لماذا يتحدث أبناء المغتربين باللهجة الخليجية ؟ الطالبة (عزة) نموذجا

Quote: والله يا أخي ذكرتني نكتة الخواجة الجابوهو يعلم العوض اللغة الإنجليزية وقال ليهم اقفلوني معاهو في غرفة لمدة شهر بس. ولما انقضى الشهر الجماعة دقوا الباب على الخواجة والعوض، وفي بالهم إنو العوض يكون بقى خواجة عديل كده، ففتح الخواجة الباب وقال ليهم: بتدوروا العوض؟ يا صديقي ظاهرة (كراهية الوطن) والتبروء مما يحدث فيه وبإسمه من النظام الحاكم وطول الغربة بدون أمل عودة في الأفق، وعوامل الإحباط والإنشغال عن الرعاية، ومحاولة التأقلم في المجتمعات الجديدة والنجاح باي ثمن ربما دفعت ابناء وبنات الكثيرين من المغتربين والمهاجرين للخلط بين الإندماج والتكيف في المجتمعات الجديدة وبين أن يحافظ الإنسان على أصالته وأولها اللسان. ولعلهم نسوا أن حتى المجتمعات الجديدة نفسها تحترم أكثر وتقدر الإنسان الذي يحافظ على هويته ويعتز بها لأنها هي التي تميزه عن الآخرين. ولعله من الصعب في هذه الظروف المحبطة أن يحاول الأباء والأمهات في الغربة إعطاء دروس في التربية الوطنية هم نفسهم غير مقتنعين بها فلا أحد مستعد للتضحية بابنائه وتشجيعهم مثلاً على أداء (الخدمة الوطنية) وهو يعلم أنها (خدمة حزبية وليست وطنية) أو يسدد مطالب السفارات والقنصليات وجهاز المغتربين التي لا تنتهي من الأتاوات والضرائب والزكاة الشرعية والغير شرعية. هذه كلها غشارات سالبة في أذهان هؤلاء الأطفال، فلا أحد يستطيع أن يتحدث عن كوننا نموذج إيجابي في اي مجال واقعي سوى أن نتحدث عن مثل عليا وأفكار وأحلام ونماذج متناثرة هنا وهناك وتاريخ سالف وذكريات وعادات وتقاليد واشعار وغيبيات نحاول قسراً أن نربطها بالواقع المرير تكون لنا في النهاية "فكرة الوطن" ولسان حالنا يقول: بلادي وإن جارت عليّ عزيزة وأهلي وإن ضنوا عليّ كرام. ولا أدري لماذا خطرت لي ابيات زهير بن أبي سلمى ومن يغترب يحسب عدوا صديقه .... ومن لا يكرم نفسه لا يكرم . . وكائن ترى من صامت لك معجب .... زيادته أو نقصه في التكلم . . لسان الفتى نصف ونصف فؤاده .... فلم يبق إلا صورة اللحم والدم لكنني متأكد أن هذا الحال سينعدل، مع مجمل أحوال وظواهر أخرى كثيرة سالبة، عندما ينعدل ميزان الحق في الوطن ويسود الحكم الرشيد. وهو ما يجب أن يسعى له الناس بحق، لأنه القضية الأساسية والأولوية القصوى. إلى ذلك الحين دعنا لا نقسوا على من أجبرهم الزمان على تعلم لسان بيئتهم الحالية، فلم يتح لهم الزمان القاسي إلاّ ذلك. وحرمهم حتى من حنان لسان أهلهم وذويهم ورائحة طين بلدهم ودعاشه كما حرمهم من حنين وأحضان حبوباتهم... ولعل هذه لغة أولى حرموا منها قبل اللسان.

Quote: ماهو المقصود باللهجة السودانيه هل تقصد لهجة امدرمان والخرطوم ومناطق الوسط!!! ام تقصد ان هناك لهجه (معممه) يجب علي السودانيين اتقانها ...مع العلم بان هناك لهجات متعدده في هذاالوطن القاره منها لهجة اهل الجزيره ولهجة البقاره ولهجات اهل البطانه واللهجه البدويه....هذا علي اعتبار النقاش محصور فقط علي الناطقين بالعربيه

Quote: موقف اثار اشمئزازى لما صادفتة فتاة فى مطعم تفطر مع واحد اجنبى.. دى ما مالمشكلة .. المشكلة انها كانت تأكل بى شوكة وسكين.. برضو دى ما مشكلة.. المشكلة انها كانت بتاكل باليد الشمال ود ما نهاه الاسلام.. تخيل اقتنصت فرصة وبكل زوق حاولت اشرح القصة.. كان ردها انو هى قاصدة تاكل بالشمال.. وهى كرهت اليوم الاتولدت فيهو فى السودان كمان.. تخيل اتمالكت اعصابى ولعنت ابليس وقبلت مشيت يعنى ترضى الزول القاعد قداما دا ورب العالمين ملحوق... وتقول لى يتكلموا خليجى ليه!!

Quote: الكلام ده في السودان ؟

Quote: وفى لذيذ كمان ايه رايك؟؟

Quote: عزان.. اول حاجه وينو شريط علي المك ؟؟؟

Quote: تعرف يا عزان الامر شائك ومتداخل ولا اعتبر ان ذلك عيب بقدرما هو نتاج الهجرة السودانية الطويلة والمستطيلة ولعل ليس من ذنب على عزة التي تحمل اسم السودان دون ارتباط كبير بثقافة السودان ولعل ذلك يحسب لها فهي ولدت ونشأة وترعرت في ثقافة اخرى هي المتاحة لها بحكم الدراسة والاختلاط وهو اندماج معكوسه الجمود والتحرك في محيط لسان اسرتها فقط , بنتك التي ستنجبها في امريكا ستأتي بملامح ثقافة متعثرة ولعلك شاهدت مقابلات مع سودانيات من امريكا يافعات يتلعثمن بلا قال شقيقهن انهن لا يعرفن اللغة العربية ولا يعرفن عن السودان شئ بل في حساباتنا كدا البسيطة ونحن نتحلق حول التلفزيون وصفناهن( بالعويرات ) لكن المسألة ابعد من ذلك ولعل نائب الامين لجهاز شؤون السودانيين بالخارج في اجتماع لن بوفده قال ان في ليبيا غربة للسودانيين عن كامل الثقافة السودانية ... الشابة عزة انموذج بسيط لازمة الدولة السودانية التي ارهقت كاهل المغترب بكل صنوف الابتزاز وجعلت خياره الافضل البقاء في الغربة مضحياً بالثقافة والانتماء والجذور على رهق مراجعة جهاز المغتربيين وصعوبة الدخول وقساوة الخروج والتواصل فمن الافضل لي ان يعيش اولادي في السودان ويدرسون فيه ويسهُل التواصل بيننا بدل الهجرة والغربة الكامل والانفصال فمن ينفصل لسانه وثقافته وانتماؤه بلا شك اسهامه في البلد وللوطن يكون ضئيل ومنعدم لكن الازمة ليس ازمة عزة صلاح (الشلتو حالها دي ) بقدرما هي ازمة عزة السودانية وسياسات المؤتمر الوطني الاقصائية وعقم وبلادة جهاز المغتربيين .

Quote: فى رأى يجب الإنتباه الى الوسيلة الفعالة فى جعل الابناء أكثر إلتصاقاً و تمسك بلهجتهم من خلال إطلاعهم على برامج اطفال تحمل ثقافة و ذات صبغة سودانية كبرنامج (قطار الزهور) الذى تقدمه قناة الشروق وبرامج أخرى أيضاَ موجودة فى قنوات سودانية مختلفة ، ومن الجانب الآخر أيضاً تقع المسئولية على الأعلام السوداني فى تكثيف البرامج - سوى كان تعليمية او تثقيفية- التى تركز على العامية حتى لا ينصرف أبناء السودانيين الى قنوات تعرض ثقافة خاصة ببلدان أخرى كقنوات" كراميش " و"طيور الجنة" وغيرها . الدور تكاملى والمسؤولية مشتركة حتى نجعل فلزات أكبادنا أكثر حباً للهجتها.

Quote: المشكلة كما تفضلت هي في (طول الغربة) التي تميز السودانيين . . نذهب (لبلاد برة) بلا خطة عمل أو أهداف محددة ، فنصبح أطول خلق الله مكوثا في بلاد الغير . . المصري عندما يذهب للخليج يكون قد وضع لنفسه خطة معينة لشراء الثلاجة والعربة والشقة وبعد إنجاز ذلك يعود لبلده بينما نحن نطيل المكوث هربا من واقعنا الذي تسطره الحكومات المفروضة علينا . . أتمني أن يأتي اليوم الذي يعود فيه الجميع لوطن يحكمه العدل ويعود إليه الجمال

Quote: المناسبة ما نحنا السودانيين المقيمين في الخليج بس البتكلمو لهجة خليجية ، حتى اللبنانيين و المصريين غيرهم بتكلموا خليجي لما يقعدوا كتير في الخليج ، عندي نماذج اصدقاء و زملاء عمل بتكلموا سعودي مع السعوديين ، و بالمناسبة حتى الخليجيين لما يطلعوا من بلدانهم لي مصر او الشام بيحاولوا يتكلموا بلهجة البلد البسافرو ليها ، يبقى الموضوع ما موضوع تنكر للهجة لكن موضوع محاولة اندماج لا ارادي بتحصل للفرد ليسهل التفاهم بينه و بين المجتمع العايش فيه .

Quote: وما تلومونا كان رجعنا البلد نتكلم هندي... يا اخي المصري بيرجع...بي عربيتو وتلاجتو وغسالتو...وبشتري شقتو من غربة تلاتة سنين؟ كدي قول لي السوداني بقدر يسويهن في كم سنة؟؟؟ تشتري قطعة الارض بي تحويشة عشر سنين غربة...وكان جوك ناس الاراضي يبيعوا ليك قطعة ارض الا تسكن جنبك ابليس وبعدا ما تلقي الارض وتفتح بوست خمس سنين لزوم الاستشارة...وتبدأ تبني ولما يأكلوك تقول ليهم اعرشو علي كدي... تشتري العربية...وبطنك طامة من الجمارك...تشتري التلاجة وتصدي في بورتسودان...من فعايل المخلصين والجمارك... يمين الله انا عندي كم حاجة مشحونات خليتن عديل كدي من كترة المزازاة...المخلص ما جاء...وامش ادفع في الشباك دا؟؟؟ وشوف رسوم الارضية؟؟؟ وامش اعمل دمغات في الطلب دا والطلب البعدو...والقطعة دي ما بتخش؟؟ وديك امشي الخرطوم ادفع عليها فرق موديل...وعفشك دا كتير..وليشنو ما ختمت الورق دا في السفارة...لما تطرش عوووووووووووووووووع وتبكي في سرك وتخلي حاجاتك وتشرط ورقك...وتمشي ترطن مع اولادك هندي... ولادي ما بلومن...كان رطنو هندي كان عوجو لسانن...كان اتكلمو خليجي...فد يوم مافي خليجي قال لي امش اعمل دمغة والله ادفع جمارك والله انت منو زاتو؟؟؟ عندي رخصة سواقة هنا ليها عشرين سنة ما طلعتها من بيتنا الا لتجديدها مرتين...

Quote: يجوز جلس في الغربة 3 سنوات

Quote: الغربة بجلسوا فيها هي كرسي؟؟؟ اها نوع جلس دي ياها زاتا البتجيب الكاروشة للبوست وسيد البوست...

Quote: د / عزان سلامات يا أخى هى اجازة كلها كم اسبوع وراجع تانى للوجع حق Baltimore وقدامك قدح قراصة 5 بوصة تقوم يا عزان تتلفت لا من الفاس يقع فى الرأس . .. جميلة الطريقة الخليجية فى الكلام . بس الكلام وقت يصل القراصة يقيف بب . .. سلام وجيب معاك كتب كتب كتب وسلام على نيل بلادى واهلى .

Quote: إنت من رخصتك أم عشرة طلقات دي أكييييد قاعد مع ناس (جالس) وسوق (واقف)،، ذبحونا بيها ناسكم ديل : الفريق جالس يقدم في مستويات جداً ممتازة في (هكذا) مسابقة،،

Quote: قال : اسمع اول حاجة انا كنت بنزل في الشواويل من العربية ومدي ضهري الطلاعة....الزول الدقيتو دا جا ساكت كجر لي واندرشت علي قفاي...ودقيت الدلجة...لامن راسي لف... لعد وعيت لقيتو جنبي اديتو مطرقين فرق اضنيو... كورك وقام جاري لم فيني خلق الله والبوليس...

Quote: يا عزان، كان ممكن تنتقد من غير تجريح، الموضوع دا معروف إنو موضوع شائك، واللوم كلو على الحكومات السودانية الفاشلة التى شردت السودانيين في المنافي. وبعدين ظلمت أهل الفتاة ظلم الحسن والحسين، ياخي ديل سمو بتهم ب"عزة السودان" معقولة يكونوا غير وطنيين؟!

Quote: في ناس كدا بتتعقد لما مغترب يقول ليهم ((السيارة)) ،، يأخ دا موضوع ممارسة يومية لمغترب يجوز جلس في الغربة 3 سنوات بقول (سيارة) زي مائة مرة في اليوم ولو قال عربية في الغربة بفتكروها (العربية أي شي عندو عجلات إلا السيارة وتستخدم في نقل المونة أو نقل العدد أو تستخدم داخل السوبر ماركت والمولات وبعضهم ينطقها عربانة)، يعني مافيها محاولة للتعالي : دي مسألة عقد ليس إلا،،

Quote: المصري عندما يذهب للخليج يكون قد وضع لنفسه خطة معينة لشراء الثلاجة والعربة والشقة وبعد إنجاز ذلك يعود لبلده

Quote: أن أدعو الله تعالى في كُل الصلوات المكتوبة في اليَوم والليلة ، أن < يِشِلْني > أو < يشيل ناس الإنقاذ >

Quote: وللأسرة دور كبير في ذلك

Quote: اكييد ...وللصحبة دور ..

Quote: إذن الموضوع طبيعي وبل أكثر ما دام أنهم يتحدثون العربية .

Quote: أتولدوا فى بلاد الخليج ودرسوا من التمهيدى حتى الثانوى تقريبا هناك أغلب صداقاتهم إن لم نقل كلها وسط المجتمع الخليجى أىا كان ، مراحلهم الدراسيه كما قلت لك ن تفاهمهم وسط زملاءهم وفى الشارع وفى الأسواق ، وفى مختلف مناحى الحياه تكون وسط أناس من أهل البلد ويتكلمون اللهجه المحليه الخليجيه ، يزورون السودان فى الإجازات فقط وإحتمال كل سنتين أو 3 سنوات ولفتره لا تتجاوز الشهرين كأقصى حد فماذا تريد منهم أن يتكلمون ؟؟؟؟

Quote: أن < يِشِلْني > أو < يشيل ناس الإنقاذ >

Quote: أخي عزان هذه المعلومة قديمة جداً وغير صحيحة من الأساس لذا لا يصح الإستدلال بها المغترب المصري مثله من أي مغترب من الدول الأخرى يأتي لتحقيق اهداف معينة ومن ثم يطيب له المقام في الخليج أو في أي مكان آخر وحتى بعد تحقيق هذه الأهداف التي ذكرتها يقيم في هذه الدول لعشرات السنين مثله مثل السوداني والهندي والبنغالي طيلة وجودي في السعودية لم أسمع بأي مصري بمجرد أن حقق هذه الأهداف عاد إلى وطنه بل تمتد فترة الإقامة حتى يقضي الله أمراً كان مفعولا

Quote: يعني عتالي بي مقانص وبخاف من العين!!

Quote: يعني الخلاكم تحتفلوا بلسان سودانيو الغرب الأنجليزي و تستكترو على ناس الخليج شنو؟

Quote: اللهجة السودانية غير معروفة لكل الخليجيين عشان الناس تفهم بعض قالوا المرضان بيكوس الفكي

Quote: عزان سلام عزة صلاح طالبة إعلام متفوقة جداً وصاحبة حضور وشكل مميزان قبل مدة ليست بالبعيدة شاركت الأستاذ السني دفع الله مخرج وكاتب المسرحية الفائزة في مسابقة المسرح الشبابي (أحلام) وهي مسرحية باللهجة القطرية وقد راجعتها لغوياً وبإجادة عزة أي أن عزة تجد نفسها في هذا الإطار وتستطيع من خلالة أن تبدع في أكثر من شيء ولا يحق لي إنتقادها طالما أنا تعمل في ذات الحيز لكن أن تشارك عزة في الفعاليات السودانية باللهجة القطرية فهو الشيء المربك والمحير في آن

Quote: يا عزان... اها هاك دي...الليلة الصباح دا مشيت وصلت بنياتي المدرسة بعد ما البص فاتن...وفي الطريق ضربوا لي ناس المدرسة.. قالوا لي وين يارا...قلت ليهم معاي وماشين علي المدرسة في شنو؟؟؟ ودا اول يوم امشي معاهن المدرسة الصباح..لتزامن مواعيد دوام العمل مع المدرسة... واللي كان بتتكلم معاي دي الناظرة...قالت لي اسرع نحن منتظرينها... اها هنا الشمار كتلني ...قلت انزل معاها اشوف الحاصل شنو؟ ما تكون فلقت ليها بت!!!! نزلت فاذا بالمدرسة كلها مصطفة طابور في نص الحوش...وهناك مسرح ومايكرفون...طوالي ساقوا يارا علي المايكرفون... وبدأت... Good Morning Principal, Teachers & my Please Put your hand down for The National Anthem of India Jana Mana Gana Hokker Jokker Janna Mana Hey والباقين يشيلو معاها بي المدرسات بي منتهي الاحترام دا كلام قبال دا اصلو ما سمعناها قالتو في البيت ولا ورتنا انها بتعرفو...او انو محفظينها نشيد العلم الهندي هسي زي دي كان عندك بتسوي ليها شنو؟؟؟ مع العلم انو مقرراتهم انجليزية وعربي وليس من بينها الهندي... ومع ذلك حافظة نشيد العلم الهندي بي معناه... وكيتا في الناظرة وفي الغربة حفظتها نشيد العلم السوداني وقلت ليها حفظيه الناظرة...وبديها اسبوع واحد كان لقيتا ما حافظاه...بجي انقل بناتي من المدرسة دي وكتبت ليها ما يفيد ذلك...وانا هسي منتظر تاني ستة يوم وحا امشي اسمع لي الناظرة وفي الطابور... نهن جند الله جند الواتان ان دأآ دائي للفداء لن نهن نتهدي الموت اند المهن نشتري المجد بآآقلي تامان هذه الاردو لنا فليأش سوداننا... الخ النشيد...وكتبتو ليها بالحروف الانجليزية كما هو مع شرح لصوت الحروف...

Quote: كما أن المسألة مختلفة تماما ، أمريكا دار (هجرة) وليس دار إغتراب كالخليج ، سودانيون كثيرون هنا ليس لديهم أي نية عودة وصاروا أمريكان . . كما إن السودانيين والخليجيين يتكلمون لغة واحدة (إفتراضا) وهذا غير متوفر هنا . .

Quote: الأخ الكريم عزان سعيد هل هناك شيء اسمه لهجة سودانية (موحدة)؟ كل مداخلاتك فيها تحامل على العرب والعربي ..ليه؟ لا أعتقد أن مسألة اللهجة المستعملة في الكلام موضوع خطير لهذه الدرجة ولا يوجد فيه أي احساس بالدونية ولا الاستعلاء نحن أنفسنا لا نتحدث بنفس مفردات جداتنا.. المسألة لا تدخل في مجال المقارنات بين من كان صاحب الحضارة الأقدم .. أو من هم أصحاب الحضارة الدون.. الطفل المولود وعايش في مجتمع غير الذي ولد فيه والداه يتحدث تلقائيا بلهجة وأحيانا لغة تتناسب مع بيئته الـتي يعيش فيها..اللغة ولهجاتها هي وسيلة تواصل وإذا كانت لهجتي لا تساعدني في هذا التواصل ح أحاول أجعلها تكون بالطريقة التي تسهل لي هذا التواصل. الكثير من المتحدثين بالعربية لا يفهمون لهجتنا ونحن لا نفهم لهجة كثير من العرب وأي لهجة هجين توصلنا إلى نقطة التقاء "حبابها عشرة" وإلا لا داعي للحديث باللغة العربية مع بعض. المشكلة ليست في أي لهجة أو لهجة هجين يتحدثها الابناء.. بل في أي لغة يعرفها وأخرى لا يجيدها الطفل الذي ولد وتربى خارج السودان.. لأن بعض أبنائنا لا يعرفون الحديث باللغة العربية أو لا يجيدونه وهذه مشكلة كبيرة ومصدر قلق للوالدين .. ولا أظن يا أخي الكريم أن الأهل يجب أن يقوموا بفرض اللهجة التي يود الحديث بها الأبناء- ولا حتى اللغة- بفوهة البندقية.. هي خيارات تقوم على أساس المصلحة الظرفية ومن حقهم على الوالدين ألا يفرضوا عليهم لهجة الحديث طالما التزموا بالترفع عن توافه الكلام والعبارات غير اللائقة.. ثم يعني ما الجمال بالله عليك في كلمات آآآآآآي أو هناي أو أهنداك..

Quote: بجانب مهم وفي غاية الاهمية خلال فترة الانقاذ التي اجبرتنا على الهجرة .

Quote: هل هناك شيء اسمه لهجة سودانية (موحدة)

Quote: ده كلام غريــــــــــــــــب وفيه تحيز غير مرغوب فيه... فعلا وصحي صحي..

Quote: لكن, موضوع اللهجة السودانية والتمسك بالتخاطب بيها فى مجتمعات دول الخليج , يحتاج إلى جهد كبير من الأسرة , بالذات للأطفال المولودين فى تلك المنطقة,السودانيين مثلاً فى دولة الإمارات قِلة , مقارنة مع جاليات أخرى , يعنى الطفل السودانى , ممكن يلقى نفسه وحيد فى صف فيه أكتر من 7 جنسيات مختلفة, لو اللغة السائدة فى المدرسة هى اللغة الإنجليزية بكون فى مامن من اللبس دة, لو بتخاطبوا بالعربى بتبدأ هنا المعضلة, يعنى الطفل ماليو يد مباشرة فى الحاصل.