|
|
|
|
|
Re: خدر FM (Re: خدر)
|
اخد زمنك صديق البرنامج و صديق مقدم البرنامج خضر حسين خليل , و حا ننتظرك بكرة في نفس المواعيد و تمنيات البرنامج ليك بسهرة سعيدة مع الاصدقاء و البرنامج بهديك و السادة المستمعين اغنية من اغاني الحقيبة تسجيل نادر مشاركة من مكتبة الاستاذ صديق البرنامج نزار الخواض و هي اغنية نادرة لان مؤدييها كانوا من قمم الموسيقي و الغناء السوداني آنذاك , الاستاذة صديق الكحلاوي و بادي محمد الطيب و عبدالعزيز محمد داوؤد . المدهش انو عند الاستماع للاغنية دي حا تجيك ريحة الماضي و ايامو و ده بأكد ما ذهبنا اليه في بدايات حلقة اليوم عن الاماكن و رائحتها , شكرا صديق البرنامج خضر حسن و شكرا استاذنا نزار الخواض لخص البرنامج بتلك الاغنية النادرة
| |
|
|
|
|
|
|
|
|
|
Re: خدر FM (Re: خدر)
|
خدوري اف ام
ياخي تتذكر ريحة الكراسات والكتب الجديدة لمن تفتح المدرسة حتى الكنب والادراج الجديدة ليها ريحة خاصة وشجر المدرسة كل شجرة ليهاريحة تختلف من التانية وكمان لو ربنا اكرمك بي كبك من باتا جديد تجي البيت تطلع الكبك تشم ريحة عند السيد على الميرغني مافي كاااااااااك تمشي سوق الخضار ريحة مختلفة من سوق اللحوم البيضاء والحمراء منها وتخش سوق البهارات تاخد ليك عطسة اول حاجة وتحمد ربك بعد داك تبدا تفرز ريحة الشطة من الشمار
ولو رجعت البيت بي بوكس ولا حافلة او ابو رجيلة كل واحد له ريحة مغايرة عن التاني
ياخي زمان النخرين كانت اصلية المشكلة كلها من تايوان كااااااااااااااااك
تيت تيت تيت الخط فصل
زاتوووو
| |
|
|
|
|
|
|
|
|
|
Re: خدر FM (Re: خدر)
|
الو بلبل امستردام
( مداخلــة لاثراء الونســة )
بيت الزار ( فيهو ريحــة بتظل عالقــة بجو بيت الزار لاكثر من اسبوع ) بتدى الزول إحساس بغياب ومغادرة زول للحياة
ريحــة ( السيد على ) إنتاج صاحبها الشبراويشـى وتلازمهــا مع الكفن السودانـى
( سؤال )
( إنــي لاجد ريح يوسـف لولا ان تفندون ) سورة يوســف ... لماذا تحدث القران بالفعل (تجد / اجد / يجد ) ولم يقل
أشم / شم / يشم ؟
( ممكن طلب و اهداء ) اغنيــة تفك فيها الحلــق (يا حمامــه ) والاهداء الــى التى تلتحــف شتاء بلدة مــا نزعت اوراق
اشجارهـا دون إستئذان
ترمــة ( إنت بيقولو ليك مولانـا خدر ليــه ؟) وما شرعــت الاسئلة الا للسؤال !!
| |
|
|
|
|
|
|
|
|
|
Re: خدر FM (Re: بدر الدين اسحاق احمد)
|
أخونا خدر FM
تحية طيبة زيك
شكراً ليك كتير كلامك جميل و غناك أجمل
-
شكلك كدا الليلة حا تساهر بينا لكن السهر معاك ليه نكهه و طعم جميلين جداً
دي مداخلة سلام و الباقي عايز ليه مداخلات براها
تحياتي
| |
|
|
|
|
|
|
|
|
|
Re: خدر FM (Re: ABUHUSSEIN)
|
| Quote: علبة العسل الخدرا الفيهو صورة اسد |
عارف دا العسل الإنجليزي اللي كنا بنعمل منو السندوتشات أو في الصحن و نغمس و ناكل
عندنا هنا في السعودية كان موجود و سامية حامد عندها قراصة خفييييييييييفة بتعملها
ما بتظبط إلا بالعسل دا و معاه القشطة ... و الله يا خدر تجيبها ليك في الصحن
تقوم تلفها زي السجارة الخدرة و تأكلها و الله لو ولدك بكى قدامك ما تديهو
قبل شهر قالت عايزه تعملها فتشت الرياض كلها ما لقيت العسل دا و طارت علينا القراصة
.
| |
|
|
|
|
|
|
|
|
|
Re: خدر FM (Re: ABUHUSSEIN)
|
| Quote: العيادة كان عندها ريحة يا عمر , ميكروكروم و بنسلين علي ما ازكر |
ياخي بالغت في دي........
صبغة اليود و السلفا
عارف مرة في مستشفى أمدرمان زمن الكنب الطوييييييل اللونو رمادي داك
واقف جنب صيدلية المستشفى الداخلية و المراة شايله ليها شافع ببكي
قالت ليه أسكت يا ولدي و الله سلفا ما أدونا ليها.....
الزمن داك المستشفى نضيفة و فاضية و العيانيين ذاتهم نضيفييييييييين
كدي ما تشوف لينا غنا سمح زي الفوق دا
تحياتي
.
| |
|
|
|
|
|
|
|
|
|
Re: خدر FM (Re: ABUHUSSEIN)
|
[ خدر ياخ عندي شخشخه في الإرسال رغم إني قفلت الراديو وفتحتو .. ريحة راديو الكهرباء من وراء.. مع قدود الكرتون،
بالمناسبه العسل البتتكلموا عنو أمبارح دي لاقيتو في رف أحد السوبر ماركتات، بس ابعد منو ، بيرفع السكر في الدم
أكتر مما رفعتو الإنغاز في الدكاكين...
هسه ما عارف أوصف ليك العلبه كيف في الإف إم بتاعك ده ، وكنت قايل معناها إختصار ( فكَّت مننا) وزمان كانت في حلتنا واحده باتريوت بس ، شديده شده يا خدر ، إسمها ف.م وبلغة إختزال الشباب كنا في الونسه بنقول ليها FM وكانت بالفعل Frequency Modulation عموما ، الريحه المابتتنسي كلو كلو هي ريحة اللبن المقنن ( codified milk ) وريحة حِنَّة الطهور وحبوبه وتوبا..
| |
|
|
|
|
|
|
|
|
 Re: خدر FM (Re: محمد المرتضى حامد)
|
هالو , خدر إف إم
برنامجكم جميل والله,
ممكن أشاراك؟
غايتو ياخدر موضوع الريحة دة وقع لى فى جروح "كتيرة"
عندى علاقة غريبة مع روائح الناس , ممكن اميز ريحة زول من مسافة , وممكن زول يشبه لى زول بريحتو بس , ومابكون بيناتهم اى شبه فى الملامح ,
مخدة أبوى, ولغيابو الكتير كنا بنغير كيس المخدة يومياتى لما يكون فى ونحتفظ بـ أكبر عدد من الأكياس
وتوب أمى بتاع الصلاة , ست أسماء أم فصلنا وريحة صابون غريب حقا هى براها , مع انو امى كل مرة بتقول لى كل الناس بستحم بـ "الفنيك" دة ياندى , لكن أصلو غير ست أسماء ماشميتو عن زول, دكان جدى وريحة براهاتشم فيها بخور تيمان,زيت سمسم ,صابون غسيل وريحة مصلايتو بتاعت الجلد.
وفى ناس ريحتهم تملأ المكان حياة , تحس بصخب محبب حتى لو مانضمو , ريحتهم تصلى فى المكان بخشوع.
لما تصلوا "الشوف" أدونا خبر , وبشوف القلب.
وشكرن لخدر إف إم وللمستمعين كلهم
| |
|
|
|
|
|
|
|
|
|
Re: خدر FM (Re: ندى عثمان حسن)
|
يعنى مقدم البرنامج خدر
واحد من المشاركين سال من علبة عسل خدرا...
البوست دا اناشامى فيهو ريحة خدرا عديييييل...
-----------
تحياتى يا البصاص
البرد شكلو خشة العضم 
| |
|
|
|
|
|
|
|
|
|
Re: خدر FM (Re: Mohammed Awad)
|
الو ...
ممكن اشارك...
معاك الطيب . اى الطيب ود عبدالله من قريه السمبر ريفى ام شتيلته الحنه الفى القليب
. .
عندى صاحبى فى الجامعه بيحب يجى من ورا ويغطى العيون ... و يغير صوتو وهو يقول (( انا منو يا بطل ))
الغريبه اى زول بينقرو ليك من اول مره ما حصل زول غلط ما عرفو غير فد مره....
المره الوحيده الفيها الناس ما عرفتو كان كابى
Deodorant
اخونا دا لى هسى مستغرب ...
العالم دى كيف بتعرفو
| |
|
|
|
|
|
|
|
|
|
Re: خدر FM (Re: Emad Abdulla)
|
الو ...
الو ...
اى ...معاك الخير من الديوم
لا لا ..
ديم القنا..
اكتر ريحه ما بنساها ريحه محلات القماش فى السوق العربى والافرنجى، ريحه مميزة ونافذة ومنعشعه...
اختفت الريحه دى تماما الان لانو كل الملابس بتجى السودان مستعمله ...
وبرضو ريحه الرتينه فى البرد جوة الاوضه ... رغم انهابتولع بالجاز لكن جاز زمان مازى (الجاز ) بتاع هسع...دة هسع بتمسكك منو كاروشه.
معليش يا منو ..ما دايرين نخش فى السياسه ...توت ...توت ...توتززاحسن قطع .. دة داير يقطع عيشنا ويقفل لينا الاذاعه دى.
ومعانا اتصال جديد
| |
|
|
|
|
|
|
|
|
|
Re: خدر FM (Re: abullif)
|
ألوو..
ألووو..
ريحة المنقد لمن يكون في برد شديد وتدخلوا ليك الحاجة في الأوضة عشان الدفو
شقيق الجضوم في البرد ومسح الجلسرين الحار في الرجلين
نقريش القصب في ركن الحلة بالصباح ايام الجمعة
ام الحفر قدام المدرسة قبل طابور الصباح
نشيد علمي أنت رجائي في طابور الصباح في المدرسة
حفظ المحفوظات زمااان لمن يكون بكرة عندك تسميع
| |
|
|
|
|
|
|
|
|
|
Re: خدر FM (Re: Emad Abdulla)
|
الووو ...خدر ازيك
نحنا ناس انطباعيين وشممامين شديد
والله يا خدر ياخ نحنا بنحب بى نخرتنا واضنينا عديل
بعد داك تجى الحاجات التانيه عشان تكمل لينا احساسنا
ريحه ابوى دى عمرها ماغبتنى...ولايوم ممكن اشمها فى حته تانيه
ريحه المطرة...والرزاز...ريحه حبوبتى لمن كانت تسالمنى وتقلدنى شديد
عليها.....ريحه الورد الصباح بدرى...ريحه اولادى
لكن مسعول من الخير يا خدر....هو ريحه الحاجات كلها بقت واحدة وغبتنا مالها.؟؟
غايتو الله يغطس حجر الخلانا ما نفرز ريحه المطرة من ون مان شو .
عاوزاك تغرد يا خدر ياخ....ممكونه والله(غرد ياحمام)
| |
|
|
|
|
|
|
|
|
|
Re: خدر FM (Re: بخاري عثمان الامين)
|
و بنعود ليكم يا اصدقاء خدر FM في صباح جديد , صباح الخير عليكم و شكري العميق لانو الحلقة الاولي و موضوعها لقي صدي عندكم. من اجمل الحاجات البتسعد القائمين علي امر البرامج ذات العلاقة المباشرة مع المستمعين التفاعل البنلقاهو منهم و الليلة الصباح دخلت المحطة و وجدت الانسرماشين فيها الكتير من رسائلكم الممتعة
الصديق عمران حسن من الرياض , بنقول ليك شكرا كتير علي الاتصال و حا اجتهد انو انفذ اقتراحك بس المشكلة الوحيدة انو ادارة المحطة بتحرص علي تنوع الاعمال الموسيقية لانو زي ما عارف الشعب السوداني ده متلقي حجج و بتاع إشاعات و حا ينسفوا لينا إستقرار البرنامج بإشاعات من نوع مقدم البرنامج بقدم غناهو بس و كده و بتاع لكن اوعدك في يوم ما اجيب معاي العود من البيت و اعمل في بث مباشر حلقة خاصة معاي. و برضو بقول ليك يا اخ عمران ما تخاف من الحنين و تبعد منو الحنين إحساس إنساني جميل و كلنا بنحتاج ليهو ,بمرقنا شوية من ضغوط العمل و بزكرنا بأحباب نفتقدهم, بنتمني ليك يا عمران اعوام حافلة بالحنين و الفاء و الروايح الجميلة و شكرا علي إتصالك.
الصديق زاتو لازم الخط يفصل يا معفن لانك بديت الروايح بي ريحة الكبك , خاف الله يا زاتو في المستمعين البسمعوك ديل ياخ لكن رغم كده فعلا حتي الاحذية (الله يكرم السامعين ) زمان كان عندها ريحة و بنقول معاك الله يرحم مصنع باتا و لاركو , فعلا كان عندهم ريحة مميزة موش بعد ما نلبسهم لكن لمن نشتريهم جداد , كان عندي صديق طفولة زمان لمن يشتروا ليهو كبك جديد بنومو معاهو في السرير لحدي الصباح تشجيعا للمنتجات الوطنية . بشكر صديق البرنامج زاتوو و بنتمني نسمع منك تاني و بنقول ليك افتقدنا ضحكتك المرحة الخليعة في الشهور السابقة و بنتمني عودتها.
وجدت آنسرماشين من صديق البرنامج بدرالدين اسحق بنشكرو عليهو و بقول ليهو فعلا ريحة السيد علي مرتبطة عند السودانيين بالحنوط و الموت لكن الوصية في الذمة يا بدرالدين ياخ المستمعين ديل انا بحاول افرحهم هنا و اغير ليهم شوية من الضغط اليومي البحصل ليهم بعد الجري وراء المعايش فياخي جايب لينا سيرة الحنوط و الموت مالك ؟ بالمنسبة للزار اعدك اني سافرد حلقة منفصلة عنو لاحقا و اغنية ازكريني يا حمامة لاستاذنا و شيخنا الانيق عبدالحميد يوسف ستجد حظها من البث لاحقا. اما فيما يخص سؤالك عن استخدامات كلمة شم في الاية الكريم فأظن والله اعلم ان كلمة اجد تم إستخدامها في الايه علي لسان يعقوب عليه السلام , تحدث سيدنا يعقوب عما وجد من اثر الريح و هذا ما بعرف بالمتلازمات الزمنية إذن في كل الاحوال استخدام كلمة ريح يقع في منطقة بلاغة القرآن الكريم الذي هو كلام العرب والله اعلم.
فيما يخص سؤالك الاخير حول اسمي احيلك لاخونا قاضي القضاة دكين لانو هو الاطلق علي اللقب ده و بشكرك تاني علي إتصالك و اسئلتك الجميلة القومت لي نفسي و تابع معانا.
اعزائي المستمعين نطلع لي بريك قصير اخليكم فيهو مع معالجة لمسويقيين شباب لاغنية الحقيبة وحياة عينيك , علي الجيتار عماد ببو - الفلوت ناجي فلوت - الكيبورد محمد الجزار و غناء الشاب امير مع جزيل الشكر للصديق ناجي لمد البرنامج بالاغنية الجميلة .
| |
|
|
|
|
|
|
|
|
|
Re: خدر FM (Re: doma)
|
يأخ والله ده شغل مساطيل !! من أين لك هذا الوحى ياخدر ؟؟!!
تتصور بسرعه إسترجعت كل الروائح التى إندثرت وأستدعيتها كلها وكانت أقواها ريحة القدره
فى دكان عمنا البربرى فى المسالمه ,, يا الله ياخدر !
حتى ريحة الطلح والشاف ياخدر ,, إتغيرت ,,, الطلح ماياهو الطلح ,, والشاف ماياهو الشاف !!
تتصور هسه بقوا يولعوه عشان يطردوا بيهو الباعوضه بـس !!
روايح كتيره راحت !
نحمدك ياربى شبعنا شم
ياربى ناس اليومين دى قاعدين يشموا شنو ؟؟!!
شكرا خدر FM
| |
|
|
|
|
|
|
|
|
|
Re: خدر FM (Re: حاتم الياس)
|
الو الو . . .
خدر
معاك ياسر بيناوي من ابحمد
ممكن اشارك في المسابغة
اولا الف الف لهذة الاذاعة الراقية
وشكرا لمقدم البرنامج لهذة الحلقة الثرة
وشكرا علي الغناء الطاعم ( اقسم باسويردي هنا كان عزاز علينا )
الحنين ياخ ...... الحنين
الزمان اواخر ثمانينات القرن الماضي
المكان نيمة اولاد السكة حديد ( ابوحمد )
المشهد القطر ( قطركريمة ... او اكسبريس وادي حلفا .... او المحلي عطبرة ابوحمد ) وهو داخل علي محطة ابوحمد
اولاد السكة حديد بعضهم يلعب الكوتشينة وبعضهم يلعب الضمنة ... والبعض الاخر يلعب سكج مكج
يلمح احدهم القطر ويهتف ..... القطر جاء
ياسلام وماحلاها تلك اللحظات التي نجري فيها مستقبلين القطر
ونتجه جميعنا الي عربة البوستة وهي العربة الاخيرة قبل الفرملة
حيث نشتري الصحف والمجلات
كانت مجلة ماجد لها نقهه خاصة في تلك الايام
وكتب الالغاز ( الشياطين ال13 والمغامرين الخمسة وكان تختخ يحظي بمحبة شديدة )
وعند مغادرة القطار نرجع الي نيمتنا وكل حظي بما يكفيه من كتب ومجلات حتي القطر الجايي
وفي العصرية نذهب لتمرين فريق السكة ( فريق المدينة الاول في تلك الايام )
ولا انسي هتافنا المشهور ( السكة حديد يامدرسة ..... ادارة وورشة وهندسة ) في اشارة لاقسام السكة حديد
وفي المغربية نذهب لنادي السكة حديد ( وما احلي فول احمدون )
وما اجمله وهو ينادي ابنه صفوت ( الله يرحمو )
ميتينك ياسفوت
واكيد اكيد لي عودة
خالص الود
| |
|
|
|
|
|
|
|
|
|
Re: خدر FM (Re: حاتم الياس)
|
اليومين ديل يالحبيب الواحد ما متحمل نفسه ذاتو ... عديل دايب في اشواقه :( ... مالك علينا وريحة الزمن السمح داك يا سمحين عندي طلب يا خدر اف ام ممكن غنيه تريح الاعصاب بريحة زمنا داك معزتي
| |
|
|
|
|
|
|
|
|
|
Re: خدر FM (Re: حاتم الياس)
|
نعود يا اصدقاء و اتمني انو تكونوا إستمتعتوا بالاغنية الجميلة.
نعود لاتصال صديق البرنامج عادل ابوالحسين و وصلتني اخبار من الإعداد انو عادل عندو اطفال (ماشاء الله عليهم) لطيفين و اصحاب نكتة , يُحكي انو محمد عادل إتكلم عن المدرسة في امسية عائلية يومية بتبادلوا فيها اخبار يومهم و كان بحكي عن أستاذ في المدرسة, إنتهى محمد من كلامو فقام اخوهو الكبير حسين بدأ يحكي عن المدرسة , أثناء ما هو بحكي , عايز يقول إسم الأستاذ شكلو كدا نسى الاسم و قعد يقول أستاذ ,, أستاذ,,أستاذ و اثناء ما هو بحاول بتذكر في إسم الأستاذ قام رفع المخدة و قعد يعاين تحتها, اخوهو محمد ضحك و قال ليهو ,حسين بتفتش للأستاذ تحت المخدة؟ طرائف الاطفال طتيرة و غالبا حا نفرد ليها حلقة منفصلة لاحقا , بشكر اخونا عادل شديد علي المشاركات الجميلة و علي الانسرماشين مع الملاحظات الذكية و تمنياتي بدوام التواصل.
سعيدين جدا بحضور مولانا محمد المرتضي بمعية علبة عسل الاسد الشهيرة و ياريت نسمع منو في باقي الحلقة عن زكرياتو مع عسل الاسد و الباتريون. المدهش يا استاذ محمد انو ريحة حِنَّة الطهور مختلفة من ريحة حنة النساء المعلومة , يمكن لانو الطقس كلو مختلف في أذهاننا في الوكت داك ولا يمكن ياربي من خلعة الطهارة ما عارف اما اللبن المقنن ده فحكاية تانية , انا عندي معاهو برضو علاقة حميمة و اظن معظمنا , شكرا مولانا محمد المرتضي و اتمني انك ما تقطعنا من حلو الاتصالات و الطلة الجميلة.
بنرحب بيك ندي عثمان الحسن و بنقول ليك اهلا بيك في اي وكت صديقة مشاركة في البرنامج و البرنامج مفتوح لاتصالتكم و انتو البتعملوهو بي مساهماتك عن المواضيع البنطرحا, سعدت جدا بي كلامك عن كيس المخدة و ابوك ربنا يمد في ايامو و البيآكد ما ذهبنا ليهو في موضوع الحنين و الريحة عند السودانيين .. سعيد جدا انا يا ندي بمشاركتك الحميمة و علاقتك الجيدة مع الريحة و المكان و قطعا حا نديك خبر لمن نصل مرحلة الشوف , ابقي طيبة و تحياتي لكل الاهل و الاحباب و صابون الفنيك طيب الله ثراه
عدو البرنامج طبنجة , بنحييك رغم الفوضي العملتها لينا دي و بنقول ليك انو البوست عن الحنين و الرائحة عندنا كسودانيين , و لو ما بطلت الفوضي بتاعتك دي حا اكلم ليك مخرج البرنامج بكري ابوبكر يقطع منك السيقنال و احتمال كبير نشتكيك للنظام العام لانك دفقت العسل في الاستوديو.
مرحب بي الطيب و مرحب بجميع اهالي قريه السمبر ريفى ام شتيلته الحنه الفى القليب , مالها يا الطيب قريتكم دي اسمها طويل كده و قطع شك الطول ده من المحنة. طريفة جدا قصة صاحبكم و ذكرتني بموقف حصل لي في منتصف التسعينات مع استاذ الاجيال ابراهيم عوض و كنا بمعية الاستاذ احمد يوسف حمد صاحب و مدير شركة حصاد في عربيتو و كنت انا اجلس في الامام و الاستاذ ابراهيم عوض عطر الله ثراه يجلس في الخلف كعادة الافندية و الباشوات و يحكي علي سجيته عن مواقف مرت به , فحكي من ضمنها ان الجميع يتعرف عليه من صوته و كان مندهش جدا , فضحكنا و قلنا ليهو يا استاذ ابراهيم لو ما صوتك انت الاتعرف صوت منو تاني بتعرف ؟ اتمني انو كل زول يكون عندو ريحة او ديودرنت خاص بيهو نقدر نعرفو بيهو و بالتالي يقدر كل زول يعرف انو التاني متواجد في نفس المكان من ريحتو و اتخيل معاي انك جيت الشغل و مديرك غالطك انك ما جيت الموضوع قطعا بتحسم بي ريحتك الموجودة علي مكتبك
تلقيت اشارة من مخرج البرنامج بكري ابوبكر بحلول موعد نشرة اخبار التاسعة
| |
|
|
|
|
|
|
|
|
|
Re: خدر FM (Re: خدر)
|
| Quote: تلقيت اشارة من مخرج البرنامج بكري ابوبكر بحلول موعد نشرة اخبار التاسعة |
سيبك من المخرج دا و شوف لينا أغنية كااااااااااااااربة نحن جينا هنا هرباً من الأخبار
| |
|
|
|
|
|
|
|
|
|
Re: خدر FM (Re: عمران حسن صالح)
|
عدنا بعد اخبار التاسعة المحزنة عن ارتفاع معدل التصويت لصالح انفصال جنوبنا الحبيب عن الشمال ولا نقول إلا تمنياتنا للاخوة الجنوبيين التوفيق في حيارهم الجديد مع عميق غضبنا علي إتفاقية نيفاشا التي جعلت تقسيمنا الي شعبين لكنها طبيعة الاشياء , فنيفاشا حقنت دماء الشماليين و الجنوبيين لكنها قسمتنا الي دولتين و يكفينا سعادة الجنوبيين في خيارهم و حق دماء السودانيين.
نعود الي إتصالاتكم و نستقبل إتصال من صديقنا ود التوم الديامي الحكاي الوناس و الفنان المعجون بالجن و الموسيقا. ادهشتني يا عماد بتذكرك للامكنة و الروائح باسماء اصحابها و ادهشتني اكتر بحكاية قرطاس الاسمنت ده , كيف يعني قرطاس من الاسمنت؟ حسب علمي انو عندنا مصنعين للاسمنت في السودان عطبرة و ربك و الاتنين ما قادرين يكفوا غابات الاسمنت الملت العاصمة المثلثة , كيف يصنعوا منهم قراطيس للتسالي ؟ و الدهشة الاكبر كانت انو حلتكم عندها ريحة اما فيما يخص سؤالك عن ريحة الاحياء الان فأظن و الله اعلم انو ده بسبب التلوث الكبير الحصل في الجو بسبب دخان السيارات و المصانع بعد ان دخل السودان مرحلة الاستهلاك . اتمني ان تتواصل إتصالاتك يا ود التوم و حكاويك عن حلتكم ام ريحة
يبدو انو البرنامج وصلني بالعديد من الاصدقاء القدامي , عرفتك يا ابوالليف من صوتك , الخير ده منو ؟ فعلا ريحة سوق القماش و بالة القطن لكن يا هاشم ما اعتقد انو الاختفاء بسبب الملابس المستعملة , في ظني انو القصة دي بسبب تراجع تجارة القماش امام باب الاستيراد و السوق المفتوح , في حاجة مهمة اظنك نسيتها في وصفك , ريحة الارض قدام دكان القماش المرشوشة بالموية و باقي كبابي الشاي الشربها سيد الدكان و صبيانو
اتصال آخر من المغرب العربي الشقيق من صديق البرنامج طارق جبريل , و عندي ليك يا طارق سؤال واحد و اتمني انك تجاوبني بصراحة .. انت كنت في المدرسة زمن كان نشيد العلم علمي انت رجائي ؟ و قاعد معانا ليك سنين هنا و عامل فيها مواليد 64 ؟
معانا اتصال جديد من الجميلة لدن جعفر , بنحييها و بنتمني ليها اعوام كلها حب و سعادة و بقول ليك يا لدن انو فعلا دي ملاحظة ذكية جدا , نحن كشعب سوداني حافظنا علي العلاقة بين الحب و حاسة الشم عندنا و تناقلناها جيل بعد جيل و دي في ظني عادة جميلة اننا نحب الحب الواحد ده بي انفنا, يعني حبيبتك او زوجتك بكون عندها ريحة مميزة في انفك اما قصة الحب بالاضنين ده موضوع مختلف عن موضوع حلقتنا لكن قطع شك حا نطرقوا في حلقة لاحقة و العلاقة بين الحب بالسمع و الحب بالشوف و الاحساس . بشكرك تاني كتير يا لدن و بتمني انك ما تنقطعي مننا و بنهديك اغنية غرد يا حمام كلمات و الحان شيخنا محمد علي الامي و غناء طارق ابوعبيدة.
| |
|
|
|
|
|
|
|
|
|
Re: خدر FM (Re: خدر)
|
نعود مع صديقي بخاري الامين و اماتنا و حبوباتنا البقالدونا و يشّمونا, طريقة شم الجنا سواء كان ابن او ابن اخ او اخت او خفيد , عادة اصيلة عند بعض القبائل السودانية و هي تلخص جوهر موضوعنا لحلقة اليوم , الاعتقاد السائد عند تلك القبائل ان عادة الشم تعبير عن الحنية و المحنة بتشمم الطفل او الصبية او الصبية وده تعبير ما اظنو موجود الا عندنا السودانيين. و للاسف نحن في سودان اليوم لاذالت تلك العادة مستمرة لكن من الزوجات في اطار حملات التفتيش علي ملابس الازواج
ردود سريع لتلغرافات اصدقاء البرنامج
في إنتظارك يا ابوالليف و حكاويك الطريفة
نعد يا دكتور امجد ببث اغنية مشرع الحلم الفسيح لاحقا
خالتنا دومة , سعيد انا بمرورك و شهادتك الكبيرة في حقي و انت من الاسماء البنفخر بيها و بنعتز انهم سودانيين معانا , شكرا يا ستنا.
العزيز كمال سالم خصنا بآنسرماشين شحمان جدا , شكرا ليهو و شكرا لتزكيرنا برائحة الطلح و الشاف و الروائح السودانية الاصيلة و نهديك في المقام ده طريقة تحضير خمرة الصندل السودانية
Quote: تخلط جميع المواد الناشفة مع بعضها في وعاء وتعجن بالصندلية وتلصق (تلخ) على جوانب الوعاء المستدير وتدخن بالشاف في نار هادئة .
كلما تدخنت العجينة وتحول لونها للون احمر داكن تقلب ثم تعجن بالصندلية وتلصق على جوانب الوعاء وتعرض للدخان وهكذا تتكرر العملية مرة بعد مرة حتى تتشبع برائحة الدخان.
ترفع العجينة من الدخان وتوضع في زجاجة وتصب فيها كل الروائح السائلة وترج جيدا وتوضع مغلقة في مكان دافئ لمدة أسبوع على الأقل حتى تتخمر.
منقول |
و نستقبل الان المكالمات من جديد
الووو ..
منو معاي !!
| |
|
|
|
|
|
|
|
|
|
Re: خدر FM (Re: خدر)
|
الو
استاذ خدر
معاك امجد مرة تانية ...
كنتا داير اسأل من تحليلك للوضع الحالي في المنبر
و كيف ترى افاق الخروج من الازمة اذا كنتا شايف انو في ازمة بالاساس
و شكراً
| |
|
|
|
|
|
|
|
|
|
Re: خدر FM (Re: خدر)
|
اهلا و سهلا صديقنا حاتم الياس المحامي و شيخ العرب , و شكرا لتزكيرنا برائحة الفصول و السعف و الكنب و طموح التلامذة آنذاك . فيما يخص رائحة الحرمان ما عارف اقول ليك شنو لكن في ظني ككائن أنفي اي استخدم انفي لقاء حوائجي انو الحرمان عندو رائحة , الفكرة عندي يا حاتم مرتبطة بالجو البنتابك فيهو احساس محدد, مكونات المكان من اثاث - الجغرافيا - الطقس الجوي - الخ , الحاجات دي كلها قطعا ستؤثر في قرار انفك بتحديد الرائحة المرتبطة بإحساسك . عشان كده انا شايف انو الحرمان عندو رائحة و اظن عندو طعم برضو ولا شنو ؟ نسمع منك و من السادة المستمعين مداخلات و ارآء اخري حول الحرمان و سعيد بإتصالك و إنشاء الله القميص الاهديتو ليك زمان داك لسه شغال معاك كويس
و لدينا اتصال من الصديق ياسر بيناوي من ابوحمد و هو بحكي في تداعي جميل عن ابوحمد في خمسينات القرن الماضي و اختراع السكة حديد و ثقافة القراية الحّل محلها في عالم اليوم الانترنت و التلفزيون , حكي جميل يا استاذ بيناوي , شكرا علي التداعي و تلك الرائحة. في إنتظار عودتك يا ياسر و ما تطول الغيبة .
الصديق جمال سعيد صاحب المحطة الاذاعية الصديقة (راديو مزيكا سودانية) علي الوعد معك بتقديم سلسلة حلقات خدر FM من استوديوهات المحطة بأمستردام قريبا , الدفع طبعا باليورو يا جمال و الحوافز اوع تعملها لينا جبنة و لبن
وليم اندرية , صديق البرنامج اهلا و سهلا و سعيد جدا بإنفعالك مع البرنامج و سعيد انو حلقة اليوم ادتك زخات من الحنين للزمن القديم و بالمناسبة دي ها اهديك و اصدقاء البرنامج اغنية مفاجأة , و هي اغنية تعود الي ثمنينات او سبعينات الالفية التانية علي ما اعتقد , اغنية يا بلدينا من الحان و كلمات الاستاذ انس العاقب و المفاجاة انها بصوتو في تسجيل نادر حصلت عليهو خدر FM من صديق البرنامج الإذاعي المخضرم ابراهيم حمودة و اتمني انها ترجعك و مستمعينا لي زمن جميل
تلغرافات
الصديق ابوحسين ما تعمل لينا مشاكل مع المخرج بلاهي و تقطع عيشنا
حبيبنا عمران شكرا علي بخور التيميان و المبخر و العطور النثرتها لينا في المكان و شكرا كتير يا فنان
| |
|
|
|
|
|
|
|
|
|
Re: خدر FM (Re: خدر)
|
...
خدر؟؟؟
ياخ ..دا برنامج عجيب ...فيهو كم ريحه..
تذكر ريحة إمتحان الشهاده ..؟؟ْ
آآي إمتحان الشهاده الواحد دا .. إمتحان الشهاده حق سنه سادسه..ياخ دا ما كان عندو ريحه براها ...؟؟؟
لي قدام شويه كدا .. ريحة معرض الخرطوم الدولي ..متذكر ريحتو كيف ..؟؟ رحلة المدرسه لبري ..؟؟
بعد داك ... ريحة... الإنتفاضه ..متذكرها ؟؟
ما البمبان .. الإنتفاضه زااتها متذكر ريحتا كيف ...؟؟
| |
|
|
|
|
|
|
|
|
|
Re: خدر FM (Re: Osama AbdelAziz Eltayeb)
|
الو استاذ خدر:
معاك الصاوي من امريكا:
في البداية بحب اهنيك على البرامج الشيق الرجعنا لزكريات جميلة
وبحييك لأنك فعلاً قدرت من خلال برنامجك ومشاركات المشاهدين تثبت انه
حواس الإنسان بتضع بصماتها على التاريخ والزكريات و المواقف وترتبط
بها بل وتغلفها باغلفة الشوف و السمع و الشم و الإحساس ..
اسامة عبد العزيز ده ذكرني بي ريحة الحبر الفي اوراق الإمتحانات، الإمتحانات زمان
كانوا بيكتبوها باليد في ورق الشمع وبيطبعوها بواسطة لف الشمعة في ماكينة الرونيو
وفعلاً كان عندها ريحة مميزة مربوطة بإحساس بالخوف و الرهبة من الإمتحان نفسه ..
سوق ام درمان كان عنده مجموعة روائح مميزة تبدأ من التيمان و انت داخل السوق
من الناحية الشرقية حيث تصلك رائح البخور و البهارات و الدويات وانت على بعد اكثر
من ثلاثين متر، ثم مروراً بسوق الجلود ورائحة العماري الممزوجة برائحة الطين المتعفن
وتدخل شوية جوة السوق بتجيك رائحة الجلود المنبعثة من دكاكين صانعي المراكيب ودكاكينهم
ذاتها ضيقة و رطبة و ارضيتها في العادة رملية او مضفورة طوب احمر و هي الأخرى عند رشها
تنبعث منها رائحة مميزة، وتدخل شوية لي زنك الخضار وده كمان ريحتو براها وشوية شوية
تدخل سوق الطواقي حيث الحبوبات يجلسن ويبعن الطواقي و الملافح و العمم المطرزة و الحبوبات
ديل بتشم فيهم ريحة محافظهم جمع محفظة و ينطقونها "محفضة" و احياناً "مفحضة" و المحفضة لمن لا
يعرفها هي اشبه بالجزلان "اوعى تقولوا لي الجزلان ذاتو شنو؟" وهي مصنوعة من الجلد و تربط على
خيط طويل سميك و احمر داكن في العادة ويعلق على الرقبة ويتدلي حى يقارب القدمين، وللمحفظة
الجلدية رائحة مميزة خاصة عندما تتبلل بالعرق و ترتبط عندي بإحساس غريب و مفرح وكنا عندما
تفتح احدى حبوباتنا محفظتها امامنا نفرح لأنه هذا يعني انه في قرش او قرشين في الطريق الينا
تعرف يا خدر بمناسبة الحبوبات دي حبوبتي فاطمة ام امي الله يرحمها كان عندها خاصية عجبية جداً
والله العظيم وانا صغير في الشتاء لما كنت اجي ارقد في حضنها بلقاها دافية
وفي الصيف بلقاها باردة Air conditioner عديل كده، حتى اطلقنا عليها لقب الدافية
| |
|
|
|
|
|
|
|
|
|
Re: خدر FM (Re: elsawi)
|
| Quote: اتصال آخر من المغرب العربي الشقيق من صديق البرنامج طارق جبريل , و عندي ليك يا طارق سؤال واحد و اتمني انك تجاوبني بصراحة .. انت كنت في المدرسة زمن كان نشيد العلم علمي انت رجائي ؟ و قاعد معانا ليك سنين هنا و عامل فيها مواليد 64 ؟ |
عاد يا الحبيب سويتها شينة
هسي انا كان مواليد 64 موش كان اترحمت من كرت السفر بتاع التجنيد
لي هسي ادفع فيه ياخي
| |
|
|
|
|
|
|
|
|
|
Re: خدر FM (Re: elsawi)
|
معانا إتصال من صديق البرنامج امجد بسأل عن حال المنبر اليومين ديل , و رغم انو ده ما موضوع الحلقة لكن حا اجبر بخاطرك يا امجد و احاول اجاوب ليك , خدر FM يستحيل انها تتخلي عن اصدقاءها. المنبر ده يا امجد انا شايف انو كل يوم ماشي وراء علي المستويين الفني و النوعي , علي المستوي الفني زي ما شايف اخونا بكري ابوبكر كل يوم بقصقص في المنبر شوية. علي المستوي النوعي كل الناس بتقول انو المنبر بقي طارد , طارد موش لانو مافيهو كواليتي بالعكس المنبر لسه فيهو كواليتي جيدة من الكتاب و الناشطين و اصحاب المبادرات و النكتة الطريفة لكن, آفة المنبر في ظني هي السياسة و الناشطين سياسيا, المنبر العام بقي زي (ابيي) سكان ابيي قدروا يحلوا خلافاتهم و يتعايشوا سلميا لفترة طويلة جدا من الزمن قبل مجي الانقاذ (رغم المشاحنات البتحصل من آن لاخر) , لكن بمجي الانقاذ ذادت حدة الإحتقان وده الحاصل في سودانيزاونلاين اسه , منسوبي الوطني ,المنبر بالنسبة ليهم كعكة ابيي و يجب السيطرة علي الرأئ العام فيهو حتي لو بأضعف الاسمان - إحتلال الصفحة الاولي و طرد المساهمات الاخري اي كان نوعها ثقافي او سياسي او اجتماعي للصفحات التالية - و طبعا لن نتوقع انو منسوبي التنظيمات السياسية التانية يقيفوا مكتوفي الايدي , الشعبي و حركات دارفور و الحركة الشعبية و بقية احزاب المعارضة بردوا الصاع صاعين إذن زي ما شايف في الصفحة الاولي فاليتنافس المتنافسون. الصراع ده هو البسوق للإختلاف و الشتائم و كل زول بي ادواتو . الجاهل لمن تختلف معاهو بمشي طوالي لي اهلك و امك و ابوك و اخواتك و مرتك و العاقل صوتو ضعيف طبعا دائما. صعب جدا في يا دكتور امجد انك تحدد سقف للإختلاف او الصراع السياسي في سودانيزاونلاين لانو ده بعتمد علي ثقافة المختلف + وعيو + البيئة النشاء فيها. الشخص البطئ التفكير واضح و معروف لكل ذي عين لكن المشكل في الكادر السياسي المختلف البلجاء لاسلوب الشتم و السب سواء بسليقة تعّود عليها او بتكنيك عالي هدفوا إقصاء المختلف من الصراع بإرهابو و شتمو في صمة خشمو. خلاصة كلامي يا صديق البرنامج امجد انو المنبر العام لسودانيزاونلاين هو اخفاق جديد انا بضيفو لي اخفاقات المعارضة المتواصلة منذ مجي الانقاذ لانو منسوبيها بستجيبوا لاستفزازات و تحرشات منسوبي الوطني (البياكلوا عيشهم من العكننة علي الخلوق دي هنا) , مما يعني عندي مباشرة ضعف روئية منسوبي المعارضة و عدم وضوح خطهم و برنامجهم لطرح افكارهم او مقارعة و فضح المؤتمر الوطني و كوادر انقاذه.
إتصال مفاجاة من الصديق العزيز اسامة عبدالعزيز , والله يا اسامة لمن المخرج كلمني انك علي الخط ما صدقت اصلا , اولا ياخي حمدلله علي السلامة و بركة الشفتك اونلاين تعافر مع المواطنيين و تتواصل معاهم و نعرف خبارك و نطمئن عليك و تانيا يا اسامة ياخ لاني مشتاق ليك جدا و تالتا لاني ماشبعت من الونسة معاك في بيت الفنون قبل شهور و ما اتلاقينا تاني , اسامة عبدالعزيز الاخوة المستمعين من قدامي الاصدقاء و لنا حكايات معا و الكثير من الاصدقاء , يا اسامة والله العظيم شكرا كتير علي اتصالك و ظهورك في اسافير الله اكبر دي و سعيد انك جيتنا بي ريحة الامتحانات و الانتفاضة و معرض الخرطوم الدولي و البنات في رحلات بري
نطلع في فاصل صغير و نعود
| |
|
|
|
|
|
|
|
|
|
Re: خدر FM (Re: خدر)
|
الو خدر FM مرة اخري
ياخدر بالله ماتنسو لينا ريحة عواسة الحلومر ياخ
بتزكر الوالدة ( اسوية بت حاج مكي ) الله يديها العافية
لمن تجي للوالد الله يديهو العافية برضو
وتقول ليهو دايرين دويات رمضان
فيرد لها رد رباطابابي قح : القال ليكي رمضان دا عيان منو ....؟
ونغوص في موجة من الضحك المعافى
ويرسلوني دكان بكري الماحي واجيب الحاجات
انا غايتو هسة ما متزكر منهم غير القرفة والغرنجال
ويتلمو نسوان الحلة بعد مانكون جهزنا الزريعة والدويات عل قول الحاجة
ويجوا يكوجنوا العجين
وبعد يومين يجوا للعواسة
ومع اول طرقة تظهر تلك الريحة الخاصة
ويا سلااااااااااااااااام
ولانسي ايضا ريحة الحوت العميان
في ايام الدميرة في يوم محدد ينتظرة الناس
وهو يوم الحوت العميان له رائحة لاتنسي
وتظهر في بدايته اهم علامة وهي سراطين البحر التي تخرج لليابسة
ومجرد ماظهرت يعني ان الحوت العميان علي وشك الوصول
نقوم جارين ونطلع رؤوس المنازل او المخازن حيث كنا نضع كرابلنا
والكربلة عبارة صنارة كبيرة جدا تصنع محليا
ويستخدم الكربل فقط يوم الحوت العميان
وبمجرد وصول الحوت العميان وهو سمك يطفو علي سطح الماء نسبة لارتفاع نسبة الطمي
والكل خائض في البحر بحثا عن الاسماك الكبيرة والجيدة
حيث كنا نحن الشباب المفتحين نحظي بالدبس والكابروس وعين العجل
اما الصغار والناس المابيعرفو العوم يصدون فقط
الكناكيج ( القراقير ) والعر
وتاني يوم البحر ينحسر بصورة كبيرة وتظهر علي الطين
كمية من الاسماك الميتة
وتملا الرائحة الكريهه اجواء تلك المناطق
خالص الود
| |
|
|
|
|
|
|
|
|
 Re: خدر FM (Re: ياسر بيناوي)
|
خدر وكل المعاه ازيكم
بالله يا خدر تذكرواريحة القطر وانت مسافر من الخرطوم للابيض ياخى دى ريحة غريبة خلاص
بجاى شمام وبجاى سمك وريحة بطاطين وشكلة بين اتنين نايمين
والحديد ماشى وبرسل الحانةغريبة
وكنا بنغنى مع كل حركة لعجلات القطر اغنية معينة وبنلقاها لافقة
ياخى انتو بتجننونا بالذكريات دى .
ياخدر معاى اختى عايزة تشارك ممكن
والله انا دايرة اقول ليكم ود الحاولاى قال لحن سال من شعرها الذهب فى القطر
بالله لاحظوا معاى للحن ده
بتى برضو
تشارك
ازيك يااستاذ ممكن اطلب
غنية
الحب والظروف بالله
شكرا وناس حلتنا كلهم بسلموا عليك
| |
|
|
|
|
|
|
|
|
|
Re: خدر FM (Re: tayseer alnworani)
|
يا خدر سلام و على ذكر الروايح أنا في ريحتين ما بنساهم ريحة أمي (اللة يمتعها بالعافيه حيث أجريت لها أمس عملية تغير ركبة) ، أمي مولعة جدا بالعطور وخاصة الدخان كانت عندما تضربني بدل أجري منها بحضنا و أتكرف الريحة تخيل نحن مساكين كيف يعني ألوكت الوحيد البتسمتع فيه بحضن أمك تكون بتاخد علقة لكن نحن كنا عشرة شياطين. الريحة التانيه ريحة السلطه الخدرا لمن تقطعها أمي بتكون ريحتا دخان دخان.
| |
|
|
|
|
|
|
|
|
|
Re: خدر FM (Re: Afraa Sanad)
|
الاصدقاء طارق جبرين و بيناوي و تيسير النوراني و عفراء سند , سأعود للرد عليكم قبل بداية الحلقة التانية من خدر FM . الاستوديو كلو في حالة تجهيز لموضوع الحلقة التانية , اعفوا لي رجاء حتي اعود
| |
|
|
|
|
|
|
|
|
|
Re: خدر FM (Re: خضر حسين خليل)
|
Quote: رابطة الدخينات الأدبية
---
كان ماشكرتنى تانى بابضرب |
هههههههههههههههههههههههههه
خدر يا صديقى ما سمعت اى اغنية اتصلح معانا ياخى
نزل الاغانى بى شيتن معروف عشان نسمع
| |
|
|
|
|
|
|
|
|
|
Re: خدر FM (Re: tayseer alnworani)
|
يا الصاوي ياخي انت عشان فنان و الفنان ده زي الام قلبوا بشوف . سعيد بي توضيفك و ال>كريات السكبتها لينا دي يا فنان و اطمنك اني لمن دخلت في طاحونة الهجرة دي كان واحدة اصحابي في السفر مفحضة حمراء جاتني هدية من صديقة عزيزة و كنت معلقها في الحيطة بتاعت البيت في امستردام و كانت بتحصل علي اكبر نسبة من التعليقات و الاسئلة من زواري الخواجات و كانوا مندهشين جدا انو كيف زول يستحمل حاجة طويلة زي دي مدلدلة بين رجلينو و هل ما بقع لمن يمشي ؟ تحياتي يا الصاوي ليك و لاهلك و نسأل الله لحاجة الدافية الدفء في القبر زي ما كانت بتديكم ليهو و انتو اطفال .. شكرا يا صديقي علي الاتصال.
طارق جبرين صديقنا المطموس , سعيد انا بإتصالك مرة اخري , كرت السفر بتاع التجنيد ده موش الأقنعت الموظفة انو راجلها قريبك وانها هي ذاتها قريبتك ؟ . يا طروق ذكريات المدارس و الطوابير و ريحة غبار كرعيننا و شكلهم و نحن ماشين في طابور طويل من الحاجات الما بتتنسي ابدا, انت ليه بالمناسبة دي طيش الفصل دايما بكون ريحة هدومو سندوتشات و زيت و قراصة نبق ؟
بناوي من ابوحمد. انا اسلافي برضو من مناطق نهر النيل لكن حدي كان الباوقة , مبيريكة ما وصلتها فعلا الريحة العالقة في ذهني عن المناطق ديك هي ريحة السمك و النيل , النيل عندو ريحة بالمناسبة ريحة جميلة زي ريحة الهواء البتلفح وشك وانت قاعد جنبو و احيان اخري ريحتو بتكون سمك و طيب , النيل عجيب يا بناوي و قصتو كبيرة , ياريت نقدر تنحكي عنو في حلقات لاحقة . شاكر اتصالك يا صاحب الدبس و العجل و الكابروس
صديقة البرنامج تيسير النوراني جاتنا و معاها ريحة القطر و موسيقاه, بالنسبة لي يا تيسير ذكريات القطر مرتبطة لي عربية النوم , انا ولد موظفين و خدمة مدنية و {التسريح ] و ريحة البيض و الدجاج المحمر و ملفوف في المناديل عشان الزيت يتصفي منو و اغاني القطر كانت من اجمل الاغاني و صوت الصنفور و ريحة الزيت و الباكم , عطبرة ريحتها ورش و حديد و زيت قطارات و كلها روائح جميلة , شكرا يا تيسير علي الذكريات و تحياتي لي ناس حلتكم ام ريحة
عفور ربنا يوالي الوالدة بالعافية و يبلغها الصحة اجر و كفارة يا ستنا و ما تشوف شر انشاء الله , ضحكتيني بي فكرة الدقة و الجرية العكسية دي و طبعا معروف بكون اخد اكبر نصيب في الدق التمام اماتنا ديل كوم براهو يا عفراء , تتزكري ريحة الشملة بتاعت الدخان حقت اماتنا و حبوباتنا ديك ؟ في الغالب بتكون ريحة المخزن الفيهو الكرور في البيت شملة شملة , دي ذكريات جميلة يا عفراء و سعيد بي اتصالك المليان دخان و ريحة , عطرتي البرنامج يا ستنا و شكرا كتير
خضر حسين , حا اجيك بهناك في بوست وزارة الثروة الحيوانية.
يا تيسير الاغاني كلها مسموعة , حاولي راجعي جهازك. اما اخونا ود الياس ده داير لهو حلقة براهو لي خفة ظلو و حكاويهو و قصصو الجميلة.
| |
|
|
|
|
|
|
|
|
|
Re: خدر FM (Re: خدر)
|
صباح الخير متابعي المحطة , الساعة الان صباح يوم غائم في سماء امستردام , ابث لكم الحلقة اليوم من كافية عتيق في جخانين امستردام المدينة القديمة , يدخل الزبائين علي دفعات الي الكافية و الويتر الشقراء الجميلة تبتسم في وجه الجميع و رائحة القهوة تعبق في المكان و من راديو عتيق يصدح صوت Christina Aguilera الشابة الامريكية العشرينية بالاغنية التي كانت سببا في شهرة صاحبتها ذات الصوت القوي و المطرب قبل تسعة اعوام
What a girl wants
What a girl needs
كلما استمعت لتلك الاغنية الجميلة , تتسع دائرة دهشتي و حيرتي و احيانا ضحكي الهستيري حين تصل كرستينا للمقطع البقول
A girl needs somebody sensitive but tough
Somebody there when the goin' gets rough
Every night he'll be giving his love
To just one girl
Somebody cool but real tender too
Somebody, baby, just like you
Can keep me hangin' around
With the one who always knew
و ده موضوع حلقتنا اليوم , البنات ديل عاوزين شنو ؟
كيف يعني رقيق و حساس و قاسي في نفس الوكت ؟
كيف يعني بدي إحساس و حب يوميا و كأنما ده دورو الرئيس في الحياة , الرجل ده ما انسان يا بنات , و طاقتو محدودة , ولا شنو ؟ تحضرني الان طرفة عن زوج جاهو حرامي في البيت و اتقبض و سجنوهو في القسم, الزوج تاني يوم مشي قسم البوليس عشان يقابل الحرامي القبضوهو بسرق من بيتو , الضابط في القسم قال ليهو مافي طريقة تلاقيهو إلا بعد ما نحولوا للنيابة بكرة , الراجل قال ليهو يا جنابو انا ما داير منو حاجة كتيرة بس عاوزو يوريني كيف قدر يدخل البيت بدون ما مرتي تصحي , انا لي سنين طويلة بحاول اعمل الحركة دي و ما قادر لحدي اسه . نستقبل مكالماتكم الان و ياريت نستقبل مكالمات اكتر من اخواتنا و زوجاتنا و اماتنا عشان اهلنا قالوا سمح الغنا من خشم سيدو. للمشاركات و المشاركين البتعذر عليهو الاتصال يمكنهم مشاركتنا علي الايميل [email protected] . نستريح شوية مع عز الدين هلالي و الاستاذ يوسف الموصلي في {إنت لي}
| |
|
|
|
|
|
|
|
|
|
Re: خدر FM (Re: Elmosley)
|
لا تنسوا ريحه اللبن المقنن
مع الزلابيه
والزيت البيبقي في يديك بعد ما تأكل الزلابيه
وما تنسوا ريحه
ساندوتش سلطه الأسود والطعميه في محطه شندي
| |
|
|
|
|
|
|
|
|
|
Re: خدر FM (Re: فدياس نجم الدين)
|
من عطبرة نحي خدر ونهدي اغنية المسافرة الجاهلة يا حليلة وراها انا ما بنوم ليلة
نرسل سلامي الى الداخلة
التي احسست انها كشت في زيارتي الاخيرة .. اصبحت الشوارع ضيقة وقصيرة
واكتشفت انه دكان الابي ما بعيد ذلك البعد الذي استحق كل تلك المفاريك التي كسرت
في شخصي لرفضي المراسيل اليه.
واكشتفت انه البحر فركة كعب ولا ادري لماذا كنا نراه بعيدا
حتى الحيط ما طويلة ذلك الطول..
بالجد كراع الزول الكبير بتفرق من كراع الزول الصغير بمسافة فرسخ او نحوه..
| |
|
|
|
|
|
|
|
|
 Re: خدر FM (Re: د.نجاة محمود)
|
الو خدر
كيف يعنى البنات عايزات شنو؟ عايزات حاجات بسيطة شديد
عايزات , واحد زى أبوها هادىء ورايق وصوتو براحة , يسمعا ومايقاطعا كلو كلو, يشوفا أحسن بت فى الدنيا وجمالا مافى منو اتنين. يعنى لو أبوها عمرو 60 سنة لمن أنت جيت عليك بأخلاق رجال الستين " إتصرف أن شاءالله تشتريا من السوق".
عايزات, واحد يحبها زى حبيبا بتاع المراهقة داك , يقيف قداما خاضع ذليل , يتصل فى كل رأس ثانية عشان يسالا : أنتى كويسة حسة؟ وهى لابتكون عيانة ولاحاجة, تتأخر على المواعيد ولااايزعل بس أول من يشوفا جاية من هناك يبتسم بوشو كلو.
عايزات, واحد كمراسل القنوات التلفزيونية , يحكى اييييي شى وياويلو لو نسى شى , ح تصنفو طوالى وقرون إستشعارا تشتغل اتوماتيكلى.
عايزات, واحد ماعندو علاقة بالبنات , وبيشوف كل البنات شينات حتى ولو كانت Yolanthe Cabau . ومافى حاجة أسما صحباتى ولا زميلاتى , نهائى.
عايزات, واحد ظريف وراقى وماعندو اى مشكلة مع زملاء دراستها او زملاء العمل.
عايزات , واحد زى البنك , كل ماتقول ليو ماشة السوق , يقول ليا عايزة كم ؟
عايزات, واحد أصلو مايجيب ليا سيرة أمو واخواتو,
فى زى 100 حاجة تانية بسيييطة بتصل تانى وبقولا , رصيدى كمل حسة.
حسة دى صعبة؟!؟
| |
|
|
|
|
|
|
|
|
|
Re: خدر FM (Re: د.نجاة محمود)
|
عذرا يا اصدقاء المحطة للغياب القسري , الدنيا اليومين ديل فيها إنتفاضات في تونس و مصر و الاردن و اليمين و البعض يتوقع انو السودان يُصاب بالحمي دي قريبا, اجهزة البث في المحطة كانت مشغولة الفترة الماضية بتغطية آراء الشوارع العربية .. اتمني ان تجدوا لنا العذر فيالانقطاع و الغياب عنكم.
____
صديق البرنامج فدياس , حمدالله علي سلامة العودة , فقدناك يا سيدي والله , عودا حميدا يا فنان. حسب رواية اخونا المنصور المفتاح في منبر السروراب , بشائر فرح هو اسم حركي إختفت خلفه الشاعرة سحر ميسرة الحاج و كتبت به الكثير من الاغاني من بينها عزاز علينا - يسلم لي عوض التي تغنت بهما ندي القلعة مؤخرا , نازك دهب تغنت بها بشكل جميل ايضا بمصاحبة الاسرة الفنية الرائعة. سعيدين بي إتصالك فدياس و بفيديو نازك الجميل.
الموسيقار و استاذنا يوسف الموصلي خصنا بإتصال جميل , الاتصال ريحتو ون مان شنو بسبب دستة الصناديق الشايلها معاهو , دي شيلة منو يا استاذ يوسف الاتناشر دي ؟ حقو والله نطلع اشاعة انك حا تتزوج عشان سكينة تقلعك باسووردك . سعيدين يا استاذ يوسف بزيارتك و نتمني انك تشاركنا بي تجاربك الثرة و قصصك الجميلة في برنامجنا في قادم الحلقات .
و اتصال حنين من مدينتي الحنينة عطرة من الصديقة نجاة محمود ,تعرف يا نجاة موضوع إختلاف المسافات بسبب الغياب او نمؤ الانسان موضوع مهم جدا و اتمني انو نتناولوا في حلقات قادمة. القصة دي بتحصل لي كتير لمن ارجع السودان من رحلة خارجية و بالذات لو كانت من العالم الاول .. كل المسافات بتتقلص و بتصغر , دايما انا بقول انو القصة دي عندها علاقة بالعين و الشوف وانت الليلة اضفت فكرة جديدة -فكرة السن و نمؤ البني ادم و ده انترستنق برضو .. اتمني ان لا تنقطعي و تواصلي معانا و تحياتي لاهلي في عطبرة مدينة الحديد و النار و لكل الناس , شكرا كتير يا نجاة علي الاتصال الحميم
| |
|
|
|
|
|
|
|
|
|
Re: خدر FM (Re: خدر)
|
سنعود بعد قليل لمواصلة النقاش حول موضوع الحلقة الجديد (البنات عاوزين شنو ) و سنبدأ بإتصال الصديقة ندي الدسم
Quote: الو خدر
كيف يعنى البنات عايزات شنو؟ عايزات حاجات بسيطة شديد
عايزات , واحد زى أبوها هادىء ورايق وصوتو براحة , يسمعا ومايقاطعا كلو كلو, يشوفا أحسن بت فى الدنيا وجمالا مافى منو اتنين. يعنى لو أبوها عمرو 60 سنة لمن أنت جيت عليك بأخلاق رجال الستين " إتصرف أن شاءالله تشتريا من السوق".
عايزات, واحد يحبها زى حبيبا بتاع المراهقة داك , يقيف قداما خاضع ذليل , يتصل فى كل رأس ثانية عشان يسالا : أنتى كويسة حسة؟ وهى لابتكون عيانة ولاحاجة, تتأخر على المواعيد ولااايزعل بس أول من يشوفا جاية من هناك يبتسم بوشو كلو.
عايزات, واحد كمراسل القنوات التلفزيونية , يحكى اييييي شى وياويلو لو نسى شى , ح تصنفو طوالى وقرون إستشعارا تشتغل اتوماتيكلى.
عايزات, واحد ماعندو علاقة بالبنات , وبيشوف كل البنات شينات حتى ولو كانت Yolanthe Cabau . ومافى حاجة أسما صحباتى ولا زميلاتى , نهائى.
عايزات, واحد ظريف وراقى وماعندو اى مشكلة مع زملاء دراستها او زملاء العمل.
عايزات , واحد زى البنك , كل ماتقول ليو ماشة السوق , يقول ليا عايزة كم ؟
عايزات, واحد أصلو مايجيب ليا سيرة أمو واخواتو,
فى زى 100 حاجة تانية بسيييطة بتصل تانى وبقولا , رصيدى كمل حسة.
حسة دى صعبة؟!؟ |
حتي ذلك الحين نترككم في إستراحة مع الشيخ عمر البنا و غناء طارق ابوعبيدة في أغنية سيد الروح
| |
|
|
|
|
|
|
|
|
|
Re: خدر FM (Re: خدر)
|
خدر يا ريحة دعاش سبق المطر وانشره
خدر نسمة خريف ساعة الصباح انفره
خدر يا قمرا ضحك اظهر جمالو ووره
مودتي
| |
|
|
|
|
|
|
| |
خدر
omer osman
خضر حسين خليل
khatab
عمران حسن صالح
ALZOLZATOO
بدر الدين اسحاق احمد
ABUHUSSEIN
محمد المرتضى حامد
ندى عثمان حسن
Mohammed Awad
يوسف الولى
Emad Abdulla
طارق جبريل
بخاري عثمان الامين
Amjed
doma
كمال سالم
حاتم الياس
ياسر بيناوي
جمال سعيد
willeim andrea
Osama AbdelAziz Eltayeb
elsawi
Afraa Sanad
فدياس نجم الدين
Elmosley
الرشيد ابراهيم احمد
فيس بوك
تويتر
انستقرام
يوتيوب
بنتيريست