طواقي الخوف ... قصيدة جديدة للشاعر الكبير محمد طه القدال

نعى اليم ...... سودانيز اون لاين دوت كم تحتسب الزميل معاوية التوم محمد طه فى رحمه الله
الاستاذ معاوية التوم في ذمة الله
رابطة الاعلاميين بالسعودية تحتسب الاعلامي معاوية التوم محمد طه
منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 12-12-2018, 09:26 AM الصفحة الرئيسية

مدخل أرشيف الربع الرابع للعام 2010م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
27-12-2010, 02:31 PM

عمر عشاري
<aعمر عشاري
تاريخ التسجيل: 22-08-2009
مجموع المشاركات: 1777

للتواصل معنا

FaceBook
تويتر Twitter
YouTube


طواقي الخوف ... قصيدة جديدة للشاعر الكبير محمد طه القدال

    السلام عليكم

    نهار اليوم شرفني الأستاذ محمد طه القدال

    بإرسال قصيدته الجديده على بريدي الإلكتروني

    هاتفته أساله ...إن كان بإمكاني نشرها على المنبر

    رد قائلا ... أكيد ممكن

    سألته كطفل كبير ...إن كانت جديده حتى اكون اول من ينشرها

    فرد قائلا ...جديدة لنج

    تطالعونها غدا في السوداني

    هذا ما أسميه ...قبل الطبع ...

    .......................

    أستاذي الكبير أسال الله ان يمتعك بالصحة والعافية

    ولعلى بهذه المقدمة لا احتاج إلى الأيقونة المشهورة ...التي تجعل متجاهليها في عداد الهالكين

    فإلى قصيدة شاعرنا الكبير / محمد طه القدال
                   |Articles |News |مقالات |بيانات

27-12-2010, 02:35 PM

عمر عشاري
<aعمر عشاري
تاريخ التسجيل: 22-08-2009
مجموع المشاركات: 1777

للتواصل معنا

FaceBook
تويتر Twitter
YouTube


Re: طواقي الخوف ... قصيدة جديدة للشاعر الكبير محمد طه القدال (Re: عمر عشاري)

    لا علم لي إطلاقا

    كيف قدم الوجه الأخضر الضاحك إلى عنوان البوست

    ربما قصدت ان يكون بعد تعليقي بانني لا احتاج إلى كتابة منقول

    في حقبة الإعتداء على قوانين الملكية الفكرية
                   |Articles |News |مقالات |بيانات

27-12-2010, 02:37 PM

عمر عشاري
<aعمر عشاري
تاريخ التسجيل: 22-08-2009
مجموع المشاركات: 1777

للتواصل معنا

FaceBook
تويتر Twitter
YouTube


Re: طواقي الخوف ... قصيدة جديدة للشاعر الكبير محمد طه القدال (Re: عمر عشاري)

    طواقي الخوف


    ما خايف المطر
    يتحاشى الضهاري الراجية قولة خيرا
    ولا خايف المطر
    يمشي على الصحاري تلمو في بشكيرا
    ولا خايف العشم
    يتناسى العشامى ونيما ياكل نيرا
    ولا خايف النفس
    تتذكر نفسها وتنسى يوم حِدّيرا
    خوفي على البلد
    الطيب جناها وقمنا في خُديرا
    شاحدك يا كريم
    لا تحصل خراب لا أرجى يوم ودّيرا
    ***
    وانا ما بجيب سيرة الجنوب.
    عيال بتسرح للمدارس ..
    والفطور نجماً بعيد.
    بنوت بتجري
    على الخطاطيب الخطاطيف
    البتجرح ..
    والعريس نجماً بعيد.
    الدكاكين التملا تفضي،
    السماسرة يسمسروا،
    والبسفو الطين ..
    يسفوا،
    والبحتّوا الراب ..
    يحتّوا،
    والبناطلين ليها سستم،
    والقوانين ليها سستم،
    البنوك الفيها بستم ..
    من سويسرا ولي ماليزيا
    بالسفارات
    والعمارات
    والخبارات .. .
    انا كنت متغطي ..
    ومتدفي،
    العمة ملوية،
    والشال على كتفي.
    سودان وكان ما كان
    سودان علي كيفك
    السكة ساعة إيد
    والأرض مروية
    والناس حنان وظراف
    والراح يجيك ..
    للحول
    والخدمة مظبوطة
    مظبوطة مدنية
    والدنيا حرية
    الماشي درب الكار يغور
    والتاب من التمباك يتوب..!
    انا مابجيب سيرة الجنوب.
    الغبّوا عرفوهو
    والعرفو سوّوهو
    والسووا بلقوهو ..
    ......
    أصبحت زي الزول
    قادل بوسط السوق
    سروالو نصلوهو
    لو العِرق مسروق
    أو قلبي نشلوهو
    طعم الكضب مسلوق
    ماسخ تضوقوهو
    لو فمي ما مطلوق
    أو كمي غسلوهو
    ياني البسوي القوق
    قولي البتابوهو
    ماعندكم دمي
    ما عندهم دمي
    من دمي لا لا لا
    ماقدروا فصلوهو.

    وانا ما بجيب سيرة الجنوب؟
    قول استقلْ ..
    انا في صفوف الزوق
    واقف مع الواقفين مزنوق بهنِّيهو
    ويهنوهو
    أواستقال ..
    ودا أول الأحزان
    أو قالوا باعوهو
    ودا ياهو قطِّيع القلوب
    أنا ما بجيب سيرة الجنوب،
    فالسيرة كمين ألف عام
    لوني المحرق مندوكور
    وشكلي شكلين
    شكل منقة
    وشكل تور
    دمي المشتت من قبايل نوح وحام
    شعري المقرقد زي حصايا
    اتشتت فوق الدروب
    كتفي المهدل بالعيوب
    وانا ما بجيب سيرة الجنوب
    أصل البقت
    من ساس وسايس أو يسوس
    ياها البقت
    خلونا من حرب البسوس
    الفاضلة
    تكفير الذنوب
    الفاضلة لمليم البشاتن
    والمعاطن
    والخبوب
    الباقي
    مايخموكا تاني على
    الدفافير والكناتر والحروب

    الباقي تعظيم التماسك
    في الخطوب
    لا نافع الشَّدة العلوق
    ولا نافع المبقوص يحوق
    لا بنفعك عَرَق الزنوج
    ولابرقعك لبن العروب
    إلا الوقوف ألفاً ضكر
    واحد براك
    في الشيمة تلفحك الهبوب
    الغيمة تديك
    للسفاسف
    والعواصف
    والمطر
    برطع مع الأفعال
    وادخل على التاريخ
    يغلب أجاويدك
    من قرقريب عوسك
    اخرِج من التاريخ
    شيخك وعربيدك
    لا نافعك التكفير
    ولانافعك التوبيخ
    فامشيه وحيدك
    وامرق على التاريخ
    تلقاه في السهلات
    مستني كمسيدك
    لا بيظلم التاريخ
    ولا يرحم التاريخ
    إياه عوس ايدك.

    والأرض موقوت القنابل
    في الحدود
    والأرض منهبة الثعالب
    والطحالب
    والجيوش
    باليوناميد
    واليوناميس
    والفُرقة بينات القبايل
    والشتايم في المنصات
    والشراكة الفي
    المكايد
    والخناجرفي الحناجر
    والمنابر ..
    آه من تلك المنابر،
    إنداية كرتلة وبنابر
    والجرايد
    داقة طارات المدايد
    الصَدَق في الناس كذوب
    الساسة نِيّام العسل
    بين انتباهة
    وغفلتين
    بين السلاطين والحبوش
    والشلاتين
    والقرايب
    فين حلايب؟
    واللي بنى الأرض كان في الفرض سوداني
    عيني عليها
    اتمزعت
    حتة في قلبي
    وحتة ف غصتي .. تاني
    آدي اسرائيل في النيل
    بكِّيني ولعبطني
    والنيل أدنداني
    إحنا حبايب في الطيّبة والآه؟
    آ.
    غنيلي ورقصني ؟
    طيب.
    بسِّ سمعني آه الآه في وداني.
    ***
    أنقد السُقا وما بينصلح وكَّايو
    وانكشح اللبن ما بينفعِن بكَّايو
    بعدن بى الدروب مابقصِّرِن تكَّايو
    والشاكي النقاص ناقص قمح شكَّايو
    ***
    وانا لا بجيب سيرة الجنوب
    ولا أكلوني
    إذا ما أكلو التور الأبيض ..
    (الأرض في الجزيرة)
    وبدر الله فوق سماهو
    يا ساسا يابساحوتة
    مكوار حبس مياهو
    عطشت قبايل ابقوتة؟
    البودة في خلاهو
    والأرضة في بيوتا؟
    الزول رِبَت كلاهو
    سمينة بي مقوتا
    يا تمت المعاهو
    أو خلصت الحدوتة
    وانا لا بجيب سيرة الجنوب
    ولا أكلوني
    إذا ما أكلو التور الأبيض ..

    ***
    يدر الله يابسلوكة
    سلوكة الجزيرة
    كل يوم فينا بتنتش
    سكك الحديد بي كم؟
    بي كم بيت المفتش؟
    والبيع بيعة عدوكا
    بعت الأرض بترابا؟؟
    باكر تبيع أبوكا
    وان مُتْ من تُخمة باكر
    ناس الشرق يبكوكا
    وناس الغرب يبكوكا
    ناس الشمال يبكوكا
    وناس الجنوب يبكوكا.
    وانا لا بجيب سيرة الجنوب
    ولا أكلوني
    إذا ما أكلو التور الأبيض ..
    ***
    حمدتكم بالجاية
    والجاية فوق الجاية
    وعسكري الجباية
    قلبو الحجر اللداية
    ***
    بشرتكم بالسادة
    والسادة بعد السادة
    وجرادة فوق جرادة
    من دوكة لام كدلدة
    ***
    حمدتكم بالواقعة
    والصاقعة جنب الصاقعة
    مقدودة مالها راقعة
    والدمعة صابة وناقعة
    ***
    بشرتكم بالتوية
    والصبنة لي الدامبوية
    في الحلة دي ام كدوية
    ما تقعدوا شدرة موية
    ***
    والأرض لا حليوة
    ولاها دي الجزيرة
    الأرض أمات الحنين
    لو نقط الضحوي البريق،
    في الحين تبتق شهوتِن.
    تحبل
    كما الأمات
    وتشرق بالوحم
    لو تسعة الميلاد بتمرق بالسنين،
    أو دي الشوارع بالبنات متحينة،
    ترسل تراتيل الخروج في يوم
    وتقطع سرتِن.
    الأرض تعريف الهديل
    هدل الحمام بشري
    وشوق السلام انسان
    بالحيل بيعرف أنَّتِن
    والأرض شافت
    إلا خافت
    من عيون الليل
    تناجي حبيب
    غريب في الليل
    وتفرز غنوتِنْ.
    زي بذرة في جوف الأرض
    أو ضحكة عند طرف القلب
    بتغني لو جات في العيون
    والضحكة لاقت مرقتِن
    الأرض منصوص الضمان
    حضن أمك الدافي وأمين
    ريحة حبيب
    جاياني من شمة حبيبتي وكرفتِن
    لو جاتا في يوم الهموم،
    في الحين تزغرد فرحتِن.
    أو حرقصت فوقها السموم،
    باكر تهبهب نسمتِن.
    والأرض ما بتعرف تنوم
    ترتاح
    وغابت جمتِن
    بس تدِّي مدين للعديم
    بالمدة تحفظ ذمتِن
    ***
    هن مارقات خلاهِن
    ما مارقات بَراهِن

    لي بصاص حِداهِن
    إو قصاص بِراهِن

    هن مارقات تراهِن
    تريانات تراهِن

    الخوف ما حَماهِن
    من شوفة حِماهِن

    طمانات جناهِن
    بي لبنا معاهِن

    يوم الشينة جَاهِن..
    مرقن ليهو جَاهِن

    بالعز المبطَّر
    والزوق الشَفاهِن

    لا حايدات مداهِن
    لا قايدات عماهِن

    وما كشحن بلاهِن
    فوق زولاً أباهِن

    لو الضيم رماهِن
    هِنْ ياهِنْ
    وما هِنْ.
    ***

    وانا لا بجيب سيرة الجنوب
    لاني زول بالمرة خايف
    إلا شايف
    إلا شايف
    إلا شايف
    ***

    أنا شايف المطر
    يتحاشى الضهاري الراجية قولة خيرا
    وانا شايف المطر
    يمشي على الصحاري تلمو في بشكيرا
    وانا شايف العشم
    يتناسى العشامى ونيما ياكل نيرا
    وانا شايف النفس
    تتذكر نفسها وتنسى يوم حديرا
    وانا شايف البلد
    الطيب جناها وقمنا في شدِّيرا
    ...
    ...
    شاحدك يا كريم
    لا تحصل خراب لا أرجى يوم وديرا.


    محمد طه القدال 9/12/2010م
                   |Articles |News |مقالات |بيانات

27-12-2010, 05:17 PM

ناذر محمد الخليفة
<aناذر محمد الخليفة
تاريخ التسجيل: 28-01-2005
مجموع المشاركات: 29123

للتواصل معنا

FaceBook
تويتر Twitter
YouTube


Re: طواقي الخوف ... قصيدة جديدة للشاعر الكبير محمد طه القدال (Re: عمر عشاري)

                   |Articles |News |مقالات |بيانات

27-12-2010, 07:30 PM

محمد عبدالرحمن
<aمحمد عبدالرحمن
تاريخ التسجيل: 15-03-2004
مجموع المشاركات: 9059

للتواصل معنا

FaceBook
تويتر Twitter
YouTube


Re: طواقي الخوف ... قصيدة جديدة للشاعر الكبير محمد طه القدال (Re: ناذر محمد الخليفة)



    الله على الشعر لما يرسم الماساة بحروفو..الله على الشعر لما تنبض
    قوافيه بنض الواقع والحال المائل...الله على القدال لما يسن حروفو
    ويشارك فى كتابة النهاية لهذه الغيبوبة...


    والله عليك ياعمر ياعشارى فقد رديت الينا الروح.
                   |Articles |News |مقالات |بيانات

27-12-2010, 07:47 PM

Farahat Sayed
<aFarahat Sayed
تاريخ التسجيل: 24-04-2005
مجموع المشاركات: 592

للتواصل معنا

FaceBook
تويتر Twitter
YouTube


Re: طواقي الخوف ... قصيدة جديدة للشاعر الكبير محمد طه القدال (Re: محمد عبدالرحمن)

    عليك الله يا عمر عشاري ما تتم جميلك

    وتنزلها هنا بصوت القدال


    لك التحيه ومثلها للقدال
                   |Articles |News |مقالات |بيانات

27-12-2010, 09:10 PM

أيمن التوم حسن
<aأيمن التوم حسن
تاريخ التسجيل: 26-04-2010
مجموع المشاركات: 1067

للتواصل معنا

FaceBook
تويتر Twitter
YouTube


Re: طواقي الخوف ... قصيدة جديدة للشاعر الكبير محمد طه القدال (Re: Farahat Sayed)

    Quote: بعت الأرض بترابا؟؟
    باكر تبيع أبوكا
    وان مُتْ من تُخمة باكر
    ناس الشرق يبكوكا
    وناس الغرب يبكوكا
    ناس الشمال يبكوكا
    وناس الجنوب يبكوكا.


    رشهم يالقدال رشاهم عمى
                   |Articles |News |مقالات |بيانات

27-12-2010, 10:21 PM

عمر عشاري
<aعمر عشاري
تاريخ التسجيل: 22-08-2009
مجموع المشاركات: 1777

للتواصل معنا

FaceBook
تويتر Twitter
YouTube


Re: طواقي الخوف ... قصيدة جديدة للشاعر الكبير محمد طه القدال (Re: أيمن التوم حسن)

    Quote: الله على الشعر لما يرسم الماساة بحروفو..الله على الشعر لما تنبض
    قوافيه بنض الواقع والحال المائل...الله على القدال لما يسن حروفو
    ويشارك فى كتابة النهاية لهذه الغيبوبة...


    العزيز محمد

    شعر مسئول ...يؤرخ للمأساة القادمة
                   |Articles |News |مقالات |بيانات

27-12-2010, 10:30 PM

Yassir Tayfour
<aYassir Tayfour
تاريخ التسجيل: 18-08-2005
مجموع المشاركات: 10897

للتواصل معنا

FaceBook
تويتر Twitter
YouTube


Re: طواقي الخوف ... قصيدة جديدة للشاعر الكبير محمد طه القدال (Re: عمر عشاري)

    العشاري يا عمر
    Quote: طعم الكضب مسلوق
    ماسخ تضوقوهو
    يعلم الله الكيزان ديل كضبهم أمسّخ من موية السعف..
                   |Articles |News |مقالات |بيانات

27-12-2010, 10:47 PM

عمر عشاري
<aعمر عشاري
تاريخ التسجيل: 22-08-2009
مجموع المشاركات: 1777

للتواصل معنا

FaceBook
تويتر Twitter
YouTube


Re: طواقي الخوف ... قصيدة جديدة للشاعر الكبير محمد طه القدال (Re: Yassir Tayfour)

    ياسر

    سلامات ياخ

    مرورك أسعدني ياصديقي
                   |Articles |News |مقالات |بيانات

27-12-2010, 10:48 PM

عمار نجم الدين
<aعمار نجم الدين
تاريخ التسجيل: 19-05-2009
مجموع المشاركات: 826

للتواصل معنا

FaceBook
تويتر Twitter
YouTube


Re: طواقي الخوف ... قصيدة جديدة للشاعر الكبير محمد طه القدال (Re: Yassir Tayfour)

    شكرا ليك
    ياعمر
    شكرا
    شكرا
    شكرا للقدال
    برد قلبنا
    عندما نقول التاريخ يؤرخ هم لا يعرفون ذلك ويعتقدون انه بعيد المنال
    هذا هو القدال يعقد هذه المحاكمة ستظل باقية لتكشف سوأتهم التي ما اجتهدوا
    كي ستروها
    عملوا بكل ما قدرتهم في شان يزلونا
    لكن يهندا ردنا
    فرتقوا البلد
    لكن يهندا تاريخهم امامهم
    مرمطوا بالنساء الارض لكن امهاتنا واخواتنا وخالاتنا مابعرفن الانكسار ردوا الصاع صاعين
    سرقوا البلد ... نهبوا الخير ... خربوا بنية المجتمع .. . ولكن الاصل فيّ وحانعمل
    عشان نرجع بلدنا متل ما كانت قبل مجئ المجرمين ذات
    شكرا يا عمر ويا ريت لو سمعنا القصيدة بصوات القدال
    ربنا يحفظه ويديه العافية

    (عدل بواسطة عمار نجم الدين on 27-12-2010, 11:18 PM)

                   |Articles |News |مقالات |بيانات

27-12-2010, 10:53 PM

عمر عشاري
<aعمر عشاري
تاريخ التسجيل: 22-08-2009
مجموع المشاركات: 1777

للتواصل معنا

FaceBook
تويتر Twitter
YouTube


Re: طواقي الخوف ... قصيدة جديدة للشاعر الكبير محمد طه القدال (Re: عمار نجم الدين)

    عمار ... أيمن ...ناذر ....فرحات

    سلامات يا أصدقاء

    سعيد بهذا الليل الذي نقضيه معا في قراءة قصيدة للقدال


    ساجتهد لإنزال القصيدة بصوت القدال يمكنني تسجيلها ، ومن ثم إنزالها في الموقع

    تحياتي وإحترامي
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de