|
|
 ولمن ستقرع اجراس كنائس الخرطوم ؟! .. ثررة حميمة (سناء جعفر )
|
كان يا ما كان .. في قديم الزمان .. وسالف العصر والأوان .. وطن اسمه السودان .. كان اكبر الأوطان .. وكان أحلى الأوطان .. كان حنوناً ومضيئاً .. شماله بنكهة النيل والنخيل والصحراء .. وجنوبه جنات من عسل اسود بنكهة زهور خط الاستواء ..شرقه بنكهة القهوة والقاش والجبال .. وغربه بنكهة المردوم وعصيدة الدخن .. كان وطن سمته التنوع والتعدد .. وميزته تمازج كل النكهات وتعايشها بجانب بعضها البعض .. كان وطن فكرته الأساسية أن لا غنى عن أي نكهة وإلا اختلت ( تتبيله ) هذا الحيز المكاني واختلف طعمه الفريد .. كانت أجراس كنائسه تصدح متجاورة مع أصوات المآذن .. وكان حامل الصليب يسير ويجلس ويأكل ويشرب مع حامل القرآن .. وكانت كل الفروقات تذوب أمام قيمة الإنسان كانسان .. بعيداً عن اختلاف السحنات والأعراق والأديان .. ثم أتت قبيلة الغربان .. غزت البلاد وأخضعت العباد بالبارود البمبان .. أشعلت النعرات .. غرست فسائل الفساد .. وأغرقت الأرض بفيضان من الدماء والأحقاد .. كانت قبيلة الغربان تنعق بالخراب كل صبح ومساء .. تبشّر بالدمار .. تكرّم الأشرار وتقتل الأخيار ..
وتداعى الوطن .. من شماله لجنوبه .. ومن شرقه لغربه .. أصبح كتلة من لهب وحفرة من نار .. تباعدت النفوس .. تباغضت القلوب .. ووصل الحال إلى حافة الانفصال .. لم تعد ميري تجالس عشة .. ولم يعد اوهاج يصادق اسحق .. واختلف محمد احمد مع عثمان .. لم يعد الوطن وطناً .. وقريباً قد يفقد صفة الأكبر بين أوطان الأفارقة والعربان
يا ترى كيف حيكون شكل خريطة السودان من غير الجنوب ؟! .. كيف حيكون طعمه بعد ما يفقد واحدة من احلى نكهاته ؟! .. كيف حتبدو الشوارع من غير جون وانجلينا وجيمس واشوال ودينق ؟! هل حتبكيهم البيوت السكنوها ؟! .. ولا حيبكوهم الجيران الفارقوهم بلا عودة ؟! .. هل حتفتقدهم أماكن تجمعاتهم في الاسواق والحواري والازقة ؟! .. هل حتسال عنهم البصات الركبوها .. والشوارع المشوا فيها ؟! .. ولمن ستقرع أجراس كنائسهم بعد رحيلهم ؟
خلوني احكي ليكم حكاية .. في نص حلتنا كان في بيت ساكنين فيه جماعة من أهل الشام الاستقروا في السودان من زمن بعيد وبقوا حاملين جنسيته .. كانوا مستأجرين البيت من أسرة معروفة في الخرطوم .. بعد فترة اشتروا قطعة ارض في منطقة جديدة .. بنوها .. ورحلوا من جنبنا مخلفين وراهم فراغ عريض .. وسيرة بيت مسكون بالجن والعفاريت من كترت ما قعد فاضي سنين طويلة .. ما كان في زول من الحلة بتجرأ يدخل البيت البدت حيطانه تغطس جوة الارض .. وبقت شجرة التمر هندي الكبيرة الرامية فروعها في الشارع ضل مهجور حتى الكلاب ما بستظل بيه
وفي يوم من الأيام أصبحت الحلة ولقت باب البيت المسكون مفتوح .. وخشم بابه مقشوش ومرشوش .. وقدامه عيال صغار .. أتخلعت الحلة .. ومن كل بيت ظهر نفر عاوز يشوف منو الناس الطالعين من البيت المسكون .. بالأول خافو منهم .. قالو ديل أكيد جن أتشكل بصورة ناس .. لأنه مستحيل بني آدم عادي يقدر يسكن في مكان ما فيه نور ولا موية وكمان سقفه قرب يطبق على أرضه .. ومع تزايد اللمة طلع من البيت المسكون راجل طويل نحيل .. لونه زي الليل .. وجبهته مدقوقة برصة بديعة من الدوائر المتشابهة .. ابتسم لناس الحلة الفضوليين .. سلم عليهم .. وقال أنا اسمي ( قرويش ) ودي مرتي ( سارة ) وديل عيالي .. واحنا حنسكن في البيت دة ..
واتملت الوشوش بمشاعر شتى .. خوف ..دهشة .. استهجان .. رفض .. قبول .. ارتياح ..
ساق قرويش عياله ودخل البيت وخلى ناس الحلة واقفين يتشاوروا في الأمر الجلل .. كيف يعني جنوبي يجي يسكن وسط الحلة ؟! .. دة أكيد حيجيب كل بلاوي الدنيا معاه .. اكيد حيبيع العرقي ويدس الحرامية وي###### الشارع .. نعمل شنو ؟! .. نبلغ البوليس ؟! .. نحاول نتصل بأسياد البيت ( أسياد البيت ما كان في زول عارف ليهم طريق ولا ظهر منهم زول من سنين ) .. نعمل شنو ؟! ... نطردهم بالقوة ؟! .. نكلم اللجنة الشعبية ؟! .. واستمر الأمر بين اخذ ورد .. وفي النهاية قرروا ناس الحلة انهم ينتظرو شوية لغاية ما يشوفوا آخر الزول دة شنو
في أول إجازة مشيتا السودان بعد ما قرويش احتل في البيت المسكون لقيت بته الصغيرة ( توج ) قاعدة جوة بيتنا وبتلعب مع أولاد اختى الصغار .. ولقيت انه ( سارة ) ولدت وجابت بت سمتا ( سلمي ) تيمناً بأختي الكبيرة لأنها بقت صحبتهم وبتمشي ليهم وبجوها .. ولقيت أولاده كل يوم قبل ما يمشوا الدكان الصباح بجوا يسالوا أمي ( حبوبه ما عاوزة حاجة من الدكان ؟! ) .. لقيت قرويش كل يوم بجي يخت موبايله في الشاحن عندنا لأنه ما عندهم كهرباء .. ولمن يكونو أهله جايين من الجنوب وعندهم لمة بجو العيال يشيلو مننا كراسي الحديد .. اكتشفت انه كل الحاجات الزايدة في بيتنا بقت مخزنة في بيت قرويش .. ولقيت انه كل الحلة أتعودت عليهم وبقوا مبسوطين بقعدتهم وبقوا يستشهدو بنضافتهم واحترامهم لجيرانهم .. وبقولو انه الحلة بقت أمان اكتر من يوم ما قرويش جا فيها .. ولقيت انه البيت المسكون بقى اسمه بيت قرويش ..
هسة يا ربي كيف حيبقى شكل حلتنا من غير قرويش وسارة وتوج وسلمى ؟
أتعودت كل ما امشي إجازة السودان .. لازم ازور المكان الاشتغلت فيه قبل الرحيل لأني كونت فيه صداقات صمدت في وجه البعد والغربة والتواصل المتقطع .. ولأنه عندي فيه ذكريات جميلة مع ناس حلوين ..أول ما أتعينت في شركة عبد المنعم الصناعية والهندسية أتعرفت ( بجميس لولو ) الفراش ومسئول الكافتريا .. كان حجمه ضئيل لكن قلبه كبير .. بعمل أحلى شاي كركدي واطعم قهوة فيها وش معتبر .. بقابلني بابتسامة جميلة .. وكان الصباح ما بكتمل إذا ما سمعت نقنقته بالعربي المكسر .. شلنا معاه هموم البقر الناقص لمن كان عاوز يعرس .. وشاركناه النقاش في محاولات زوجته للإنجاب .. وكنا بنشفق عليه من المشاوير البعيدة لأنه ( ضعيف وكملان من لحم الدنيا ) ..
ومع لولو كان في ( بولين ) ود قبيلة الزاندي بلونه الفاتح وملامحه المصمتة وباله الماهل وطويل زي السلبة .. كان طول الوقت بهرول ما بين الشركة والبنك وهو يحمل مئات آلاف من المبالغ النقدية التي تودع أو تسحب حسب الاحتياج .. وكان هناك أيضاً ( جون داقي ) بقامته الفارعة ولونه الفحمي وابتسامته الناصعة .. كان المندوب السامي للشركة في حملات توزيع الشمع وجمع ( الغلة ) .. كانت ثقة صاحب الشركة فيه مضرب مثل ... ثم أخيراً ( تولبرت ) المحاسب الشاطر خريج الجامعة المثقف الذي يملك أراء واضحة في مشاكل الشمال والجنوب .. كان يبجل الدكتور جون قرنق ويؤيد الوحدة ولا يرغب بالانفصال ..
هسة كيف تاني امشي ازور شركة عبد المنعم وما الاقي جميس لولو ولا بولين ولا داقي ولا تولبرت ؟! .. كيف حيكون شكل المكان ونكهته من غير الناس ديل ؟
مرات بفكر انه محاولتنا للتأقلم مع فكرة انفصال الجنوب عاملة زي محاولة مريض السكري التأقلم مع فكرة بتر احد أعضاؤه بالرغم من انه بيكون هو السبب في الوصول لقرار البتر لأنه أهمل العضو وأتعامل معاه بمبدأ حتمية البقاء مهما كانت درجة إهماله وسؤ المعاملة البيمارسا ضده .. ولمن بقى قرار البتر لا رجعة فيه شعر بالندم وبدا يسعى لبقاء العضو وهو ما عارف انه ما حيقدر يتفادى البتر إلا بمعجزة .. وبعد قرار البتر بقى نافذ بدأ يحس بقيمة الجزء الهو حيفقده .. بدا يحس بأهميته .. وبضرورة بقاؤه
جواي أحاسيس متناقضة من فكرة انفصال الجنوب .. حزن في القلب مشوب بفرح طفيف .. حسرة وندم .. هزيمة وانتصار .. الحزن لي لأني حافقد ناس كتار بعرفهم وعاشرتهم .. وكانت بتجمعنا حاجات كتيرة غير الجنسية المشتركة .. حنبقى أغراب رسمياً ... وكل واحد فينا حيشيل هوية مختلفة عن التاني ..
الفرح ليهم لأنهم حققوا أمنية كانت بتداعب خيالهم من سنين .. لأنهم أخيراً حيتحرروا من تبعية وطن حاربهم لكن ما حارب عشان يتمسك بيهم .. ولانهم اخيراً حيتجمعوا كلهم في حيز مكاني واحد .. ولانهم حيصبحوا سواسية كأسنان المشط لا فرق بين اسود واسود إلا بالطول أوالحجم أم الملامح .. ولانهم ما حيحسوا بالدونية .. ولا بالتهميش .. ومافي زول حيقول للتاني ( يا عبد ) .. حيبقى ليهم كينونة .. حيبقى عندهم وطن حقهم براهم .. حيبقوا اسياد روحهم ..
الندم والحسرة لي لأني ما فكرت ولو للحظة إني امشي ازور الجنوب لمن كان متاح وبدون تأشيرة دخول ولا ختم على جواز السفر .. ما فكرت أزوره وهو جزء من وطني .. جزء مني .. وإحساس الهزيمة لي لو جاتني فكرة امشي هناك بعد ما بقيت غريبة .. وأعامل معاملة الأجنبي ..
لكن في نفس الوقت حأهنيهم بانتصارهم على كل العوائق .. وقدرتهم على إنشاء دولة ..
المؤسف في الموضوع انه العالم الأول العنده المقدرة المالية والخبرة السياسية مال لفكرة التكتلات والاتحادات بعد ما عرف فوائد الوحدة الاقتصادية والسياسية .. ألغى الحدود بين بعضه .. حرر التجارة .. وحد العملة .. وبقى قوة لا يستهان بها .. وإحنا المعولقين المسجمين المرمدين جاريين بخطوات واسعة نحو الانفصال عن جزء لا يتجزأ مننا .. وكمان في ناس فرحانة للتخلص من الجنوب بكل ما فيه ومن فيه باعتبار انه عبء حيرفع عن كاهل الوطن .. واظن دة تفكير غبي واصحابه ما بشوفوا ابعد من أرنبة أنوفهم ..
وما زلت انتظر معجزة تلغي قرار الانفصال .. ما زلت أتمنى أن يظل الجنوب جزءا من جسد الوطن نتعهده بالرعاية والاهتمام ونعلن له حبنا وعدم قدرتنا على الاستغناء عنه ..
|
|
  
|
|
|
|
|
|
|
|
Re: ولمن ستقرع اجراس كنائس الخرطوم ؟! .. ثررة حميمة (سناء جعفر ) (Re: abubakr)
|
| Quote: مرات بفكر انه محاولتنا للتأقلم مع فكرة انفصال الجنوب عاملة زي محاولة مريض السكري التأقلم مع فكرة بتر احد أعضاؤه بالرغم من انه بيكون هو السبب في الوصول لقرار البتر لأنه أهمل العضو وأتعامل معاه بمبدأ حتمية البقاء مهما كانت درجة إهماله وسؤ المعاملة البيمارسا ضده .. ولمن بقى قرار البتر لا رجعة فيه شعر بالندم وبدا يسعى لبقاء العضو وهو ما عارف انه ما حيقدر يتفادى البتر إلا بمعجزة .. وبعد قرار البتر بقى نافذ بدأ يحس بقيمة الجزء الهو حيفقده .. بدا يحس بأهميته .. وبضرورة بقاؤه |
| |
|
|
|
|
|
|
|
|
 Re: ولمن ستقرع اجراس كنائس الخرطوم ؟! .. ثررة حميمة (سناء جعفر ) (Re: abubakr)
|
شكراً جزيلاً حبيبنا أبو بكر ...
سناء جعفر كتبت كل ما يجول بخاطري .. بس الحتة دي مبالغة في التطابق مع رؤاي ..
| Quote: المؤسف في الموضوع انه العالم الأول العنده المقدرة المالية والخبرة السياسية مال لفكرة التكتلات والاتحادات بعد ما عرف فوائد الوحدة الاقتصادية والسياسية .. ألغى الحدود بين بعضه .. حرر التجارة .. وحد العملة .. وبقى قوة لا يستهان بها .. وإحنا المعولقين المسجمين المرمدين جاريين بخطوات واسعة نحو الانفصال عن جزء لا يتجزأ مننا .. وكمان في ناس فرحانة للتخلص من الجنوب بكل ما فيه ومن فيه باعتبار انه عبء حيرفع عن كاهل الوطن .. واظن دة تفكير غبي واصحابه ما بشوفوا ابعد من أرنبة أنوفهم ..وما زلت انتظر معجزة تلغي قرار الانفصال .. ما زلت أتمنى أن يظل الجنوب جزءا من جسد الوطن نتعهده بالرعاية والاهتمام ونعلن له حبنا وعدم قدرتنا على الاستغناء عنه .. |
شكراً يا سناء يا رائعة ..
شكراً ليك حبيبنا الباشمهندس أبو بكر ..
| |
|
|
|
|
|
|
| |
abubakr
منتصرمحمد زكى
عبد الله كسلا
فيس بوك
تويتر
انستقرام
يوتيوب
بنتيريست