|
|
 طلال دفع الله عبدالعزيز يهديكم عبري:مـقـاطِـع .. لِـجـون قـرنـق
|
مـقـاطِـع .. لِـجـون قـرنـق
طلال دفع الله
******************
قلع جلد الشلوخ واللون
دخل جلد الوطن والكون
نادى : الوطن كوكب
سمّى الجِنِس إنسان .
سلاحو كان احلام
وبيان ضواهو بيان
حسينا بالفكره
مزروعه في الوجدان
جوانا بالفطره
محتاجه بس إيمان
بى عين يقين الشوق
نلقى الوطن واحد
راجع جديد بنيان
بالعدل والحكمه
وبإرادة الفرسان
**************
رِدْناهو نحنا كتير ..
فارس زمن حارب
قاوَم ضلام الليل ،
رِدناهو حين سالَم
زولاً أصيل وجميل
وعجبنا يوم كالَم
ضي كلمتو القنديل
ولامن رماها بذور
إتشابكت أغصان
ضُلاً وسيع ووهيط
داني الثمار ريّان
شفنا الزمان حاضر
يوم بكره أجمل بان
مالقينا أيّ نشاز
بين رنة الأجراس
وبين رفعة الأذان
أصلو الوطن للكل
والدين وللديان .
*******
قلع جلد الشلوخ واللون
دخل جلد الوطن والكون
نادى : الوطن كوكب
سمّى الجِنِس إنسان .
وبيان وراهو بيان
بى كلمه كلها ذوق
الفكره في الوجدان
يشمخ وطنَّا وفوق
محتاجه بس إيمان
بعيون يقين الشوق
يبقى الوطن ناهض
واجمل جديد بنيان
لو فيهو نتخاوى
نتساوى في الميزان.
*********
دخلت وسيم .. مرقت نسيم
تفوت كيفن
بأسرع من جواد الريح
وداخرنك قفا المايلات
وسترة حالنا في النازلات
وبلسم.. لى جراح هامش
ولى أيام بقن رايحات ؟!!
أقلو أكان
تمِد القعده حد الشوق
وكان أيه يعني
لو عاندتو .. يا محارب
أو فجيتو سجن الموت
وفي إيديك.. قلوب وارواح
عشان تقعد هنيَّه تفوت
فداك كانت إذا حبيت
عشان ما تتم
مشاويرك مشاويرها .
و حَي الحال
و حَي الفال
بعَد خليت وراك البور
بشارة خير وبسمة نور .
فيا بستانو يا مفلوح
بذر جواكَ بذرة روحو
كَبَّ المويه
ما بلَّت حنين التربه
من ريق حرفو بس كبْ راح ،
وياما زمان
وقف زي فارس الفرسان
يقاوم في بساله رياح ؛
يجوز باكر .. تهب إعصار
يجوز باكر توِجَّ النار ؛
وقف ناولنا سيف بتار
سيف
من نبته .. من سوبا ..
وزمان الفونج ؛
من النوبه .. دار الفور ..
من الأمتونج ،
سيف .. كان شايلو
مهدي الله ؛
إعجاز دقنه
وعلي الدَّي نار ؛
موشَّح بيهو .. كان الماظ
علي عبد اللطيف
أبو الأزهار
طه القرشي .. أكتوبر
قرنق جوزيف
فؤاد أبريل
شهيد رمضان
محمد عبدالسلام
وسيمنا البار
شفيع الكُدَّح الأحرار ،
وكانت إيدك الورده
يد مانديلا .. يد غاندي ..
والبرعي .. ونَفَس محمود
بنفس الطِّيب
وكت ما تفوح
بيوت الله بدعا الصالحين ،
تعاليمك
تصحِّي العالم السفلي
سماحة طيب .. عبير آمال
وكانت كلمتك عنبر
معاني العدل والرحمه ..
ورؤى التنزيل
ياها الجاتنا
في القرآن وفي الإنجيل ؛
مَعْبَر .. لى سلام كوكب
يعيش آمن في حضن الكون
حر إنسانو .. متطامن
علي حاضرو وجميل باكرو
وعلي مستقبل الجايين ،
واشهد لسه إنك حي
وشمسك كهربا وأنوار
وغيمتك رشة الأمطار
وزهو الطين
إذا قامت
براعْم الفكره واتسامت :
شدر .. واحات
شدر وارف .. شدر غابات
شدر واقف يلاوي الريح
بلابلو يغنوا متحابين ،
كلام تدخل حروفو الروح
دخول المويه عطش الطين
************
يا هو زولاً .. زيي زيك
بسماتو بتقطِّر عسل
طيب وديد
دمعاتو في حزن الوطن
أقرب إلى حبل الوريد
أحلامو راسمات السلام
كيفن يكون
بالجد .. وصاح ما بالكلام
الخوه والعدل التمام
الحكمه والراي السديد
الحِلْمِ لو صدق الضمير
البلد بلداً جديد .. تصبح أكيد
قِدّام تمِش .. تجدع بعيد
راجنو أيه نبدا العمل ؟!
نصنع تواريخنا ونعيد
نرسم بواكرنا ونشيد
لا طايفه .. راسمال محتكر
لا سُخره لا ساده وعبيد
الثروه لى كل الوطن
والسلطه للبِقدر ويجيد .
***************
ما انحسب ترحل حساب
ويفضل سؤالنا بدون جواب
البلد عشق إبتسامتك
والبساطه الفي الخطاب :
العصافير .. التغنّي
وتاني ما ينعق غراب
الهوامش تبقى مركز
كل قريه تصير مدينه
لاقيه مويه .. وضل وكنبه
لاقيه كُراسه وكتاب ،
الحروب راحت رياحها
وبى وراها انسدَّ باب
الوطن واضحه ابتسامتو
جمَّ نَفَسو من العذاب
يلاّ يا دارفور اقيفي
الدُّواس جاب الخراب
الوطن راجيهو خيرِك
والخضار بدل اليباب
يا شرِقْنا صباحنا منك
ببدا فالنا
ويبقى لو بَرَق السحاب
يا جنوبنا الفي قلوبنا
يبرا جرحك .. تبني صرحك
كم دعيت الله استجاب
***************
وطال وجع المخاض أجيال
سنين مغروسه في الأوحال
خُطاها الكايسه أحلامها
وصلاح الحال.
***************
دخلتَ عليها متأكِّد بأنك صاح
فتح باب الضلام الليل
دخلت عليها ضَي قنديل
وكانت كلمتك مفتاح
وإتنفَّس دِغيشها صباح
فار دم الوطن أزمان
جَبَد نَفَسو الوطن وإرتاح
زمن طلّيت كتاب مفتوح
ملان كلمات كما النغمات
تشد عصب القلِب والروح
تمشي تروح مع المنيات
باكر في السما المفتوح
تكون بين اجمل النجمات
وعاشت حِلمك الممدود
جناح غيمات
مسافر في الخيال صدّّاح
رجع من قلب الفضا الهدهد
نفَض تعب السفر فرحان
وقبْل يرتاح
صدَح بالشافو صاح الصاح
وكان بُشرات:
وطن تاني
وطن شايف ملامحو ملاح
وسيم زي قَلْدَة الحِبّان
وزي صادِق دُعا الأُمات
فرح أطفال
بَعَد ما عانوا حِفظو نشيد
ردّدوا لحنو تاني صباح
وطن صدّاح
وطن مرتاح
*****************
رحيل إسطوري
ورحيل فاجع تراجيدي
أريتو أكان مِلِك إيدَي
أروح أفديك .. أروح بدلك
عشان وطناً .. عرفنا معاك تفاصيلو
وطن للكل .. وسيم آمن
وطن بُكراهو متطامن
وشاهدين .. ما تِعِب صوتك
تغنِّي عليهْ .. وتناديلو
وطن واقع
وما يتوبية الأحلام
حُر إنسانو متطامن
علي دمو .. إختلاف فكرو
علي أديانو متعايشات
كريم اعرافو متحابات
وكم صادحات
أناشيدو ومواويلو
************
لسه في آخر النفق
داخرنك سُتُر حالنا
يا بلسم
جراح الهامش الراجيك
ياخ مالك
تفوت أسرع من برِق جامح
وياخ مالك
إذا فجّيت سحابة الموت
وكانت في منال إيديك
قلوب .. أرواح تفوت تفديك
عشان ما تتمو مشوارك مشاويرها؟!
وداعة الله ووداع الحي
وحي فينا .. وسمِح فالنا
رميت بذرة فجُر باكر
رفعت الفال صِبِح ممكن
قريب .. ومعاك
بعيدو سراب بقى محالنا
شموع الحب .. وشوف نيِّر
تضوي الصاح لأِجيالنا ولآِمالنا
دخلت وسيم
مرق شين الأسى الطالنا
مرقت نِغيم
وبيك حجَّينا أطفالنا
*********
حار ياخوي
إذا فارق لحم ضفرك
فما بالك
فراق الروح جسد منهوك ؟!
****************
يوم ضلعتو الورده
رغم الجراح نابضات
سال الفؤاد دمعات
ورَّتنا بالكلمات
وين سِلْمَن الخطوات
عضّت في قليبها جروح
ركزت أبت ما تبوح
كيف الجميل قد فات
شان البلد ما يكون
دمو الفضل مصيون.
*****************
والجونا خير بوراه
الكانوا ببنوا معاه
درباً عديلو بداه
سندو وسَند يُمناه
وطنو الجديد مبداه
عارفين تمام مبداه
بى روحو راح وفَدَاه
ورّانا قبلِ يفوت
وطناً جديد وهَدَا
نسند بعض صادقين
نبقى المدد والعون
نكدح يسار ويمين
في الليد شليل مضمون
نمشي الطريق الزين
لى باكر الميمون.
*********
قلع جلد الشلوخ واللون
ورّانا نتعايش
كيف المحبه تكون
حق الحُكُم والمال
يبقى الكلام مضمون
الصحه والتعليم
ضُل السكن مضمون
لو يبقن الدستور
نحيا ونعيش بسلام
في جنة المليون
تعرف عيونّا النور
ويصبح عديل الكون.
بلدك بكت
يوم الرحيل
عنك حكت
قالت كلام :
كان الكبير
وكان النفير .. لى حِلْمَنا
وكان السلام .
الغصينات إنتكت
صوت العصافير
يا حبيب
بحَّ وسكت .
عصفوره طارت
في شجونها
وعزَّن دِميعاتها الحمام .
غنى الوطن حد البكا
صنَّ وسكت .
هُدهُد يقينّا الفات رجع ..
قال لليمام :
الحِلِم بذرة حياتنا
قاعده من تاريخ بعيد
تبقى شدره
حديقه نضِرَه
والزَّرَع حادي النشيد ؛
ختَّ ساسو
وكل هامش
علّى راسو
وبى وطن تاني وجديد
إبتدا الحلم التمام .
والغد الهاني السعيد :
وطناً فسيح
وطناً رحيم
لا فيهو سيد ،
فكراً حكيم
راياً سديد
واحد أحد
وطناً رطن ..
وطناً فصيح
وطناً وطن
جوه القلوب
طيب صحيح
وطناً جديد ،
أسيادو ناسو
ووطناً هو سِيد .
الحِلِم كان بذرة حياتنا
قاعده من تاريخ بعيد
تبقى شدره .. حديقه نضره
والزَّرَع حادي النشيد .
بلدك بكت
رجعت حكت
لو مشى وخلاّها أرضو
بور خصيبه السابها برضو
وفالنا في الزمن الجديد .
شوقنا من اشواقو يشكي
نلقه زي أول بساطتو
لما يقعد بينّا يحكي
وطِيبه تِدفَّق حواسو
بسمه سمحه .. وكلمه قمحه
تامي كيفنا
لما يقلدنا ونوانسوا .
***************
سلام .. بى كل لغات الكون
أمان وسلام عليك يا جون
تعرِف .. يا حبيب الناس
بأنك قشة الغرقان
كنت .. ولسه ما زلت
نشَّة دمعة المحزون
لقمة وجغمة الجيعان
بلسم وعافية العيَّان
وفشَّة آهة المغبون .
لأنك في القلوب نابض
ورغم رحيلك الوامض
محلك في الوطن رابض .
هواك شعباً ركض بوراك
وعارف وين معاك راكض
أملنا ونجدة المليون .
وتعرف أيه كمان يا جون ؟!
رحيلك .. عن مكان الكان
وباقي على الزمان حتكون .
|
|
  
|
|
|
|
mekki
فتحي البحيري
فيس بوك
تويتر
انستقرام
يوتيوب
بنتيريست