|
|
 موقف عجيب , عجيب ساي ياخي تحفة
|
بتي الصغيرة علي اعتاب الروضة والمدرسة , اها اخوكم ما وطني غيور , لاحظت اليوم داك البت بتردد ليها في نشيد اطفال من احدى القنوات الفضائية الشامية , يعني نشيد بالشامي وطبعا اخوكم جنه وجن الجماعة ديل كمان البت تتكلم لي شامي بعد ما جاطت لي اللغة العربية الفصحى , اها فكرت وقدرت ثم فكرت تاني قلت البت دي لازم ابدا معاها من الزيرو , قلت ابدا بالقران امها كتر خيرها شغالة معاها في الاتجاه دا وحفظتها سورتين تلاتة , اها قلت شنو الما بتلقاهو في المدرسة , لقيت ليك نشيد العلم بتاعنا الحاجة الوحيدة الما بدوها ليها في المدرسة لو دخلت مدرسة سعودية او عالمية في المملكة , فلت شنو يا اساسي اضرب ضربة استباقية وحفظ البنية نشيد علم امها وابوها وجدودها , اها جيت متحفذ وناديتها قلت ليها تعالي يا بت : اها وبديت ليك معاها وهي تردد وراي
نحن جند الله جند الوطن
إن دعا داع الفدا لن نخن
نتحدى الموت عند المحن
نشتري المجد بأغلى ثمن
هذه الأرض لنا
طــــــــــــق
قعدت اتلفت 
باقي النشيد !!!
صدقوا نسيتوا ليكم
البت راجياني اكلمل ليها وانا قاعد اتلفت
هي يا اساسي يا وطني يا غيور نشيد العلم !! راح وين ؟
اتصرفت سريع عشان اطلع من الموقف الدقيق دا ناديت امها قلت ليها انا بديت معاها لحدي هنا اها انت واصلي ليها
الحمد لله طلعت حافظاهو والا كان بطيارة بكرة خميت عيالي وعدت ادراجي
الحمد لله ربنا يسر لينا قوقل عشان يدعم وطنيتنا شوية والا ما كنت استدركت بقية الابيات التي تقول
فليعش سوداننا علماً بين الأمم
يا بني السودان هذا رمزكم
يحمل العبء ويحمي أرضكم...
ــــــــ
الحاجة الوحيدة البشكر عليها وزارة التربية والتعليم في السودان انهم ما الزمونا بحفظ كامل القصيدة واكتفوا بالمطلع فقط فبقيتها كان يستلزم الاحراج للرئاسة زات نفسها والذي يقول
نحن أسد الغاب أبناء الحروب
لا نهاب الموت أو نخشى الخطوب
نحفظ السودان في هذي القلوب
نفتديه من شمال أو جنوب
بالكفاح المُرُّ والعزم المتين
وقلوب من حديد لا تلين
نهزم الشرَّ ونجلي الغاصبين
كنسورٍ الجوِّ أو أُسْد العرين
ندفعُ الرّدَى
نصدُّ من عدا
نردُّ من ظلم
(عدل بواسطة اساسي on 01-16-2011, 10:29 AM)
|
|
  
|
|
|
|
|
|
|
 Re: موقف عجيب , عجيب ساي ياخي تحفة (Re: اساسي)
|
.
.
.
كعبة البشتنة
والبركة في (ثورة الإنقاذ) الجنبك
الهبت ونجدتك
يا اخي الغربة كربة والله
والله الواحد قرب ينسى نفسو ذاتا
خايف يجي علينا يوم الواحد ينادوهو باسمو ما يرد
عشان بكون نسى اسمو
يا اخي ربنا يعتقنا منها
وييسر لينا أمورنا في بلدنا المنكوبة دي
و
سلام يا صاحب
| |
|
|
|
|
|
|
|
|
|
Re: موقف عجيب , عجيب ساي ياخي تحفة (Re: محمد عبدالرحمن محمد)
|
الوطني الغيور صاحب البوست
تحياتي لك ولأسرتك الكريمة والطفلة الصغيرة التي بدأتم معها مشوار الوطنية. جاء في مداخلتك أن تتمة النشيد كانت كالتالي
Quote: يا بني السودان هذا رمزكم
يحمل العبء ويحمي أرضكم... |
وأنا أعتقد أن في هذه الأبيات خطأ شائع. فما معنى أن الرمز، وهو في هذه الحالة العلم، يحمل العبء ويحمي الأرض؟
أعتقد أن تركيبة البيت الصحيحة هي:
يا بني السودان هذا رمزكم
فأحملوا العبء واحموا أرضكم
دورها مرة أخرى في عقلك وابحث فيها ربما اقتنعت بوجود الخلل في الرواية الشائعة للنشيد.
تحياتي لك مرة أخرى.
| |
|
|
|
|
|
|
|
|
|
Re: موقف عجيب , عجيب ساي ياخي تحفة (Re: اساسي)
|
Quote: نحن جند الله جند الوطن
إن دعا داع الفدا لن نخن
نتحدى الموت عند المحن
نشتري المجد بأغلى ثمن
هذه الأرض لنا
|
الاخ العزيز الكوز اساسي
سلام
قال هذه الأرض لنا قال
من المسؤول عن نفصال ارض جنوب السودان
من تخلى عن ارض حلايب من دون انى يرف له جفن
من باع الوطن لاجل الجلوس على سدة حكم السودان الى الابد
المسؤول عن انفصال الجنوب هى سياسة الخداع والفساد التى عاش فيها السودان على مدى عشرين عاما ذاق خلالها الشعب السودانى ابشع انواع الظلم
من تخلى عن ارض حلايب هو الذى ظل يكذب على الشعب السودانى واعدنا بدولة الحق والقانون التى اكتشف العالم اجمع انها دولة الظلم والفساد
اليوم يفصل الجنوب لينجو من مايسمى بالمحكمة الجنائية اذا انفصل الجنوب هل سيكون آخر انفصال فى السودان ؟
| |
|
|
|
|
|
|
|
|
|
Re: موقف عجيب , عجيب ساي ياخي تحفة (Re: يحي ابن عوف)
|
اقترح يا اساسي انك تحفظ البت بعد نشيد العلم النشيد أدناه
تماشياً مع الواقع
من سجن لبيت اشباح
وعطالة ودم مباح
ومذلة تودي الغربة
والغربة جراحا جراح
ـــــــــــ
باقي النشيد ممكن تستعين بي قوقل ولا أقول ليك استعين بمعاوية عبيد
تحياتي لك وللاسرة
| |
|
|
|
|
|
|
|
|
|
Re: موقف عجيب , عجيب ساي ياخي تحفة (Re: عبدالفتاح أبوشيمة)
|
الأخ أساسي ده موضوع مهم وجميل للغاية لأنو فعلاً أولادنا نحن المغتربين يكاد يكون علاقتهم بالسودان والوطنية ذي علاقتهم باللغة الصينية ونتمنى أن نجد وقت ونحزو حزوك في زرع بذرة الوطنية في نفوس أبناءنا ورد الله غربتك وغربتنا جميعاً ...
تحياتي : ياسر العيلفون
تخريمه : يا أساسي فيك ملامح من صديق عزيز علي إسمه نبيل من بري إمتداد ناصر هل قريبك ،، ؟؟؟؟
| |
|
|
|
|
|
|
| |
اساسي
بله محمد الفاضل
محمد عبدالرحمن محمد
يحي ابن عوف
خضر حسين خليل
عمران حسن صالح
داليا الكباشى
عبدالفتاح أبوشيمة
ياسر السر
فيس بوك
تويتر
انستقرام
يوتيوب
بنتيريست